{"id":"mn110","title":"The Shorter Discourse on the Full-Moon Night","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mn110","title":"The Shorter Discourse on the Full-Moon Night","units":[{"id":"mn110:0","sourceIds":["mn110:0.1","mn110:0.2"],"kind":"text","text":{"pi":"Majjhima Nikāya 110\nCūḷapuṇṇamasutta","en":"Middle Discourses 110\nThe Shorter Discourse on the Full-Moon Night"}},{"id":"mn110:1","sourceIds":["mn110:1.1","mn110:1.2"],"kind":"text","text":{"pi":"Evaṁ me sutaṁ—\nekaṁ samayaṁ bhagavā sāvatthiyaṁ viharati pubbārāme migāramātupāsāde.","en":"So I have heard.\nAt one time the Buddha was staying near Sāvatthī in the stilt longhouse of Migāra’s mother in the Eastern Monastery."}},{"id":"mn110:2","sourceIds":["mn110:2.1","mn110:2.2"],"kind":"text","text":{"pi":"Tena kho pana samayena bhagavā tadahuposathe pannarase puṇṇāya puṇṇamāya rattiyā bhikkhusaṅghaparivuto abbhokāse nisinno hoti.\nAtha kho bhagavā tuṇhībhūtaṁ tuṇhībhūtaṁ bhikkhusaṅghaṁ anuviloketvā bhikkhū āmantesi:","en":"Now, at that time it was the sabbath—the full moon on the fifteenth day—and the Buddha was sitting in the open surrounded by the Saṅgha of monks.\nThen the Buddha looked around the Saṅgha of monks, who were so very silent. He addressed them,"}},{"id":"mn110:3","sourceIds":["mn110:3.1","mn110:3.2","mn110:3.3","mn110:3.4","mn110:3.5","mn110:3.6","mn110:3.7","mn110:3.8","mn110:3.9","mn110:3.10","mn110:3.11","mn110:3.12"],"kind":"text","text":{"pi":"“jāneyya nu kho, bhikkhave, asappuriso asappurisaṁ:\n‘asappuriso ayaṁ bhavan’”ti?\n“No hetaṁ, bhante”.\n“Sādhu, bhikkhave;\naṭṭhānametaṁ, bhikkhave, anavakāso yaṁ asappuriso asappurisaṁ jāneyya:\n‘asappuriso ayaṁ bhavan’ti.\nJāneyya pana, bhikkhave, asappuriso sappurisaṁ:\n‘sappuriso ayaṁ bhavan’”ti?\n“No hetaṁ, bhante”.\n“Sādhu, bhikkhave;\netampi kho, bhikkhave, aṭṭhānaṁ anavakāso yaṁ asappuriso sappurisaṁ jāneyya:\n‘sappuriso ayaṁ bhavan’ti.","en":"“Monks, could an untrue person know of an untrue person:\n‘This worthy one is an untrue person’?”\n“No, sir.”\n“Good, monks!\nIt’s impossible, it can’t happen, that an untrue person could know of an untrue person:\n‘This worthy one is an untrue person.’\nBut could an untrue person know of a true person:\n‘This worthy one is a true person’?”\n“No, sir.”\n“Good, monks!\nThat too is impossible."}},{"id":"mn110:4","sourceIds":["mn110:4.1"],"kind":"text","text":{"pi":"Asappuriso, bhikkhave, assaddhammasamannāgato hoti, asappurisabhatti hoti, asappurisacintī hoti, asappurisamantī hoti, asappurisavāco hoti, asappurisakammanto hoti, asappurisadiṭṭhi hoti; asappurisadānaṁ deti.","en":"An untrue person has bad qualities, is devoted to untrue persons, and has the intentions, counsel, speech, actions, views, and giving of an untrue person."}},{"id":"mn110:5","sourceIds":["mn110:5.1","mn110:5.2","mn110:5.3"],"kind":"text","text":{"pi":"Kathañca, bhikkhave, asappuriso assaddhammasamannāgato hoti?\nIdha, bhikkhave, asappuriso assaddho hoti, ahiriko hoti, anottappī hoti, appassuto hoti, kusīto hoti, muṭṭhassati hoti, duppañño hoti.\nEvaṁ kho, bhikkhave, asappuriso assaddhammasamannāgato hoti.","en":"And how does an untrue person have bad qualities?\nIt’s when an untrue person is faithless, shameless, imprudent, unlearned, lazy, unmindful, and witless.\nThat’s how an untrue person has bad qualities."