{"id":"mil5.2.3","title":"3. Maccubhāyanābhāyanapañha","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mil5.2.3","title":"3. Maccubhāyanābhāyanapañha","units":[{"id":"mil5.2.3:0","sourceIds":["mil5.2.3:0.1","mil5.2.3:0.2","mil5.2.3:0.3","mil5.2.3:0.4"],"kind":"text","text":{"pi":"Milindapañha\nMeṇḍakapañha\nAbhejjavagga\n3. Maccubhāyanābhāyanapañha"}},{"id":"mil5.2.3:1","sourceIds":["mil5.2.3:1.1","mil5.2.3:1.2","mil5.2.3:1.3","mil5.2.3:1.4","mil5.2.3:1.5","mil5.2.3:1.6","mil5.2.3:1.7","mil5.2.3:1.8","mil5.2.3:1.9"],"kind":"text","text":{"pi":"“Bhante nāgasena, bhāsitampetaṁ bhagavatā—\n‘sabbe tasanti daṇḍassa, sabbe bhāyanti maccuno’ti, puna bhaṇitaṁ—\n‘arahā sabbabhayamatikkanto’ti.\nKiṁ nu kho, bhante nāgasena, arahā daṇḍabhayā tasati, niraye vā nerayikā sattā jalitā kuthitā tattā santattā tamhā jalitaggijālakā mahānirayā cavamānā maccuno bhāyanti.\nYadi, bhante nāgasena, bhagavatā bhaṇitaṁ—\n‘sabbe tasanti daṇḍassa, sabbe bhāyanti maccuno’ti, tena hi ‘arahā sabbabhayamatikkanto’ti yaṁ vacanaṁ, taṁ micchā.\nYadi bhagavatā bhaṇitaṁ—\n‘arahā sabbabhayamatikkanto’ti, tena hi ‘sabbe tasanti daṇḍassa, sabbe bhāyanti maccuno’ti tampi vacanaṁ micchā.\nAyaṁ ubhato koṭiko pañho tavānuppatto, so tayā nibbāhitabbo”ti."}},{"id":"mil5.2.3:2","sourceIds":["mil5.2.3:2.1","mil5.2.3:2.2","mil5.2.3:2.3","mil5.2.3:2.4","mil5.2.3:2.5","mil5.2.3:2.6"],"kind":"text","text":{"pi":"“Netaṁ, mahārāja, vacanaṁ bhagavatā arahante upādāya bhaṇitaṁ—\n‘sabbe tasanti daṇḍassa, sabbe bhāyanti maccuno’ti.\nṬhapito arahā tasmiṁ vatthusmiṁ, samūhato bhayahetu arahato.\nYe te, mahārāja, sattā sakilesā, yesañca adhimattā attānudiṭṭhi, ye ca sukhadukkhesu unnatāvanatā, te upādāya bhagavatā bhaṇitaṁ—\n‘sabbe tasanti daṇḍassa, sabbe bhāyanti maccuno’ti.\nArahato, mahārāja, sabbagati upacchinnā, yoni viddhaṁsitā, paṭisandhi upahatā, bhaggā phāsukā, samūhatā sabbabhavālayā, samucchinnā sabbasaṅkhārā, hataṁ kusalākusalaṁ, vihatā avijjā, abījaṁ viññāṇaṁ kataṁ, daḍḍhā sabbakilesā, ativattā lokadhammā, tasmā arahā na tasati sabbabhayehi."}},{"id":"mil5.2.3:3","sourceIds":["mil5.2.3:3.1","mil5.2.3:3.2","mil5.2.3:3.3","mil5.2.3:3.4","mil5.2.3:3.5","mil5.2.3:3.6","mil5.2.3:3.7","mil5.2.3:3.8","mil5.2.3:3.9"],"kind":"text","text":{"pi":"Idha, mahārāja, rañño cattāro mahāmattā bhaveyyuṁ anurakkhā laddhayasā vissāsikā ṭhapitā mahati issariye ṭhāne.\nAtha rājā kismiñci deva karaṇīye samuppanne yāvatā sakavijite sabbajanassa āṇāpeyya ‘sabbeva me baliṁ karontu, sādhetha tumhe cattāro mahāmattā taṁ karaṇīyan’ti.\nApi nu kho, mahārāja, tesaṁ catunnaṁ mahāmattānaṁ balibhayā santāso uppajjeyyā”ti?