{"id":"mn41","title":"The People of Sālā","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mn41","title":"The People of Sālā","units":[{"id":"mn41:0","sourceIds":["mn41:0.1","mn41:0.2"],"kind":"text","text":{"pi":"Majjhima Nikāya 41\nSāleyyakasutta","en":"Middle Discourses 41\nThe People of Sālā"}},{"id":"mn41:1","sourceIds":["mn41:1.1","mn41:1.2"],"kind":"text","text":{"pi":"Evaṁ me sutaṁ—\nekaṁ samayaṁ bhagavā kosalesu cārikaṁ caramāno mahatā bhikkhusaṅghena saddhiṁ yena sālā nāma kosalānaṁ brāhmaṇagāmo tadavasari.","en":"So I have heard.\nAt one time the Buddha was wandering in the land of the Kosalans together with a large Saṅgha of mendicants when he arrived at a village of the Kosalan brahmins named Sālā."}},{"id":"mn41:2","sourceIds":["mn41:2.1","mn41:2.2","mn41:2.3","mn41:2.4","mn41:2.5","mn41:2.6","mn41:2.7","mn41:2.8"],"kind":"text","text":{"pi":"Assosuṁ kho sāleyyakā brāhmaṇagahapatikā:\n“samaṇo khalu, bho, gotamo sakyaputto sakyakulā pabbajito kosalesu cārikaṁ caramāno mahatā bhikkhusaṅghena saddhiṁ sālaṁ anuppatto.\nTaṁ kho pana bhavantaṁ gotamaṁ evaṁ kalyāṇo kittisaddo abbhuggato:\n‘itipi so bhagavā arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavā’.\nSo imaṁ lokaṁ sadevakaṁ samārakaṁ sabrahmakaṁ sassamaṇabrāhmaṇiṁ pajaṁ sadevamanussaṁ sayaṁ abhiññā sacchikatvā pavedeti.\nSo dhammaṁ deseti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ;\nkevalaparipuṇṇaṁ parisuddhaṁ brahmacariyaṁ pakāseti.\nSādhu kho pana tathārūpānaṁ arahataṁ dassanaṁ hotī”ti.","en":"The brahmins and householders of Sālā heard,\n“It seems the ascetic Gotama—a Sakyan, gone forth from a Sakyan family—while wandering in the land of the Kosalans has arrived at Sālā, together with a large Saṅgha of mendicants.\nHe has this good reputation:\n‘That Blessed One is perfected, a fully awakened Buddha, accomplished in knowledge and conduct, holy, knower of the world, supreme guide for those fit for training, teacher of gods and humans, awakened, blessed.’\nHe has realized with his own insight this world—with its gods, Māras, and divinities, this population with its ascetics and brahmins, gods and humans—and he makes it known to others.\nHe teaches Dhamma that’s good in the beginning, good in the middle, and good in the end, meaningful and well-phrased.\nHe reveals an entirely full and pure spiritual life.\nIt’s good to see such perfected ones.”"}},{"id":"mn41:3","sourceIds":["mn41:3.1"],"kind":"text","text":{"pi":"Atha kho sāleyyakā brāhmaṇagahapatikā yena bhagavā tenupasaṅkamiṁsu; upasaṅkamitvā appekacce bhagavantaṁ abhivādetvā ekamantaṁ nisīdiṁsu; appekacce bhagavatā saddhiṁ sammodiṁsu, sammodanīyaṁ kathaṁ sāraṇīyaṁ vītisāretvā ekamantaṁ nisīdiṁsu; appekacce yena bhagavā tenañjaliṁ paṇāmetvā ekamantaṁ nisīdiṁsu; appekacce bhagavato santike nāmagottaṁ sāvetvā ekamantaṁ nisīdiṁsu; appekacce tuṇhībhūtā ekamantaṁ nisīdiṁsu. Ekamantaṁ nisinnā kho sāleyyakā brāhmaṇagahapatikā bhagavantaṁ etadavocuṁ:","en":"Then the brahmins and householders of Sālā went up to the Buddha. Before sitting down to one side, some bowed, some exchanged greetings and polite conversation, some held up their cupped palms toward the Buddha, some announced their name and clan, while some kept silent. Seated to one side they said to the Buddha:"}},{"id":"mn41:4","sourceIds":["mn41:4.1","mn41:4.2"],"kind":"text","text":{"pi":"“ko nu kho, bho gotama, hetu, ko paccayo, yena m’idhekacce sattā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjanti?\nKo pana, bho gotama, hetu, ko paccayo, yena m’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjantī”ti?","en":"“What is the cause, worthy Gotama, what is the reason why some sentient beings, when their body breaks up, after death, are reborn in a place of loss, a bad place, the underworld, hell?\nAnd what is the cause, worthy Gotama, what is the reason why some sentient beings, when their body breaks up, after death, are reborn in a good place, a heavenly realm?”"}},{"id":"mn41:5","sourceIds":["mn41:5.1","mn41:5.2"],"kind":"text","text":{"pi":"“Adhammacariyāvisamacariyāhetu kho, gahapatayo, evam’idhekacce sattā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjanti.\nDhammacariyāsamacariyāhetu kho, gahapatayo, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjantī”ti.","en":"“Unprincipled and immoral conduct is the reason why some sentient beings, when their body breaks up, after death, are reborn in a place of loss, a bad place, the underworld, hell.\nPrincipled and moral conduct is the reason why some sentient beings, when their body breaks up, after death, are reborn in a good place, a heavenly realm.”"}},{"id":"mn41:6","sourceIds":["mn41:6.1","mn41:6.2","mn41:6.3","mn41:6.4","mn41:6.5"],"kind":"text","text":{"pi":"“Na kho mayaṁ imassa bhoto gotamassa saṅkhittena bhāsitassa, vitthārena atthaṁ avibhattassa, vitthārena atthaṁ ājānāma.\nSādhu no bhavaṁ gotamo tathā dhammaṁ desetu, yathā mayaṁ imassa bhoto gotamassa saṅkhittena bhāsitassa, vitthārena atthaṁ avibhattassa, vitthārena atthaṁ ājāneyyāmā”ti.\n“Tena hi, gahapatayo, suṇātha, sādhukaṁ manasi karotha, bhāsissāmī”ti.\n“Evaṁ, bho”ti kho sāleyyakā brāhmaṇagahapatikā bhagavato paccassosuṁ.\nBhagavā etadavoca:","en":"“We don’t understand the detailed meaning of the worthy Gotama’s brief statement.\nWorthy Gotama, please teach us this matter in detail so we can understand the meaning.”\n“Well then, householders, listen and apply your mind well, I will speak.”\n“Yes, worthy sir,” they replied.\nThe Buddha said this:"}},{"id":"mn41:7","sourceIds":["mn41:7.1"],"kind":"text","text":{"pi":"“Tividhaṁ kho, gahapatayo, kāyena adhammacariyāvisamacariyā hoti, catubbidhaṁ vācāya adhammacariyāvisamacariyā hoti, tividhaṁ manasā adhammacariyāvisamacariyā hoti.","en":"“Householders, unprincipled and immoral conduct is threefold by way of body, fourfold by way of speech, and threefold by way of mind."}},{"id":"mn41:8","sourceIds":["mn41:8.1","mn41:8.2","mn41:8.3","mn41:8.4","mn41:8.5"],"kind":"text","text":{"pi":"Kathañca, gahapatayo, tividhaṁ kāyena adhammacariyāvisamacariyā hoti?\nIdha, gahapatayo, ekacco pāṇātipātī hoti, luddo lohitapāṇi hatappahate niviṭṭho adayāpanno pāṇabhūtesu.\nAdinnādāyī kho pana hoti. Yaṁ taṁ parassa paravittūpakaraṇaṁ, gāmagataṁ vā araññagataṁ vā, taṁ adinnaṁ theyyasaṅkhātaṁ ādātā hoti.