{"id":"mil5.5.9","title":"9. Gāthābhigītabhojanakathāpañha","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mil5.5.9","title":"9. Gāthābhigītabhojanakathāpañha","units":[{"id":"mil5.5.9:0","sourceIds":["mil5.5.9:0.1","mil5.5.9:0.2","mil5.5.9:0.3","mil5.5.9:0.4"],"kind":"text","text":{"pi":"Milindapañha\nMeṇḍakapañha\nSanthavavagga\n9. Gāthābhigītabhojanakathāpañha"}},{"id":"mil5.5.9:1","sourceIds":["mil5.5.9:1.1"],"kind":"text","text":{"pi":"“Bhante nāgasena, bhāsitampetaṁ bhagavatā—"}},{"id":"mil5.5.9:2","sourceIds":["mil5.5.9:2.1","mil5.5.9:2.2","mil5.5.9:2.3","mil5.5.9:2.4"],"kind":"text","text":{"pi":"‘Gāthābhigītaṁ me abhojaneyyaṁ,\nSampassataṁ brāhmaṇa nesa dhammo;\nGāthābhigītaṁ panudanti buddhā,\nDhamme satī brāhmaṇa vuttiresā’ti."}},{"id":"mil5.5.9:3","sourceIds":["mil5.5.9:3.1","mil5.5.9:3.2","mil5.5.9:3.3","mil5.5.9:3.4","mil5.5.9:3.5","mil5.5.9:3.6","mil5.5.9:3.7"],"kind":"text","text":{"pi":"Puna ca bhagavā parisāya dhammaṁ desento kathento anupubbikathaṁ paṭhamaṁ tāva dānakathaṁ katheti, pacchā sīlakathaṁ, tassa bhagavato sabbalokissarassa bhāsitaṁ sutvā devamanussā abhisaṅkharitvā dānaṁ denti, tassa taṁ uyyojitaṁ dānaṁ sāvakā paribhuñjanti.\nYadi, bhante nāgasena, bhagavatā bhaṇitaṁ—\n‘gāthābhigītaṁ me abhojaneyyan’ti, tena hi ‘bhagavā dānakathaṁ paṭhamaṁ kathetī’ti yaṁ vacanaṁ, taṁ micchā.\nYadi dānakathaṁ paṭhamaṁ katheti, tena hi ‘gāthābhigītaṁ me abhojaneyyan’ti tampi vacanaṁ micchā.\nKiṅkāraṇaṁ?\nYo so, bhante, dakkhiṇeyyo gihīnaṁ piṇḍapātadānassa vipākaṁ katheti, tassa te dhammakathaṁ sutvā pasannacittā aparāparaṁ dānaṁ denti, ye taṁ dānaṁ paribhuñjanti, sabbe te gāthābhigītaṁ paribhuñjanti.\nAyampi ubhato koṭiko pañho nipuṇo gambhīro tavānuppatto, so tayā nibbāhitabbo”ti."}},{"id":"mil5.5.9:4","sourceIds":["mil5.5.9:4.1","mil5.5.9:4.2","mil5.5.9:4.3","mil5.5.9:4.4","mil5.5.9:4.5","mil5.5.9:4.6","mil5.5.9:4.7"],"kind":"text","text":{"pi":"“Bhāsitampetaṁ, mahārāja, bhagavatā—\n‘gāthābhigītaṁ me abhojaneyyaṁ, sampassataṁ brāhmaṇa nesa dhammo.\nGāthābhigītaṁ panudanti buddhā, dhamme satī brāhmaṇa vuttiresā’ti, katheti ca bhagavā paṭhamaṁ dānakathaṁ, tañca pana kiriyaṁ sabbesaṁ tathāgatānaṁ paṭhamaṁ dānakathāya, tattha cittaṁ abhiramāpetvā pacchā sīle niyojenti.\nYathā, mahārāja, manussā taruṇadārakānaṁ paṭhamaṁ tāva kīḷābhaṇḍakāni denti.