{"id":"kv7.7","title":"Pathavīkammavipākotikathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"kv7.7","title":"Pathavīkammavipākotikathā","units":[{"id":"kv7.7:0","sourceIds":["kv7.7:0.1","kv7.7:0.2","kv7.7:0.3","kv7.7:0.4"],"kind":"text","text":{"pi":"Kathāvatthu\nMahāpaṇṇāsaka\nSattamavagga\nPathavīkammavipākotikathā"}},{"id":"kv7.7:1","sourceIds":["kv7.7:1.1","kv7.7:1.2","kv7.7:1.3","kv7.7:1.4","kv7.7:1.5","kv7.7:1.6","kv7.7:1.7","kv7.7:1.8","kv7.7:1.9","kv7.7:1.10","kv7.7:1.11","kv7.7:1.12"],"kind":"text","text":{"pi":"Pathavī kammavipākoti?\nĀmantā.\nSukhavedaniyā dukkhavedaniyā adukkhamasukhavedaniyā, sukhāya vedanāya sampayuttā, dukkhāya vedanāya sampayuttā, adukkhamasukhāya vedanāya sampayuttā, phassena sampayuttā, vedanāya sampayuttā, saññāya sampayuttā, cetanāya sampayuttā, cittena sampayuttā, sārammaṇā;\natthi tāya āvaṭṭanā ābhogo samannāhāro manasikāro cetanā patthanā paṇidhīti?\nNa hevaṁ vattabbe …pe…\nnanu na sukhavedaniyā na dukkhavedaniyā na adukkhamasukhavedaniyā, na sukhāya vedanāya sampayuttā, na dukkhāya vedanāya sampayuttā, na adukkhamasukhāya vedanāya sampayuttā, na phassena sampayuttā, na vedanāya sampayuttā, na saññāya sampayuttā, na cetanāya sampayuttā, na cittena sampayuttā, anārammaṇā;\nnatthi tāya āvaṭṭanā ābhogo samannāhāro manasikāro cetanā patthanā paṇidhīti?\nĀmantā.\nHañci na sukhavedaniyā na dukkhavedaniyā …pe…\nanārammaṇā;\nnatthi tāya āvaṭṭanā …pe… paṇidhi, no ca vata re vattabbe—\n“pathavī kammavipāko”ti."}},{"id":"kv7.7:2","sourceIds":["kv7.7:2.1","kv7.7:2.2","kv7.7:2.3","kv7.7:2.4","kv7.7:2.5","kv7.7:2.6","kv7.7:2.7","kv7.7:2.8","kv7.7:2.9","kv7.7:2.10","kv7.7:2.11","kv7.7:2.12"],"kind":"text","text":{"pi":"Phasso kammavipāko, phasso sukhavedaniyo dukkhavedaniyo adukkhamasukhavedaniyo sukhāya vedanāya sampayutto dukkhāya …pe… adukkhamasukhāya vedanāya sampayutto phassena sampayutto vedanāya sampayutto saññāya sampayutto cetanāya sampayutto cittena sampayutto sārammaṇo;\natthi tassa āvaṭṭanā …pe… paṇidhīti?\nĀmantā.\nPathavī kammavipāko, pathavī sukhavedaniyā dukkhavedaniyā adukkhamasukhavedaniyā sukhāya vedanāya sampayuttā dukkhāya …pe… adukkhamasukhāya vedanāya sampayuttā phassena sampayuttā vedanāya sampayuttā saññāya sampayuttā cetanāya sampayuttā cittena sampayuttā sārammaṇā;\natthi tāya āvaṭṭanā ābhogo samannāhāro manasikāro cetanā patthanā paṇidhīti?\nNa hevaṁ vattabbe …pe…\npathavī kammavipāko, pathavī na sukhavedaniyā na dukkhavedaniyā …pe… anārammaṇā;\nnatthi tāya āvaṭṭanā …pe… paṇidhīti?\nĀmantā.\nPhasso kammavipāko, phasso na sukhavedaniyo na dukkhavedaniyo …pe… anārammaṇo;\nnatthi tassa āvaṭṭanā …pe… paṇidhīti?\nNa hevaṁ vattabbe …pe…."}},{"id":"kv7.7:3","sourceIds":["kv7.7:3.1","kv7.7:3.2","kv7.7:3.3","kv7.7:3.4","kv7.7:3.5","kv7.7:3.6"],"kind":"text","text":{"pi":"Pathavī kammavipākoti?\nĀmantā.\nPathavī paggahaniggahupagā chedanabhedanupagāti?\nĀmantā.\nKammavipāko paggahaniggahupago chedanabhedanupagoti?\nNa hevaṁ vattabbe …pe…."