{"id":"mn42","title":"The People of Verañjā","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mn42","title":"The People of Verañjā","units":[{"id":"mn42:0","sourceIds":["mn42:0.1","mn42:0.2"],"kind":"text","text":{"pi":"Majjhima Nikāya 42\nVerañjakasutta","en":"Middle Discourses 42\nThe People of Verañjā"}},{"id":"mn42:1","sourceIds":["mn42:1.1","mn42:1.2"],"kind":"text","text":{"pi":"Evaṁ me sutaṁ—\nekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.","en":"So I have heard.\nAt one time the Buddha was staying near Sāvatthī in Jeta’s Grove, Anāthapiṇḍika’s monastery."}},{"id":"mn42:2","sourceIds":["mn42:2.1","mn42:2.2","mn42:2.3","mn42:2.4","mn42:2.5","mn42:2.6","mn42:2.7","mn42:2.8"],"kind":"text","text":{"pi":"Tena kho pana samayena verañjakā brāhmaṇagahapatikā sāvatthiyaṁ paṭivasanti kenacideva karaṇīyena.\nAssosuṁ kho verañjakā brāhmaṇagahapatikā:\n“samaṇo khalu, bho, gotamo sakyaputto sakyakulā pabbajito sāvatthiyaṁ viharati jetavane anāthapiṇḍikassa ārāme.\nTaṁ kho pana bhavantaṁ gotamaṁ evaṁ kalyāṇo kittisaddo abbhuggato:\n‘itipi so bhagavā arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavā’.\nSo imaṁ lokaṁ sadevakaṁ samārakaṁ sabrahmakaṁ sassamaṇabrāhmaṇiṁ pajaṁ sadevamanussaṁ sayaṁ abhiññā sacchikatvā pavedeti.\nSo dhammaṁ deseti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ; kevalaparipuṇṇaṁ parisuddhaṁ brahmacariyaṁ pakāseti.\nSādhu kho pana tathārūpānaṁ arahataṁ dassanaṁ hotī”ti.","en":"Now at that time the brahmins and householders of Verañjā were residing in Sāvatthī on some business.\nThe brahmins and householders of Verañjā heard:\n“It seems the ascetic Gotama—a Sakyan, gone forth from a Sakyan family—is staying near Sāvatthī in Jeta’s Grove, Anāthapiṇḍika’s monastery.\nHe has this good reputation …\nIt’s good to see such perfected ones.”"}},{"id":"mn42:3","sourceIds":["mn42:3.1"],"kind":"text","text":{"pi":"Atha kho verañjakā brāhmaṇagahapatikā yena bhagavā tenupasaṅkamiṁsu; upasaṅkamitvā appekacce bhagavantaṁ abhivādetvā ekamantaṁ nisīdiṁsu; appekacce bhagavatā saddhiṁ sammodiṁsu, sammodanīyaṁ kathaṁ sāraṇīyaṁ vītisāretvā ekamantaṁ nisīdiṁsu; appekacce yena bhagavā tenañjaliṁ paṇāmetvā ekamantaṁ nisīdiṁsu; appekacce bhagavato santike nāmagottaṁ sāvetvā ekamantaṁ nisīdiṁsu; appekacce tuṇhībhūtā ekamantaṁ nisīdiṁsu. Ekamantaṁ nisinnā kho verañjakā brāhmaṇagahapatikā bhagavantaṁ etadavocuṁ:","en":"… They said to the Buddha:"}},{"id":"mn42:4","sourceIds":["mn42:4.1","mn42:4.2"],"kind":"text","text":{"pi":"“ko nu kho, bho gotama, hetu, ko paccayo yena m’idhekacce sattā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjanti?