{"id":"mn118","title":"Mindfulness of Breathing","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mn118","title":"Mindfulness of Breathing","units":[{"id":"mn118:0","sourceIds":["mn118:0.1","mn118:0.2"],"kind":"text","text":{"pi":"Majjhima Nikāya 118\nĀnāpānassatisutta","en":"Middle Discourses 118\nMindfulness of Breathing"}},{"id":"mn118:1","sourceIds":["mn118:1.1","mn118:1.2","mn118:1.3"],"kind":"text","text":{"pi":"Evaṁ me sutaṁ—\nekaṁ samayaṁ bhagavā sāvatthiyaṁ viharati pubbārāme migāramātupāsāde sambahulehi abhiññātehi abhiññātehi therehi sāvakehi saddhiṁ—\nāyasmatā ca sāriputtena āyasmatā ca mahāmoggallānena āyasmatā ca mahākassapena āyasmatā ca mahākaccāyanena āyasmatā ca mahākoṭṭhikena āyasmatā ca mahākappinena āyasmatā ca mahācundena āyasmatā ca anuruddhena āyasmatā ca revatena āyasmatā ca ānandena, aññehi ca abhiññātehi abhiññātehi therehi sāvakehi saddhiṁ.","en":"So I have heard.\nAt one time the Buddha was staying near Sāvatthī in the stilt longhouse of Migāra’s mother in the Eastern Monastery, together with several well-known senior disciples, such as\nthe venerables Sāriputta, Mahāmoggallāna, Mahākassapa, Mahākaccāna, Mahākoṭṭhita, Mahākappina, Mahācunda, Anuruddha, Revata, Ānanda, and others."}},{"id":"mn118:2","sourceIds":["mn118:2.1","mn118:2.2","mn118:2.3"],"kind":"text","text":{"pi":"Tena kho pana samayena therā bhikkhū nave bhikkhū ovadanti anusāsanti.\nAppekacce therā bhikkhū dasapi bhikkhū ovadanti anusāsanti, appekacce therā bhikkhū vīsampi bhikkhū ovadanti anusāsanti, appekacce therā bhikkhū tiṁsampi bhikkhū ovadanti anusāsanti, appekacce therā bhikkhū cattārīsampi bhikkhū ovadanti anusāsanti.\nTe ca navā bhikkhū therehi bhikkhūhi ovadiyamānā anusāsiyamānā uḷāraṁ pubbenāparaṁ visesaṁ jānanti.","en":"Now at that time the senior monks were advising and instructing the junior monks.\nSome senior monks instructed ten monks, while some instructed twenty, thirty, or forty.\nBeing instructed by the senior monks, the junior monks realized a higher distinction than they had before."}},{"id":"mn118:3","sourceIds":["mn118:3.1","mn118:3.2"],"kind":"text","text":{"pi":"Tena kho pana samayena bhagavā tadahuposathe pannarase pavāraṇāya puṇṇāya puṇṇamāya rattiyā bhikkhusaṅghaparivuto abbhokāse nisinno hoti.\nAtha kho bhagavā tuṇhībhūtaṁ tuṇhībhūtaṁ bhikkhusaṅghaṁ anuviloketvā bhikkhū āmantesi:","en":"Now, at that time it was the sabbath—the full moon on the fifteenth day—and the Buddha was sitting surrounded by the Saṅgha of monks for the invitation to admonish.\nThen the Buddha looked around the Saṅgha of monks, who were so very silent. He addressed them:"}},{"id":"mn118:4","sourceIds":["mn118:4.1","mn118:4.2","mn118:4.3","mn118:4.4"],"kind":"text","text":{"pi":"“āraddhosmi, bhikkhave, imāya paṭipadāya;\nāraddhacittosmi, bhikkhave, imāya paṭipadāya.\nTasmātiha, bhikkhave, bhiyyoso mattāya vīriyaṁ ārabhatha appattassa pattiyā, anadhigatassa adhigamāya, asacchikatassa sacchikiriyāya.\nIdhevāhaṁ sāvatthiyaṁ komudiṁ cātumāsiniṁ āgamessāmī”ti.","en":"“I am satisfied, monks, with this practice.\nMy heart is satisfied with this practice.\nSo you should rouse up even more energy for attaining the unattained, achieving the unachieved, and realizing the unrealized.\nI will wait here in Sāvatthī for the Komudī full moon of the fourth month.”"}},{"id":"mn118:5","sourceIds":["mn118:5.1","mn118:5.2","mn118:5.3"],"kind":"text","text":{"pi":"Assosuṁ kho jānapadā bhikkhū:\n“bhagavā kira tattheva sāvatthiyaṁ komudiṁ cātumāsiniṁ āgamessatī”ti.\nTe jānapadā bhikkhū sāvatthiṁ osaranti bhagavantaṁ dassanāya.","en":"Mendicants from around the country heard about this,\nand came down to Sāvatthī to see the Buddha."}},{"id":"mn118:6","sourceIds":["mn118:6.1","mn118:6.2","mn118:6.3"],"kind":"text","text":{"pi":"Te ca kho therā bhikkhū bhiyyoso mattāya nave bhikkhū ovadanti anusāsanti.\nAppekacce therā bhikkhū dasapi bhikkhū ovadanti anusāsanti, appekacce therā bhikkhū vīsampi bhikkhū ovadanti anusāsanti, appekacce therā bhikkhū tiṁsampi bhikkhū ovadanti anusāsanti, appekacce therā bhikkhū cattārīsampi bhikkhū ovadanti anusāsanti.\nTe ca navā bhikkhū therehi bhikkhūhi ovadiyamānā anusāsiyamānā uḷāraṁ pubbenāparaṁ visesaṁ jānanti.","en":"And those senior monks instructed the junior monks even more.