{"id":"mn136","title":"The Longer Analysis of Deeds","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mn136","title":"The Longer Analysis of Deeds","units":[{"id":"mn136:0","sourceIds":["mn136:0.1","mn136:0.2"],"kind":"text","text":{"pi":"Majjhima Nikāya 136\nMahākammavibhaṅgasutta","en":"Middle Discourses 136\nThe Longer Analysis of Deeds"}},{"id":"mn136:1","sourceIds":["mn136:1.1","mn136:1.2"],"kind":"text","text":{"pi":"Evaṁ me sutaṁ—\nekaṁ samayaṁ bhagavā rājagahe viharati veḷuvane kalandakanivāpe.","en":"So I have heard.\nAt one time the Buddha was staying near Rājagaha in the Bamboo Grove, the squirrels’ feeding ground."}},{"id":"mn136:2","sourceIds":["mn136:2.1","mn136:2.2","mn136:2.3","mn136:2.4","mn136:2.5","mn136:2.6","mn136:2.7","mn136:2.8","mn136:2.9","mn136:2.10","mn136:2.11","mn136:2.12","mn136:2.13","mn136:2.14","mn136:2.15","mn136:2.16"],"kind":"text","text":{"pi":"Tena kho pana samayena āyasmā samiddhi araññakuṭikāyaṁ viharati.\nAtha kho potaliputto paribbājako jaṅghāvihāraṁ anucaṅkamamāno anuvicaramāno yenāyasmā samiddhi tenupasaṅkami; upasaṅkamitvā āyasmatā samiddhinā saddhiṁ sammodi.\nSammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho potaliputto paribbājako āyasmantaṁ samiddhiṁ etadavoca:\n“sammukhā metaṁ, āvuso samiddhi, samaṇassa gotamassa sutaṁ, sammukhā paṭiggahitaṁ:\n‘moghaṁ kāyakammaṁ moghaṁ vacīkammaṁ, manokammameva saccan’ti.\nAtthi ca sā samāpatti yaṁ samāpattiṁ samāpanno na kiñci vediyatī”ti?\n“Mā hevaṁ, āvuso potaliputta, avaca; mā hevaṁ, āvuso potaliputta, avaca; mā bhagavantaṁ abbhācikkhi. Na hi sādhu bhagavato abbhakkhānaṁ. Na hi bhagavā evaṁ vadeyya:\n‘moghaṁ kāyakammaṁ moghaṁ vacīkammaṁ, manokammameva saccan’ti.\n‘Atthi ca kho sā, āvuso, samāpatti yaṁ samāpattiṁ samāpanno na kiñci vediyatī’”ti.\n“Kīvaciraṁ pabbajitosi, āvuso samiddhī”ti?\n“Na ciraṁ, āvuso, tīṇi vassānī”ti.\n“Ettha dāni mayaṁ there bhikkhū kiṁ vakkhāma, yatra hi nāma evaṁnavo bhikkhu satthāraṁ parirakkhitabbaṁ maññissati.\nSañcetanikaṁ, āvuso samiddhi, kammaṁ katvā kāyena vācāya manasā kiṁ so vediyatī”ti?\n“Sañcetanikaṁ, āvuso potaliputta, kammaṁ katvā kāyena vācāya manasā dukkhaṁ so vediyatī”ti.\nAtha kho potaliputto paribbājako āyasmato samiddhissa bhāsitaṁ neva abhinandi nappaṭikkosi;\nanabhinanditvā appaṭikkositvā uṭṭhāyāsanā pakkāmi.","en":"Now at that time Venerable Samiddhi was staying in a wilderness hut.\nThen as the wanderer Potaliputta was going for a walk he came up to Venerable Samiddhi and exchanged greetings with him.\nWhen the greetings and polite conversation were over, he sat down to one side and said to him:\n“Reverend Samiddhi, I have heard and learned this in the presence of the ascetic Gotama:\n‘Deeds by way of body and speech are done in vain. Only mental deeds are real.’\nAnd: ‘There is such an attainment where the one who enters it does not feel anything at all.’”\n“Don’t say that, Reverend Potaliputta, don’t say that! Don’t misrepresent the Buddha, for misrepresentation of the Buddha is not good. And the Buddha would not say this:\n‘Deeds by way of body and speech are done in vain. Only mental deeds are real.’\nBut, reverend, there is such an attainment where the one who enters it does not feel anything at all.”\n“Reverend Samiddhi, how long has it been since you went forth?”\n“Not long, reverend: three years.”\n“Well now, what are we to say to the senior mendicants, when even such a junior mendicant imagines their Teacher needs defending?\nAfter doing an intentional deed by way of body, speech, or mind, reverend, what does one feel?”\n“After doing an intentional deed by way of body, speech, or mind, reverend, one feels suffering.”\nThen, neither approving nor rejecting Samiddhi’s statement, Potaliputta\nrose from his seat and left."}},{"id":"mn136:3","sourceIds":["mn136:3.1","mn136:3.2","mn136:3.3","mn136:3.4","mn136:3.5","mn136:3.6","mn136:3.7","mn136:3.8"],"kind":"text","text":{"pi":"Atha kho āyasmā samiddhi acirapakkante potaliputte paribbājake yenāyasmā ānando tenupasaṅkami; upasaṅkamitvā āyasmatā ānandena saddhiṁ sammodi.\nSammodanīyaṁ kathaṁ sāraṇīyaṁ vītisāretvā ekamantaṁ nisīdi.\nEkamantaṁ nisinno kho āyasmā samiddhi yāvatako ahosi potaliputtena paribbājakena saddhiṁ kathāsallāpo taṁ sabbaṁ āyasmato ānandassa ārocesi.