{"id":"kv8.3","title":"Kāmaguṇakathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"kv8.3","title":"Kāmaguṇakathā","units":[{"id":"kv8.3:0","sourceIds":["kv8.3:0.1","kv8.3:0.2","kv8.3:0.3","kv8.3:0.4"],"kind":"text","text":{"pi":"Kathāvatthu\nMahāpaṇṇāsaka\nAṭṭhamavagga\nKāmaguṇakathā"}},{"id":"kv8.3:1","sourceIds":["kv8.3:1.1","kv8.3:1.2","kv8.3:1.3","kv8.3:1.4","kv8.3:1.5","kv8.3:1.6","kv8.3:1.7","kv8.3:1.8","kv8.3:1.9","kv8.3:1.10"],"kind":"text","text":{"pi":"Pañceva kāmaguṇā kāmadhātūti?\nĀmantā.\nNanu atthi tappaṭisaññutto chandoti?\nĀmantā.\nHañci atthi tappaṭisaññutto chando, no ca vata re vattabbe—\n“pañceva kāmaguṇā kāmadhātū”ti.\nNanu atthi tappaṭisaññutto rāgo tappaṭisaññutto chando tappaṭisaññutto chandarāgo tappaṭisaññutto saṅkappo tappaṭisaññutto rāgo tappaṭisaññutto saṅkapparāgo tappaṭisaññuttā pīti tappaṭisaññuttaṁ somanassaṁ tappaṭisaññuttaṁ pītisomanassanti?\nĀmantā.\nHañci atthi tappaṭisaññuttaṁ pītisomanassaṁ, no ca vata re vattabbe—\n“pañceva kāmaguṇā kāmadhātū”ti."}},{"id":"kv8.3:2","sourceIds":["kv8.3:2.1","kv8.3:2.2","kv8.3:2.3","kv8.3:2.4","kv8.3:2.5","kv8.3:2.6","kv8.3:2.7","kv8.3:2.8","kv8.3:2.9","kv8.3:2.10"],"kind":"text","text":{"pi":"Pañceva kāmaguṇā kāmadhātūti?\nĀmantā.\nManussānaṁ cakkhu na kāmadhātūti?\nNa hevaṁ vattabbe …pe…\nmanussānaṁ sotaṁ …pe…\nmanussānaṁ ghānaṁ …pe…\nmanussānaṁ jivhā …pe…\nmanussānaṁ kāyo …pe…\nmanussānaṁ mano na kāmadhātūti?\nNa hevaṁ vattabbe …pe…."}},{"id":"kv8.3:3","sourceIds":["kv8.3:3.1","kv8.3:3.2","kv8.3:3.3"],"kind":"text","text":{"pi":"Manussānaṁ mano na kāmadhātūti?\nĀmantā.\nNanu vuttaṁ bhagavatā—"}},{"id":"kv8.3:4","sourceIds":["kv8.3:4.1","kv8.3:4.2","kv8.3:4.3","kv8.3:4.4"],"kind":"text","text":{"pi":"“Pañca kāmaguṇā loke,\nmanocchaṭṭhā paveditā;\nEttha chandaṁ virājetvā,\nevaṁ dukkhā pamuccatī”ti."}},{"id":"kv8.3:5","sourceIds":["kv8.3:5.1","kv8.3:5.2","kv8.3:5.3","kv8.3:5.4"],"kind":"text","text":{"pi":"Attheva suttantoti?\nĀmantā.\nTena hi na vattabbaṁ—\n“manussānaṁ mano na kāmadhātū”ti."}},{"id":"kv8.3:6","sourceIds":["kv8.3:6.1","kv8.3:6.2","kv8.3:6.3","kv8.3:6.4","kv8.3:6.5","kv8.3:6.6","kv8.3:6.7","kv8.3:6.8","kv8.3:6.9","kv8.3:6.10","kv8.3:6.11","kv8.3:6.12","kv8.3:6.13","kv8.3:6.14","kv8.3:6.15","kv8.3:6.16"],"kind":"text","text":{"pi":"Pañceva kāmaguṇā kāmadhātūti?\nĀmantā.\nKāmaguṇā bhavo gati sattāvāso saṁsāro yoni viññāṇaṭṭhiti attabhāvapaṭilābhoti?\nNa hevaṁ vattabbe …pe…\natthi kāmaguṇūpagaṁ kammanti?\nNa hevaṁ vattabbe …pe…\natthi kāmaguṇūpagā sattāti?\nNa hevaṁ vattabbe …pe…\nkāmaguṇe sattā jāyanti jīyanti mīyanti cavanti upapajjantīti?