{"id":"mil7.2.5","title":"5. Dīpikaṅgapañha","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mil7.2.5","title":"5. Dīpikaṅgapañha","units":[{"id":"mil7.2.5:0","sourceIds":["mil7.2.5:0.1","mil7.2.5:0.2","mil7.2.5:0.3","mil7.2.5:0.4"],"kind":"text","text":{"pi":"Milindapañha\nOpammakathāpañha\nGadrabhavagga\n5. Dīpikaṅgapañha"}},{"id":"mil7.2.5:1","sourceIds":["mil7.2.5:1.1","mil7.2.5:1.2","mil7.2.5:1.3","mil7.2.5:1.4","mil7.2.5:1.5","mil7.2.5:1.6"],"kind":"text","text":{"pi":"“Bhante nāgasena, ‘dīpikassa dve aṅgāni gahetabbānī’ti yaṁ vadesi, katamāni tāni dve aṅgāni gahetabbānī”ti?\n“Yathā, mahārāja, dīpiko araññe tiṇagahanaṁ vā vanagahanaṁ vā pabbatagahanaṁ vā nissāya nilīyitvā mige gaṇhāti;\nevameva kho, mahārāja, yoginā yogāvacarena vivekaṁ sevitabbaṁ araññaṁ rukkhamūlaṁ pabbataṁ kandaraṁ giriguhaṁ susānaṁ vanapatthaṁ abbhokāsaṁ palālapuñjaṁ appasaddaṁ appanigghosaṁ vijanavātaṁ manussarāhaseyyakaṁ paṭisallānasāruppaṁ;\nvivekaṁ sevamāno hi, mahārāja, yogī yogāvacaro nacirasseva chaḷabhiññāsu ca vasibhāvaṁ pāpuṇāti.\nIdaṁ, mahārāja, dīpikassa paṭhamaṁ aṅgaṁ gahetabbaṁ.\nBhāsitampetaṁ, mahārāja, therehi dhammasaṅgāhakehi—"}},{"id":"mil7.2.5:2","sourceIds":["mil7.2.5:2.1","mil7.2.5:2.2","mil7.2.5:2.3","mil7.2.5:2.4","mil7.2.5:2.5","mil7.2.5:2.6"],"kind":"text","text":{"pi":"‘Yathāpi dīpiko nāma,\nnilīyitvā gaṇhate mige;\nTathevāyaṁ buddhaputto,\nyuttayogo vipassako;\nAraññaṁ pavisitvāna,\ngaṇhāti phalamuttaman’ti."}},{"id":"mil7.2.5:3","sourceIds":["mil7.2.5:3.1","mil7.2.5:3.2","mil7.2.5:3.3","mil7.2.5:3.4"],"kind":"text","text":{"pi":"Puna caparaṁ, mahārāja, dīpiko yaṁ kiñci pasuṁ vadhitvā vāmena passena patitaṁ na bhakkheti;\nevameva kho, mahārāja, yoginā yogāvacarena veḷudānena vā pattadānena vā pupphadānena vā phaladānena vā sinānadānena vā mattikādānena vā cuṇṇadānena vā dantakaṭṭhadānena vā mukhodakadānena vā cātukamyatāya vā muggasupyatāya vā pāribhaṭyatāya vā jaṅghapesanīyena vā vejjakammena vā dūtakammena vā pahiṇagamanena vā piṇḍapaṭipiṇḍena vā dānānuppadānena vā vatthuvijjāya vā nakkhattavijjāya vā aṅgavijjāya vā aññataraññatarena vā buddhappaṭikuṭṭhena micchājīvena nipphāditaṁ bhojanaṁ na bhuñjitabbaṁ vāmena passena patitaṁ pasuṁ viya dīpiko.\nIdaṁ, mahārāja, dīpikassa dutiyaṁ aṅgaṁ gahetabbaṁ.\nBhāsitampetaṁ, mahārāja, therena sāriputtena dhammasenāpatinā—"}},{"id":"mil7.2.5:4","sourceIds":["mil7.2.5:4.1","mil7.2.5:4.2","mil7.2.5:4.3","mil7.2.5:4.4"],"kind":"text","text":{"pi":"‘Vacīviññattivipphārā,\nuppannaṁ madhupāyasaṁ;\nSace bhutto bhaveyyāhaṁ,\nsājīvo garahito mama."}},{"id":"mil7.2.5:5","sourceIds":["mil7.2.5:5.1","mil7.2.5:5.2","mil7.2.5:5.3","mil7.2.5:5.4"],"kind":"text","text":{"pi":"Yadipi me antaguṇaṁ,\nnikkhamitvā bahī care;\nNeva bhindeyyamājīvaṁ,\ncajamānopi jīvitan’”ti."}},{"id":"mil7.2.5:6","sourceIds":["mil7.2.5:6.1"],"kind":"text","text":{"pi":"Dīpikaṅgapañho pañcamo."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mil7.2.5/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}