{"id":"mn128","title":"Corruptions","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mn128","title":"Corruptions","units":[{"id":"mn128:0","sourceIds":["mn128:0.1","mn128:0.2"],"kind":"text","text":{"pi":"Majjhima Nikāya 128\nUpakkilesasutta","en":"Middle Discourses 128\nCorruptions"}},{"id":"mn128:1","sourceIds":["mn128:1.1","mn128:1.2"],"kind":"text","text":{"pi":"Evaṁ me sutaṁ—\nekaṁ samayaṁ bhagavā kosambiyaṁ viharati ghositārāme.","en":"So I have heard.\nAt one time the Buddha was staying near Kosambī in Ghosita’s monastery."}},{"id":"mn128:2","sourceIds":["mn128:2.1"],"kind":"text","text":{"pi":"Tena kho pana samayena kosambiyaṁ bhikkhū bhaṇḍanajātā kalahajātā vivādāpannā aññamaññaṁ mukhasattīhi vitudantā viharanti.","en":"Now at that time the mendicants of Kosambī were fighting, quarreling, and disputing, continually wounding each other with barbed words."}},{"id":"mn128:3","sourceIds":["mn128:3.1","mn128:3.2","mn128:3.3","mn128:3.4"],"kind":"text","text":{"pi":"Atha kho aññataro bhikkhu yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ aṭṭhāsi. Ekamantaṁ ṭhito kho so bhikkhu bhagavantaṁ etadavoca:\n“idha, bhante, kosambiyaṁ bhikkhū bhaṇḍanajātā kalahajātā vivādāpannā aññamaññaṁ mukhasattīhi vitudantā viharanti.\nSādhu, bhante, bhagavā yena te bhikkhū tenupasaṅkamatu anukampaṁ upādāyā”ti.\nAdhivāsesi bhagavā tuṇhībhāvena.","en":"Then a mendicant went up to the Buddha, bowed, stood to one side, and told him what was happening, adding:\n“Please, sir go to those mendicants out of sympathy.”\nThe Buddha consented with silence."}},{"id":"mn128:4","sourceIds":["mn128:4.1","mn128:4.2","mn128:4.3","mn128:4.4","mn128:4.5","mn128:4.6","mn128:4.7","mn128:4.8","mn128:4.9","mn128:4.10","mn128:4.11","mn128:4.12","mn128:4.13","mn128:4.14","mn128:4.15","mn128:4.16","mn128:4.17","mn128:4.18","mn128:4.19","mn128:4.20","mn128:4.21"],"kind":"text","text":{"pi":"Atha kho bhagavā yena te bhikkhū tenupasaṅkami; upasaṅkamitvā te bhikkhū etadavoca:\n“alaṁ, bhikkhave, mā bhaṇḍanaṁ, mā kalahaṁ, mā viggahaṁ, mā vivādan”ti.\nEvaṁ vutte, aññataro bhikkhu bhagavantaṁ etadavoca:\n“āgametu, bhante.\nBhagavā dhammassāmī;\nappossukko, bhante, bhagavā diṭṭhadhammasukhavihāraṁ anuyutto viharatu;\nmayametena bhaṇḍanena kalahena viggahena vivādena paññāyissāmā”ti.\nDutiyampi kho bhagavā te bhikkhū etadavoca:\n“alaṁ, bhikkhave, mā bhaṇḍanaṁ, mā kalahaṁ, mā viggahaṁ, mā vivādan”ti.\nDutiyampi kho so bhikkhu bhagavantaṁ etadavoca:\n“āgametu, bhante.\nBhagavā dhammassāmī;\nappossukko, bhante, bhagavā diṭṭhadhammasukhavihāraṁ anuyutto viharatu;\nmayametena bhaṇḍanena kalahena viggahena vivādena paññāyissāmā”ti.\nTatiyampi kho bhagavā te bhikkhū etadavoca:\n“alaṁ, bhikkhave, mā bhaṇḍanaṁ, mā kalahaṁ, mā viggahaṁ, mā vivādan”ti.\nTatiyampi kho so bhikkhu bhagavantaṁ etadavoca:\n“āgametu, bhante.\nBhagavā dhammassāmī;\nappossukko, bhante, bhagavā diṭṭhadhammasukhavihāraṁ anuyutto viharatu;\nmayametena bhaṇḍanena kalahena viggahena vivādena paññāyissāmā”ti.","en":"Then the Buddha went up to those mendicants and said,\n“Enough, mendicants! Stop fighting, quarreling, and disputing.”\nWhen he said this, one of the mendicants said to the Buddha,\n“Wait, sir!\nLet the Buddha, the Lord of the Dhamma,\nremain passive, dwelling in blissful meditation in this life.\nWe will be known for this fighting, quarreling, arguing, and disputing.”\nFor a second time …\nand a third time the Buddha said to those mendicants,\n“Enough, mendicants! Stop fighting, quarreling, and disputing.”\nFor a third time, that mendicant said to the Buddha,\n“Wait, sir!\nLet the Buddha, the Lord of the Dhamma,\nremain passive, dwelling in blissful meditation in this life.\nWe will be known for this fighting, quarreling, arguing, and disputing.”"}},{"id":"mn128:5","sourceIds":["mn128:5.1","mn128:5.2"],"kind":"text","text":{"pi":"Atha kho bhagavā pubbaṇhasamayaṁ nivāsetvā pattacīvaramādāya kosambiṁ piṇḍāya pāvisi.\nKosambiyaṁ piṇḍāya caritvā pacchābhattaṁ piṇḍapātapaṭikkanto senāsanaṁ saṁsāmetvā pattacīvaramādāya ṭhitakova imā gāthā abhāsi:","en":"Then the Buddha robed up in the morning and, taking his bowl and robe, entered Kosambī for alms.\nAfter the meal, on his return from almsround, he set his lodgings in order. Taking his bowl and robe, he recited these verses while standing right there:"}},{"id":"mn128:6","sourceIds":["mn128:6.1","mn128:6.2","mn128:6.3","mn128:6.4","mn128:6.5","mn128:6.6","mn128:6.7","mn128:6.8","mn128:6.9","mn128:6.10","mn128:6.11","mn128:6.12","mn128:6.13","mn128:6.14","mn128:6.15","mn128:6.16","mn128:6.17","mn128:6.18","mn128:6.19","mn128:6.20","mn128:6.21","mn128:6.22","mn128:6.23","mn128:6.24","mn128:6.25","mn128:6.26","mn128:6.27","mn128:6.28","mn128:6.29","mn128:6.30","mn128:6.31","mn128:6.32","mn128:6.33","mn128:6.34","mn128:6.35","mn128:6.36","mn128:6.37","mn128:6.38","mn128:6.39","mn128:6.40","mn128:6.41"],"kind":"text","text":{"pi":"“Puthusaddo samajano,\nna bālo koci maññatha;\nSaṅghasmiṁ bhijjamānasmiṁ,\nnāññaṁ bhiyyo amaññaruṁ.