{"id":"kv9.2","title":"Amatārammaṇakathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"kv9.2","title":"Amatārammaṇakathā","units":[{"id":"kv9.2:0","sourceIds":["kv9.2:0.1","kv9.2:0.2","kv9.2:0.3","kv9.2:0.4"],"kind":"text","text":{"pi":"Kathāvatthu\nMahāpaṇṇāsaka\nNavamavagga\nAmatārammaṇakathā"}},{"id":"kv9.2:1","sourceIds":["kv9.2:1.1","kv9.2:1.2","kv9.2:1.3","kv9.2:1.4","kv9.2:1.5","kv9.2:1.6","kv9.2:1.7","kv9.2:1.8"],"kind":"text","text":{"pi":"Amatārammaṇaṁ saṁyojananti?\nĀmantā.\nAmataṁ saṁyojaniyaṁ ganthaniyaṁ oghaniyaṁ yoganiyaṁ nīvaraṇiyaṁ parāmaṭṭhaṁ upādāniyaṁ saṅkilesiyanti?\nNa hevaṁ vattabbe …pe…\nnanu amataṁ asaṁyojaniyaṁ aganthaniyaṁ …pe… asaṅkilesiyanti?\nĀmantā.\nHañci amataṁ asaṁyojaniyaṁ …pe… asaṅkilesiyaṁ, no ca vata re vattabbe—\n“amatārammaṇaṁ saṁyojanan”ti."}},{"id":"kv9.2:2","sourceIds":["kv9.2:2.1","kv9.2:2.2","kv9.2:2.3","kv9.2:2.4","kv9.2:2.5","kv9.2:2.6","kv9.2:2.7","kv9.2:2.8"],"kind":"text","text":{"pi":"Amataṁ ārabbha rāgo uppajjatīti?\nĀmantā.\nAmataṁ rāgaṭṭhāniyaṁ rajaniyaṁ kamaniyaṁ madaniyaṁ bandhaniyaṁ mucchaniyanti?\nNa hevaṁ vattabbe …pe…\nnanu amataṁ na rāgaṭṭhāniyaṁ na rajaniyaṁ na kamaniyaṁ na madaniyaṁ na bandhaniyaṁ na mucchaniyanti?\nĀmantā.\nHañci amataṁ na rāgaṭṭhāniyaṁ na rajaniyaṁ na kamaniyaṁ na madaniyaṁ na bandhaniyaṁ na mucchaniyaṁ, no ca vata re vattabbe—\n“amataṁ ārabbha rāgo uppajjatī”ti."}},{"id":"kv9.2:3","sourceIds":["kv9.2:3.1","kv9.2:3.2","kv9.2:3.3","kv9.2:3.4","kv9.2:3.5","kv9.2:3.6","kv9.2:3.7","kv9.2:3.8"],"kind":"text","text":{"pi":"Amataṁ ārabbha doso uppajjatīti?\nĀmantā.\nAmataṁ dosaṭṭhāniyaṁ kopaṭṭhāniyaṁ paṭighaṭṭhāniyanti?\nNa hevaṁ vattabbe …pe…\nnanu amataṁ na dosaṭṭhāniyaṁ na kopaṭṭhāniyaṁ na paṭighaṭṭhāniyanti?\nĀmantā.\nHañci amataṁ na dosaṭṭhāniyaṁ na kopaṭṭhāniyaṁ na paṭighaṭṭhāniyaṁ, no ca vata re vattabbe—\n“amataṁ ārabbha doso uppajjatī”ti."}},{"id":"kv9.2:4","sourceIds":["kv9.2:4.1","kv9.2:4.2","kv9.2:4.3","kv9.2:4.4","kv9.2:4.5","kv9.2:4.6","kv9.2:4.7","kv9.2:4.8","kv9.2:4.9"],"kind":"text","text":{"pi":"Amataṁ ārabbha moho uppajjatīti?\nĀmantā.\nAmataṁ mohaṭṭhāniyaṁ aññāṇakaraṇaṁ acakkhukaraṇaṁ paññānirodhiyaṁ vighātapakkhiyaṁ anibbānasaṁvattaniyanti?\nNa hevaṁ vattabbe …pe…\nnanu amataṁ na mohaṭṭhāniyaṁ na aññāṇakaraṇaṁ na acakkhukaraṇaṁ paññābuddhiyaṁ avighātapakkhiyaṁ nibbānasaṁvattaniyanti?\nĀmantā.\nHañci amataṁ na mohaṭṭhāniyaṁ na aññāṇakaraṇaṁ …pe…\nnibbānasaṁvattaniyaṁ, no ca vata re vattabbe—\n“amataṁ ārabbha moho uppajjatī”ti."}},{"id":"kv9.2:5","sourceIds":["kv9.2:5.1","kv9.2:5.2","kv9.2:5.3","kv9.2:5.4"],"kind":"text","text":{"pi":"Rūpaṁ ārabbha saṁyojanā uppajjanti, rūpaṁ saṁyojaniyaṁ ganthaniyaṁ …pe… saṅkilesiyanti?\nĀmantā.\nAmataṁ ārabbha saṁyojanā uppajjanti, amataṁ saṁyojaniyaṁ …pe… saṅkilesiyanti?\nNa hevaṁ vattabbe …pe…."}},{"id":"kv9.2:6","sourceIds":["kv9.2:6.1","kv9.2:6.2","kv9.2:6.3","kv9.2:6.4"],"kind":"text","text":{"pi":"Rūpaṁ ārabbha rāgo uppajjati, rūpaṁ rāgaṭṭhāniyaṁ rajaniyaṁ kamaniyaṁ madaniyaṁ bandhaniyaṁ mucchaniyanti?