\nNa hevaṁ vattabbe …pe…\nkāmaguṇe atthi rūpaṁ vedanā saññā saṅkhārā viññāṇanti?\nNa hevaṁ vattabbe …pe…\nkāmaguṇā pañcavokārabhavoti?\nNa hevaṁ vattabbe …pe…\nkāmaguṇe sammāsambuddhā uppajjanti, paccekasambuddhā uppajjanti, sāvakayugaṁ uppajjatīti?\nNa hevaṁ vattabbe …pe…."}},{"id":"kv8.3:7","sourceIds":["kv8.3:7.1","kv8.3:7.2","kv8.3:7.3","kv8.3:7.4","kv8.3:7.5","kv8.3:7.6","kv8.3:7.7","kv8.3:7.8","kv8.3:7.9","kv8.3:7.10","kv8.3:7.11","kv8.3:7.12"],"kind":"text","text":{"pi":"Kāmadhātu bhavo gati sattāvāso saṁsāro yoni viññāṇaṭṭhiti attabhāvapaṭilābhoti?\nĀmantā.\nKāmaguṇā bhavo gati sattāvāso saṁsāro yoni viññāṇaṭṭhiti attabhāvapaṭilābhoti?\nNa hevaṁ vattabbe …pe…\natthi kāmadhātūpagaṁ kammanti?\nĀmantā.\nAtthi kāmaguṇūpagaṁ kammanti?\nNa hevaṁ vattabbe …pe…\natthi kāmadhātūpagā sattāti?\nĀmantā.\nAtthi kāmaguṇūpagā sattāti?\nNa hevaṁ vattabbe …pe…."}},{"id":"kv8.3:8","sourceIds":["kv8.3:8.1","kv8.3:8.2","kv8.3:8.3","kv8.3:8.4","kv8.3:8.5","kv8.3:8.6","kv8.3:8.7","kv8.3:8.8","kv8.3:8.9","kv8.3:8.10","kv8.3:8.11","kv8.3:8.12","kv8.3:8.13","kv8.3:8.14","kv8.3:8.15","kv8.3:8.16"],"kind":"text","text":{"pi":"Kāmadhātuyā sattā jāyanti jīyanti mīyanti cavanti upapajjantīti?\nĀmantā.\nKāmaguṇe sattā jāyanti jīyanti mīyanti cavanti upapajjantīti?\nNa hevaṁ vattabbe …pe…\nkāmadhātuyā atthi rūpaṁ vedanā saññā saṅkhārā viññāṇanti?\nĀmantā.\nKāmaguṇe atthi rūpaṁ vedanā saññā saṅkhārā viññāṇanti?\nNa hevaṁ vattabbe …pe…\nkāmadhātu pañcavokārabhavoti?\nĀmantā.\nKāmaguṇā pañcavokārabhavoti?\nNa hevaṁ vattabbe …pe…\nkāmadhātuyā sammāsambuddhā uppajjanti, paccekasambuddhā uppajjanti, sāvakayugaṁ uppajjatīti?\nĀmantā.\nKāmaguṇe sammāsambuddhā uppajjanti, paccekasambuddhā uppajjanti, sāvakayugaṁ uppajjatīti?\nNa hevaṁ vattabbe …pe…."}},{"id":"kv8.3:9","sourceIds":["kv8.3:9.1","kv8.3:9.2","kv8.3:9.3","kv8.3:9.4","kv8.3:9.5","kv8.3:9.6","kv8.3:9.7","kv8.3:9.8","kv8.3:9.9","kv8.3:9.10","kv8.3:9.11","kv8.3:9.12","kv8.3:9.13","kv8.3:9.14","kv8.3:9.15"],"kind":"text","text":{"pi":"Na vattabbaṁ—\n“pañceva kāmaguṇā kāmadhātū”ti?\nĀmantā.\nNanu vuttaṁ bhagavatā—\n“pañcime, bhikkhave, kāmaguṇā.\nKatame pañca?\nCakkhuviññeyyā rūpā iṭṭhā kantā manāpā piyarūpā kāmūpasaṁhitā rajanīyā, sotaviññeyyā saddā …pe…\nghānaviññeyyā gandhā …pe…\njivhāviññeyyā rasā …pe…\nkāyaviññeyyā phoṭṭhabbā iṭṭhā kantā manāpā piyarūpā kāmūpasaṁhitā rajanīyā—\nime kho, bhikkhave, pañca kāmaguṇā”ti.\nAttheva suttantoti?\nĀmantā.\nTena hi pañceva kāmaguṇā kāmadhātūti.\nKāmaguṇakathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/kv8.3/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}