}},{"id":"kv7.7:4","sourceIds":["kv7.7:4.1","kv7.7:4.2","kv7.7:4.3","kv7.7:4.4"],"kind":"text","text":{"pi":"Labbhā pathavī ketuṁ vikketuṁ āṭhapetuṁ ocinituṁ vicinitunti?\nĀmantā.\nLabbhā kammavipāko ketuṁ vikketuṁ āṭhapetuṁ ocinituṁ vicinitunti?\nNa hevaṁ vattabbe …pe…."}},{"id":"kv7.7:5","sourceIds":["kv7.7:5.1","kv7.7:5.2","kv7.7:5.3","kv7.7:5.4"],"kind":"text","text":{"pi":"Pathavī paresaṁ sādhāraṇāti?\nĀmantā.\nKammavipāko paresaṁ sādhāraṇoti?\nNa hevaṁ vattabbe …pe…."}},{"id":"kv7.7:6","sourceIds":["kv7.7:6.1","kv7.7:6.2","kv7.7:6.3"],"kind":"text","text":{"pi":"Kammavipāko paresaṁ sādhāraṇoti?\nĀmantā.\nNanu vuttaṁ bhagavatā—"}},{"id":"kv7.7:7","sourceIds":["kv7.7:7.1","kv7.7:7.2","kv7.7:7.3","kv7.7:7.4"],"kind":"text","text":{"pi":"“Asādhāraṇamaññesaṁ,\nacoraharaṇo nidhi;\nKayirātha macco puññāni,\nsace sucaritaṁ care”ti."}},{"id":"kv7.7:8","sourceIds":["kv7.7:8.1","kv7.7:8.2","kv7.7:8.3","kv7.7:8.4"],"kind":"text","text":{"pi":"Attheva suttantoti?\nĀmantā.\nTena hi na vattabbaṁ—\n“kammavipāko paresaṁ sādhāraṇo”ti."}},{"id":"kv7.7:9","sourceIds":["kv7.7:9.1","kv7.7:9.2","kv7.7:9.3","kv7.7:9.4","kv7.7:9.5","kv7.7:9.6"],"kind":"text","text":{"pi":"Pathavī kammavipākoti?\nĀmantā.\nPaṭhamaṁ pathavī saṇṭhāti, pacchā sattā uppajjantīti?\nĀmantā.\nPaṭhamaṁ vipāko uppajjati, pacchā vipākapaṭilābhāya kammaṁ karontīti?\nNa hevaṁ vattabbe …pe…."}},{"id":"kv7.7:10","sourceIds":["kv7.7:10.1","kv7.7:10.2","kv7.7:10.3","kv7.7:10.4","kv7.7:10.5","kv7.7:10.6","kv7.7:10.7","kv7.7:10.8","kv7.7:10.9","kv7.7:10.10"],"kind":"text","text":{"pi":"Pathavī sabbasattānaṁ kammavipākoti?\nĀmantā.\nSabbe sattā pathaviṁ paribhuñjantīti?\nNa hevaṁ vattabbe …pe…\nsabbe sattā pathaviṁ paribhuñjantīti?\nĀmantā.\nAtthi keci pathaviṁ aparibhuñjitvā parinibbāyantīti?\nĀmantā.\nAtthi keci kammavipākaṁ akhepetvā parinibbāyantīti?\nNa hevaṁ vattabbe …pe…."}},{"id":"kv7.7:11","sourceIds":["kv7.7:11.1","kv7.7:11.2","kv7.7:11.3","kv7.7:11.4","kv7.7:11.5","kv7.7:11.6","kv7.7:11.7","kv7.7:11.8","kv7.7:11.9","kv7.7:11.10"],"kind":"text","text":{"pi":"Pathavī cakkavattisattassa kammavipākoti?\nĀmantā.\nAññe sattā pathaviṁ paribhuñjantīti?\nĀmantā.\nCakkavattisattassa kammavipākaṁ aññe sattā paribhuñjantīti?\nNa hevaṁ vattabbe …pe…\ncakkavattisattassa kammavipākaṁ aññe sattā paribhuñjantīti?\nĀmantā.\nCakkavattisattassa phassaṁ vedanaṁ saññaṁ cetanaṁ cittaṁ saddhaṁ vīriyaṁ satiṁ samādhiṁ paññaṁ aññe sattā paribhuñjantīti?\nNa hevaṁ vattabbe …pe…."}},{"id":"kv7.7:12","sourceIds":["kv7.7:12.1","kv7.7:12.2","kv7.7:12.3","kv7.7:12.4","kv7.7:12.5","kv7.7:12.6","kv7.7:12.7","kv7.7:12.8"],"kind":"text","text":{"pi":"Na vattabbaṁ—\n“pathavī kammavipāko”ti?\nĀmantā.\nNanu atthi issariyasaṁvattaniyaṁ kammaṁ adhipaccasaṁvattaniyaṁ kammanti?\nĀmantā.\nHañci atthi issariyasaṁvattaniyaṁ kammaṁ adhipaccasaṁvattaniyaṁ kammaṁ, tena vata re vattabbe—\n“pathavī kammavipāko”ti.\nPathavī kammavipākotikathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/kv7.7/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}