\nKāmesumicchācārī kho pana hoti. Yā tā māturakkhitā piturakkhitā mātāpiturakkhitā bhāturakkhitā bhaginirakkhitā ñātirakkhitā gottarakkhitā dhammarakkhitā sassāmikā saparidaṇḍā antamaso mālāguḷaparikkhittāpi, tathārūpāsu cārittaṁ āpajjitā hoti.\nEvaṁ kho, gahapatayo, tividhaṁ kāyena adhammacariyāvisamacariyā hoti.","en":"And how is unprincipled and immoral conduct threefold by way of body?\nIt’s when someone kills living creatures. They’re violent, bloody-handed, a hardened killer, merciless to living beings.\nThey steal. With the intention to commit theft, they take the wealth or belongings of others from village or wilderness.\nThey commit sexual misconduct. They have relations with women who have their mother, father, both mother and father, brother, sister, relatives, or clan as guardian. They have relations with a woman who is protected on principle, or who has a husband, or whose violation is punishable by law, or even one who has been garlanded as a token of betrothal.\nThis is how unprincipled and immoral conduct is threefold by way of body."}},{"id":"mn41:9","sourceIds":["mn41:9.1","mn41:9.2","mn41:9.3","mn41:9.4","mn41:9.5","mn41:9.6"],"kind":"text","text":{"pi":"Kathañca, gahapatayo, catubbidhaṁ vācāya adhammacariyāvisamacariyā hoti?\nIdha, gahapatayo, ekacco musāvādī hoti. Sabhāgato vā parisāgato vā, ñātimajjhagato vā pūgamajjhagato vā rājakulamajjhagato vā, abhinīto sakkhipuṭṭho: ‘ehambho purisa, yaṁ jānāsi taṁ vadehī’ti, so ajānaṁ vā āha: ‘jānāmī’ti, jānaṁ vā āha: na jānāmī’ti, ‘apassaṁ vā āha: ‘passāmī’ti, passaṁ vā āha: ‘na passāmī’ti. Iti attahetu vā parahetu vā āmisakiñcikkhahetu vā sampajānamusā bhāsitā hoti.\nPisuṇavāco kho pana hoti. Ito sutvā amutra akkhātā imesaṁ bhedāya, amutra vā sutvā imesaṁ akkhātā amūsaṁ bhedāya. Iti samaggānaṁ vā bhettā, bhinnānaṁ vā anuppadātā, vaggārāmo vaggarato vagganandī vaggakaraṇiṁ vācaṁ bhāsitā hoti.\nPharusavāco kho pana hoti. Yā sā vācā aṇḍakā kakkasā parakaṭukā parābhisajjanī kodhasāmantā asamādhisaṁvattanikā, tathārūpiṁ vācaṁ bhāsitā hoti.\nSamphappalāpī kho pana hoti. Akālavādī abhūtavādī anatthavādī adhammavādī avinayavādī. Anidhānavatiṁ vācaṁ bhāsitā hoti akālena anapadesaṁ apariyantavatiṁ anatthasaṁhitaṁ.\nEvaṁ kho, gahapatayo, catubbidhaṁ vācāya adhammacariyāvisamacariyā hoti.","en":"And how is unprincipled and immoral conduct fourfold by way of speech?\nIt’s when someone lies. They’re summoned to a council, an assembly, a family meeting, a guild, or to the royal court, and asked to bear witness: ‘Please, my friend, say what you know.’ Not knowing, they say ‘I know.’ Knowing, they say ‘I don’t know.’ Not seeing, they say ‘I see.’ And seeing, they say ‘I don’t see.’ So they deliberately lie for the sake of themselves or another, or for some trivial worldly reason.\nThey backbite. They repeat in one place what they heard in another so as to divide people against each other. And so they divide those who are harmonious, supporting division, delighting in division, loving division, speaking words that promote division.\nThey speak harshly. They use the kinds of words that are cruel, nasty, hurtful, offensive, bordering on anger, not leading to immersion.