{"id":"mnd4","title":"4. Suddhaṭṭhakasuttaniddesa","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mnd4","title":"4. Suddhaṭṭhakasuttaniddesa","units":[{"id":"mnd4:0","sourceIds":["mnd4:0.1","mnd4:0.2","mnd4:0.3"],"kind":"text","text":{"pi":"Mahāniddesa\nAṭṭhakavagga\n4. Suddhaṭṭhakasuttaniddesa"}},{"id":"mnd4:1","sourceIds":["mnd4:1.1"],"kind":"text","text":{"pi":"Atha suddhaṭṭhakasuttaniddesaṁ vakkhati—"}},{"id":"mnd4:2","sourceIds":["mnd4:2.1","mnd4:2.2","mnd4:2.3","mnd4:2.4"],"kind":"text","text":{"pi":"Passāmi suddhaṁ paramaṁ arogaṁ,\nDiṭṭhena saṁsuddhi narassa hoti;\nEvābhijānaṁ paramanti ñatvā,\nSuddhānupassīti pacceti ñāṇaṁ."}},{"id":"mnd4:3","sourceIds":["mnd4:3.1","mnd4:3.2","mnd4:3.3","mnd4:3.4"],"kind":"text","text":{"pi":"Passāmi suddhaṁ paramaṁ aroganti.\nPassāmi suddhanti passāmi suddhaṁ, dakkhāmi suddhaṁ, olokemi suddhaṁ, nijjhāyāmi suddhaṁ, upaparikkhāmi suddhaṁ.\nParamaṁ aroganti paramaṁ ārogyappattaṁ tāṇappattaṁ leṇappattaṁ saraṇappattaṁ abhayappattaṁ accutappattaṁ amatappattaṁ nibbānappattanti—\npassāmi suddhaṁ paramaṁ arogaṁ."}},{"id":"mnd4:4","sourceIds":["mnd4:4.1","mnd4:4.2","mnd4:4.3"],"kind":"text","text":{"pi":"Diṭṭhena saṁsuddhi narassa hotīti.\nCakkhuviññāṇaṁ rūpadassanena narassa suddhi visuddhi parisuddhi, mutti vimutti parimutti hoti, naro sujjhati visujjhati parisujjhati, muccati vimuccati parimuccatīti—\ndiṭṭhena saṁsuddhi narassa hoti."}},{"id":"mnd4:5","sourceIds":["mnd4:5.1","mnd4:5.2","mnd4:5.3","mnd4:5.4"],"kind":"text","text":{"pi":"Evābhijānaṁ paramanti ñatvāti.\nEvaṁ abhijānanto ājānanto vijānanto paṭivijānanto paṭivijjhanto.\n“Idaṁ paramaṁ aggaṁ seṭṭhaṁ visiṭṭhaṁ pāmokkhaṁ uttamaṁ pavaran”ti ñatvā jānitvā tulayitvā tīrayitvā vibhāvayitvā vibhūtaṁ katvāti—\nevābhijānaṁ paramanti ñatvā."}},{"id":"mnd4:6","sourceIds":["mnd4:6.1","mnd4:6.2","mnd4:6.3"],"kind":"text","text":{"pi":"Suddhānupassīti pacceti ñāṇanti.\nYo suddhaṁ passati, so suddhānupassī, pacceti ñāṇanti cakkhuviññāṇaṁ rūpadassanena ñāṇanti pacceti, maggoti pacceti, pathoti pacceti, niyyānanti paccetīti—\nsuddhānupassī pacceti ñāṇaṁ."}},{"id":"mnd4:7","sourceIds":["mnd4:7.1"],"kind":"text","text":{"pi":"Tenāha bhagavā—"}},{"id":"mnd4:8","sourceIds":["mnd4:8.1","mnd4:8.2","mnd4:8.3","mnd4:8.4"],"kind":"text","text":{"pi":"“Passāmi suddhaṁ paramaṁ arogaṁ,\nDiṭṭhena saṁsuddhi narassa hoti;\nEvābhijānaṁ paramanti ñatvā,\nSuddhānupassīti pacceti ñāṇan”ti."}},{"id":"mnd4:9","sourceIds":["mnd4:9.1","mnd4:9.2","mnd4:9.3","mnd4:9.4"],"kind":"text","text":{"pi":"Diṭṭhena ce suddhi narassa hoti,\nÑāṇena vā so pajahāti dukkhaṁ;\nAññena so sujjhati sopadhīko,\nDiṭṭhī hi naṁ pāva tathā vadānaṁ."}},{"id":"mnd4:10","sourceIds":["mnd4:10.1","mnd4:10.2","mnd4:10.3"],"kind":"text","text":{"pi":"Diṭṭhena ce suddhi narassa hotīti.\nCakkhuviññāṇaṁ rūpadassanena ce narassa suddhi visuddhi parisuddhi, mutti vimutti parimutti hoti, naro sujjhati visujjhati parisujjhati, muccati vimuccati parimuccatīti—\ndiṭṭhena ce suddhi narassa hoti."