{"id":"mn14","title":"The Shorter Discourse on the Mass of Suffering","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mn14","title":"The Shorter Discourse on the Mass of Suffering","units":[{"id":"mn14:0","sourceIds":["mn14:0.1","mn14:0.2"],"kind":"text","text":{"pi":"Majjhima Nikāya 14\nCūḷadukkhakkhandhasutta","en":"Middle Discourses 14\nThe Shorter Discourse on the Mass of Suffering"}},{"id":"mn14:1","sourceIds":["mn14:1.1","mn14:1.2"],"kind":"text","text":{"pi":"Evaṁ me sutaṁ—\nekaṁ samayaṁ bhagavā sakkesu viharati kapilavatthusmiṁ nigrodhārāme.","en":"So I have heard.\nAt one time the Buddha was staying in the land of the Sakyans, near Kapilavatthu in the Banyan Tree Monastery."}},{"id":"mn14:2","sourceIds":["mn14:2.1","mn14:2.2","mn14:2.3","mn14:2.4","mn14:2.5","mn14:2.6","mn14:2.7","mn14:2.8"],"kind":"text","text":{"pi":"Atha kho mahānāmo sakko yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho mahānāmo sakko bhagavantaṁ etadavoca:\n“dīgharattāhaṁ, bhante, bhagavatā evaṁ dhammaṁ desitaṁ ājānāmi:\n‘lobho cittassa upakkileso, doso cittassa upakkileso, moho cittassa upakkileso’ti.\nEvañcāhaṁ, bhante, bhagavatā dhammaṁ desitaṁ ājānāmi:\n‘lobho cittassa upakkileso, doso cittassa upakkileso, moho cittassa upakkileso’ti.\nAtha ca pana me ekadā lobhadhammāpi cittaṁ pariyādāya tiṭṭhanti, dosadhammāpi cittaṁ pariyādāya tiṭṭhanti, mohadhammāpi cittaṁ pariyādāya tiṭṭhanti.\nTassa mayhaṁ, bhante, evaṁ hoti:\n‘kosu nāma me dhammo ajjhattaṁ appahīno yena me ekadā lobhadhammāpi cittaṁ pariyādāya tiṭṭhanti, dosadhammāpi cittaṁ pariyādāya tiṭṭhanti, mohadhammāpi cittaṁ pariyādāya tiṭṭhantī’”ti.","en":"Then Mahānāma the Sakyan went up to the Buddha, bowed, sat down to one side, and said to him,\n“For a long time, sir, I have understood your teaching like this:\n‘Greed, hate, and delusion are corruptions of the mind.’\nDespite understanding this, sometimes my mind is occupied by thoughts of greed, hate, and delusion.\nI wonder what qualities remain in me that I have such thoughts?”"}},{"id":"mn14:3","sourceIds":["mn14:3.1","mn14:3.2","mn14:3.3"],"kind":"text","text":{"pi":"“So eva kho te, mahānāma, dhammo ajjhattaṁ appahīno yena te ekadā lobhadhammāpi cittaṁ pariyādāya tiṭṭhanti, dosadhammāpi cittaṁ pariyādāya tiṭṭhanti, mohadhammāpi cittaṁ pariyādāya tiṭṭhanti.\nSo ca hi te, mahānāma, dhammo ajjhattaṁ pahīno abhavissa, na tvaṁ agāraṁ ajjhāvaseyyāsi, na kāme paribhuñjeyyāsi.\nYasmā ca kho te, mahānāma, so eva dhammo ajjhattaṁ appahīno tasmā tvaṁ agāraṁ ajjhāvasasi, kāme paribhuñjasi.","en":"“Mahānāma, there is a quality that remains in you that makes you have such thoughts.\nFor if you had given up that quality you would not still be living at home and enjoying sensual pleasures.\nBut because you haven’t given up that quality you are still living at home and enjoying sensual pleasures."}},{"id":"mn14:4","sourceIds":["mn14:4.1","mn14:4.2","mn14:4.3","mn14:4.4","mn14:4.5"],"kind":"text","text":{"pi":"‘Appassādā kāmā bahudukkhā bahupāyāsā, ādīnavo ettha bhiyyo’ti—\niti cepi, mahānāma, ariyasāvakassa yathābhūtaṁ sammappaññāya sudiṭṭhaṁ hoti, so ca aññatreva kāmehi aññatra akusalehi dhammehi pītisukhaṁ nādhigacchati, aññaṁ vā tato santataraṁ;\natha kho so neva tāva anāvaṭṭī kāmesu hoti.