\nParimuṭṭhā paṇḍitābhāsā,\nvācāgocarabhāṇino;\nYāvicchanti mukhāyāmaṁ,\nyena nītā na taṁ vidū.\nAkkocchi maṁ avadhi maṁ,\najini maṁ ahāsi me;\nYe ca taṁ upanayhanti,\nveraṁ tesaṁ na sammati.\nAkkocchi maṁ avadhi maṁ,\najini maṁ ahāsi me;\nYe ca taṁ nupanayhanti,\nveraṁ tesūpasammati.\nNa hi verena verāni,\nsammantīdha kudācanaṁ;\nAverena ca sammanti,\nesa dhammo sanantano.\nPare ca na vijānanti,\nmayamettha yamāmase;\nYe ca tattha vijānanti,\ntato sammanti medhagā.\nAṭṭhicchinnā pāṇaharā,\ngavassadhanahārino;\nRaṭṭhaṁ vilumpamānānaṁ,\ntesampi hoti saṅgati;\nKasmā tumhākaṁ no siyā.\nSace labhetha nipakaṁ sahāyaṁ,\nSaddhiṁ caraṁ sādhuvihāri dhīraṁ;\nAbhibhuyya sabbāni parissayāni,\nCareyya tenattamano satīmā.\nNo ce labhetha nipakaṁ sahāyaṁ,\nSaddhiṁ caraṁ sādhuvihāri dhīraṁ;\nRājāva raṭṭhaṁ vijitaṁ pahāya,\nEko care mātaṅgaraññeva nāgo.\nEkassa caritaṁ seyyo,\nNatthi bāle sahāyatā;\nEko care na ca pāpāni kayirā,\nAppossukko mātaṅgaraññeva nāgo”ti.","en":"“Many voices shout at once,\nyet no one thinks that they’re the fool.\nEven as the Saṅgha splits,\nthey think no better of the other.\nDolts pretending to be astute,\nthey talk, their words out of bounds.\nThey blab at will, their mouths agape,\nand not one knows what leads them on.\n‘They abused me, they hit me!\nThey beat me, they robbed me!’\nFor those bearing such a grudge,\nhatred is never laid to rest.\n‘They abused me, they hit me!\nThey beat me, they robbed me!’\nFor those who bear no such grudge,\nhatred is laid to rest.\nFor never is hatred\nlaid to rest by hate,\nit’s laid to rest by love:\nthis is an ancient teaching.\nWhen others do not understand,\nlet us, who do understand this,\nrestrain ourselves in this regard;\nfor that is how conflicts are laid to rest.\nBreakers of bones and takers of life,\nthieves of cattle, horses, wealth,\nthose who plunder the nation:\neven they can come together,\nso why can’t you?\nIf you find an alert companion,\nan attentive friend to live happily together,\nthen, overcoming all adversities,\nwander with them, joyful and mindful.\nIf you find no alert companion,\nno attentive friend to live happily together,\nthen, like a king who flees his conquered realm,\nwander alone like a tusker in the wilds.\nIt’s better to wander alone,\nthere’s no fellowship with fools.\nWander alone and do no wrong,\nat ease like a tusker in the wilds.”"}},{"id":"mn128:7","sourceIds":["mn128:7.1","mn128:7.2","mn128:7.3","mn128:7.4","mn128:7.5","mn128:7.6","mn128:7.7","mn128:7.8","mn128:7.9","mn128:7.10","mn128:7.11"],"kind":"text","text":{"pi":"Atha kho bhagavā ṭhitakova imā gāthā bhāsitvā yena bālakaloṇakāragāmo tenupasaṅkami.\nTena kho pana samayena āyasmā bhagu bālakaloṇakāragāme viharati.\nAddasā kho āyasmā bhagu bhagavantaṁ dūratova āgacchantaṁ.\nDisvāna āsanaṁ paññapesi udakañca pādānaṁ dhovanaṁ.\nNisīdi bhagavā paññatte āsane.\nNisajja pāde pakkhālesi.\nĀyasmāpi kho bhagu bhagavantaṁ abhivādetvā ekamantaṁ nisīdi.\nEkamantaṁ nisinnaṁ kho āyasmantaṁ bhaguṁ bhagavā etadavoca:\n“kacci, bhikkhu, khamanīyaṁ, kacci yāpanīyaṁ, kacci piṇḍakena na kilamasī”ti?\n“Khamanīyaṁ bhagavā, yāpanīyaṁ bhagavā, na cāhaṁ, bhante, piṇḍakena kilamāmī”ti.\nAtha kho bhagavā āyasmantaṁ bhaguṁ dhammiyā kathāya sandassetvā samādapetvā samuttejetvā sampahaṁsetvā uṭṭhāyāsanā yena pācīnavaṁsadāyo tenupasaṅkami.","en":"After speaking these verses while standing, the Buddha went to the village of the child salt-miners,\nwhere Venerable Bhagu was staying at the time.\nBhagu saw the Buddha coming off in the distance,\nso he spread out a seat and placed water for washing the feet.\nThe Buddha sat down on the seat spread out,\nand washed his feet.\nBhagu bowed to the Buddha and sat down to one side.\nThe Buddha said to him,\n“I hope you’re keeping well, mendicant, I hope you’re all right. And I hope you’re having no trouble getting almsfood.”\n“I’m keeping well, Blessed One, I’m all right. And I’m having no trouble getting almsfood.”\nThen the Buddha educated, encouraged, fired up, and inspired Bhagu with a Dhamma talk, after which he rose from his seat and set out for the Park of the East-Raftered Hall."}},{"id":"mn128:8","sourceIds":["mn128:8.1","mn128:8.2","mn128:8.3","mn128:8.4","mn128:8.5","mn128:8.6"],"kind":"text","text":{"pi":"Tena kho pana samayena āyasmā ca anuruddho āyasmā ca nandiyo āyasmā ca kimilo pācīnavaṁsadāye viharanti.\nAddasā kho dāyapālo bhagavantaṁ dūratova āgacchantaṁ.\nDisvāna bhagavantaṁ etadavoca:\n“mā, mahāsamaṇa, etaṁ dāyaṁ pāvisi.\nSantettha tayo kulaputtā attakāmarūpā viharanti.\nMā tesaṁ aphāsumakāsī”ti.","en":"Now at that time the venerables Anuruddha, Nandiya, and Kimbila were staying in the Park of the East-Raftered Hall.\nThe park keeper saw the Buddha coming off in the distance\nand said to the Buddha,\n“Don’t come into this park, ascetic.