\nThey talk nonsense. Their speech is untimely, and is neither factual nor beneficial. It has nothing to do with the teaching or the training. Their words have no value, and are untimely, unreasonable, rambling, and pointless.\nThis is how unprincipled and immoral conduct is fourfold by way of speech."}},{"id":"mn41:10","sourceIds":["mn41:10.1","mn41:10.2","mn41:10.3","mn41:10.4","mn41:10.5","mn41:10.6","mn41:10.7"],"kind":"text","text":{"pi":"Kathañca, gahapatayo, tividhaṁ manasā adhammacariyāvisamacariyā hoti?\nIdha, gahapatayo, ekacco abhijjhālu hoti, yaṁ taṁ parassa paravittūpakaraṇaṁ taṁ abhijjhātā hoti: ‘aho vata yaṁ parassa taṁ mamassā’ti.\nByāpannacitto kho pana hoti paduṭṭhamanasaṅkappo: ‘ime sattā haññantu vā vajjhantu vā ucchijjantu vā vinassantu vā mā vā ahesun’ti.\nMicchādiṭṭhiko kho pana hoti viparītadassano:\n‘natthi dinnaṁ natthi yiṭṭhaṁ natthi hutaṁ, natthi sukatadukkaṭānaṁ kammānaṁ phalaṁ vipāko, natthi ayaṁ loko natthi paro loko, natthi mātā natthi pitā, natthi sattā opapātikā, natthi loke samaṇabrāhmaṇā sammaggatā sammāpaṭipannā ye imañca lokaṁ parañca lokaṁ sayaṁ abhiññā sacchikatvā pavedentī’ti.\nEvaṁ kho, gahapatayo, tividhaṁ manasā adhammacariyāvisamacariyā hoti.\nEvaṁ adhammacariyāvisamacariyāhetu kho, gahapatayo, evam’idhekacce sattā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjanti.","en":"And how is unprincipled and immoral conduct threefold by way of mind?\nIt’s when someone is covetous. They covet the wealth and belongings of others: ‘Oh, if only their belongings were mine!’\nThey have ill will and malicious intentions: ‘May these sentient beings be killed, slaughtered, slain, destroyed, or annihilated!’\nThey have wrong view. Their perspective is distorted:\n‘There’s no meaning in giving, sacrifice, or offerings. There’s no fruit or result of good and bad deeds. There’s no afterlife. There’s no such thing as mother and father, or beings that are reborn spontaneously. And there’s no ascetic or brahmin who is rightly comported and rightly practiced, and who describes the afterlife after realizing it with their own insight.’\nThis is how unprincipled and immoral conduct is threefold by way of mind.\nThat’s how unprincipled and immoral conduct is the reason why some sentient beings, when their body breaks up, after death, are reborn in a place of loss, a bad place, the underworld, hell."}},{"id":"mn41:11","sourceIds":["mn41:11.1"],"kind":"text","text":{"pi":"Tividhaṁ kho, gahapatayo, kāyena dhammacariyāsamacariyā hoti, catubbidhaṁ vācāya dhammacariyāsamacariyā hoti, tividhaṁ manasā dhammacariyāsamacariyā hoti.","en":"Householders, principled and moral conduct is threefold by way of body, fourfold by way of speech, and threefold by way of mind."}},{"id":"mn41:12","sourceIds":["mn41:12.1","mn41:12.2","mn41:12.3","mn41:12.4","mn41:12.5"],"kind":"text","text":{"pi":"Kathañca, gahapatayo, tividhaṁ kāyena dhammacariyāsamacariyā hoti?\nIdha, gahapatayo, ekacco pāṇātipātaṁ pahāya pāṇātipātā paṭivirato hoti, nihitadaṇḍo nihitasattho lajjī dayāpanno sabbapāṇabhūtahitānukampī viharati.