\nYato ca kho, mahānāma, ariyasāvakassa ‘appassādā kāmā bahudukkhā bahupāyāsā, ādīnavo ettha bhiyyo’ti—evametaṁ yathābhūtaṁ sammappaññāya sudiṭṭhaṁ hoti, so ca aññatreva kāmehi aññatra akusalehi dhammehi pītisukhaṁ adhigacchati aññaṁ vā tato santataraṁ;\natha kho so anāvaṭṭī kāmesu hoti.","en":"Sensual pleasures give little gratification and much suffering and distress, and they are all the more full of drawbacks.\nSo, Mahānāma, even though a noble disciple has clearly seen this with right wisdom, as long as they do not achieve the rapture and bliss that are apart from sensual pleasures and unskillful qualities, or something even more peaceful than that,\nthey can return to sensual pleasures.\nBut when they do achieve that rapture and bliss, or something more peaceful than that,\nthey do not return to sensual pleasures."}},{"id":"mn14:5","sourceIds":["mn14:5.1","mn14:5.2","mn14:5.3","mn14:5.4","mn14:5.5","mn14:5.6"],"kind":"text","text":{"pi":"Mayhampi kho, mahānāma, pubbeva sambodhā, anabhisambuddhassa bodhisattasseva sato,\n‘appassādā kāmā bahudukkhā bahupāyāsā, ādīnavo ettha bhiyyo’ti—evametaṁ yathābhūtaṁ sammappaññāya sudiṭṭhaṁ hoti,\nso ca aññatreva kāmehi aññatra akusalehi dhammehi pītisukhaṁ nājjhagamaṁ, aññaṁ vā tato santataraṁ;\natha khvāhaṁ neva tāva anāvaṭṭī kāmesu paccaññāsiṁ.\nYato ca kho me, mahānāma, ‘appassādā kāmā bahudukkhā bahupāyāsā, ādīnavo ettha bhiyyo’ti—evametaṁ yathābhūtaṁ sammappaññāya sudiṭṭhaṁ ahosi, so ca aññatreva kāmehi aññatra akusalehi dhammehi pītisukhaṁ ajjhagamaṁ, aññaṁ vā tato santataraṁ;\nathāhaṁ anāvaṭṭī kāmesu paccaññāsiṁ.","en":"Before my awakening—when I was still unawakened but intent on awakening—I too clearly saw with right wisdom that:\n‘Sensual pleasures give little gratification and much suffering and distress, and they are all the more full of drawbacks.’\nBut so long as I didn’t achieve the rapture and bliss that are apart from sensual pleasures and unskillful qualities, or something even more peaceful than that,\nI didn’t announce that I would not return to sensual pleasures.\nBut when I did achieve that rapture and bliss, or something more peaceful than that,\nI announced that I would not return to sensual pleasures."}},{"id":"mn14:6","sourceIds":["mn14:6.1","mn14:6.2","mn14:6.3","mn14:6.4","mn14:6.5","mn14:6.6","mn14:6.7","mn14:6.8","mn14:6.9","mn14:6.10","mn14:6.11"],"kind":"text","text":{"pi":"Ko ca, mahānāma, kāmānaṁ assādo?\nPañcime, mahānāma, kāmaguṇā.\nKatame pañca?\nCakkhuviññeyyā rūpā iṭṭhā kantā manāpā piyarūpā kāmūpasaṁhitā rajanīyā;\nsotaviññeyyā saddā …pe…\nghānaviññeyyā gandhā …\njivhāviññeyyā rasā …\nkāyaviññeyyā phoṭṭhabbā iṭṭhā kantā manāpā piyarūpā kāmūpasaṁhitā rajanīyā—\nime kho, mahānāma, pañca kāmaguṇā.\nYaṁ kho, mahānāma, ime pañca kāmaguṇe paṭicca uppajjati sukhaṁ somanassaṁ—\nayaṁ kāmānaṁ assādo.","en":"And what is the gratification of sensual pleasures?\nThere are these five kinds of sensual stimulation.\nWhat five?\nSights known by the eye, which are likable, desirable, agreeable, pleasant, sensual, and arousing.\nSounds known by the ear …\nSmells known by the nose …\nTastes known by the tongue …\nTouches known by the body, which are likable, desirable, agreeable, pleasant, sensual, and arousing.\nThese are the five kinds of sensual stimulation.\nThe pleasure and happiness that arise from these five kinds of sensual stimulation: this is the gratification of sensual pleasures."}},{"id":"mn14:7","sourceIds":["mn14:7.1","mn14:7.2","mn14:7.3","mn14:7.4","mn14:7.5"],"kind":"text","text":{"pi":"Ko ca, mahānāma, kāmānaṁ ādīnavo?