{"id":"kv7.5","title":"Paribhogamayapuññakathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"kv7.5","title":"Paribhogamayapuññakathā","units":[{"id":"kv7.5:0","sourceIds":["kv7.5:0.1","kv7.5:0.2","kv7.5:0.3","kv7.5:0.4"],"kind":"text","text":{"pi":"Kathāvatthu\nMahāpaṇṇāsaka\nSattamavagga\nParibhogamayapuññakathā"}},{"id":"kv7.5:1","sourceIds":["kv7.5:1.1","kv7.5:1.2","kv7.5:1.3","kv7.5:1.4"],"kind":"text","text":{"pi":"Paribhogamayaṁ puññaṁ vaḍḍhatīti?\nĀmantā.\nParibhogamayo phasso vaḍḍhati, vedanā vaḍḍhati, saññā vaḍḍhati, cetanā vaḍḍhati, cittaṁ vaḍḍhati, saddhā vaḍḍhati, vīriyaṁ vaḍḍhati, sati vaḍḍhati, samādhi vaḍḍhati, paññā vaḍḍhatīti?\nNa hevaṁ vattabbe …pe…."}},{"id":"kv7.5:2","sourceIds":["kv7.5:2.1","kv7.5:2.2","kv7.5:2.3","kv7.5:2.4"],"kind":"text","text":{"pi":"Paribhogamayaṁ puññaṁ vaḍḍhatīti?\nĀmantā.\nLatā viya vaḍḍhati, māluvā viya vaḍḍhati, rukkho viya vaḍḍhati, tiṇaṁ viya vaḍḍhati, muñjapuñjo viya vaḍḍhatīti?\nNa hevaṁ vattabbe …pe…."}},{"id":"kv7.5:3","sourceIds":["kv7.5:3.1","kv7.5:3.2","kv7.5:3.3","kv7.5:3.4","kv7.5:3.5","kv7.5:3.6","kv7.5:3.7","kv7.5:3.8","kv7.5:3.9","kv7.5:3.10","kv7.5:3.11","kv7.5:3.12","kv7.5:3.13","kv7.5:3.14","kv7.5:3.15","kv7.5:3.16","kv7.5:3.17","kv7.5:3.18","kv7.5:3.19","kv7.5:3.20","kv7.5:3.21","kv7.5:3.22","kv7.5:3.23","kv7.5:3.24","kv7.5:3.25"],"kind":"text","text":{"pi":"Paribhogamayaṁ puññaṁ vaḍḍhatīti?\nĀmantā.\nDāyako dānaṁ datvā na samannāharati, hoti puññanti?\nĀmantā.\nAnāvaṭṭentassa hoti …\nanābhogassa hoti …\nasamannāharantassa hoti …\namanasikarontassa hoti …\nacetayantassa hoti …\napatthayantassa hoti … appaṇidahantassa hotīti?\nNa hevaṁ vattabbe …pe…\nnanu āvaṭṭentassa hoti …\nābhogassa hoti …\nsamannāharantassa hoti …\nmanasikarontassa hoti …\ncetayantassa hoti …\npatthayantassa hoti … paṇidahantassa hotīti?\nĀmantā.\nHañci āvaṭṭentassa hoti …\nābhogassa hoti …\nsamannāharantassa hoti …\nmanasikarontassa hoti …\ncetayantassa hoti …\npatthayantassa hoti … paṇidahantassa hoti, no ca vata re vattabbe—\n“paribhogamayaṁ puññaṁ vaḍḍhatī”ti."}},{"id":"kv7.5:4","sourceIds":["kv7.5:4.1","kv7.5:4.2","kv7.5:4.3","kv7.5:4.4","kv7.5:4.5","kv7.5:4.6","kv7.5:4.7","kv7.5:4.8","kv7.5:4.9","kv7.5:4.10","kv7.5:4.11","kv7.5:4.12","kv7.5:4.13","kv7.5:4.14","kv7.5:4.15","kv7.5:4.16","kv7.5:4.17","kv7.5:4.18","kv7.5:4.19","kv7.5:4.20","kv7.5:4.21","kv7.5:4.22","kv7.5:4.23","kv7.5:4.24","kv7.5:4.25","kv7.5:4.26"],"kind":"text","text":{"pi":"Paribhogamayaṁ puññaṁ vaḍḍhatīti?\nĀmantā.