{"id":"mn113","title":"A True Person","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mn113","title":"A True Person","units":[{"id":"mn113:0","sourceIds":["mn113:0.1","mn113:0.2"],"kind":"text","text":{"pi":"Majjhima Nikāya 113\nSappurisasutta","en":"Middle Discourses 113\nA True Person"}},{"id":"mn113:1","sourceIds":["mn113:1.1","mn113:1.2","mn113:1.3","mn113:1.4","mn113:1.5","mn113:1.6"],"kind":"text","text":{"pi":"Evaṁ me sutaṁ—\nekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.\nTatra kho bhagavā bhikkhū āmantesi:\n“bhikkhavo”ti.\n“Bhadante”ti te bhikkhū bhagavato paccassosuṁ.\nBhagavā etadavoca:","en":"So I have heard.\nAt one time the Buddha was staying near Sāvatthī in Jeta’s Grove, Anāthapiṇḍika’s monastery.\nThere the Buddha addressed the mendicants,\n“Mendicants!”\n“Venerable sir,” they replied.\nThe Buddha said this:"}},{"id":"mn113:2","sourceIds":["mn113:2.1","mn113:2.2","mn113:2.3","mn113:2.4"],"kind":"text","text":{"pi":"“sappurisadhammañca vo, bhikkhave, desessāmi asappurisadhammañca.\nTaṁ suṇātha, sādhukaṁ manasi karotha, bhāsissāmī”ti.\n“Evaṁ, bhante”ti kho te bhikkhū bhagavato paccassosuṁ.\nBhagavā etadavoca:","en":"“Mendicants, I will teach you the qualities of a true person and the qualities of an untrue person.\nListen and apply your mind well, I will speak.”\n“Yes, sir,” they replied.\nThe Buddha said this:"}},{"id":"mn113:3","sourceIds":["mn113:3.1","mn113:3.2","mn113:3.3","mn113:3.4","mn113:3.5","mn113:3.6","mn113:3.7","mn113:3.8","mn113:3.9","mn113:3.10","mn113:3.11","mn113:3.12"],"kind":"text","text":{"pi":"“Katamo ca, bhikkhave, asappurisadhammo?\nIdha, bhikkhave, asappuriso uccākulā pabbajito hoti.\nSo iti paṭisañcikkhati:\n‘ahaṁ khomhi uccākulā pabbajito, ime panaññe bhikkhū na uccākulā pabbajitā’ti.\nSo tāya uccākulīnatāya attānukkaṁseti, paraṁ vambheti.\nAyaṁ, bhikkhave, asappurisadhammo.\nSappuriso ca kho, bhikkhave, iti paṭisañcikkhati:\n‘na kho uccākulīnatāya lobhadhammā vā parikkhayaṁ gacchanti, dosadhammā vā parikkhayaṁ gacchanti, mohadhammā vā parikkhayaṁ gacchanti.\nNo cepi uccākulā pabbajito hoti;\nso ca hoti dhammānudhammappaṭipanno sāmīcippaṭipanno anudhammacārī, so tattha pujjo, so tattha pāsaṁso’ti.\nSo paṭipadaṁyeva antaraṁ karitvā tāya uccākulīnatāya nevattānukkaṁseti na paraṁ vambheti.\nAyaṁ, bhikkhave, sappurisadhammo.","en":"“And what is a quality of an untrue person?\nTake an untrue person who has gone forth from an eminent family.\nThey reflect:\n‘I have gone forth from an eminent family, unlike these other mendicants.’\nAnd they glorify themselves and put others down on account of that.\nThis is a quality of an untrue person.\nA true person reflects:\n‘It’s not because of one’s eminent family that thoughts of greed, hate, or delusion come to an end.\nEven if someone has not gone forth from an eminent family,\nif they practice in line with the teaching, practice properly, and live in line with the teaching, they are worthy of honor and praise for that.’\nKeeping the practice to themselves, they don’t glorify themselves and put others down on account of their eminent family.\nThis is a quality of a true person."