\nSome senior monks instructed ten monks, while some instructed twenty, thirty, or forty.\nBeing instructed by the senior monks, the junior monks realized a higher distinction than they had before."}},{"id":"mn118:7","sourceIds":["mn118:7.1","mn118:7.2"],"kind":"text","text":{"pi":"Tena kho pana samayena bhagavā tadahuposathe pannarase komudiyā cātumāsiniyā puṇṇāya puṇṇamāya rattiyā bhikkhusaṅghaparivuto abbhokāse nisinno hoti.\nAtha kho bhagavā tuṇhībhūtaṁ tuṇhībhūtaṁ bhikkhusaṅghaṁ anuviloketvā bhikkhū āmantesi:","en":"Now, at that time it was the sabbath—the Komudī full moon on the fifteenth day of the fourth month—and the Buddha was sitting in the open surrounded by the Saṅgha of monks.\nThen the Buddha looked around the Saṅgha of monks, who were so very silent. He addressed them:"}},{"id":"mn118:8","sourceIds":["mn118:8.1","mn118:8.2","mn118:8.3","mn118:8.4","mn118:8.5","mn118:8.6","mn118:8.7","mn118:8.8","mn118:8.9"],"kind":"text","text":{"pi":"“Apalāpāyaṁ, bhikkhave, parisā; nippalāpāyaṁ, bhikkhave, parisā; suddhā sāre patiṭṭhitā.\nTathārūpo ayaṁ, bhikkhave, bhikkhusaṅgho; tathārūpā ayaṁ, bhikkhave, parisā\nyathārūpā parisā āhuneyyā pāhuneyyā dakkhiṇeyyā añjalikaraṇīyā anuttaraṁ puññakkhettaṁ lokassa.\nTathārūpo ayaṁ, bhikkhave, bhikkhusaṅgho; tathārūpā ayaṁ, bhikkhave, parisā\nyathārūpāya parisāya appaṁ dinnaṁ bahu hoti, bahu dinnaṁ bahutaraṁ.\nTathārūpo ayaṁ, bhikkhave, bhikkhusaṅgho; tathārūpā ayaṁ, bhikkhave, parisā\nyathārūpā parisā dullabhā dassanāya lokassa.\nTathārūpo ayaṁ, bhikkhave, bhikkhusaṅgho; tathārūpā ayaṁ, bhikkhave, parisā\nyathārūpaṁ parisaṁ alaṁ yojanagaṇanāni dassanāya gantuṁ puṭosenāpi.","en":"“This assembly has no chaff, monks, it is free of chaff, pure, and consolidated in the core.\nSuch is this Saṅgha of monks, such is this assembly!\nAn assembly such as this is worthy of offerings dedicated to the gods, worthy of hospitality, worthy of a religious donation, worthy of greeting with cupped palms, and is the supreme field of merit for the world.\nSuch is this Saṅgha of monks, such is this assembly!\nFor an assembly such as this, giving little becomes much, while giving much becomes even more.\nSuch is this Saṅgha of monks, such is this assembly!\nAn assembly such as this is rarely seen in the world.\nSuch is this Saṅgha of monks, such is this assembly!\nAn assembly such as this is worth traveling many leagues to see, even if you have to carry your own provisions in a knapsack."}},{"id":"mn118:9","sourceIds":["mn118:9.1","mn118:9.2"],"kind":"text","text":{"pi":"Santi, bhikkhave, bhikkhū imasmiṁ bhikkhusaṅghe arahanto khīṇāsavā vusitavanto katakaraṇīyā ohitabhārā anuppattasadatthā parikkhīṇabhavasaṁyojanā sammadaññāvimuttā—\nevarūpāpi, bhikkhave, santi bhikkhū imasmiṁ bhikkhusaṅghe.","en":"For in this Saṅgha there are perfected mendicants who have ended the defilements, completed the spiritual journey, done what had to be done, laid down the burden, achieved their heart’s goal, utterly ended the fetter of continued existence, and are rightly freed through enlightenment.\nThere are such mendicants in this Saṅgha."}},{"id":"mn118:10","sourceIds":["mn118:10.1","mn118:10.2"],"kind":"text","text":{"pi":"Santi, bhikkhave, bhikkhū imasmiṁ bhikkhusaṅghe pañcannaṁ orambhāgiyānaṁ saṁyojanānaṁ parikkhayā opapātikā tattha parinibbāyino anāvattidhammā tasmā lokā—\nevarūpāpi, bhikkhave, santi bhikkhū imasmiṁ bhikkhusaṅghe.","en":"In this Saṅgha there are mendicants who, with the ending of the five lower fetters are reborn spontaneously. They are extinguished there, and are not liable to return from that world.\nThere are such mendicants in this Saṅgha."}},{"id":"mn118:11","sourceIds":["mn118:11.1","mn118:11.2"],"kind":"text","text":{"pi":"Santi, bhikkhave, bhikkhū imasmiṁ bhikkhusaṅghe tiṇṇaṁ saṁyojanānaṁ parikkhayā rāgadosamohānaṁ tanuttā sakadāgāmino sakideva imaṁ lokaṁ āgantvā dukkhassantaṁ karissanti—\nevarūpāpi, bhikkhave, santi bhikkhū imasmiṁ bhikkhusaṅghe.","en":"In this Saṅgha there are mendicants who, with the ending of three fetters, and the weakening of greed, hate, and delusion, are once-returners. They come back to this world once only, then make an end of suffering.