{"id":"mn15","title":"Measuring Up","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mn15","title":"Measuring Up","units":[{"id":"mn15:0","sourceIds":["mn15:0.1","mn15:0.2"],"kind":"text","text":{"pi":"Majjhima Nikāya 15\nAnumānasutta","en":"Middle Discourses 15\nMeasuring Up"}},{"id":"mn15:1","sourceIds":["mn15:1.1","mn15:1.2","mn15:1.3","mn15:1.4","mn15:1.5","mn15:1.6"],"kind":"text","text":{"pi":"Evaṁ me sutaṁ—\nekaṁ samayaṁ āyasmā mahāmoggallāno bhaggesu viharati susumāragire bhesakaḷāvane migadāye.\nTatra kho āyasmā mahāmoggallāno bhikkhū āmantesi:\n“āvuso bhikkhavo”ti.\n“Āvuso”ti kho te bhikkhū āyasmato mahāmoggallānassa paccassosuṁ.\nĀyasmā mahāmoggallāno etadavoca:","en":"So I have heard.\nAt one time Venerable Mahāmoggallāna was staying in the land of the Bhaggas at Crocodile’s Bellow, in the deer park at Bhesakaḷā’s Wood.\nThere Venerable Mahāmoggallāna addressed the mendicants:\n“Reverends, mendicants!”\n“Reverend,” they replied.\nVenerable Mahāmoggallāna said this:"}},{"id":"mn15:2","sourceIds":["mn15:2.1","mn15:2.2"],"kind":"text","text":{"pi":"“Pavāreti cepi, āvuso, bhikkhu:\n‘vadantu maṁ āyasmanto, vacanīyomhi āyasmantehī’ti, so ca hoti dubbaco, dovacassakaraṇehi dhammehi samannāgato, akkhamo appadakkhiṇaggāhī anusāsaniṁ, atha kho naṁ sabrahmacārī na ceva vattabbaṁ maññanti, na ca anusāsitabbaṁ maññanti, na ca tasmiṁ puggale vissāsaṁ āpajjitabbaṁ maññanti.","en":"“Suppose a mendicant invites\nother mendicants to admonish them. But they’re hard to admonish, having qualities that make them hard to admonish. They’re impatient, and don’t take instruction respectfully. So their spiritual companions don’t think it’s worth advising and instructing them, and that individual doesn’t gain their trust."}},{"id":"mn15:3","sourceIds":["mn15:3.1","mn15:3.2","mn15:3.3","mn15:3.4","mn15:3.5","mn15:3.6","mn15:3.7","mn15:3.8","mn15:3.9","mn15:3.10","mn15:3.11","mn15:3.12","mn15:3.13","mn15:3.14","mn15:3.15","mn15:3.16","mn15:3.17","mn15:3.18","mn15:3.19","mn15:3.20","mn15:3.21","mn15:3.22","mn15:3.23","mn15:3.24","mn15:3.25","mn15:3.26","mn15:3.27","mn15:3.28","mn15:3.29","mn15:3.30","mn15:3.31","mn15:3.32","mn15:3.33","mn15:3.34","mn15:3.35","mn15:3.36","mn15:3.37","mn15:3.38","mn15:3.39","mn15:3.40","mn15:3.41","mn15:3.42","mn15:3.43","mn15:3.44","mn15:3.45","mn15:3.46","mn15:3.47","mn15:3.48","mn15:3.49","mn15:3.50"],"kind":"text","text":{"pi":"Katame cāvuso, dovacassakaraṇā dhammā?\nIdhāvuso, bhikkhu pāpiccho hoti, pāpikānaṁ icchānaṁ vasaṁ gato.\nYaṁpāvuso, bhikkhu pāpiccho hoti, pāpikānaṁ icchānaṁ vasaṁ gato—\nayampi dhammo dovacassakaraṇo.\nPuna caparaṁ, āvuso, bhikkhu attukkaṁsako hoti paravambhī.\nYaṁpāvuso, bhikkhu attukkaṁsako hoti paravambhī—\nayampi dhammo dovacassakaraṇo.\nPuna caparaṁ, āvuso, bhikkhu kodhano hoti kodhābhibhūto.\nYaṁpāvuso, bhikkhu kodhano hoti kodhābhibhūto—\nayampi dhammo dovacassakaraṇo.\nPuna caparaṁ, āvuso, bhikkhu kodhano hoti kodhahetu upanāhī.\nYaṁpāvuso, bhikkhu kodhano hoti kodhahetu upanāhī—\nayampi dhammo dovacassakaraṇo.\nPuna caparaṁ, āvuso, bhikkhu kodhano hoti kodhahetu abhisaṅgī.\nYaṁpāvuso, bhikkhu kodhano hoti kodhahetu abhisaṅgī—\nayampi dhammo dovacassakaraṇo.\nPuna caparaṁ, āvuso, bhikkhu kodhano hoti kodhasāmantā vācaṁ nicchāretā.\nYaṁpāvuso, bhikkhu kodhano hoti kodhasāmantā vācaṁ nicchāretā—\nayampi dhammo dovacassakaraṇo.\nPuna caparaṁ, āvuso, bhikkhu codito codakena codakaṁ paṭippharati.\nYaṁpāvuso, bhikkhu codito codakena codakaṁ paṭippharati—\nayampi dhammo dovacassakaraṇo.\nPuna caparaṁ, āvuso, bhikkhu codito codakena codakaṁ apasādeti.\nYaṁpāvuso, bhikkhu codito codakena codakaṁ apasādeti—\nayampi dhammo dovacassakaraṇo.\nPuna caparaṁ, āvuso, bhikkhu codito codakena codakassa paccāropeti.