\nSeyyathidaṁ—\nvaṅkakaṁ ghaṭikaṁ ciṅgulakaṁ pattāḷhakaṁ rathakaṁ dhanukaṁ, pacchā te sake sake kamme niyojenti.\nEvameva kho, mahārāja, tathāgato paṭhamaṁ dānakathāya cittaṁ abhiramāpetvā pacchā sīle niyojeti."}},{"id":"mil5.5.9:5","sourceIds":["mil5.5.9:5.1","mil5.5.9:5.2","mil5.5.9:5.3"],"kind":"text","text":{"pi":"Yathā vā pana, mahārāja, bhisakko nāma āturānaṁ paṭhamaṁ tāva catūhapañcāhaṁ telaṁ pāyeti balakaraṇāya sinehanāya, pacchā vireceti;\nevameva kho, mahārāja, tathāgato paṭhamaṁ tāva dānakathāya cittaṁ abhiramāpetvā pacchā sīle niyojeti.\nDāyakānaṁ, mahārāja, dānapatīnaṁ cittaṁ mudukaṁ hoti maddavaṁ siniddhaṁ, tena te dānasetusaṅkamena dānanāvāya saṁsārasāgarapāramanugacchanti, tasmā tesaṁ paṭhamaṁ kammabhūmimanusāsati, na ca kenaci viññattimāpajjatī”ti."}},{"id":"mil5.5.9:6","sourceIds":["mil5.5.9:6.1","mil5.5.9:6.2","mil5.5.9:6.3","mil5.5.9:6.4"],"kind":"text","text":{"pi":"“Bhante nāgasena, ‘viññattin’ti yaṁ vadesi, kati pana tā viññattiyo”ti?\n“Dvemā, mahārāja, viññattiyo kāyaviññatti vacīviññatti cāti.\nTattha atthi kāyaviññatti sāvajjā, atthi anavajjā.\nAtthi vacīviññatti sāvajjā, atthi anavajjā."}},{"id":"mil5.5.9:7","sourceIds":["mil5.5.9:7.1","mil5.5.9:7.2","mil5.5.9:7.3"],"kind":"text","text":{"pi":"Katamā kāyaviññatti sāvajjā?\nIdhekacco bhikkhu kulāni upagantvā anokāse ṭhito ṭhānaṁ bhañjati, ayaṁ kāyaviññatti sāvajjā.\nTāya ca viññāpitaṁ ariyā na paribhuñjanti, so ca puggalo ariyānaṁ samaye oññāto hoti hīḷito khīḷito garahito paribhūto acittīkato, bhinnājīvotveva saṅkhaṁ gacchati."}},{"id":"mil5.5.9:8","sourceIds":["mil5.5.9:8.1"],"kind":"text","text":{"pi":"Puna caparaṁ, mahārāja, idhekacco bhikkhu kulāni upagantvā anokāse ṭhito galaṁ paṇāmetvā morapekkhitaṁ pekkhati ‘evaṁ ime passantī’ti, tena ca te passanti, ayampi kāyaviññatti sāvajjā, tāya ca viññāpitaṁ ariyā na paribhuñjanti, so ca puggalo ariyānaṁ samaye oññāto hoti hīḷito khīḷito garahito paribhūto acittīkato, bhinnājīvotveva saṅkhaṁ gacchati."}},{"id":"mil5.5.9:9","sourceIds":["mil5.5.9:9.1"],"kind":"text","text":{"pi":"Puna caparaṁ, mahārāja, idhekacco bhikkhu hanukāya vā bhamukāya vā aṅguṭṭhena vā viññāpeti, ayampi kāyaviññatti sāvajjā, tāya ca viññāpitaṁ ariyā na paribhuñjanti, so ca puggalo ariyānaṁ samaye oññāto hoti hīḷito khīḷito garahito paribhūto acittīkato, bhinnājīvotveva saṅkhaṁ gacchati."