\nEvaṁ vutte, āyasmā ānando āyasmantaṁ samiddhiṁ etadavoca:\n“atthi kho idaṁ, āvuso samiddhi, kathāpābhataṁ bhagavantaṁ dassanāya.\nĀyāmāvuso samiddhi, yena bhagavā tenupasaṅkamissāma; upasaṅkamitvā etamatthaṁ bhagavato ārocessāma.\nYathā no bhagavā byākarissati tathā naṁ dhāressāmā”ti.\n“Evamāvuso”ti kho āyasmā samiddhi āyasmato ānandassa paccassosi.","en":"Soon after he had left, Venerable Samiddhi went to Venerable Ānanda, and exchanged greetings with him.\nWhen the greetings and polite conversation were over, he sat down to one side,\nand informed Ānanda of all they had discussed.\nWhen he had spoken, Ānanda said to him,\n“Reverend Samiddhi, we should see the Buddha about this matter.\nCome, let’s go to the Buddha and inform him about this.\nAs he answers, so we’ll remember it.”\n“Yes, reverend,” Samiddhi replied."}},{"id":"mn136:4","sourceIds":["mn136:4.1","mn136:4.2"],"kind":"text","text":{"pi":"Atha kho āyasmā ca ānando āyasmā ca samiddhi yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu.\nEkamantaṁ nisinno kho āyasmā ānando yāvatako ahosi āyasmato samiddhissa potaliputtena paribbājakena saddhiṁ kathāsallāpo taṁ sabbaṁ bhagavato ārocesi.","en":"Then Ānanda and Samiddhi went up to the Buddha, bowed, sat down to one side,\nand told him what had happened."}},{"id":"mn136:5","sourceIds":["mn136:5.1","mn136:5.2","mn136:5.3"],"kind":"text","text":{"pi":"Evaṁ vutte, bhagavā āyasmantaṁ ānandaṁ etadavoca:\n“dassanampi kho ahaṁ, ānanda, potaliputtassa paribbājakassa nābhijānāmi, kuto panevarūpaṁ kathāsallāpaṁ?\nIminā ca, ānanda, samiddhinā moghapurisena potaliputtassa paribbājakassa vibhajjabyākaraṇīyo pañho ekaṁsena byākato”ti.","en":"When they had spoken, the Buddha said to Ānanda,\n“I don’t recall even seeing the wanderer Potaliputta, Ānanda, so how could we have had such a discussion?\nThe wanderer Potaliputta’s question should have been answered after analyzing it, but this futile man answered categorically.”"}},{"id":"mn136:6","sourceIds":["mn136:6.1","mn136:6.2","mn136:6.3","mn136:6.4","mn136:6.5","mn136:6.6","mn136:6.7","mn136:6.8","mn136:6.9","mn136:6.10","mn136:6.11","mn136:6.12","mn136:6.13","mn136:6.14","mn136:6.15"],"kind":"text","text":{"pi":"Evaṁ vutte, āyasmā udāyī bhagavantaṁ etadavoca:\n“sace pana, bhante, āyasmatā samiddhinā idaṁ sandhāya bhāsitaṁ—\nyaṁ kiñci vedayitaṁ taṁ dukkhasmin”ti.\nAtha kho bhagavā āyasmantaṁ ānandaṁ āmantesi:\n“passasi no tvaṁ, ānanda, imassa udāyissa moghapurisassa ummaṅgaṁ?\nAññāsiṁ kho ahaṁ, ānanda:\n‘idānevāyaṁ udāyī moghapuriso ummujjamāno ayoniso ummujjissatī’ti.\nĀdiṁyeva, ānanda, potaliputtena paribbājakena tisso vedanā pucchitā.\nSacāyaṁ, ānanda, samiddhi moghapuriso potaliputtassa paribbājakassa evaṁ puṭṭho evaṁ byākareyya:\n‘sañcetanikaṁ, āvuso potaliputta, kammaṁ katvā kāyena vācāya manasā sukhavedanīyaṁ sukhaṁ so vedayati;\nsañcetanikaṁ, āvuso potaliputta, kammaṁ katvā kāyena vācāya manasā dukkhavedanīyaṁ dukkhaṁ so vedayati;\nsañcetanikaṁ, āvuso potaliputta, kammaṁ katvā kāyena vācāya manasā adukkhamasukhavedanīyaṁ adukkhamasukhaṁ so vedayatī’ti.\nEvaṁ byākaramāno kho, ānanda, samiddhi moghapuriso potaliputtassa paribbājakassa sammā byākaramāno byākareyya.\nApi ca, ānanda, ke ca aññatitthiyā paribbājakā bālā abyattā ke ca tathāgatassa mahākammavibhaṅgaṁ jānissanti?\nSace tumhe, ānanda, suṇeyyātha tathāgatassa mahākammavibhaṅgaṁ vibhajantassā”ti.","en":"When he said this, Venerable Udāyī said to him,\n“But perhaps, sir, Venerable Samiddhi spoke in reference to the statement:\n‘Suffering includes whatever is felt.’”\nBut the Buddha said to Venerable Ānanda,\n“See what this futile man Udāyī comes up with?\nI knew that\nhe was coming up with something irrational.\nRight from the start Potaliputta asked about the three feelings.\nSuppose the futile man Samiddhi had answered the wanderer Potaliputta’s question like this:\n‘After doing an intentional deed to be experienced as pleasant by way of body, speech, or mind, one feels pleasure.\nAfter doing an intentional deed to be experienced as painful by way of body, speech, or mind, one feels pain.\nAfter doing an intentional deed to be experienced as neutral by way of body, speech, or mind, one feels neutral.’\nAnswering in this way, Samiddhi would have rightly answered Potaliputta.\nStill, who are those foolish and incompetent wanderers of other religions to understand the Realized One’s great analysis of deeds?