{"id":"mn18","title":"The Honey-Cake","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mn18","title":"The Honey-Cake","units":[{"id":"mn18:0","sourceIds":["mn18:0.1","mn18:0.2"],"kind":"text","text":{"pi":"Majjhima Nikāya 18\nMadhupiṇḍikasutta","en":"Middle Discourses 18\nThe Honey-Cake"}},{"id":"mn18:1","sourceIds":["mn18:1.1","mn18:1.2"],"kind":"text","text":{"pi":"Evaṁ me sutaṁ—\nekaṁ samayaṁ bhagavā sakkesu viharati kapilavatthusmiṁ nigrodhārāme.","en":"So I have heard.\nAt one time the Buddha was staying in the land of the Sakyans, near Kapilavatthu in the Banyan Tree Monastery."}},{"id":"mn18:2","sourceIds":["mn18:2.1","mn18:2.2","mn18:2.3"],"kind":"text","text":{"pi":"Atha kho bhagavā pubbaṇhasamayaṁ nivāsetvā pattacīvaramādāya kapilavatthuṁ piṇḍāya pāvisi.\nKapilavatthusmiṁ piṇḍāya caritvā pacchābhattaṁ piṇḍapātapaṭikkanto yena mahāvanaṁ tenupasaṅkami divāvihārāya.\nMahāvanaṁ ajjhogāhetvā beluvalaṭṭhikāya mūle divāvihāraṁ nisīdi.","en":"Then the Buddha robed up in the morning and, taking his bowl and robe, entered Kapilavatthu for alms.\nHe wandered for alms in Kapilavatthu. After the meal, on his return from almsround, he went to the Great Wood for the day’s meditation,\nplunged deep into it, and sat at the root of a young wood-apple tree to meditate."}},{"id":"mn18:3","sourceIds":["mn18:3.1","mn18:3.2","mn18:3.3","mn18:3.4"],"kind":"text","text":{"pi":"Daṇḍapāṇipi kho sakko jaṅghāvihāraṁ anucaṅkamamāno anuvicaramāno yena mahāvanaṁ tenupasaṅkami.\nMahāvanaṁ ajjhogāhetvā yena beluvalaṭṭhikā yena bhagavā tenupasaṅkami; upasaṅkamitvā bhagavatā saddhiṁ sammodi.\nSammodanīyaṁ kathaṁ sāraṇīyaṁ vītisāretvā daṇḍamolubbha ekamantaṁ aṭṭhāsi. Ekamantaṁ ṭhito kho daṇḍapāṇi sakko bhagavantaṁ etadavoca:\n“kiṁvādī samaṇo kimakkhāyī”ti?","en":"Daṇḍapāṇi the Sakyan, while going for a walk,\nplunged deep into the Great Wood. He approached the Buddha and exchanged greetings with him.\nWhen the greetings and polite conversation were over, he stood to one side leaning on his staff, and said to the Buddha,\n“What is the ascetic’s doctrine? What does he assert?”"}},{"id":"mn18:4","sourceIds":["mn18:4.1","mn18:4.2"],"kind":"text","text":{"pi":"“Yathāvādī kho, āvuso, sadevake loke samārake sabrahmake sassamaṇabrāhmaṇiyā pajāya sadevamanussāya na kenaci loke viggayha tiṭṭhati, yathā ca pana kāmehi visaṁyuttaṁ viharantaṁ taṁ brāhmaṇaṁ akathaṅkathiṁ chinnakukkuccaṁ bhavābhave vītataṇhaṁ saññā nānusenti—\nevaṁvādī kho ahaṁ, āvuso, evamakkhāyī”ti.","en":"“Respectable sir, my doctrine is such that one does not argue with anyone in this world with its gods, Māras, and divinities, this population with its ascetics and brahmins, its gods and humans. And it is such that perceptions do not underlie the brahmin who lives detached from sensual pleasures, without indecision, stripped of worry, and rid of craving for rebirth in this or that state.\nThat is my doctrine, and that is what I assert.”"}},{"id":"mn18:5","sourceIds":["mn18:5.1"],"kind":"text","text":{"pi":"Evaṁ vutte, daṇḍapāṇi sakko sīsaṁ okampetvā, jivhaṁ nillāḷetvā, tivisākhaṁ nalāṭikaṁ nalāṭe vuṭṭhāpetvā daṇḍamolubbha pakkāmi.","en":"When he had spoken, Daṇḍapāṇi shook his head, waggled his tongue, raised his eyebrows until his brow puckered in three furrows, and left leaning on his staff."}},{"id":"mn18:6","sourceIds":["mn18:6.1","mn18:6.2","mn18:6.3","mn18:6.4","mn18:6.5","mn18:6.6","mn18:6.7","mn18:6.8","mn18:6.9","mn18:6.10","mn18:6.11","mn18:6.12","mn18:6.13","mn18:6.14"],"kind":"text","text":{"pi":"Atha kho bhagavā sāyanhasamayaṁ paṭisallānā vuṭṭhito yena nigrodhārāmo tenupasaṅkami; upasaṅkamitvā paññatte āsane nisīdi.