\nKo pana, bho gotama, hetu, ko paccayo yena m’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjantī”ti?","en":"“What is the cause, worthy Gotama, what is the reason why some sentient beings, when their body breaks up, after death, are reborn in a place of loss, a bad place, the underworld, hell?\nAnd what is the cause, worthy Gotama, what is the reason why some sentient beings, when their body breaks up, after death, are reborn in a good place, a heavenly realm?”"}},{"id":"mn42:5","sourceIds":["mn42:5.1","mn42:5.2"],"kind":"text","text":{"pi":"“Adhammacariyāvisamacariyāhetu kho, gahapatayo, evam’idhekacce sattā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjanti.\nDhammacariyāsamacariyāhetu kho, gahapatayo, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjantī”ti.","en":"“Unprincipled and immoral conduct is the reason why some sentient beings, when their body breaks up, after death, are reborn in a place of loss, a bad place, the underworld, hell.\nPrincipled and moral conduct is the reason why some sentient beings, when their body breaks up, after death, are reborn in a good place, a heavenly realm.”"}},{"id":"mn42:6","sourceIds":["mn42:6.1","mn42:6.2","mn42:6.3","mn42:6.4","mn42:6.5"],"kind":"text","text":{"pi":"“Na kho mayaṁ imassa bhoto gotamassa saṅkhittena bhāsitassa, vitthārena atthaṁ avibhattassa, vitthārena atthaṁ ājānāma.\nSādhu no bhavaṁ gotamo tathā dhammaṁ desetu yathā mayaṁ imassa bhoto gotamassa saṅkhittena bhāsitassa, vitthārena atthaṁ avibhattassa, vitthārena atthaṁ ājāneyyāmā”ti.\n“Tena hi, gahapatayo, suṇātha sādhukaṁ manasi karotha, bhāsissāmī”ti.\n“Evaṁ, bho”ti kho verañjakā brāhmaṇagahapatikā bhagavato paccassosuṁ.\nBhagavā etadavoca:","en":"“We don’t understand the detailed meaning of the worthy Gotama’s brief statement. …”"}},{"id":"mn42:7","sourceIds":["mn42:7.1"],"kind":"text","text":{"pi":"“Tividhaṁ kho, gahapatayo, kāyena adhammacārī visamacārī hoti, catubbidhaṁ vācāya adhammacārī visamacārī hoti, tividhaṁ manasā adhammacārī visamacārī hoti.","en":"“Householders, a person of unprincipled and immoral conduct is threefold by way of body, fourfold by way of speech, and threefold by way of mind. …” …"}},{"id":"mn42:8","sourceIds":["mn42:8.1","mn42:8.2","mn42:8.3","mn42:8.4","mn42:8.5"],"kind":"text","text":{"pi":"Kathañca, gahapatayo, tividhaṁ kāyena adhammacārī visamacārī hoti?\nIdha, gahapatayo, ekacco pāṇātipātī hoti. Luddo lohitapāṇi hatappahate niviṭṭho adayāpanno pāṇabhūtesu.\nAdinnādāyī kho pana hoti. Yaṁ taṁ parassa paravittūpakaraṇaṁ … taṁ adinnaṁ theyyasaṅkhātaṁ ādātā hoti.\nKāmesumicchācārī kho pana hoti. Yā tā māturakkhitā … tathārūpāsu cārittaṁ āpajjitā hoti.\nEvaṁ kho, gahapatayo, tividhaṁ kāyena adhammacārī visamacārī hoti."