\nIdha, mahānāma, kulaputto yena sippaṭṭhānena jīvikaṁ kappeti—\nyadi muddāya yadi gaṇanāya yadi saṅkhānena yadi kasiyā yadi vaṇijjāya yadi gorakkhena yadi issatthena yadi rājaporisena yadi sippaññatarena,\nsītassa purakkhato uṇhassa purakkhato ḍaṁsamakasavātātapasarīsapasamphassehi rissamāno khuppipāsāya mīyamāno;\nayampi, mahānāma, kāmānaṁ ādīnavo sandiṭṭhiko dukkhakkhandho kāmahetu kāmanidānaṁ kāmādhikaraṇaṁ kāmānameva hetu.","en":"And what is the drawback of sensual pleasures?\nIt’s when a gentleman earns a living by means such as\narithmetic, accounting, calculating, farming, trade, raising cattle, archery, government service, or one of the professions.\nBut they must face cold and heat, being hurt by the touch of flies, mosquitoes, wind, sun, and reptiles, and risking death from hunger and thirst.\nThis is a drawback of sensual pleasures apparent in the present life, a mass of suffering caused by sensual pleasures."}},{"id":"mn14:8","sourceIds":["mn14:8.1","mn14:8.2","mn14:8.3"],"kind":"text","text":{"pi":"Tassa ce, mahānāma, kulaputtassa evaṁ uṭṭhahato ghaṭato vāyamato te bhogā nābhinipphajjanti,\nso socati kilamati paridevati urattāḷiṁ kandati sammohaṁ āpajjati ‘moghaṁ vata me uṭṭhānaṁ, aphalo vata me vāyāmo’ti.\nAyampi, mahānāma, kāmānaṁ ādīnavo sandiṭṭhiko dukkhakkhandho kāmahetu kāmanidānaṁ kāmādhikaraṇaṁ kāmānameva hetu.","en":"That gentleman might try hard, strive, and make an effort, but fail to accrue riches.\nIf this happens, they sorrow and wail and lament, beating their breast and falling into confusion, saying: ‘Oh, my hard work is wasted. My efforts are fruitless!’\nThis too is a drawback of sensual pleasures apparent in the present life, a mass of suffering caused by sensual pleasures."}},{"id":"mn14:9","sourceIds":["mn14:9.1","mn14:9.2","mn14:9.3","mn14:9.4","mn14:9.5","mn14:9.6","mn14:9.7"],"kind":"text","text":{"pi":"Tassa ce, mahānāma, kulaputtassa evaṁ uṭṭhahato ghaṭato vāyamato te bhogā abhinipphajjanti.\nSo tesaṁ bhogānaṁ ārakkhādhikaraṇaṁ dukkhaṁ domanassaṁ paṭisaṁvedeti:\n‘kinti me bhoge neva rājāno hareyyuṁ, na corā hareyyuṁ, na aggi daheyya, na udakaṁ vaheyya, na appiyā vā dāyādā hareyyun’ti.\nTassa evaṁ ārakkhato gopayato te bhoge rājāno vā haranti, corā vā haranti, aggi vā dahati, udakaṁ vā vahati, appiyā vā dāyādā haranti.\nSo socati kilamati paridevati urattāḷiṁ kandati sammohaṁ āpajjati:\n‘yampi me ahosi tampi no natthī’ti.\nAyampi, mahānāma, kāmānaṁ ādīnavo sandiṭṭhiko dukkhakkhandho kāmahetu kāmanidānaṁ kāmādhikaraṇaṁ kāmānameva hetu.","en":"That gentleman might try hard, strive, and make an effort, and succeed in accruing riches.\nBut they experience pain and sadness when they try to protect it, thinking:\n‘How can I prevent my wealth from being taken by rulers or bandits, consumed by fire, swept away by flood, or taken by unloved heirs?’\nAnd even though they protect it and ward it, rulers or bandits take it, or fire consumes it, or flood sweeps it away, or unloved heirs take it.\nThey sorrow and wail and lament, beating their breast and falling into confusion:\n‘What once was mine is gone.’\nThis too is a drawback of sensual pleasures apparent in the present life, a mass of suffering caused by sensual pleasures."