{"id":"mn151","title":"The Purification of Alms","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mn151","title":"The Purification of Alms","units":[{"id":"mn151:0","sourceIds":["mn151:0.1","mn151:0.2"],"kind":"text","text":{"pi":"Majjhima Nikāya 151\nPiṇḍapātapārisuddhisutta","en":"Middle Discourses 151\nThe Purification of Alms"}},{"id":"mn151:1","sourceIds":["mn151:1.1","mn151:1.2","mn151:1.3"],"kind":"text","text":{"pi":"Evaṁ me sutaṁ—\nekaṁ samayaṁ bhagavā rājagahe viharati veḷuvane kalandakanivāpe.\nAtha kho āyasmā sāriputto sāyanhasamayaṁ paṭisallānā vuṭṭhito yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho āyasmantaṁ sāriputtaṁ bhagavā etadavoca:","en":"So I have heard.\nAt one time the Buddha was staying near Rājagaha in the Bamboo Grove, the squirrels’ feeding ground.\nThen in the late afternoon, Sāriputta came out of retreat and went to the Buddha. He bowed and sat down to one side. The Buddha said to him,"}},{"id":"mn151:2","sourceIds":["mn151:2.1","mn151:2.2","mn151:2.3","mn151:2.4","mn151:2.5","mn151:2.6","mn151:2.7"],"kind":"text","text":{"pi":"“Vippasannāni kho te, sāriputta, indriyāni, parisuddho chavivaṇṇo pariyodāto.\nKatamena kho tvaṁ, sāriputta, vihārena etarahi bahulaṁ viharasī”ti?\n“Suññatāvihārena kho ahaṁ, bhante, etarahi bahulaṁ viharāmī”ti.\n“Sādhu sādhu, sāriputta.\nMahāpurisavihārena kira tvaṁ, sāriputta, etarahi bahulaṁ viharasi.\nMahāpurisavihāro eso, sāriputta, yadidaṁ—\nsuññatā.","en":"“Sāriputta, your faculties are so very clear, and your complexion is pure and bright.\nWhat kind of meditation are you usually practicing these days?”\n“Sir, these days I usually practice the meditation on emptiness.”\n“Good, good, Sāriputta!\nIt seems you usually practice the meditation of a great man.\nFor emptiness is the meditation of a great man."}},{"id":"mn151:3","sourceIds":["mn151:3.1","mn151:3.2","mn151:3.3","mn151:3.4","mn151:3.5","mn151:3.6","mn151:3.7"],"kind":"text","text":{"pi":"Tasmātiha, sāriputta, bhikkhu sace ākaṅkheyya:\n‘suññatāvihārena bahulaṁ vihareyyan’ti, tena, sāriputta, bhikkhunā iti paṭisañcikkhitabbaṁ:\n‘yena cāhaṁ maggena gāmaṁ piṇḍāya pāvisiṁ, yasmiñca padese piṇḍāya acariṁ, yena ca maggena gāmato piṇḍāya paṭikkamiṁ, atthi nu kho me tattha cakkhuviññeyyesu rūpesu chando vā rāgo vā doso vā moho vā paṭighaṁ vāpi cetaso’ti?\nSace, sāriputta, bhikkhu paccavekkhamāno evaṁ jānāti:\n‘yena cāhaṁ maggena gāmaṁ piṇḍāya pāvisiṁ, yasmiñca padese piṇḍāya acariṁ, yena ca maggena gāmato piṇḍāya paṭikkamiṁ, atthi me tattha cakkhuviññeyyesu rūpesu chando vā rāgo vā doso vā moho vā paṭighaṁ vāpi cetaso’ti, tena, sāriputta, bhikkhunā tesaṁyeva pāpakānaṁ akusalānaṁ dhammānaṁ pahānāya vāyamitabbaṁ.\nSace pana, sāriputta, bhikkhu paccavekkhamāno evaṁ jānāti:\n‘yena cāhaṁ maggena gāmaṁ piṇḍāya pāvisiṁ, yasmiñca padese piṇḍāya acariṁ, yena ca maggena gāmato piṇḍāya paṭikkamiṁ, natthi me tattha cakkhuviññeyyesu rūpesu chando vā rāgo vā doso vā moho vā paṭighaṁ vāpi cetaso’ti, tena, sāriputta, bhikkhunā teneva pītipāmojjena vihātabbaṁ ahorattānusikkhinā kusalesu dhammesu.","en":"Now, a mendicant might wish:\n‘May I usually practice the meditation on emptiness.’ So they should reflect:\n‘Along the path that I went for alms, or in the place I wandered for alms, or along the path that I returned from alms, was there any desire or greed or hate or delusion or aversion in my heart for sights known by the eye?’\nSuppose that, upon checking, a mendicant knows that\nthere was such desire or greed or hate or delusion or aversion in their heart, they should make an effort to give up those unskillful qualities.\nBut suppose that, upon checking, a mendicant knows that\nthere was no such desire or greed or hate or delusion or aversion in their heart, they should meditate with rapture and joy, training day and night in skillful qualities."}},{"id":"mn151:4-8","sourceIds":["mn151:4-8.1","mn151:4-8.2","mn151:4-8.3","mn151:4-8.4","mn151:4-8.5","mn151:4-8.6","mn151:4-8.7","mn151:4-8.8","mn151:4-8.9","mn151:4-8.10"],"kind":"text","text":{"pi":"Puna caparaṁ, sāriputta, bhikkhunā iti paṭisañcikkhitabbaṁ:\n‘yena cāhaṁ maggena gāmaṁ piṇḍāya pāvisiṁ, yasmiñca padese piṇḍāya acariṁ, yena ca maggena gāmato piṇḍāya paṭikkamiṁ, atthi nu kho me tattha sotaviññeyyesu saddesu …pe…\nghānaviññeyyesu gandhesu …\njivhāviññeyyesu rasesu …\nkāyaviññeyyesu phoṭṭhabbesu …\nmanoviññeyyesu dhammesu chando vā rāgo vā doso vā moho vā paṭighaṁ vāpi cetaso’ti?\nSace, sāriputta, bhikkhu paccavekkhamāno evaṁ jānāti:\n‘yena cāhaṁ maggena gāmaṁ piṇḍāya pāvisiṁ, yasmiñca padese piṇḍāya acariṁ, yena ca maggena gāmato piṇḍāya paṭikkamiṁ, atthi me tattha manoviññeyyesu dhammesu chando vā rāgo vā doso vā moho vā paṭighaṁ vāpi cetaso’ti, tena, sāriputta, bhikkhunā tesaṁyeva pāpakānaṁ akusalānaṁ dhammānaṁ pahānāya vāyamitabbaṁ.\nSace pana, sāriputta, bhikkhu paccavekkhamāno evaṁ jānāti:\n‘yena cāhaṁ maggena gāmaṁ piṇḍāya pāvisiṁ, yasmiñca padese piṇḍāya acariṁ, yena ca maggena gāmato piṇḍāya paṭikkamiṁ, natthi me tattha manoviññeyyesu dhammesu chando vā rāgo vā doso vā moho vā paṭighaṁ vāpi cetaso’ti, tena, sāriputta, bhikkhunā teneva pītipāmojjena vihātabbaṁ ahorattānusikkhinā kusalesu dhammesu.","en":"Furthermore, a mendicant should reflect:\n‘Along the path that I went for alms, or in the place I wandered for alms, or along the path that I returned from alms, was there any desire or greed or hate or delusion or repulsion in my heart for sounds known by the ear …\nsmells known by the nose …\ntastes known by the tongue …\ntouches known by the body …\nideas known by the mind?’\nSuppose that, upon checking, a mendicant knows that\nthere was such desire or greed or hate or delusion or aversion in their heart, they should make an effort to give up those unskillful qualities.