\nThere are such mendicants in this Saṅgha."}},{"id":"mn118:12","sourceIds":["mn118:12.1","mn118:12.2"],"kind":"text","text":{"pi":"Santi, bhikkhave, bhikkhū imasmiṁ bhikkhusaṅghe tiṇṇaṁ saṁyojanānaṁ parikkhayā sotāpannā avinipātadhammā niyatā sambodhiparāyanā—\nevarūpāpi, bhikkhave, santi bhikkhū imasmiṁ bhikkhusaṅghe.","en":"In this Saṅgha there are mendicants who, with the ending of three fetters are stream-enterers, not liable to be reborn in the underworld, assured, destined for awakening.\nThere are such mendicants in this Saṅgha."}},{"id":"mn118:13","sourceIds":["mn118:13.1","mn118:13.2"],"kind":"text","text":{"pi":"Santi, bhikkhave, bhikkhū imasmiṁ bhikkhusaṅghe catunnaṁ satipaṭṭhānānaṁ bhāvanānuyogamanuyuttā viharanti—\nevarūpāpi, bhikkhave, santi bhikkhū imasmiṁ bhikkhusaṅghe.","en":"In this Saṅgha there are mendicants who are committed to developing the four kinds of mindfulness meditation …"}},{"id":"mn118:14","sourceIds":["mn118:14.1","mn118:14.2","mn118:14.3","mn118:14.4","mn118:14.5","mn118:14.6","mn118:14.7","mn118:14.8","mn118:14.9","mn118:14.10","mn118:14.11","mn118:14.12","mn118:14.13","mn118:14.14","mn118:14.15"],"kind":"text","text":{"pi":"Santi, bhikkhave, bhikkhū imasmiṁ bhikkhusaṅghe catunnaṁ sammappadhānānaṁ bhāvanānuyogamanuyuttā viharanti …pe…\ncatunnaṁ iddhipādānaṁ …\npañcannaṁ indriyānaṁ …\npañcannaṁ balānaṁ …\nsattannaṁ bojjhaṅgānaṁ …\nariyassa aṭṭhaṅgikassa maggassa bhāvanānuyogamanuyuttā viharanti—\nevarūpāpi, bhikkhave, santi bhikkhū imasmiṁ bhikkhusaṅghe.\nSanti, bhikkhave, bhikkhū imasmiṁ bhikkhusaṅghe mettābhāvanānuyogamanuyuttā viharanti …\nkaruṇābhāvanānuyogamanuyuttā viharanti …\nmuditābhāvanānuyogamanuyuttā viharanti …\nupekkhābhāvanānuyogamanuyuttā viharanti …\nasubhabhāvanānuyogamanuyuttā viharanti …\naniccasaññābhāvanānuyogamanuyuttā viharanti—\nevarūpāpi, bhikkhave, santi bhikkhū imasmiṁ bhikkhusaṅghe.\nSanti, bhikkhave, bhikkhū imasmiṁ bhikkhusaṅghe ānāpānassatibhāvanānuyogamanuyuttā viharanti.","en":"the four right efforts …\nthe four bases of psychic power …\nthe five faculties …\nthe five powers …\nthe seven awakening factors …\nthe noble eightfold path.\nThere are such mendicants in this Saṅgha.\nIn this Saṅgha there are mendicants who are committed to developing the meditation on love …\ncompassion …\nrejoicing …\nequanimity …\nugliness …\nimpermanence.\nThere are such mendicants in this Saṅgha.\nIn this Saṅgha there are mendicants who are committed to developing the meditation on mindfulness of breathing."}},{"id":"mn118:15","sourceIds":["mn118:15.1","mn118:15.2","mn118:15.3","mn118:15.4"],"kind":"text","text":{"pi":"Ānāpānassati, bhikkhave, bhāvitā bahulīkatā mahapphalā hoti mahānisaṁsā.\nĀnāpānassati, bhikkhave, bhāvitā bahulīkatā cattāro satipaṭṭhāne paripūreti.\nCattāro satipaṭṭhānā bhāvitā bahulīkatā satta bojjhaṅge paripūrenti.\nSatta bojjhaṅgā bhāvitā bahulīkatā vijjāvimuttiṁ paripūrenti.","en":"Mendicants, when mindfulness of breathing is developed and cultivated it is very fruitful and beneficial.\nMindfulness of breathing, when developed and cultivated, fulfills the four kinds of mindfulness meditation.\nThe four kinds of mindfulness meditation, when developed and cultivated, fulfill the seven awakening factors.\nAnd the seven awakening factors, when developed and cultivated, fulfill knowledge and freedom."}},{"id":"mn118:16","sourceIds":["mn118:16.1"],"kind":"text","text":{"pi":"Kathaṁ bhāvitā ca, bhikkhave, ānāpānassati kathaṁ bahulīkatā mahapphalā hoti mahānisaṁsā?","en":"And how is mindfulness of breathing developed and cultivated to be very fruitful and beneficial?"}},{"id":"mn118:17","sourceIds":["mn118:17.1","mn118:17.2"],"kind":"text","text":{"pi":"Idha, bhikkhave, bhikkhu araññagato vā rukkhamūlagato vā suññāgāragato vā nisīdati pallaṅkaṁ ābhujitvā ujuṁ kāyaṁ paṇidhāya parimukhaṁ satiṁ upaṭṭhapetvā.\nSo satova assasati satova passasati.","en":"It’s when a mendicant—gone to a wilderness, or to the root of a tree, or to an empty hut—sits down cross-legged, sets their body straight, and brings mindfulness to the present.\nJust mindful, they breathe in. Mindful, they breathe out."