\nNisajja kho bhagavā bhikkhū āmantesi:\n“idhāhaṁ, bhikkhave, pubbaṇhasamayaṁ nivāsetvā pattacīvaramādāya kapilavatthuṁ piṇḍāya pāvisiṁ.\nKapilavatthusmiṁ piṇḍāya caritvā pacchābhattaṁ piṇḍapātapaṭikkanto yena mahāvanaṁ tenupasaṅkamiṁ divāvihārāya.\nMahāvanaṁ ajjhogāhetvā beluvalaṭṭhikāya mūle divāvihāraṁ nisīdiṁ.\nDaṇḍapāṇipi kho, bhikkhave, sakko jaṅghāvihāraṁ anucaṅkamamāno anuvicaramāno yena mahāvanaṁ tenupasaṅkami.\nMahāvanaṁ ajjhogāhetvā yena beluvalaṭṭhikā yenāhaṁ tenupasaṅkami; upasaṅkamitvā mayā saddhiṁ sammodi.\nSammodanīyaṁ kathaṁ sāraṇīyaṁ vītisāretvā daṇḍamolubbha ekamantaṁ aṭṭhāsi. Ekamantaṁ ṭhito kho, bhikkhave, daṇḍapāṇi sakko maṁ etadavoca:\n‘kiṁvādī samaṇo kimakkhāyī’ti?\nEvaṁ vutte, ahaṁ, bhikkhave, daṇḍapāṇiṁ sakkaṁ etadavocaṁ:\n‘yathāvādī kho, āvuso, sadevake loke samārake sabrahmake sassamaṇabrāhmaṇiyā pajāya sadevamanussāya na kenaci loke viggayha tiṭṭhati, yathā ca pana kāmehi visaṁyuttaṁ viharantaṁ taṁ brāhmaṇaṁ akathaṅkathiṁ chinnakukkuccaṁ bhavābhave vītataṇhaṁ saññā nānusenti—\nevaṁvādī kho ahaṁ, āvuso, evamakkhāyī’ti.\nEvaṁ vutte, bhikkhave, daṇḍapāṇi sakko sīsaṁ okampetvā, jivhaṁ nillāḷetvā, tivisākhaṁ nalāṭikaṁ nalāṭe vuṭṭhāpetvā daṇḍamolubbha pakkāmī”ti.\nEvaṁ vutte, aññataro bhikkhu bhagavantaṁ etadavoca:","en":"Then in the late afternoon, the Buddha came out of retreat and went to the Banyan Tree Monastery, sat down on the seat spread out,\nand told the mendicants what had happened.\nWhen he had spoken, one of the mendicants said to him,"}},{"id":"mn18:7","sourceIds":["mn18:7.1","mn18:7.2"],"kind":"text","text":{"pi":"“kiṁvādī pana, bhante, bhagavā sadevake loke samārake sabrahmake sassamaṇabrāhmaṇiyā pajāya sadevamanussāya na kenaci loke viggayha tiṭṭhati?\nKathañca pana, bhante, bhagavantaṁ kāmehi visaṁyuttaṁ viharantaṁ taṁ brāhmaṇaṁ akathaṅkathiṁ chinnakukkuccaṁ bhavābhave vītataṇhaṁ saññā nānusentī”ti?","en":"“But sir, asserting what doctrine does the Buddha not argue with anyone in this world with its gods, Māras, and divinities, this population with its ascetics and brahmins, its gods and humans?\nAnd how is it that perceptions do not underlie the Buddha, the brahmin who lives detached from sensual pleasures, without indecision, stripped of worry, and rid of craving for rebirth in this or that state?”"}},{"id":"mn18:8","sourceIds":["mn18:8.1","mn18:8.2","mn18:8.3","mn18:8.4"],"kind":"text","text":{"pi":"“Yatonidānaṁ, bhikkhu, purisaṁ papañcasaññāsaṅkhā samudācaranti.\nEttha ce natthi abhinanditabbaṁ abhivaditabbaṁ ajjhositabbaṁ.\nEsevanto rāgānusayānaṁ, esevanto paṭighānusayānaṁ, esevanto diṭṭhānusayānaṁ, esevanto vicikicchānusayānaṁ, esevanto mānānusayānaṁ, esevanto bhavarāgānusayānaṁ, esevanto avijjānusayānaṁ, esevanto daṇḍādānasatthādānakalahaviggahavivādatuvaṁtuvaṁpesuññamusāvādānaṁ.\nEtthete pāpakā akusalā dhammā aparisesā nirujjhantī”ti.","en":"“Mendicant, judgments driven by proliferating perceptions beset a person.\nIf they don’t find anything worth approving, welcoming, or getting attached to in the source from which these arise,\njust this is the end of the underlying tendencies to desire, aversion, views, doubt, conceit, the desire for continued existence, and ignorance. This is the end of taking up the rod and the sword, the end of quarrels, arguments, and disputes, of accusations, backbiting, and lies.\nThis is where these bad, unskillful qualities cease without remainder.”"