\nBut suppose that, upon checking, a mendicant knows that\nthere was no such desire or greed or hate or delusion or aversion in their heart, they should meditate with rapture and joy, training day and night in skillful qualities."}},{"id":"mn151:9","sourceIds":["mn151:9.1","mn151:9.2","mn151:9.3","mn151:9.4","mn151:9.5","mn151:9.6"],"kind":"text","text":{"pi":"Puna caparaṁ, sāriputta, bhikkhunā iti paṭisañcikkhitabbaṁ:\n‘pahīnā nu kho me pañca kāmaguṇā’ti?\nSace, sāriputta, bhikkhu paccavekkhamāno evaṁ jānāti:\n‘appahīnā kho me pañca kāmaguṇā’ti, tena, sāriputta, bhikkhunā pañcannaṁ kāmaguṇānaṁ pahānāya vāyamitabbaṁ.\nSace pana, sāriputta, bhikkhu paccavekkhamāno evaṁ jānāti:\n‘pahīnā kho me pañca kāmaguṇā’ti, tena, sāriputta, bhikkhunā teneva pītipāmojjena vihātabbaṁ ahorattānusikkhinā kusalesu dhammesu.","en":"Furthermore, a mendicant should reflect:\n‘Have I given up the five kinds of sensual stimulation?’\nSuppose that, upon checking, a mendicant knows that\nthey have not given them up, they should make an effort to do so.\nBut suppose that, upon checking, a mendicant knows that\nthey have given them up, they should meditate with rapture and joy, training day and night in skillful qualities."}},{"id":"mn151:10","sourceIds":["mn151:10.1","mn151:10.2","mn151:10.3","mn151:10.4","mn151:10.5","mn151:10.6"],"kind":"text","text":{"pi":"Puna caparaṁ, sāriputta, bhikkhunā iti paṭisañcikkhitabbaṁ:\n‘pahīnā nu kho me pañca nīvaraṇā’ti?\nSace, sāriputta, bhikkhu paccavekkhamāno evaṁ jānāti:\n‘appahīnā kho me pañca nīvaraṇā’ti, tena, sāriputta, bhikkhunā pañcannaṁ nīvaraṇānaṁ pahānāya vāyamitabbaṁ.\nSace pana, sāriputta, bhikkhu paccavekkhamāno evaṁ jānāti:\n‘pahīnā kho me pañca nīvaraṇā’ti, tena, sāriputta, bhikkhunā teneva pītipāmojjena vihātabbaṁ ahorattānusikkhinā kusalesu dhammesu.","en":"Furthermore, a mendicant should reflect:\n‘Have I given up the five hindrances?’\nSuppose that, upon checking, a mendicant knows that\nthey have not given them up, they should make an effort to do so.\nBut suppose that, upon checking, a mendicant knows that\nthey have given them up, they should meditate with rapture and joy, training day and night in skillful qualities."}},{"id":"mn151:11","sourceIds":["mn151:11.1","mn151:11.2","mn151:11.3","mn151:11.4","mn151:11.5","mn151:11.6"],"kind":"text","text":{"pi":"Puna caparaṁ, sāriputta, bhikkhunā iti paṭisañcikkhitabbaṁ:\n‘pariññātā nu kho me pañcupādānakkhandhā’ti?\nSace, sāriputta, bhikkhu paccavekkhamāno evaṁ jānāti:\n‘apariññātā kho me pañcupādānakkhandhā’ti, tena, sāriputta, bhikkhunā pañcannaṁ upādānakkhandhānaṁ pariññāya vāyamitabbaṁ.\nSace pana, sāriputta, bhikkhu paccavekkhamāno evaṁ jānāti:\n‘pariññātā kho me pañcupādānakkhandhā’ti, tena, sāriputta, bhikkhunā teneva pītipāmojjena vihātabbaṁ ahorattānusikkhinā kusalesu dhammesu.","en":"Furthermore, a mendicant should reflect:\n‘Have I completely understood the five grasping aggregates?’\nSuppose that, upon checking, a mendicant knows that\nthey have not completely understood them, they should make an effort to do so.