}},{"id":"mn118:18","sourceIds":["mn118:18.1","mn118:18.2","mn118:18.3","mn118:18.4"],"kind":"text","text":{"pi":"Dīghaṁ vā assasanto ‘dīghaṁ assasāmī’ti pajānāti, dīghaṁ vā passasanto ‘dīghaṁ passasāmī’ti pajānāti;\nrassaṁ vā assasanto ‘rassaṁ assasāmī’ti pajānāti, rassaṁ vā passasanto ‘rassaṁ passasāmī’ti pajānāti;\n‘sabbakāyapaṭisaṁvedī assasissāmī’ti sikkhati, ‘sabbakāyapaṭisaṁvedī passasissāmī’ti sikkhati;\n‘passambhayaṁ kāyasaṅkhāraṁ assasissāmī’ti sikkhati, ‘passambhayaṁ kāyasaṅkhāraṁ passasissāmī’ti sikkhati.","en":"Breathing in heavily they know: ‘I’m breathing in heavily.’ Breathing out heavily they know: ‘I’m breathing out heavily.’\nBreathing in lightly they know: ‘I’m breathing in lightly.’ Breathing out lightly they know: ‘I’m breathing out lightly.’\nThey practice like this: ‘I’ll breathe in experiencing the whole body.’ They practice like this: ‘I’ll breathe out experiencing the whole body.’\nThey practice like this: ‘I’ll breathe in stilling the physical process.’ They practice like this: ‘I’ll breathe out stilling the physical process.’"}},{"id":"mn118:19","sourceIds":["mn118:19.1","mn118:19.2","mn118:19.3","mn118:19.4"],"kind":"text","text":{"pi":"‘Pītipaṭisaṁvedī assasissāmī’ti sikkhati, ‘pītipaṭisaṁvedī passasissāmī’ti sikkhati;\n‘sukhapaṭisaṁvedī assasissāmī’ti sikkhati, ‘sukhapaṭisaṁvedī passasissāmī’ti sikkhati;\n‘cittasaṅkhārapaṭisaṁvedī assasissāmī’ti sikkhati, ‘cittasaṅkhārapaṭisaṁvedī passasissāmī’ti sikkhati;\n‘passambhayaṁ cittasaṅkhāraṁ assasissāmī’ti sikkhati, ‘passambhayaṁ cittasaṅkhāraṁ passasissāmī’ti sikkhati.","en":"They practice like this: ‘I’ll breathe in experiencing rapture.’ They practice like this: ‘I’ll breathe out experiencing rapture.’\nThey practice like this: ‘I’ll breathe in experiencing bliss.’ They practice like this: ‘I’ll breathe out experiencing bliss.’\nThey practice like this: ‘I’ll breathe in experiencing the mental process.’ They practice like this: ‘I’ll breathe out experiencing the mental process.’\nThey practice like this: ‘I’ll breathe in stilling the mental process.’ They practice like this: ‘I’ll breathe out stilling the mental process.’"}},{"id":"mn118:20","sourceIds":["mn118:20.1","mn118:20.2","mn118:20.3","mn118:20.4"],"kind":"text","text":{"pi":"‘Cittapaṭisaṁvedī assasissāmī’ti sikkhati, ‘cittapaṭisaṁvedī passasissāmī’ti sikkhati;\n‘abhippamodayaṁ cittaṁ assasissāmī’ti sikkhati, ‘abhippamodayaṁ cittaṁ passasissāmī’ti sikkhati;\n‘samādahaṁ cittaṁ assasissāmī’ti sikkhati, ‘samādahaṁ cittaṁ passasissāmī’ti sikkhati;\n‘vimocayaṁ cittaṁ assasissāmī’ti sikkhati, ‘vimocayaṁ cittaṁ passasissāmī’ti sikkhati.","en":"They practice like this: ‘I’ll breathe in experiencing the mind.’ They practice like this: ‘I’ll breathe out experiencing the mind.’\nThey practice like this: ‘I’ll breathe in gladdening the mind.’ They practice like this: ‘I’ll breathe out gladdening the mind.’\nThey practice like this: ‘I’ll breathe in immersing the mind in samādhi.’ They practice like this: ‘I’ll breathe out immersing the mind in samādhi.’\nThey practice like this: ‘I’ll breathe in freeing the mind.’ They practice like this: ‘I’ll breathe out freeing the mind.’"}},{"id":"mn118:21","sourceIds":["mn118:21.1","mn118:21.2","mn118:21.3","mn118:21.4"],"kind":"text","text":{"pi":"‘Aniccānupassī assasissāmī’ti sikkhati, ‘aniccānupassī passasissāmī’ti sikkhati;\n‘virāgānupassī assasissāmī’ti sikkhati, ‘virāgānupassī passasissāmī’ti sikkhati;\n‘nirodhānupassī assasissāmī’ti sikkhati, ‘nirodhānupassī passasissāmī’ti sikkhati;\n‘paṭinissaggānupassī assasissāmī’ti sikkhati, ‘paṭinissaggānupassī passasissāmī’ti sikkhati.","en":"They practice like this: ‘I’ll breathe in observing impermanence.’ They practice like this: ‘I’ll breathe out observing impermanence.’\nThey practice like this: ‘I’ll breathe in observing fading away.’ They practice like this: ‘I’ll breathe out observing fading away.’\nThey practice like this: ‘I’ll breathe in observing cessation.’ They practice like this: ‘I’ll breathe out observing cessation.’\nThey practice like this: ‘I’ll breathe in observing letting go.’ They practice like this: ‘I’ll breathe out observing letting go.’"