}},{"id":"mn18:9","sourceIds":["mn18:9.1","mn18:9.2"],"kind":"text","text":{"pi":"Idamavoca bhagavā.\nIdaṁ vatvāna sugato uṭṭhāyāsanā vihāraṁ pāvisi.","en":"That is what the Buddha said.\nWhen he had spoken, the Holy One rose from his seat and entered his dwelling."}},{"id":"mn18:10","sourceIds":["mn18:10.1","mn18:10.2","mn18:10.3","mn18:10.4","mn18:10.5","mn18:10.6","mn18:10.7","mn18:10.8","mn18:10.9","mn18:10.10","mn18:10.11"],"kind":"text","text":{"pi":"Atha kho tesaṁ bhikkhūnaṁ acirapakkantassa bhagavato etadahosi:\n“idaṁ kho no, āvuso, bhagavā saṅkhittena uddesaṁ uddisitvā, vitthārena atthaṁ avibhajitvā, uṭṭhāyāsanā vihāraṁ paviṭṭho:\n‘yatonidānaṁ, bhikkhu, purisaṁ papañcasaññāsaṅkhā samudācaranti.\nEttha ce natthi abhinanditabbaṁ abhivaditabbaṁ ajjhositabbaṁ.\nEsevanto rāgānusayānaṁ …pe…\netthete pāpakā akusalā dhammā aparisesā nirujjhantī’ti.\nKo nu kho imassa bhagavatā saṅkhittena uddesassa uddiṭṭhassa vitthārena atthaṁ avibhattassa vitthārena atthaṁ vibhajeyyā”ti?\nAtha kho tesaṁ bhikkhūnaṁ etadahosi:\n“ayaṁ kho āyasmā mahākaccāno satthu ceva saṁvaṇṇito sambhāvito ca viññūnaṁ sabrahmacārīnaṁ.\nPahoti cāyasmā mahākaccāno imassa bhagavatā saṅkhittena uddesassa uddiṭṭhassa vitthārena atthaṁ avibhattassa vitthārena atthaṁ vibhajituṁ.\nYannūna mayaṁ yenāyasmā mahākaccāno tenupasaṅkameyyāma; upasaṅkamitvā āyasmantaṁ mahākaccānaṁ etamatthaṁ paṭipuccheyyāmā”ti.","en":"Soon after the Buddha left, those mendicants considered,\n“The Buddha gave this brief summary recital, then entered his dwelling without explaining the meaning in detail.\nWho can explain in detail the meaning of this brief summary recital given by the Buddha?”\nThen those mendicants thought,\n“This Venerable Mahākaccāna is praised by the Buddha and esteemed by his sensible spiritual companions.\nHe is capable of explaining in detail the meaning of this brief summary recital given by the Buddha.\nLet’s go to him, and ask him about this matter.”"}},{"id":"mn18:11","sourceIds":["mn18:11.1","mn18:11.2","mn18:11.3","mn18:11.4","mn18:11.5","mn18:11.6","mn18:11.7","mn18:11.8","mn18:11.9","mn18:11.10","mn18:11.11","mn18:11.12","mn18:11.13","mn18:11.14","mn18:11.15","mn18:11.16","mn18:11.17","mn18:11.18"],"kind":"text","text":{"pi":"Atha kho te bhikkhū yenāyasmā mahākaccāno tenupasaṅkamiṁsu; upasaṅkamitvā āyasmatā mahākaccānena saddhiṁ sammodiṁsu.\nSammodanīyaṁ kathaṁ sāraṇīyaṁ vītisāretvā ekamantaṁ nisīdiṁsu. Ekamantaṁ nisinnā kho te bhikkhū āyasmantaṁ mahākaccānaṁ etadavocuṁ:\n“idaṁ kho no, āvuso kaccāna, bhagavā saṅkhittena uddesaṁ uddisitvā vitthārena atthaṁ avibhajitvā uṭṭhāyāsanā vihāraṁ paviṭṭho:\n‘yatonidānaṁ, bhikkhu, purisaṁ papañcasaññāsaṅkhā samudācaranti.\nEttha ce natthi abhinanditabbaṁ abhivaditabbaṁ ajjhositabbaṁ.\nEsevanto rāgānusayānaṁ …pe…\netthete pāpakā akusalā dhammā aparisesā nirujjhantī’ti.\nTesaṁ no, āvuso kaccāna, amhākaṁ acirapakkantassa bhagavato etadahosi:\n‘idaṁ kho no, āvuso, bhagavā saṅkhittena uddesaṁ uddisitvā vitthārena atthaṁ avibhajitvā uṭṭhāyāsanā vihāraṁ paviṭṭho:\n“yatonidānaṁ, bhikkhu, purisaṁ papañcasaññāsaṅkhā samudācaranti.\nEttha ce natthi abhinanditabbaṁ abhivaditabbaṁ ajjhositabbaṁ.\nEsevanto rāgānusayānaṁ …pe…\netthete pāpakā akusalā dhammā aparisesā nirujjhantī”’ti.\nKo nu kho imassa bhagavatā saṅkhittena uddesassa uddiṭṭhassa vitthārena atthaṁ avibhattassa vitthārena atthaṁ vibhajeyyāti?\nTesaṁ no, āvuso kaccāna, amhākaṁ etadahosi:\n‘ayaṁ kho āyasmā mahākaccāno satthu ceva saṁvaṇṇito sambhāvito ca viññūnaṁ sabrahmacārīnaṁ, pahoti cāyasmā mahākaccāno imassa bhagavatā saṅkhittena uddesassa uddiṭṭhassa vitthārena atthaṁ avibhattassa vitthārena atthaṁ vibhajituṁ.