{"id":"mil5.4.1","title":"1 Iddhikammavipākapañha","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mil5.4.1","title":"1 Iddhikammavipākapañha","units":[{"id":"mil5.4.1:0","sourceIds":["mil5.4.1:0.1","mil5.4.1:0.2","mil5.4.1:0.3","mil5.4.1:0.4"],"kind":"text","text":{"pi":"Milindapañha\nMeṇḍakapañha\nSabbaññutañāṇavagga\n1 Iddhikammavipākapañha"}},{"id":"mil5.4.1:1","sourceIds":["mil5.4.1:1.1","mil5.4.1:1.2","mil5.4.1:1.3","mil5.4.1:1.4","mil5.4.1:1.5","mil5.4.1:1.6","mil5.4.1:1.7"],"kind":"text","text":{"pi":"“Bhante nāgasena, bhāsitampetaṁ bhagavatā—\n‘etadaggaṁ, bhikkhave, mama sāvakānaṁ bhikkhūnaṁ iddhimantānaṁ yadidaṁ mahāmoggallāno’ti.\nPuna ca kira so laguḷehi paripothito bhinnasīso sañcuṇṇitaṭṭhimaṁsadhamanichinnaparigatto parinibbuto.\nYadi, bhante nāgasena, thero mahāmoggallāno iddhiyā koṭiṁ gato, tena hi laguḷehi pothito parinibbutoti yaṁ vacanaṁ, taṁ micchā.\nYadi laguḷehi paripothito parinibbuto, tena hi iddhiyā koṭiṁ gatoti tampi vacanaṁ micchā.\nKiṁ na samattho iddhiyā attano upaghātaṁ apanayituṁ, sadevakassapi lokassa paṭisaraṇaṁ bhavituṁ arahoti?\nAyampi ubhato koṭiko pañho tavānuppatto, so tayā nibbāhitabbo”ti."}},{"id":"mil5.4.1:2","sourceIds":["mil5.4.1:2.1","mil5.4.1:2.2","mil5.4.1:2.3"],"kind":"text","text":{"pi":"“Bhāsitampetaṁ, mahārāja, bhagavatā—\n‘etadaggaṁ, bhikkhave, mama sāvakānaṁ bhikkhūnaṁ iddhimantānaṁ yadidaṁ mahāmoggallāno’ti.\nĀyasmā ca mahāmoggallāno laguḷahato parinibbuto, tañca pana kammādhiggahitenā”ti."}},{"id":"mil5.4.1:3","sourceIds":["mil5.4.1:3.1","mil5.4.1:3.2","mil5.4.1:3.3","mil5.4.1:3.4","mil5.4.1:3.5","mil5.4.1:3.6"],"kind":"text","text":{"pi":"“Nanu, bhante nāgasena, iddhimato iddhivisayopi kammavipākopi dve acintiyā, acintiyena acintiyaṁ apanayitabbaṁ.\nYathā nāma, bhante, keci phalakāmā kapitthena kapitthaṁ pothenti, ambena ambaṁ pothenti;\nevameva kho, bhante nāgasena, acintiyena acintiyaṁ pothayitvā apanetabban”ti?\n“Acintiyānampi, mahārāja, ekaṁ adhimattaṁ balavataraṁ.\nYathā, mahārāja, mahiyā rājāno honti samajaccā, samajaccānampi tesaṁ eko sabbe abhibhavitvā āṇaṁ pavatteti;\nevameva kho, mahārāja, tesaṁ acintiyānaṁ kammavipākaṁyeva adhimattaṁ balavataraṁ, kammavipākaṁ yeva sabbe abhibhaviya āṇaṁ pavatteti, kammādhiggahitassa avasesā kiriyā okāsaṁ na labhanti."}},{"id":"mil5.4.1:4","sourceIds":["mil5.4.1:4.1","mil5.4.1:4.2","mil5.4.1:4.3","mil5.4.1:4.4"],"kind":"text","text":{"pi":"Idha pana, mahārāja, koci puriso kismiñcideva pakaraṇe aparajjhati, na tassa mātā vā pitā vā bhaginī vā bhātaro vā sakhī vā sahāyakā vā tāyanti, atha kho rājāyeva tattha abhibhaviya āṇaṁ pavatteti.\nKiṁ tattha kāraṇaṁ?\nAparādhikatā.\nEvameva kho, mahārāja, tesaṁ acintiyānaṁ kammavipākaṁyeva adhimattaṁ balavataraṁ, kammavipākaṁyeva sabbe abhibhaviya āṇaṁ pavatteti, kammādhiggahitassa avasesā kiriyā okāsaṁ na labhanti."}},{"id":"mil5.4.1:5","sourceIds":["mil5.4.1:5.1","mil5.4.1:5.2","mil5.4.1:5.3","mil5.4.1:5.4","mil5.4.1:5.5"],"kind":"text","text":{"pi":"Yathā vā pana, mahārāja, mahiyā davaḍāhe samuṭṭhite ghaṭasahassampi udakaṁ na sakkoti nibbāpetuṁ, atha kho aggiyeva tattha abhibhaviya āṇaṁ pavatteti.\nKiṁ tattha kāraṇaṁ?\nBalavatā tejassa.\nEvameva kho, mahārāja, tesaṁ acintiyānaṁ kammavipākaṁ yeva adhimattaṁ balavataraṁ, kammavipākaṁyeva sabbe abhibhaviya āṇaṁ pavatteti, kammādhiggahitassa avasesā kiriyā okāsaṁ na labhanti, tasmā, mahārāja, āyasmato mahāmoggallānassa kammādhiggahitassa laguḷehi pothiyamānassa iddhiyā samannāhāro nāhosī”ti.\n“Sādhu, bhante nāgasena, evametaṁ tathā sampaṭicchāmī”ti."}},{"id":"mil5.4.1:6","sourceIds":["mil5.4.1:6.1"],"kind":"text","text":{"pi":"Iddhikammavipākapañho paṭhamo."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mil5.4.1/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}