}},{"id":"mn113:4-6","sourceIds":["mn113:4-6.1","mn113:4-6.2","mn113:4-6.3","mn113:4-6.4","mn113:4-6.5","mn113:4-6.6","mn113:4-6.7","mn113:4-6.8","mn113:4-6.9","mn113:4-6.10","mn113:4-6.11","mn113:4-6.12","mn113:4-6.13"],"kind":"text","text":{"pi":"Puna caparaṁ, bhikkhave, asappuriso mahākulā pabbajito hoti …pe…\nmahābhogakulā pabbajito hoti …pe…\nuḷārabhogakulā pabbajito hoti.\nSo iti paṭisañcikkhati:\n‘ahaṁ khomhi uḷārabhogakulā pabbajito, ime panaññe bhikkhū na uḷārabhogakulā pabbajitā’ti.\nSo tāya uḷārabhogatāya attānukkaṁseti, paraṁ vambheti.\nAyampi, bhikkhave, asappurisadhammo.\nSappuriso ca kho, bhikkhave, iti paṭisañcikkhati:\n‘na kho uḷārabhogatāya lobhadhammā vā parikkhayaṁ gacchanti, dosadhammā vā parikkhayaṁ gacchanti, mohadhammā vā parikkhayaṁ gacchanti.\nNo cepi uḷārabhogakulā pabbajito hoti;\nso ca hoti dhammānudhammappaṭipanno sāmīcippaṭipanno anudhammacārī, so tattha pujjo, so tattha pāsaṁso’ti.\nSo paṭipadaṁyeva antaraṁ karitvā tāya uḷārabhogatāya nevattānukkaṁseti, na paraṁ vambheti.\nAyampi, bhikkhave, sappurisadhammo.","en":"Furthermore, take an untrue person who has gone forth from a great family …\nfrom a wealthy family …\nfrom an exceptionally wealthy family.\nThey reflect:\n‘I have gone forth from an exceptionally wealthy family, unlike these other mendicants.’\nAnd they glorify themselves and put others down on account of that.\nThis too is a quality of an untrue person.\nA true person reflects:\n‘It’s not because of one’s exceptionally wealthy family that thoughts of greed, hate, or delusion come to an end.\nEven if someone has not gone forth from an exceptionally wealthy family,\nif they practice in line with the teaching, practice properly, and live in line with the teaching, they are worthy of honor and praise for that.’\nKeeping the practice to themselves, they don’t glorify themselves and put others down on account of their exceptionally wealthy family.\nThis too is a quality of a true person."}},{"id":"mn113:7","sourceIds":["mn113:7.1","mn113:7.2","mn113:7.3","mn113:7.4","mn113:7.5","mn113:7.6","mn113:7.7","mn113:7.8","mn113:7.9","mn113:7.10","mn113:7.11"],"kind":"text","text":{"pi":"Puna caparaṁ, bhikkhave, asappuriso ñāto hoti yasassī.\nSo iti paṭisañcikkhati:\n‘ahaṁ khomhi ñāto yasassī, ime panaññe bhikkhū appaññātā appesakkhā’ti.\nSo tena ñattena attānukkaṁseti, paraṁ vambheti.\nAyampi, bhikkhave, asappurisadhammo.\nSappuriso ca kho, bhikkhave, iti paṭisañcikkhati:\n‘na kho ñattena lobhadhammā vā parikkhayaṁ gacchanti, dosadhammā vā parikkhayaṁ gacchanti, mohadhammā vā parikkhayaṁ gacchanti.\nNo cepi ñāto hoti yasassī;\nso ca hoti dhammānudhammappaṭipanno sāmīcippaṭipanno anudhammacārī, so tattha pujjo, so tattha pāsaṁso’ti.\nSo paṭipadaṁyeva antaraṁ karitvā tena ñattena nevattānukkaṁseti, na paraṁ vambheti.\nAyampi, bhikkhave, sappurisadhammo.","en":"Furthermore, take an untrue person who is well-known and famous.\nThey reflect:\n‘I’m well-known and famous. These other mendicants are obscure and insignificant.’\nAnd they glorify themselves and put others down on account of that.\nThis too is a quality of an untrue person.\nA true person reflects:\n‘It’s not because of one’s fame that thoughts of greed, hate, or delusion come to an end.\nEven if someone is not well-known and famous,\nif they practice in line with the teaching, practice properly, and live in line with the teaching, they are worthy of honor and praise for that.’\nKeeping the practice to themselves, they don’t glorify themselves and put others down on account of their fame.