\nBut suppose that, upon checking, a mendicant knows that\nthey have completely understood them, they should meditate with rapture and joy, training day and night in skillful qualities."}},{"id":"mn151:12","sourceIds":["mn151:12.1","mn151:12.2","mn151:12.3","mn151:12.4","mn151:12.5","mn151:12.6"],"kind":"text","text":{"pi":"Puna caparaṁ, sāriputta, bhikkhunā iti paṭisañcikkhitabbaṁ:\n‘bhāvitā nu kho me cattāro satipaṭṭhānā’ti?\nSace, sāriputta, bhikkhu paccavekkhamāno evaṁ jānāti:\n‘abhāvitā kho me cattāro satipaṭṭhānā’ti, tena, sāriputta, bhikkhunā catunnaṁ satipaṭṭhānānaṁ bhāvanāya vāyamitabbaṁ.\nSace pana, sāriputta, bhikkhu paccavekkhamāno evaṁ jānāti:\n‘bhāvitā kho me cattāro satipaṭṭhānā’ti, tena, sāriputta, bhikkhunā teneva pītipāmojjena vihātabbaṁ ahorattānusikkhinā kusalesu dhammesu.","en":"Furthermore, a mendicant should reflect:\n‘Have I developed the four kinds of mindfulness meditation?’\nSuppose that, upon checking, a mendicant knows that\nthey haven’t developed them, they should make an effort to do so.\nBut suppose that, upon checking, a mendicant knows that\nthey have developed them, they should meditate with rapture and joy, training day and night in skillful qualities."}},{"id":"mn151:13","sourceIds":["mn151:13.1","mn151:13.2","mn151:13.3","mn151:13.4","mn151:13.5","mn151:13.6"],"kind":"text","text":{"pi":"Puna caparaṁ, sāriputta, bhikkhunā iti paṭisañcikkhitabbaṁ:\n‘bhāvitā nu kho me cattāro sammappadhānā’ti?\nSace, sāriputta, bhikkhu paccavekkhamāno evaṁ jānāti:\n‘abhāvitā kho me cattāro sammappadhānā’ti, tena, sāriputta, bhikkhunā catunnaṁ sammappadhānānaṁ bhāvanāya vāyamitabbaṁ.\nSace pana, sāriputta, bhikkhu paccavekkhamāno evaṁ jānāti:\n‘bhāvitā kho me cattāro sammappadhānā’ti, tena, sāriputta, bhikkhunā teneva pītipāmojjena vihātabbaṁ ahorattānusikkhinā kusalesu dhammesu.","en":"Furthermore, a mendicant should reflect:\n‘Have I developed the four right efforts …"}},{"id":"mn151:14","sourceIds":["mn151:14.1","mn151:14.2","mn151:14.3","mn151:14.4","mn151:14.5","mn151:14.6"],"kind":"text","text":{"pi":"Puna caparaṁ, sāriputta, bhikkhunā iti paṭisañcikkhitabbaṁ:\n‘bhāvitā nu kho me cattāro iddhipādā’ti?\nSace, sāriputta, bhikkhu paccavekkhamāno evaṁ jānāti:\n‘abhāvitā kho me cattāro iddhipādā’ti, tena, sāriputta, bhikkhunā catunnaṁ iddhipādānaṁ bhāvanāya vāyamitabbaṁ.\nSace pana, sāriputta, bhikkhu paccavekkhamāno evaṁ jānāti:\n‘bhāvitā kho me cattāro iddhipādā’ti, tena, sāriputta, bhikkhunā teneva pītipāmojjena vihātabbaṁ ahorattānusikkhinā kusalesu dhammesu.","en":"the four bases of psychic power …"}},{"id":"mn151:15","sourceIds":["mn151:15.1","mn151:15.2","mn151:15.3","mn151:15.4","mn151:15.5","mn151:15.6"],"kind":"text","text":{"pi":"Puna caparaṁ, sāriputta, bhikkhunā iti paṭisañcikkhitabbaṁ:\n‘bhāvitāni nu kho me pañcindriyānī’ti?\nSace, sāriputta, bhikkhu paccavekkhamāno evaṁ jānāti:\n‘abhāvitāni kho me pañcindriyānī’ti, tena, sāriputta, bhikkhunā pañcannaṁ indriyānaṁ bhāvanāya vāyamitabbaṁ.