}},{"id":"mn110:6","sourceIds":["mn110:6.1","mn110:6.2","mn110:6.3"],"kind":"text","text":{"pi":"Kathañca, bhikkhave, asappuriso asappurisabhatti hoti?\nIdha, bhikkhave, asappurisassa ye te samaṇabrāhmaṇā assaddhā ahirikā anottappino appassutā kusītā muṭṭhassatino duppaññā tyāssa mittā honti te sahāyā.\nEvaṁ kho, bhikkhave, asappuriso asappurisabhatti hoti.","en":"And how is an untrue person devoted to untrue persons?\nIt’s when an untrue person is a friend and companion of ascetics and brahmins who are faithless, shameless, imprudent, unlearned, lazy, unmindful, and witless.\nThat’s how an untrue person is devoted to untrue persons."}},{"id":"mn110:7","sourceIds":["mn110:7.1","mn110:7.2","mn110:7.3"],"kind":"text","text":{"pi":"Kathañca, bhikkhave, asappuriso asappurisacintī hoti?\nIdha, bhikkhave, asappuriso attabyābādhāyapi ceteti, parabyābādhāyapi ceteti, ubhayabyābādhāyapi ceteti.\nEvaṁ kho, bhikkhave, asappuriso asappurisacintī hoti.","en":"And how does an untrue person have the intentions of an untrue person?\nIt’s when an untrue person intends to hurt themselves, hurt others, and hurt both.\nThat’s how an untrue person has the intentions of an untrue person."}},{"id":"mn110:8","sourceIds":["mn110:8.1","mn110:8.2","mn110:8.3"],"kind":"text","text":{"pi":"Kathañca, bhikkhave, asappuriso asappurisamantī hoti?\nIdha, bhikkhave, asappuriso attabyābādhāyapi manteti, parabyābādhāyapi manteti, ubhayabyābādhāyapi manteti.\nEvaṁ kho, bhikkhave, asappuriso asappurisamantī hoti.","en":"And how does an untrue person offer the counsel of an untrue person?\nIt’s when an untrue person offers counsel that hurts themselves, hurts others, and hurts both.\nThat’s how an untrue person offers the counsel of an untrue person."}},{"id":"mn110:9","sourceIds":["mn110:9.1","mn110:9.2","mn110:9.3"],"kind":"text","text":{"pi":"Kathañca, bhikkhave, asappuriso asappurisavāco hoti?\nIdha, bhikkhave, asappuriso musāvādī hoti, pisuṇavāco hoti, pharusavāco hoti, samphappalāpī hoti.\nEvaṁ kho, bhikkhave, asappuriso asappurisavāco hoti.","en":"And how does an untrue person have the speech of an untrue person?\nIt’s when an untrue person uses speech that’s false, backbiting, harsh, and nonsensical.\nThat’s how an untrue person has the speech of an untrue person."}},{"id":"mn110:10","sourceIds":["mn110:10.1","mn110:10.2","mn110:10.3"],"kind":"text","text":{"pi":"Kathañca, bhikkhave, asappuriso asappurisakammanto hoti?\nIdha, bhikkhave, asappuriso pāṇātipātī hoti, adinnādāyī hoti, kāmesumicchācārī hoti.\nEvaṁ kho, bhikkhave, asappuriso asappurisakammanto hoti.","en":"And how does an untrue person have the action of an untrue person?\nIt’s when an untrue person kills living creatures, steals, and commits sexual misconduct.\nThat’s how an untrue person has the actions of an untrue person."}},{"id":"mn110:11","sourceIds":["mn110:11.1","mn110:11.2","mn110:11.3","mn110:11.4"],"kind":"text","text":{"pi":"Kathañca, bhikkhave, asappuriso asappurisadiṭṭhi hoti?\nIdha, bhikkhave, asappuriso evaṁdiṭṭhi hoti:\n‘natthi dinnaṁ, natthi yiṭṭhaṁ, natthi hutaṁ, natthi sukatadukkaṭānaṁ kammānaṁ phalaṁ vipāko, natthi ayaṁ loko, natthi paro loko, natthi mātā, natthi pitā, natthi sattā opapātikā, natthi loke samaṇabrāhmaṇā sammaggatā sammāpaṭipannā, ye imañca lokaṁ parañca lokaṁ sayaṁ abhiññā sacchikatvā pavedentī’ti.\nEvaṁ kho, bhikkhave, asappuriso asappurisadiṭṭhi hoti.","en":"And how does an untrue person have the view of an untrue person?