\nThere are three gentlemen staying here whose nature is to desire self-knowledge.\nDo not disturb them.”"}},{"id":"mn128:9","sourceIds":["mn128:9.1","mn128:9.2","mn128:9.3","mn128:9.4"],"kind":"text","text":{"pi":"Assosi kho āyasmā anuruddho dāyapālassa bhagavatā saddhiṁ mantayamānassa.\nSutvāna dāyapālaṁ etadavoca:\n“mā, āvuso dāyapāla, bhagavantaṁ vāresi.\nSatthā no bhagavā anuppatto”ti.","en":"Anuruddha heard the park keeper conversing with the Buddha,\nand said to him,\n“Don’t keep the Buddha out, good park keeper!\nOur Teacher, the Blessed One, has arrived.”"}},{"id":"mn128:10","sourceIds":["mn128:10.1","mn128:10.2","mn128:10.3","mn128:10.4","mn128:10.5","mn128:10.6","mn128:10.7","mn128:10.8","mn128:10.9","mn128:10.10"],"kind":"text","text":{"pi":"Atha kho āyasmā anuruddho yenāyasmā ca nandiyo yenāyasmā ca kimilo tenupasaṅkami; upasaṅkamitvā āyasmantañca nandiyaṁ āyasmantañca kimilaṁ etadavoca:\n“abhikkamathāyasmanto, abhikkamathāyasmanto, satthā no bhagavā anuppatto”ti.\nAtha kho āyasmā ca anuruddho āyasmā ca nandiyo āyasmā ca kimilo bhagavantaṁ paccuggantvā\neko bhagavato pattacīvaraṁ paṭiggahesi, eko āsanaṁ paññapesi, eko pādodakaṁ upaṭṭhapesi.\nNisīdi bhagavā paññatte āsane.\nNisajja pāde pakkhālesi.\nTepi kho āyasmanto bhagavantaṁ abhivādetvā ekamantaṁ nisīdiṁsu.\nEkamantaṁ nisinnaṁ kho āyasmantaṁ anuruddhaṁ bhagavā etadavoca:\n“kacci vo, anuruddhā, khamanīyaṁ, kacci yāpanīyaṁ, kacci piṇḍakena na kilamathā”ti?\n“Khamanīyaṁ bhagavā, yāpanīyaṁ bhagavā, na ca mayaṁ, bhante, piṇḍakena kilamāmā”ti.","en":"Then Anuruddha went to Nandiya and Kimbila, and said to them,\n“Come forth, venerables, come forth! Our Teacher, the Blessed One, has arrived!”\nThen Anuruddha, Nandiya, and Kimbila came out to greet the Buddha.\nOne received his bowl and robe, one spread out a seat, and one set out water for washing his feet.\nThe Buddha sat down on the seat spread out,\nand washed his feet.\nThose venerables bowed and sat down to one side.\nThe Buddha said to Anuruddha,\n“I hope you’re keeping well, Anuruddha and friends, I hope you’re all right. And I hope you’re having no trouble getting almsfood.”\n“We’re keeping well, Blessed One, we’re getting by. And we have no trouble getting almsfood.”"}},{"id":"mn128:11","sourceIds":["mn128:11.1","mn128:11.2","mn128:11.3"],"kind":"text","text":{"pi":"“Kacci pana vo, anuruddhā, samaggā sammodamānā avivadamānā khīrodakībhūtā aññamaññaṁ piyacakkhūhi sampassantā viharathā”ti?\n“Taggha mayaṁ, bhante, samaggā sammodamānā avivadamānā khīrodakībhūtā aññamaññaṁ piyacakkhūhi sampassantā viharāmā”ti.\n“Yathā kathaṁ pana tumhe, anuruddhā, samaggā sammodamānā avivadamānā khīrodakībhūtā aññamaññaṁ piyacakkhūhi sampassantā viharathā”ti?","en":"“I hope you’re living in harmony, appreciating each other, without quarreling, blending like milk and water, and regarding each other with kindly eyes?”\n“Indeed, sir, we live in harmony as you say.”\n“But how do you live this way?”"}},{"id":"mn128:12","sourceIds":["mn128:12.1","mn128:12.2","mn128:12.3","mn128:12.4","mn128:12.5","mn128:12.6","mn128:12.7","mn128:12.8","mn128:12.9","mn128:12.10","mn128:12.11","mn128:12.12","mn128:12.13","mn128:12.14","mn128:12.15","mn128:12.16","mn128:12.17","mn128:12.18","mn128:12.19","mn128:12.20","mn128:12.21","mn128:12.22","mn128:12.23"],"kind":"text","text":{"pi":"“Idha mayhaṁ, bhante, evaṁ hoti:\n‘lābhā vata me, suladdhaṁ vata me\nyohaṁ evarūpehi sabrahmacārīhi saddhiṁ viharāmī’ti.\nTassa mayhaṁ, bhante, imesu āyasmantesu mettaṁ kāyakammaṁ paccupaṭṭhitaṁ āvi ceva raho ca,\nmettaṁ vacīkammaṁ paccupaṭṭhitaṁ āvi ceva raho ca,\nmettaṁ manokammaṁ paccupaṭṭhitaṁ āvi ceva raho ca.\nTassa, mayhaṁ, bhante, evaṁ hoti:\n‘yannūnāhaṁ sakaṁ cittaṁ nikkhipitvā imesaṁyeva āyasmantānaṁ cittassa vasena vatteyyan’ti.\nSo kho ahaṁ, bhante, sakaṁ cittaṁ nikkhipitvā imesaṁyeva āyasmantānaṁ cittassa vasena vattāmi.\nNānā hi kho no, bhante, kāyā, ekañca pana maññe cittan”ti.\nĀyasmāpi kho nandiyo …pe…\nāyasmāpi kho kimilo bhagavantaṁ etadavoca:\n“mayhampi kho, bhante, evaṁ hoti:\n‘lābhā vata me, suladdhaṁ vata me\nyohaṁ evarūpehi sabrahmacārīhi saddhiṁ viharāmī’ti.\nTassa mayhaṁ, bhante, imesu āyasmantesu mettaṁ kāyakammaṁ paccupaṭṭhitaṁ āvi ceva raho ca,\nmettaṁ vacīkammaṁ paccupaṭṭhitaṁ āvi ceva raho ca,\nmettaṁ manokammaṁ paccupaṭṭhitaṁ āvi ceva raho ca.\nTassa mayhaṁ, bhante, evaṁ hoti:\n‘yannūnāhaṁ sakaṁ cittaṁ nikkhipitvā imesaṁyeva āyasmantānaṁ cittassa vasena vatteyyan’ti.\nSo kho ahaṁ, bhante, sakaṁ cittaṁ nikkhipitvā imesaṁyeva āyasmantānaṁ cittassa vasena vattāmi.\nNānā hi kho no, bhante, kāyā, ekañca pana maññe cittanti.\nEvaṁ kho mayaṁ, bhante, samaggā sammodamānā avivadamānā khīrodakībhūtā aññamaññaṁ piyacakkhūhi sampassantā viharāmā”ti.","en":"“In this case, sir, I think:\n‘I’m fortunate, so very fortunate,\nto live together with spiritual companions such as these.’