\nIf you would all listen, Ānanda, I will explain the Realized One’s great analysis of deeds.”"}},{"id":"mn136:7","sourceIds":["mn136:7.1","mn136:7.2","mn136:7.3","mn136:7.4","mn136:7.5"],"kind":"text","text":{"pi":"“Etassa, bhagavā, kālo, etassa, sugata, kālo\nyaṁ bhagavā mahākammavibhaṅgaṁ vibhajeyya. Bhagavato sutvā bhikkhū dhāressantī”ti.\n“Tena hānanda, suṇāhi, sādhukaṁ manasi karohi; bhāsissāmī”ti.\n“Evaṁ, bhante”ti kho āyasmā ānando bhagavato paccassosi.\nBhagavā etadavoca:","en":"“Now is the time, Blessed One! Now is the time, Holy One!\nLet the Buddha explain the great analysis of deeds. The mendicants will listen and remember it.”\n“Well then, Ānanda, listen and apply your mind well, I will speak.”\n“Yes, sir,” Ānanda replied.\nThe Buddha said this:"}},{"id":"mn136:8","sourceIds":["mn136:8.1","mn136:8.2","mn136:8.3","mn136:8.4","mn136:8.5","mn136:8.6","mn136:8.7","mn136:8.8","mn136:8.9","mn136:8.10"],"kind":"text","text":{"pi":"“Cattārome, ānanda, puggalā santo saṁvijjamānā lokasmiṁ.\nKatame cattāro?\nIdhānanda, ekacco puggalo idha pāṇātipātī hoti, adinnādāyī hoti, kāmesumicchācārī hoti, musāvādī hoti, pisuṇavāco hoti, pharusavāco hoti, samphappalāpī hoti, abhijjhālu hoti, byāpannacitto hoti, micchādiṭṭhi hoti.\nSo kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.\nIdha panānanda, ekacco puggalo idha pāṇātipātī hoti, adinnādāyī hoti, kāmesumicchācārī hoti, musāvādī hoti, pisuṇavāco hoti, pharusavāco hoti, samphappalāpī hoti, abhijjhālu hoti, byāpannacitto hoti, micchādiṭṭhi hoti.\nSo kāyassa bhedā paraṁ maraṇā sugatiṁ saggaṁ lokaṁ upapajjati.\nIdhānanda, ekacco puggalo idha pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti, pisuṇāya vācāya paṭivirato hoti, pharusāya vācāya paṭivirato hoti, samphappalāpā paṭivirato hoti, anabhijjhālu hoti, abyāpannacitto hoti, sammādiṭṭhi hoti.\nSo kāyassa bhedā paraṁ maraṇā sugatiṁ saggaṁ lokaṁ upapajjati.\nIdha panānanda, ekacco puggalo idha pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti, pisuṇāya vācāya paṭivirato hoti, pharusāya vācāya paṭivirato hoti, samphappalāpā paṭivirato hoti, anabhijjhālu hoti, abyāpannacitto hoti, sammādiṭṭhi hoti.\nSo kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.","en":"“Ānanda, these four individuals are found in the world.\nWhat four?\nIt’s when an individual here kills living creatures, steals, and commits sexual misconduct. They use speech that’s false, backbiting, harsh, or nonsensical. And they’re covetous, malicious, and have wrong view.\nWhen their body breaks up, after death, they’re reborn in a place of loss, a bad place, the underworld, hell.\nBut some other individual here kills living creatures, steals, and commits sexual misconduct. They use speech that’s false, backbiting, harsh, or nonsensical. And they’re covetous, malicious, and have wrong view.\nWhen their body breaks up, after death, they’re reborn in a good place, a heavenly realm.\nBut some other individual here refrains from killing living creatures, stealing, sexual misconduct, or using speech that’s false, divisive, harsh, or nonsensical. And they’re contented, kind-hearted, with right view.\nWhen their body breaks up, after death, they’re reborn in a good place, a heavenly realm.\nBut some other individual here refrains from killing living creatures, stealing, sexual misconduct, or using speech that’s false, divisive, harsh, or nonsensical. And they’re contented, kind-hearted, with right view.\nWhen their body breaks up, after death, they’re reborn in a place of loss, a bad place, the underworld, hell."}},{"id":"mn136:9","sourceIds":["mn136:9.1","mn136:9.2","mn136:9.3","mn136:9.4","mn136:9.5","mn136:9.6","mn136:9.7","mn136:9.8","mn136:9.9"],"kind":"text","text":{"pi":"Idhānanda, ekacco samaṇo vā brāhmaṇo vā ātappamanvāya padhānamanvāya anuyogamanvāya appamādamanvāya sammāmanasikāramanvāya tathārūpaṁ cetosamādhiṁ phusati yathāsamāhite citte dibbena cakkhunā visuddhena atikkantamānusakena amuṁ puggalaṁ passati—\nidha pāṇātipātiṁ adinnādāyiṁ kāmesumicchācāriṁ musāvādiṁ pisuṇavācaṁ pharusavācaṁ samphappalāpiṁ abhijjhāluṁ byāpannacittaṁ micchādiṭṭhiṁ kāyassa bhedā paraṁ maraṇā passati apāyaṁ duggatiṁ vinipātaṁ nirayaṁ upapannaṁ.\nSo evamāha:\n‘atthi kira, bho, pāpakāni kammāni, atthi duccaritassa vipāko.