\nThis too is a quality of a true person."}},{"id":"mn113:8","sourceIds":["mn113:8.1","mn113:8.2","mn113:8.3","mn113:8.4","mn113:8.5","mn113:8.6","mn113:8.7","mn113:8.8","mn113:8.9","mn113:8.10","mn113:8.11"],"kind":"text","text":{"pi":"Puna caparaṁ, bhikkhave, asappuriso lābhī hoti cīvarapiṇḍapātasenāsanagilānappaccayabhesajjaparikkhārānaṁ.\nSo iti paṭisañcikkhati:\n‘ahaṁ khomhi lābhī cīvarapiṇḍapātasenāsanagilānappaccayabhesajjaparikkhārānaṁ, ime panaññe bhikkhū na lābhino cīvarapiṇḍapātasenāsanagilānappaccayabhesajjaparikkhārānan’ti.\nSo tena lābhena attānukkaṁseti, paraṁ vambheti.\nAyampi, bhikkhave, asappurisadhammo.\nSappuriso ca kho, bhikkhave, iti paṭisañcikkhati:\n‘na kho lābhena lobhadhammā vā parikkhayaṁ gacchanti, dosadhammā vā parikkhayaṁ gacchanti, mohadhammā vā parikkhayaṁ gacchanti.\nNo cepi lābhī hoti cīvarapiṇḍapātasenāsanagilānappaccayabhesajjaparikkhārānaṁ;\nso ca hoti dhammānudhammappaṭipanno sāmīcippaṭipanno anudhammacārī, so tattha pujjo, so tattha pāsaṁso’ti.\nSo paṭipadaṁyeva antaraṁ karitvā tena lābhena nevattānukkaṁseti, na paraṁ vambheti.\nAyampi, bhikkhave, sappurisadhammo.","en":"Furthermore, take an untrue person who receives robes, almsfood, lodgings, and medicines and supplies for the sick.\nThey reflect:\n‘I receive robes, almsfood, lodgings, and medicines and supplies for the sick, unlike these other mendicants.’\nAnd they glorify themselves and put others down on account of that.\nThis too is a quality of an untrue person.\nA true person reflects:\n‘It’s not because of one’s material things that thoughts of greed, hate, or delusion come to an end.\nEven if someone doesn’t receive robes, almsfood, lodgings, and medicines and supplies for the sick,\nif they practice in line with the teaching, practice properly, and live in line with the teaching, they are worthy of honor and praise for that.’\nKeeping the practice to themselves, they don’t glorify themselves and put others down on account of their material things.\nThis too is a quality of a true person."}},{"id":"mn113:9","sourceIds":["mn113:9.1","mn113:9.2","mn113:9.3","mn113:9.4","mn113:9.5","mn113:9.6","mn113:9.7","mn113:9.8","mn113:9.9","mn113:9.10","mn113:9.11"],"kind":"text","text":{"pi":"Puna caparaṁ, bhikkhave, asappuriso bahussuto hoti.\nSo iti paṭisañcikkhati:\n‘ahaṁ khomhi bahussuto, ime panaññe bhikkhū na bahussutā’ti.\nSo tena bāhusaccena attānukkaṁseti, paraṁ vambheti.\nAyampi, bhikkhave, asappurisadhammo.\nSappuriso ca kho, bhikkhave, iti paṭisañcikkhati:\n‘na kho bāhusaccena lobhadhammā vā parikkhayaṁ gacchanti, dosadhammā vā parikkhayaṁ gacchanti, mohadhammā vā parikkhayaṁ gacchanti.\nNo cepi bahussuto hoti;\nso ca hoti dhammānudhammappaṭipanno sāmīcippaṭipanno anudhammacārī, so tattha pujjo, so tattha pāsaṁso’ti.\nSo paṭipadaṁyeva antaraṁ karitvā tena bāhusaccena nevattānukkaṁseti, na paraṁ vambheti.\nAyampi, bhikkhave, sappurisadhammo.","en":"Furthermore, take an untrue person who is very learned …"}},{"id":"mn113:10","sourceIds":["mn113:10.1","mn113:10.2","mn113:10.3","mn113:10.4","mn113:10.5","mn113:10.6","mn113:10.7","mn113:10.8","mn113:10.9","mn113:10.10","mn113:10.11"],"kind":"text","text":{"pi":"Puna caparaṁ, bhikkhave, asappuriso vinayadharo hoti.\nSo iti paṭisañcikkhati:\n‘ahaṁ khomhi vinayadharo, ime panaññe bhikkhū na vinayadharā’ti.