\n“Na hi, bhante”ti.\n“Kena kāraṇena, mahārājā”ti.\n“Ṭhapitā te, bhante, raññā uttamaṭṭhāne, natthi tesaṁ bali, samatikkantabalino te, avasese upādāya raññā āṇāpitaṁ ‘sabbeva me baliṁ karontū’”ti.\n“Evameva kho, mahārāja, netaṁ vacanaṁ bhagavatā arahante upādāya bhaṇitaṁ, ṭhapito arahā tasmiṁ vatthusmiṁ, samūhato bhayahetu arahato, ye te, mahārāja, sattā sakilesā, yesañca adhimattā attānudiṭṭhi, ye ca sukhadukkhesu unnatāvanatā, te upādāya bhagavatā bhaṇitaṁ—\n‘sabbe tasanti daṇḍassa, sabbe bhāyanti maccuno’ti.\nTasmā arahā na tasati sabbabhayehī”ti."}},{"id":"mil5.2.3:4","sourceIds":["mil5.2.3:4.1","mil5.2.3:4.2"],"kind":"text","text":{"pi":"“Netaṁ, bhante nāgasena, vacanaṁ sāvasesaṁ, niravasesavacanametaṁ ‘sabbe’ti.\nTattha me uttariṁ kāraṇaṁ brūhi taṁ vacanaṁ patiṭṭhāpetun”ti."}},{"id":"mil5.2.3:5","sourceIds":["mil5.2.3:5.1","mil5.2.3:5.2","mil5.2.3:5.3","mil5.2.3:5.4","mil5.2.3:5.5","mil5.2.3:5.6","mil5.2.3:5.7"],"kind":"text","text":{"pi":"“Idha, mahārāja, gāme gāmassāmiko āṇāpakaṁ āṇāpeyya ‘ehi, bho āṇāpaka, yāvatā gāme gāmikā, te sabbe sīghaṁ mama santike sannipātehī’ti.\nSo ‘sādhu, sāmī’ti sampaṭicchitvā gāmamajjhe ṭhatvā tikkhattuṁ saddamanussāveyya ‘yāvatā gāme gāmikā, te sabbe sīghasīghaṁ sāmino santike sannipatantū’ti.\nTato te gāmikā āṇāpakassa vacanena turitaturitā sannipatitvā gāmassāmikassa ārocenti ‘sannipatitā, sāmi, sabbe gāmikā, yaṁ te karaṇīyaṁ taṁ karohī’ti.\nIti so, mahārāja, gāmassāmiko kuṭipurise sannipātento sabbe gāmike āṇāpeti, te ca āṇattā na sabbe sannipatanti, kuṭipurisāyeva sannipatanti, ‘ettakāyeva me gāmikā’ti gāmassāmiko ca tathā sampaṭicchati, aññe bahutarā anāgatā itthipurisā dāsidāsā bhatakā kammakarā gāmikā gilānā gomahiṁsā ajeḷakā suvānā, ye anāgatā, sabbe te agaṇitā, kuṭipuriseyeva upādāya āṇāpitattā ‘sabbe sannipatantū’ti.\nEvameva kho, mahārāja, netaṁ vacanaṁ bhagavatā arahante upādāya bhaṇitaṁ, ṭhapito arahā tasmiṁ vatthusmiṁ, samūhato bhayahetu arahato, ye te, mahārāja, sattā sakilesā, yesañca adhimattā attānudiṭṭhi, ye ca sukhadukkhesu unnatāvanatā, te upādāya bhagavatā bhaṇitaṁ—\n‘sabbe tasanti daṇḍassa, sabbe bhāyanti maccuno’ti.\nTasmā arahā na tasati sabbabhayehi."}},{"id":"mil5.2.3:6","sourceIds":["mil5.2.3:6.1","mil5.2.3:6.2"],"kind":"text","text":{"pi":"Atthi, mahārāja, sāvasesaṁ vacanaṁ sāvaseso attho, atthi sāvasesaṁ vacanaṁ niravaseso attho, atthi niravasesaṁ vacanaṁ sāvaseso attho, atthi niravasesaṁ vacanaṁ niravaseso attho.\nTena tena attho sampaṭicchitabbo."