}},{"id":"mn42:9","sourceIds":["mn42:9.1","mn42:9.2","mn42:9.3","mn42:9.4","mn42:9.5","mn42:9.6"],"kind":"text","text":{"pi":"Kathañca, gahapatayo, catubbidhaṁ vācāya adhammacārī visamacārī hoti?\nIdha, gahapatayo, ekacco musāvādī hoti. Sabhāgato vā … sampajānamusā bhāsitā hoti.\nPisuṇavāco kho pana hoti. Ito sutvā amutra akkhātā … vaggakaraṇiṁ vācaṁ bhāsitā hoti.\nPharusavāco kho pana hoti. Yā sā vācā aṇḍakā kakkasā … tathārūpiṁ vācaṁ bhāsitā hoti.\nSamphappalāpī kho pana hoti. Akālavādī … apariyantavatiṁ anatthasaṁhitaṁ.\nEvaṁ kho, gahapatayo, catubbidhaṁ vācāya adhammacārī visamacārī hoti."}},{"id":"mn42:10","sourceIds":["mn42:10.1","mn42:10.2","mn42:10.3","mn42:10.4","mn42:10.5","mn42:10.6","mn42:10.7"],"kind":"text","text":{"pi":"Kathañca, gahapatayo, tividhaṁ manasā adhammacārī visamacārī hoti?\nIdha, gahapatayo, ekacco abhijjhālu hoti …pe… taṁ mamassā’ti.\nByāpannacitto kho pana hoti paduṭṭhamanasaṅkappo: ‘ime sattā haññantu vā … mā vā ahesun’ti.\nMicchādiṭṭhiko kho pana hoti viparītadassano:\n‘natthi dinnaṁ, natthi yiṭṭhaṁ … sacchikatvā pavedentī’ti.\nEvaṁ kho, gahapatayo, tividhaṁ manasā adhammacārī visamacārī hoti.\nEvaṁ adhammacariyāvisamacariyāhetu kho, gahapatayo, evam’idhekacce sattā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjanti."}},{"id":"mn42:11","sourceIds":["mn42:11.1"],"kind":"text","text":{"pi":"Tividhaṁ kho, gahapatayo, kāyena dhammacārī samacārī hoti, catubbidhaṁ vācāya dhammacārī samacārī hoti, tividhaṁ manasā dhammacārī samacārī hoti."}},{"id":"mn42:12","sourceIds":["mn42:12.1","mn42:12.2","mn42:12.3","mn42:12.4","mn42:12.5"],"kind":"text","text":{"pi":"Kathañca, gahapatayo, tividhaṁ kāyena dhammacārī samacārī hoti?\nIdha, gahapatayo, ekacco pāṇātipātaṁ pahāya pāṇātipātā paṭivirato hoti, nihitadaṇḍo nihitasattho lajjī dayāpanno sabbapāṇabhūtahitānukampī viharati.\nAdinnādānaṁ pahāya adinnādānā paṭivirato hoti, yaṁ taṁ parassa … taṁ nādinnaṁ theyyasaṅkhātaṁ ādātā hoti.\nKāmesumicchācāraṁ pahāya … tathārūpāsu na cārittaṁ āpajjitā hoti.\nEvaṁ kho, gahapatayo, tividhaṁ kāyena dhammacārī samacārī hoti."}},{"id":"mn42:13","sourceIds":["mn42:13.1","mn42:13.2","mn42:13.3","mn42:13.4","mn42:13.5","mn42:13.6"],"kind":"text","text":{"pi":"Kathañca, gahapatayo, catubbidhaṁ vācāya dhammacārī samacārī hoti?\nIdha, gahapatayo, ekacco musāvādaṁ pahāya musāvādā paṭivirato hoti. Sabhāgato vā …pe… na sampajānamusā bhāsitā hoti.\nPisuṇaṁ vācaṁ pahāya … samaggakaraṇiṁ vācaṁ bhāsitā hoti.\nPharusaṁ vācaṁ pahāya … tathārūpaṁ vācaṁ bhāsitā hoti.\nSamphappalāpaṁ pahāya … kālena sāpadesaṁ pariyantavatiṁ atthasaṁhitaṁ.\nEvaṁ kho, gahapatayo, catubbidhaṁ vācāya dhammacārī samacārī hoti."