}},{"id":"mnd4:11","sourceIds":["mnd4:11.1","mnd4:11.2"],"kind":"text","text":{"pi":"Ñāṇena vā so pajahāti dukkhanti cakkhuviññāṇaṁ rūpadassanena ce naro jātidukkhaṁ pajahati, jarādukkhaṁ pajahati, byādhidukkhaṁ pajahati, maraṇadukkhaṁ pajahati, sokaparidevadukkhadomanassupāyāsadukkhaṁ pajahatīti—\nñāṇena vā so pajahāti dukkhaṁ."}},{"id":"mnd4:12","sourceIds":["mnd4:12.1","mnd4:12.2","mnd4:12.3","mnd4:12.4"],"kind":"text","text":{"pi":"Aññena so sujjhati sopadhīkoti.\nAññena asuddhimaggena micchāpaṭipadāya aniyyānikapathena aññatra satipaṭṭhānehi aññatra sammappadhānehi aññatra iddhipādehi aññatra indriyehi aññatra balehi aññatra bojjhaṅgehi aññatra ariyā aṭṭhaṅgikā maggā naro sujjhati visujjhati parisujjhati, muccati vimuccati parimuccati.\nSopadhīkoti sarāgo sadoso samoho samāno sataṇho sadiṭṭhi sakileso saupādānoti—\naññena so sujjhati sopadhīko."}},{"id":"mnd4:13","sourceIds":["mnd4:13.1","mnd4:13.2","mnd4:13.3","mnd4:13.4","mnd4:13.5","mnd4:13.6","mnd4:13.7","mnd4:13.8","mnd4:13.9","mnd4:13.10","mnd4:13.11","mnd4:13.12","mnd4:13.13","mnd4:13.14","mnd4:13.15"],"kind":"text","text":{"pi":"Diṭṭhī hi naṁ pāva tathā vadānanti.\nSāva diṭṭhi taṁ puggalaṁ pāvadati—\niti vāyaṁ puggalo micchādiṭṭhiko viparītadassano.\nTathā vadānanti tathā vadantaṁ kathentaṁ bhaṇantaṁ dīpayantaṁ voharantaṁ.\n“Sassato loko, idameva saccaṁ moghamaññan”ti tathā vadantaṁ kathentaṁ bhaṇantaṁ dīpayantaṁ voharantaṁ.\n“Asassato loko …\nantavā loko …\nanantavā loko …\ntaṁ jīvaṁ taṁ sarīraṁ …\naññaṁ jīvaṁ aññaṁ sarīraṁ …\nhoti tathāgato paraṁ maraṇā …\nna hoti tathāgato paraṁ maraṇā …\nhoti ca na ca hoti tathāgato paraṁ maraṇā …\nneva hoti na na hoti tathāgato paraṁ maraṇā, idameva saccaṁ moghamaññan”ti tathā vadantaṁ kathentaṁ bhaṇantaṁ dīpayantaṁ voharantanti—\ndiṭṭhī hi naṁ pāva tathā vadānaṁ."}},{"id":"mnd4:14","sourceIds":["mnd4:14.1"],"kind":"text","text":{"pi":"Tenāha bhagavā—"}},{"id":"mnd4:15","sourceIds":["mnd4:15.1","mnd4:15.2","mnd4:15.3","mnd4:15.4"],"kind":"text","text":{"pi":"“Diṭṭhena ce suddhi narassa hoti,\nÑāṇena vā so pajahāti dukkhaṁ;\nAññena so sujjhati sopadhīko,\nDiṭṭhī hi naṁ pāva tathā vadānan”ti."}},{"id":"mnd4:16","sourceIds":["mnd4:16.1","mnd4:16.2","mnd4:16.3","mnd4:16.4"],"kind":"text","text":{"pi":"Na brāhmaṇo aññato suddhimāha,\nDiṭṭhe sute sīlavate mute vā;\nPuññe ca pāpe ca anūpalitto,\nAttañjaho nayidha pakubbamāno."}},{"id":"mnd4:17","sourceIds":["mnd4:17.1","mnd4:17.2","mnd4:17.3","mnd4:17.4","mnd4:17.5"],"kind":"text","text":{"pi":"Na brāhmaṇo aññato suddhimāha diṭṭhe sute sīlavate mute vāti.\nNāti paṭikkhepo.\nBrāhmaṇoti sattannaṁ dhammānaṁ bāhitattā brāhmaṇo—\nsakkāyadiṭṭhi bāhitā hoti, vicikicchā bāhitā hoti, sīlabbataparāmāso bāhito hoti, rāgo bāhito hoti, doso bāhito hoti, moho bāhito hoti, māno bāhito hoti.\nBāhitāssa honti pāpakā akusalā dhammā saṅkilesikā ponobhavikā sadarā dukkhavipākā āyatiṁ jātijarāmaraṇiyā."