\nSace pana, sāriputta, bhikkhu paccavekkhamāno evaṁ jānāti:\n‘bhāvitāni kho me pañcindriyānī’ti, tena, sāriputta, bhikkhunā teneva pītipāmojjena vihātabbaṁ ahorattānusikkhinā kusalesu dhammesu.","en":"the five faculties …"}},{"id":"mn151:16","sourceIds":["mn151:16.1","mn151:16.2","mn151:16.3","mn151:16.4","mn151:16.5","mn151:16.6"],"kind":"text","text":{"pi":"Puna caparaṁ, sāriputta, bhikkhunā iti paṭisañcikkhitabbaṁ:\n‘bhāvitāni nu kho me pañca balānī’ti?\nSace, sāriputta, bhikkhu paccavekkhamāno evaṁ jānāti:\n‘abhāvitāni kho me pañca balānī’ti, tena, sāriputta, bhikkhunā pañcannaṁ balānaṁ bhāvanāya vāyamitabbaṁ.\nSace pana, sāriputta, bhikkhu paccavekkhamāno evaṁ jānāti:\n‘bhāvitāni kho me pañca balānī’ti, tena, sāriputta, bhikkhunā teneva pītipāmojjena vihātabbaṁ ahorattānusikkhinā kusalesu dhammesu.","en":"the five powers …"}},{"id":"mn151:17","sourceIds":["mn151:17.1","mn151:17.2","mn151:17.3","mn151:17.4","mn151:17.5","mn151:17.6"],"kind":"text","text":{"pi":"Puna caparaṁ, sāriputta, bhikkhunā iti paṭisañcikkhitabbaṁ:\n‘bhāvitā nu kho me satta bojjhaṅgā’ti?\nSace, sāriputta, bhikkhu paccavekkhamāno evaṁ jānāti:\n‘abhāvitā kho me satta bojjhaṅgā’ti, tena, sāriputta, bhikkhunā sattannaṁ bojjhaṅgānaṁ bhāvanāya vāyamitabbaṁ.\nSace pana, sāriputta, bhikkhu paccavekkhamāno evaṁ jānāti:\n‘bhāvitā kho me satta bojjhaṅgā’ti, tena, sāriputta, bhikkhunā teneva pītipāmojjena vihātabbaṁ ahorattānusikkhinā kusalesu dhammesu.","en":"the seven awakening factors …"}},{"id":"mn151:18","sourceIds":["mn151:18.1","mn151:18.2","mn151:18.3","mn151:18.4","mn151:18.5","mn151:18.6"],"kind":"text","text":{"pi":"Puna caparaṁ, sāriputta, bhikkhunā iti paṭisañcikkhitabbaṁ:\n‘bhāvito nu kho me ariyo aṭṭhaṅgiko maggo’ti?\nSace, sāriputta, bhikkhu paccavekkhamāno evaṁ jānāti:\n‘abhāvito kho me ariyo aṭṭhaṅgiko maggo’ti, tena, sāriputta, bhikkhunā ariyassa aṭṭhaṅgikassa maggassa bhāvanāya vāyamitabbaṁ.\nSace pana, sāriputta, bhikkhu paccavekkhamāno evaṁ jānāti:\n‘bhāvito kho me ariyo aṭṭhaṅgiko maggo’ti, tena, sāriputta, bhikkhunā teneva pītipāmojjena vihātabbaṁ ahorattānusikkhinā kusalesu dhammesu.","en":"the noble eightfold path?’\nSuppose that, upon checking, a mendicant knows that\nthey haven’t developed it, they should make an effort to do so.\nBut suppose that, upon checking, a mendicant knows that\nthey have developed it, they should meditate with rapture and joy, training day and night in skillful qualities."}},{"id":"mn151:19","sourceIds":["mn151:19.1","mn151:19.2","mn151:19.3","mn151:19.4","mn151:19.5","mn151:19.6"],"kind":"text","text":{"pi":"Puna caparaṁ, sāriputta, bhikkhunā iti paṭisañcikkhitabbaṁ:\n‘bhāvitā nu kho me samatho ca vipassanā cā’ti?\nSace, sāriputta, bhikkhu paccavekkhamāno evaṁ jānāti:\n‘abhāvitā kho me samatho ca vipassanā cā’ti, tena, sāriputta, bhikkhunā samathavipassanānaṁ bhāvanāya vāyamitabbaṁ.