}},{"id":"mn14:10","sourceIds":["mn14:10.1","mn14:10.2","mn14:10.3","mn14:10.4"],"kind":"text","text":{"pi":"Puna caparaṁ, mahānāma, kāmahetu kāmanidānaṁ kāmādhikaraṇaṁ kāmānameva hetu rājānopi rājūhi vivadanti, khattiyāpi khattiyehi vivadanti, brāhmaṇāpi brāhmaṇehi vivadanti, gahapatīpi gahapatīhi vivadanti, mātāpi puttena vivadati, puttopi mātarā vivadati, pitāpi puttena vivadati, puttopi pitarā vivadati, bhātāpi bhātarā vivadati, bhātāpi bhaginiyā vivadati, bhaginīpi bhātarā vivadati, sahāyopi sahāyena vivadati.\nTe tattha kalahaviggahavivādāpannā aññamaññaṁ pāṇīhipi upakkamanti, leḍḍūhipi upakkamanti, daṇḍehipi upakkamanti, satthehipi upakkamanti.\nTe tattha maraṇampi nigacchanti, maraṇamattampi dukkhaṁ.\nAyampi, mahānāma, kāmānaṁ ādīnavo sandiṭṭhiko dukkhakkhandho kāmahetu kāmanidānaṁ kāmādhikaraṇaṁ kāmānameva hetu.","en":"Furthermore, for the sake of sensual pleasures kings fight with kings, aristocrats fight with aristocrats, brahmins fight with brahmins, and householders fight with householders. A mother fights with her child, child with mother, father with child, and child with father. Brother fights with brother, brother with sister, sister with brother, and friend fights with friend.\nOnce they’ve started quarreling, arguing, and disputing, they attack each other with fists, stones, rods, and swords,\nresulting in death and deadly pain.\nThis too is a drawback of sensual pleasures apparent in the present life, a mass of suffering caused by sensual pleasures."}},{"id":"mn14:11","sourceIds":["mn14:11.1","mn14:11.2","mn14:11.3","mn14:11.4"],"kind":"text","text":{"pi":"Puna caparaṁ, mahānāma, kāmahetu kāmanidānaṁ kāmādhikaraṇaṁ kāmānameva hetu asicammaṁ gahetvā, dhanukalāpaṁ sannayhitvā, ubhatobyūḷhaṁ saṅgāmaṁ pakkhandanti usūsupi khippamānesu, sattīsupi khippamānāsu, asīsupi vijjotalantesu.\nTe tattha usūhipi vijjhanti, sattiyāpi vijjhanti, asināpi sīsaṁ chindanti.\nTe tattha maraṇampi nigacchanti, maraṇamattampi dukkhaṁ.\nAyampi, mahānāma, kāmānaṁ ādīnavo sandiṭṭhiko dukkhakkhandho kāmahetu kāmanidānaṁ kāmādhikaraṇaṁ kāmānameva hetu.","en":"Furthermore, for the sake of sensual pleasures they don their sword and shield, fasten their bow and arrows, and plunge into a battle massed on both sides, with arrows and spears flying and swords flashing.\nThere they are struck with arrows and spears, and their heads are chopped off,\nresulting in death and deadly pain.\nThis too is a drawback of sensual pleasures apparent in the present life, a mass of suffering caused by sensual pleasures."}},{"id":"mn14:12","sourceIds":["mn14:12.1","mn14:12.2","mn14:12.3","mn14:12.4"],"kind":"text","text":{"pi":"Puna caparaṁ, mahānāma, kāmahetu kāmanidānaṁ kāmādhikaraṇaṁ kāmānameva hetu asicammaṁ gahetvā, dhanukalāpaṁ sannayhitvā, addāvalepanā upakāriyo pakkhandanti usūsupi khippamānesu, sattīsupi khippamānāsu, asīsupi vijjotalantesu.\nTe tattha usūhipi vijjhanti, sattiyāpi vijjhanti, chakaṇakāyapi osiñcanti, abhivaggenapi omaddanti, asināpi sīsaṁ chindanti.\nTe tattha maraṇampi nigacchanti, maraṇamattampi dukkhaṁ.\nAyampi, mahānāma, kāmānaṁ ādīnavo sandiṭṭhiko dukkhakkhandho kāmahetu kāmanidānaṁ kāmādhikaraṇaṁ kāmānameva hetu.","en":"Furthermore, for the sake of sensual pleasures they don their sword and shield, fasten their bow and arrows, and charge wetly plastered bastions, with arrows and spears flying and swords flashing.\nThere they are struck with arrows and spears, splashed with dung, crushed by a superior force, and their heads are chopped off,\nresulting in death and deadly pain.