{"id":"mil3.5.7","title":"7. Aññakāyasaṅkamanapañha","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mil3.5.7","title":"7. Aññakāyasaṅkamanapañha","units":[{"id":"mil3.5.7:0","sourceIds":["mil3.5.7:0.1","mil3.5.7:0.2","mil3.5.7:0.3"],"kind":"text","text":{"pi":"Milindapañha\nBuddhavagga\n7. Aññakāyasaṅkamanapañha"}},{"id":"mil3.5.7:1","sourceIds":["mil3.5.7:1.1","mil3.5.7:1.2","mil3.5.7:1.3","mil3.5.7:1.4","mil3.5.7:1.5"],"kind":"text","text":{"pi":"Rājā āha—\n“bhante nāgasena, atthi koci satto yo imamhā kāyā aññaṁ kāyaṁ saṅkamatī”ti?\n“Na hi, mahārājā”ti.\n“Yadi, bhante nāgasena, imamhā kāyā aññaṁ kāyaṁ saṅkamanto natthi, nanu mutto bhavissati pāpakehi kammehī”ti?\n“Āma, mahārāja, yadi na paṭisandaheyya, mutto bhavissati pāpakehi kammehīti, yasmā ca kho, mahārāja, paṭisandahati, tasmā na parimutto pāpakehi kammehī”ti."}},{"id":"mil3.5.7:2","sourceIds":["mil3.5.7:2.1","mil3.5.7:2.2","mil3.5.7:2.3","mil3.5.7:2.4","mil3.5.7:2.5","mil3.5.7:2.6"],"kind":"text","text":{"pi":"“Opammaṁ karohī”ti.\n“Yathā, mahārāja, kocideva puriso aññatarassa purisassa ambaṁ avahareyya, kiṁ so daṇḍappatto bhaveyyā”ti?\n“Āma, bhante, daṇḍappatto bhaveyyā”ti.\n“Na kho so, mahārāja, tāni ambāni avahari, yāni tena ropitāni, kasmā daṇḍappatto bhaveyyā”ti?\n“Tāni, bhante, ambāni nissāya jātāni, tasmā daṇḍappatto bhaveyyā”ti.\n“Evameva kho, mahārāja, iminā nāmarūpena kammaṁ karoti sobhanaṁ vā asobhanaṁ vā, tena kammena aññaṁ nāmarūpaṁ paṭisandahati, tasmā na parimutto pāpakehi kammehī”ti."}},{"id":"mil3.5.7:3","sourceIds":["mil3.5.7:3.1"],"kind":"text","text":{"pi":"“Kallosi, bhante nāgasenā”ti."}},{"id":"mil3.5.7:4","sourceIds":["mil3.5.7:4.1"],"kind":"text","text":{"pi":"Aññakāyasaṅkamanapañho sattamo."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mil3.5.7/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}