{"id":"mil6.1.4","title":"4. Paṭipadādosapañha","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mil6.1.4","title":"4. Paṭipadādosapañha","units":[{"id":"mil6.1.4:0","sourceIds":["mil6.1.4:0.1","mil6.1.4:0.2","mil6.1.4:0.3","mil6.1.4:0.4"],"kind":"text","text":{"pi":"Milindapañha\nAnumānapañha\nBuddhavagga\n4. Paṭipadādosapañha"}},{"id":"mil6.1.4:1","sourceIds":["mil6.1.4:1.1"],"kind":"text","text":{"pi":"“Bhante nāgasena, yadā bodhisatto dukkarakārikaṁ akāsi, netādiso aññatra ārambho ahosi nikkamo kilesayuddhaṁ maccusenaṁ vidhamanaṁ āhārapariggaho dukkarakārikā, evarūpe parakkame kiñci assādaṁ alabhitvā tameva cittaṁ parihāpetvā evamavoca ‘na kho panāhaṁ imāya kaṭukāya dukkarakārikāya adhigacchāmi uttari manussadhammaṁ alamariyañāṇadassanavisesaṁ, siyā nu kho añño maggo bodhāyā’ti, tato nibbinditvā aññena maggena sabbaññutaṁ patto, puna tāya paṭipadāya sāvake anusāsati samādapeti."}},{"id":"mil6.1.4:2","sourceIds":["mil6.1.4:2.1","mil6.1.4:2.2","mil6.1.4:2.3","mil6.1.4:2.4"],"kind":"text","text":{"pi":"‘Ārambhatha nikkhamatha,\nyuñjatha buddhasāsane;\nDhunātha maccuno senaṁ,\nnaḷāgāraṁva kuñjaro’ti."}},{"id":"mil6.1.4:3","sourceIds":["mil6.1.4:3.1"],"kind":"text","text":{"pi":"Kena nu kho, bhante nāgasena, kāraṇena tathāgato yāya paṭipadāya attanā nibbinno virattarūpo, tattha sāvake anusāsati samādapetī”ti?"}},{"id":"mil6.1.4:4","sourceIds":["mil6.1.4:4.1","mil6.1.4:4.2","mil6.1.4:4.3","mil6.1.4:4.4","mil6.1.4:4.5"],"kind":"text","text":{"pi":"“Tadāpi, mahārāja, etarahipi sāyeva paṭipadā, taṁyeva paṭipadaṁ paṭipajjitvā bodhisatto sabbaññutaṁ patto.\nApi ca, mahārāja, bodhisatto ativīriyaṁ karonto niravasesato āhāraṁ uparundhi.\nTassa āhārūparodhena cittadubbalyaṁ uppajji.\nSo tena dubbalyena nāsakkhi sabbaññutaṁ pāpuṇituṁ, so mattamattaṁ kabaḷīkārāhāraṁ sevanto tāyeva paṭipadāya nacirasseva sabbaññutaṁ pāpuṇi.\nSāyeva, mahārāja, paṭipadā sabbesaṁ tathāgatānaṁ sabbaññutañāṇappaṭilābhāya."}},{"id":"mil6.1.4:5","sourceIds":["mil6.1.4:5.1","mil6.1.4:5.2"],"kind":"text","text":{"pi":"Yathā, mahārāja, sabbesaṁ sattānaṁ āhāro upatthambho, āhārūpanissitā sabbe sattā sukhaṁ anubhavanti;\nevameva kho, mahārāja, sāyeva paṭipadā sabbesaṁ tathāgatānaṁ sabbaññutañāṇappaṭilābhāya, neso, mahārāja, doso ārambhassa, na nikkamassa, na kilesayuddhassa, yena tathāgato tasmiṁ samaye na pāpuṇi sabbaññutañāṇaṁ, atha kho āhārūparodhasseveso doso, sadā paṭiyattā yevesā paṭipadā."}},{"id":"mil6.1.4:6","sourceIds":["mil6.1.4:6.1","mil6.1.4:6.2","mil6.1.4:6.3","mil6.1.4:6.4","mil6.1.4:6.5","mil6.1.4:6.6"],"kind":"text","text":{"pi":"Yathā, mahārāja, puriso addhānaṁ ativegena gaccheyya, tena so pakkhahato vā bhaveyya pīṭhasappī vā asañcaro pathavitale.\nApi nu kho, mahārāja, mahāpathaviyā doso atthi, yena so puriso pakkhahato ahosī”ti?\n“Na hi, bhante;\nsadā paṭiyattā, bhante, mahāpathavī, kuto tassā doso?\nVāyāmasseveso doso, yena so puriso pakkhahato ahosī”ti.\n“Evameva kho, mahārāja, neso doso ārambhassa, na nikkamassa, na kilesayuddhassa, yena tathāgato tasmiṁ samaye na pāpuṇi sabbaññutañāṇaṁ, atha kho āhārūparodhasseveso doso sadā paṭiyattā yevesā paṭipadā."}},{"id":"mil6.1.4:7","sourceIds":["mil6.1.4:7.1","mil6.1.4:7.2","mil6.1.4:7.3","mil6.1.4:7.4"],"kind":"text","text":{"pi":"Yathā vā pana, mahārāja, puriso kiliṭṭhaṁ sāṭakaṁ nivāseyya, na so taṁ dhovāpeyya, neso doso udakassa, sadā paṭiyattaṁ udakaṁ.\nPurisasseveso doso.\nEvameva kho, mahārāja, neso doso ārambhassa, na nikkamassa, na kilesayuddhassa, yena tathāgato tasmiṁ samaye na pāpuṇi sabbaññutañāṇaṁ, atha kho āhārūparodhasseveso doso, sadā paṭiyattā yevesā paṭipadā, tasmā tathāgato tāyeva paṭipadāya sāvake anusāsati samādapeti, evaṁ kho, mahārāja, sadā paṭiyattā anavajjā sā paṭipadā”ti.\n“Sādhu, bhante nāgasena, evametaṁ tathā sampaṭicchāmī”ti."}},{"id":"mil6.1.4:8","sourceIds":["mil6.1.4:8.1"],"kind":"text","text":{"pi":"Paṭipadādosapañho catuttho."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mil6.1.4/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}