{"id":"mil3.3.11","title":"11. Cetanālakkhaṇapañha","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mil3.3.11","title":"11. Cetanālakkhaṇapañha","units":[{"id":"mil3.3.11:0","sourceIds":["mil3.3.11:0.1","mil3.3.11:0.2","mil3.3.11:0.3"],"kind":"text","text":{"pi":"Milindapañha\nVicāravagga\n11. Cetanālakkhaṇapañha"}},{"id":"mil3.3.11:1","sourceIds":["mil3.3.11:1.1","mil3.3.11:1.2"],"kind":"text","text":{"pi":"“Bhante nāgasena, kiṁlakkhaṇā cetanā”ti?\n“Cetayitalakkhaṇā, mahārāja, cetanā abhisaṅkharaṇalakkhaṇā cā”ti."}},{"id":"mil3.3.11:2","sourceIds":["mil3.3.11:2.1","mil3.3.11:2.2","mil3.3.11:2.3","mil3.3.11:2.4"],"kind":"text","text":{"pi":"“Opammaṁ karohī”ti.\n“Yathā, mahārāja, kocideva puriso visaṁ abhisaṅkharitvā attanā ca piveyya, pare ca pāyeyya, so attanāpi dukkhito bhaveyya, parepi dukkhitā bhaveyyuṁ;\nevameva kho, mahārāja, idhekacco puggalo akusalaṁ kammaṁ cetanāya cetayitvā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjeyya.\nYepi tassa anusikkhanti, tepi kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjanti."}},{"id":"mil3.3.11:3","sourceIds":["mil3.3.11:3.1","mil3.3.11:3.2","mil3.3.11:3.3","mil3.3.11:3.4"],"kind":"text","text":{"pi":"Yathā vā pana, mahārāja, kocideva puriso sappinavanītatelamadhuphāṇitaṁ ekajjhaṁ abhisaṅkharitvā attanā ca piveyya, pare ca pāyeyya, so attanā sukhito bhaveyya, parepi sukhitā bhaveyyuṁ;\nevameva kho, mahārāja, idhekacco puggalo kusalaṁ kammaṁ cetanāya cetayitvā kāyassa bhedā paraṁ maraṇā sugatiṁ saggaṁ lokaṁ upapajjati.\nYepi tassa anusikkhanti, tepi kāyassa bhedā paraṁ maraṇā sugatiṁ saggaṁ lokaṁ upapajjanti.\nEvaṁ kho, mahārāja, cetayitalakkhaṇā cetanā abhisaṅkharaṇalakkhaṇā cā”ti."}},{"id":"mil3.3.11:4","sourceIds":["mil3.3.11:4.1"],"kind":"text","text":{"pi":"“Kallosi, bhante nāgasenā”ti."}},{"id":"mil3.3.11:5","sourceIds":["mil3.3.11:5.1"],"kind":"text","text":{"pi":"Cetanālakkhaṇapañho ekādasamo."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mil3.3.11/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}