}},{"id":"mnd4:18","sourceIds":["mnd4:18.1","mnd4:18.2","mnd4:18.3","mnd4:18.4","mnd4:18.5"],"kind":"text","text":{"pi":"Bāhitvā sabbapāpakāni,\n(sabhiyāti bhagavā)\nVimalo sādhusamāhito ṭhitatto;\nSaṁsāramaticca kevalī so,\nAsito tādi pavuccate sa brahmā."}},{"id":"mnd4:19","sourceIds":["mnd4:19.1","mnd4:19.2","mnd4:19.3"],"kind":"text","text":{"pi":"Na brāhmaṇo aññato suddhimāhāti.\nBrāhmaṇo aññena asuddhimaggena micchāpaṭipadāya aniyyānikapathena aññatra satipaṭṭhānehi aññatra sammappadhānehi aññatra iddhipādehi aññatra indriyehi aññatra balehi aññatra bojjhaṅgehi aññatra ariyena aṭṭhaṅgikena maggena suddhiṁ visuddhiṁ parisuddhiṁ, muttiṁ vimuttiṁ parimuttiṁ, nāha na katheti na bhaṇati na dīpayati na voharatīti—\nna brāhmaṇo aññato suddhimāha."}},{"id":"mnd4:20","sourceIds":["mnd4:20.1","mnd4:20.2","mnd4:20.3","mnd4:20.4","mnd4:20.5","mnd4:20.6","mnd4:20.7","mnd4:20.8","mnd4:20.9","mnd4:20.10","mnd4:20.11","mnd4:20.12"],"kind":"text","text":{"pi":"Diṭṭhe sute sīlavate mute vāti.\nSanteke samaṇabrāhmaṇā diṭṭhisuddhikā.\nTe ekaccānaṁ rūpānaṁ dassanaṁ maṅgalaṁ paccenti, ekaccānaṁ rūpānaṁ dassanaṁ amaṅgalaṁ paccenti.\nKatamesaṁ rūpānaṁ dassanaṁ maṅgalaṁ paccenti?\nTe kālato vuṭṭhahitvā abhimaṅgalagatāni rūpāni passanti—\ncāṭakasakuṇaṁ passanti, phussaveḷuvalaṭṭhiṁ passanti, gabbhinitthiṁ passanti, kumārakaṁ khandhe āropetvā gacchantaṁ passanti, puṇṇaghaṭaṁ passanti, rohitamacchaṁ passanti, ājaññaṁ passanti, ājaññarathaṁ passanti, usabhaṁ passanti, gokapilaṁ passanti.\nEvarūpānaṁ rūpānaṁ dassanaṁ maṅgalaṁ paccenti.\nKatamesaṁ rūpānaṁ dassanaṁ amaṅgalaṁ paccenti?\nPalālapuñjaṁ passanti, takkaghaṭaṁ passanti, rittaghaṭaṁ passanti, naṭaṁ passanti, naggasamaṇakaṁ passanti, kharaṁ passanti, kharayānaṁ passanti, ekayuttayānaṁ passanti, kāṇaṁ passanti, kuṇiṁ passanti, khañjaṁ passanti, pakkhahataṁ passanti, jiṇṇakaṁ passanti, byādhikaṁ passanti, mataṁ passanti.\nEvarūpānaṁ rūpānaṁ dassanaṁ amaṅgalaṁ paccenti.\nIme te samaṇabrāhmaṇā diṭṭhisuddhikā.\nTe diṭṭhena suddhiṁ visuddhiṁ parisuddhiṁ muttiṁ vimuttiṁ parimuttiṁ paccenti."}},{"id":"mnd4:21","sourceIds":["mnd4:21.1","mnd4:21.2","mnd4:21.3","mnd4:21.4","mnd4:21.5","mnd4:21.6","mnd4:21.7","mnd4:21.8","mnd4:21.9","mnd4:21.10","mnd4:21.11"],"kind":"text","text":{"pi":"Santeke samaṇabrāhmaṇā sutasuddhikā.\nTe ekaccānaṁ saddānaṁ savanaṁ maṅgalaṁ paccenti, ekaccānaṁ saddānaṁ savanaṁ amaṅgalaṁ paccenti.\nKatamesaṁ saddānaṁ savanaṁ maṅgalaṁ paccenti?\nTe kālato vuṭṭhahitvā abhimaṅgalagatāni saddāni suṇanti—\nvaḍḍhāti vā vaḍḍhamānāti vā puṇṇāti vā phussāti vā asokāti vā sumanāti vā sunakkhattāti vā sumaṅgalāti vā sirīti vā sirīvaḍḍhāti vā.\nEvarūpānaṁ saddānaṁ savanaṁ maṅgalaṁ paccenti.\nKatamesaṁ saddānaṁ savanaṁ amaṅgalaṁ paccenti?\nKāṇoti vā kuṇīti vā khañjoti vā pakkhahatoti vā jiṇṇakoti vā byādhikoti vā matoti vā chindanti vā bhindanti vā daḍḍhanti vā naṭṭhanti vā natthīti vā.\nEvarūpānaṁ saddānaṁ savanaṁ amaṅgalaṁ paccenti.\nIme te samaṇabrāhmaṇā sutasuddhikā.\nTe sutena suddhiṁ visuddhiṁ parisuddhiṁ muttiṁ vimuttiṁ parimuttiṁ paccenti."