\nYannūna mayaṁ yenāyasmā mahākaccāno tenupasaṅkameyyāma; upasaṅkamitvā āyasmantaṁ mahākaccānaṁ etamatthaṁ paṭipuccheyyāmā’ti.\nVibhajatāyasmā mahākaccāno”ti.","en":"Then those mendicants went to Mahākaccāna, and exchanged greetings with him.\nWhen the greetings and polite conversation were over, they sat down to one side. They told him what had happened, and said:\n“May Venerable Mahākaccāna please explain this.”"}},{"id":"mn18:12","sourceIds":["mn18:12.1","mn18:12.2","mn18:12.3","mn18:12.4","mn18:12.5"],"kind":"text","text":{"pi":"“Seyyathāpi, āvuso, puriso sāratthiko sāragavesī sārapariyesanaṁ caramāno mahato rukkhassa tiṭṭhato sāravato atikkammeva mūlaṁ, atikkamma khandhaṁ, sākhāpalāse sāraṁ pariyesitabbaṁ maññeyya;\nevaṁsampadamidaṁ āyasmantānaṁ satthari sammukhībhūte, taṁ bhagavantaṁ atisitvā, amhe etamatthaṁ paṭipucchitabbaṁ maññatha.\nSo hāvuso, bhagavā jānaṁ jānāti, passaṁ passati, cakkhubhūto ñāṇabhūto dhammabhūto brahmabhūto, vattā pavattā, atthassa ninnetā, amatassa dātā, dhammassāmī tathāgato.\nSo ceva panetassa kālo ahosi, yaṁ bhagavantaṁyeva etamatthaṁ paṭipuccheyyātha.\nYathā vo bhagavā byākareyya tathā naṁ dhāreyyāthā”ti.","en":"“Reverends, suppose there was a person in need of heartwood. And while wandering in search of heartwood he’d come across a large tree standing with heartwood. But he’d pass over the roots and trunk, imagining that the heartwood should be sought in the branches and leaves.\nSuch is the consequence for the venerables. Though you were face to face with the Buddha, you bypassed him, imagining that you should ask me about this matter.\nFor he is the Buddha, the one who knows and sees. He is vision, he is knowledge, he is the manifestation of principle, he is the manifestation of divinity. He is the preacher, the proclaimer, the elucidator of meaning, the bestower of freedom from death, the lord of truth, the Realized One.\nThat was the time to approach the Buddha and ask about this matter.\nYou should have remembered it in line with the Buddha’s answer.”"}},{"id":"mn18:13","sourceIds":["mn18:13.1","mn18:13.2","mn18:13.3","mn18:13.4","mn18:13.5","mn18:13.6"],"kind":"text","text":{"pi":"“Addhāvuso kaccāna, bhagavā jānaṁ jānāti, passaṁ passati, cakkhubhūto ñāṇabhūto dhammabhūto brahmabhūto, vattā pavattā, atthassa ninnetā, amatassa dātā, dhammassāmī tathāgato.\nSo ceva panetassa kālo ahosi, yaṁ bhagavantaṁyeva etamatthaṁ paṭipuccheyyāma.\nYathā no bhagavā byākareyya tathā naṁ dhāreyyāma.\nApi cāyasmā mahākaccāno satthu ceva saṁvaṇṇito sambhāvito ca viññūnaṁ sabrahmacārīnaṁ,\npahoti cāyasmā mahākaccāno imassa bhagavatā saṅkhittena uddesassa uddiṭṭhassa vitthārena atthaṁ avibhattassa vitthārena atthaṁ vibhajituṁ.\nVibhajatāyasmā mahākaccāno agaruṁ katvā”ti.","en":"“Certainly he is the Buddha, the one who knows and sees. He is vision, he is knowledge, he is the manifestation of principle, he is the manifestation of divinity. He is the preacher, the proclaimer, the elucidator of meaning, the bestower of freedom from death, the lord of truth, the Realized One.\nThat was the time to approach the Buddha and ask about this matter.\nWe should have remembered it in line with the Buddha’s answer.\nStill, Mahākaccāna is praised by the Buddha and esteemed by his sensible spiritual companions.\nYou are capable of explaining in detail the meaning of this brief summary recital given by the Buddha.\nPlease explain this, if it’s no trouble.”"