\nAdinnādānaṁ pahāya adinnādānā paṭivirato hoti. Yaṁ taṁ parassa paravittūpakaraṇaṁ, gāmagataṁ vā araññagataṁ vā, taṁ nādinnaṁ theyyasaṅkhātaṁ ādātā hoti.\nKāmesumicchācāraṁ pahāya kāmesumicchācārā paṭivirato hoti. Yā tā māturakkhitā piturakkhitā mātāpiturakkhitā bhāturakkhitā bhaginirakkhitā ñātirakkhitā gottarakkhitā dhammarakkhitā sassāmikā saparidaṇḍā antamaso mālāguḷaparikkhittāpi, tathārūpāsu na cārittaṁ āpajjitā hoti.\nEvaṁ kho, gahapatayo, tividhaṁ kāyena dhammacariyāsamacariyā hoti.","en":"And how is principled and moral conduct threefold by way of body?\nIt’s when someone gives up killing living creatures, renouncing the rod and the sword. They’re scrupulous and kind, living full of sympathy for all living beings.\nThey give up stealing. They don’t, with the intention to commit theft, take the wealth or belongings of others from village or wilderness.\nThey give up sexual misconduct. They don’t have relations with women who have their mother, father, both mother and father, brother, sister, relatives, or clan as guardian. They don’t have relations with a woman who is protected on principle, or who has a husband, or whose violation is punishable by law, or even one who has been garlanded as a token of betrothal.\nThis is how principled and moral conduct is threefold by way of body."}},{"id":"mn41:13","sourceIds":["mn41:13.1","mn41:13.2","mn41:13.3","mn41:13.4","mn41:13.5","mn41:13.6"],"kind":"text","text":{"pi":"Kathañca, gahapatayo, catubbidhaṁ vācāya dhammacariyāsamacariyā hoti?\nIdha, gahapatayo, ekacco musāvādaṁ pahāya musāvādā paṭivirato hoti. Sabhāgato vā parisāgato vā, ñātimajjhagato vā pūgamajjhagato vā rājakulamajjhagato vā, abhinīto sakkhipuṭṭho: ‘ehambho purisa, yaṁ jānāsi taṁ vadehī’ti, so ajānaṁ vā āha: ‘na jānāmī’ti, jānaṁ vā āha: ‘jānāmī’ti, apassaṁ vā āha: ‘na passāmī’ti, passaṁ vā āha: ‘passāmī’ti. Iti attahetu vā parahetu vā āmisakiñcikkhahetu vā na sampajānamusā bhāsitā hoti.\nPisuṇaṁ vācaṁ pahāya pisuṇāya vācāya paṭivirato hoti, ito sutvā na amutra akkhātā imesaṁ bhedāya, amutra vā sutvā na imesaṁ akkhātā amūsaṁ bhedāya. Iti bhinnānaṁ vā sandhātā, sahitānaṁ vā anuppadātā, samaggārāmo samaggarato samagganandī samaggakaraṇiṁ vācaṁ bhāsitā hoti.\nPharusaṁ vācaṁ pahāya pharusāya vācāya paṭivirato hoti. Yā sā vācā nelā kaṇṇasukhā pemanīyā hadayaṅgamā porī bahujanakantā bahujanamanāpā—tathārūpiṁ vācaṁ bhāsitā hoti.\nSamphappalāpaṁ pahāya samphappalāpā paṭivirato hoti. Kālavādī bhūtavādī atthavādī dhammavādī vinayavādī nidhānavatiṁ vācaṁ bhāsitā hoti kālena sāpadesaṁ pariyantavatiṁ atthasaṁhitaṁ.\nEvaṁ kho, gahapatayo, catubbidhaṁ vācāya dhammacariyāsamacariyā hoti.","en":"And how is principled and moral conduct fourfold by way of speech?\nIt’s when someone gives up lying. They’re summoned to a council, an assembly, a family meeting, a guild, or to the royal court, and asked to bear witness: ‘Please, my friend, say what you know.’ Not knowing, they say ‘I don’t know.’ Knowing, they say ‘I know.’ Not seeing, they say ‘I don’t see.’ And seeing, they say ‘I see.’ So they don’t deliberately lie for the sake of themselves or another, or for some trivial worldly reason.