\nSo tena vinayadharattena attānukkaṁseti, paraṁ vambheti.\nAyampi, bhikkhave, asappurisadhammo.\nSappuriso ca kho, bhikkhave, iti paṭisañcikkhati:\n‘na kho vinayadharattena lobhadhammā vā parikkhayaṁ gacchanti, dosadhammā vā parikkhayaṁ gacchanti, mohadhammā vā parikkhayaṁ gacchanti.\nNo cepi vinayadharo hoti;\nso ca hoti dhammānudhammappaṭipanno sāmīcippaṭipanno anudhammacārī, so tattha pujjo, so tattha pāsaṁso’ti.\nSo paṭipadaṁyeva antaraṁ karitvā tena vinayadharattena nevattānukkaṁseti, na paraṁ vambheti.\nAyampi, bhikkhave, sappurisadhammo.","en":"who is an expert in the monastic law …"}},{"id":"mn113:11","sourceIds":["mn113:11.1","mn113:11.2","mn113:11.3","mn113:11.4","mn113:11.5","mn113:11.6","mn113:11.7","mn113:11.8","mn113:11.9","mn113:11.10","mn113:11.11"],"kind":"text","text":{"pi":"Puna caparaṁ, bhikkhave, asappuriso dhammakathiko hoti.\nSo iti paṭisañcikkhati:\n‘ahaṁ khomhi dhammakathiko, ime panaññe bhikkhū na dhammakathikā’ti.\nSo tena dhammakathikattena attānukkaṁseti, paraṁ vambheti.\nAyampi, bhikkhave, asappurisadhammo.\nSappuriso ca kho, bhikkhave, iti paṭisañcikkhati:\n‘na kho dhammakathikattena lobhadhammā vā parikkhayaṁ gacchanti, dosadhammā vā parikkhayaṁ gacchanti, mohadhammā vā parikkhayaṁ gacchanti.\nNo cepi dhammakathiko hoti;\nso ca hoti dhammānudhammappaṭipanno sāmīcippaṭipanno anudhammacārī, so tattha pujjo, so tattha pāsaṁso’ti.\nSo paṭipadaṁyeva antaraṁ karitvā tena dhammakathikattena nevattānukkaṁseti, na paraṁ vambheti.\nAyampi, bhikkhave, sappurisadhammo.","en":"who is a Dhamma teacher …"}},{"id":"mn113:12","sourceIds":["mn113:12.1","mn113:12.2","mn113:12.3","mn113:12.4","mn113:12.5","mn113:12.6","mn113:12.7","mn113:12.8","mn113:12.9","mn113:12.10","mn113:12.11"],"kind":"text","text":{"pi":"Puna caparaṁ, bhikkhave, asappuriso āraññiko hoti.\nSo iti paṭisañcikkhati:\n‘ahaṁ khomhi āraññiko ime panaññe bhikkhū na āraññikā’ti.\nSo tena āraññikattena attānukkaṁseti, paraṁ vambheti.\nAyampi, bhikkhave, asappurisadhammo.\nSappuriso ca kho, bhikkhave, iti paṭisañcikkhati:\n‘na kho āraññikattena lobhadhammā vā parikkhayaṁ gacchanti, dosadhammā vā parikkhayaṁ gacchanti, mohadhammā vā parikkhayaṁ gacchanti.\nNo cepi āraññiko hoti;\nso ca hoti dhammānudhammappaṭipanno sāmīcippaṭipanno anudhammacārī, so tattha pujjo, so tattha pāsaṁso’ti.\nSo paṭipadaṁyeva antaraṁ karitvā tena āraññikattena nevattānukkaṁseti, na paraṁ vambheti.\nAyampi, bhikkhave, sappurisadhammo.","en":"who dwells in the wilderness …"}},{"id":"mn113:13","sourceIds":["mn113:13.1","mn113:13.2","mn113:13.3","mn113:13.4","mn113:13.5","mn113:13.6","mn113:13.7","mn113:13.8","mn113:13.9","mn113:13.10","mn113:13.11"],"kind":"text","text":{"pi":"Puna caparaṁ, bhikkhave, asappuriso paṁsukūliko hoti.\nSo iti paṭisañcikkhati:\n‘ahaṁ khomhi paṁsukūliko, ime panaññe bhikkhū na paṁsukūlikā’ti.\nSo tena paṁsukūlikattena attānukkaṁseti, paraṁ vambheti.\nAyampi, bhikkhave, asappurisadhammo.\nSappuriso ca kho, bhikkhave, iti paṭisañcikkhati:\n‘na kho paṁsukūlikattena lobhadhammā vā parikkhayaṁ gacchanti, dosadhammā vā parikkhayaṁ gacchanti, mohadhammā vā parikkhayaṁ gacchanti.\nNo cepi paṁsukūliko hoti;\nso ca hoti dhammānudhammappaṭipanno sāmīcippaṭipanno anudhammacārī, so tattha pujjo, so tattha pāsaṁso’ti.