\nThis too is a drawback of sensual pleasures apparent in the present life, a mass of suffering caused by sensual pleasures."}},{"id":"mn14:13","sourceIds":["mn14:13.1","mn14:13.2","mn14:13.3","mn14:13.4","mn14:13.5"],"kind":"text","text":{"pi":"Puna caparaṁ, mahānāma, kāmahetu kāmanidānaṁ kāmādhikaraṇaṁ kāmānameva hetu sandhimpi chindanti, nillopampi haranti, ekāgārikampi karonti, paripanthepi tiṭṭhanti, paradārampi gacchanti.\nTamenaṁ rājāno gahetvā vividhā kammakāraṇā kārenti—\nkasāhipi tāḷenti, vettehipi tāḷenti, aḍḍhadaṇḍakehipi tāḷenti; hatthampi chindanti, pādampi chindanti, hatthapādampi chindanti, kaṇṇampi chindanti, nāsampi chindanti, kaṇṇanāsampi chindanti; bilaṅgathālikampi karonti, saṅkhamuṇḍikampi karonti, rāhumukhampi karonti, jotimālikampi karonti, hatthapajjotikampi karonti, erakavattikampi karonti, cīrakavāsikampi karonti, eṇeyyakampi karonti, baḷisamaṁsikampi karonti, kahāpaṇikampi karonti, khārāpatacchikampi karonti, palighaparivattikampi karonti, palālapīṭhakampi karonti, tattenapi telena osiñcanti, sunakhehipi khādāpenti, jīvantampi sūle uttāsenti, asināpi sīsaṁ chindanti.\nTe tattha maraṇampi nigacchanti, maraṇamattampi dukkhaṁ.\nAyampi, mahānāma, kāmānaṁ ādīnavo sandiṭṭhiko dukkhakkhandho kāmahetu kāmanidānaṁ kāmādhikaraṇaṁ kāmānameva hetu.","en":"Furthermore, for the sake of sensual pleasures they break into houses, plunder wealth, steal from isolated buildings, commit highway robbery, and commit adultery.\nThe rulers would arrest them and subject them to various punishments—\nwhipping, caning, and clubbing; cutting off hands or feet, or both; cutting off ears or nose, or both; the ‘porridge pot’, the ‘shell-shave’, the ‘Rāhu’s mouth’, the ‘garland of fire’, the ‘burning hand’, the ‘bulrush twist’, the ‘bark dress’, the ‘antelope’, the ‘meat hook’, the ‘coins’, the ‘caustic pickle’, the ‘twisting bar’, the ‘straw mat’; being splashed with hot oil, being fed to the hounds, being impaled alive, and being beheaded.\nThese result in death and deadly pain.\nThis too is a drawback of sensual pleasures apparent in the present life, a mass of suffering caused by sensual pleasures."}},{"id":"mn14:14","sourceIds":["mn14:14.1","mn14:14.2","mn14:14.3"],"kind":"text","text":{"pi":"Puna caparaṁ, mahānāma, kāmahetu kāmanidānaṁ kāmādhikaraṇaṁ kāmānameva hetu kāyena duccaritaṁ caranti, vācāya duccaritaṁ caranti, manasā duccaritaṁ caranti.\nTe kāyena duccaritaṁ caritvā, vācāya duccaritaṁ caritvā, manasā duccaritaṁ caritvā, kāyassa bhedā paraṁ maraṇā, apāyaṁ duggatiṁ vinipātaṁ nirayaṁ upapajjanti.\nAyampi, mahānāma, kāmānaṁ ādīnavo samparāyiko, dukkhakkhandho kāmahetu kāmanidānaṁ kāmādhikaraṇaṁ kāmānameva hetu.","en":"Furthermore, for the sake of sensual pleasures, they conduct themselves badly by way of body, speech, and mind.\nWhen their body breaks up, after death, they’re reborn in a place of loss, a bad place, the underworld, hell.\nThis is a drawback of sensual pleasures to do with lives to come, a mass of suffering caused by sensual pleasures."}},{"id":"mn14:15","sourceIds":["mn14:15.1","mn14:15.2"],"kind":"text","text":{"pi":"Ekamidāhaṁ, mahānāma, samayaṁ rājagahe viharāmi gijjhakūṭe pabbate.\nTena kho pana samayena sambahulā nigaṇṭhā isigilipasse kāḷasilāyaṁ ubbhaṭṭhakā honti āsanapaṭikkhittā, opakkamikā dukkhā tibbā kharā kaṭukā vedanā vedayanti.","en":"Mahānāma, this one time I was staying near Rājagaha, on the Vulture’s Peak Mountain.