}},{"id":"mn118:22","sourceIds":["mn118:22.1"],"kind":"text","text":{"pi":"Evaṁ bhāvitā kho, bhikkhave, ānāpānassati evaṁ bahulīkatā mahapphalā hoti mahānisaṁsā.","en":"Mindfulness of breathing, when developed and cultivated in this way, is very fruitful and beneficial."}},{"id":"mn118:23","sourceIds":["mn118:23.1"],"kind":"text","text":{"pi":"Kathaṁ bhāvitā ca, bhikkhave, ānāpānassati kathaṁ bahulīkatā cattāro satipaṭṭhāne paripūreti?","en":"And how is mindfulness of breathing developed and cultivated so as to fulfill the four kinds of mindfulness meditation?"}},{"id":"mn118:24","sourceIds":["mn118:24.1","mn118:24.2","mn118:24.3","mn118:24.4","mn118:24.5","mn118:24.6","mn118:24.7"],"kind":"text","text":{"pi":"Yasmiṁ samaye, bhikkhave, bhikkhu dīghaṁ vā assasanto ‘dīghaṁ assasāmī’ti pajānāti, dīghaṁ vā passasanto ‘dīghaṁ passasāmī’ti pajānāti;\nrassaṁ vā assasanto ‘rassaṁ assasāmī’ti pajānāti, rassaṁ vā passasanto ‘rassaṁ passasāmī’ti pajānāti;\n‘sabbakāyapaṭisaṁvedī assasissāmī’ti sikkhati, ‘sabbakāyapaṭisaṁvedī passasissāmī’ti sikkhati;\n‘passambhayaṁ kāyasaṅkhāraṁ assasissāmī’ti sikkhati, ‘passambhayaṁ kāyasaṅkhāraṁ passasissāmī’ti sikkhati;\nkāye kāyānupassī, bhikkhave, tasmiṁ samaye bhikkhu viharati ātāpī sampajāno satimā vineyya loke abhijjhādomanassaṁ.\nKāyesu kāyaññatarāhaṁ, bhikkhave, evaṁ vadāmi yadidaṁ—assāsapassāsā.\nTasmātiha, bhikkhave, kāye kāyānupassī tasmiṁ samaye bhikkhu viharati ātāpī sampajāno satimā vineyya loke abhijjhādomanassaṁ.","en":"Whenever a mendicant knows that they breathe heavily,\nor lightly,\nor experiencing the whole body,\nor stilling the physical process—\nat that time they’re meditating by observing an aspect of the body—keen, aware, and mindful, rid of covetousness and displeasure for the world.\nFor I say that the in-breaths and out-breaths are an aspect of the body.\nThat’s why at that time a mendicant is meditating by observing an aspect of the body—keen, aware, and mindful, rid of covetousness and displeasure for the world."}},{"id":"mn118:25","sourceIds":["mn118:25.1","mn118:25.2","mn118:25.3","mn118:25.4","mn118:25.5","mn118:25.6","mn118:25.7"],"kind":"text","text":{"pi":"Yasmiṁ samaye, bhikkhave, bhikkhu ‘pītipaṭisaṁvedī assasissāmī’ti sikkhati, ‘pītipaṭisaṁvedī passasissāmī’ti sikkhati;\n‘sukhapaṭisaṁvedī assasissāmī’ti sikkhati, ‘sukhapaṭisaṁvedī passasissāmī’ti sikkhati;\n‘cittasaṅkhārapaṭisaṁvedī assasissāmī’ti sikkhati, ‘cittasaṅkhārapaṭisaṁvedī passasissāmī’ti sikkhati;\n‘passambhayaṁ cittasaṅkhāraṁ assasissāmī’ti sikkhati, ‘passambhayaṁ cittasaṅkhāraṁ passasissāmī’ti sikkhati;\nvedanāsu vedanānupassī, bhikkhave, tasmiṁ samaye bhikkhu viharati ātāpī sampajāno satimā vineyya loke abhijjhādomanassaṁ.\nVedanāsu vedanāññatarāhaṁ, bhikkhave, evaṁ vadāmi yadidaṁ—assāsapassāsānaṁ sādhukaṁ manasikāraṁ.\nTasmātiha, bhikkhave, vedanāsu vedanānupassī tasmiṁ samaye bhikkhu viharati ātāpī sampajāno satimā vineyya loke abhijjhādomanassaṁ.","en":"Whenever a mendicant practices breathing while experiencing rapture,\nor experiencing bliss,\nor experiencing the mental process,\nor stilling the mental process—\nat that time they meditate observing an aspect of feelings—keen, aware, and mindful, rid of covetousness and displeasure for the world.\nFor I say that careful application of mind to the in-breaths and out-breaths is an aspect of feelings.\nThat’s why at that time a mendicant is meditating by observing an aspect of feelings—keen, aware, and mindful, rid of covetousness and displeasure for the world."}},{"id":"mn118:26","sourceIds":["mn118:26.1","mn118:26.2","mn118:26.3","mn118:26.4","mn118:26.5","mn118:26.6","mn118:26.7"],"kind":"text","text":{"pi":"Yasmiṁ samaye, bhikkhave, bhikkhu ‘cittapaṭisaṁvedī assasissāmī’ti sikkhati, ‘cittapaṭisaṁvedī passasissāmī’ti sikkhati;\n‘abhippamodayaṁ cittaṁ assasissāmī’ti sikkhati, ‘abhippamodayaṁ cittaṁ passasissāmī’ti sikkhati;\n‘samādahaṁ cittaṁ assasissāmī’ti sikkhati, ‘samādahaṁ cittaṁ passasissāmī’ti sikkhati;\n‘vimocayaṁ cittaṁ assasissāmī’ti sikkhati, ‘vimocayaṁ cittaṁ passasissāmī’ti sikkhati;\ncitte cittānupassī, bhikkhave, tasmiṁ samaye bhikkhu viharati ātāpī sampajāno satimā vineyya loke abhijjhādomanassaṁ.