\nThey give up backbiting. They don’t repeat in one place what they heard in another so as to divide people against each other. Instead, they reconcile those who are divided and support those who are united, delighting in harmony, loving harmony, speaking words that promote harmony.\nThey give up harsh speech. They speak in a way that’s mellow, pleasing to the ear, endearing, going to the heart, polite, likable, and agreeable to the people.\nThey give up talking nonsense. Their words are timely, true, and meaningful, in line with the teaching and training. They say things at the right time which are valuable, reasonable, succinct, and beneficial.\nThis is how principled and moral conduct is fourfold by way of speech."}},{"id":"mn41:14","sourceIds":["mn41:14.1","mn41:14.2","mn41:14.3","mn41:14.4","mn41:14.5","mn41:14.6","mn41:14.7"],"kind":"text","text":{"pi":"Kathañca, gahapatayo, tividhaṁ manasā dhammacariyāsamacariyā hoti?\nIdha, gahapatayo, ekacco anabhijjhālu hoti, yaṁ taṁ parassa paravittūpakaraṇaṁ taṁ nābhijjhātā hoti: ‘aho vata yaṁ parassa taṁ mamassā’ti.\nAbyāpannacitto kho pana hoti appaduṭṭhamanasaṅkappo: ‘ime sattā averā abyābajjhā anīghā sukhī attānaṁ pariharantū’ti.\nSammādiṭṭhiko kho pana hoti aviparītadassano:\n‘atthi dinnaṁ atthi yiṭṭhaṁ atthi hutaṁ, atthi sukatadukkaṭānaṁ kammānaṁ phalaṁ vipāko, atthi ayaṁ loko atthi paro loko, atthi mātā atthi pitā, atthi sattā opapātikā, atthi loke samaṇabrāhmaṇā sammaggatā sammāpaṭipannā ye imañca lokaṁ parañca lokaṁ sayaṁ abhiññā sacchikatvā pavedentī’ti.\nEvaṁ kho, gahapatayo, tividhaṁ manasā dhammacariyāsamacariyā hoti.\nEvaṁ dhammacariyāsamacariyāhetu kho, gahapatayo, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti.","en":"And how is principled and moral conduct threefold by way of mind?\nIt’s when someone is not covetous. They don’t covet the wealth and belongings of others: ‘Oh, if only their belongings were mine!’\nThey have a kind heart and loving intentions: ‘May these sentient beings live free of enmity and ill will, untroubled and happy!’\nThey have right view, an undistorted perspective:\n‘There is meaning in giving, sacrifice, and offerings. There are fruits and results of good and bad deeds. There is an afterlife. There are such things as mother and father, and beings that are reborn spontaneously. And there are ascetics and brahmins who are rightly comported and rightly practiced, and who describe the afterlife after realizing it with their own insight.’\nThis is how principled and moral conduct is threefold by way of mind.\nThis is how principled and moral conduct is the reason why some sentient beings, when their body breaks up, after death, are reborn in a good place, a heavenly realm."}},{"id":"mn41:15","sourceIds":["mn41:15.1","mn41:15.2","mn41:15.3","mn41:15.4","mn41:15.5"],"kind":"text","text":{"pi":"Ākaṅkheyya ce, gahapatayo, dhammacārī samacārī:\n‘aho vatāhaṁ kāyassa bhedā paraṁ maraṇā khattiyamahāsālānaṁ sahabyataṁ upapajjeyyan’ti;\nṭhānaṁ kho panetaṁ vijjati, yaṁ so kāyassa bhedā paraṁ maraṇā khattiyamahāsālānaṁ sahabyataṁ upapajjeyya.\nTaṁ kissa hetu?\nTathā hi so dhammacārī samacārī.","en":"Someone of principled and moral conduct might wish:\n‘If only, when my body breaks up, after death, I would be reborn in the company of well-to-do aristocrats!’