{"id":"mil5.3.7","title":"7. Buddhapūjanapañha","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mil5.3.7","title":"7. Buddhapūjanapañha","units":[{"id":"mil5.3.7:0","sourceIds":["mil5.3.7:0.1","mil5.3.7:0.2","mil5.3.7:0.3","mil5.3.7:0.4"],"kind":"text","text":{"pi":"Milindapañha\nMeṇḍakapañha\nPaṇāmitavagga\n7. Buddhapūjanapañha"}},{"id":"mil5.3.7:1","sourceIds":["mil5.3.7:1.1","mil5.3.7:1.2"],"kind":"text","text":{"pi":"“Bhante nāgasena, bhāsitampetaṁ tathāgatena ‘abyāvaṭā tumhe, ānanda, hotha tathāgatassa sarīrapūjāyā’ti.\nPuna ca bhaṇitaṁ—"}},{"id":"mil5.3.7:2","sourceIds":["mil5.3.7:2.1","mil5.3.7:2.2"],"kind":"text","text":{"pi":"‘Pūjetha naṁ pūjaniyassa dhātuṁ,\nEvaṁ kira saggamito gamissathā’ti."}},{"id":"mil5.3.7:3","sourceIds":["mil5.3.7:3.1","mil5.3.7:3.2","mil5.3.7:3.3","mil5.3.7:3.4","mil5.3.7:3.5"],"kind":"text","text":{"pi":"Yadi, bhante nāgasena, tathāgatena bhaṇitaṁ—\n‘abyāvaṭā tumhe, ānanda, hotha tathāgatassa sarīrapūjāyā’ti, tena hi ‘pūjetha naṁ pūjaniyassa dhātuṁ, evaṁ karā saggamito gamissathā’ti yaṁ vacanaṁ, taṁ micchā.\nYadi tathāgatena bhaṇitaṁ—\n‘pūjetha naṁ pūjaniyassa dhātuṁ, evaṁ karā saggamito gamissathā’ti, tena hi ‘abyāvaṭā tumhe, ānanda, hotha tathāgatassa sarīrapūjāyā’ti tampi vacanaṁ micchā.\nAyampi ubhato koṭiko pañho tavānuppatto, so tayā nibbāhitabbo”ti."}},{"id":"mil5.3.7:4","sourceIds":["mil5.3.7:4.1","mil5.3.7:4.2","mil5.3.7:4.3","mil5.3.7:4.4"],"kind":"text","text":{"pi":"“Bhāsitampetaṁ, mahārāja, bhagavatā ‘abyāvaṭā tumhe, ānanda, hotha tathāgatassa sarīrapūjāyā’ti, puna ca bhaṇitaṁ—\n‘pūjetha naṁ pūjaniyassa dhātuṁ, evaṁ karā saggamito gamissathā’ti, tañca pana na sabbesaṁ jinaputtānaṁyeva ārabbha bhaṇitaṁ—\n‘abyāvaṭā tumhe, ānanda, hotha tathāgatassa sarīrapūjāyā’ti.\nAkammaṁ hetaṁ, mahārāja, jinaputtānaṁ yadidaṁ pūjā, sammasanaṁ saṅkhārānaṁ, yoniso manasikāro, satipaṭṭhānānupassanā, ārammaṇasāraggāho, kilesayuddhaṁ, sadatthamanuyuñjanā, etaṁ jinaputtānaṁ karaṇīyaṁ, avasesānaṁ devamanussānaṁ pūjā karaṇīyā."}},{"id":"mil5.3.7:5","sourceIds":["mil5.3.7:5.1","mil5.3.7:5.2"],"kind":"text","text":{"pi":"Yathā, mahārāja, mahiyā rājaputtānaṁ hatthiassarathadhanutharulekhamuddāsikkhākhaggamantasutisammutiyuddhayujjhāpanakiriyā karaṇīyā, avasesānaṁ puthuvessasuddānaṁ kasi vaṇijjā gorakkhā karaṇīyā;\nevameva kho, mahārāja, akammaṁ hetaṁ jinaputtānaṁ yadidaṁ pūjā, sammasanaṁ saṅkhārānaṁ, yoniso manasikāro, satipaṭṭhānānupassanā, ārammaṇasāraggāho, kilesayuddhaṁ, sadatthamanuyuñjanā, etaṁ jinaputtānaṁ karaṇīyaṁ, avasesānaṁ devamanussānaṁ pūjā karaṇīyā."}},{"id":"mil5.3.7:6","sourceIds":["mil5.3.7:6.1","mil5.3.7:6.2","mil5.3.7:6.3","mil5.3.7:6.4","mil5.3.7:6.5","mil5.3.7:6.6"],"kind":"text","text":{"pi":"Yathā vā pana, mahārāja, brāhmaṇamāṇavakānaṁ iruvedaṁ yajuvedaṁ sāmavedaṁ athabbaṇavedaṁ lakkhaṇaṁ itihāsaṁ purāṇaṁ nighaṇḍu keṭubhaṁ akkharappabhedaṁ padaṁ veyyākaraṇaṁ bhāsamaggaṁ uppātaṁ supinaṁ nimittaṁ chaḷaṅgaṁ candaggāhaṁ sūriyaggāhaṁ sukkarāhucaritaṁ uḷuggahayuddhaṁ devadundubhissaraṁ okkanti ukkāpātaṁ bhūmikammaṁ disādāhaṁ bhummantalikkhaṁ jotisaṁ lokāyatikaṁ sācakkaṁ migacakkaṁ antaracakkaṁ missakuppādaṁ sakuṇarutaravitaṁ sikkhā karaṇīyā, avasesānaṁ puthuvessasuddānaṁ kasi vaṇijjā gorakkhā karaṇīyā;\nevameva kho, mahārāja, akammaṁ hetaṁ jinaputtānaṁ yadidaṁ pūjā, sammasanaṁ saṅkhārānaṁ, yoniso manasikāro, satipaṭṭhānānupassanā, ārammaṇasāraggāho, kilesayuddhaṁ, sadatthamanuyuñjanā, etaṁ jinaputtānaṁ karaṇīyaṁ, avasesānaṁ devamanussānaṁ pūjā karaṇīyā, tasmā, mahārāja, tathāgato ‘mā ime akamme yuñjantu, kamme ime yuñjantū’ti—\nāha—\n‘abyāvaṭā tumhe, ānanda, hotha tathāgatassa sarīrapūjāyā’ti.\nYadetaṁ, mahārāja, tathāgato na bhaṇeyya, pattacīvarampi attano pariyādāpetvā bhikkhū buddhapūjaṁyeva kareyyun”ti.\n“Sādhu, bhante nāgasena, evametaṁ tathā sampaṭicchāmī”ti."}},{"id":"mil5.3.7:7","sourceIds":["mil5.3.7:7.1"],"kind":"text","text":{"pi":"Buddhapūjanapañho sattamo."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mil5.3.7/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}