\nDāyako dānaṁ datvā kāmavitakkaṁ vitakketi, byāpādavitakkaṁ vitakketi, vihiṁsāvitakkaṁ vitakketi, hoti puññanti?\nĀmantā.\nDvinnaṁ phassānaṁ …pe…\ndvinnaṁ cittānaṁ samodhānaṁ hotīti?\nNa hevaṁ vattabbe …pe…\ndvinnaṁ phassānaṁ …pe…\ndvinnaṁ cittānaṁ samodhānaṁ hotīti?\nĀmantā.\nKusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṁ āgacchantīti?\nNa hevaṁ vattabbe …pe…\nkusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṁ āgacchantīti?\nĀmantā.\nNanu vuttaṁ bhagavatā—\n“cattārimāni, bhikkhave, suvidūravidūrāni.\nKatamāni cattāri?\nNabhañca, bhikkhave, pathavī ca—\nidaṁ paṭhamaṁ suvidūravidūraṁ.\nOrimañca, bhikkhave, tīraṁ samuddassa pārimañca tīraṁ—\nidaṁ dutiyaṁ suvidūravidūraṁ.\nYato ca, bhikkhave, verocano abbhudeti yattha ca atthameti—\nidaṁ tatiyaṁ suvidūravidūraṁ.\nSatañca, bhikkhave, dhammo asatañca dhammo—\nidaṁ catutthaṁ suvidūravidūraṁ.\nImāni kho, bhikkhave, cattāri suvidūravidūrānīti."}},{"id":"kv7.5:5","sourceIds":["kv7.5:5.1","kv7.5:5.2","kv7.5:5.3","kv7.5:5.4","kv7.5:5.5","kv7.5:5.6"],"kind":"text","text":{"pi":"Nabhañca dūre pathavī ca dūre,\nPāraṁ samuddassa tadāhu dūre;\nYato ca verocano abbhudeti,\nPabhaṅkaro yattha ca atthameti;\nTato have dūrataraṁ vadanti,\nSatañca dhammaṁ asatañca dhammaṁ."}},{"id":"kv7.5:6","sourceIds":["kv7.5:6.1","kv7.5:6.2","kv7.5:6.3","kv7.5:6.4"],"kind":"text","text":{"pi":"Abyāyiko hoti sataṁ samāgamo,\nYāvampi tiṭṭheyya tatheva hoti;\nKhippañhi veti asataṁ samāgamo,\nTasmā sataṁ dhammo asabbhi ārakā”ti."}},{"id":"kv7.5:7","sourceIds":["kv7.5:7.1","kv7.5:7.2","kv7.5:7.3","kv7.5:7.4"],"kind":"text","text":{"pi":"Attheva suttantoti?\nĀmantā.\nTena hi na vattabbaṁ—\n“kusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṁ āgacchantī”ti."}},{"id":"kv7.5:8","sourceIds":["kv7.5:8.1","kv7.5:8.2","kv7.5:8.3","kv7.5:8.4"],"kind":"text","text":{"pi":"Na vattabbaṁ—\n“paribhogamayaṁ puññaṁ vaḍḍhatī”ti?\nĀmantā.\nNanu vuttaṁ bhagavatā—"}},{"id":"kv7.5:9","sourceIds":["kv7.5:9.1","kv7.5:9.2","kv7.5:9.3","kv7.5:9.4"],"kind":"text","text":{"pi":"“Ārāmaropā vanaropā,\nye janā setukārakā;\nPapañca udapānañca,\nye dadanti upassayaṁ."}},{"id":"kv7.5:10","sourceIds":["kv7.5:10.1","kv7.5:10.2","kv7.5:10.3","kv7.5:10.4"],"kind":"text","text":{"pi":"Tesaṁ divā ca ratto ca,\nsadā puññaṁ pavaḍḍhati;\nDhammaṭṭhā sīlasampannā,\nte janā saggagāmino”ti."}},{"id":"kv7.5:11","sourceIds":["kv7.5:11.1","kv7.5:11.2","kv7.5:11.3"],"kind":"text","text":{"pi":"Attheva suttantoti?\nĀmantā.\nTena hi paribhogamayaṁ puññaṁ vaḍḍhatīti."