\nYaṁpāvuso, bhikkhu codito codakena codakassa paccāropeti—\nayampi dhammo dovacassakaraṇo.\nPuna caparaṁ, āvuso, bhikkhu codito codakena aññenaññaṁ paṭicarati, bahiddhā kathaṁ apanāmeti, kopañca dosañca appaccayañca pātukaroti.\nYaṁpāvuso, bhikkhu codito codakena aññenaññaṁ paṭicarati, bahiddhā kathaṁ apanāmeti, kopañca dosañca appaccayañca pātukaroti—\nayampi dhammo dovacassakaraṇo.\nPuna caparaṁ, āvuso, bhikkhu codito codakena apadāne na sampāyati.\nYaṁpāvuso, bhikkhu codito codakena apadāne na sampāyati—\nayampi dhammo dovacassakaraṇo.\nPuna caparaṁ, āvuso, bhikkhu makkhī hoti paḷāsī.\nYaṁpāvuso, bhikkhu makkhī hoti paḷāsī—\nayampi dhammo dovacassakaraṇo.\nPuna caparaṁ, āvuso, bhikkhu issukī hoti maccharī.\nYaṁpāvuso, bhikkhu issukī hoti maccharī—\nayampi dhammo dovacassakaraṇo.\nPuna caparaṁ, āvuso, bhikkhu saṭho hoti māyāvī.\nYaṁpāvuso, bhikkhu saṭho hoti māyāvī—\nayampi dhammo dovacassakaraṇo.\nPuna caparaṁ, āvuso, bhikkhu thaddho hoti atimānī.\nYaṁpāvuso, bhikkhu thaddho hoti atimānī—\nayampi dhammo dovacassakaraṇo.\nPuna caparaṁ, āvuso, bhikkhu sandiṭṭhiparāmāsī hoti ādhānaggāhī duppaṭinissaggī.\nYaṁpāvuso, bhikkhu sandiṭṭhiparāmāsī hoti ādhānaggāhī duppaṭinissaggī—\nayampi dhammo dovacassakaraṇo.\nIme vuccantāvuso, dovacassakaraṇā dhammā.","en":"And what are the qualities that make them hard to admonish?\nFirstly, a mendicant has corrupt wishes, having fallen under the sway of corrupt wishes.\nThis is a quality that makes them difficult to admonish.\nFurthermore, a mendicant glorifies themselves and puts others down. …\nThey’re irritable, overcome by anger …\nThey’re irritable, and acrimonious due to anger …\nThey’re irritable, and stubborn due to anger …\nThey’re irritable, and blurt out words bordering on anger …\nWhen accused, they object to the accuser …\nWhen accused, they rebuke the accuser …\nWhen accused, they retort to the accuser …\nWhen accused, they dodge the issue, distract the discussion with irrelevant points, and display annoyance, hate, and bitterness …\nWhen accused, they are unable to account for the evidence …\nThey are offensive and contemptuous …\nThey’re jealous and stingy …\nThey’re devious and deceitful …\nThey’re obstinate and arrogant …\nFurthermore, a mendicant is attached to their own views, holding them tight, and refusing to let go.\nThis too is a quality that makes them difficult to admonish.\nThese are the qualities that make them hard to admonish."}},{"id":"mn15:4","sourceIds":["mn15:4.1","mn15:4.2"],"kind":"text","text":{"pi":"No cepi, āvuso, bhikkhu pavāreti:\n‘vadantu maṁ āyasmanto, vacanīyomhi āyasmantehī’ti, so ca hoti suvaco, sovacassakaraṇehi dhammehi samannāgato, khamo padakkhiṇaggāhī anusāsaniṁ, atha kho naṁ sabrahmacārī vattabbañceva maññanti, anusāsitabbañca maññanti, tasmiñca puggale vissāsaṁ āpajjitabbaṁ maññanti.","en":"Suppose a mendicant doesn’t invite\nother mendicants to admonish them. But they’re easy to admonish, having qualities that make them easy to admonish. They’re accepting, and take instruction respectfully. So their spiritual companions think it’s worth advising and instructing them, and that individual gains their trust."}},{"id":"mn15:5","sourceIds":["mn15:5.1","mn15:5.2","mn15:5.3","mn15:5.4","mn15:5.5","mn15:5.6","mn15:5.7","mn15:5.8","mn15:5.9","mn15:5.10","mn15:5.11","mn15:5.12","mn15:5.13","mn15:5.14","mn15:5.15","mn15:5.16","mn15:5.17","mn15:5.18","mn15:5.19","mn15:5.20","mn15:5.21","mn15:5.22","mn15:5.23","mn15:5.24","mn15:5.25","mn15:5.26","mn15:5.27","mn15:5.28","mn15:5.29","mn15:5.30","mn15:5.31","mn15:5.32","mn15:5.33","mn15:5.34","mn15:5.35","mn15:5.36","mn15:5.37","mn15:5.38","mn15:5.39","mn15:5.40","mn15:5.41","mn15:5.42","mn15:5.43","mn15:5.44","mn15:5.45","mn15:5.46","mn15:5.47","mn15:5.48","mn15:5.49","mn15:5.50"],"kind":"text","text":{"pi":"Katame cāvuso, sovacassakaraṇā dhammā?