}},{"id":"mnd4:22","sourceIds":["mnd4:22.1","mnd4:22.2","mnd4:22.3","mnd4:22.4","mnd4:22.5","mnd4:22.6","mnd4:22.7","mnd4:22.8"],"kind":"text","text":{"pi":"Santeke samaṇabrāhmaṇā sīlasuddhikā.\nTe sīlamattena saṁyamamattena saṁvaramattena avītikkamamattena suddhiṁ visuddhiṁ parisuddhiṁ muttiṁ vimuttiṁ parimuttiṁ paccenti.\nSamaṇamuṇḍikāputto evamāha—\n“catūhi kho ahaṁ, gahapati, dhammehi samannāgataṁ purisapuggalaṁ paññāpemi sampannakusalaṁ paramakusalaṁ uttamapattippattaṁ samaṇaṁ ayojjaṁ.\nKatamehi catūhi?\nIdha, gahapati, na kāyena pāpakaṁ kammaṁ karoti, na pāpikaṁ vācaṁ bhāsati, na pāpakaṁ saṅkappaṁ saṅkappati, na pāpakaṁ ājīvaṁ ājīvati.\nImehi kho ahaṁ, gahapati, catūhi dhammehi samannāgataṁ purisapuggalaṁ paññāpemi sampannakusalaṁ paramakusalaṁ uttamapattippattaṁ samaṇaṁ ayojjaṁ”.\nEvamevaṁ santeke samaṇabrāhmaṇā sīlasuddhikā, te sīlamattena saṁyamamattena saṁvaramattena avītikkamamattena suddhiṁ visuddhiṁ parisuddhiṁ muttiṁ vimuttiṁ parimuttiṁ paccenti."}},{"id":"mnd4:23","sourceIds":["mnd4:23.1","mnd4:23.2","mnd4:23.3","mnd4:23.4"],"kind":"text","text":{"pi":"Santeke samaṇabrāhmaṇā vatasuddhikā.\nTe hatthivatikā vā honti, assavatikā vā honti, govatikā vā honti, kukkuravatikā vā honti, kākavatikā vā honti, vāsudevavatikā vā honti, baladevavatikā vā honti, puṇṇabhaddavatikā vā honti, maṇibhaddavatikā vā honti, aggivatikā vā honti, nāgavatikā vā honti, supaṇṇavatikā vā honti, yakkhavatikā vā honti, asuravatikā vā honti, gandhabbavatikā vā honti, mahārājavatikā vā honti, candavatikā vā honti, sūriyavatikā vā honti, indavatikā vā honti, brahmavatikā vā honti, devavatikā vā honti, disāvatikā vā honti.\nIme te samaṇabrāhmaṇā vatasuddhikā.\nTe vatena suddhiṁ visuddhiṁ parisuddhiṁ muttiṁ vimuttiṁ parimuttiṁ paccenti."}},{"id":"mnd4:24","sourceIds":["mnd4:24.1","mnd4:24.2","mnd4:24.3","mnd4:24.4","mnd4:24.5"],"kind":"text","text":{"pi":"Santeke samaṇabrāhmaṇā mutasuddhikā.\nTe kālato uṭṭhahitvā pathaviṁ āmasanti, haritaṁ āmasanti, gomayaṁ āmasanti, kacchapaṁ āmasanti, phālaṁ akkamanti, tilavāhaṁ āmasanti, phussatilaṁ khādanti, phussatelaṁ makkhenti, phussadantakaṭṭhaṁ khādanti, phussamattikāya nhāyanti, phussasāṭakaṁ nivāsenti, phussaveṭhanaṁ veṭhenti.\nIme te samaṇabrāhmaṇā mutasuddhikā.\nTe mutena suddhiṁ visuddhiṁ parisuddhiṁ muttiṁ vimuttiṁ parimuttiṁ paccenti.\nNa brāhmaṇo aññato suddhimāha."}},{"id":"mnd4:25","sourceIds":["mnd4:25.1","mnd4:25.2","mnd4:25.3"],"kind":"text","text":{"pi":"Diṭṭhe sute sīlavate mute vāti.\nBrāhmaṇo diṭṭhasuddhiyāpi suddhiṁ nāha, sutasuddhiyāpi suddhiṁ nāha, sīlasuddhiyāpi suddhiṁ nāha, vatasuddhiyāpi suddhiṁ nāha, mutasuddhiyāpi suddhiṁ nāha na katheti na bhaṇati na dīpayati na voharatīti—\nna brāhmaṇo aññato suddhimāha diṭṭhe sute sīlavate mute vā."}},{"id":"mnd4:26","sourceIds":["mnd4:26.1","mnd4:26.2","mnd4:26.3","mnd4:26.4","mnd4:26.5"],"kind":"text","text":{"pi":"Puññe ca pāpe ca anūpalittoti.\nPuññaṁ vuccati yaṁ kiñci tedhātukaṁ kusalābhisaṅkhāraṁ, apuññaṁ vuccati sabbaṁ akusalaṁ.