{"id":"mil7.3.8","title":"8. Niyāmakaṅgapañha","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mil7.3.8","title":"8. Niyāmakaṅgapañha","units":[{"id":"mil7.3.8:0","sourceIds":["mil7.3.8:0.1","mil7.3.8:0.2","mil7.3.8:0.3","mil7.3.8:0.4"],"kind":"text","text":{"pi":"Milindapañha\nOpammakathāpañha\nSamuddavagga\n8. Niyāmakaṅgapañha"}},{"id":"mil7.3.8:1","sourceIds":["mil7.3.8:1.1","mil7.3.8:1.2","mil7.3.8:1.3","mil7.3.8:1.4","mil7.3.8:1.5"],"kind":"text","text":{"pi":"“Bhante nāgasena, ‘niyāmakassa tīṇi aṅgāni gahetabbānī’ti yaṁ vadesi, katamāni tāni tīṇi aṅgāni gahetabbānī”ti?\n“Yathā, mahārāja, niyāmako rattindivaṁ satataṁ samitaṁ appamatto yattappayatto nāvaṁ sāreti;\nevameva kho, mahārāja, yoginā yogāvacarena cittaṁ niyāmayamānena rattindivaṁ satataṁ samitaṁ appamattena yattappayattena yoniso manasikārena cittaṁ niyāmetabbaṁ.\nIdaṁ, mahārāja, niyāmakassa paṭhamaṁ aṅgaṁ gahetabbaṁ.\nBhāsitampetaṁ, mahārāja, bhagavatā devātidevena dhammapade—"}},{"id":"mil7.3.8:2","sourceIds":["mil7.3.8:2.1","mil7.3.8:2.2","mil7.3.8:2.3","mil7.3.8:2.4"],"kind":"text","text":{"pi":"‘Appamādaratā hotha,\nsacittamanurakkhatha;\nDuggā uddharathattānaṁ,\npaṅke sannova kuñjaro’ti."}},{"id":"mil7.3.8:3","sourceIds":["mil7.3.8:3.1","mil7.3.8:3.2","mil7.3.8:3.3"],"kind":"text","text":{"pi":"Puna caparaṁ, mahārāja, niyāmakassa yaṁ kiñci mahāsamudde kalyāṇaṁ vā pāpakaṁ vā, sabbaṁ taṁ viditaṁ hoti;\nevameva kho, mahārāja, yoginā yogāvacarena kusalākusalaṁ sāvajjānavajjaṁ hīnappaṇītaṁ kaṇhasukkasappaṭibhāgaṁ vijānitabbaṁ.\nIdaṁ, mahārāja, niyāmakassa dutiyaṁ aṅgaṁ gahetabbaṁ."}},{"id":"mil7.3.8:4","sourceIds":["mil7.3.8:4.1","mil7.3.8:4.2","mil7.3.8:4.3","mil7.3.8:4.4","mil7.3.8:4.5"],"kind":"text","text":{"pi":"Puna caparaṁ, mahārāja, niyāmako yante muddikaṁ deti ‘mā koci yantaṁ āmasitthā’ti;\nevameva kho, mahārāja, yoginā yogāvacarena citte saṁvaramuddikā dātabbā ‘mā kiñci pāpakaṁ akusalavitakkaṁ vitakkesī’ti, idaṁ, mahārāja, niyāmakassa tatiyaṁ aṅgaṁ gahetabbaṁ.\nBhāsitampetaṁ, mahārāja, bhagavatā devātidevena saṁyuttanikāyavare—\n‘mā, bhikkhave, pāpake akusale vitakke vitakkeyyātha, seyyathidaṁ—\nkāmavitakkaṁ byāpādavitakkaṁ vihiṁsāvitakkan’”ti."}},{"id":"mil7.3.8:5","sourceIds":["mil7.3.8:5.1"],"kind":"text","text":{"pi":"Niyāmakaṅgapañho aṭṭhamo."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mil7.3.8/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}