\nIdhāvuso, bhikkhu na pāpiccho hoti, na pāpikānaṁ icchānaṁ vasaṁ gato.\nYaṁpāvuso, bhikkhu na pāpiccho hoti na pāpikānaṁ icchānaṁ vasaṁ gato—\nayampi dhammo sovacassakaraṇo.\nPuna caparaṁ, āvuso, bhikkhu anattukkaṁsako hoti aparavambhī.\nYaṁpāvuso, bhikkhu anattukkaṁsako hoti aparavambhī—\nayampi dhammo sovacassakaraṇo.\nPuna caparaṁ, āvuso, bhikkhu na kodhano hoti na kodhābhibhūto.\nYaṁpāvuso, bhikkhu na kodhano hoti na kodhābhibhūto—\nayampi dhammo sovacassakaraṇo.\nPuna caparaṁ, āvuso, bhikkhu na kodhano hoti na kodhahetu upanāhī.\nYaṁpāvuso, bhikkhu na kodhano hoti na kodhahetu upanāhī—\nayampi dhammo sovacassakaraṇo.\nPuna caparaṁ, āvuso, bhikkhu na kodhano hoti na kodhahetu abhisaṅgī.\nYaṁpāvuso, bhikkhu na kodhano hoti na kodhahetu abhisaṅgī—\nayampi dhammo sovacassakaraṇo.\nPuna caparaṁ, āvuso, bhikkhu na kodhano hoti na kodhasāmantā vācaṁ nicchāretā.\nYaṁpāvuso, bhikkhu na kodhano hoti na kodhasāmantā vācaṁ nicchāretā—\nayampi dhammo sovacassakaraṇo.\nPuna caparaṁ, āvuso, bhikkhu codito codakena codakaṁ nappaṭippharati.\nYaṁpāvuso, bhikkhu codito codakena codakaṁ nappaṭippharati—\nayampi dhammo sovacassakaraṇo.\nPuna caparaṁ, āvuso, bhikkhu codito codakena codakaṁ na apasādeti.\nYaṁpāvuso, bhikkhu codito codakena codakaṁ na apasādeti—\nayampi dhammo sovacassakaraṇo.\nPuna caparaṁ, āvuso, bhikkhu codito codakena codakassa na paccāropeti.\nYaṁpāvuso, bhikkhu codito codakena codakassa na paccāropeti—\nayampi dhammo sovacassakaraṇo.\nPuna caparaṁ, āvuso, bhikkhu codito codakena na aññenaññaṁ paṭicarati, na bahiddhā kathaṁ apanāmeti, na kopañca dosañca appaccayañca pātukaroti.\nYaṁpāvuso, bhikkhu codito codakena na aññenaññaṁ paṭicarati, na bahiddhā kathaṁ apanāmeti, na kopañca dosañca appaccayañca pātukaroti—\nayampi dhammo sovacassakaraṇo.\nPuna caparaṁ, āvuso, bhikkhu codito codakena apadāne sampāyati.\nYaṁpāvuso, bhikkhu codito codakena apadāne sampāyati—\nayampi dhammo sovacassakaraṇo.\nPuna caparaṁ, āvuso, bhikkhu amakkhī hoti apaḷāsī.\nYaṁpāvuso, bhikkhu amakkhī hoti apaḷāsī—\nayampi dhammo sovacassakaraṇo.\nPuna caparaṁ, āvuso, bhikkhu anissukī hoti amaccharī.\nYaṁpāvuso, bhikkhu anissukī hoti amaccharī—\nayampi dhammo sovacassakaraṇo.\nPuna caparaṁ, āvuso, bhikkhu asaṭho hoti amāyāvī.\nYaṁpāvuso, bhikkhu asaṭho hoti amāyāvī—\nayampi dhammo sovacassakaraṇo.\nPuna caparaṁ, āvuso, bhikkhu atthaddho hoti anatimānī.\nYaṁpāvuso, bhikkhu atthaddho hoti anatimānī—\nayampi dhammo sovacassakaraṇo.\nPuna caparaṁ, āvuso, bhikkhu asandiṭṭhiparāmāsī hoti anādhānaggāhī suppaṭinissaggī.\nYaṁpāvuso, bhikkhu asandiṭṭhiparāmāsī hoti, anādhānaggāhī suppaṭinissaggī—\nayampi dhammo sovacassakaraṇo.\nIme vuccantāvuso, sovacassakaraṇā dhammā.","en":"And what are the qualities that make them easy to admonish?\nFirstly, a mendicant doesn’t have corrupt wishes …\nFurthermore, a mendicant isn’t attached to their own views, not holding them tight, but letting them go easily.\nThese are the qualities that make them easy to admonish."}},{"id":"mn15:6","sourceIds":["mn15:6.1","mn15:6.2","mn15:6.3","mn15:6.4","mn15:6.5","mn15:6.6","mn15:6.7","mn15:6.8","mn15:6.9","mn15:6.10","mn15:6.11","mn15:6.12","mn15:6.13","mn15:6.14","mn15:6.15","mn15:6.16","mn15:6.17","mn15:6.18","mn15:6.19","mn15:6.20","mn15:6.21","mn15:6.22","mn15:6.23","mn15:6.24","mn15:6.25","mn15:6.26","mn15:6.27","mn15:6.28","mn15:6.29","mn15:6.30","mn15:6.31","mn15:6.32","mn15:6.33","mn15:6.34","mn15:6.35","mn15:6.36","mn15:6.37","mn15:6.38","mn15:6.39","mn15:6.40","mn15:6.41","mn15:6.42","mn15:6.43","mn15:6.44","mn15:6.45","mn15:6.46","mn15:6.47","mn15:6.48","mn15:6.49"],"kind":"text","text":{"pi":"Tatrāvuso, bhikkhunā attanāva attānaṁ evaṁ anuminitabbaṁ:\n‘yo khvāyaṁ puggalo pāpiccho, pāpikānaṁ icchānaṁ vasaṁ gato, ayaṁ me puggalo appiyo amanāpo;\nahañceva kho panassaṁ pāpiccho pāpikānaṁ icchānaṁ vasaṁ gato, ahampāssaṁ paresaṁ appiyo amanāpo’ti.