\nIt’s possible that this might happen.\nWhy is that?\nBecause they have principled and moral conduct."}},{"id":"mn41:16-17","sourceIds":["mn41:16-17.1","mn41:16-17.2","mn41:16-17.3","mn41:16-17.4","mn41:16-17.5","mn41:16-17.6"],"kind":"text","text":{"pi":"Ākaṅkheyya ce, gahapatayo, dhammacārī samacārī:\n‘aho vatāhaṁ kāyassa bhedā paraṁ maraṇā brāhmaṇamahāsālānaṁ …pe…\ngahapatimahāsālānaṁ sahabyataṁ upapajjeyyan’ti;\nṭhānaṁ kho panetaṁ vijjati, yaṁ so kāyassa bhedā paraṁ maraṇā gahapatimahāsālānaṁ sahabyataṁ upapajjeyya.\nTaṁ kissa hetu?\nTathā hi so dhammacārī samacārī.","en":"Someone of principled and moral conduct might wish:\n‘If only, when my body breaks up, after death, I would be reborn in the company of well-to-do brahmins …\nwell-to-do householders …"}},{"id":"mn41:18-42","sourceIds":["mn41:18-42.1","mn41:18-42.2","mn41:18-42.3","mn41:18-42.4","mn41:18-42.5","mn41:18-42.6","mn41:18-42.7","mn41:18-42.8","mn41:18-42.9","mn41:18-42.10","mn41:18-42.11","mn41:18-42.12","mn41:18-42.13","mn41:18-42.14","mn41:18-42.15","mn41:18-42.16","mn41:18-42.17","mn41:18-42.18","mn41:18-42.19","mn41:18-42.20","mn41:18-42.21","mn41:18-42.22","mn41:18-42.23","mn41:18-42.24","mn41:18-42.25","mn41:18-42.26","mn41:18-42.27","mn41:18-42.28","mn41:18-42.29","mn41:18-42.30","mn41:18-42.31","mn41:18-42.32","mn41:18-42.33","mn41:18-42.34","mn41:18-42.35","mn41:18-42.36","mn41:18-42.37","mn41:18-42.38","mn41:18-42.39","mn41:18-42.40"],"kind":"text","text":{"pi":"Ākaṅkheyya ce, gahapatayo, dhammacārī samacārī:\n‘aho vatāhaṁ kāyassa bhedā paraṁ maraṇā cātumahārājikānaṁ devānaṁ sahabyataṁ upapajjeyyan’ti;\nṭhānaṁ kho panetaṁ vijjati, yaṁ so kāyassa bhedā paraṁ maraṇā cātumahārājikānaṁ devānaṁ sahabyataṁ upapajjeyya.\nTaṁ kissa hetu?\nTathā hi so dhammacārī samacārī.\nĀkaṅkheyya ce, gahapatayo, dhammacārī samacārī:\n‘aho vatāhaṁ kāyassa bhedā paraṁ maraṇā tāvatiṁsānaṁ devānaṁ …pe…\nyāmānaṁ devānaṁ …\ntusitānaṁ devānaṁ …\nnimmānaratīnaṁ devānaṁ …\nparanimmitavasavattīnaṁ devānaṁ …\nbrahmakāyikānaṁ devānaṁ sahabyataṁ upapajjeyyan’ti;\nṭhānaṁ kho panetaṁ vijjati, yaṁ so kāyassa bhedā paraṁ maraṇā brahmakāyikānaṁ devānaṁ sahabyataṁ upapajjeyya.\nTaṁ kissa hetu?\nTathā hi so dhammacārī samacārī.\nĀkaṅkheyya ce, gahapatayo, dhammacārī samacārī:\n‘aho vatāhaṁ kāyassa bhedā paraṁ maraṇā ābhānaṁ devānaṁ sahabyataṁ upapajjeyyan’ti;\nṭhānaṁ kho panetaṁ vijjati, yaṁ so kāyassa bhedā paraṁ maraṇā ābhānaṁ devānaṁ sahabyataṁ upapajjeyya.\nTaṁ kissa hetu?\nTathā hi so dhammacārī samacārī.\nĀkaṅkheyya ce, gahapatayo, dhammacārī samacārī:\n‘aho vatāhaṁ kāyassa bhedā paraṁ maraṇā parittābhānaṁ devānaṁ …pe…\nappamāṇābhānaṁ devānaṁ …\nābhassarānaṁ devānaṁ …\nparittasubhānaṁ devānaṁ …\nappamāṇasubhānaṁ devānaṁ …\nsubhakiṇhānaṁ devānaṁ …\nvehapphalānaṁ devānaṁ …\navihānaṁ devānaṁ …\natappānaṁ devānaṁ …\nsudassānaṁ devānaṁ …\nsudassīnaṁ devānaṁ …\nakaniṭṭhānaṁ devānaṁ …\nākāsānañcāyatanūpagānaṁ devānaṁ …\nviññāṇañcāyatanūpagānaṁ devānaṁ …\nākiñcaññāyatanūpagānaṁ devānaṁ …\nnevasaññānāsaññāyatanūpagānaṁ devānaṁ sahabyataṁ upapajjeyyan’ti;\nṭhānaṁ kho panetaṁ vijjati, yaṁ so kāyassa bhedā paraṁ maraṇā nevasaññānāsaññāyatanūpagānaṁ devānaṁ sahabyataṁ upapajjeyya.