\nNow at that time several Jain ascetics on the slopes of Isigili at the Black Rock were constantly standing, turning down seats. And they felt painful, sharp, severe, acute feelings due to exertion."}},{"id":"mn14:16","sourceIds":["mn14:16.1","mn14:16.2"],"kind":"text","text":{"pi":"Atha khvāhaṁ, mahānāma, sāyanhasamayaṁ paṭisallānā vuṭṭhito yena isigilipasse kāḷasilā yena te nigaṇṭhā tenupasaṅkamiṁ; upasaṅkamitvā te nigaṇṭhe etadavocaṁ:\n‘kiṁ nu tumhe, āvuso nigaṇṭhā, ubbhaṭṭhakā āsanapaṭikkhittā, opakkamikā dukkhā tibbā kharā kaṭukā vedanā vedayathā’ti?","en":"Then in the late afternoon, I came out of retreat and went to the Black Rock to visit those Jain ascetics. I said to them,\n‘Reverends, why are you constantly standing, turning down seats, so that you suffer painful, sharp, severe, acute feelings due to exertion?’"}},{"id":"mn14:17","sourceIds":["mn14:17.1","mn14:17.2","mn14:17.3","mn14:17.4","mn14:17.5","mn14:17.6","mn14:17.7","mn14:17.8","mn14:17.9"],"kind":"text","text":{"pi":"Evaṁ vutte, mahānāma, te nigaṇṭhā maṁ etadavocuṁ:\n‘nigaṇṭho, āvuso, nāṭaputto sabbaññū sabbadassāvī aparisesaṁ ñāṇadassanaṁ paṭijānāti:\n“carato ca me tiṭṭhato ca suttassa ca jāgarassa ca satataṁ samitaṁ ñāṇadassanaṁ paccupaṭṭhitan”ti.\nSo evamāha:\n“atthi kho vo, nigaṇṭhā, pubbe pāpakammaṁ kataṁ, taṁ imāya kaṭukāya dukkarakārikāya nijjīretha;\nyaṁ panettha etarahi kāyena saṁvutā vācāya saṁvutā manasā saṁvutā taṁ āyatiṁ pāpassa kammassa akaraṇaṁ;\niti purāṇānaṁ kammānaṁ tapasā byantibhāvā, navānaṁ kammānaṁ akaraṇā, āyatiṁ anavassavo;\nāyatiṁ anavassavā kammakkhayo, kammakkhayā dukkhakkhayo, dukkhakkhayā vedanākkhayo, vedanākkhayā sabbaṁ dukkhaṁ nijjiṇṇaṁ bhavissatī”ti.\nTañca panamhākaṁ ruccati ceva khamati ca, tena camha attamanā’ti.","en":"When I said this, those Jain ascetics said to me,\n‘Reverend, the Jain ascetic of the Ñātika clan claims to be all-knowing and all-seeing, to know and see everything without exception, thus:\n“Knowledge and vision are constantly and continually present to me, while walking, standing, sleeping, and waking.”\nHe says,\n“O Jain ascetics, you have done bad deeds in a past life. Wear them away with these severe and grueling austerities.\nAnd when in the present you are restrained in body, speech, and mind, you’re not doing any bad deeds for the future.\nSo, due to eliminating past deeds by fervent mortification, and not doing any new deeds, there’s nothing to come up in the future.\nWith no future consequence, deeds end. With the ending of deeds, suffering ends. With the ending of suffering, feeling ends. And with the ending of feeling, all suffering will have been worn away.”\nWe endorse and accept this, and we are satisfied with it.’"}},{"id":"mn14:18","sourceIds":["mn14:18.1","mn14:18.2","mn14:18.3","mn14:18.4","mn14:18.5","mn14:18.6","mn14:18.7","mn14:18.8","mn14:18.9","mn14:18.10","mn14:18.11","mn14:18.12","mn14:18.13","mn14:18.14","mn14:18.15","mn14:18.16"],"kind":"text","text":{"pi":"Evaṁ vutte, ahaṁ, mahānāma, te nigaṇṭhe etadavocaṁ:\n‘kiṁ pana tumhe, āvuso nigaṇṭhā, jānātha—\nahuvamheva mayaṁ pubbe na nāhuvamhā’ti?\n‘No hidaṁ, āvuso’.\n‘Kiṁ pana tumhe, āvuso nigaṇṭhā, jānātha—\nakaramheva mayaṁ pubbe pāpakammaṁ na nākaramhā’ti?\n‘No hidaṁ, āvuso’.\n‘Kiṁ pana tumhe, āvuso nigaṇṭhā, jānātha—\nevarūpaṁ vā evarūpaṁ vā pāpakammaṁ akaramhā’ti?\n‘No hidaṁ, āvuso’.