}},{"id":"kv7.5:12","sourceIds":["kv7.5:12.1","kv7.5:12.2","kv7.5:12.3","kv7.5:12.4","kv7.5:12.5","kv7.5:12.6","kv7.5:12.7","kv7.5:12.8","kv7.5:12.9","kv7.5:12.10","kv7.5:12.11","kv7.5:12.12","kv7.5:12.13","kv7.5:12.14"],"kind":"text","text":{"pi":"Na vattabbaṁ—\n“paribhogamayaṁ puññaṁ vaḍḍhatī”ti?\nĀmantā.\nNanu vuttaṁ bhagavatā—\n“cattārome, bhikkhave, puññābhisandā kusalābhisandā sukhassāhārā sovaggikā sukhavipākā saggasaṁvattanikā iṭṭhāya kantāya manāpāya hitāya sukhāya saṁvattanti.\nKatame cattāro?\nYassa, bhikkhave, bhikkhu cīvaraṁ paribhuñjamāno appamāṇaṁ cetosamādhiṁ upasampajja viharati, appamāṇo tassa puññābhisando kusalābhisando sukhassāhāro sovaggiko sukhavipāko saggasaṁvattaniko iṭṭhāya kantāya manāpāya hitāya sukhāya saṁvattati.\nYassa, bhikkhave, bhikkhu piṇḍapātaṁ paribhuñjamāno …pe…\nsenāsanaṁ paribhuñjamāno …pe…\ngilānapaccayabhesajjaparikkhāraṁ paribhuñjamāno appamāṇaṁ cetosamādhiṁ upasampajja viharati, appamāṇo tassa puññābhisando kusalābhisando sukhassāhāro sovaggiko sukhavipāko saggasaṁvattaniko iṭṭhāya kantāya manāpāya hitāya sukhāya saṁvattati.\nIme kho, bhikkhave, cattāro puññābhisandā kusalābhisandā sukhassāhārā sovaggikā sukhavipākā saggasaṁvattanikā iṭṭhāya kantāya manāpāya hitāya sukhāya saṁvattantī”ti.\nAttheva suttantoti?\nĀmantā.\nTena hi paribhogamayaṁ puññaṁ vaḍḍhatīti."}},{"id":"kv7.5:13","sourceIds":["kv7.5:13.1","kv7.5:13.2","kv7.5:13.3","kv7.5:13.4","kv7.5:13.5","kv7.5:13.6","kv7.5:13.7"],"kind":"text","text":{"pi":"Paribhogamayaṁ puññaṁ vaḍḍhatīti?\nĀmantā.\nDāyako dānaṁ deti, paṭiggāhako paṭiggahetvā na paribhuñjati chaḍḍeti vissajjeti, hoti puññanti?\nĀmantā.\nHañci dāyako dānaṁ deti, paṭiggāhako paṭiggahetvā na paribhuñjati chaḍḍeti vissajjeti, hoti puññaṁ;\nno ca vata re vattabbe—\n“paribhogamayaṁ puññaṁ vaḍḍhatī”ti."}},{"id":"kv7.5:14","sourceIds":["kv7.5:14.1","kv7.5:14.2","kv7.5:14.3","kv7.5:14.4","kv7.5:14.5","kv7.5:14.6","kv7.5:14.7","kv7.5:14.8"],"kind":"text","text":{"pi":"Paribhogamayaṁ puññaṁ vaḍḍhatīti?\nĀmantā.\nDāyako dānaṁ deti, paṭiggāhake paṭiggahite rājāno vā haranti, corā vā haranti, aggi vā dahati, udakaṁ vā vahati, appiyā vā dāyādā haranti, hoti puññanti?\nĀmantā.\nHañci dāyako dānaṁ deti, paṭiggāhake paṭiggahite rājāno vā haranti, corā vā haranti, aggi vā dahati, udakaṁ vā vahati, appiyā vā dāyādā haranti, hoti puññaṁ;\nno ca vata re vattabbe—\n“paribhogamayaṁ puññaṁ vaḍḍhatī”ti.\nParibhogamayapuññakathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/kv7.5/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}