{"id":"mil5.3.10","title":"10. Vaṇṇabhaṇanapañha","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mil5.3.10","title":"10. Vaṇṇabhaṇanapañha","units":[{"id":"mil5.3.10:0","sourceIds":["mil5.3.10:0.1","mil5.3.10:0.2","mil5.3.10:0.3","mil5.3.10:0.4"],"kind":"text","text":{"pi":"Milindapañha\nMeṇḍakapañha\nPaṇāmitavagga\n10. Vaṇṇabhaṇanapañha"}},{"id":"mil5.3.10:1","sourceIds":["mil5.3.10:1.1","mil5.3.10:1.2"],"kind":"text","text":{"pi":"“Bhante nāgasena, bhāsitampetaṁ bhagavatā—\n‘mamaṁ vā, bhikkhave, pare vaṇṇaṁ bhāseyyuṁ, dhammassa vā, saṅghassa vā vaṇṇaṁ bhāseyyuṁ, tatra tumhehi na ānando, na somanassaṁ, na cetaso uppilāvitattaṁ karaṇīyan’ti puna ca tathāgato selassa brāhmaṇassa yathābhucce vaṇṇe bhaññamāne ānandito sumano uppilāvito bhiyyo uttariṁ sakaguṇaṁ pakittesi—"}},{"id":"mil5.3.10:2","sourceIds":["mil5.3.10:2.1","mil5.3.10:2.2","mil5.3.10:2.3","mil5.3.10:2.4"],"kind":"text","text":{"pi":"‘Rājāhamasmi selāti,\ndhammarājā anuttaro;\nDhammena cakkaṁ vattemi,\ncakkaṁ appaṭivattiyan’ti."}},{"id":"mil5.3.10:3","sourceIds":["mil5.3.10:3.1","mil5.3.10:3.2","mil5.3.10:3.3","mil5.3.10:3.4"],"kind":"text","text":{"pi":"Yadi, bhante nāgasena, bhagavatā bhaṇitaṁ—\n‘mamaṁ vā, bhikkhave, pare vaṇṇaṁ bhāseyyuṁ, dhammassa vā saṅghassa vā vaṇṇaṁ bhāseyyuṁ, tatra tumhehi na ānando, na somanassaṁ, na cetaso uppilāvitattaṁ karaṇīyan’ti, tena hi selassa brāhmaṇassa yathābhucce vaṇṇe bhaññamāne ānandito sumano uppilāvito bhiyyo uttariṁ sakaguṇaṁ pakittesīti yaṁ vacanaṁ, taṁ micchā.\nYadi selassa brāhmaṇassa yathābhucce vaṇṇe bhaññamāne ānandito sumano uppilāvito bhiyyo uttariṁ sakaguṇaṁ pakittesi, tena hi ‘mamaṁ vā, bhikkhave, pare vaṇṇaṁ bhāseyyuṁ, dhammassa vā saṅghassa vā vaṇṇaṁ bhāseyyuṁ, tatra tumhehi na ānando, na somanassaṁ, na cetaso uppilāvitattaṁ karaṇīyan’ti tampi vacanaṁ micchā.\nAyampi ubhato koṭiko pañho tavānuppatto, so tayā nibbāhitabbo”ti."}},{"id":"mil5.3.10:4","sourceIds":["mil5.3.10:4.1","mil5.3.10:4.2","mil5.3.10:4.3"],"kind":"text","text":{"pi":"“Bhāsitampetaṁ, mahārāja, bhagavatā—\n‘mamaṁ vā, bhikkhave, pare vaṇṇaṁ bhāseyyuṁ, dhammassa vā saṅghassa vā vaṇṇaṁ bhāseyyuṁ, tatra tumhehi na ānando, na somanassaṁ, na cetaso uppilāvitattaṁ karaṇīyan’ti.\nSelassa ca brāhmaṇassa yathābhucce vaṇṇe bhaññamāne bhiyyo uttariṁ sakaguṇaṁ pakittitaṁ—"}},{"id":"mil5.3.10:5","sourceIds":["mil5.3.10:5.1","mil5.3.10:5.2","mil5.3.10:5.3","mil5.3.10:5.4"],"kind":"text","text":{"pi":"‘Rājāhamasmi selāti,\ndhammarājā anuttaro;\nDhammena cakkaṁ vattemi,\ncakkaṁ appaṭivattiyan’ti."}},{"id":"mil5.3.10:6","sourceIds":["mil5.3.10:6.1","mil5.3.10:6.2","mil5.3.10:6.3","mil5.3.10:6.4","mil5.3.10:6.5","mil5.3.10:6.6"],"kind":"text","text":{"pi":"Paṭhamaṁ, mahārāja, bhagavatā dhammassa sabhāvasarasalakkhaṇaṁ sabhāvaṁ avitathaṁ bhūtaṁ tacchaṁ tathatthaṁ paridīpayamānena bhaṇitaṁ—\n‘mamaṁ vā bhikkhave, pare vaṇṇaṁ bhāseyyuṁ, dhammassa vā saṅghassa vā vaṇṇaṁ bhāseyyuṁ, tatra tumhehi na ānando, na somanassaṁ, na cetaso uppilāvitattaṁ karaṇīyan’ti.\nYaṁ pana bhagavatā selassa brāhmaṇassa yathābhucce vaṇṇe bhaññamāne bhiyyo uttariṁ sakaguṇaṁ pakittitaṁ—\n‘rājāhamasmi selāti, dhammarājā anuttaro’ti taṁ na lābhahetu, na yasahetu, na attahetu, na pakkhahetu, na antevāsikamyatāya, atha kho anukampāya kāruññena hitavasena evaṁ imassa dhammābhisamayo bhavissati tiṇṇañca māṇavakasatānanti, evaṁ bhiyyo uttariṁ sakaguṇaṁ bhaṇitaṁ—\n‘rājāhamasmi selāti, dhammarājā anuttaro’”ti.\n“Sādhu, bhante nāgasena, evametaṁ tathā sampaṭicchāmī”ti."}},{"id":"mil5.3.10:7","sourceIds":["mil5.3.10:7.1"],"kind":"text","text":{"pi":"Vaṇṇabhaṇanapañho dasamo."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mil5.3.10/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}