}},{"id":"mil5.5.9:10","sourceIds":["mil5.5.9:10.1","mil5.5.9:10.2","mil5.5.9:10.3","mil5.5.9:10.4"],"kind":"text","text":{"pi":"Katamā kāyaviññatti anavajjā?\nIdha bhikkhu kulāni upagantvā sato samāhito sampajāno ṭhānepi aṭṭhānepi yathānusiṭṭhiṁ gantvā ṭhāne tiṭṭhati, dātukāmesu tiṭṭhati, adātukāmesu pakkamati.\nAyaṁ kāyaviññatti anavajjā, tāya ca viññāpitaṁ ariyā paribhuñjanti, so ca puggalo ariyānaṁ samaye vaṇṇito hoti thuto pasattho sallekhitācāro, parisuddhājīvotveva saṅkhaṁ gacchati.\nBhāsitampetaṁ, mahārāja, bhagavatā devātidevena—"}},{"id":"mil5.5.9:11","sourceIds":["mil5.5.9:11.1","mil5.5.9:11.2","mil5.5.9:11.3","mil5.5.9:11.4"],"kind":"text","text":{"pi":"‘Na ve yācanti sappaññā,\nDhīro ca veditumarahati;\nUddissa ariyā tiṭṭhanti,\nEsā ariyāna yācanā’ti."}},{"id":"mil5.5.9:12","sourceIds":["mil5.5.9:12.1","mil5.5.9:12.2"],"kind":"text","text":{"pi":"Katamā vacīviññatti sāvajjā?\nIdha, mahārāja, bhikkhu vācāya bahuvidhaṁ viññāpeti cīvarapiṇḍapātasenāsanagilānappaccayabhesajjaparikkhāraṁ, ayaṁ vacīviññatti sāvajjā, tāya ca viññāpitaṁ ariyā na paribhuñjanti, so ca puggalo ariyānaṁ samaye oññāto hoti hīḷito khīḷito garahito paribhūto acittīkato, bhinnājīvotveva saṅkhaṁ gacchati."}},{"id":"mil5.5.9:13","sourceIds":["mil5.5.9:13.1"],"kind":"text","text":{"pi":"Puna caparaṁ, mahārāja, idhekacco bhikkhu paresaṁ sāvento evaṁ bhaṇati ‘iminā me attho’ti, tāya ca vācāya paresaṁ sāvitāya tassa lābho uppajjati, ayampi vacīviññatti sāvajjā, tāya ca viññāpitaṁ ariyā na paribhuñjanti, so ca puggalo ariyānaṁ samaye oññāto hoti hīḷito khīḷito garahito paribhūto acittīkato, bhinnājīvotveva saṅkhaṁ gacchati."}},{"id":"mil5.5.9:14","sourceIds":["mil5.5.9:14.1"],"kind":"text","text":{"pi":"Puna caparaṁ, mahārāja, idhekacco bhikkhu vacīvipphārena parisāya sāveti ‘evañca evañca bhikkhūnaṁ dātabban’ti, tañca te vacanaṁ sutvā parikittitaṁ abhiharanti, ayampi vacīviññatti sāvajjā, tāya ca viññāpitaṁ ariyā na paribhuñjanti, so ca puggalo ariyānaṁ samaye oññāto hoti hīḷito khīḷito garahito paribhūto acittīkato, bhinnājīvotveva saṅkhaṁ gacchati."}},{"id":"mil5.5.9:15","sourceIds":["mil5.5.9:15.1","mil5.5.9:15.2","mil5.5.9:15.3","mil5.5.9:15.4"],"kind":"text","text":{"pi":"Nanu, mahārāja, theropi sāriputto atthaṅgate sūriye rattibhāge gilāno samāno therena mahāmoggallānena bhesajjaṁ pucchīyamāno vācaṁ bhindi, tassa tena vacībhedena bhesajjaṁ uppajji.