\nEvaṁ jānantenāvuso, bhikkhunā ‘na pāpiccho bhavissāmi, na pāpikānaṁ icchānaṁ vasaṁ gato’ti cittaṁ uppādetabbaṁ.\n‘Yo khvāyaṁ puggalo attukkaṁsako paravambhī, ayaṁ me puggalo appiyo amanāpo;\nahañceva kho panassaṁ attukkaṁsako paravambhī, ahampāssaṁ paresaṁ appiyo amanāpo’ti.\nEvaṁ jānantenāvuso, bhikkhunā ‘anattukkaṁsako bhavissāmi aparavambhī’ti cittaṁ uppādetabbaṁ.\n‘Yo khvāyaṁ puggalo kodhano kodhābhibhūto, ayaṁ me puggalo appiyo amanāpo.\nAhañceva kho panassaṁ kodhano kodhābhibhūto, ahampāssaṁ paresaṁ appiyo amanāpo’ti.\nEvaṁ jānantenāvuso, bhikkhunā ‘na kodhano bhavissāmi na kodhābhibhūto’ti cittaṁ uppādetabbaṁ.\n‘Yo khvāyaṁ puggalo kodhano kodhahetu upanāhī, ayaṁ me puggalo appiyo amanāpo;\nahañceva kho panassaṁ kodhano kodhahetu upanāhī, ahampāssaṁ paresaṁ appiyo amanāpo’ti.\nEvaṁ jānantenāvuso, bhikkhunā ‘na kodhano bhavissāmi na kodhahetu upanāhī’ti cittaṁ uppādetabbaṁ.\n‘Yo khvāyaṁ puggalo kodhano kodhahetu abhisaṅgī, ayaṁ me puggalo appiyo amanāpo;\nahañceva kho panassaṁ kodhano kodhahetu abhisaṅgī, ahampāssaṁ paresaṁ appiyo amanāpo’ti.\nEvaṁ jānantenāvuso, bhikkhunā ‘na kodhano bhavissāmi na kodhahetu abhisaṅgī’ti cittaṁ uppādetabbaṁ.\n‘Yo khvāyaṁ puggalo kodhano kodhasāmantā vācaṁ nicchāretā, ayaṁ me puggalo appiyo amanāpo;\nahañceva kho panassaṁ kodhano kodhasāmantā vācaṁ nicchāretā, ahampāssaṁ paresaṁ appiyo amanāpo’ti.\nEvaṁ jānantenāvuso, bhikkhunā ‘na kodhano bhavissāmi na kodhasāmantā vācaṁ nicchāressāmī’ti cittaṁ uppādetabbaṁ.\n‘Yo khvāyaṁ puggalo codito codakena codakaṁ paṭippharati, ayaṁ me puggalo appiyo amanāpo;\nahañceva kho pana codito codakena codakaṁ paṭipphareyyaṁ, ahampāssaṁ paresaṁ appiyo amanāpo’ti.\nEvaṁ jānantenāvuso, bhikkhunā ‘codito codakena codakaṁ nappaṭippharissāmī’ti cittaṁ uppādetabbaṁ.\n‘Yo khvāyaṁ puggalo codito codakena codakaṁ apasādeti, ayaṁ me puggalo appiyo amanāpo;\nahañceva kho pana codito codakena codakaṁ apasādeyyaṁ, ahampāssaṁ paresaṁ appiyo amanāpo’ti.\nEvaṁ jānantenāvuso, bhikkhunā ‘codito codakena codakaṁ na apasādessāmī’ti cittaṁ uppādetabbaṁ.\n‘Yo khvāyaṁ puggalo codito codakena codakassa paccāropeti, ayaṁ me puggalo appiyo amanāpo;\nahañceva kho pana codito codakena codakassa paccāropeyyaṁ, ahampāssaṁ paresaṁ appiyo amanāpo’ti.\nEvaṁ jānantenāvuso, bhikkhunā ‘codito codakena codakassa na paccāropessāmī’ti cittaṁ uppādetabbaṁ.\n‘Yo khvāyaṁ puggalo codito codakena aññenaññaṁ paṭicarati, bahiddhā kathaṁ apanāmeti, kopañca dosañca appaccayañca pātukaroti, ayaṁ me puggalo appiyo amanāpo;\nahañceva kho pana codito codakena aññenaññaṁ paṭicareyyaṁ, bahiddhā kathaṁ apanāmeyyaṁ, kopañca dosañca appaccayañca pātukareyyaṁ, ahampāssaṁ paresaṁ appiyo amanāpo’ti.\nEvaṁ jānantenāvuso, bhikkhunā ‘codito codakena na aññenaññaṁ paṭicarissāmi, na bahiddhā kathaṁ apanāmessāmi, na kopañca dosañca appaccayañca pātukarissāmī’ti cittaṁ uppādetabbaṁ.\n‘Yo khvāyaṁ puggalo codito codakena apadāne na sampāyati, ayaṁ me puggalo appiyo amanāpo;\nahañceva kho pana codito codakena apadāne na sampāyeyyaṁ, ahampāssaṁ paresaṁ appiyo amanāpo’ti.\nEvaṁ jānantenāvuso, bhikkhunā ‘codito codakena apadāne sampāyissāmī’ti cittaṁ uppādetabbaṁ.\n‘Yo khvāyaṁ puggalo makkhī paḷāsī, ayaṁ me puggalo appiyo amanāpo;\nahañceva kho panassaṁ makkhī paḷāsī, ahampāssaṁ paresaṁ appiyo amanāpo’ti.\nEvaṁ jānantenāvuso, bhikkhunā ‘amakkhī bhavissāmi apaḷāsī’ti cittaṁ uppādetabbaṁ.