\nNāhaṁ, bhikkhave, muṭṭhassatissa asampajānassa ānāpānassatiṁ vadāmi.\nTasmātiha, bhikkhave, citte cittānupassī tasmiṁ samaye bhikkhu viharati ātāpī sampajāno satimā vineyya loke abhijjhādomanassaṁ.","en":"Whenever a mendicant practices breathing while experiencing the mind,\nor gladdening the mind,\nor immersing the mind in samādhi,\nor freeing the mind—\nat that time they meditate observing an aspect of the mind—keen, aware, and mindful, rid of covetousness and displeasure for the world.\nThere is no development of mindfulness of breathing for someone who is unmindful and lacks awareness, I say.\nThat’s why at that time a mendicant is meditating by observing an aspect of the mind—keen, aware, and mindful, rid of covetousness and displeasure for the world."}},{"id":"mn118:27","sourceIds":["mn118:27.1","mn118:27.2","mn118:27.3","mn118:27.4","mn118:27.5","mn118:27.6","mn118:27.7"],"kind":"text","text":{"pi":"Yasmiṁ samaye, bhikkhave, bhikkhu ‘aniccānupassī assasissāmī’ti sikkhati, ‘aniccānupassī passasissāmī’ti sikkhati;\n‘virāgānupassī assasissāmī’ti sikkhati, ‘virāgānupassī passasissāmī’ti sikkhati;\n‘nirodhānupassī assasissāmī’ti sikkhati, ‘nirodhānupassī passasissāmī’ti sikkhati;\n‘paṭinissaggānupassī assasissāmī’ti sikkhati, ‘paṭinissaggānupassī passasissāmī’ti sikkhati;\ndhammesu dhammānupassī, bhikkhave, tasmiṁ samaye bhikkhu viharati ātāpī sampajāno satimā vineyya loke abhijjhādomanassaṁ.\nSo yaṁ taṁ abhijjhādomanassānaṁ pahānaṁ taṁ paññāya disvā sādhukaṁ ajjhupekkhitā hoti.\nTasmātiha, bhikkhave, dhammesu dhammānupassī tasmiṁ samaye bhikkhu viharati ātāpī sampajāno satimā vineyya loke abhijjhādomanassaṁ.","en":"Whenever a mendicant practices breathing while observing impermanence,\nor observing fading away,\nor observing cessation,\nor observing letting go—\nat that time they meditate observing an aspect of principles—keen, aware, and mindful, rid of covetousness and displeasure for the world.\nHaving seen with wisdom the giving up of covetousness and displeasure, they watch over closely with equanimity.\nThat’s why at that time a mendicant is meditating by observing an aspect of principles—keen, aware, and mindful, rid of covetousness and displeasure for the world."}},{"id":"mn118:28","sourceIds":["mn118:28.1"],"kind":"text","text":{"pi":"Evaṁ bhāvitā kho, bhikkhave, ānāpānassati evaṁ bahulīkatā cattāro satipaṭṭhāne paripūreti.","en":"That’s how mindfulness of breathing, when developed and cultivated, fulfills the four kinds of mindfulness meditation."}},{"id":"mn118:29","sourceIds":["mn118:29.1"],"kind":"text","text":{"pi":"Kathaṁ bhāvitā ca, bhikkhave, cattāro satipaṭṭhānā kathaṁ bahulīkatā satta bojjhaṅge paripūrenti?","en":"And how are the four kinds of mindfulness meditation developed and cultivated so as to fulfill the seven awakening factors?"}},{"id":"mn118:30","sourceIds":["mn118:30.1","mn118:30.2"],"kind":"text","text":{"pi":"Yasmiṁ samaye, bhikkhave, bhikkhu kāye kāyānupassī viharati ātāpī sampajāno satimā vineyya loke abhijjhādomanassaṁ, upaṭṭhitāssa tasmiṁ samaye sati hoti asammuṭṭhā.\nYasmiṁ samaye, bhikkhave, bhikkhuno upaṭṭhitā sati hoti asammuṭṭhā, satisambojjhaṅgo tasmiṁ samaye bhikkhuno āraddho hoti. Satisambojjhaṅgaṁ tasmiṁ samaye bhikkhu bhāveti, satisambojjhaṅgo tasmiṁ samaye bhikkhuno bhāvanāpāripūriṁ gacchati.","en":"Whenever a mendicant meditates by observing an aspect of the body, at that time their mindfulness is established and lucid.\nAt such a time, a mendicant has initiated the awakening factor of mindfulness; they develop it and perfect it."}},{"id":"mn118:31","sourceIds":["mn118:31.1","mn118:31.2"],"kind":"text","text":{"pi":"So tathāsato viharanto taṁ dhammaṁ paññāya pavicinati pavicayati parivīmaṁsaṁ āpajjati.\nYasmiṁ samaye, bhikkhave, bhikkhu tathāsato viharanto taṁ dhammaṁ paññāya pavicinati pavicayati parivīmaṁsaṁ āpajjati, dhammavicayasambojjhaṅgo tasmiṁ samaye bhikkhuno āraddho hoti, dhammavicayasambojjhaṅgaṁ tasmiṁ samaye bhikkhu bhāveti, dhammavicayasambojjhaṅgo tasmiṁ samaye bhikkhuno bhāvanāpāripūriṁ gacchati.","en":"As they live mindfully in this way they investigate, explore, and inquire into that principle with wisdom.