\nYato puññābhisaṅkhāro ca apuññābhisaṅkhāro ca āneñjābhisaṅkhāro ca pahīnā honti ucchinnamūlā tālāvatthukatā anabhāvaṅkatā āyatiṁ anuppādadhammā;\nettāvatā puññe ca pāpe ca na limpati na palimpati na upalimpati alitto apalitto anūpalitto nikkhanto nissaṭo vippamutto visaññutto vimariyādikatena cetasā viharatīti—\npuññe ca pāpe ca anūpalitto."}},{"id":"mnd4:27","sourceIds":["mnd4:27.1","mnd4:27.2","mnd4:27.3","mnd4:27.4","mnd4:27.5","mnd4:27.6"],"kind":"text","text":{"pi":"Attañjaho nayidha pakubbamānoti.\nAttañjahoti attadiṭṭhijaho.\nAttañjahoti gāhaṁ jaho.\nAttañjahoti taṇhāvasena diṭṭhivasena gahitaṁ parāmaṭṭhaṁ abhiniviṭṭhaṁ ajjhositaṁ adhimuttaṁ, sabbaṁ taṁ cattaṁ hoti vantaṁ muttaṁ pahīnaṁ paṭinissaṭṭhaṁ.\nNayidha pakubbamānoti puññābhisaṅkhāraṁ vā apuññābhisaṅkhāraṁ vā āneñjābhisaṅkhāraṁ vā apakubbamāno ajanayamāno asañjanayamāno anibbattayamāno anabhinibbattayamānoti—\nattañjaho nayidha pakubbamāno."}},{"id":"mnd4:28","sourceIds":["mnd4:28.1"],"kind":"text","text":{"pi":"Tenāha bhagavā—"}},{"id":"mnd4:29","sourceIds":["mnd4:29.1","mnd4:29.2","mnd4:29.3","mnd4:29.4"],"kind":"text","text":{"pi":"“Na brāhmaṇo aññato suddhimāha,\nDiṭṭhe sute sīlavate mute vā;\nPuññe ca pāpe ca anūpalitto,\nAttañjaho nayidha pakubbamāno”ti."}},{"id":"mnd4:30","sourceIds":["mnd4:30.1","mnd4:30.2","mnd4:30.3","mnd4:30.4"],"kind":"text","text":{"pi":"Purimaṁ pahāya aparaṁ sitāse,\nEjānugā te na taranti saṅgaṁ;\nTe uggahāyanti nirassajanti,\nKapīva sākhaṁ pamuñcaṁ gahāya."}},{"id":"mnd4:31","sourceIds":["mnd4:31.1","mnd4:31.2","mnd4:31.3","mnd4:31.4","mnd4:31.5","mnd4:31.6","mnd4:31.7","mnd4:31.8"],"kind":"text","text":{"pi":"Purimaṁ pahāya aparaṁ sitāseti.\nPurimaṁ satthāraṁ pahāya paraṁ satthāraṁ nissitā;\npurimaṁ dhammakkhānaṁ pahāya aparaṁ dhammakkhānaṁ nissitā;\npurimaṁ gaṇaṁ pahāya aparaṁ gaṇaṁ nissitā;\npurimaṁ diṭṭhiṁ pahāya aparaṁ diṭṭhiṁ nissitā;\npurimaṁ paṭipadaṁ pahāya aparaṁ paṭipadaṁ nissitā;\npurimaṁ maggaṁ pahāya aparaṁ maggaṁ nissitā sannissitā allīnā upagatā ajjhositā adhimuttāti—\npurimaṁ pahāya aparaṁ sitāse."}},{"id":"mnd4:32","sourceIds":["mnd4:32.1","mnd4:32.2","mnd4:32.3","mnd4:32.4","mnd4:32.5","mnd4:32.6"],"kind":"text","text":{"pi":"Ejānugā te na taranti saṅganti.\nEjā vuccati taṇhā.\nYo rāgo sārāgo …pe… abhijjhā lobho akusalamūlaṁ.\nEjānugāti ejānugā ejānugatā ejānusaṭā ejāya pannā patitā abhibhūtā pariyādinnacittā.\nTe na taranti saṅganti rāgasaṅgaṁ dosasaṅgaṁ mohasaṅgaṁ mānasaṅgaṁ diṭṭhisaṅgaṁ kilesasaṅgaṁ duccaritasaṅgaṁ na taranti na uttaranti na pataranti na samatikkamanti na vītivattantīti—\nejānugā te na taranti saṅgaṁ."}},{"id":"mnd4:33","sourceIds":["mnd4:33.1","mnd4:33.2","mnd4:33.3","mnd4:33.4","mnd4:33.5","mnd4:33.6","mnd4:33.7","mnd4:33.8"],"kind":"text","text":{"pi":"Te uggahāyanti nirassajantīti satthāraṁ gaṇhanti, taṁ muñcitvā aññaṁ satthāraṁ gaṇhanti;\ndhammakkhānaṁ gaṇhanti, taṁ muñcitvā aññaṁ dhammakkhānaṁ gaṇhanti;\ngaṇaṁ gaṇhanti, taṁ muñcitvā aññaṁ gaṇaṁ gaṇhanti;\ndiṭṭhiṁ gaṇhanti, taṁ muñcitvā aññaṁ diṭṭhiṁ gaṇhanti;\npaṭipadaṁ gaṇhanti, taṁ muñcitvā aññaṁ paṭipadaṁ gaṇhanti;\nmaggaṁ gaṇhanti, taṁ muñcitvā aññaṁ maggaṁ gaṇhanti;\ngaṇhanti ca muñcanti ca ādiyanti ca nirassajanti cāti—\nte uggahāyanti nirassajanti."