\nIt’s when an untrue person has such a view:\n‘There’s no meaning in giving, sacrifice, or offerings. There’s no fruit or result of good and bad deeds. There’s no afterlife. There’s no such thing as mother and father, or beings that are reborn spontaneously. And there’s no ascetic or brahmin who is rightly comported and rightly practiced, and who describes the afterlife after realizing it with their own insight.’\nThat’s how an untrue person has the view of an untrue person."}},{"id":"mn110:12","sourceIds":["mn110:12.1","mn110:12.2","mn110:12.3"],"kind":"text","text":{"pi":"Kathañca, bhikkhave, asappuriso asappurisadānaṁ deti?\nIdha, bhikkhave, asappuriso asakkaccaṁ dānaṁ deti, asahatthā dānaṁ deti, acittīkatvā dānaṁ deti, apaviṭṭhaṁ dānaṁ deti anāgamanadiṭṭhiko dānaṁ deti.\nEvaṁ kho, bhikkhave, asappuriso asappurisadānaṁ deti.","en":"And how does an untrue person give the gifts of an untrue person?\nIt’s when an untrue person gives a gift carelessly, not with their own hand, and thoughtlessly. They give the dregs, and they give without consideration for consequences.\nThat’s how an untrue person gives the gifts of an untrue person."}},{"id":"mn110:13","sourceIds":["mn110:13.1","mn110:13.2","mn110:13.3","mn110:13.4"],"kind":"text","text":{"pi":"So, bhikkhave, asappuriso evaṁ assaddhammasamannāgato, evaṁ asappurisabhatti, evaṁ asappurisacintī, evaṁ asappurisamantī, evaṁ asappurisavāco, evaṁ asappurisakammanto, evaṁ asappurisadiṭṭhi;\nevaṁ asappurisadānaṁ datvā kāyassa bhedā paraṁ maraṇā yā asappurisānaṁ gati tattha upapajjati.\nKā ca, bhikkhave, asappurisānaṁ gati?\nNirayo vā tiracchānayoni vā.","en":"That untrue person—who has such bad qualities, is devoted to untrue persons, and has the intentions, counsel, speech, actions, views, and giving of an untrue person—\nwhen their body breaks up, after death, is reborn in the place where untrue persons are reborn.\nAnd what is the place where untrue persons are reborn?\nHell or the animal realm."}},{"id":"mn110:14","sourceIds":["mn110:14.1","mn110:14.2","mn110:14.3","mn110:14.4","mn110:14.5","mn110:14.6","mn110:14.7","mn110:14.8","mn110:14.9"],"kind":"text","text":{"pi":"Jāneyya nu kho, bhikkhave, sappuriso sappurisaṁ:\n‘sappuriso ayaṁ bhavan’”ti?\n“Evaṁ, bhante”.\n“Sādhu, bhikkhave;\nṭhānametaṁ, bhikkhave, vijjati yaṁ sappuriso sappurisaṁ jāneyya:\n‘sappuriso ayaṁ bhavan’ti.\nJāneyya pana, bhikkhave, sappuriso asappurisaṁ:\n‘asappuriso ayaṁ bhavan’”ti?\n“Evaṁ, bhante”.","en":"Monks, could a true person know of a true person:\n‘This worthy one is a true person’?”\n“Yes, sir.”\n“Good, monks!\nIt is possible that a true person could know of a true person:\n‘This worthy one is a true person.’\nBut could a true person know of an untrue person:\n‘This worthy one is an untrue person’?”\n“Yes, sir.”"}},{"id":"mn110:15","sourceIds":["mn110:15.1","mn110:15.2","mn110:15.3","mn110:15.4","mn110:15.5"],"kind":"text","text":{"pi":"“Sādhu, bhikkhave;\netampi kho, bhikkhave, ṭhānaṁ vijjati yaṁ sappuriso asappurisaṁ jāneyya:\n‘asappuriso ayaṁ bhavan’ti.\nSappuriso, bhikkhave, saddhammasamannāgato hoti, sappurisabhatti hoti, sappurisacintī hoti, sappurisamantī hoti, sappurisavāco hoti, sappurisakammanto hoti, sappurisadiṭṭhi hoti;\nsappurisadānaṁ deti.","en":"“Good, monks!\nThat too is possible.