\nAt such a time, a mendicant has initiated the awakening factor of investigation of principles; they develop it and perfect it."}},{"id":"mn118:32","sourceIds":["mn118:32.1","mn118:32.2"],"kind":"text","text":{"pi":"Tassa taṁ dhammaṁ paññāya pavicinato pavicayato parivīmaṁsaṁ āpajjato āraddhaṁ hoti vīriyaṁ asallīnaṁ.\nYasmiṁ samaye, bhikkhave, bhikkhuno taṁ dhammaṁ paññāya pavicinato pavicayato parivīmaṁsaṁ āpajjato āraddhaṁ hoti vīriyaṁ asallīnaṁ, vīriyasambojjhaṅgo tasmiṁ samaye bhikkhuno āraddho hoti, vīriyasambojjhaṅgaṁ tasmiṁ samaye bhikkhu bhāveti, vīriyasambojjhaṅgo tasmiṁ samaye bhikkhuno bhāvanāpāripūriṁ gacchati.","en":"As they investigate principles with wisdom in this way their energy is roused up and unflagging.\nAt such a time, a mendicant has initiated the awakening factor of energy; they develop it and perfect it."}},{"id":"mn118:33","sourceIds":["mn118:33.1","mn118:33.2"],"kind":"text","text":{"pi":"Āraddhavīriyassa uppajjati pīti nirāmisā.\nYasmiṁ samaye, bhikkhave, bhikkhuno āraddhavīriyassa uppajjati pīti nirāmisā, pītisambojjhaṅgo tasmiṁ samaye bhikkhuno āraddho hoti, pītisambojjhaṅgaṁ tasmiṁ samaye bhikkhu bhāveti, pītisambojjhaṅgo tasmiṁ samaye bhikkhuno bhāvanāpāripūriṁ gacchati.","en":"When they’re energetic, rapture not of the flesh arises.\nAt such a time, a mendicant has initiated the awakening factor of rapture; they develop it and perfect it."}},{"id":"mn118:34","sourceIds":["mn118:34.1","mn118:34.2"],"kind":"text","text":{"pi":"Pītimanassa kāyopi passambhati, cittampi passambhati.\nYasmiṁ samaye, bhikkhave, bhikkhuno pītimanassa kāyopi passambhati, cittampi passambhati, passaddhisambojjhaṅgo tasmiṁ samaye bhikkhuno āraddho hoti, passaddhisambojjhaṅgaṁ tasmiṁ samaye bhikkhu bhāveti, passaddhisambojjhaṅgo tasmiṁ samaye bhikkhuno bhāvanāpāripūriṁ gacchati.","en":"When the mind is full of rapture, the body and mind become tranquil.\nAt such a time, a mendicant has initiated the awakening factor of tranquility; they develop it and perfect it."}},{"id":"mn118:35","sourceIds":["mn118:35.1","mn118:35.2"],"kind":"text","text":{"pi":"Passaddhakāyassa sukhino cittaṁ samādhiyati.\nYasmiṁ samaye, bhikkhave, bhikkhuno passaddhakāyassa sukhino cittaṁ samādhiyati, samādhisambojjhaṅgo tasmiṁ samaye bhikkhuno āraddho hoti, samādhisambojjhaṅgaṁ tasmiṁ samaye bhikkhu bhāveti, samādhisambojjhaṅgo tasmiṁ samaye bhikkhuno bhāvanāpāripūriṁ gacchati.","en":"When the body is tranquil and they feel bliss, the mind becomes immersed in samādhi.\nAt such a time, a mendicant has initiated the awakening factor of immersion; they develop it and perfect it."}},{"id":"mn118:36","sourceIds":["mn118:36.1","mn118:36.2"],"kind":"text","text":{"pi":"So tathāsamāhitaṁ cittaṁ sādhukaṁ ajjhupekkhitā hoti.\nYasmiṁ samaye, bhikkhave, bhikkhu tathāsamāhitaṁ cittaṁ sādhukaṁ ajjhupekkhitā hoti, upekkhāsambojjhaṅgo tasmiṁ samaye bhikkhuno āraddho hoti, upekkhāsambojjhaṅgaṁ tasmiṁ samaye bhikkhu bhāveti, upekkhāsambojjhaṅgo tasmiṁ samaye bhikkhuno bhāvanāpāripūriṁ gacchati.","en":"They closely watch over that mind immersed in samādhi.\nAt such a time, a mendicant has initiated the awakening factor of equanimity; they develop it and perfect it."}},{"id":"mn118:37","sourceIds":["mn118:37.1"],"kind":"text","text":{"pi":"Yasmiṁ samaye, bhikkhave, bhikkhu vedanāsu …pe…","en":"Whenever a mendicant meditates by observing an aspect of feelings …"}},{"id":"mn118:38","sourceIds":["mn118:38.1","mn118:38.2","mn118:38.3","mn118:38.4","mn118:38.5","mn118:38.6","mn118:38.7","mn118:38.8","mn118:38.9","mn118:38.10","mn118:38.11","mn118:38.12","mn118:38.13"],"kind":"text","text":{"pi":"citte …\ndhammesu dhammānupassī viharati ātāpī sampajāno satimā vineyya loke abhijjhādomanassaṁ, upaṭṭhitāssa tasmiṁ samaye sati hoti asammuṭṭhā.\nYasmiṁ samaye, bhikkhave, bhikkhuno upaṭṭhitā sati hoti asammuṭṭhā, satisambojjhaṅgo tasmiṁ samaye bhikkhuno āraddho hoti, satisambojjhaṅgaṁ tasmiṁ samaye bhikkhu bhāveti, satisambojjhaṅgo tasmiṁ samaye bhikkhuno bhāvanāpāripūriṁ gacchati.\nSo tathāsato viharanto taṁ dhammaṁ paññāya pavicinati pavicayati parivīmaṁsaṁ āpajjati.