\nĀmantā.\nAmataṁ ārabbha rāgo uppajjati, amataṁ rāgaṭṭhāniyaṁ …pe… mucchaniyanti?\nNa hevaṁ vattabbe …pe…."}},{"id":"kv9.2:7","sourceIds":["kv9.2:7.1","kv9.2:7.2","kv9.2:7.3","kv9.2:7.4"],"kind":"text","text":{"pi":"Rūpaṁ ārabbha doso uppajjati, rūpaṁ dosaṭṭhāniyaṁ kopaṭṭhāniyaṁ paṭighaṭṭhāniyanti?\nĀmantā.\nAmataṁ ārabbha doso uppajjati, amataṁ dosaṭṭhāniyaṁ kopaṭṭhāniyaṁ paṭighaṭṭhāniyanti?\nNa hevaṁ vattabbe …pe…."}},{"id":"kv9.2:8","sourceIds":["kv9.2:8.1","kv9.2:8.2","kv9.2:8.3","kv9.2:8.4"],"kind":"text","text":{"pi":"Rūpaṁ ārabbha moho uppajjati, rūpaṁ mohaṭṭhāniyaṁ aññāṇakaraṇaṁ …pe… anibbānasaṁvattaniyanti?\nĀmantā.\nAmataṁ ārabbha moho uppajjati, amataṁ mohaṭṭhāniyaṁ aññāṇakaraṇaṁ …pe… anibbānasaṁvattaniyanti?\nNa hevaṁ vattabbe …pe…."}},{"id":"kv9.2:9","sourceIds":["kv9.2:9.1","kv9.2:9.2","kv9.2:9.3","kv9.2:9.4"],"kind":"text","text":{"pi":"Amataṁ ārabbha saṁyojanā uppajjanti, amataṁ asaṁyojaniyaṁ aganthaniyaṁ anoghaniyaṁ ayoganiyaṁ anīvaraṇiyaṁ aparāmaṭṭhaṁ anupādāniyaṁ asaṅkilesiyanti?\nĀmantā.\nRūpaṁ ārabbha saṁyojanā uppajjanti, rūpaṁ asaṁyojaniyaṁ aganthaniyaṁ …pe… asaṅkilesiyanti?\nNa hevaṁ vattabbe …pe…."}},{"id":"kv9.2:10","sourceIds":["kv9.2:10.1","kv9.2:10.2","kv9.2:10.3","kv9.2:10.4","kv9.2:10.5"],"kind":"text","text":{"pi":"Amataṁ ārabbha rāgo uppajjati, amataṁ na rāgaṭṭhāniyaṁ na rajaniyaṁ na kamaniyaṁ na madaniyaṁ na bandhaniyaṁ na mucchaniyanti?\nĀmantā.\nRūpaṁ ārabbha rāgo uppajjati, rūpaṁ na rāgaṭṭhāniyaṁ …pe…\nna mucchaniyanti?\nNa hevaṁ vattabbe …pe…."}},{"id":"kv9.2:11","sourceIds":["kv9.2:11.1","kv9.2:11.2","kv9.2:11.3","kv9.2:11.4"],"kind":"text","text":{"pi":"Amataṁ ārabbha doso uppajjati, amataṁ na dosaṭṭhāniyaṁ na kopaṭṭhāniyaṁ na paṭighaṭṭhāniyanti?\nĀmantā.\nRūpaṁ ārabbha doso uppajjati, rūpaṁ na dosaṭṭhāniyaṁ na kopaṭṭhāniyaṁ na paṭighaṭṭhāniyanti?\nNa hevaṁ vattabbe …pe…."}},{"id":"kv9.2:12","sourceIds":["kv9.2:12.1","kv9.2:12.2","kv9.2:12.3","kv9.2:12.4"],"kind":"text","text":{"pi":"Amataṁ ārabbha moho uppajjati, amataṁ na mohaṭṭhāniyaṁ na aññāṇakaraṇaṁ …pe… nibbānasaṁvattaniyanti?\nĀmantā.\nRūpaṁ ārabbha moho uppajjati, rūpaṁ na mohaṭṭhāniyaṁ na aññāṇakaraṇaṁ …pe… nibbānasaṁvattaniyanti?\nNa hevaṁ vattabbe …pe…."}},{"id":"kv9.2:13","sourceIds":["kv9.2:13.1","kv9.2:13.2","kv9.2:13.3","kv9.2:13.4","kv9.2:13.5","kv9.2:13.6","kv9.2:13.7","kv9.2:13.8","kv9.2:13.9"],"kind":"text","text":{"pi":"Na vattabbaṁ—\n“amatārammaṇaṁ saṁyojanan”ti?\nĀmantā.\nNanu vuttaṁ bhagavatā—\n“nibbānaṁ nibbānato sañjānāti, nibbānaṁ nibbānato sañjānitvā nibbānaṁ maññati, nibbānasmiṁ maññati, nibbānato maññati, nibbānaṁ meti maññati, nibbānaṁ abhinandatī”ti.\nAttheva suttantoti?\nĀmantā.\nTena hi amatārammaṇaṁ saṁyojananti.\nAmatārammaṇakathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/kv9.2/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}