{"id":"mil5.4.8","title":"8. Amarādevīpañha","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mil5.4.8","title":"8. Amarādevīpañha","units":[{"id":"mil5.4.8:0","sourceIds":["mil5.4.8:0.1","mil5.4.8:0.2","mil5.4.8:0.3","mil5.4.8:0.4"],"kind":"text","text":{"pi":"Milindapañha\nMeṇḍakapañha\nSabbaññutañāṇavagga\n8. Amarādevīpañha"}},{"id":"mil5.4.8:1","sourceIds":["mil5.4.8:1.1"],"kind":"text","text":{"pi":"“Bhante nāgasena, bhāsitampetaṁ bhagavatā—"}},{"id":"mil5.4.8:2","sourceIds":["mil5.4.8:2.1","mil5.4.8:2.2","mil5.4.8:2.3","mil5.4.8:2.4"],"kind":"text","text":{"pi":"‘Sace labhetha khaṇaṁ vā raho vā,\nNimantakaṁ vāpi labhetha tādisaṁ;\nSabbāva itthī kayiruṁ nu pāpaṁ,\nAññaṁ aladdhā pīṭhasappinā saddhin’ti."}},{"id":"mil5.4.8:3","sourceIds":["mil5.4.8:3.1","mil5.4.8:3.2","mil5.4.8:3.3","mil5.4.8:3.4","mil5.4.8:3.5","mil5.4.8:3.6","mil5.4.8:3.7","mil5.4.8:3.8","mil5.4.8:3.9"],"kind":"text","text":{"pi":"Puna ca kathīyati ‘mahosadhassa bhariyā amarā nāma itthī gāmake ṭhapitā pavutthapatikā raho nisinnā vivittā rājappaṭisamaṁ sāmikaṁ karitvā sahassena nimantīyamānā pāpaṁ nākāsī’ti.\nYadi, bhante nāgasena, bhagavatā bhaṇitaṁ—\n‘sace …pe…\nsaddhin’ti tena hi ‘mahosadhassa bhariyā …pe…\nnākāsī’ti yaṁ vacanaṁ, taṁ micchā.\nYadi mahosadhassa bhariyā …pe…\nnākāsi, tena hi ‘sace …pe…\nsaddhin’ti tampi vacanaṁ micchā.\nAyampi ubhato koṭiko pañho tavānuppatto, so tayā nibbāhitabbo”ti."}},{"id":"mil5.4.8:4","sourceIds":["mil5.4.8:4.1","mil5.4.8:4.2","mil5.4.8:4.3","mil5.4.8:4.4","mil5.4.8:4.5","mil5.4.8:4.6"],"kind":"text","text":{"pi":"“Bhāsitampetaṁ, mahārāja, bhagavatā—\n‘sace …pe…\nsaddhin’ti.\nKathīyati ca ‘mahosadhassa bhariyā …pe…\nnākāsī’ti.\nKareyya sā, mahārāja, itthī sahassaṁ labhamānā tādisena purisena saddhiṁ pāpakammaṁ, na sā kareyya sace khaṇaṁ vā raho vā nimantakaṁ vāpi tādisaṁ labheyya, vicinantī sā, mahārāja, amarā itthī na addasa khaṇaṁ vā raho vā nimantakaṁ vāpi tādisaṁ."}},{"id":"mil5.4.8:5","sourceIds":["mil5.4.8:5.1","mil5.4.8:5.2"],"kind":"text","text":{"pi":"Idha loke garahabhayā khaṇaṁ na passi, paraloke nirayabhayā khaṇaṁ na passi, kaṭukavipākaṁ pāpanti khaṇaṁ na passi, piyaṁ amuñcitukāmā khaṇaṁ na passi, sāmikassa garukatāya khaṇaṁ na passi, dhammaṁ apacāyantī khaṇaṁ na passi, anariyaṁ garahantī khaṇaṁ na passi, kiriyaṁ abhinditukāmā khaṇaṁ na passi.\nEvarūpehi bahūhi kāraṇehi khaṇaṁ na passi."}},{"id":"mil5.4.8:6","sourceIds":["mil5.4.8:6.1","mil5.4.8:6.2","mil5.4.8:6.3","mil5.4.8:6.4","mil5.4.8:6.5","mil5.4.8:6.6","mil5.4.8:6.7"],"kind":"text","text":{"pi":"Rahopi sā loke vicinitvā apassantī pāpaṁ nākāsi.\nSace sā manussehi raho labheyya, atha amanussehi raho na labheyya.\nSace amanussehi raho labheyya, atha paracittavidūhi pabbajitehi raho na labheyya.\nSace paracittavidūhi pabbajitehi raho labheyya, atha paracittavidūnīhi devatāhi raho na labheyya.\nSace paracittavidūnīhi devatāhi raho labheyya, attanāva pāpehi raho na labheyya.\nSace attanāva pāpehi raho labheyya, atha adhammena raho na labheyya.\nEvarūpehi bahuvidhehi kāraṇehi raho alabhitvā pāpaṁ nākāsi."}},{"id":"mil5.4.8:7","sourceIds":["mil5.4.8:7.1","mil5.4.8:7.2","mil5.4.8:7.3","mil5.4.8:7.4","mil5.4.8:7.5","mil5.4.8:7.6","mil5.4.8:7.7"],"kind":"text","text":{"pi":"Nimantakampi sā loke vicinitvā tādisaṁ alabhantī pāpaṁ nākāsi.\nMahosadho, mahārāja, paṇḍito aṭṭhavīsatiyā aṅgehi samannāgato.\nKatamehi aṭṭhavīsatiyā aṅgehi samannāgato?\nMahosadho, mahārāja, sūro hirimā ottappī sapakkho mittasampanno khamo sīlavā saccavādī soceyyasampanno akkodhano anatimānī anusūyako vīriyavā āyūhako saṅgāhako saṁvibhāgī sakhilo nivātavutti saṇho asaṭho amāyāvī atibuddhisampanno kittimā vijjāsampanno hitesī upanissitānaṁ patthito sabbajanassa dhanavā yasavā.\nMahosadho, mahārāja, paṇḍito imehi aṭṭhavīsatiyā aṅgehi samannāgato.\nSā aññaṁ tādisaṁ nimantakaṁ alabhitvā pāpaṁ nākāsī”ti.\n“Sādhu, bhante nāgasena, evametaṁ tathā sampaṭicchāmī”ti."}},{"id":"mil5.4.8:8","sourceIds":["mil5.4.8:8.1"],"kind":"text","text":{"pi":"Amarādevīpañho aṭṭhamo."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mil5.4.8/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}