\nI consistently treat these venerables with kindness by way of body, speech, and mind, both in public and in private.\nI think:\n‘Why don’t I set aside my own ideas and just go along with these venerables’ ideas?’\nAnd that’s what I do.\nThough we’re different in body, sir, we’re one in mind, it seems to me.”\nAnd the venerables Nandiya and Kimbila spoke likewise, and they added:\n“That’s how we live in harmony, appreciating each other, without dispute, blending like milk and water, and regarding each other with kindly eyes.”"}},{"id":"mn128:13","sourceIds":["mn128:13.1","mn128:13.2"],"kind":"text","text":{"pi":"“Sādhu sādhu, anuruddhā.\nKacci pana vo, anuruddhā, appamattā ātāpino pahitattā viharathā”ti?","en":"“Good, good, Anuruddha and friends!\nBut I hope you’re living diligently, keen, and resolute?”"}},{"id":"mn128:14","sourceIds":["mn128:14.1","mn128:14.2","mn128:14.3","mn128:14.4","mn128:14.5","mn128:14.6","mn128:14.7","mn128:14.8","mn128:14.9"],"kind":"text","text":{"pi":"“Taggha mayaṁ, bhante, appamattā ātāpino pahitattā viharāmā”ti.\n“Yathā kathaṁ pana tumhe, anuruddhā, appamattā ātāpino pahitattā viharathā”ti?\n“Idha, bhante, amhākaṁ yo paṭhamaṁ gāmato piṇḍāya paṭikkamati, so āsanāni paññapeti, pānīyaṁ paribhojanīyaṁ upaṭṭhāpeti, avakkārapātiṁ upaṭṭhāpeti.\nYo pacchā gāmato piṇḍāya paṭikkamati—sace hoti bhuttāvaseso, sace ākaṅkhati, bhuñjati; no ce ākaṅkhati, appaharite vā chaḍḍeti apāṇake vā udake opilāpeti—\nso āsanāni paṭisāmeti, pānīyaṁ paribhojanīyaṁ paṭisāmeti, avakkārapātiṁ dhovitvā paṭisāmeti, bhattaggaṁ sammajjati.\nYo passati pānīyaghaṭaṁ vā paribhojanīyaghaṭaṁ vā vaccaghaṭaṁ vā rittaṁ tucchaṁ so upaṭṭhāpeti.\nSacassa hoti avisayhaṁ, hatthavikārena dutiyaṁ āmantetvā hatthavilaṅghakena upaṭṭhāpema, na tveva mayaṁ, bhante, tappaccayā vācaṁ bhindāma.\nPañcāhikaṁ kho pana mayaṁ, bhante, sabbarattiṁ dhammiyā kathāya sannisīdāma.\nEvaṁ kho mayaṁ, bhante, appamattā ātāpino pahitattā viharāmā”ti.","en":"“Indeed, sir, we live diligently.”\n“But how do you live this way?”\n“In this case, sir, whoever returns first from almsround prepares the seats, and puts out the drinking water and the rubbish bin.\nIf there’s remainder, whoever returns last eats it if they like. Otherwise they throw it out where there is little that grows, or drop it into water that has no living creatures.\nThen they put away the seats, drinking water, and rubbish bin, and sweep the refectory.\nIf someone sees that the pot of water for washing, drinking, or the toilet is empty they set it up.\nIf he can’t do it, he summons another with a wave of the hand, and they set it up by lending each other a hand to lift. But we don’t break into speech for that reason.\nAnd every five days we sit together for the whole night and discuss the teachings.\nThat’s how we live diligently, keen, and resolute.”"}},{"id":"mn128:15","sourceIds":["mn128:15.1","mn128:15.2","mn128:15.3","mn128:15.4","mn128:15.5"],"kind":"text","text":{"pi":"“Sādhu sādhu, anuruddhā.\nAtthi pana vo, anuruddhā, evaṁ appamattānaṁ ātāpīnaṁ pahitattānaṁ viharataṁ uttari manussadhammā alamariyañāṇadassanaviseso adhigato phāsuvihāro”ti?\n“Idha mayaṁ, bhante, appamattā ātāpino pahitattā viharantā obhāsañceva sañjānāma dassanañca rūpānaṁ.\nSo kho pana no obhāso nacirasseva antaradhāyati dassanañca rūpānaṁ;\ntañca nimittaṁ nappaṭivijjhāmā”ti.","en":"“Good, good, Anuruddha and friends!\nBut as you live diligently like this, have you achieved any superhuman distinction in knowledge and vision worthy of the noble ones, a comfortable meditation?”\n“Well, sir, while meditating diligent, keen, and resolute, we perceive both light and vision of forms.\nBut before long the light and the vision of forms vanish.\nWe haven’t worked out the basis of that.”"}},{"id":"mn128:16","sourceIds":["mn128:16.1","mn128:16.2","mn128:16.3","mn128:16.4","mn128:16.5","mn128:16.6","mn128:16.7","mn128:16.8","mn128:16.9"],"kind":"text","text":{"pi":"“Taṁ kho pana vo, anuruddhā, nimittaṁ paṭivijjhitabbaṁ.\nAhampi sudaṁ, anuruddhā, pubbeva sambodhā anabhisambuddho bodhisattova samāno obhāsañceva sañjānāmi dassanañca rūpānaṁ.\nSo kho pana me obhāso nacirasseva antaradhāyati dassanañca rūpānaṁ.\nTassa mayhaṁ, anuruddhā, etadahosi:\n‘ko nu kho hetu ko paccayo yena me obhāso antaradhāyati dassanañca rūpānan’ti?\nTassa mayhaṁ, anuruddhā, etadahosi:\n‘vicikicchā kho me udapādi, vicikicchādhikaraṇañca pana me samādhi cavi.\nSamādhimhi cute obhāso antaradhāyati dassanañca rūpānaṁ.\nSohaṁ tathā karissāmi yathā me puna na vicikicchā uppajjissatī’ti.","en":"“Well, you should work out the basis of that.\nBefore my awakening—when I was still unawakened but intent on awakening—I too perceived light and vision of forms.\nBut before long my light and vision of forms vanished.\nIt occurred to me:\n‘What’s the cause, what’s the reason why my light and vision of forms vanish?’