\nAtha thero sāriputto ‘vacībhedena me imaṁ bhesajjaṁ uppannaṁ, mā me ājīvo bhijjī’ti ājīvabhedabhayā taṁ bhesajjaṁ pajahi na upajīvi.\nEvampi vacīviññatti sāvajjā, tāya ca viññāpitaṁ ariyā na paribhuñjanti.\nSo ca puggalo ariyānaṁ samaye oññāto hoti hīḷito khīḷito garahito paribhūto acittīkato, bhinnājīvotveva saṅkhaṁ gacchati."}},{"id":"mil5.5.9:16","sourceIds":["mil5.5.9:16.1","mil5.5.9:16.2"],"kind":"text","text":{"pi":"Katamā vacīviññatti anavajjā?\nIdha, mahārāja, bhikkhu sati paccaye bhesajjaṁ viññāpeti ñātipavāritesu kulesu, ayaṁ vacīviññatti anavajjā, tāya ca viññāpitaṁ ariyā paribhuñjanti, so ca puggalo ariyānaṁ samaye vaṇṇito hoti thomito pasattho, parisuddhājīvotveva saṅkhaṁ gacchati, anumato tathāgatehi arahantehi sammāsambuddhehi."}},{"id":"mil5.5.9:17","sourceIds":["mil5.5.9:17.1"],"kind":"text","text":{"pi":"Yaṁ pana, mahārāja, tathāgato kasibhāradvājassa brāhmaṇassa bhojanaṁ pajahi, taṁ āveṭhanaviniveṭhanakaḍḍhananiggahappaṭikammena nibbatti, tasmā tathāgato taṁ piṇḍapātaṁ paṭikkhipi na upajīvī”ti."}},{"id":"mil5.5.9:18","sourceIds":["mil5.5.9:18.1","mil5.5.9:18.2"],"kind":"text","text":{"pi":"“Sabbakālaṁ, bhante nāgasena, tathāgate bhuñjamāne devatā dibbaṁ ojaṁ patte ākiranti, udāhu ‘sūkaramaddave ca madhupāyāse cā’ti dvīsuyeva piṇḍapātesu ākiriṁsū”ti?\n“Sabbakālaṁ, mahārāja, tathāgate bhuñjamāne devatā dibbaṁ ojaṁ gahetvā upatiṭṭhitvā uddhaṭuddhaṭe ālope ākiranti."}},{"id":"mil5.5.9:19","sourceIds":["mil5.5.9:19.1","mil5.5.9:19.2","mil5.5.9:19.3","mil5.5.9:19.4","mil5.5.9:19.5"],"kind":"text","text":{"pi":"Yathā, mahārāja, rañño sūdo rañño bhuñjantassa sūpaṁ gahetvā upatiṭṭhitvā kabaḷe kabaḷe sūpaṁ ākirati;\nevameva kho, mahārāja, sabbakālaṁ tathāgate bhuñjamāne devatā dibbaṁ ojaṁ gahetvā upatiṭṭhitvā uddhaṭuddhaṭe ālope dibbaṁ ojaṁ ākiranti.\nVerañjāyampi, mahārāja, tathāgatassa sukkhayavapulake bhuñjamānassa devatā dibbena ojena temayitvā temayitvā upasaṁhariṁsu, tena tathāgatassa kāyo upacito ahosī”ti.\n“Lābhā vata, bhante nāgasena, tāsaṁ devatānaṁ, yā tathāgatassa sarīrappaṭijaggane satataṁ samitaṁ ussukkamāpannā.\nSādhu, bhante nāgasena, evametaṁ tathā sampaṭicchāmī”ti."}},{"id":"mil5.5.9:20","sourceIds":["mil5.5.9:20.1"],"kind":"text","text":{"pi":"Gāthābhigītabhojanakathāpañho navamo."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mil5.5.9/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}