{"id":"mil7.3.10","title":"10. Samuddaṅgapañha","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mil7.3.10","title":"10. Samuddaṅgapañha","units":[{"id":"mil7.3.10:0","sourceIds":["mil7.3.10:0.1","mil7.3.10:0.2","mil7.3.10:0.3","mil7.3.10:0.4"],"kind":"text","text":{"pi":"Milindapañha\nOpammakathāpañha\nSamuddavagga\n10. Samuddaṅgapañha"}},{"id":"mil7.3.10:1","sourceIds":["mil7.3.10:1.1","mil7.3.10:1.2","mil7.3.10:1.3","mil7.3.10:1.4"],"kind":"text","text":{"pi":"“Bhante nāgasena, ‘samuddassa pañca aṅgāni gahetabbānī’ti yaṁ vadesi, katamāni tāni pañca aṅgāni gahetabbānī”ti?\n“Yathā, mahārāja, mahāsamuddo matena kuṇapena saddhiṁ na saṁvasati;\nevameva kho, mahārāja, yoginā yogāvacarena rāgadosamohamānadiṭṭhimakkhapaḷāsaissāmacchariyamāyāsāṭheyyakuṭilavisamaduccaritakilesamalehi saddhiṁ na saṁvasitabbaṁ.\nIdaṁ, mahārāja, samuddassa paṭhamaṁ aṅgaṁ gahetabbaṁ."}},{"id":"mil7.3.10:2","sourceIds":["mil7.3.10:2.1","mil7.3.10:2.2","mil7.3.10:2.3"],"kind":"text","text":{"pi":"Puna caparaṁ, mahārāja, mahāsamuddo muttāmaṇiveḷuriyasaṅkhasilāpavāḷaphalikamaṇivividharatananicayaṁ dhārento pidahati, na bahi vikirati;\nevameva kho, mahārāja, yoginā yogāvacarena maggaphalajhānavimokkhasamādhisamāpattivipassanābhiññāvividhaguṇaratanāni adhigantvā pidahitabbāni, na bahi nīharitabbāni.\nIdaṁ, mahārāja, samuddassa dutiyaṁ aṅgaṁ gahetabbaṁ."}},{"id":"mil7.3.10:3","sourceIds":["mil7.3.10:3.1","mil7.3.10:3.2","mil7.3.10:3.3"],"kind":"text","text":{"pi":"Puna caparaṁ, mahārāja, mahāsamuddo mahantehi mahābhūtehi saddhiṁ saṁvasati;\nevameva kho, mahārāja, yoginā yogāvacarena appicchaṁ santuṭṭhaṁ dhutavādaṁ sallekhavuttiṁ ācārasampannaṁ lajjiṁ pesalaṁ garuṁ bhāvanīyaṁ vattāraṁ vacanakkhamaṁ codakaṁ pāpagarahiṁ ovādakaṁ anusāsakaṁ viññāpakaṁ sandassakaṁ samādapakaṁ samuttejakaṁ sampahaṁsakaṁ kalyāṇamittaṁ sabrahmacāriṁ nissāya vasitabbaṁ.\nIdaṁ, mahārāja, mahāsamuddassa tatiyaṁ aṅgaṁ gahetabbaṁ."}},{"id":"mil7.3.10:4","sourceIds":["mil7.3.10:4.1","mil7.3.10:4.2","mil7.3.10:4.3","mil7.3.10:4.4"],"kind":"text","text":{"pi":"Puna caparaṁ, mahārāja, mahāsamuddo navasalilasampuṇṇāhi gaṅgāyamunāaciravatīsarabhūmahīādīhi nadīsatasahassehi antalikkhe saliladhārāhi ca pūritopi sakaṁ velaṁ nātivattati;\nevameva kho, mahārāja, yoginā yogāvacarena lābhasakkārasilokavandanamānanapūjanakāraṇā jīvitahetupi sañcicca sikkhāpadavītikkamo na karaṇīyo.\nIdaṁ, mahārāja, mahāsamuddassa catutthaṁ aṅgaṁ gahetabbaṁ.\nBhāsitampetaṁ, mahārāja, bhagavatā devātidevena—"}},{"id":"mil7.3.10:5","sourceIds":["mil7.3.10:5.1","mil7.3.10:5.2"],"kind":"text","text":{"pi":"‘Seyyathāpi, mahārāja, mahāsamuddo ṭhitadhammo velaṁ nātikkamati;\nevameva kho, mahārāja, yaṁ mayā sāvakānaṁ sikkhāpadaṁ paññattaṁ, taṁ mama sāvakā jīvitahetupi nātikkamantī’ti."}},{"id":"mil7.3.10:6","sourceIds":["mil7.3.10:6.1","mil7.3.10:6.2","mil7.3.10:6.3","mil7.3.10:6.4"],"kind":"text","text":{"pi":"Puna caparaṁ, mahārāja, mahāsamuddo sabbasavantīhi gaṅgāyamunāaciravatīsarabhūmahīhi antalikkhe udakadhārāhipi na paripūrati;\nevameva kho, mahārāja, yoginā yogāvacarena uddesaparipucchāsavanadhāraṇavinicchayaabhidhammavinayagāḷhasuttantaviggahapadanikkhepapadasandhi padavibhattinavaṅgajinasāsanavaraṁ suṇantenāpi na tappitabbaṁ.\nIdaṁ, mahārāja, mahāsamuddassa pañcamaṁ aṅgaṁ gahetabbaṁ.\nBhāsitampetaṁ, mahārāja, bhagavatā devātidevena sutasomajātake—"}},{"id":"mil7.3.10:7","sourceIds":["mil7.3.10:7.1","mil7.3.10:7.2","mil7.3.10:7.3","mil7.3.10:7.4"],"kind":"text","text":{"pi":"‘Aggi yathā tiṇakaṭṭhaṁ dahanto,\nNa tappati sāgaro vā nadīhi;\nEvampi ce paṇḍitā rājaseṭṭha,\nSutvā na tappanti subhāsitenā’”ti."}},{"id":"mil7.3.10:8","sourceIds":["mil7.3.10:8.1"],"kind":"text","text":{"pi":"Samuddaṅgapañho dasamo."}},{"id":"mil7.3.10:9","sourceIds":["mil7.3.10:9.1"],"kind":"text","text":{"pi":"Samuddavaggo dutiyo."}},{"id":"mil7.3.10:10","sourceIds":["mil7.3.10:10.1"],"kind":"text","text":{"pi":"Tassuddānaṁ"}},{"id":"mil7.3.10:11","sourceIds":["mil7.3.10:11.1","mil7.3.10:11.2","mil7.3.10:11.3","mil7.3.10:11.4","mil7.3.10:11.5","mil7.3.10:11.6"],"kind":"text","text":{"pi":"Lābulatā ca padumaṁ,\nbījaṁ sālakalyāṇikā;\nNāvā ca nāvālagganaṁ,\nkūpo niyāmako tathā;\nKammakāro samuddo ca,\nvaggo tena pavuccatīti."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mil7.3.10/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}