\n‘Kiṁ pana tumhe, āvuso nigaṇṭhā, jānātha—\nettakaṁ vā dukkhaṁ nijjiṇṇaṁ, ettakaṁ vā dukkhaṁ nijjīretabbaṁ, ettakamhi vā dukkhe nijjiṇṇe sabbaṁ dukkhaṁ nijjiṇṇaṁ bhavissatī’ti?\n‘No hidaṁ, āvuso’.\n‘Kiṁ pana tumhe, āvuso nigaṇṭhā, jānātha—\ndiṭṭheva dhamme akusalānaṁ dhammānaṁ pahānaṁ, kusalānaṁ dhammānaṁ upasampadan’ti?\n‘No hidaṁ, āvuso’.","en":"When they said this, I said to them,\n‘But reverends, do you know\nfor sure that you existed in the past, and it is not the case that you did not exist?’\n‘No we don’t, reverend.’\n‘But reverends, do you know\nfor sure that you did bad deeds in the past?’\n‘No we don’t, reverend.’\n‘But reverends, do you know\nthat you did bad deeds of this type or that?’\n‘No we don’t, reverend.’\n‘But reverends, do you know\nthat so much suffering has already been worn away? Or that so much suffering still remains to be worn away? Or that when so much suffering is worn away all suffering will have been worn away?’\n‘No we don’t, reverend.’\n‘But reverends, do you know\nabout giving up unskillful qualities in this very life and embracing skillful qualities?’\n‘No we don’t, reverend.’"}},{"id":"mn14:19","sourceIds":["mn14:19.1","mn14:19.2","mn14:19.3","mn14:19.4","mn14:19.5","mn14:19.6","mn14:19.7","mn14:19.8"],"kind":"text","text":{"pi":"‘Iti kira tumhe, āvuso nigaṇṭhā, na jānātha—\nahuvamheva mayaṁ pubbe na nāhuvamhāti, na jānātha—\nakaramheva mayaṁ pubbe pāpakammaṁ na nākaramhāti, na jānātha—\nevarūpaṁ vā evarūpaṁ vā pāpakammaṁ akaramhāti, na jānātha—\nettakaṁ vā dukkhaṁ nijjiṇṇaṁ, ettakaṁ vā dukkhaṁ nijjīretabbaṁ, ettakamhi vā dukkhe nijjiṇṇe sabbaṁ dukkhaṁ nijjiṇṇaṁ bhavissatīti.\nNa jānātha—\ndiṭṭheva dhamme akusalānaṁ dhammānaṁ pahānaṁ, kusalānaṁ dhammānaṁ upasampadaṁ.\nEvaṁ sante, āvuso nigaṇṭhā, ye loke luddā lohitapāṇino kurūrakammantā manussesu paccājātā te nigaṇṭhesu pabbajantī’ti?","en":"‘So it seems that you don’t know any of these things.\nThat being so, when those in the world who are violent and bloody-handed and of cruel livelihood are reborn among humans they go forth as Jain ascetics.’"}},{"id":"mn14:20","sourceIds":["mn14:20.1","mn14:20.2","mn14:20.3","mn14:20.4","mn14:20.5","mn14:20.6","mn14:20.7","mn14:20.8","mn14:20.9","mn14:20.10","mn14:20.11"],"kind":"text","text":{"pi":"‘Na kho, āvuso gotama, sukhena sukhaṁ adhigantabbaṁ, dukkhena kho sukhaṁ adhigantabbaṁ;\nsukhena cāvuso gotama, sukhaṁ adhigantabbaṁ abhavissa, rājā māgadho seniyo bimbisāro sukhaṁ adhigaccheyya, rājā māgadho seniyo bimbisāro sukhavihāritaro āyasmatā gotamenā’ti.\n‘Addhāyasmantehi nigaṇṭhehi sahasā appaṭisaṅkhā vācā bhāsitā:\n“na kho, āvuso gotama, sukhena sukhaṁ adhigantabbaṁ, dukkhena kho sukhaṁ adhigantabbaṁ;\nsukhena cāvuso gotama, sukhaṁ adhigantabbaṁ abhavissa, rājā māgadho seniyo bimbisāro sukhaṁ adhigaccheyya, rājā māgadho seniyo bimbisāro sukhavihāritaro āyasmatā gotamenā”ti.\nApi ca ahameva tattha paṭipucchitabbo:\n“ko nu kho āyasmantānaṁ sukhavihāritaro rājā vā māgadho seniyo bimbisāro āyasmā vā gotamo”ti?\nAddhāvuso gotama, amhehi sahasā appaṭisaṅkhā vācā bhāsitā, na kho, āvuso gotama, sukhena sukhaṁ adhigantabbaṁ, dukkhena kho sukhaṁ adhigantabbaṁ;\nsukhena cāvuso gotama, sukhaṁ adhigantabbaṁ abhavissa, rājā māgadho seniyo bimbisāro sukhaṁ adhigaccheyya, rājā māgadho seniyo bimbisāro sukhavihāritaro āyasmatā gotamenāti.