}},{"id":"mnd4:34","sourceIds":["mnd4:34.1","mnd4:34.2","mnd4:34.3","mnd4:34.4"],"kind":"text","text":{"pi":"Kapīva sākhaṁ pamuñcaṁ gahāyāti.\nYathā makkaṭo araññe pavane caramāno sākhaṁ gaṇhāti, taṁ muñcitvā aññaṁ sākhaṁ gaṇhāti.\nEvamevaṁ puthusamaṇabrāhmaṇā puthudiṭṭhigatāni gaṇhanti ca muñcanti ca ādiyanti ca nirassajanti cāti—\nkapīva sākhaṁ pamuñcaṁ gahāya."}},{"id":"mnd4:35","sourceIds":["mnd4:35.1"],"kind":"text","text":{"pi":"Tenāha bhagavā—"}},{"id":"mnd4:36","sourceIds":["mnd4:36.1","mnd4:36.2","mnd4:36.3","mnd4:36.4"],"kind":"text","text":{"pi":"“Purimaṁ pahāya aparaṁ sitāse,\nEjānugā te na taranti saṅgaṁ;\nTe uggahāyanti nirassajanti,\nKapīva sākhaṁ pamuñcaṁ gahāyā”ti."}},{"id":"mnd4:37","sourceIds":["mnd4:37.1","mnd4:37.2","mnd4:37.3","mnd4:37.4"],"kind":"text","text":{"pi":"Sayaṁ samādāya vatāni jantu,\nUccāvacaṁ gacchati saññasatto;\nVidvā ca vedehi samecca dhammaṁ,\nNa uccāvacaṁ gacchati bhūripañño."}},{"id":"mnd4:38","sourceIds":["mnd4:38.1","mnd4:38.2","mnd4:38.3","mnd4:38.4","mnd4:38.5","mnd4:38.6"],"kind":"text","text":{"pi":"Sayaṁ samādāya vatāni jantūti.\nSayaṁ samādāyāti sāmaṁ samādāya.\nVatānīti hatthivataṁ vā assavataṁ vā govataṁ vā kukkūravataṁ vā kākavataṁ vā vāsudevavataṁ vā baladevavataṁ vā puṇṇabhaddavataṁ vā maṇibhaddavataṁ vā aggivataṁ vā nāgavataṁ vā supaṇṇavataṁ vā yakkhavataṁ vā asuravataṁ vā …pe…\ndisāvataṁ vā ādāya samādāya ādiyitvā samādiyitvā gaṇhitvā parāmasitvā abhinivisitvā.\nJantūti satto naro …pe… manujoti—\nsayaṁ samādāya vatāni jantu."}},{"id":"mnd4:39","sourceIds":["mnd4:39.1","mnd4:39.2","mnd4:39.3","mnd4:39.4","mnd4:39.5","mnd4:39.6","mnd4:39.7","mnd4:39.8","mnd4:39.9"],"kind":"text","text":{"pi":"Uccāvacaṁ gacchati saññasattoti satthārato satthāraṁ gacchati;\ndhammakkhānato dhammakkhānaṁ gacchati;\ngaṇato gaṇaṁ gacchati;\ndiṭṭhiyā diṭṭhiṁ gacchati;\npaṭipadāya paṭipadaṁ gacchati;\nmaggato maggaṁ gacchati.\nSaññasattoti kāmasaññāya byāpādasaññāya vihiṁsāsaññāya diṭṭhisaññāya satto visatto āsatto laggo laggito palibuddho.\nYathā bhittikhile vā nāgadante vā bhaṇḍaṁ sattaṁ visattaṁ āsattaṁ laggaṁ laggitaṁ palibuddhaṁ, evamevaṁ kāmasaññāya byāpādasaññāya vihiṁsāsaññāya diṭṭhisaññāya satto visatto āsatto laggo laggito palibuddhoti—\nuccāvacaṁ gacchati saññasatto."}},{"id":"mnd4:40","sourceIds":["mnd4:40.1","mnd4:40.2","mnd4:40.3","mnd4:40.4","mnd4:40.5","mnd4:40.6"],"kind":"text","text":{"pi":"Vidvā ca vedehi samecca dhammanti.\nVidvāti vidvā vijjāgato ñāṇī vibhāvī medhāvī.\nVedehīti vedā vuccanti catūsu maggesu ñāṇaṁ paññā paññindriyaṁ paññābalaṁ dhammavicayasambojjhaṅgo vīmaṁsā vipassanā sammādiṭṭhi.\nTehi vedehi jātijarāmaraṇassa antagato antappatto, koṭigato koṭippatto, pariyantagato pariyantappatto, vosānagato vosānappatto, tāṇagato tāṇappatto, leṇagato leṇappatto, saraṇagato saraṇappatto, abhayagato abhayappatto, accutagato accutappatto, amatagato amatappatto, nibbānagato nibbānappatto.