\nIt occurred to me:\n‘Doubt arose in me, and because of that my immersion fell away.\nWhen immersion falls away, the light and vision of forms vanish.\nI’ll make sure that doubt will not arise in me again.’"}},{"id":"mn128:17","sourceIds":["mn128:17.1","mn128:17.2","mn128:17.3","mn128:17.4","mn128:17.5","mn128:17.6","mn128:17.7","mn128:17.8"],"kind":"text","text":{"pi":"So kho ahaṁ, anuruddhā, appamatto ātāpī pahitatto viharanto obhāsañceva sañjānāmi dassanañca rūpānaṁ.\nSo kho pana me obhāso nacirasseva antaradhāyati dassanañca rūpānaṁ.\nTassa mayhaṁ, anuruddhā, etadahosi:\n‘ko nu kho hetu ko paccayo yena me obhāso antaradhāyati dassanañca rūpānan’ti?\nTassa mayhaṁ, anuruddhā, etadahosi:\n‘amanasikāro kho me udapādi, amanasikārādhikaraṇañca pana me samādhi cavi.\nSamādhimhi cute obhāso antaradhāyati dassanañca rūpānaṁ.\nSohaṁ tathā karissāmi yathā me puna na vicikicchā uppajjissati, na amanasikāro’ti.","en":"While meditating diligent, keen, and resolute, I perceived light and vision of forms.\nBut before long my light and vision of forms vanished.\nIt occurred to me:\n‘What’s the cause, what’s the reason why my light and vision of forms vanish?’\nIt occurred to me:\n‘Loss of focus arose in me, and because of that my immersion fell away.\nWhen immersion falls away, the light and vision of forms vanish.\nI’ll make sure that neither doubt nor loss of focus will arise in me again.’"}},{"id":"mn128:18","sourceIds":["mn128:18.1","mn128:18.2","mn128:18.3","mn128:18.4","mn128:18.5"],"kind":"text","text":{"pi":"So kho ahaṁ, anuruddhā …pe…\ntassa mayhaṁ, anuruddhā, etadahosi:\n‘thinamiddhaṁ kho me udapādi, thinamiddhādhikaraṇañca pana me samādhi cavi.\nSamādhimhi cute obhāso antaradhāyati dassanañca rūpānaṁ.\nSohaṁ tathā karissāmi yathā me puna na vicikicchā uppajjissati, na amanasikāro, na thinamiddhan’ti.","en":"While meditating …\n‘Dullness and drowsiness arose in me …\nI’ll make sure that neither doubt nor loss of focus nor dullness and drowsiness will arise in me again.’"}},{"id":"mn128:19","sourceIds":["mn128:19.1","mn128:19.2","mn128:19.3","mn128:19.4","mn128:19.5","mn128:19.6","mn128:19.7","mn128:19.8"],"kind":"text","text":{"pi":"So kho ahaṁ, anuruddhā …pe…\ntassa mayhaṁ, anuruddhā, etadahosi:\n‘chambhitattaṁ kho me udapādi, chambhitattādhikaraṇañca pana me samādhi cavi.\nSamādhimhi cute obhāso antaradhāyati dassanañca rūpānaṁ.\nSeyyathāpi, anuruddhā, puriso addhānamaggappaṭipanno, tassa ubhatopasse vaṭṭakā uppateyyuṁ, tassa tatonidānaṁ chambhitattaṁ uppajjeyya;\nevameva kho me, anuruddhā, chambhitattaṁ udapādi, chambhitattādhikaraṇañca pana me samādhi cavi.\nSamādhimhi cute obhāso antaradhāyati dassanañca rūpānaṁ.\nSohaṁ tathā karissāmi yathā me puna na vicikicchā uppajjissati, na amanasikāro, na thinamiddhaṁ, na chambhitattan’ti.","en":"While meditating …\n‘Terror arose in me, and because of that my immersion fell away.\nWhen immersion falls away, the light and vision of forms vanish.\nSuppose a person was traveling along a road, and killers were to spring out at them from both sides. They’d feel terrified because of that.\nIn the same way, terror arose in me …\nI’ll make sure that neither doubt nor loss of focus nor dullness and drowsiness nor terror will arise in me again.’"}},{"id":"mn128:20","sourceIds":["mn128:20.1","mn128:20.2","mn128:20.3","mn128:20.4","mn128:20.5","mn128:20.6","mn128:20.7","mn128:20.8"],"kind":"text","text":{"pi":"So kho ahaṁ, anuruddhā …pe…\ntassa mayhaṁ, anuruddhā, etadahosi:\n‘uppilaṁ kho me udapādi, uppilādhikaraṇañca pana me samādhi cavi.\nSamādhimhi cute obhāso antaradhāyati dassanañca rūpānaṁ.\nSeyyathāpi, anuruddhā, puriso ekaṁ nidhimukhaṁ gavesanto sakideva pañcanidhimukhāni adhigaccheyya, tassa tatonidānaṁ uppilaṁ uppajjeyya;\nevameva kho me, anuruddhā, uppilaṁ udapādi, uppilādhikaraṇañca pana me samādhi cavi.\nSamādhimhi cute obhāso antaradhāyati dassanañca rūpānaṁ.\nSohaṁ tathā karissāmi yathā me puna na vicikicchā uppajjissati, na amanasikāro, na thinamiddhaṁ, na chambhitattaṁ, na uppilan’ti.","en":"While meditating …\n‘Elation arose in me, and because of that my immersion fell away.\nWhen immersion falls away, the light and vision of forms vanish.\nSuppose a person was looking for the entrance to a treasure trove. And all at once they’d come across five entrances! They’d feel excited because of that.\nIn the same way, elation arose in me …\nI’ll make sure that neither doubt nor loss of focus nor dullness and drowsiness nor terror nor elation will arise in me again.’"}},{"id":"mn128:21","sourceIds":["mn128:21.1","mn128:21.2","mn128:21.3","mn128:21.4","mn128:21.5"],"kind":"text","text":{"pi":"So kho ahaṁ, anuruddhā …pe…\ntassa mayhaṁ, anuruddhā, etadahosi:\n‘duṭṭhullaṁ kho me udapādi, duṭṭhullādhikaraṇañca pana me samādhi cavi.\nSamādhimhi cute obhāso antaradhāyati dassanañca rūpānaṁ.