}},{"id":"mil5.2.3:7","sourceIds":["mil5.2.3:7.1","mil5.2.3:7.2","mil5.2.3:7.3","mil5.2.3:7.4","mil5.2.3:7.5","mil5.2.3:7.6","mil5.2.3:7.7","mil5.2.3:7.8"],"kind":"text","text":{"pi":"Pañcavidhehi, mahārāja, kāraṇehi attho sampaṭicchitabbo āhaccapadena rasena ācariyavaṁsena adhippāyā kāraṇuttariyatāya.\nEttha hi āhaccapadanti suttaṁ adhippetaṁ.\nRasoti suttānulomaṁ.\nĀcariyavaṁsoti ācariyavādo.\nAdhippāyoti attano mati.\nKāraṇuttariyatāti imehi catūhi samentaṁ kāraṇaṁ.\nImehi kho, mahārāja, pañcahi kāraṇehi attho sampaṭicchitabbo.\nEvameso pañho suvinicchito hotī”ti."}},{"id":"mil5.2.3:8","sourceIds":["mil5.2.3:8.1","mil5.2.3:8.2","mil5.2.3:8.3"],"kind":"text","text":{"pi":"“Hotu, bhante nāgasena, tathā taṁ sampaṭicchāmi.\nṬhapito hotu arahā tasmiṁ vatthusmiṁ, tasantu avasesā sattā, niraye pana nerayikā sattā dukkhā tibbā kaṭukā vedanā vedayamānā jalitapajjalitasabbaṅgapaccaṅgā ruṇṇakāruññakanditaparidevitalālappitamukhā asayhatibbadukkhābhibhūtā atāṇā asaraṇā asaraṇībhūtā anappasokāturā antimapacchimagatikā ekantasokaparāyaṇā uṇhatikhiṇacaṇḍakharatapanatejavanto bhīmabhayajanakaninādamahāsaddā saṁsibbitachabbidhajālāmālākulā samantā satayojanānupharaṇaccivegā kadariyā tapanā mahānirayā cavamānā maccuno bhāyantī”ti?\n“Āma, mahārājā”ti."}},{"id":"mil5.2.3:9","sourceIds":["mil5.2.3:9.1","mil5.2.3:9.2","mil5.2.3:9.3","mil5.2.3:9.4"],"kind":"text","text":{"pi":"“Nanu, bhante nāgasena, nirayo ekantadukkhavedanīyo, kissa pana te nerayikā sattā ekantadukkhavedanīyā nirayā cavamānā maccuno bhāyanti, kissa niraye ramantī”ti?\n“Na te, mahārāja, nerayikā sattā niraye ramanti, muñcitukāmāva te nirayā.\nMaraṇasseva so, mahārāja, ānubhāvo, yena tesaṁ santāso uppajjatī”ti.\n“Etaṁ kho, bhante nāgasena, na saddahāmi, yaṁ muccitukāmānaṁ cutiyā santāso uppajjatīti, hāsanīyaṁ, bhante nāgasena, taṁ ṭhānaṁ, yaṁ te patthitaṁ labhanti, kāraṇena maṁ saññāpehī”ti."}},{"id":"mil5.2.3:10","sourceIds":["mil5.2.3:10.1","mil5.2.3:10.2","mil5.2.3:10.3","mil5.2.3:10.4","mil5.2.3:10.5","mil5.2.3:10.6"],"kind":"text","text":{"pi":"“Maraṇanti kho, mahārāja, etaṁ adiṭṭhasaccānaṁ tāsanīyaṭṭhānaṁ, etthāyaṁ jano tasati ca ubbijjati ca.\nYo ca, mahārāja, kaṇhasappassa bhāyati, so maraṇassa bhāyanto kaṇhasappassa bhāyati.\nYo ca hatthissa bhāyati …pe…\nsīhassa … byagghassa … dīpissa … acchassa … taracchassa … mahiṁsassa … gavayassa … aggissa … udakassa … khāṇukassa … kaṇṭakassa bhāyati.\nYo ca sattiyā bhāyati, so maraṇassa bhāyanto sattiyā bhāyati.\nMaraṇasseva so, mahārāja, sarasasabhāvatejo, tassa sarasasabhāvatejena sakilesā sattā maraṇassa tasanti bhāyanti, muccitukāmāpi, mahārāja, nerayikā sattā maraṇassa tasanti bhāyanti."