\nVedānaṁ vā antagatoti vedagū, vedehi vā antagatoti vedagū, sattannaṁ vā dhammānaṁ viditattā vedagū.\nSakkāyadiṭṭhi viditā hoti, vicikicchā viditā hoti, sīlabbataparāmāso vidito hoti, rāgo vidito hoti, doso vidito hoti, moho vidito hoti, māno vidito hoti, viditāssa honti pāpakā akusalā dhammā saṅkilesikā ponobhavikā sadarā dukkhavipākā āyatiṁ jātijarāmaraṇiyā."}},{"id":"mnd4:41","sourceIds":["mnd4:41.1","mnd4:41.2","mnd4:41.3","mnd4:41.4","mnd4:41.5"],"kind":"text","text":{"pi":"Vedāni viceyya kevalāni,\n(sabhiyāti bhagavā)\nSamaṇānaṁ yānīdhatthi brāhmaṇānaṁ;\nSabbavedanāsu vītarāgo,\nSabbaṁ vedamaticca vedagū soti."}},{"id":"mnd4:42","sourceIds":["mnd4:42.1","mnd4:42.2","mnd4:42.3","mnd4:42.4","mnd4:42.5","mnd4:42.6","mnd4:42.7","mnd4:42.8","mnd4:42.9","mnd4:42.10","mnd4:42.11","mnd4:42.12","mnd4:42.13","mnd4:42.14","mnd4:42.15","mnd4:42.16","mnd4:42.17","mnd4:42.18","mnd4:42.19","mnd4:42.20","mnd4:42.21","mnd4:42.22","mnd4:42.23","mnd4:42.24","mnd4:42.25","mnd4:42.26","mnd4:42.27","mnd4:42.28","mnd4:42.29","mnd4:42.30","mnd4:42.31","mnd4:42.32","mnd4:42.33","mnd4:42.34","mnd4:42.35","mnd4:42.36","mnd4:42.37","mnd4:42.38","mnd4:42.39","mnd4:42.40","mnd4:42.41","mnd4:42.42","mnd4:42.43","mnd4:42.44","mnd4:42.45"],"kind":"text","text":{"pi":"Vidvā ca vedehi samecca dhammanti.\nSamecca abhisamecca dhammaṁ.\nSabbe saṅkhārā aniccāti samecca abhisamecca dhammaṁ;\nsabbe saṅkhārā dukkhāti samecca abhisamecca dhammaṁ;\nsabbe dhammā anattāti samecca abhisamecca dhammaṁ;\navijjāpaccayā saṅkhārāti samecca abhisamecca dhammaṁ;\nsaṅkhārapaccayā viññāṇanti samecca abhisamecca dhammaṁ;\nviññāṇapaccayā nāmarūpanti …\nnāmarūpapaccayā saḷāyatananti …\nsaḷāyatanapaccayā phassoti …\nphassapaccayā vedanāti …\nvedanāpaccayā taṇhāti …\ntaṇhāpaccayā upādānanti …\nupādānapaccayā bhavoti …\nbhavapaccayā jātīti …\njātipaccayā jarāmaraṇanti samecca abhisamecca dhammaṁ;\navijjānirodhā saṅkhāranirodhoti samecca abhisamecca dhammaṁ;\nsaṅkhāranirodhā viññāṇanirodhoti samecca abhisamecca dhammaṁ;\nviññāṇanirodhā nāmarūpanirodhoti …\nnāmarūpanirodhā saḷāyatananirodhoti …\nsaḷāyatananirodhā phassanirodhoti …\nphassanirodhā vedanānirodhoti …\nvedanānirodhā taṇhānirodhoti …\ntaṇhānirodhā upādānanirodhoti …\nupādānanirodhā bhavanirodhoti …\nbhavanirodhā jātinirodhoti …\njātinirodhā jarāmaraṇanirodhoti samecca abhisamecca dhammaṁ;\nidaṁ dukkhanti samecca abhisamecca dhammaṁ;\nayaṁ dukkhasamudayoti …\nayaṁ dukkhanirodhoti …\nayaṁ dukkhanirodhagāminī paṭipadāti samecca abhisamecca dhammaṁ;\nime āsavāti samecca abhisamecca dhammaṁ;\nayaṁ āsavasamudayoti …\nayaṁ āsavanirodhoti …\nayaṁ āsavanirodhagāminī paṭipadāti samecca abhisamecca dhammaṁ;\nime dhammā abhiññeyyāti samecca abhisamecca dhammaṁ;\nime dhammā pariññeyyāti …\nime dhammā pahātabbāti …\nime dhammā bhāvetabbāti …\nime dhammā sacchikātabbāti samecca abhisamecca dhammaṁ.\nChannaṁ phassāyatanānaṁ samudayañca atthaṅgamañca assādañca ādīnavañca nissaraṇañca samecca abhisamecca dhammaṁ.