\nSohaṁ tathā karissāmi yathā me puna na vicikicchā uppajjissati, na amanasikāro, na thinamiddhaṁ, na chambhitattaṁ, na uppilaṁ, na duṭṭhullan’ti.","en":"While meditating …\n‘Discomfort arose in me …\nI’ll make sure that neither doubt nor loss of focus nor dullness and drowsiness nor terror nor elation nor discomfort will arise in me again.’"}},{"id":"mn128:22","sourceIds":["mn128:22.1","mn128:22.2","mn128:22.3","mn128:22.4","mn128:22.5","mn128:22.6","mn128:22.7","mn128:22.8"],"kind":"text","text":{"pi":"So kho ahaṁ, anuruddhā …pe…\ntassa mayhaṁ, anuruddhā, etadahosi:\n‘accāraddhavīriyaṁ kho me udapādi, accāraddhavīriyādhikaraṇañca pana me samādhi cavi.\nSamādhimhi cute obhāso antaradhāyati dassanañca rūpānaṁ.\nSeyyathāpi, anuruddhā, puriso ubhohi hatthehi vaṭṭakaṁ gāḷhaṁ gaṇheyya, so tattheva patameyya;\nevameva kho me, anuruddhā, accāraddhavīriyaṁ udapādi, accāraddhavīriyādhikaraṇañca pana me samādhi cavi.\nSamādhimhi cute obhāso antaradhāyati dassanañca rūpānaṁ.\nSohaṁ tathā karissāmi yathā me puna na vicikicchā uppajjissati, na amanasikāro, na thinamiddhaṁ, na chambhitattaṁ, na uppilaṁ, na duṭṭhullaṁ, na accāraddhavīriyan’ti.","en":"While meditating …\n‘Excessive energy arose in me, and because of that my immersion fell away.\nWhen immersion falls away, the light and vision of forms vanish.\nSuppose a person was to grip a quail too tightly in their hands—it would die right there.\nI’ll make sure that neither doubt nor loss of focus nor dullness and drowsiness nor terror nor elation nor discomfort nor excessive energy will arise in me again.’"}},{"id":"mn128:23","sourceIds":["mn128:23.1","mn128:23.2","mn128:23.3","mn128:23.4","mn128:23.5","mn128:23.6","mn128:23.7","mn128:23.8"],"kind":"text","text":{"pi":"So kho ahaṁ, anuruddhā …pe…\ntassa mayhaṁ, anuruddhā, etadahosi:\n‘atilīnavīriyaṁ kho me udapādi, atilīnavīriyādhikaraṇañca pana me samādhi cavi.\nSamādhimhi cute obhāso antaradhāyati dassanañca rūpānaṁ.\nSeyyathāpi, anuruddhā, puriso vaṭṭakaṁ sithilaṁ gaṇheyya, so tassa hatthato uppateyya;\nevameva kho me, anuruddhā, atilīnavīriyaṁ udapādi, atilīnavīriyādhikaraṇañca pana me samādhi cavi.\nSamādhimhi cute obhāso antaradhāyati dassanañca rūpānaṁ.\nSohaṁ tathā karissāmi yathā me puna na vicikicchā uppajjissati, na amanasikāro, na thinamiddhaṁ, na chambhitattaṁ, na uppilaṁ, na duṭṭhullaṁ, na accāraddhavīriyaṁ, na atilīnavīriyan’ti.","en":"While meditating …\n‘Overly lax energy arose in me, and because of that my immersion fell away.\nWhen immersion falls away, the light and vision of forms vanish.\nSuppose a person was to grip a quail too loosely—it would fly out of their hands.\nI’ll make sure that neither doubt nor loss of focus nor dullness and drowsiness nor terror nor elation nor discomfort nor excessive energy nor overly lax energy will arise in me again.’"}},{"id":"mn128:24","sourceIds":["mn128:24.1","mn128:24.2","mn128:24.3","mn128:24.4","mn128:24.5"],"kind":"text","text":{"pi":"So kho ahaṁ, anuruddhā …pe…\ntassa mayhaṁ, anuruddhā, etadahosi:\n‘abhijappā kho me udapādi, abhijappādhikaraṇañca pana me samādhi cavi.\nSamādhimhi cute obhāso antaradhāyati dassanañca rūpānaṁ.\nSohaṁ tathā karissāmi yathā me puna na vicikicchā uppajjissati, na amanasikāro, na thinamiddhaṁ, na chambhitattaṁ, na uppilaṁ, na duṭṭhullaṁ, na accāraddhavīriyaṁ, na atilīnavīriyaṁ, na abhijappā’ti.","en":"While meditating …\n‘Longing arose in me …\nI’ll make sure that neither doubt nor loss of focus nor dullness and drowsiness nor terror nor elation nor discomfort nor excessive energy nor overly lax energy nor longing will arise in me again.’"}},{"id":"mn128:25","sourceIds":["mn128:25.1","mn128:25.2","mn128:25.3","mn128:25.4","mn128:25.5"],"kind":"text","text":{"pi":"So kho ahaṁ, anuruddhā …pe…\ntassa mayhaṁ, anuruddhā, etadahosi:\n‘nānattasaññā kho me udapādi, nānattasaññādhikaraṇañca pana me samādhi cavi.\nSamādhimhi cute obhāso antaradhāyati dassanañca rūpānaṁ.\nSohaṁ tathā karissāmi yathā me puna na vicikicchā uppajjissati, na amanasikāro, na thinamiddhaṁ, na chambhitattaṁ, na uppilaṁ, na duṭṭhullaṁ, na accāraddhavīriyaṁ, na atilīnavīriyaṁ, na abhijappā, na nānattasaññā’ti.","en":"While meditating …\n‘Perceptions of diversity arose in me …\nI’ll make sure that neither doubt nor loss of focus nor dullness and drowsiness nor terror nor elation nor discomfort nor excessive energy nor overly lax energy nor longing nor perception of diversity will arise in me again.’"}},{"id":"mn128:26","sourceIds":["mn128:26.1","mn128:26.2","mn128:26.3","mn128:26.4","mn128:26.5","mn128:26.6","mn128:26.7","mn128:26.8"],"kind":"text","text":{"pi":"So kho ahaṁ, anuruddhā, appamatto ātāpī pahitatto viharanto obhāsañceva sañjānāmi dassanañca rūpānaṁ.\nSo kho pana me obhāso nacirasseva antaradhāyati dassanañca rūpānaṁ.\nTassa mayhaṁ anuruddhā etadahosi:\n‘ko nu kho hetu ko paccayo yena me obhāso antaradhāyati dassanañca rūpānan’ti.