{"id":"kv7.4","title":"Dānakathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"kv7.4","title":"Dānakathā","units":[{"id":"kv7.4:0","sourceIds":["kv7.4:0.1","kv7.4:0.2","kv7.4:0.3","kv7.4:0.4"],"kind":"text","text":{"pi":"Kathāvatthu\nMahāpaṇṇāsaka\nSattamavagga\nDānakathā"}},{"id":"kv7.4:1","sourceIds":["kv7.4:1.1","kv7.4:1.2","kv7.4:1.3","kv7.4:1.4","kv7.4:1.5","kv7.4:1.6","kv7.4:1.7","kv7.4:1.8","kv7.4:1.9","kv7.4:1.10","kv7.4:1.11","kv7.4:1.12","kv7.4:1.13","kv7.4:1.14","kv7.4:1.15","kv7.4:1.16","kv7.4:1.17"],"kind":"text","text":{"pi":"Cetasiko dhammo dānanti?\nĀmantā.\nLabbhā cetasiko dhammo paresaṁ dātunti?\nNa hevaṁ vattabbe …pe…\nlabbhā cetasiko dhammo paresaṁ dātunti?\nĀmantā.\nLabbhā phasso paresaṁ dātunti?\nNa hevaṁ vattabbe …pe…\nlabbhā vedanā …pe…\nsaññā …\ncetanā …\nsaddhā …\nvīriyaṁ …\nsati …\nsamādhi …\npaññā paresaṁ dātunti?\nNa hevaṁ vattabbe …pe…."}},{"id":"kv7.4:2","sourceIds":["kv7.4:2.1","kv7.4:2.2","kv7.4:2.3","kv7.4:2.4","kv7.4:2.5","kv7.4:2.6","kv7.4:2.7","kv7.4:2.8","kv7.4:2.9"],"kind":"text","text":{"pi":"Na vattabbaṁ—\n“cetasiko dhammo dānan”ti?\nĀmantā.\nDānaṁ aniṭṭhaphalaṁ akantaphalaṁ amanuññaphalaṁ secanakaphalaṁ dukkhudrayaṁ dukkhavipākanti?\nNa hevaṁ vattabbe …pe…\nnanu dānaṁ iṭṭhaphalaṁ kantaphalaṁ manuññaphalaṁ asecanakaphalaṁ sukhudrayaṁ sukhavipākanti?\nĀmantā.\nHañci dānaṁ iṭṭhaphalaṁ kantaphalaṁ manuññaphalaṁ asecanakaphalaṁ sukhudrayaṁ sukhavipākaṁ, tena vata re vattabbe—\n“cetasiko dhammo dānan”ti."}},{"id":"kv7.4:3","sourceIds":["kv7.4:3.1","kv7.4:3.2","kv7.4:3.3","kv7.4:3.4","kv7.4:3.5","kv7.4:3.6","kv7.4:3.7","kv7.4:3.8"],"kind":"text","text":{"pi":"Dānaṁ iṭṭhaphalaṁ vuttaṁ bhagavatā, cīvaraṁ dānanti?\nĀmantā.\nCīvaraṁ iṭṭhaphalaṁ kantaphalaṁ manuññaphalaṁ asecanakaphalaṁ sukhudrayaṁ sukhavipākanti?\nNa hevaṁ vattabbe …pe…\ndānaṁ iṭṭhaphalaṁ vuttaṁ bhagavatā, piṇḍapāto senāsanaṁ gilānapaccayabhesajjaparikkhāro dānanti?\nĀmantā.\nGilānapaccayabhesajjaparikkhāro iṭṭhaphalo kantaphalo manuññaphalo asecanakaphalo sukhudrayo sukhavipākoti?\nNa hevaṁ vattabbe …pe…."}},{"id":"kv7.4:4","sourceIds":["kv7.4:4.1","kv7.4:4.2","kv7.4:4.3","kv7.4:4.4"],"kind":"text","text":{"pi":"Na vattabbaṁ—\n“cetasiko dhammo dānan”ti?\nĀmantā.\nNanu vuttaṁ bhagavatā—"}},{"id":"kv7.4:5","sourceIds":["kv7.4:5.1","kv7.4:5.2","kv7.4:5.3","kv7.4:5.4"],"kind":"text","text":{"pi":"“Saddhā hiriyaṁ kusalañca dānaṁ,\nDhammā ete sappurisānuyātā;\nEtañhi maggaṁ diviyaṁ vadanti,\nEtena hi gacchati devalokan”ti."}},{"id":"kv7.4:6","sourceIds":["kv7.4:6.1","kv7.4:6.2","kv7.4:6.3"],"kind":"text","text":{"pi":"Attheva suttantoti?\nĀmantā.\nTena hi cetasiko dhammo dānanti."}},{"id":"kv7.4:7","sourceIds":["kv7.4:7.1","kv7.4:7.2","kv7.4:7.3","kv7.4:7.4","kv7.4:7.5","kv7.4:7.6","kv7.4:7.7","kv7.4:7.8","kv7.4:7.9","kv7.4:7.10","kv7.4:7.11","kv7.4:7.12","kv7.4:7.13","kv7.4:7.14","kv7.4:7.15","kv7.4:7.16","kv7.4:7.17","kv7.4:7.18","kv7.4:7.19","kv7.4:7.20","kv7.4:7.21"],"kind":"text","text":{"pi":"Na vattabbaṁ—\n“cetasiko dhammo dānan”ti?\nĀmantā.