\nA true person has good qualities, is devoted to true persons, and has the intentions, counsel, speech, actions, views, and giving of a true person."}},{"id":"mn110:16","sourceIds":["mn110:16.1","mn110:16.2","mn110:16.3"],"kind":"text","text":{"pi":"Kathañca, bhikkhave, sappuriso saddhammasamannāgato hoti?\nIdha, bhikkhave, sappuriso saddho hoti, hirimā hoti, ottappī hoti, bahussuto hoti, āraddhavīriyo hoti, upaṭṭhitassati hoti, paññavā hoti.\nEvaṁ kho, bhikkhave, sappuriso saddhammasamannāgato hoti.","en":"And how does a true person have good qualities?\nIt’s when a true person is faithful, conscientious, prudent, learned, energetic, mindful, and wise.\nThat’s how a true person has good qualities."}},{"id":"mn110:17","sourceIds":["mn110:17.1","mn110:17.2","mn110:17.3"],"kind":"text","text":{"pi":"Kathañca, bhikkhave, sappuriso sappurisabhatti hoti?\nIdha, bhikkhave, sappurisassa ye te samaṇabrāhmaṇā saddhā hirimanto ottappino bahussutā āraddhavīriyā upaṭṭhitassatino paññavanto tyāssa mittā honti, te sahāyā.\nEvaṁ kho, bhikkhave, sappuriso sappurisabhatti hoti.","en":"And how is a true person devoted to true persons?\nIt’s when a true person is a friend and companion of ascetics and brahmins who are faithful, conscientious, prudent, learned, energetic, mindful, and wise.\nThat’s how a true person is devoted to true persons."}},{"id":"mn110:18","sourceIds":["mn110:18.1","mn110:18.2","mn110:18.3"],"kind":"text","text":{"pi":"Kathañca, bhikkhave, sappuriso sappurisacintī hoti?\nIdha, bhikkhave, sappuriso nevattabyābādhāya ceteti, na parabyābādhāya ceteti, na ubhayabyābādhāya ceteti.\nEvaṁ kho, bhikkhave, sappuriso sappurisacintī hoti.","en":"And how does a true person have the intentions of a true person?\nIt’s when a true person doesn’t intend to hurt themselves, hurt others, and hurt both.\nThat’s how a true person has the intentions of a true person."}},{"id":"mn110:19","sourceIds":["mn110:19.1","mn110:19.2","mn110:19.3"],"kind":"text","text":{"pi":"Kathañca, bhikkhave, sappuriso sappurisamantī hoti?\nIdha, bhikkhave, sappuriso nevattabyābādhāya manteti, na parabyābādhāya manteti, na ubhayabyābādhāya manteti.\nEvaṁ kho, bhikkhave, sappuriso sappurisamantī hoti.","en":"And how does a true person offer the counsel of a true person?\nIt’s when a true person offers counsel that doesn’t hurt themselves, hurt others, and hurt both.\nThat’s how a true person offers the counsel of a true person."}},{"id":"mn110:20","sourceIds":["mn110:20.1","mn110:20.2","mn110:20.3"],"kind":"text","text":{"pi":"Kathañca, bhikkhave, sappuriso sappurisavāco hoti?\nIdha, bhikkhave, sappuriso musāvādā paṭivirato hoti, pisuṇāya vācāya paṭivirato hoti, pharusāya vācāya paṭivirato hoti, samphappalāpā paṭivirato hoti.\nEvaṁ kho, bhikkhave, sappuriso sappurisavāco hoti.","en":"And how does a true person have the speech of a true person?\nIt’s when a true person refrains from speech that’s false, backbiting, harsh, or nonsensical.\nThat’s how a true person has the speech of a true person."}},{"id":"mn110:21","sourceIds":["mn110:21.1","mn110:21.2","mn110:21.3"],"kind":"text","text":{"pi":"Kathañca, bhikkhave, sappuriso sappurisakammanto hoti?\nIdha, bhikkhave, sappuriso pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti.\nEvaṁ kho, bhikkhave, sappuriso sappurisakammanto hoti.","en":"And how does a true person have the action of a true person?\nIt’s when a true person refrains from killing living creatures, stealing, and sexual misconduct.