}},{"id":"mn42:14","sourceIds":["mn42:14.1","mn42:14.2","mn42:14.3","mn42:14.4","mn42:14.5","mn42:14.6","mn42:14.7"],"kind":"text","text":{"pi":"Kathañca, gahapatayo, tividhaṁ manasā dhammacārī samacārī hoti?\nIdha, gahapatayo, ekacco anabhijjhālu hoti. Yaṁ taṁ parassa paravittūpakaraṇaṁ taṁ nābhijjhātā hoti: ‘aho vata yaṁ parassa, taṁ mamassā’ti.\nAbyāpannacitto kho pana hoti appaduṭṭhamanasaṅkappo: ‘ime sattā averā abyābajjhā anīghā sukhī attānaṁ pariharantū’ti.\nSammādiṭṭhiko kho pana hoti aviparītadassano:\n‘atthi dinnaṁ, atthi yiṭṭhaṁ … sayaṁ abhiññā sacchikatvā pavedentī’ti.\nEvaṁ kho, gahapatayo, tividhaṁ manasā dhammacārī samacārī hoti.\nEvaṁ dhammacariyāsamacariyāhetu kho, gahapatayo, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapajjanti."}},{"id":"mn42:15","sourceIds":["mn42:15.1","mn42:15.2","mn42:15.3","mn42:15.4","mn42:15.5"],"kind":"text","text":{"pi":"Ākaṅkheyya ce, gahapatayo, dhammacārī samacārī:\n‘aho vatāhaṁ kāyassa bhedā paraṁ maraṇā khattiyamahāsālānaṁ sahabyataṁ upapajjeyyan’ti;\nṭhānaṁ kho panetaṁ vijjati, yaṁ so kāyassa bhedā paraṁ maraṇā khattiyamahāsālānaṁ sahabyataṁ upapajjeyya.\nTaṁ kissa hetu?\nTathā hi so dhammacārī samacārī."}},{"id":"mn42:16-17","sourceIds":["mn42:16-17.1","mn42:16-17.2","mn42:16-17.3","mn42:16-17.4","mn42:16-17.5","mn42:16-17.6"],"kind":"text","text":{"pi":"Ākaṅkheyya ce, gahapatayo, dhammacārī samacārī:\n‘aho vatāhaṁ kāyassa bhedā paraṁ maraṇā brāhmaṇamahāsālānaṁ …pe…\ngahapatimahāsālānaṁ sahabyataṁ upapajjeyyan’ti;\nṭhānaṁ kho panetaṁ vijjati, yaṁ so kāyassa bhedā paraṁ maraṇā gahapatimahāsālānaṁ sahabyataṁ upapajjeyya.\nTaṁ kissa hetu?\nTathā hi so dhammacārī samacārī."}},{"id":"mn42:18-42","sourceIds":["mn42:18-42.1","mn42:18-42.2","mn42:18-42.3","mn42:18-42.4","mn42:18-42.5","mn42:18-42.6","mn42:18-42.7","mn42:18-42.8","mn42:18-42.9","mn42:18-42.10","mn42:18-42.11","mn42:18-42.12","mn42:18-42.13","mn42:18-42.14","mn42:18-42.15","mn42:18-42.16","mn42:18-42.17","mn42:18-42.18","mn42:18-42.19","mn42:18-42.20","mn42:18-42.21","mn42:18-42.22","mn42:18-42.23","mn42:18-42.24","mn42:18-42.25","mn42:18-42.26","mn42:18-42.27","mn42:18-42.28","mn42:18-42.29","mn42:18-42.30","mn42:18-42.31","mn42:18-42.32","mn42:18-42.33","mn42:18-42.34","mn42:18-42.35","mn42:18-42.36","mn42:18-42.37","mn42:18-42.38","mn42:18-42.39","mn42:18-42.40"],"kind":"text","text":{"pi":"Ākaṅkheyya ce, gahapatayo, dhammacārī samacārī:\n‘aho vatāhaṁ kāyassa bhedā paraṁ maraṇā cātumahārājikānaṁ devānaṁ sahabyataṁ upapajjeyyan’ti;\nṭhānaṁ kho panetaṁ vijjati, yaṁ so kāyassa bhedā paraṁ maraṇā cātumahārājikānaṁ devānaṁ sahabyataṁ upapajjeyya.\nTaṁ kissa hetu?\nTathā hi so dhammacārī samacārī.