\n‘Yo khvāyaṁ puggalo issukī maccharī, ayaṁ me puggalo appiyo amanāpo;\nahañceva kho panassaṁ issukī maccharī, ahampāssaṁ paresaṁ appiyo amanāpo’ti.\nEvaṁ jānantenāvuso, bhikkhunā ‘anissukī bhavissāmi amaccharī’ti cittaṁ uppādetabbaṁ.\n‘Yo khvāyaṁ puggalo saṭho māyāvī, ayaṁ me puggalo appiyo amanāpo;\nahañceva kho panassaṁ saṭho māyāvī, ahampāssaṁ paresaṁ appiyo amanāpo’ti.\nEvaṁ jānantenāvuso, bhikkhunā ‘asaṭho bhavissāmi amāyāvī’ti cittaṁ uppādetabbaṁ.\n‘Yo khvāyaṁ puggalo thaddho atimānī, ayaṁ me puggalo appiyo amanāpo;\nahañceva kho panassaṁ thaddho atimānī, ahampāssaṁ paresaṁ appiyo amanāpo’ti.\nEvaṁ jānantenāvuso, bhikkhunā ‘atthaddho bhavissāmi anatimānī’ti cittaṁ uppādetabbaṁ.\n‘Yo khvāyaṁ puggalo sandiṭṭhiparāmāsī ādhānaggāhī duppaṭinissaggī, ayaṁ me puggalo appiyo amanāpo;\nahañceva kho panassaṁ sandiṭṭhiparāmāsī ādhānaggāhī duppaṭinissaggī, ahampāssaṁ paresaṁ appiyo amanāpo’ti.\nEvaṁ jānantenāvuso, bhikkhunā ‘asandiṭṭhiparāmāsī bhavissāmi anādhānaggāhī suppaṭinissaggī’ti cittaṁ uppādetabbaṁ.","en":"In such a case, a mendicant should measure themselves like this.\n‘This individual has corrupt wishes, having fallen under the sway of corrupt wishes. And I don’t like or approve of this individual.\nAnd if I were to fall under the sway of corrupt wishes, others wouldn’t like or approve of me.’\nA mendicant who knows this should give rise to the thought: ‘I will not fall under the sway of corrupt wishes.’ …\n‘This individual is attached to their own views, holding them tight and refusing to let go. And I don’t like or approve of this individual.\nAnd if I were to be attached to my own views, holding them tight and refusing to let go, others wouldn’t like or approve of me.’\nA mendicant who knows this should give rise to the thought: ‘I will not be attached to my own views, holding them tight, but will let them go easily.’"}},{"id":"mn15:7","sourceIds":["mn15:7.1","mn15:7.2","mn15:7.3","mn15:7.4","mn15:7.5","mn15:7.6","mn15:7.7","mn15:7.8","mn15:7.9","mn15:7.10","mn15:7.11","mn15:7.12","mn15:7.13","mn15:7.14","mn15:7.15","mn15:7.16","mn15:7.17","mn15:7.18","mn15:7.19","mn15:7.20","mn15:7.21","mn15:7.22","mn15:7.23","mn15:7.24","mn15:7.25","mn15:7.26","mn15:7.27","mn15:7.28","mn15:7.29","mn15:7.30","mn15:7.31","mn15:7.32","mn15:7.33","mn15:7.34","mn15:7.35","mn15:7.36","mn15:7.37","mn15:7.38","mn15:7.39","mn15:7.40","mn15:7.41","mn15:7.42","mn15:7.43","mn15:7.44","mn15:7.45","mn15:7.46","mn15:7.47","mn15:7.48","mn15:7.49","mn15:7.50","mn15:7.51","mn15:7.52","mn15:7.53","mn15:7.54","mn15:7.55","mn15:7.56","mn15:7.57","mn15:7.58","mn15:7.59","mn15:7.60","mn15:7.61","mn15:7.62","mn15:7.63","mn15:7.64","mn15:7.65","mn15:7.66","mn15:7.67","mn15:7.68","mn15:7.69","mn15:7.70","mn15:7.71","mn15:7.72","mn15:7.73","mn15:7.74","mn15:7.75","mn15:7.76","mn15:7.77","mn15:7.78","mn15:7.79","mn15:7.80","mn15:7.81","mn15:7.82","mn15:7.83","mn15:7.84","mn15:7.85","mn15:7.86","mn15:7.87","mn15:7.88","mn15:7.89","mn15:7.90","mn15:7.91","mn15:7.92"],"kind":"text","text":{"pi":"Tatrāvuso, bhikkhunā attanāva attānaṁ evaṁ paccavekkhitabbaṁ:\n‘kiṁ nu khomhi pāpiccho, pāpikānaṁ icchānaṁ vasaṁ gato’ti?\nSace, āvuso, bhikkhu paccavekkhamāno evaṁ jānāti:\n‘pāpiccho khomhi, pāpikānaṁ icchānaṁ vasaṁ gato’ti, tenāvuso, bhikkhunā tesaṁyeva pāpakānaṁ akusalānaṁ dhammānaṁ pahānāya vāyamitabbaṁ.\nSace panāvuso, bhikkhu paccavekkhamāno evaṁ jānāti:\n‘na khomhi pāpiccho, na pāpikānaṁ icchānaṁ vasaṁ gato’ti, tenāvuso, bhikkhunā teneva pītipāmojjena vihātabbaṁ ahorattānusikkhinā kusalesu dhammesu.\nPuna caparaṁ, āvuso, bhikkhunā attanāva attānaṁ evaṁ paccavekkhitabbaṁ:\n‘kiṁ nu khomhi attukkaṁsako paravambhī’ti?