\nAmāhaṁ puggalaṁ addasaṁ idha pāṇātipātiṁ adinnādāyiṁ …pe… micchādiṭṭhiṁ kāyassa bhedā paraṁ maraṇā passāmi apāyaṁ duggatiṁ vinipātaṁ nirayaṁ upapannan’ti.\nSo evamāha:\n‘yo kira, bho, pāṇātipātī adinnādāyī …pe… micchādiṭṭhi, sabbo so kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.\nYe evaṁ jānanti, te sammā jānanti; ye aññathā jānanti, micchā tesaṁ ñāṇan’ti.\nIti so yadeva tassa sāmaṁ ñātaṁ sāmaṁ diṭṭhaṁ sāmaṁ viditaṁ tadeva tattha thāmasā parāmāsā abhinivissa voharati: ‘idameva saccaṁ, moghamaññan’ti.","en":"Now, some ascetic or brahmin—by dint of keen, resolute, committed, and diligent effort, and right application of mind—experiences an immersion of the heart of such a kind that it gives rise to clairvoyance that is purified and superhuman. With that clairvoyance they see that individual\nhere who killed living creatures, stole, and committed sexual misconduct; who used speech that’s false, backbiting, harsh, or nonsensical; and who was covetous, malicious, and had wrong view. And they see that, when their body breaks up, after death, they are reborn in a place of loss, a bad place, the underworld, hell.\nThey say:\n‘It seems, worthy sir, that there is such a thing as bad deeds, and the result of bad conduct.\nFor I have seen a individual here who killed living creatures … and had wrong view. And when their body broke up, after death, they were reborn in a place of loss, a bad place, the underworld, hell.’\nThey say:\n‘It seems that everyone who kills living creatures … and has wrong view is reborn in hell.\nThose whose notion is this have the right notion. Those whose notion is otherwise have a wrong notion.’\nAnd so they obstinately stick to what they have known, seen, and understood for themselves, insisting that: ‘This is the only truth, anything else is futile.’"}},{"id":"mn136:10","sourceIds":["mn136:10.1","mn136:10.2","mn136:10.3","mn136:10.4","mn136:10.5","mn136:10.6","mn136:10.7","mn136:10.8","mn136:10.9"],"kind":"text","text":{"pi":"Idha panānanda, ekacco samaṇo vā brāhmaṇo vā ātappamanvāya padhānamanvāya anuyogamanvāya appamādamanvāya sammāmanasikāramanvāya tathārūpaṁ cetosamādhiṁ phusati yathāsamāhite citte dibbena cakkhunā visuddhena atikkantamānusakena amuṁ puggalaṁ passati—\nidha pāṇātipātiṁ adinnādāyiṁ …pe… micchādiṭṭhiṁ, kāyassa bhedā paraṁ maraṇā passati sugatiṁ saggaṁ lokaṁ upapannaṁ.\nSo evamāha:\n‘natthi kira, bho, pāpakāni kammāni, natthi duccaritassa vipāko.\nAmāhaṁ puggalaṁ addasaṁ—idha pāṇātipātiṁ adinnādāyiṁ …pe… micchādiṭṭhiṁ, kāyassa bhedā paraṁ maraṇā passāmi sugatiṁ saggaṁ lokaṁ upapannan’ti.\nSo evamāha:\n‘yo kira, bho, pāṇātipātī adinnādāyī …pe… micchādiṭṭhi, sabbo so kāyassa bhedā paraṁ maraṇā sugatiṁ saggaṁ lokaṁ upapajjati.\nYe evaṁ jānanti te sammā jānanti; ye aññathā jānanti, micchā tesaṁ ñāṇan’ti.\nIti so yadeva tassa sāmaṁ ñātaṁ sāmaṁ diṭṭhaṁ sāmaṁ viditaṁ tadeva tattha thāmasā parāmāsā abhinivissa voharati: ‘idameva saccaṁ, moghamaññan’ti.","en":"But some other ascetic or brahmin—by dint of keen, resolute, committed, and diligent effort, and right application of mind—experiences an immersion of the heart of such a kind that it gives rise to clairvoyance that is purified and superhuman. With that clairvoyance they see that individual\nhere who killed living creatures … and had wrong view. And they see that they are reborn in a heavenly realm.\nThey say:\n‘It seems that there is no such thing as bad deeds, and the result of bad conduct.\nFor I have seen an individual here who killed living creatures … and had wrong view. And I saw that they were reborn in a heavenly realm.’\nThey say:\n‘It seems that everyone who kills living creatures … and has wrong view is reborn in a heavenly realm.\nThose whose notion is this have the right notion. Those whose notion is otherwise have a wrong notion.’\nAnd so they obstinately stick to what they have known, seen, and understood for themselves, insisting that: ‘This is the only truth, anything else is futile.’"}},{"id":"mn136:11","sourceIds":["mn136:11.1","mn136:11.2","mn136:11.3","mn136:11.4","mn136:11.5","mn136:11.6","mn136:11.7","mn136:11.8","mn136:11.9"],"kind":"text","text":{"pi":"Idhānanda, ekacco samaṇo vā brāhmaṇo vā ātappamanvāya padhānamanvāya anuyogamanvāya appamādamanvāya sammāmanasikāramanvāya tathārūpaṁ cetosamādhiṁ phusati yathāsamāhite citte dibbena cakkhunā visuddhena atikkantamānusakena amuṁ puggalaṁ passati—\nidha pāṇātipātā paṭivirataṁ adinnādānā paṭivirataṁ kāmesumicchācārā paṭivirataṁ musāvādā paṭivirataṁ pisuṇāya vācāya paṭivirataṁ pharusāya vācāya paṭivirataṁ samphappalāpā paṭivirataṁ anabhijjhāluṁ abyāpannacittaṁ sammādiṭṭhiṁ, kāyassa bhedā paraṁ maraṇā passati sugatiṁ saggaṁ lokaṁ upapannaṁ.