\nThat’s how a true person has the action of a true person."}},{"id":"mn110:22","sourceIds":["mn110:22.1","mn110:22.2","mn110:22.3","mn110:22.4"],"kind":"text","text":{"pi":"Kathañca, bhikkhave, sappuriso sappurisadiṭṭhi hoti?\nIdha, bhikkhave, sappuriso evaṁdiṭṭhi hoti:\n‘atthi dinnaṁ, atthi yiṭṭhaṁ, atthi hutaṁ, atthi sukatadukkaṭānaṁ kammānaṁ phalaṁ vipāko, atthi ayaṁ loko, atthi paro loko, atthi mātā, atthi pitā, atthi sattā opapātikā, atthi loke samaṇabrāhmaṇā sammaggatā sammāpaṭipannā ye imañca lokaṁ parañca lokaṁ sayaṁ abhiññā sacchikatvā pavedentī’ti.\nEvaṁ kho, bhikkhave, sappuriso sappurisadiṭṭhi hoti.","en":"And how does a true person have the view of a true person?\nIt’s when a true person has such a view:\n‘There is meaning in giving, sacrifice, and offerings. There are fruits and results of good and bad deeds. There is an afterlife. There are such things as mother and father, and beings that are reborn spontaneously. And there are ascetics and brahmins who are rightly comported and rightly practiced, and who describe the afterlife after realizing it with their own insight.’\nThat’s how a true person has the view of a true person."}},{"id":"mn110:23","sourceIds":["mn110:23.1","mn110:23.2","mn110:23.3"],"kind":"text","text":{"pi":"Kathañca, bhikkhave, sappuriso sappurisadānaṁ deti?\nIdha, bhikkhave, sappuriso sakkaccaṁ dānaṁ deti, sahatthā dānaṁ deti, cittīkatvā dānaṁ deti, anapaviṭṭhaṁ dānaṁ deti, āgamanadiṭṭhiko dānaṁ deti.\nEvaṁ kho, bhikkhave, sappuriso sappurisadānaṁ deti.","en":"And how does a true person give the gifts of a true person?\nIt’s when a true person gives a gift carefully, with their own hand, and thoughtfully. They don’t give the dregs, and they give with consideration for consequences.\nThat’s how a true person gives the gifts of a true person."}},{"id":"mn110:24","sourceIds":["mn110:24.1","mn110:24.2","mn110:24.3","mn110:24.4"],"kind":"text","text":{"pi":"So, bhikkhave, sappuriso evaṁ saddhammasamannāgato, evaṁ sappurisabhatti, evaṁ sappurisacintī, evaṁ sappurisamantī, evaṁ sappurisavāco, evaṁ sappurisakammanto, evaṁ sappurisadiṭṭhi;\nevaṁ sappurisadānaṁ datvā kāyassa bhedā paraṁ maraṇā yā sappurisānaṁ gati tattha upapajjati.\nKā ca, bhikkhave, sappurisānaṁ gati?\nDevamahattatā vā manussamahattatā vā”ti.","en":"That true person—who has such good qualities, is devoted to true persons, and has the intentions, counsel, speech, actions, views, and giving of a true person—\nwhen their body breaks up, after death, is reborn in the place where true persons are reborn.\nAnd what is the place where true persons are reborn?\nA state of greatness among gods or humans.”"}},{"id":"mn110:25","sourceIds":["mn110:25.1","mn110:25.2","mn110:25.3","mn110:25.4"],"kind":"text","text":{"pi":"Idamavoca bhagavā.\nAttamanā te bhikkhū bhagavato bhāsitaṁ abhinandunti.\nCūḷapuṇṇamasuttaṁ niṭṭhitaṁ dasamaṁ.\nDevadahavaggo niṭṭhito paṭhamo.","en":"That is what the Buddha said.\nSatisfied, the monks approved what the Buddha said."}},{"id":"mn110:26","sourceIds":["mn110:26.0","mn110:26.1","mn110:26.2","mn110:26.3","mn110:26.4"],"kind":"text","text":{"pi":"Tassuddānaṁ\nDevadahaṁ pañcattayaṁ,\nKinti sāma sunakkhattaṁ;\nSappāya gaṇa gopaka—\nMahāpuṇṇa cūḷapuṇṇañcāti."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mn110/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}