\nYasmiṁ samaye, bhikkhave, bhikkhu tathāsato viharanto taṁ dhammaṁ paññāya pavicinati pavicayati parivīmaṁsaṁ āpajjati, dhammavicayasambojjhaṅgo tasmiṁ samaye bhikkhuno āraddho hoti, dhammavicayasambojjhaṅgaṁ tasmiṁ samaye bhikkhu bhāveti, dhammavicayasambojjhaṅgo tasmiṁ samaye bhikkhuno bhāvanāpāripūriṁ gacchati.\nTassa taṁ dhammaṁ paññāya pavicinato pavicayato parivīmaṁsaṁ āpajjato āraddhaṁ hoti vīriyaṁ asallīnaṁ.\nYasmiṁ samaye, bhikkhave, bhikkhuno taṁ dhammaṁ paññāya pavicinato pavicayato parivīmaṁsaṁ āpajjato āraddhaṁ hoti vīriyaṁ asallīnaṁ, vīriyasambojjhaṅgo tasmiṁ samaye bhikkhuno āraddho hoti, vīriyasambojjhaṅgaṁ tasmiṁ samaye bhikkhu bhāveti, vīriyasambojjhaṅgo tasmiṁ samaye bhikkhuno bhāvanāpāripūriṁ gacchati.\nĀraddhavīriyassa uppajjati pīti nirāmisā.\nYasmiṁ samaye, bhikkhave, bhikkhuno āraddhavīriyassa uppajjati pīti nirāmisā, pītisambojjhaṅgo tasmiṁ samaye bhikkhuno āraddho hoti, pītisambojjhaṅgaṁ tasmiṁ samaye bhikkhu bhāveti, pītisambojjhaṅgo tasmiṁ samaye bhikkhuno bhāvanāpāripūriṁ gacchati.\nPītimanassa kāyopi passambhati, cittampi passambhati.\nYasmiṁ samaye, bhikkhave, bhikkhuno pītimanassa kāyopi passambhati, cittampi passambhati, passaddhisambojjhaṅgo tasmiṁ samaye bhikkhuno āraddho hoti, passaddhisambojjhaṅgaṁ tasmiṁ samaye bhikkhu bhāveti, passaddhisambojjhaṅgo tasmiṁ samaye bhikkhuno bhāvanāpāripūriṁ gacchati.\nPassaddhakāyassa sukhino cittaṁ samādhiyati.\nYasmiṁ samaye, bhikkhave, bhikkhuno passaddhakāyassa sukhino cittaṁ samādhiyati, samādhisambojjhaṅgo tasmiṁ samaye bhikkhuno āraddho hoti, samādhisambojjhaṅgaṁ tasmiṁ samaye bhikkhu bhāveti, samādhisambojjhaṅgo tasmiṁ samaye bhikkhuno bhāvanāpāripūriṁ gacchati.","en":"mind …\nprinciples, at that time their mindfulness is established and lucid.\nAt such a time, a mendicant has initiated the awakening factor of mindfulness …\ninvestigation of principles …\nenergy …\nrapture …\ntranquility …\nimmersion …"}},{"id":"mn118:39","sourceIds":["mn118:39.1","mn118:39.2"],"kind":"text","text":{"pi":"So tathāsamāhitaṁ cittaṁ sādhukaṁ ajjhupekkhitā hoti.\nYasmiṁ samaye, bhikkhave, bhikkhu tathāsamāhitaṁ cittaṁ sādhukaṁ ajjhupekkhitā hoti, upekkhāsambojjhaṅgo tasmiṁ samaye bhikkhuno āraddho hoti, upekkhāsambojjhaṅgaṁ tasmiṁ samaye bhikkhu bhāveti, upekkhāsambojjhaṅgo tasmiṁ samaye bhikkhuno bhāvanāpāripūriṁ gacchati.","en":"equanimity."}},{"id":"mn118:40","sourceIds":["mn118:40.1"],"kind":"text","text":{"pi":"Evaṁ bhāvitā kho, bhikkhave, cattāro satipaṭṭhānā evaṁ bahulīkatā satta sambojjhaṅge paripūrenti.","en":"That’s how the four kinds of mindfulness meditation, when developed and cultivated, fulfill the seven awakening factors."}},{"id":"mn118:41","sourceIds":["mn118:41.1"],"kind":"text","text":{"pi":"Kathaṁ bhāvitā ca, bhikkhave, satta bojjhaṅgā kathaṁ bahulīkatā vijjāvimuttiṁ paripūrenti?","en":"And how are the seven awakening factors developed and cultivated so as to fulfill knowledge and freedom?"}},{"id":"mn118:42","sourceIds":["mn118:42.1","mn118:42.2","mn118:42.3","mn118:42.4","mn118:42.5","mn118:42.6","mn118:42.7"],"kind":"text","text":{"pi":"Idha, bhikkhave, bhikkhu satisambojjhaṅgaṁ bhāveti vivekanissitaṁ virāganissitaṁ nirodhanissitaṁ vossaggapariṇāmiṁ.\nDhammavicayasambojjhaṅgaṁ bhāveti …pe…\nvīriyasambojjhaṅgaṁ bhāveti …\npītisambojjhaṅgaṁ bhāveti …\npassaddhisambojjhaṅgaṁ bhāveti …\nsamādhisambojjhaṅgaṁ bhāveti …\nupekkhāsambojjhaṅgaṁ bhāveti vivekanissitaṁ virāganissitaṁ nirodhanissitaṁ vossaggapariṇāmiṁ.","en":"It’s when a mendicant develops the awakening factors of mindfulness,\ninvestigation of principles,\nenergy,\nrapture,\ntranquility,\nimmersion,\nand equanimity, which rely on seclusion, fading away, and cessation, and ripen as letting go."}},{"id":"mn118:43","sourceIds":["mn118:43.1","mn118:43.2","mn118:43.3","mn118:43.4"],"kind":"text","text":{"pi":"Evaṁ bhāvitā kho, bhikkhave, satta bojjhaṅgā evaṁ bahulīkatā vijjāvimuttiṁ paripūrentī”ti.\nIdamavoca bhagavā.\nAttamanā te bhikkhū bhagavato bhāsitaṁ abhinandunti.\nĀnāpānassatisuttaṁ niṭṭhitaṁ aṭṭhamaṁ.","en":"That’s how the seven awakening factors, when developed and cultivated, fulfill knowledge and freedom.”\nThat is what the Buddha said.\nSatisfied, the monks approved what the Buddha said."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mn118/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}