\nĀkaṅkheyya ce, gahapatayo, dhammacārī samacārī:\n‘aho vatāhaṁ kāyassa bhedā paraṁ maraṇā tāvatiṁsānaṁ devānaṁ …\nyāmānaṁ devānaṁ …\ntusitānaṁ devānaṁ …\nnimmānaratīnaṁ devānaṁ …\nparanimmitavasavattīnaṁ devānaṁ …\nbrahmakāyikānaṁ devānaṁ sahabyataṁ upapajjeyyan’ti;\nṭhānaṁ kho panetaṁ vijjati, yaṁ so kāyassa bhedā paraṁ maraṇā brahmakāyikānaṁ devānaṁ sahabyataṁ upapajjeyya.\nTaṁ kissa hetu?\nTathā hi so dhammacārī samacārī.\nĀkaṅkheyya ce, gahapatayo, dhammacārī samacārī:\n‘aho vatāhaṁ kāyassa bhedā paraṁ maraṇā ābhānaṁ devānaṁ sahabyataṁ upapajjeyyan’ti;\nṭhānaṁ kho panetaṁ vijjati, yaṁ so kāyassa bhedā paraṁ maraṇā ābhānaṁ devānaṁ sahabyataṁ upapajjeyya.\nTaṁ kissa hetu?\nTathā hi so dhammacārī samacārī.\nĀkaṅkheyya ce, gahapatayo, dhammacārī samacārī:\n‘aho vatāhaṁ kāyassa bhedā paraṁ maraṇā parittābhānaṁ devānaṁ …pe…\nappamāṇābhānaṁ devānaṁ …\nābhassarānaṁ devānaṁ …\nparittasubhānaṁ devānaṁ …\nappamāṇasubhānaṁ devānaṁ …\nsubhakiṇhānaṁ devānaṁ …\nvehapphalānaṁ devānaṁ …\navihānaṁ devānaṁ …\natappānaṁ devānaṁ …\nsudassānaṁ devānaṁ …\nsudassīnaṁ devānaṁ …\nakaniṭṭhānaṁ devānaṁ …\nākāsānañcāyatanūpagānaṁ devānaṁ …\nviññāṇañcāyatanūpagānaṁ devānaṁ …\nākiñcaññāyatanūpagānaṁ devānaṁ …\nnevasaññānāsaññāyatanūpagānaṁ devānaṁ sahabyataṁ upapajjeyyan’ti;\nṭhānaṁ kho panetaṁ vijjati, yaṁ so kāyassa bhedā paraṁ maraṇā nevasaññānāsaññāyatanūpagānaṁ devānaṁ sahabyataṁ upapajjeyya.\nTaṁ kissa hetu?\nTathā hi so dhammacārī samacārī."}},{"id":"mn42:43","sourceIds":["mn42:43.1","mn42:43.2","mn42:43.3","mn42:43.4","mn42:43.5"],"kind":"text","text":{"pi":"Ākaṅkheyya ce, gahapatayo, dhammacārī samacārī:\n‘aho vatāhaṁ āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja vihareyyan’ti;\nṭhānaṁ kho panetaṁ vijjati, ‘yaṁ so āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja vihareyya.\nTaṁ kissa hetu?\nTathā hi so dhammacārī samacārī’”ti."}},{"id":"mn42:44","sourceIds":["mn42:44.1","mn42:44.2","mn42:44.3","mn42:44.4","mn42:44.5","mn42:44.6"],"kind":"text","text":{"pi":"Evaṁ vutte, verañjakā brāhmaṇagahapatikā bhagavantaṁ etadavocuṁ:\n“abhikkantaṁ, bho gotama, abhikkantaṁ, bho gotama.\nSeyyathāpi, bho gotama, nikkujjitaṁ vā ukkujjeyya, paṭicchannaṁ vā vivareyya, mūḷhassa vā maggaṁ ācikkheyya, andhakāre vā telapajjotaṁ dhāreyya: ‘cakkhumanto rūpāni dakkhantī’ti; evamevaṁ bhotā gotamena anekapariyāyena dhammo pakāsito.\nEte mayaṁ bhavantaṁ gotamaṁ saraṇaṁ gacchāma dhammañca bhikkhusaṅghañca.\nUpāsake no bhavaṁ gotamo dhāretu ajjatagge pāṇupete saraṇaṁ gate”ti.\nVerañjakasuttaṁ niṭṭhitaṁ dutiyaṁ."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mn42/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}