\nSace, āvuso, bhikkhu paccavekkhamāno evaṁ jānāti:\n‘attukkaṁsako khomhi paravambhī’ti, tenāvuso, bhikkhunā tesaṁyeva pāpakānaṁ akusalānaṁ dhammānaṁ pahānāya vāyamitabbaṁ.\nSace panāvuso, bhikkhu paccavekkhamāno evaṁ jānāti:\n‘anattukkaṁsako khomhi aparavambhī’ti, tenāvuso, bhikkhunā teneva pītipāmojjena vihātabbaṁ ahorattānusikkhinā kusalesu dhammesu.\nPuna caparaṁ, āvuso, bhikkhunā attanāva attānaṁ evaṁ paccavekkhitabbaṁ:\n‘kiṁ nu khomhi kodhano kodhābhibhūto’ti?\nSace, āvuso, bhikkhu paccavekkhamāno evaṁ jānāti:\n‘kodhano khomhi kodhābhibhūto’ti, tenāvuso, bhikkhunā tesaṁyeva pāpakānaṁ akusalānaṁ dhammānaṁ pahānāya vāyamitabbaṁ.\nSace panāvuso, bhikkhu paccavekkhamāno evaṁ jānāti:\n‘na khomhi kodhano kodhābhibhūto’ti, tenāvuso, bhikkhunā teneva pītipāmojjena vihātabbaṁ ahorattānusikkhinā kusalesu dhammesu.\nPuna caparaṁ, āvuso, bhikkhunā attanāva attānaṁ evaṁ paccavekkhitabbaṁ:\n‘kiṁ nu khomhi kodhano kodhahetu upanāhī’ti?\nSace, āvuso, bhikkhu paccavekkhamāno evaṁ jānāti ‘kodhano khomhi kodhahetu upanāhī’ti, tenāvuso, bhikkhunā tesaṁyeva pāpakānaṁ akusalānaṁ dhammānaṁ pahānāya vāyamitabbaṁ.\nSace panāvuso, bhikkhu paccavekkhamāno evaṁ jānāti ‘na khomhi kodhano kodhahetu upanāhī’ti, tenāvuso, bhikkhunā teneva pītipāmojjena vihātabbaṁ ahorattānusikkhinā kusalesu dhammesu.\nPuna caparaṁ, āvuso, bhikkhunā attanāva attānaṁ evaṁ paccavekkhitabbaṁ:\n‘kiṁ nu khomhi kodhano kodhahetu abhisaṅgī’ti?\nSace, āvuso, bhikkhu paccavekkhamāno evaṁ jānāti:\n‘kodhano khomhi kodhahetu abhisaṅgī’ti, tenāvuso, bhikkhunā tesaṁyeva pāpakānaṁ akusalānaṁ dhammānaṁ pahānāya vāyamitabbaṁ.\nSace panāvuso, bhikkhu paccavekkhamāno evaṁ jānāti:\n‘na khomhi kodhano kodhahetu abhisaṅgī’ti, tenāvuso, bhikkhunā teneva pītipāmojjena vihātabbaṁ ahorattānusikkhinā kusalesu dhammesu.\nPuna caparaṁ, āvuso, bhikkhunā attanāva attānaṁ evaṁ paccavekkhitabbaṁ:\n‘kiṁ nu khomhi kodhano kodhasāmantā vācaṁ nicchāretā’ti?\nSace, āvuso, bhikkhu paccavekkhamāno evaṁ jānāti:\n‘kodhano khomhi kodhasāmantā vācaṁ nicchāretā’ti, tenāvuso, bhikkhunā tesaṁyeva pāpakānaṁ akusalānaṁ dhammānaṁ pahānāya vāyamitabbaṁ.\nSace panāvuso, bhikkhu paccavekkhamāno evaṁ jānāti:\n‘na khomhi kodhano kodhasāmantā vācaṁ nicchāretā’ti, tenāvuso, bhikkhunā teneva pītipāmojjena vihātabbaṁ ahorattānusikkhinā kusalesu dhammesu.\nPuna caparaṁ, āvuso, bhikkhunā attanāva attānaṁ evaṁ paccavekkhitabbaṁ:\n‘kiṁ nu khomhi codito codakena codakaṁ paṭippharāmī’ti?\nSace, āvuso, bhikkhu paccavekkhamāno evaṁ jānāti ‘codito khomhi codakena codakaṁ paṭippharāmī’ti, tenāvuso, bhikkhunā tesaṁyeva pāpakānaṁ akusalānaṁ dhammānaṁ pahānāya vāyamitabbaṁ.\nSace panāvuso, bhikkhu paccavekkhamāno evaṁ jānāti:\n‘codito khomhi codakena codakaṁ nappaṭippharāmī’ti, tenāvuso, bhikkhunā teneva pītipāmojjena vihātabbaṁ ahorattānusikkhinā kusalesu dhammesu.\nPuna caparaṁ, āvuso, bhikkhunā attanāva attānaṁ evaṁ paccavekkhitabbaṁ:\n‘kiṁ nu khomhi codito codakena codakaṁ apasādemī’ti?\nSace, āvuso, bhikkhu paccavekkhamāno evaṁ jānāti ‘codito khomhi codakena codakaṁ apasādemī’ti, tenāvuso, bhikkhunā tesaṁyeva pāpakānaṁ akusalānaṁ dhammānaṁ pahānāya vāyamitabbaṁ.\nSace panāvuso, bhikkhu paccavekkhamāno evaṁ jānāti:\n‘codito khomhi codakena codakaṁ na apasādemī’ti, tenāvuso, bhikkhunā teneva pītipāmojjena vihātabbaṁ ahorattānusikkhinā kusalesu dhammesu.\nPuna caparaṁ, āvuso, bhikkhunā attanāva attānaṁ evaṁ paccavekkhitabbaṁ:\n‘kiṁ nu khomhi codito codakena codakassa paccāropemī’ti?\nSace, āvuso, bhikkhu paccavekkhamāno evaṁ jānāti:\n‘codito khomhi codakena codakassa paccāropemī’ti, tenāvuso, bhikkhunā tesaṁyeva pāpakānaṁ akusalānaṁ dhammānaṁ pahānāya vāyamitabbaṁ.\nSace panāvuso, bhikkhu paccavekkhamāno evaṁ jānāti:\n‘codito khomhi codakena codakassa na paccāropemī’ti, tenāvuso, bhikkhunā teneva pītipāmojjena vihātabbaṁ ahorattānusikkhinā kusalesu dhammesu.