\nSo evamāha:\n‘atthi kira, bho, kalyāṇāni kammāni, atthi sucaritassa vipāko.\nAmāhaṁ puggalaṁ addasaṁ—idha pāṇātipātā paṭivirataṁ adinnādānā paṭivirataṁ …pe… sammādiṭṭhiṁ, kāyassa bhedā paraṁ maraṇā passāmi sugatiṁ saggaṁ lokaṁ upapannan’ti.\nSo evamāha:\n‘yo kira, bho, pāṇātipātā paṭivirato adinnādānā paṭivirato …pe… sammādiṭṭhi sabbo so kāyassa bhedā paraṁ maraṇā sugatiṁ saggaṁ lokaṁ upapajjati.\nYe evaṁ jānanti te sammā jānanti; ye aññathā jānanti, micchā tesaṁ ñāṇan’ti.\nIti so yadeva tassa sāmaṁ ñātaṁ sāmaṁ diṭṭhaṁ sāmaṁ viditaṁ tadeva tattha thāmasā parāmāsā abhinivissa voharati: ‘idameva saccaṁ, moghamaññan’ti.","en":"Take some ascetic or brahmin who with clairvoyance sees an individual\nhere who refrained from killing living creatures … and had right view. And they see that they are reborn in a heavenly realm.\nThey say:\n‘It seems that there is such a thing as good deeds, and the result of good conduct.\nFor I have seen an individual here who refrained from killing living creatures … and had right view. And I saw that they were reborn in a heavenly realm.’\nThey say:\n‘It seems that everyone who refrains from killing living creatures … and has right view is reborn in a heavenly realm.\nThose whose notion is this have the right notion. Those whose notion is otherwise have a wrong notion.’\nAnd so they obstinately stick to what they have known, seen, and understood for themselves, insisting that: ‘This is the only truth, anything else is futile.’"}},{"id":"mn136:12","sourceIds":["mn136:12.1","mn136:12.2","mn136:12.3","mn136:12.4","mn136:12.5","mn136:12.6","mn136:12.7"],"kind":"text","text":{"pi":"Idha panānanda, ekacco samaṇo vā brāhmaṇo vā ātappamanvāya padhānamanvāya anuyogamanvāya appamādamanvāya sammāmanasikāramanvāya tathārūpaṁ cetosamādhiṁ phusati yathāsamāhite citte dibbena cakkhunā visuddhena atikkantamānusakena amuṁ puggalaṁ passati—idha pāṇātipātā paṭivirataṁ …pe… sammādiṭṭhiṁ, kāyassa bhedā paraṁ maraṇā passati apāyaṁ duggatiṁ vinipātaṁ nirayaṁ upapannaṁ.\nSo evamāha:\n‘natthi kira, bho, kalyāṇāni kammāni, natthi sucaritassa vipāko. Amāhaṁ puggalaṁ addasaṁ—\nidha pāṇātipātā paṭivirataṁ adinnādānā paṭivirataṁ …pe… sammādiṭṭhiṁ, kāyassa bhedā paraṁ maraṇā passāmi apāyaṁ duggatiṁ vinipātaṁ nirayaṁ upapannan’ti.\nSo evamāha: ‘yo kira, bho, pāṇātipātā paṭivirato adinnādānā paṭivirato …pe… sammādiṭṭhi, sabbo so kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.\nYe evaṁ jānanti te sammā jānanti; ye aññathā jānanti, micchā tesaṁ ñāṇan’ti.\nIti so yadeva tassa sāmaṁ ñātaṁ sāmaṁ diṭṭhaṁ sāmaṁ viditaṁ tadeva tattha thāmasā parāmāsā abhinivissa voharati: ‘idameva saccaṁ, moghamaññan’ti.","en":"Take some ascetic or brahmin who with clairvoyance sees an individual here who refrained from killing living creatures … and had right view. And they see that they are reborn in hell.\nThey say:\n‘It seems that there is no such thing as good deeds, and the result of good conduct. For I have seen an individual\nhere who refrained from killing living creatures … and had right view. And I saw that they were reborn in hell.’\nThey say: ‘It seems that everyone who refrains from killing living creatures … and has right view is reborn in hell.\nThose whose notion is this have the right notion. Those whose notion is otherwise have a wrong notion.’\nAnd so they obstinately stick to what they have known, seen, and understood for themselves, insisting that: ‘This is the only truth, anything else is futile.’"