{"id":"mil7.3.5","title":"5. Nāvaṅgapañha","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mil7.3.5","title":"5. Nāvaṅgapañha","units":[{"id":"mil7.3.5:0","sourceIds":["mil7.3.5:0.1","mil7.3.5:0.2","mil7.3.5:0.3","mil7.3.5:0.4"],"kind":"text","text":{"pi":"Milindapañha\nOpammakathāpañha\nSamuddavagga\n5. Nāvaṅgapañha"}},{"id":"mil7.3.5:1","sourceIds":["mil7.3.5:1.1","mil7.3.5:1.2","mil7.3.5:1.3","mil7.3.5:1.4"],"kind":"text","text":{"pi":"“Bhante nāgasena, ‘nāvāya tīṇi aṅgāni gahetabbānī’ti yaṁ vadesi, katamāni tāni tīṇi aṅgāni gahetabbānī”ti?\n“Yathā, mahārāja, nāvā bahuvidhadārusaṅghāṭasamavāyena bahumpi janaṁ tārayati;\nevameva kho, mahārāja, yoginā yogāvacarena ācārasīlaguṇavattappaṭivattabahuvidhadhammasaṅghāṭasamavāyena sadevako loko tārayitabbo.\nIdaṁ, mahārāja, nāvāya paṭhamaṁ aṅgaṁ gahetabbaṁ."}},{"id":"mil7.3.5:2","sourceIds":["mil7.3.5:2.1","mil7.3.5:2.2","mil7.3.5:2.3"],"kind":"text","text":{"pi":"Puna caparaṁ, mahārāja, nāvā bahuvidhaūmitthanitavegavisaṭamāvaṭṭavegaṁ sahati;\nevameva kho, mahārāja, yoginā yogāvacarena bahuvidhakilesaūmivegaṁ lābhasakkārayasasilokapūjanavandanā parakulesu nindāpasaṁsāsukhadukkhasammānanavimānanabahuvidhadosaūmivegañca sahitabbaṁ.\nIdaṁ, mahārāja, nāvāya dutiyaṁ aṅgaṁ gahetabbaṁ."}},{"id":"mil7.3.5:3","sourceIds":["mil7.3.5:3.1","mil7.3.5:3.2","mil7.3.5:3.3","mil7.3.5:3.4"],"kind":"text","text":{"pi":"Puna caparaṁ, mahārāja, nāvā aparimitamanantamapāramakkhobhitagambhīre mahatimahāghose timitimiṅgalamakaramacchagaṇākule mahatimahāsamudde carati;\nevameva kho, mahārāja, yoginā yogāvacarena tiparivaṭṭadvādasākāracatusaccābhisamayappaṭivedhe mānasaṁ sañcārayitabbaṁ.\nIdaṁ, mahārāja, nāvāya tatiyaṁ aṅgaṁ gahetabbaṁ.\nBhāsitampetaṁ, mahārāja, bhagavatā devātidevena saṁyuttanikāyavare saccasaṁyutte—"}},{"id":"mil7.3.5:4","sourceIds":["mil7.3.5:4.1"],"kind":"text","text":{"pi":"‘Vitakkentā ca kho tumhe, bhikkhave, “idaṁ dukkhan”ti vitakkeyyātha, “ayaṁ dukkhasamudayo”ti vitakkeyyātha, “ayaṁ dukkhanirodho”ti vitakkeyyātha, “ayaṁ dukkhanirodhagāminī paṭipadā”ti vitakkeyyāthā’”ti."}},{"id":"mil7.3.5:5","sourceIds":["mil7.3.5:5.1"],"kind":"text","text":{"pi":"Nāvaṅgapañho pañcamo."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mil7.3.5/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}