\nPuna caparaṁ, āvuso, bhikkhunā attanāva attānaṁ evaṁ paccavekkhitabbaṁ:\n‘kiṁ nu khomhi codito codakena aññenaññaṁ paṭicarāmi, bahiddhā kathaṁ apanāmemi, kopañca dosañca appaccayañca pātukaromī’ti?\nSace, āvuso, bhikkhu paccavekkhamāno evaṁ jānāti:\n‘codito khomhi codakena aññenaññaṁ paṭicarāmi, bahiddhā kathaṁ apanāmemi, kopañca dosañca appaccayañca pātukaromī’ti, tenāvuso, bhikkhunā tesaṁyeva pāpakānaṁ akusalānaṁ dhammānaṁ pahānāya vāyamitabbaṁ.\nSace panāvuso, bhikkhu paccavekkhamāno evaṁ jānāti:\n‘codito khomhi codakena na aññenaññaṁ paṭicarāmi, na bahiddhā kathaṁ apanāmemi, na kopañca dosañca appaccayañca pātukaromī’ti, tenāvuso, bhikkhunā teneva pītipāmojjena vihātabbaṁ ahorattānusikkhinā kusalesu dhammesu.\nPuna caparaṁ, āvuso, bhikkhunā attanāva attānaṁ evaṁ paccavekkhitabbaṁ:\n‘kiṁ nu khomhi codito codakena apadāne na sampāyāmī’ti?\nSace, āvuso, bhikkhu paccavekkhamāno evaṁ jānāti:\n‘codito khomhi codakena apadāne na sampāyāmī’ti, tenāvuso, bhikkhunā tesaṁyeva pāpakānaṁ akusalānaṁ dhammānaṁ pahānāya vāyamitabbaṁ.\nSace panāvuso, bhikkhu paccavekkhamāno evaṁ jānāti:\n‘codito khomhi codakena apadāne sampāyāmī’ti, tenāvuso, bhikkhunā teneva pītipāmojjena vihātabbaṁ ahorattānusikkhinā kusalesu dhammesu.\nPuna caparaṁ, āvuso, bhikkhunā attanāva attānaṁ evaṁ paccavekkhitabbaṁ:\n‘kiṁ nu khomhi makkhī paḷāsī’ti?\nSace, āvuso, bhikkhu paccavekkhamāno evaṁ jānāti:\n‘makkhī khomhi paḷāsī’ti, tenāvuso, bhikkhunā tesaṁyeva pāpakānaṁ akusalānaṁ dhammānaṁ pahānāya vāyamitabbaṁ.\nSace panāvuso, bhikkhu paccavekkhamāno evaṁ jānāti:\n‘amakkhī khomhi apaḷāsī’ti, tenāvuso, bhikkhunā teneva pītipāmojjena vihātabbaṁ ahorattānusikkhinā kusalesu dhammesu.\nPuna caparaṁ, āvuso, bhikkhunā attanāva attānaṁ evaṁ paccavekkhitabbaṁ:\n‘kiṁ nu khomhi issukī maccharī’ti?\nSace, āvuso, bhikkhu paccavekkhamāno evaṁ jānāti:\n‘issukī khomhi maccharī’ti, tenāvuso, bhikkhunā tesaṁyeva pāpakānaṁ akusalānaṁ dhammānaṁ pahānāya vāyamitabbaṁ.\nSace panāvuso, bhikkhu paccavekkhamāno evaṁ jānāti:\n‘anissukī khomhi amaccharī’ti, tenāvuso, bhikkhunā teneva pītipāmojjena vihātabbaṁ ahorattānusikkhinā kusalesu dhammesu.\nPuna caparaṁ, āvuso, bhikkhunā attanāva attānaṁ evaṁ paccavekkhitabbaṁ:\n‘kiṁ nu khomhi saṭho māyāvī’ti?\nSace, āvuso, bhikkhu paccavekkhamāno evaṁ jānāti:\n‘saṭho khomhi māyāvī’ti, tenāvuso, bhikkhunā tesaṁyeva pāpakānaṁ akusalānaṁ dhammānaṁ pahānāya vāyamitabbaṁ.\nSace panāvuso, bhikkhu paccavekkhamāno evaṁ jānāti:\n‘asaṭho khomhi amāyāvī’ti, tenāvuso, bhikkhunā teneva pītipāmojjena vihātabbaṁ ahorattānusikkhinā kusalesu dhammesu.\nPuna caparaṁ, āvuso, bhikkhunā attanāva attānaṁ evaṁ paccavekkhitabbaṁ:\n‘kiṁ nu khomhi thaddho atimānī’ti?\nSace, āvuso, bhikkhu paccavekkhamāno evaṁ jānāti:\n‘thaddho khomhi atimānī’ti, tenāvuso, bhikkhunā tesaṁyeva pāpakānaṁ akusalānaṁ dhammānaṁ pahānāya vāyamitabbaṁ.\nSace panāvuso, bhikkhu paccavekkhamāno evaṁ jānāti:\n‘atthaddho khomhi anatimānī’ti, tenāvuso, bhikkhunā teneva pītipāmojjena vihātabbaṁ ahorattānusikkhinā kusalesu dhammesu.\nPuna caparaṁ, āvuso, bhikkhunā attanāva attānaṁ evaṁ paccavekkhitabbaṁ:\n‘kiṁ nu khomhi sandiṭṭhiparāmāsī ādhānaggāhī duppaṭinissaggī’ti?\nSace, āvuso, bhikkhu paccavekkhamāno evaṁ jānāti:\n‘sandiṭṭhiparāmāsī khomhi ādhānaggāhī duppaṭinissaggī’ti, tenāvuso, bhikkhunā tesaṁyeva pāpakānaṁ akusalānaṁ dhammānaṁ pahānāya vāyamitabbaṁ.\nSace panāvuso, bhikkhu paccavekkhamāno evaṁ jānāti:\n‘asandiṭṭhiparāmāsī khomhi anādhānaggāhī suppaṭinissaggī’ti, tenāvuso, bhikkhunā teneva pītipāmojjena vihātabbaṁ ahorattānusikkhinā kusalesu dhammesu.","en":"In such a case, a mendicant should check themselves like this:\n‘Do I have corrupt wishes? Have I fallen under the sway of corrupt wishes?’