\nTassa mayhaṁ, anuruddhā, etadahosi:\n‘atinijjhāyitattaṁ kho me rūpānaṁ udapādi, atinijjhāyitattādhikaraṇañca pana me rūpānaṁ samādhi cavi.\nSamādhimhi cute obhāso antaradhāyati dassanañca rūpānaṁ.\nSohaṁ tathā karissāmi yathā me puna na vicikicchā uppajjissati, na amanasikāro, na thinamiddhaṁ, na chambhitattaṁ, na uppilaṁ, na duṭṭhullaṁ, na accāraddhavīriyaṁ, na atilīnavīriyaṁ, na abhijappā, na nānattasaññā, na atinijjhāyitattaṁ rūpānan’ti.","en":"While meditating diligent, keen, and resolute, I perceived light and vision of forms.\nBut before long my light and vision of forms vanished.\nIt occurred to me:\n‘What’s the cause, what’s the reason why my light and vision of forms vanish?’\nIt occurred to me:\n‘Excessive concentration on forms arose in me, and because of that my immersion fell away.\nWhen immersion falls away, the light and vision of forms vanish.\nI’ll make sure that neither doubt nor loss of focus nor dullness and drowsiness nor terror nor elation nor discomfort nor excessive energy nor overly lax energy nor longing nor perception of diversity nor excessive concentration on forms will arise in me again.’"}},{"id":"mn128:27","sourceIds":["mn128:27.1","mn128:27.2","mn128:27.3","mn128:27.4","mn128:27.5","mn128:27.6","mn128:27.7","mn128:27.8","mn128:27.9","mn128:27.10","mn128:27.11"],"kind":"text","text":{"pi":"So kho ahaṁ, anuruddhā, ‘vicikicchā cittassa upakkileso’ti—iti viditvā vicikicchaṁ cittassa upakkilesaṁ pajahiṁ,\n‘amanasikāro cittassa upakkileso’ti—iti viditvā amanasikāraṁ cittassa upakkilesaṁ pajahiṁ,\n‘thinamiddhaṁ cittassa upakkileso’ti—iti viditvā thinamiddhaṁ cittassa upakkilesaṁ pajahiṁ,\n‘chambhitattaṁ cittassa upakkileso’ti—iti viditvā chambhitattaṁ cittassa upakkilesaṁ pajahiṁ,\n‘uppilaṁ cittassa upakkileso’ti—iti viditvā uppilaṁ cittassa upakkilesaṁ pajahiṁ,\n‘duṭṭhullaṁ cittassa upakkileso’ti—iti viditvā duṭṭhullaṁ cittassa upakkilesaṁ pajahiṁ,\n‘accāraddhavīriyaṁ cittassa upakkileso’ti—iti viditvā accāraddhavīriyaṁ cittassa upakkilesaṁ pajahiṁ,\n‘atilīnavīriyaṁ cittassa upakkileso’ti—iti viditvā atilīnavīriyaṁ cittassa upakkilesaṁ pajahiṁ,\n‘abhijappā cittassa upakkileso’ti—iti viditvā abhijappaṁ cittassa upakkilesaṁ pajahiṁ,\n‘nānattasaññā cittassa upakkileso’ti—iti viditvā nānattasaññaṁ cittassa upakkilesaṁ pajahiṁ,\n‘atinijjhāyitattaṁ rūpānaṁ cittassa upakkileso’ti—iti viditvā atinijjhāyitattaṁ rūpānaṁ cittassa upakkilesaṁ pajahiṁ.","en":"When I understood that doubt is a corruption of the mind, I gave it up.\nWhen I understood that loss of focus,\ndullness and drowsiness,\nterror,\nelation,\ndiscomfort,\nexcessive energy,\noverly lax energy,\nlonging,\nperception of diversity,\nand excessive concentration on forms are corruptions of the mind, I gave them up."}},{"id":"mn128:28","sourceIds":["mn128:28.1","mn128:28.2","mn128:28.3","mn128:28.4","mn128:28.5","mn128:28.6","mn128:28.7","mn128:28.8","mn128:28.9","mn128:28.10","mn128:28.11"],"kind":"text","text":{"pi":"So kho ahaṁ, anuruddhā, appamatto ātāpī pahitatto viharanto obhāsañhi kho sañjānāmi, na ca rūpāni passāmi;\nrūpāni hi kho passāmi, na ca obhāsaṁ sañjānāmi:\n‘kevalampi rattiṁ, kevalampi divaṁ, kevalampi rattindivaṁ’.\nTassa mayhaṁ, anuruddhā, etadahosi:\n‘ko nu kho hetu ko paccayo yvāhaṁ obhāsañhi kho sañjānāmi na ca rūpāni passāmi;\nrūpāni hi kho passāmi na ca obhāsaṁ sañjānāmi—\nkevalampi rattiṁ, kevalampi divaṁ, kevalampi rattindivan’ti.\nTassa mayhaṁ, anuruddhā, etadahosi:\n‘yasmiñhi kho ahaṁ samaye rūpanimittaṁ amanasikaritvā obhāsanimittaṁ manasi karomi, obhāsañhi kho tasmiṁ samaye sañjānāmi, na ca rūpāni passāmi.\nYasmiṁ panāhaṁ samaye obhāsanimittaṁ amanasikaritvā rūpanimittaṁ manasi karomi, rūpāni hi kho tasmiṁ samaye passāmi na ca obhāsaṁ sañjānāmi—\nkevalampi rattiṁ, kevalampi divaṁ, kevalampi rattindivan’ti.","en":"While meditating diligent, keen, and resolute, I perceived light but did not see forms,\nor I saw forms, but did not see light.\nAnd this went on for a whole night, a whole day, even a whole night and day.\nI thought:\n‘What is the cause, what is the reason for this?’\nIt occurred to me:\n‘When I don’t focus on the basis of the forms, but focus on the basis of the light, then I perceive light and do not see forms.\nBut when I don’t focus on the basis of the light, but focus on the basis of the forms, then I see forms and do not perceive light.\nAnd this goes on for a whole night, a whole day, even a whole night and day.’"}},{"id":"mn128:29","sourceIds":["mn128:29.1","mn128:29.2","mn128:29.3","mn128:29.4","mn128:29.5","mn128:29.6","mn128:29.7","mn128:29.8","mn128:29.9","mn128:29.10","mn128:29.11","mn128:29.12","mn128:29.13"],"kind":"text","text":{"pi":"So kho ahaṁ, anuruddhā, appamatto ātāpī pahitatto viharanto parittañceva obhāsaṁ sañjānāmi, parittāni ca rūpāni passāmi;\nappamāṇañceva obhāsaṁ sañjānāmi, appamāṇāni ca rūpāni passāmi:\n‘kevalampi rattiṁ, kevalampi divaṁ, kevalampi rattindivaṁ’.