}},{"id":"mn136:13","sourceIds":["mn136:13.1","mn136:13.2","mn136:13.3","mn136:13.4","mn136:13.5","mn136:13.6","mn136:13.7","mn136:13.8","mn136:13.9","mn136:13.10","mn136:13.11"],"kind":"text","text":{"pi":"Tatrānanda, yvāyaṁ samaṇo vā brāhmaṇo vā evamāha:\n‘atthi kira, bho, pāpakāni kammāni, atthi duccaritassa vipāko’ti idamassa anujānāmi;\nyampi so evamāha:\n‘amāhaṁ puggalaṁ addasaṁ—idha pāṇātipātiṁ adinnādāyiṁ …pe… micchādiṭṭhiṁ, kāyassa bhedā paraṁ maraṇā passāmi apāyaṁ duggatiṁ vinipātaṁ nirayaṁ upapannan’ti idampissa anujānāmi;\nyañca kho so evamāha:\n‘yo kira, bho, pāṇātipātī adinnādāyī …pe… micchādiṭṭhi, sabbo so kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjatī’ti idamassa nānujānāmi;\nyampi so evamāha:\n‘ye evaṁ jānanti te sammā jānanti; ye aññathā jānanti, micchā tesaṁ ñāṇan’ti idampissa nānujānāmi;\nyampi so yadeva tassa sāmaṁ ñātaṁ sāmaṁ diṭṭhaṁ sāmaṁ viditaṁ tadeva tattha thāmasā parāmāsā abhinivissa voharati: ‘idameva saccaṁ, moghamaññan’ti idampissa nānujānāmi.\nTaṁ kissa hetu?\nAññathā hi, ānanda, tathāgatassa mahākammavibhaṅge ñāṇaṁ hoti.","en":"In this case, when an ascetic or brahmin says this:\n‘It seems that there is such a thing as bad deeds, and the result of bad conduct,’ I grant them that.\nAnd when they say:\n‘I have seen an individual here who killed living creatures … and had wrong view. And after death, they were reborn in hell,’ I also grant them that.\nBut when they say:\n‘It seems that everyone who kills living creatures … and has wrong view is reborn in hell,’ I don’t grant them that.\nAnd when they say:\n‘Those whose notion is this have the right notion. Those whose notion is otherwise have a wrong notion.’ I also don’t grant them that.\nAnd when they obstinately stick to what they have known, seen, and understood for themselves, insisting that: ‘This is the only truth, anything else is futile,’ I also don’t grant them that.\nWhy is that?\nBecause the Realized One’s knowledge of the great analysis of deeds is otherwise."}},{"id":"mn136:14","sourceIds":["mn136:14.1","mn136:14.2","mn136:14.3","mn136:14.4","mn136:14.5","mn136:14.6","mn136:14.7","mn136:14.8","mn136:14.9","mn136:14.10","mn136:14.11"],"kind":"text","text":{"pi":"Tatrānanda, yvāyaṁ samaṇo vā brāhmaṇo vā evamāha:\n‘natthi kira, bho, pāpakāni kammāni, natthi duccaritassa vipāko’ti idamassa nānujānāmi;\nyañca kho so evamāha:\n‘amāhaṁ puggalaṁ addasaṁ—idha pāṇātipātiṁ adinnādāyiṁ …pe… micchādiṭṭhiṁ kāyassa bhedā paraṁ maraṇā passāmi sugatiṁ saggaṁ lokaṁ upapannan’ti idamassa anujānāmi;\nyañca kho so evamāha:\n‘yo kira, bho, pāṇātipātī adinnādāyī …pe… micchādiṭṭhi, sabbo so kāyassa bhedā paraṁ maraṇā sugatiṁ saggaṁ lokaṁ upapajjatī’ti idamassa nānujānāmi;\nyampi so evamāha:\n‘ye evaṁ jānanti te sammā jānanti; ye aññathā jānanti, micchā tesaṁ ñāṇan’ti idampissa nānujānāmi;\nyampi so yadeva tassa sāmaṁ ñātaṁ sāmaṁ diṭṭhaṁ sāmaṁ viditaṁ tadeva tattha thāmasā parāmāsā abhinivissa voharati: ‘idameva saccaṁ, moghamaññan’ti idampissa nānujānāmi.\nTaṁ kissa hetu?\nAññathā hi, ānanda, tathāgatassa mahākammavibhaṅge ñāṇaṁ hoti.","en":"In this case, when an ascetic or brahmin says this:\n‘It seems that there is no such thing as bad deeds, and the result of bad conduct,’ I don’t grant them that.\nBut when they say:\n‘I have seen an individual here who killed living creatures … and had wrong view. And I saw that they were reborn in a heavenly realm,’ I grant them that.\nBut when they say:\n‘It seems that everyone who kills living creatures … and has wrong view is reborn in a heavenly realm,’ I don’t grant them that. …\nBecause the Realized One’s knowledge of the great analysis of deeds is otherwise."}},{"id":"mn136:15","sourceIds":["mn136:15.1","mn136:15.2","mn136:15.3","mn136:15.4","mn136:15.5","mn136:15.6","mn136:15.7","mn136:15.8","mn136:15.9","mn136:15.10","mn136:15.11"],"kind":"text","text":{"pi":"Tatrānanda, yvāyaṁ samaṇo vā brāhmaṇo vā evamāha:\n‘atthi kira, bho, kalyāṇāni kammāni, atthi sucaritassa vipāko’ti idamassa anujānāmi;\nyampi so evamāha:\n‘amāhaṁ puggalaṁ addasaṁ—idha pāṇātipātā paṭivirataṁ adinnādānā paṭivirataṁ …pe… sammādiṭṭhiṁ, kāyassa bhedā paraṁ maraṇā passāmi sugatiṁ saggaṁ lokaṁ upapannan’ti idampissa anujānāmi;\nyañca kho so evamāha:\n‘yo kira, bho, pāṇātipātā paṭivirato adinnādānā paṭivirato …pe… sammādiṭṭhi, sabbo so kāyassa bhedā paraṁ maraṇā sugatiṁ saggaṁ lokaṁ upapajjatī’ti idamassa nānujānāmi;\nyampi so evamāha:\n‘ye evaṁ jānanti te sammā jānanti; ye aññathā jānanti, micchā tesaṁ ñāṇan’ti idampissa nānujānāmi;\nyampi so yadeva tassa sāmaṁ ñātaṁ sāmaṁ diṭṭhaṁ sāmaṁ viditaṁ tadeva tattha thāmasā parāmāsā abhinivissa voharati: ‘idameva saccaṁ, moghamaññan’ti idampissa nānujānāmi.\nTaṁ kissa hetu?