{"id":"mil3.1.9","title":"9. Sīlalakkhaṇapañha","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mil3.1.9","title":"9. Sīlalakkhaṇapañha","units":[{"id":"mil3.1.9:0","sourceIds":["mil3.1.9:0.1","mil3.1.9:0.2","mil3.1.9:0.3"],"kind":"text","text":{"pi":"Milindapañha\nMahāvagga\n9. Sīlalakkhaṇapañha"}},{"id":"mil3.1.9:1","sourceIds":["mil3.1.9:1.1","mil3.1.9:1.2","mil3.1.9:1.3","mil3.1.9:1.4","mil3.1.9:1.5"],"kind":"text","text":{"pi":"Rājā āha—\n“bhante nāgasena, yaṁ panetaṁ brūsi ‘aññehi ca kusalehi dhammehī’ti, katame te kusalā dhammā”ti?\n“Sīlaṁ, mahārāja, saddhā vīriyaṁ sati samādhi, ime te kusalā dhammā”ti.\n“Kiṁlakkhaṇaṁ, bhante, sīlan”ti?\n“Patiṭṭhānalakkhaṇaṁ, mahārāja, sīlaṁ sabbesaṁ kusalānaṁ dhammānaṁ, indriyabalabojjhaṅgamaggaṅgasatipaṭṭhānasammappadhānaiddhipādajhānavimokkhasamādhisamāpattīnaṁ sīlaṁ patiṭṭhaṁ, sīle patiṭṭhito kho, mahārāja, yogāvacaro sīlaṁ nissāya sīle patiṭṭhāya pañcindriyāni bhāveti saddhindriyaṁ vīriyindriyaṁ satindriyaṁ samādhindriyaṁ paññindriyanti, sabbe kusalā dhammā na parihāyantī”ti."}},{"id":"mil3.1.9:2","sourceIds":["mil3.1.9:2.1","mil3.1.9:2.2","mil3.1.9:2.3"],"kind":"text","text":{"pi":"“Opammaṁ karohī”ti.\n“Yathā, mahārāja, ye keci bījagāmabhūtagāmā vuḍḍhiṁ virūḷhiṁ vepullaṁ āpajjanti, sabbe te pathaviṁ nissāya pathaviyaṁ patiṭṭhāya vuḍḍhiṁ virūḷhiṁ vepullaṁ āpajjanti;\nevameva kho, mahārāja, yogāvacaro sīlaṁ nissāya sīle patiṭṭhāya pañcindriyāni bhāveti saddhindriyaṁ vīriyindriyaṁ satindriyaṁ samādhindriyaṁ paññindriyan”ti."}},{"id":"mil3.1.9:3","sourceIds":["mil3.1.9:3.1","mil3.1.9:3.2","mil3.1.9:3.3"],"kind":"text","text":{"pi":"“Bhiyyo opammaṁ karohī”ti.\n“Yathā, mahārāja, ye keci balakaraṇīyā kammantā kayiranti, sabbe te pathaviṁ nissāya pathaviyaṁ patiṭṭhāya kayiranti;\nevameva kho, mahārāja, yogāvacaro sīlaṁ nissāya sīle patiṭṭhāya pañcindriyāni bhāveti saddhindriyaṁ vīriyindriyaṁ satindriyaṁ samādhindriyaṁ paññindriyan”ti."}},{"id":"mil3.1.9:4","sourceIds":["mil3.1.9:4.1","mil3.1.9:4.2","mil3.1.9:4.3"],"kind":"text","text":{"pi":"“Bhiyyo opammaṁ karohī”ti.\n“Yathā, mahārāja, nagaravaḍḍhakī nagaraṁ māpetukāmo paṭhamaṁ nagaraṭṭhānaṁ sodhāpetvā khāṇukaṇṭakaṁ apakaḍḍhāpetvā bhūmiṁ samaṁ kārāpetvā tato aparabhāge vīthicatukkasiṅghāṭakādiparicchedena vibhajitvā nagaraṁ māpeti;\nevameva kho, mahārāja, yogāvacaro sīlaṁ nissāya sīle patiṭṭhāya pañcindriyāni bhāveti saddhindriyaṁ vīriyindriyaṁ satindriyaṁ samādhindriyaṁ paññindriyan”ti."}},{"id":"mil3.1.9:5","sourceIds":["mil3.1.9:5.1","mil3.1.9:5.2","mil3.1.9:5.3","mil3.1.9:5.4"],"kind":"text","text":{"pi":"“Bhiyyo opammaṁ karohī”ti.\n“Yathā, mahārāja, laṅghako sippaṁ dassetukāmo pathaviṁ khaṇāpetvā sakkharakathalaṁ apakaḍḍhāpetvā bhūmiṁ samaṁ kārāpetvā mudukāya bhūmiyā sippaṁ dasseti;\nevameva kho, mahārāja, yogāvacaro sīlaṁ nissāya sīle patiṭṭhāya pañcindriyāni bhāveti saddhindriyaṁ vīriyindriyaṁ satindriyaṁ samādhindriyaṁ paññindriyanti.\nBhāsitampetaṁ, mahārāja, bhagavatā—"}},{"id":"mil3.1.9:6","sourceIds":["mil3.1.9:6.1","mil3.1.9:6.2","mil3.1.9:6.3","mil3.1.9:6.4"],"kind":"text","text":{"pi":"‘Sīle patiṭṭhāya naro sapañño,\nCittaṁ paññañca bhāvayaṁ;\nĀtāpī nipako bhikkhu,\nSo imaṁ vijaṭaye jaṭanti."}},{"id":"mil3.1.9:7","sourceIds":["mil3.1.9:7.1","mil3.1.9:7.2","mil3.1.9:7.3","mil3.1.9:7.4"],"kind":"text","text":{"pi":"Ayaṁ patiṭṭhā dharaṇīva pāṇinaṁ,\nIdañca mūlaṁ kusalābhivuḍḍhiyā;\nMukhañcidaṁ sabbajinānusāsane,\nYo sīlakkhandho varapātimokkhiyo’”ti."}},{"id":"mil3.1.9:8","sourceIds":["mil3.1.9:8.1"],"kind":"text","text":{"pi":"“Kallosi, bhante nāgasenā”ti."}},{"id":"mil3.1.9:9","sourceIds":["mil3.1.9:9.1"],"kind":"text","text":{"pi":"Sīlalakkhaṇapañho navamo."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mil3.1.9/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}