\nSuppose that, upon checking, a mendicant knows that\nthey have fallen under the sway of corrupt wishes. Then they should make an effort to give up those bad, unskillful qualities.\nBut suppose that, upon checking, a mendicant knows that\nthey haven’t fallen under the sway of corrupt wishes. Then they should meditate with rapture and joy, training day and night in skillful qualities. …\nSuppose that, upon checking, a mendicant knows that\nthey are attached to their own views, holding them tight, and refusing to let go. Then they should make an effort to give up those bad, unskillful qualities.\nSuppose that, upon checking, a mendicant knows that\nthey’re not attached to their own views, holding them tight, but let them go easily. Then they should meditate with rapture and joy, training day and night in skillful qualities."}},{"id":"mn15:8","sourceIds":["mn15:8.1","mn15:8.2","mn15:8.3","mn15:8.4","mn15:8.5","mn15:8.6","mn15:8.7","mn15:8.8","mn15:8.9","mn15:8.10"],"kind":"text","text":{"pi":"Sace, āvuso, bhikkhu paccavekkhamāno sabbepime pāpake akusale dhamme appahīne attani samanupassati, tenāvuso, bhikkhunā sabbesaṁyeva imesaṁ pāpakānaṁ akusalānaṁ dhammānaṁ pahānāya vāyamitabbaṁ.\nSace panāvuso, bhikkhu paccavekkhamāno sabbepime pāpake akusale dhamme pahīne attani samanupassati, tenāvuso, bhikkhunā teneva pītipāmojjena vihātabbaṁ, ahorattānusikkhinā kusalesu dhammesu.\nSeyyathāpi, āvuso, itthī vā puriso vā, daharo yuvā maṇḍanajātiko, ādāse vā parisuddhe pariyodāte, acche vā udakapatte, sakaṁ mukhanimittaṁ paccavekkhamāno, sace tattha passati rajaṁ vā aṅgaṇaṁ vā, tasseva rajassa vā aṅgaṇassa vā pahānāya vāyamati;\nno ce tattha passati rajaṁ vā aṅgaṇaṁ vā, teneva attamano hoti:\n‘lābhā vata me, parisuddhaṁ vata me’ti.\nEvameva kho, āvuso, sace bhikkhu paccavekkhamāno sabbepime pāpake akusale dhamme appahīne attani samanupassati, tenāvuso, bhikkhunā sabbesaṁyeva imesaṁ pāpakānaṁ akusalānaṁ dhammānaṁ pahānāya vāyamitabbaṁ.\nSace panāvuso, bhikkhu paccavekkhamāno sabbepime pāpake akusale dhamme pahīne attani samanupassati, tenāvuso, bhikkhunā teneva pītipāmojjena vihātabbaṁ, ahorattānusikkhinā kusalesu dhammesū”ti.\nIdamavocāyasmā mahāmoggallāno.\nAttamanā te bhikkhū āyasmato mahāmoggallānassa bhāsitaṁ abhinandunti.\nAnumānasuttaṁ niṭṭhitaṁ pañcamaṁ.","en":"Suppose that, upon checking, a mendicant sees that they haven’t given up all these bad, unskillful qualities. Then they should make an effort to give them all up.\nBut suppose that, upon checking, a mendicant sees that they have given up all these bad, unskillful qualities. Then they should meditate with rapture and joy, training day and night in skillful qualities.\nSuppose there was a woman or man who was young, youthful, and fond of adornments, and they check their own reflection in a clean bright mirror or a clear bowl of water. If they see any dirt or blemish there, they’d try to remove it.\nBut if they don’t see any dirt or blemish there, they’re happy, thinking:\n‘How fortunate that I’m clean!’\nIn the same way, suppose that, upon checking, a mendicant sees that they haven’t given up all these bad, unskillful qualities. Then they should make an effort to give them all up.\nBut suppose that, upon checking, a mendicant sees that they have given up all these bad, unskillful qualities. Then they should meditate with rapture and joy, training day and night in skillful qualities.”\nThat is what Venerable Mahāmoggallāna said.\nSatisfied, the mendicants approved what Mahāmoggallāna said."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mn15/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}