\nAññathā hi, ānanda, tathāgatassa mahākammavibhaṅge ñāṇaṁ hoti.","en":"In this case, when an ascetic or brahmin says this:\n‘It seems that there is such a thing as good deeds, and the result of good conduct,’ I grant them that.\nAnd when they say:\n‘I have seen an individual here who refrained from killing living creatures … and had right view. And I saw that they were reborn in a heavenly realm,’ I also grant them that.\nBut when they say:\n‘It seems that everyone who refrains from killing living creatures … and has right view is reborn in a heavenly realm,’ I don’t grant them that. …\nBecause the Realized One’s knowledge of the great analysis of deeds is otherwise."}},{"id":"mn136:16","sourceIds":["mn136:16.1","mn136:16.2","mn136:16.3","mn136:16.4","mn136:16.5","mn136:16.6","mn136:16.7","mn136:16.8","mn136:16.9","mn136:16.10","mn136:16.11"],"kind":"text","text":{"pi":"Tatrānanda, yvāyaṁ samaṇo vā brāhmaṇo vā evamāha:\n‘natthi kira, bho, kalyāṇāni kammāni, natthi sucaritassa vipāko’ti idamassa nānujānāmi;\nyañca kho so evamāha:\n‘amāhaṁ puggalaṁ addasaṁ—idha pāṇātipātā paṭivirataṁ adinnādānā paṭivirataṁ …pe… sammādiṭṭhiṁ, kāyassa bhedā paraṁ maraṇā passāmi apāyaṁ duggatiṁ vinipātaṁ nirayaṁ upapannan’ti idamassa anujānāmi;\nyañca kho so evamāha:\n‘yo kira, bho, pāṇātipātā paṭivirato adinnādānā paṭivirato …pe… sammādiṭṭhi, sabbo so kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjatī’ti idamassa nānujānāmi;\nyañca kho so evamāha: ‘ye evaṁ jānanti te sammā jānanti;\nye aññathā jānanti, micchā tesaṁ ñāṇan’ti idampissa nānujānāmi;\nyampi so yadeva tassa sāmaṁ ñātaṁ sāmaṁ diṭṭhaṁ sāmaṁ viditaṁ tadeva tattha thāmasā parāmāsā abhinivissa voharati: ‘idameva saccaṁ, moghamaññan’ti idampissa nānujānāmi.\nTaṁ kissa hetu?\nAññathā hi, ānanda, tathāgatassa mahākammavibhaṅge ñāṇaṁ hoti.","en":"In this case, when an ascetic or brahmin says this:\n‘It seems that there is no such thing as good deeds, and the result of good conduct,’ I don’t grant them that.\nBut when they say:\n‘I have seen an individual here who refrained from killing living creatures … and had right view. And after death, they were reborn in hell,’ I grant them that.\nBut when they say:\n‘It seems that everyone who refrains from killing living creatures … and has right view is reborn in hell,’ I don’t grant them that.\nBut when they say: ‘Those whose notion is this have the right notion.\nThose whose notion is otherwise have a wrong notion,’ I also don’t grant them that.\nAnd when they obstinately stick to what they have known, seen, and understood for themselves, insisting that: ‘This is the only truth, anything else is futile,’ I also don’t grant them that.\nWhy is that?\nBecause the Realized One’s knowledge of the great analysis of deeds is otherwise."}},{"id":"mn136:17","sourceIds":["mn136:17.1","mn136:17.2","mn136:17.3","mn136:17.4"],"kind":"text","text":{"pi":"Tatrānanda, yvāyaṁ puggalo idha pāṇātipātī adinnādāyī …pe… micchādiṭṭhi, kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati,\npubbe vāssa taṁ kataṁ hoti pāpakammaṁ dukkhavedanīyaṁ, pacchā vāssa taṁ kataṁ hoti pāpakammaṁ dukkhavedanīyaṁ, maraṇakāle vāssa hoti micchādiṭṭhi samattā samādinnā.\nTena so kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.\nYañca kho so idha pāṇātipātī hoti adinnādāyī hoti …pe… micchādiṭṭhi hoti tassa diṭṭheva dhamme vipākaṁ paṭisaṁvedeti upapajja vā apare vā pariyāye.","en":"Now, Ānanda, take the case of the individual here who killed living creatures … and had wrong view, and who, when their body breaks up, after death, is reborn in a place of loss, a bad place, the underworld, hell.\nThat bad deed of theirs that is to be experienced as painful was either done previously, or later, or else at the time of death they undertook wrong view.\nAnd that’s why, when their body breaks up, after death, they’re reborn in a place of loss, a bad place, the underworld, hell.\nBut anyone here who kills living creatures … and has wrong view experiences the result of that in this very life, or in the next life, or in some subsequent period."}},{"id":"mn136:18","sourceIds":["mn136:18.1","mn136:18.2","mn136:18.3","mn136:18.4"],"kind":"text","text":{"pi":"Tatrānanda, yvāyaṁ puggalo idha pāṇātipātī adinnādāyī …pe… micchādiṭṭhi kāyassa bhedā paraṁ maraṇā sugatiṁ saggaṁ lokaṁ upapajjati,\npubbe vāssa taṁ kataṁ hoti kalyāṇakammaṁ sukhavedanīyaṁ, pacchā vāssa taṁ kataṁ hoti kalyāṇakammaṁ sukhavedanīyaṁ, maraṇakāle vāssa hoti sammādiṭṭhi samattā samādinnā.