}},{"id":"mn18:14","sourceIds":["mn18:14.1","mn18:14.2","mn18:14.3"],"kind":"text","text":{"pi":"“Tena hāvuso, suṇātha, sādhukaṁ manasikarotha, bhāsissāmī”ti.\n“Evamāvuso”ti kho te bhikkhū āyasmato mahākaccānassa paccassosuṁ.\nĀyasmā mahākaccāno etadavoca:","en":"“Well then, reverends, listen and apply your mind well, I will speak.”\n“Yes, reverend,” they replied.\nVenerable Mahākaccāna said this:"}},{"id":"mn18:15","sourceIds":["mn18:15.1","mn18:15.2","mn18:15.3","mn18:15.4"],"kind":"text","text":{"pi":"“Yaṁ kho no, āvuso, bhagavā saṅkhittena uddesaṁ uddisitvā vitthārena atthaṁ avibhajitvā uṭṭhāyāsanā vihāraṁ paviṭṭho:\n‘yatonidānaṁ, bhikkhu, purisaṁ papañcasaññāsaṅkhā samudācaranti.\nEttha ce natthi abhinanditabbaṁ abhivaditabbaṁ ajjhositabbaṁ, esevanto rāgānusayānaṁ …pe…\netthete pāpakā akusalā dhammā aparisesā nirujjhantī’ti, imassa kho ahaṁ, āvuso, bhagavatā saṅkhittena uddesassa uddiṭṭhassa vitthārena atthaṁ avibhattassa evaṁ vitthārena atthaṁ ājānāmi—","en":"“Reverends, the Buddha gave this brief summary recital, then entered his dwelling without explaining the meaning in detail:\n‘Judgments driven by proliferating perceptions beset a person.\nIf they don’t find anything worth approving, welcoming, or getting attached to in the source from which these arise,\njust this is the end of the underlying tendencies to desire, repulsion, views, doubt, conceit, the desire to be reborn, and ignorance. This is the end of taking up the rod and the sword, the end of quarrels, arguments, and disputes, of accusations, backbiting, and lies. This is where these bad, unskillful qualities cease without remainder.’ This is how I understand the detailed meaning of this summary recital."}},{"id":"mn18:16","sourceIds":["mn18:16.1","mn18:16.2","mn18:16.3","mn18:16.4","mn18:16.5","mn18:16.6"],"kind":"text","text":{"pi":"Cakkhuñcāvuso, paṭicca rūpe ca uppajjati cakkhuviññāṇaṁ, tiṇṇaṁ saṅgati phasso, phassapaccayā vedanā, yaṁ vedeti taṁ sañjānāti, yaṁ sañjānāti taṁ vitakketi, yaṁ vitakketi taṁ papañceti, yaṁ papañceti tatonidānaṁ purisaṁ papañcasaññāsaṅkhā samudācaranti atītānāgatapaccuppannesu cakkhuviññeyyesu rūpesu.\nSotañcāvuso, paṭicca sadde ca uppajjati sotaviññāṇaṁ …pe…\nghānañcāvuso, paṭicca gandhe ca uppajjati ghānaviññāṇaṁ …pe…\njivhañcāvuso, paṭicca rase ca uppajjati jivhāviññāṇaṁ …pe…\nkāyañcāvuso, paṭicca phoṭṭhabbe ca uppajjati kāyaviññāṇaṁ …pe…\nmanañcāvuso, paṭicca dhamme ca uppajjati manoviññāṇaṁ, tiṇṇaṁ saṅgati phasso, phassapaccayā vedanā, yaṁ vedeti taṁ sañjānāti, yaṁ sañjānāti taṁ vitakketi, yaṁ vitakketi taṁ papañceti, yaṁ papañceti tatonidānaṁ purisaṁ papañcasaññāsaṅkhā samudācaranti atītānāgatapaccuppannesu manoviññeyyesu dhammesu.","en":"Eye consciousness arises dependent on the eye and sights. The meeting of the three is contact. Contact is a requirement for feeling. What you feel, you perceive. What you perceive, you think about. What you think about, you proliferate. What you proliferate is the source from which judgments driven by proliferating perceptions beset a person. This occurs with respect to sights known by the eye in the past, future, and present.\nEar consciousness arises dependent on the ear and sounds. …\nNose consciousness arises dependent on the nose and smells. …\nTongue consciousness arises dependent on the tongue and tastes. …\nBody consciousness arises dependent on the body and touches. …\nMind consciousness arises dependent on the mind and ideas. The meeting of the three is contact. Contact is a requirement for feeling. What you feel, you perceive. What you perceive, you think about. What you think about, you proliferate. What you proliferate is the source from which judgments driven by proliferating perceptions beset a person. This occurs with respect to ideas known by the mind in the past, future, and present."