\nApi ca tiṭṭhatetaṁ, idānipi mayaṁ āyasmantaṁ gotamaṁ pucchāma:\n“ko nu kho āyasmantānaṁ sukhavihāritaro rājā vā māgadho seniyo bimbisāro āyasmā vā gotamo”ti?","en":"‘Reverend Gotama, pleasure is not gained through pleasure; pleasure is gained through pain.\nFor if pleasure were to be gained through pleasure, King Seniya Bimbisāra of Magadha would gain pleasure, since he lives in greater pleasure than Venerable Gotama.’\n‘Clearly the venerables have spoken rashly, without reflection.\nRather, I’m the one who should be asked about\nwho lives in greater pleasure, King Bimbisāra or Venerable Gotama?’\n‘Clearly we spoke rashly and without reflection.\nBut let that be. Now we ask Venerable Gotama:\n“Who lives in greater pleasure, King Bimbisāra or Venerable Gotama?”’"}},{"id":"mn14:21","sourceIds":["mn14:21.1","mn14:21.2","mn14:21.3","mn14:21.4","mn14:21.5","mn14:21.6","mn14:21.7","mn14:21.8","mn14:21.9","mn14:21.10","mn14:21.11","mn14:21.12","mn14:21.13","mn14:21.14","mn14:21.15","mn14:21.16","mn14:21.17","mn14:21.18","mn14:21.19","mn14:21.20","mn14:21.21","mn14:21.22","mn14:21.23","mn14:21.24"],"kind":"text","text":{"pi":"Tena hāvuso nigaṇṭhā, tumheva tattha paṭipucchissāmi, yathā vo khameyya tathā naṁ byākareyyātha.\nTaṁ kiṁ maññathāvuso nigaṇṭhā, pahoti rājā māgadho seniyo bimbisāro,\naniñjamāno kāyena, abhāsamāno vācaṁ, satta rattindivāni ekantasukhaṁ paṭisaṁvedī viharitun’ti?\n‘No hidaṁ, āvuso’.\n‘Taṁ kiṁ maññathāvuso nigaṇṭhā, pahoti rājā māgadho seniyo bimbisāro,\naniñjamāno kāyena, abhāsamāno vācaṁ, cha rattindivāni …pe…\npañca rattindivāni …\ncattāri rattindivāni …\ntīṇi rattindivāni …\ndve rattindivāni …\nekaṁ rattindivaṁ ekantasukhaṁ paṭisaṁvedī viharitun’ti?\n‘No hidaṁ, āvuso’.\n‘Ahaṁ kho, āvuso nigaṇṭhā, pahomi aniñjamāno kāyena, abhāsamāno vācaṁ, ekaṁ rattindivaṁ ekantasukhaṁ paṭisaṁvedī viharituṁ.\nAhaṁ kho, āvuso nigaṇṭhā, pahomi aniñjamāno kāyena, abhāsamāno vācaṁ, dve rattindivāni …\ntīṇi rattindivāni …\ncattāri rattindivāni …\npañca rattindivāni …\ncha rattindivāni …\nsatta rattindivāni ekantasukhaṁ paṭisaṁvedī viharituṁ.\nTaṁ kiṁ maññathāvuso nigaṇṭhā, evaṁ sante ko sukhavihāritaro rājā vā māgadho seniyo bimbisāro ahaṁ vā’ti?\n‘Evaṁ sante āyasmāva gotamo sukhavihāritaro raññā māgadhena seniyena bimbisārenā’”ti.\nIdamavoca bhagavā.\nAttamano mahānāmo sakko bhagavato bhāsitaṁ abhinandīti.\nCūḷadukkhakkhandhasuttaṁ niṭṭhitaṁ catutthaṁ.","en":"‘Well then, reverends, I’ll ask you about this in return, and you can answer as you like.\nWhat do you think, reverends?\nIs King Bimbisāra capable of experiencing absolute happiness for seven days and nights without moving his body or speaking?’\n‘No he is not, reverend.’\n‘What do you think, reverends?\nIs King Bimbisāra capable of experiencing absolute happiness for six days …\nfive days …\nfour days …\nthree days …\ntwo days …\none day?’\n‘No he is not, reverend.’\n‘But I am capable of experiencing absolute happiness for one day and night without moving my body or speaking.\nI am capable of experiencing perfect happiness for two days …\nthree days …\nfour days …\nfive days …\nsix days …\nseven days.\nWhat do you think, reverends? This being so, who lives in greater pleasure, King Bimbisāra or I?’\n‘This being so, Venerable Gotama lives in greater pleasure than King Bimbisāra.’”\nThat is what the Buddha said.\nSatisfied, Mahānāma the Sakyan approved what the Buddha said."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mn14/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}