{"id":"mil8","title":"Nigamana","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mil8","title":"Nigamana","units":[{"id":"mil8:0","sourceIds":["mil8:0.1","mil8:0.2"],"kind":"text","text":{"pi":"Milindapañha\nNigamana"}},{"id":"mil8:1","sourceIds":["mil8:1.1"],"kind":"text","text":{"pi":"Iti chasu kaṇḍesu bāvīsativaggapatimaṇḍitesu dvāsaṭṭhiadhikā dvesatā imasmiṁ potthake āgatā milindapañhā samattā, anāgatā ca pana dvācattālīsā honti, āgatā ca anāgatā ca sabbā samodhānetvā catūhi adhikā tisatapañhā honti, sabbāva milindapañhāti saṅkhaṁ gacchanti."}},{"id":"mil8:2","sourceIds":["mil8:2.1"],"kind":"text","text":{"pi":"Rañño ca therassa ca pucchāvisajjanāvasāne caturāsītisatasahassayojanabahalā udakapariyantaṁ katvā ayaṁ mahāpathavī chadhā kampittha, vijjullatā nicchariṁsu, devatā dibbapupphavassaṁ pavassiṁsu, mahābrahmā sādhukāramadāsi, mahāsamuddakucchiyaṁ meghatthanitanigghoso viya mahāghoso ahosi, iti so milindo rājā ca orodhagaṇā ca sirasā añjaliṁ paṇāmetvā vandiṁsu."}},{"id":"mil8:3","sourceIds":["mil8:3.1","mil8:3.2"],"kind":"text","text":{"pi":"Milindo rājā ativiya pamuditahadayo sumathitamānahadayo buddhasāsane sāramatino ratanattaye sunikkaṅkho niggumbo nitthaddho hutvā therassa guṇesu pabbajjāsu paṭipadāiriyāpathesu ca ativiya pasanno vissattho nirālayo nihatamānatthambho uddhaṭadāṭho viya bhujagindo evamāha—\n“sādhu, bhante nāgasena, buddhavisayo pañho tayā visajjito, imasmiṁ buddhasāsane ṭhapetvā dhammasenāpatiṁ sāriputtattheraṁ añño tayā sadiso pañhavisajjane natthi, khamatha, bhante nāgasena, mama accayaṁ, upāsakaṁ maṁ, bhante nāgasena, dhāretha ajjatagge pāṇupetaṁ saraṇaṁ gatan”ti."}},{"id":"mil8:4","sourceIds":["mil8:4.1"],"kind":"text","text":{"pi":"Tadā rājā saha balakāyehi nāgasenattheraṁ payirupāsitvā milindaṁ nāma vihāraṁ kāretvā therassa niyyātetvā catūhi paccayehi nāgasenaṁ koṭisatehi bhikkhūhi saddhiṁ paricari, punapi therassa paññāya pasīditvā puttassa rajjaṁ niyyātetvā agārasmā anagāriyaṁ pabbajitvā vipassanaṁ vaḍḍhetvā arahattaṁ pāpuṇi, tena vuttaṁ—"}},{"id":"mil8:5","sourceIds":["mil8:5.1","mil8:5.2","mil8:5.3","mil8:5.4"],"kind":"text","text":{"pi":"“Paññā pasatthā lokasmiṁ,\nkatā saddhammaṭṭhitiyā;\nPaññāya vimatiṁ hantvā,\nsantiṁ papponti paṇḍitā."}},{"id":"mil8:6","sourceIds":["mil8:6.1","mil8:6.2","mil8:6.3","mil8:6.4","mil8:6.5","mil8:6.6","mil8:6.7","mil8:6.8"],"kind":"text","text":{"pi":"Yasmiṁ khandhe ṭhitā paññā,\nsati tattha anūnakā;\nPūjā visesassādhāro,\naggo seṭṭho anuttaro;\nTasmā hi paṇḍito poso,\nsampassaṁ hitamattano;\nPaññavantaṁbhipūjeyya,\ncetiyaṁ viya sādaro”ti."}},{"id":"mil8:7","sourceIds":["mil8:7.1","mil8:7.2","mil8:7.3","mil8:7.4","mil8:7.5","mil8:7.6","mil8:7.7","mil8:7.8"],"kind":"text","text":{"pi":"Laṅkāyaṁ doṇinagare,\nvasatā doṇināminā;\nMahātherena lekhitvā,\nsuṭṭhapitaṁ yathāsutaṁ;\nMilindarājapañho ca,\nnāgasenavisajjanaṁ;\nMilindo hi mahāpañño,\nnāgaseno supaṇḍito."}},{"id":"mil8:8","sourceIds":["mil8:8.1","mil8:8.2","mil8:8.3","mil8:8.4"],"kind":"text","text":{"pi":"Iminā puññakammena,\nIto gacchāmi tussitaṁ;\nMetteyyaṁnāgate passe,\nSuṇeyyaṁ dhammamuttamanti."}},{"id":"mil8:9","sourceIds":["mil8:9.1"],"kind":"text","text":{"pi":"Milindapañho niṭṭhito."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mil8/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}