}},{"id":"mn18:17","sourceIds":["mn18:17.1","mn18:17.2","mn18:17.3","mn18:17.4","mn18:17.5","mn18:17.6","mn18:17.7","mn18:17.8","mn18:17.9","mn18:17.10","mn18:17.11","mn18:17.12","mn18:17.13","mn18:17.14"],"kind":"text","text":{"pi":"So vatāvuso, cakkhusmiṁ sati rūpe sati cakkhuviññāṇe sati phassapaññattiṁ paññāpessatīti—ṭhānametaṁ vijjati.\nPhassapaññattiyā sati vedanāpaññattiṁ paññāpessatīti—ṭhānametaṁ vijjati.\nVedanāpaññattiyā sati saññāpaññattiṁ paññāpessatīti—ṭhānametaṁ vijjati.\nSaññāpaññattiyā sati vitakkapaññattiṁ paññāpessatīti—ṭhānametaṁ vijjati.\nVitakkapaññattiyā sati papañcasaññāsaṅkhāsamudācaraṇapaññattiṁ paññāpessatīti—ṭhānametaṁ vijjati.\nSo vatāvuso, sotasmiṁ sati sadde sati …pe…\nghānasmiṁ sati gandhe sati …pe…\njivhāya sati rase sati …pe…\nkāyasmiṁ sati phoṭṭhabbe sati …pe…\nmanasmiṁ sati dhamme sati manoviññāṇe sati phassapaññattiṁ paññāpessatīti—ṭhānametaṁ vijjati.\nPhassapaññattiyā sati vedanāpaññattiṁ paññāpessatīti—ṭhānametaṁ vijjati.\nVedanāpaññattiyā sati saññāpaññattiṁ paññāpessatīti—ṭhānametaṁ vijjati.\nSaññāpaññattiyā sati vitakkapaññattiṁ paññāpessatīti—ṭhānametaṁ vijjati.\nVitakkapaññattiyā sati papañcasaññāsaṅkhāsamudācaraṇapaññattiṁ paññāpessatīti—ṭhānametaṁ vijjati.","en":"Where there is the eye, sights, and eye consciousness, it will be possible to discover evidence of contact.\nWhere there is evidence of contact, it will be possible to discover evidence of feeling.\nWhere there is evidence of feeling, it will be possible to discover evidence of perception.\nWhere there is evidence of perception, it will be possible to discover evidence of thought.\nWhere there is evidence of thought, it will be possible to discover evidence of being beset by judgments driven by proliferating perceptions.\nWhere there is the ear …\nnose …\ntongue …\nbody …\nmind, ideas, and mind consciousness, it will be possible to discover evidence of contact.\nWhere there is evidence of contact, it will be possible to discover evidence of feeling.\nWhere there is evidence of feeling, it will be possible to discover evidence of perception.\nWhere there is evidence of perception, it will be possible to discover evidence of thinking.\nWhere there is evidence of thinking, it will be possible to discover evidence of being beset by judgments driven by proliferating perceptions."}},{"id":"mn18:18","sourceIds":["mn18:18.1","mn18:18.2","mn18:18.3","mn18:18.4","mn18:18.5","mn18:18.6","mn18:18.7","mn18:18.8","mn18:18.9","mn18:18.10","mn18:18.11","mn18:18.12","mn18:18.13","mn18:18.14"],"kind":"text","text":{"pi":"So vatāvuso, cakkhusmiṁ asati rūpe asati cakkhuviññāṇe asati phassapaññattiṁ paññāpessatīti—netaṁ ṭhānaṁ vijjati.\nPhassapaññattiyā asati vedanāpaññattiṁ paññāpessatīti—netaṁ ṭhānaṁ vijjati.\nVedanāpaññattiyā asati saññāpaññattiṁ paññāpessatīti—netaṁ ṭhānaṁ vijjati.\nSaññāpaññattiyā asati vitakkapaññattiṁ paññāpessatīti—netaṁ ṭhānaṁ vijjati.\nVitakkapaññattiyā asati papañcasaññāsaṅkhāsamudācaraṇapaññattiṁ paññāpessatīti—netaṁ ṭhānaṁ vijjati.\nSo vatāvuso, sotasmiṁ asati sadde asati …pe…\nghānasmiṁ asati gandhe asati …pe…\njivhāya asati rase asati …pe…\nkāyasmiṁ asati phoṭṭhabbe asati …pe…\nmanasmiṁ asati dhamme asati manoviññāṇe asati phassapaññattiṁ paññāpessatīti—netaṁ ṭhānaṁ vijjati.