\nTassa mayhaṁ, anuruddhā, etadahosi:\n‘ko nu kho hetu ko paccayo yvāhaṁ parittañceva obhāsaṁ sañjānāmi, parittāni ca rūpāni passāmi;\nappamāṇañceva obhāsaṁ sañjānāmi, appamāṇāni ca rūpāni passāmi—\nkevalampi rattiṁ, kevalampi divaṁ, kevalampi rattindivan’ti.\nTassa mayhaṁ, anuruddhā, etadahosi:\n‘yasmiṁ kho me samaye paritto samādhi hoti, parittaṁ me tasmiṁ samaye cakkhu hoti.\nSohaṁ parittena cakkhunā parittañceva obhāsaṁ sañjānāmi, parittāni ca rūpāni passāmi.\nYasmiṁ pana me samaye appamāṇo samādhi hoti, appamāṇaṁ me tasmiṁ samaye cakkhu hoti.\nSohaṁ appamāṇena cakkhunā appamāṇañceva obhāsaṁ sañjānāmi, appamāṇāni ca rūpāni passāmi—\nkevalampi rattiṁ, kevalampi divaṁ, kevalampi rattindivan’ti.","en":"While meditating diligent, keen, and resolute, I perceived limited light and saw limited forms,\nor I perceived limitless light and saw limitless forms.\nAnd this went on for a whole night, a whole day, even a whole night and day.\nI thought:\n‘What is the cause, what is the reason for this?’\nIt occurred to me:\n‘When my immersion is limited, then my vision is limited,\nand with limited vision I perceive limited light and see limited forms.\nBut when my immersion is limitless, then my vision is limitless,\nand with limitless vision I perceive limitless light and see limitless forms.\nAnd this goes on for a whole night, a whole day, even a whole night and day.’"}},{"id":"mn128:30","sourceIds":["mn128:30.1","mn128:30.2","mn128:30.3","mn128:30.4","mn128:30.5","mn128:30.6","mn128:30.7","mn128:30.8","mn128:30.9","mn128:30.10","mn128:30.11"],"kind":"text","text":{"pi":"Yato kho me, anuruddhā, ‘vicikicchā cittassa upakkileso’ti—iti viditvā vicikicchā cittassa upakkileso pahīno ahosi,\n‘amanasikāro cittassa upakkileso’ti—iti viditvā amanasikāro cittassa upakkileso pahīno ahosi,\n‘thinamiddhaṁ cittassa upakkileso’ti—iti viditvā thinamiddhaṁ cittassa upakkileso pahīno ahosi,\n‘chambhitattaṁ cittassa upakkileso’ti—iti viditvā chambhitattaṁ cittassa upakkileso pahīno ahosi,\n‘uppilaṁ cittassa upakkileso’ti—iti viditvā uppilaṁ cittassa upakkileso pahīno ahosi,\n‘duṭṭhullaṁ cittassa upakkileso’ti—iti viditvā duṭṭhullaṁ cittassa upakkileso pahīno ahosi,\n‘accāraddhavīriyaṁ cittassa upakkileso’ti—iti viditvā accāraddhavīriyaṁ cittassa upakkileso pahīno ahosi,\n‘atilīnavīriyaṁ cittassa upakkileso’ti—iti viditvā atilīnavīriyaṁ cittassa upakkileso pahīno ahosi,\n‘abhijappā cittassa upakkileso’ti—iti viditvā abhijappā cittassa upakkileso pahīno ahosi,\n‘nānattasaññā cittassa upakkileso’ti—iti viditvā nānattasaññā cittassa upakkileso pahīno ahosi,\n‘atinijjhāyitattaṁ rūpānaṁ cittassa upakkileso’ti—iti viditvā atinijjhāyitattaṁ rūpānaṁ cittassa upakkileso pahīno ahosi.","en":"After understanding that doubt,\nloss of focus,\ndullness and drowsiness,\nterror,\nexcitement,\ndiscomfort,\nexcessive energy,\noverly lax energy,\nlonging,\nperception of diversity,\nand excessive concentration on forms are corruptions of the mind, I had given them up."}},{"id":"mn128:31","sourceIds":["mn128:31.1","mn128:31.2","mn128:31.3","mn128:31.4"],"kind":"text","text":{"pi":"Tassa mayhaṁ, anuruddhā, etadahosi:\n‘ye kho me cittassa upakkilesā te me pahīnā.\nHanda dānāhaṁ tividhena samādhiṁ bhāvemī’ti.\nSo kho ahaṁ, anuruddhā, savitakkampi savicāraṁ samādhiṁ bhāvesiṁ, avitakkampi vicāramattaṁ samādhiṁ bhāvesiṁ, avitakkampi avicāraṁ samādhiṁ bhāvesiṁ, sappītikampi samādhiṁ bhāvesiṁ, nippītikampi samādhiṁ bhāvesiṁ, sātasahagatampi samādhiṁ bhāvesiṁ, upekkhāsahagatampi samādhiṁ bhāvesiṁ.","en":"I thought:\n‘I’ve given up my mental corruptions.\nNow let me develop immersion in three ways.’\nI developed immersion while placing the mind and keeping it connected; without placing the mind, merely keeping it connected; without placing the mind or keeping it connected; with rapture; without rapture; with pleasure; with equanimity."}},{"id":"mn128:32","sourceIds":["mn128:32.1","mn128:32.2","mn128:32.3","mn128:32.4","mn128:32.5","mn128:32.6"],"kind":"text","text":{"pi":"Yato kho me, anuruddhā, savitakkopi savicāro samādhi bhāvito ahosi, avitakkopi vicāramatto samādhi bhāvito ahosi, avitakkopi avicāro samādhi bhāvito ahosi, sappītikopi samādhi bhāvito ahosi, nippītikopi samādhi bhāvito ahosi, sātasahagatopi samādhi bhāvito ahosi, upekkhāsahagatopi samādhi bhāvito ahosi.\nÑāṇañca pana me dassanaṁ udapādi,\nakuppā me cetovimutti. Ayamantimā jāti, natthi dāni punabbhavo”ti.\nIdamavoca bhagavā.\nAttamano āyasmā anuruddho bhagavato bhāsitaṁ abhinandīti.\nUpakkilesasuttaṁ niṭṭhitaṁ aṭṭhamaṁ.","en":"When I had developed immersion in these ways,\nthe knowledge and vision arose in me:\n‘My freedom is unshakable; this is my last rebirth; now there’ll be no more future lives.’”\nThat is what the Buddha said.\nSatisfied, Venerable Anuruddha approved what the Buddha said."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mn128/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}