\nNanu vuttaṁ bhagavatā—\n“pañcimāni, bhikkhave, dānāni mahādānāni aggaññāni rattaññāni vaṁsaññāni porāṇāni asaṅkiṇṇāni asaṅkiṇṇapubbāni, na saṅkiyanti na saṅkiyissanti, appaṭikuṭṭhāni samaṇehi brāhmaṇehi viññūhi.\nKatamāni pañca?\nIdha, bhikkhave, ariyasāvako pāṇātipātaṁ pahāya pāṇātipātā paṭivirato hoti.\nPāṇātipātā paṭivirato, bhikkhave, ariyasāvako aparimāṇānaṁ sattānaṁ abhayaṁ deti averaṁ deti abyābajjhaṁ deti.\nAparimāṇānaṁ sattānaṁ abhayaṁ datvā averaṁ datvā abyābajjhaṁ datvā aparimāṇassa abhayassa averassa abyābajjhassa bhāgī hoti.\nIdaṁ, bhikkhave, paṭhamaṁ dānaṁ mahādānaṁ aggaññaṁ rattaññaṁ vaṁsaññaṁ porāṇaṁ asaṅkiṇṇaṁ asaṅkiṇṇapubbaṁ, na saṅkiyati na saṅkiyissati, appaṭikuṭṭhaṁ samaṇehi brāhmaṇehi viññūhi.\nPuna caparaṁ, bhikkhave, ariyasāvako adinnādānaṁ pahāya …pe…\nkāmesumicchācāraṁ pahāya …pe…\nmusāvādaṁ pahāya …pe…\nsurāmerayamajjapamādaṭṭhānaṁ pahāya surāmerayamajjapamādaṭṭhānā paṭivirato hoti.\nSurāmerayamajjapamādaṭṭhānā paṭivirato, bhikkhave, ariyasāvako aparimāṇānaṁ sattānaṁ abhayaṁ deti averaṁ deti abyābajjhaṁ deti.\nAparimāṇānaṁ sattānaṁ abhayaṁ datvā averaṁ datvā abyābajjhaṁ datvā aparimāṇassa abhayassa averassa abyābajjhassa bhāgī hoti.\nIdaṁ, bhikkhave, pañcamaṁ dānaṁ mahādānaṁ aggaññaṁ rattaññaṁ vaṁsaññaṁ porāṇaṁ asaṅkiṇṇaṁ asaṅkiṇṇapubbaṁ, na saṅkiyati na saṅkiyissati, appaṭikuṭṭhaṁ samaṇehi brāhmaṇehi viññūhi.\nImāni kho, bhikkhave, pañca dānāni mahādānāni aggaññāni rattaññāni vaṁsaññāni porāṇāni asaṅkiṇṇāni asaṅkiṇṇapubbāni, na saṅkiyanti na saṅkiyissanti, appaṭikuṭṭhāni samaṇehi brāhmaṇehi viññūhī”ti.\nAttheva suttantoti?\nĀmantā.\nTena hi cetasiko dhammo dānanti."}},{"id":"kv7.4:8","sourceIds":["kv7.4:8.1","kv7.4:8.2","kv7.4:8.3","kv7.4:8.4","kv7.4:8.5","kv7.4:8.6","kv7.4:8.7","kv7.4:8.8"],"kind":"text","text":{"pi":"Na vattabbaṁ—\n“deyyadhammo dānan”ti?\nĀmantā.\nNanu vuttaṁ bhagavatā—\n“idhekacco annaṁ deti, pānaṁ deti, vatthaṁ deti, yānaṁ deti, mālaṁ deti, gandhaṁ deti, vilepanaṁ deti, seyyaṁ deti, āvasathaṁ deti, padīpeyyaṁ detī”ti.\nAttheva suttantoti?\nĀmantā.\nTena hi deyyadhammo dānanti."}},{"id":"kv7.4:9","sourceIds":["kv7.4:9.1","kv7.4:9.2","kv7.4:9.3","kv7.4:9.4","kv7.4:9.5","kv7.4:9.6","kv7.4:9.7","kv7.4:9.8","kv7.4:9.9","kv7.4:9.10","kv7.4:9.11","kv7.4:9.12","kv7.4:9.13","kv7.4:9.14","kv7.4:9.15","kv7.4:9.16","kv7.4:9.17"],"kind":"text","text":{"pi":"Deyyadhammo dānanti?\nĀmantā.\nDeyyadhammo iṭṭhaphalo kantaphalo manuññaphalo asecanakaphalo sukhudrayo sukhavipākoti?\nNa hevaṁ vattabbe …pe…\ndānaṁ iṭṭhaphalaṁ vuttaṁ bhagavatā, cīvaraṁ dānanti?\nĀmantā.\nCīvaraṁ iṭṭhaphalaṁ kantaphalaṁ manuññaphalaṁ asecanakaphalaṁ sukhudrayaṁ sukhavipākanti?\nNa hevaṁ vattabbe …pe…\ndānaṁ iṭṭhaphalaṁ vuttaṁ bhagavatā, piṇḍapāto dānaṁ …\nsenāsanaṁ dānaṁ …\ngilānapaccayabhesajjaparikkhāro dānanti?\nĀmantā.\nGilānapaccayabhesajjaparikkhāro iṭṭhaphalo kantaphalo manuññaphalo asecanakaphalo sukhudrayo sukhavipākoti?\nNa hevaṁ vattabbe …pe…\ntena hi na vattabbaṁ—\n“deyyadhammo dānan”ti.\nDānakathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/kv7.4/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}