\nPhassapaññattiyā asati vedanāpaññattiṁ paññāpessatīti—netaṁ ṭhānaṁ vijjati.\nVedanāpaññattiyā asati saññāpaññattiṁ paññāpessatīti—netaṁ ṭhānaṁ vijjati.\nSaññāpaññattiyā asati vitakkapaññattiṁ paññāpessatīti—netaṁ ṭhānaṁ vijjati.\nVitakkapaññattiyā asati papañcasaññāsaṅkhāsamudācaraṇapaññattiṁ paññāpessatīti—netaṁ ṭhānaṁ vijjati.","en":"Where there is no eye, no sights, and no eye consciousness, it will not be possible to discover evidence of contact.\nWhere there is no evidence of contact, it will not be possible to discover evidence of feeling.\nWhere there is no evidence of feeling, it will not be possible to discover evidence of perception.\nWhere there is no evidence of perception, it will not be possible to discover evidence of thinking.\nWhere there is no evidence of thinking, it will not be possible to discover evidence of being beset by judgments driven by proliferating perceptions.\nWhere there is no ear …\nno nose …\nno tongue …\nno body …\nno mind, no ideas, and no mind consciousness, it will not be possible to discover evidence of contact.\nWhere there is no evidence of contact, it will not be possible to discover evidence of feeling.\nWhere there is no evidence of feeling, it will not be possible to discover evidence of perception.\nWhere there is no evidence of perception, it will not be possible to discover evidence of thinking.\nWhere there is no evidence of thinking, it will not be possible to discover evidence of being beset by judgments driven by proliferating perceptions."}},{"id":"mn18:19","sourceIds":["mn18:19.1","mn18:19.2","mn18:19.3","mn18:19.4","mn18:19.5"],"kind":"text","text":{"pi":"Yaṁ kho no, āvuso, bhagavā saṅkhittena uddesaṁ uddisitvā vitthārena atthaṁ avibhajitvā uṭṭhāyāsanā vihāraṁ paviṭṭho:\n‘yatonidānaṁ, bhikkhu, purisaṁ papañcasaññāsaṅkhā samudācaranti ettha ce natthi abhinanditabbaṁ abhivaditabbaṁ ajjhositabbaṁ esevanto rāgānusayānaṁ …pe…\netthete pāpakā akusalā dhammā aparisesā nirujjhantī’ti, imassa kho ahaṁ, āvuso, bhagavatā saṅkhittena uddesassa uddiṭṭhassa vitthārena atthaṁ avibhattassa evaṁ vitthārena atthaṁ ājānāmi.\nĀkaṅkhamānā ca pana tumhe āyasmanto bhagavantaṁyeva upasaṅkamitvā etamatthaṁ paṭipuccheyyātha.\nYathā vo bhagavā byākaroti tathā naṁ dhāreyyāthā”ti.","en":"This is how I understand the detailed meaning of that brief summary recital given by the Buddha.\nIf you wish, you may go to the Buddha and ask him about this.\nYou should remember it in line with the Buddha’s answer.”"}},{"id":"mn18:20","sourceIds":["mn18:20.1","mn18:20.2","mn18:20.3","mn18:20.4","mn18:20.5","mn18:20.6","mn18:20.7","mn18:20.8","mn18:20.9","mn18:20.10","mn18:20.11","mn18:20.12","mn18:20.13","mn18:20.14","mn18:20.15","mn18:20.16","mn18:20.17"],"kind":"text","text":{"pi":"Atha kho te bhikkhū āyasmato mahākaccānassa bhāsitaṁ abhinanditvā anumoditvā uṭṭhāyāsanā yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ nisinnā kho te bhikkhū bhagavantaṁ etadavocuṁ:\n“yaṁ kho no, bhante, bhagavā saṅkhittena uddesaṁ uddisitvā vitthārena atthaṁ avibhajitvā uṭṭhāyāsanā vihāraṁ paviṭṭho:\n‘yatonidānaṁ, bhikkhu, purisaṁ papañcasaññāsaṅkhā samudācaranti.\nEttha ce natthi abhinanditabbaṁ abhivaditabbaṁ ajjhositabbaṁ.\nEsevanto rāgānusayānaṁ …pe…\netthete pāpakā akusalā dhammā aparisesā nirujjhantī’ti.\nTesaṁ no, bhante, amhākaṁ acirapakkantassa bhagavato etadahosi:\n‘idaṁ kho no, āvuso, bhagavā saṅkhittena uddesaṁ uddisitvā vitthārena atthaṁ avibhajitvā uṭṭhāyāsanā vihāraṁ paviṭṭho:\n“yatonidānaṁ, bhikkhu, purisaṁ papañcasaññāsaṅkhā samudācaranti.