{"id":"mil6.2.3","title":"3. Khīṇāsavasatisammosapañha","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mil6.2.3","title":"3. Khīṇāsavasatisammosapañha","units":[{"id":"mil6.2.3:0","sourceIds":["mil6.2.3:0.1","mil6.2.3:0.2","mil6.2.3:0.3","mil6.2.3:0.4"],"kind":"text","text":{"pi":"Milindapañha\nAnumānapañha\nNippapañcavagga\n3. Khīṇāsavasatisammosapañha"}},{"id":"mil6.2.3:1","sourceIds":["mil6.2.3:1.1","mil6.2.3:1.2","mil6.2.3:1.3","mil6.2.3:1.4","mil6.2.3:1.5","mil6.2.3:1.6"],"kind":"text","text":{"pi":"“Bhante nāgasena, atthi arahato satisammoso”ti?\n“Vigatasatisammosā kho, mahārāja, arahanto, natthi arahantānaṁ satisammoso”ti.\n“Āpajjeyya pana, bhante, arahā āpattin”ti?\n“Āma, mahārājā”ti.\n“Kismiṁ vatthusmin”ti?\n“Kuṭikāre, mahārāja, sañcaritte, vikāle kālasaññāya, pavārite appavāritasaññāya, anatiritte atirittasaññāyā”ti."}},{"id":"mil6.2.3:2","sourceIds":["mil6.2.3:2.1","mil6.2.3:2.2","mil6.2.3:2.3","mil6.2.3:2.4"],"kind":"text","text":{"pi":"“Bhante nāgasena, tumhe bhaṇatha—\n‘ye āpattiṁ āpajjanti, te dvīhi kāraṇehi āpajjanti anādariyena vā ajānanena vā’ti.\nApi nu kho, bhante, arahato anādariyaṁ hoti, yaṁ arahā āpattiṁ āpajjatī”ti?\n“Na hi, mahārājā”ti."}},{"id":"mil6.2.3:3","sourceIds":["mil6.2.3:3.1","mil6.2.3:3.2"],"kind":"text","text":{"pi":"“Yadi, bhante nāgasena, arahā āpattiṁ āpajjati, natthi ca arahato anādariyaṁ, tena hi atthi arahato satisammoso”ti?\n“Natthi, mahārāja, arahato satisammoso, āpattiñca arahā āpajjatī”ti."}},{"id":"mil6.2.3:4","sourceIds":["mil6.2.3:4.1","mil6.2.3:4.2","mil6.2.3:4.3","mil6.2.3:4.4","mil6.2.3:4.5","mil6.2.3:4.6","mil6.2.3:4.7","mil6.2.3:4.8","mil6.2.3:4.9","mil6.2.3:4.10","mil6.2.3:4.11","mil6.2.3:4.12"],"kind":"text","text":{"pi":"“Tena hi, bhante, kāraṇena maṁ saññāpehi, kiṁ tattha kāraṇan”ti?\n“Dveme, mahārāja, kilesā lokavajjaṁ paṇṇattivajjañcāti.\nKatamaṁ, mahārāja, lokavajjaṁ?\nDasa akusalakammapathā, idaṁ vuccati lokavajjaṁ.\nKatamaṁ paṇṇattivajjaṁ?\nYaṁ loke atthi samaṇānaṁ ananucchavikaṁ ananulomikaṁ, gihīnaṁ anavajjaṁ.\nTattha bhagavā sāvakānaṁ sikkhāpadaṁ paññapeti ‘yāvajīvaṁ anatikkamanīyan’ti.\nVikālabhojanaṁ, mahārāja, lokassa anavajjaṁ, taṁ jinasāsane vajjaṁ.\nBhūtagāmavikopanaṁ, mahārāja, lokassa anavajjaṁ, taṁ jinasāsane vajjaṁ.\nUdake hassadhammaṁ, mahārāja, lokassa anavajjaṁ, taṁ jinasāsane vajjaṁ.\nIti evarūpāni evarūpāni, mahārāja, jinasāsane vajjāni, idaṁ vuccati paṇṇattivajjaṁ.\nLokavajjaṁ abhabbo khīṇāsavo taṁ ajjhācarituṁ."}},{"id":"mil6.2.3:5","sourceIds":["mil6.2.3:5.1","mil6.2.3:5.2","mil6.2.3:5.3","mil6.2.3:5.4","mil6.2.3:5.5","mil6.2.3:5.6","mil6.2.3:5.7"],"kind":"text","text":{"pi":"Yaṁ kilesaṁ paṇṇattivajjaṁ, taṁ ajānanto āpajjeyya.\nAvisayo, mahārāja, ekaccassa arahato sabbaṁ jānituṁ, na hi tassa balaṁ atthi sabbaṁ jānituṁ.\nAnaññātaṁ, mahārāja, arahato itthipurisānaṁ nāmampi gottampi, maggopi tassa mahiyā anaññāto;\nvimuttiṁyeva, mahārāja, ekacco arahā jāneyya;\nchaḷabhiñño arahā sakavisayaṁ jāneyya;\nsabbaññū, mahārāja, tathāgatova sabbaṁ jānātī”ti.\n“Sādhu, bhante nāgasena, evametaṁ tathā sampaṭicchāmī”ti."}},{"id":"mil6.2.3:6","sourceIds":["mil6.2.3:6.1"],"kind":"text","text":{"pi":"Khīṇāsavasatisammosapañho tatiyo."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mil6.2.3/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}