\nTaṁ kissa hetu?\nTathā hi so dhammacārī samacārī.","en":"the gods of the four great kings …\nthe gods of the thirty-three …\nthe gods of Yama …\nthe joyful gods …\nthe gods who love to create …\nthe gods who control what is created by others …\nthe gods of the Divinity’s host …\nthe luminous gods …\nthe gods of limited luminosity …\nthe gods of limitless luminosity …\nthe gods of sublime luminosity …\nthe gods of limited beauty …\nthe gods of limitless beauty …\nthe gods of universal beauty …\nthe gods of abundant fruit …\nthe gods of Aviha …\nthe gods of Atappa …\nthe gods fair to see …\nthe fair seeing gods …\nthe gods of Akaniṭṭha …\nthe gods of the dimension of infinite space …\nthe gods of the dimension of infinite consciousness …\nthe gods of the dimension of nothingness …\nthe gods of the dimension of neither perception nor non-perception.’\nIt’s possible that this might happen.\nWhy is that?\nBecause they have principled and moral conduct."}},{"id":"mn41:43","sourceIds":["mn41:43.1","mn41:43.2","mn41:43.3","mn41:43.4","mn41:43.5"],"kind":"text","text":{"pi":"Ākaṅkheyya ce, gahapatayo, dhammacārī samacārī:\n‘aho vatāhaṁ āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja vihareyyan’ti;\nṭhānaṁ kho panetaṁ vijjati, yaṁ so āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja vihareyya.\nTaṁ kissa hetu?\nTathā hi so dhammacārī samacārī”ti.","en":"Someone of principled and moral conduct might wish:\n‘If only I might realize the undefiled freedom of heart and freedom by wisdom, and live having realized it with my own insight in this very life due to the ending of defilements.’\nIt’s possible that this might happen.\nWhy is that?\nBecause they have principled and moral conduct.”"}},{"id":"mn41:44","sourceIds":["mn41:44.1","mn41:44.2","mn41:44.3","mn41:44.4","mn41:44.5","mn41:44.6"],"kind":"text","text":{"pi":"Evaṁ vutte, sāleyyakā brāhmaṇagahapatikā bhagavantaṁ etadavocuṁ:\n“abhikkantaṁ, bho gotama, abhikkantaṁ, bho gotama.\nSeyyathāpi, bho gotama, nikkujjitaṁ vā ukkujjeyya, paṭicchannaṁ vā vivareyya, mūḷhassa vā maggaṁ ācikkheyya, andhakāre vā telapajjotaṁ dhāreyya: ‘cakkhumanto rūpāni dakkhantī’ti; evamevaṁ bhotā gotamena anekapariyāyena dhammo pakāsito.\nEte mayaṁ bhavantaṁ gotamaṁ saraṇaṁ gacchāma dhammañca bhikkhusaṅghañca.\nUpāsake no bhavaṁ gotamo dhāretu ajjatagge pāṇupete saraṇaṁ gate”ti.\nSāleyyakasuttaṁ niṭṭhitaṁ paṭhamaṁ.","en":"When he had spoken, the brahmins and householders of Sālā said to the Buddha,\n“Excellent, worthy Gotama! Excellent!\nAs if he were righting the overturned, or revealing the hidden, or pointing out the path to the lost, or lighting a lamp in the dark so people with clear eyes can see what’s there, worthy Gotama has made the teaching clear in many ways.\nWe go for refuge to the worthy Gotama, to the teaching, and to the mendicant Saṅgha.\nFrom this day forth, may the worthy Gotama remember us as lay followers who have gone for refuge for life.”"}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mn41/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}