\nEttha ce natthi abhinanditabbaṁ abhivaditabbaṁ ajjhositabbaṁ.\nEsevanto rāgānusayānaṁ, esevanto paṭighānusayānaṁ, esevanto diṭṭhānusayānaṁ, esevanto vicikicchānusayānaṁ, esevanto mānānusayānaṁ, esevanto bhavarāgānusayānaṁ, esevanto avijjānusayānaṁ, esevanto daṇḍādānasatthādānakalahaviggahavivādatuvaṁtuvaṁpesuññamusāvādānaṁ.\nEtthete pāpakā akusalā dhammā aparisesā nirujjhantī”ti.\nKo nu kho imassa bhagavatā saṅkhittena uddesassa uddiṭṭhassa vitthārena atthaṁ avibhattassa vitthārena atthaṁ vibhajeyyā’ti?\nTesaṁ no, bhante, amhākaṁ etadahosi:\n‘ayaṁ kho āyasmā mahākaccāno satthu ceva saṁvaṇṇito sambhāvito ca viññūnaṁ sabrahmacārīnaṁ, pahoti cāyasmā mahākaccāno imassa bhagavatā saṅkhittena uddesassa uddiṭṭhassa vitthārena atthaṁ avibhattassa vitthārena atthaṁ vibhajituṁ, yannūna mayaṁ yenāyasmā mahākaccāno tenupasaṅkameyyāma; upasaṅkamitvā āyasmantaṁ mahākaccānaṁ etamatthaṁ paṭipuccheyyāmā’ti.\nAtha kho mayaṁ, bhante, yenāyasmā mahākaccāno tenupasaṅkamimha; upasaṅkamitvā āyasmantaṁ mahākaccānaṁ etamatthaṁ paṭipucchimha.\nTesaṁ no, bhante, āyasmatā mahākaccānena imehi ākārehi imehi padehi imehi byañjanehi attho vibhatto”ti.","en":"Then those mendicants, approving and agreeing with what Mahākaccāna said, rose from their seats and went to the Buddha, bowed, sat down to one side, and told him what had happened, adding:\n“Mahākaccāna clearly explained the meaning to us in this manner, with these words and phrases.”"}},{"id":"mn18:21","sourceIds":["mn18:21.1","mn18:21.2","mn18:21.3"],"kind":"text","text":{"pi":"“Paṇḍito, bhikkhave, mahākaccāno; mahāpañño, bhikkhave, mahākaccāno.\nMañcepi tumhe, bhikkhave, etamatthaṁ paṭipuccheyyātha, ahampi taṁ evamevaṁ byākareyyaṁ yathā taṁ mahākaccānena byākataṁ.\nEso cevetassa attho. Evañca naṁ dhārethā”ti.","en":"“Mahākaccāna is astute, mendicants, he has great wisdom.\nIf you came to me and asked this question, I would answer it in exactly the same way as Mahākaccāna.\nThat is what it means, and that’s how you should remember it.”"}},{"id":"mn18:22","sourceIds":["mn18:22.1","mn18:22.2","mn18:22.3","mn18:22.4","mn18:22.5","mn18:22.6","mn18:22.7","mn18:22.8"],"kind":"text","text":{"pi":"Evaṁ vutte, āyasmā ānando bhagavantaṁ etadavoca:\n“seyyathāpi, bhante, puriso jighacchādubbalyapareto madhupiṇḍikaṁ adhigaccheyya, so yato yato sāyeyya, labhetheva sādurasaṁ asecanakaṁ.\nEvameva kho, bhante, cetaso bhikkhu dabbajātiko, yato yato imassa dhammapariyāyassa paññāya atthaṁ upaparikkheyya, labhetheva attamanataṁ, labhetheva cetaso pasādaṁ.\nKo nāmo ayaṁ, bhante, dhammapariyāyo”ti?\n“Tasmātiha tvaṁ, ānanda, imaṁ dhammapariyāyaṁ madhupiṇḍikapariyāyotveva naṁ dhārehī”ti.\nIdamavoca bhagavā.\nAttamano āyasmā ānando bhagavato bhāsitaṁ abhinandīti.\nMadhupiṇḍikasuttaṁ niṭṭhitaṁ aṭṭhamaṁ.","en":"When he said this, Venerable Ānanda said to the Buddha,\n“Sir, suppose a person who was weak with hunger was to obtain a honey-cake. Wherever they taste it, they would enjoy a sweet, delectable flavor.\nIn the same way, wherever a sincere, proficient mendicant might examine with wisdom the meaning of this exposition of the teaching they would only gain joy and clarity.\nSir, what is the name of this exposition of the teaching?”\n“Well then, Ānanda, you may remember this exposition of the teaching as ‘The Honey-Cake Discourse’.”\nThat is what the Buddha said.\nSatisfied, Venerable Ānanda approved what the Buddha said."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mn18/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}