\nSo paṭipadaṁyeva antaraṁ karitvā tena paṁsukūlikattena nevattānukkaṁseti, na paraṁ vambheti.\nAyampi, bhikkhave, sappurisadhammo.","en":"who is a rag robe wearer …"}},{"id":"mn113:14","sourceIds":["mn113:14.1","mn113:14.2","mn113:14.3","mn113:14.4","mn113:14.5","mn113:14.6","mn113:14.7","mn113:14.8","mn113:14.9","mn113:14.10","mn113:14.11"],"kind":"text","text":{"pi":"Puna caparaṁ, bhikkhave, asappuriso piṇḍapātiko hoti.\nSo iti paṭisañcikkhati:\n‘ahaṁ khomhi piṇḍapātiko, ime panaññe bhikkhū na piṇḍapātikā’ti.\nSo tena piṇḍapātikattena attānukkaṁseti, paraṁ vambheti.\nAyampi, bhikkhave, asappurisadhammo.\nSappuriso ca kho, bhikkhave, iti paṭisañcikkhati:\n‘na kho piṇḍapātikattena lobhadhammā vā parikkhayaṁ gacchanti, dosadhammā vā parikkhayaṁ gacchanti, mohadhammā vā parikkhayaṁ gacchanti.\nNo cepi piṇḍapātiko hoti;\nso ca hoti dhammānudhammappaṭipanno sāmīcippaṭipanno anudhammacārī, so tattha pujjo, so tattha pāsaṁso’ti.\nSo paṭipadaṁyeva antaraṁ karitvā tena piṇḍapātikattena nevattānukkaṁseti, na paraṁ vambheti.\nAyampi, bhikkhave, sappurisadhammo.","en":"who eats only almsfood …"}},{"id":"mn113:15","sourceIds":["mn113:15.1","mn113:15.2","mn113:15.3","mn113:15.4","mn113:15.5","mn113:15.6","mn113:15.7","mn113:15.8","mn113:15.9","mn113:15.10","mn113:15.11"],"kind":"text","text":{"pi":"Puna caparaṁ, bhikkhave, asappuriso rukkhamūliko hoti.\nSo iti paṭisañcikkhati:\n‘ahaṁ khomhi rukkhamūliko, ime panaññe bhikkhū na rukkhamūlikā’ti.\nSo tena rukkhamūlikattena attānukkaṁseti, paraṁ vambheti.\nAyampi, bhikkhave, asappurisadhammo.\nSappuriso ca kho, bhikkhave, iti paṭisañcikkhati:\n‘na kho rukkhamūlikattena lobhadhammā vā parikkhayaṁ gacchanti, dosadhammā vā parikkhayaṁ gacchanti, mohadhammā vā parikkhayaṁ gacchanti.\nNo cepi rukkhamūliko hoti;\nso ca hoti dhammānudhammappaṭipanno sāmīcippaṭipanno anudhammacārī, so tattha pujjo, so tattha pāsaṁso’ti.\nSo paṭipadaṁyeva antaraṁ karitvā tena rukkhamūlikattena nevattānukkaṁseti, na paraṁ vambheti.\nAyampi, bhikkhave, sappurisadhammo.","en":"who stays at the root of a tree …"}},{"id":"mn113:16-20","sourceIds":["mn113:16-20.1","mn113:16-20.2","mn113:16-20.3","mn113:16-20.4","mn113:16-20.5","mn113:16-20.6","mn113:16-20.7","mn113:16-20.8","mn113:16-20.9","mn113:16-20.10","mn113:16-20.11","mn113:16-20.12","mn113:16-20.13","mn113:16-20.14","mn113:16-20.15"],"kind":"text","text":{"pi":"Puna caparaṁ, bhikkhave, asappuriso sosāniko hoti …pe…\nabbhokāsiko hoti …\nnesajjiko hoti …pe…\nyathāsanthatiko hoti …pe…\nekāsaniko hoti.\nSo iti paṭisañcikkhati:\n‘ahaṁ khomhi ekāsaniko, ime panaññe bhikkhū na ekāsanikā’ti.\nSo tena ekāsanikattena attānukkaṁseti, paraṁ vambheti.\nAyampi, bhikkhave, asappurisadhammo.\nSappuriso ca kho, bhikkhave, iti paṭisañcikkhati:\n‘na kho ekāsanikattena lobhadhammā vā parikkhayaṁ gacchanti, dosadhammā vā parikkhayaṁ gacchanti, mohadhammā vā parikkhayaṁ gacchanti.\nNo cepi ekāsaniko hoti;\nso ca hoti dhammānudhammappaṭipanno sāmīcippaṭipanno anudhammacārī, so tattha pujjo, so tattha pāsaṁso’ti.\nSo paṭipadaṁyeva antaraṁ karitvā tena ekāsanikattena nevattānukkaṁseti, na paraṁ vambheti.\nAyampi, bhikkhave, sappurisadhammo.","en":"who stays in a charnel ground …\nwho stays in the open air …\nwho never lies down …\nwho sleeps wherever they lay their mat …\nwho eats in one sitting per day.\nThey reflect:\n‘I eat in one sitting per day, unlike these other mendicants.’