\nTena so kāyassa bhedā paraṁ maraṇā sugatiṁ saggaṁ lokaṁ upapajjati.\nYañca kho so idha pāṇātipātī hoti adinnādāyī hoti …pe… micchādiṭṭhi hoti tassa diṭṭheva dhamme vipākaṁ paṭisaṁvedeti upapajja vā apare vā pariyāye.","en":"Now, Ānanda, take the case of the individual here who killed living creatures … and had wrong view, and who is reborn in a heavenly realm.\nThat good deed of theirs that is to be experienced as pleasurable was either done previously, or later, or else at the time of death they undertook right view.\nAnd that’s why, when their body breaks up, after death, they’re reborn in a good place, a heavenly realm.\nBut anyone here who kills living creatures … and has wrong view experiences the result of that in this very life, or in the next life, or in some subsequent period."}},{"id":"mn136:19","sourceIds":["mn136:19.1","mn136:19.2","mn136:19.3","mn136:19.4"],"kind":"text","text":{"pi":"Tatrānanda, yvāyaṁ puggalo idha pāṇātipātā paṭivirato adinnādānā paṭivirato …pe… sammādiṭṭhi, kāyassa bhedā paraṁ maraṇā sugatiṁ saggaṁ lokaṁ upapajjati,\npubbe vāssa taṁ kataṁ hoti kalyāṇakammaṁ sukhavedanīyaṁ, pacchā vāssa taṁ kataṁ hoti kalyāṇakammaṁ sukhavedanīyaṁ, maraṇakāle vāssa hoti sammādiṭṭhi samattā samādinnā.\nTena so kāyassa bhedā paraṁ maraṇā sugatiṁ saggaṁ lokaṁ upapajjati.\nYañca kho so idha pāṇātipātā paṭivirato hoti adinnādānā paṭivirato hoti …pe… sammādiṭṭhi hoti, tassa diṭṭheva dhamme vipākaṁ paṭisaṁvedeti upapajja vā apare vā pariyāye.","en":"Now, Ānanda, take the case of the individual here who refrained from killing living creatures … and had right view, and who is reborn in a heavenly realm.\nThat good deed of theirs that is to be experienced as pleasurable was either done previously, or later, or else at the time of death they undertook right view.\nAnd that’s why, when their body breaks up, after death, they’re reborn in a good place, a heavenly realm.\nBut anyone here who refrains from killing living creatures … and has right view experiences the result of that in this very life, or in the next life, or in some subsequent period."}},{"id":"mn136:20","sourceIds":["mn136:20.1","mn136:20.2","mn136:20.3","mn136:20.4"],"kind":"text","text":{"pi":"Tatrānanda, yvāyaṁ puggalo idha pāṇātipātā paṭivirato adinnādānā paṭivirato …pe… sammādiṭṭhi, kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati,\npubbe vāssa taṁ kataṁ hoti pāpakammaṁ dukkhavedanīyaṁ, pacchā vāssa taṁ kataṁ hoti pāpakammaṁ dukkhavedanīyaṁ, maraṇakāle vāssa hoti micchādiṭṭhi samattā samādinnā.\nTena so kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.\nYañca kho so idha pāṇātipātā paṭivirato hoti, adinnādānā paṭivirato hoti …pe… sammādiṭṭhi hoti, tassa diṭṭheva dhamme vipākaṁ paṭisaṁvedeti upapajja vā apare vā pariyāye.","en":"Now, Ānanda, take the case of the individual here who refrained from killing living creatures … and had right view, and who is reborn in hell.\nThat bad deed of theirs that is to be experienced as painful was either done previously, or later, or else at the time of death they undertook wrong view.\nAnd that’s why, when their body breaks up, after death, they’re reborn in a place of loss, a bad place, the underworld, hell.\nBut anyone here who refrains from killing living creatures … and has right view experiences the result of that in this very life, or in the next life, or in some subsequent period."}},{"id":"mn136:21","sourceIds":["mn136:21.1","mn136:21.2","mn136:21.3","mn136:21.4"],"kind":"text","text":{"pi":"Iti kho, ānanda, atthi kammaṁ abhabbaṁ abhabbābhāsaṁ, atthi kammaṁ abhabbaṁ bhabbābhāsaṁ, atthi kammaṁ bhabbañceva bhabbābhāsañca, atthi kammaṁ bhabbaṁ abhabbābhāsan”ti.\nIdamavoca bhagavā.\nAttamano āyasmā ānando bhagavato bhāsitaṁ abhinandīti.\nMahākammavibhaṅgasuttaṁ niṭṭhitaṁ chaṭṭhaṁ.","en":"So, Ānanda, there are deeds that are ineffective and appear ineffective. There are deeds that are ineffective but appear effective. There are deeds that are effective and appear effective. And there are deeds that are effective but appear ineffective.”\nThat is what the Buddha said.\nSatisfied, Venerable Ānanda approved what the Buddha said."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mn136/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}