}},{"id":"mil5.2.3:11","sourceIds":["mil5.2.3:11.1","mil5.2.3:11.2","mil5.2.3:11.3","mil5.2.3:11.4","mil5.2.3:11.5","mil5.2.3:11.6"],"kind":"text","text":{"pi":"Idha, mahārāja, purisassa kāye medo gaṇṭhi uppajjeyya.\nSo tena rogena dukkhito upaddavā parimuccitukāmo bhisakkaṁ sallakattaṁ āmantāpeyya.\nTassa vacanaṁ so bhisakko sallakatto sampaṭicchitvā tassa rogassa uddharaṇāya upakaraṇaṁ upaṭṭhāpeyya, satthakaṁ tikhiṇaṁ kareyya, yamakasalākā aggimhi pakkhipeyya, khāralavaṇaṁ nisadāya pisāpeyya, api nu kho, mahārāja, tassa āturassa tikhiṇasatthakacchedanena yamakasalākādahanena khāraloṇappavesanena tāso uppajjeyyā”ti?\n“Āma, bhante”ti.\n“Iti, mahārāja, tassa āturassa rogā muccitukāmassāpi vedanābhayā santāso uppajjati.\nEvameva kho, mahārāja, nirayā muccitukāmānampi nerayikānaṁ sattānaṁ maraṇabhayā santāso uppajjati."}},{"id":"mil5.2.3:12","sourceIds":["mil5.2.3:12.1","mil5.2.3:12.2","mil5.2.3:12.3","mil5.2.3:12.4","mil5.2.3:12.5"],"kind":"text","text":{"pi":"Idha, mahārāja, puriso issarāparādhiko baddho saṅkhalikabandhanena gabbhe pakkhitto parimuccitukāmo assa, tamenaṁ so issaro mocetukāmo pakkosāpeyya.\nApi nu kho, mahārāja, tassa issarāparādhikassa purisassa ‘katadoso ahan’ti jānantassa issaradassanena santāso uppajjeyyā”ti?\n“Āma, bhante”ti.\n“Iti, mahārāja, tassa issarāparādhikassa purisassa parimuccitukāmassāpi issarabhayā santāso uppajjati.\nEvameva kho, mahārāja, nirayā muccitukāmānampi nerayikānaṁ sattānaṁ maraṇabhayā santāso uppajjatī”ti."}},{"id":"mil5.2.3:13","sourceIds":["mil5.2.3:13.1","mil5.2.3:13.2","mil5.2.3:13.3","mil5.2.3:13.4","mil5.2.3:13.5","mil5.2.3:13.6","mil5.2.3:13.7"],"kind":"text","text":{"pi":"“Aparampi, bhante, uttariṁ kāraṇaṁ brūhi, yenāhaṁ kāraṇena okappeyyan”ti.\n“Idha, mahārāja, puriso daṭṭhavisena āsīvisena daṭṭho bhaveyya, so tena visavikārena pateyya uppateyya vaṭṭeyya pavaṭṭeyya, athaññataro puriso balavantena mantapadena taṁ daṭṭhavisaṁ āsīvisaṁ ānetvā taṁ daṭṭhavisaṁ paccācamāpeyya, api nu kho, mahārāja, tassa visagatassa purisassa tasmiṁ daṭṭhavise sappe sotthihetu upagacchante santāso uppajjeyyā”ti?\n“Āma, bhante”ti.\n“Iti, mahārāja, tathārūpe ahimhi sotthihetupi upagacchante tassa santāso uppajjati.\nEvameva kho, mahārāja, nirayā muccitukāmānampi nerayikānaṁ sattānaṁ maraṇabhayā santāso uppajjati.\nAniṭṭhaṁ, mahārāja, sabbasattānaṁ maraṇaṁ, tasmā nerayikā sattā nirayā parimuccitukāmāpi maccuno bhāyantī”ti.\n“Sādhu, bhante nāgasena, evametaṁ tathā sampaṭicchāmī”ti."}},{"id":"mil5.2.3:14","sourceIds":["mil5.2.3:14.1"],"kind":"text","text":{"pi":"Maccubhāyanābhāyanapañho tatiyo."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mil5.2.3/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}