\nAnd they glorify themselves and put others down on account of that.\nThis too is a quality of an untrue person.\nA true person reflects:\n‘It’s not because of eating in one sitting per day that thoughts of greed, hate, or delusion come to an end.\nEven if someone eats in more than one sitting per day,\nif they practice in line with the teaching, practice properly, and live in line with the teaching, they are worthy of honor and praise for that.’\nKeeping the practice to themselves, they don’t glorify themselves and put others down on account of their eating in one sitting per day.\nThis too is a quality of a true person."}},{"id":"mn113:21","sourceIds":["mn113:21.1","mn113:21.2","mn113:21.3","mn113:21.4","mn113:21.5","mn113:21.6","mn113:21.7","mn113:21.8","mn113:21.9","mn113:21.10"],"kind":"text","text":{"pi":"Puna caparaṁ, bhikkhave, asappuriso vivicceva kāmehi vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharati.\nSo iti paṭisañcikkhati:\n‘ahaṁ khomhi paṭhamajjhānasamāpattiyā lābhī, ime panaññe bhikkhū paṭhamajjhānasamāpattiyā na lābhino’ti.\nSo tāya paṭhamajjhānasamāpattiyā attānukkaṁseti, paraṁ vambheti.\nAyampi, bhikkhave, asappurisadhammo.\nSappuriso ca kho, bhikkhave, iti paṭisañcikkhati:\n‘paṭhamajjhānasamāpattiyāpi kho atammayatā vuttā bhagavatā.\nYena yena hi maññanti tato taṁ hoti aññathā’ti.\nSo atammayataññeva antaraṁ karitvā tāya paṭhamajjhānasamāpattiyā nevattānukkaṁseti, na paraṁ vambheti.\nAyampi, bhikkhave, sappurisadhammo.","en":"Furthermore, take an untrue person who, quite secluded from sensual pleasures, secluded from unskillful qualities, enters and remains in the first absorption, which has the rapture and bliss born of seclusion, while placing the mind and keeping it connected.\nThey reflect:\n‘I have attained the first absorption, unlike these other mendicants.’\nAnd they glorify themselves and put others down on account of that.\nThis too is a quality of an untrue person.\nA true person reflects:\n‘The Buddha has spoken of not being determined even by the attainment of the first absorption.\nFor however they imagine it, it turns out to be something else.’\nKeeping to themselves the fact that they are not determined by that, they don’t glorify themselves and put others down on account of their attainment of the first absorption.\nThis too is a quality of a true person."}},{"id":"mn113:22-24","sourceIds":["mn113:22-24.1","mn113:22-24.2","mn113:22-24.3","mn113:22-24.4","mn113:22-24.5","mn113:22-24.6","mn113:22-24.7","mn113:22-24.8","mn113:22-24.9","mn113:22-24.10","mn113:22-24.11","mn113:22-24.12"],"kind":"text","text":{"pi":"Puna caparaṁ, bhikkhave, asappuriso vitakkavicārānaṁ vūpasamā ajjhattaṁ sampasādanaṁ cetaso ekodibhāvaṁ avitakkaṁ avicāraṁ samādhijaṁ pītisukhaṁ dutiyaṁ jhānaṁ …pe…\ntatiyaṁ jhānaṁ …\ncatutthaṁ jhānaṁ upasampajja viharati.\nSo iti paṭisañcikkhati:\n‘ahaṁ khomhi catutthajjhānasamāpattiyā lābhī, ime panaññe bhikkhū catutthajjhānasamāpattiyā na lābhino’ti.\nSo tāya catutthajjhānasamāpattiyā attānukkaṁseti, paraṁ vambheti.\nAyampi, bhikkhave, asappurisadhammo.\nSappuriso ca kho, bhikkhave, iti paṭisañcikkhati:\n‘catutthajjhānasamāpattiyāpi kho atammayatā vuttā bhagavatā.\nYena yena hi maññanti tato taṁ hoti aññathā’ti.\nSo atammayataññeva antaraṁ karitvā tāya catutthajjhānasamāpattiyā nevattānukkaṁseti, na paraṁ vambheti.