\nSace pana, sāriputta, bhikkhu paccavekkhamāno evaṁ jānāti:\n‘bhāvitā kho me samatho ca vipassanā cā’ti, tena, sāriputta, bhikkhunā teneva pītipāmojjena vihātabbaṁ ahorattānusikkhinā kusalesu dhammesu.","en":"Furthermore, a mendicant should reflect:\n‘Have I developed serenity and discernment?’\nSuppose that, upon checking, a mendicant knows that\nthey haven’t developed them, they should make an effort to do so.\nBut suppose that, upon checking, a mendicant knows that\nthey have developed them, they should meditate with rapture and joy, training day and night in skillful qualities."}},{"id":"mn151:20","sourceIds":["mn151:20.1","mn151:20.2","mn151:20.3","mn151:20.4","mn151:20.5","mn151:20.6"],"kind":"text","text":{"pi":"Puna caparaṁ, sāriputta, bhikkhunā iti paṭisañcikkhitabbaṁ:\n‘sacchikatā nu kho me vijjā ca vimutti cā’ti?\nSace, sāriputta, bhikkhu paccavekkhamāno evaṁ jānāti:\n‘asacchikatā kho me vijjā ca vimutti cā’ti, tena, sāriputta, bhikkhunā vijjāya vimuttiyā sacchikiriyāya vāyamitabbaṁ.\nSace pana, sāriputta, bhikkhu paccavekkhamāno evaṁ jānāti:\n‘sacchikatā kho me vijjā ca vimutti cā’ti, tena, sāriputta, bhikkhunā teneva pītipāmojjena vihātabbaṁ ahorattānusikkhinā kusalesu dhammesu.","en":"Furthermore, a mendicant should reflect:\n‘Have I realized knowledge and freedom?’\nSuppose that, upon checking, a mendicant knows that\nthey haven’t realized them, they should make an effort to do so.\nBut suppose that, upon checking, a mendicant knows that\nthey have realized them, they should meditate with rapture and joy, training day and night in skillful qualities."}},{"id":"mn151:21","sourceIds":["mn151:21.1","mn151:21.2","mn151:21.3","mn151:21.4","mn151:21.5","mn151:21.6","mn151:21.7","mn151:21.8"],"kind":"text","text":{"pi":"Ye hi keci, sāriputta, atītamaddhānaṁ samaṇā vā brāhmaṇā vā piṇḍapātaṁ parisodhesuṁ, sabbe te evameva paccavekkhitvā paccavekkhitvā piṇḍapātaṁ parisodhesuṁ.\nYepi hi keci, sāriputta, anāgatamaddhānaṁ samaṇā vā brāhmaṇā vā piṇḍapātaṁ parisodhessanti, sabbe te evameva paccavekkhitvā paccavekkhitvā piṇḍapātaṁ parisodhessanti.\nYepi hi keci, sāriputta, etarahi samaṇā vā brāhmaṇā vā piṇḍapātaṁ parisodhenti, sabbe te evameva paccavekkhitvā paccavekkhitvā piṇḍapātaṁ parisodhenti.\nTasmātiha, sāriputta, ‘paccavekkhitvā paccavekkhitvā piṇḍapātaṁ parisodhessāmā’ti—\nevañhi vo, sāriputta, sikkhitabban”ti.\nIdamavoca bhagavā.\nAttamano āyasmā sāriputto bhagavato bhāsitaṁ abhinandīti.\nPiṇḍapātapārisuddhisuttaṁ niṭṭhitaṁ navamaṁ.","en":"Whether in the past, future, or present, all those who purify their almsfood do so by continually checking in this way.\nSo, Sāriputta, you should all train like this: ‘We shall purify our almsfood by continually checking.’”\nThat is what the Buddha said.\nSatisfied, Venerable Sāriputta approved what the Buddha said."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mn151/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}