\nAyampi, bhikkhave, sappurisadhammo.","en":"Furthermore, take an untrue person who, as the placing of the mind and keeping it connected are stilled, enters and remains in the second absorption …\nthird absorption …\nfourth absorption.\nThey reflect:\n‘I have attained the fourth absorption, unlike these other mendicants.’\nAnd they glorify themselves and put others down on account of that.\nThis too is a quality of an untrue person.\nA true person reflects:\n‘The Buddha has spoken of not being determined even by the attainment of the fourth absorption.\nFor however they imagine it, it turns out to be something else.’\nKeeping to themselves the fact that they are not determined by that, they don’t glorify themselves and put others down on account of their attainment of the fourth absorption.\nThis too is a quality of a true person."}},{"id":"mn113:25","sourceIds":["mn113:25.1","mn113:25.2","mn113:25.3","mn113:25.4","mn113:25.5","mn113:25.6","mn113:25.7","mn113:25.8","mn113:25.9","mn113:25.10"],"kind":"text","text":{"pi":"Puna caparaṁ, bhikkhave, asappuriso sabbaso rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā ‘ananto ākāso’ti ākāsānañcāyatanaṁ upasampajja viharati.\nSo iti paṭisañcikkhati:\n‘ahaṁ khomhi ākāsānañcāyatanasamāpattiyā lābhī, ime panaññe bhikkhū ākāsānañcāyatanasamāpattiyā na lābhino’ti.\nSo tāya ākāsānañcāyatanasamāpattiyā attānukkaṁseti, paraṁ vambheti.\nAyampi, bhikkhave, asappurisadhammo.\nSappuriso ca kho, bhikkhave, iti paṭisañcikkhati:\n‘ākāsānañcāyatanasamāpattiyāpi kho atammayatā vuttā bhagavatā.\nYena yena hi maññanti tato taṁ hoti aññathā’ti.\nSo atammayataññeva antaraṁ karitvā tāya ākāsānañcāyatanasamāpattiyā nevattānukkaṁseti, na paraṁ vambheti.\nAyampi, bhikkhave, sappurisadhammo.","en":"Furthermore, take an untrue person who, going totally beyond perceptions of form, with the disappearance of perceptions of impingement, not focusing on perceptions of diversity, aware that ‘space is infinite’, enters and remains in the dimension of infinite space …"}},{"id":"mn113:26","sourceIds":["mn113:26.1","mn113:26.2","mn113:26.3","mn113:26.4","mn113:26.5","mn113:26.6","mn113:26.7","mn113:26.8","mn113:26.9","mn113:26.10"],"kind":"text","text":{"pi":"Puna caparaṁ, bhikkhave, asappuriso sabbaso ākāsānañcāyatanaṁ samatikkamma ‘anantaṁ viññāṇan’ti viññāṇañcāyatanaṁ upasampajja viharati.\nSo iti paṭisañcikkhati:\n‘ahaṁ khomhi viññāṇañcāyatanasamāpattiyā lābhī, ime panaññe bhikkhū viññāṇañcāyatanasamāpattiyā na lābhino’ti.\nSo tāya viññāṇañcāyatanasamāpattiyā attānukkaṁseti, paraṁ vambheti.\nAyampi, bhikkhave, asappurisadhammo.\nSappuriso ca kho, bhikkhave, iti paṭisañcikkhati:\n‘viññāṇañcāyatanasamāpattiyāpi kho atammayatā vuttā bhagavatā.\nYena yena hi maññanti tato taṁ hoti aññathā’ti.\nSo atammayataññeva antaraṁ karitvā tāya viññāṇañcāyatanasamāpattiyā nevattānukkaṁseti, na paraṁ vambheti.\nAyampi, bhikkhave, sappurisadhammo.","en":"the dimension of infinite consciousness …"}},{"id":"mn113:27","sourceIds":["mn113:27.1","mn113:27.2","mn113:27.3","mn113:27.4","mn113:27.5","mn113:27.6","mn113:27.7","mn113:27.8","mn113:27.9","mn113:27.10"],"kind":"text","text":{"pi":"Puna caparaṁ, bhikkhave, asappuriso sabbaso viññāṇañcāyatanaṁ samatikkamma ‘natthi kiñcī’ti ākiñcaññāyatanaṁ upasampajja viharati.\nSo iti paṭisañcikkhati:\n‘ahaṁ khomhi ākiñcaññāyatanasamāpattiyā lābhī, ime panaññe bhikkhū ākiñcaññāyatanasamāpattiyā na lābhino’ti.\nSo tāya ākiñcaññāyatanasamāpattiyā attānukkaṁseti, paraṁ vambheti.\nAyampi, bhikkhave, asappurisadhammo.\nSappuriso ca kho, bhikkhave, iti paṭisañcikkhati:\n‘ākiñcaññāyatanasamāpattiyāpi kho atammayatā vuttā bhagavatā.\nYena yena hi maññanti tato taṁ hoti aññathā’ti.\nSo atammayataññeva antaraṁ karitvā tāya ākiñcaññāyatanasamāpattiyā nevattānukkaṁseti, na paraṁ vambheti.\nAyampi, bhikkhave, sappurisadhammo.","en":"the dimension of nothingness …"}},{"id":"mn113:28","sourceIds":["mn113:28.1","mn113:28.2","mn113:28.3","mn113:28.4","mn113:28.5","mn113:28.6","mn113:28.7","mn113:28.8","mn113:28.9","mn113:28.10"],"kind":"text","text":{"pi":"Puna caparaṁ, bhikkhave, asappuriso sabbaso ākiñcaññāyatanaṁ samatikkamma nevasaññānāsaññāyatanaṁ upasampajja viharati.\nSo iti paṭisañcikkhati:\n‘ahaṁ khomhi nevasaññānāsaññāyatanasamāpattiyā lābhī, ime panaññe bhikkhū nevasaññānāsaññāyatanasamāpattiyā na lābhino’ti.\nSo tāya nevasaññānāsaññāyatanasamāpattiyā attānukkaṁseti, paraṁ vambheti.\nAyampi, bhikkhave, asappurisadhammo.\nSappuriso ca kho, bhikkhave, iti paṭisañcikkhati:\n‘nevasaññānāsaññāyatanasamāpattiyāpi kho atammayatā vuttā bhagavatā.\nYena yena hi maññanti tato taṁ hoti aññathā’ti.\nSo atammayataññeva antaraṁ karitvā tāya nevasaññānāsaññāyatanasamāpattiyā nevattānukkaṁseti, na paraṁ vambheti.\nAyampi, bhikkhave, sappurisadhammo.","en":"the dimension of neither perception nor non-perception.\nThey reflect:\n‘I have attained the dimension of neither perception nor non-perception, unlike these other mendicants.’\nAnd they glorify themselves and put others down on account of that.\nThis too is a quality of an untrue person.\nA true person reflects:\n‘The Buddha has spoken of not being determined even by the attainment of the dimension of neither perception nor non-perception.\nFor however they imagine it, it turns out to be something else.’\nKeeping to themselves the fact that they are not determined by that, they don’t glorify themselves and put others down on account of their attainment of the dimension of neither perception nor non-perception.\nThis too is a quality of a true person."}},{"id":"mn113:29","sourceIds":["mn113:29.1","mn113:29.2","mn113:29.3","mn113:29.4","mn113:29.5"],"kind":"text","text":{"pi":"Puna caparaṁ, bhikkhave, sappuriso sabbaso nevasaññānāsaññāyatanaṁ samatikkamma saññāvedayitanirodhaṁ upasampajja viharati. Paññāya cassa disvā āsavā parikkhīṇā honti.\nAyaṁ, bhikkhave, bhikkhu na kiñci maññati, na kuhiñci maññati, na kenaci maññatī”ti.\nIdamavoca bhagavā.\nAttamanā te bhikkhū bhagavato bhāsitaṁ abhinandunti.\nSappurisasuttaṁ niṭṭhitaṁ tatiyaṁ.","en":"Furthermore, take a true person who, going totally beyond the dimension of neither perception nor non-perception, enters and remains in the cessation of perception and feeling. And, having seen with wisdom, their defilements come to an end.\nThis is a mendicant who does not conceive with anything, does not conceive regarding anything, does not conceive through anything.”\nThat is what the Buddha said.\nSatisfied, the mendicants approved what the Buddha said."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mn113/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}