\nPañcannaṁ upādānakkhandhānaṁ samudayañca atthaṅgamañca assādañca ādīnavañca nissaraṇañca samecca abhisamecca dhammaṁ.\nCatunnaṁ mahābhūtānaṁ samudayañca atthaṅgamañca assādañca ādīnavañca nissaraṇañca samecca abhisamecca dhammaṁ.\nYaṁ kiñci samudayadhammaṁ sabbaṁ taṁ nirodhadhammanti samecca abhisamecca dhammanti—\nvidvā ca vedehi samecca dhammaṁ."}},{"id":"mnd4:43","sourceIds":["mnd4:43.1","mnd4:43.2","mnd4:43.3","mnd4:43.4","mnd4:43.5"],"kind":"text","text":{"pi":"Na uccāvacaṁ gacchati bhūripaññoti na satthārato satthāraṁ gacchati, na dhammakkhānato dhammakkhānaṁ gacchati, na gaṇato gaṇaṁ gacchati, na diṭṭhiyā diṭṭhiṁ gacchati, na paṭipadāya paṭipadaṁ gacchati, na maggato maggaṁ gacchati.\nBhūripaññoti bhūripañño mahāpañño puthupañño hāsapañño javanapañño tikkhapañño nibbedhikapañño.\nBhūri vuccati pathavī.\nTāya pathavisamāya paññāya vipulāya vitthatāya samannāgatoti—\nna uccāvacaṁ gacchati bhūripañño."}},{"id":"mnd4:44","sourceIds":["mnd4:44.1"],"kind":"text","text":{"pi":"Tenāha bhagavā—"}},{"id":"mnd4:45","sourceIds":["mnd4:45.1","mnd4:45.2","mnd4:45.3","mnd4:45.4"],"kind":"text","text":{"pi":"“Sayaṁ samādāya vatāni jantu,\nUccāvacaṁ gacchati saññasatto;\nVidvā ca vedehi samecca dhammaṁ,\nNa uccāvacaṁ gacchati bhūripañño”ti."}},{"id":"mnd4:46","sourceIds":["mnd4:46.1","mnd4:46.2","mnd4:46.3","mnd4:46.4"],"kind":"text","text":{"pi":"Sa sabbadhammesu visenibhūto,\nYaṁ kiñci diṭṭhaṁ va sutaṁ mutaṁ vā;\nTameva dassiṁ vivaṭaṁ carantaṁ,\nKenīdha lokasmi vikappayeyya."}},{"id":"mnd4:47","sourceIds":["mnd4:47.1","mnd4:47.2","mnd4:47.3"],"kind":"text","text":{"pi":"Sa sabbadhammesu visenibhūto yaṁ kiñci diṭṭhaṁ va sutaṁ mutaṁ vāti.\nSenā vuccati mārasenā.\nKāyaduccaritaṁ mārasenā, vacīduccaritaṁ mārasenā, manoduccaritaṁ mārasenā, rāgo mārasenā, doso mārasenā, moho mārasenā, kodho mārasenā, upanāho …pe… sabbākusalābhisaṅkhārā mārasenā."}},{"id":"mnd4:48","sourceIds":["mnd4:48.1"],"kind":"text","text":{"pi":"Vuttañhetaṁ bhagavatā—"}},{"id":"mnd4:49","sourceIds":["mnd4:49.1","mnd4:49.2","mnd4:49.3","mnd4:49.4"],"kind":"text","text":{"pi":"“Kāmā te paṭhamā senā,\ndutiyā arati vuccati;\nTatiyā khuppipāsā te,\ncatutthī taṇhā vuccati."}},{"id":"mnd4:50","sourceIds":["mnd4:50.1","mnd4:50.2","mnd4:50.3","mnd4:50.4"],"kind":"text","text":{"pi":"Pañcamī thinamiddhaṁ te,\nchaṭṭhā bhīrū pavuccati;\nSattamī vicikicchā te,\nmakkho thambho te aṭṭhamo."}},{"id":"mnd4:51","sourceIds":["mnd4:51.1","mnd4:51.2","mnd4:51.3","mnd4:51.4"],"kind":"text","text":{"pi":"Lābho siloko sakkāro,\nmicchāladdho ca yo yaso;\nYo cattānaṁ samukkaṁse,\npare ca avajānati."}},{"id":"mnd4:52","sourceIds":["mnd4:52.1","mnd4:52.2","mnd4:52.3","mnd4:52.4"],"kind":"text","text":{"pi":"Esā namuci te senā,\nkaṇhassābhippahārinī;\nNa naṁ asūro jināti,\njetvāva labhate sukhan”ti."}},{"id":"mnd4:53","sourceIds":["mnd4:53.1","mnd4:53.2","mnd4:53.3"],"kind":"text","text":{"pi":"Yato catūhi ariyamaggehi sabbā ca mārasenā sabbe ca paṭisenikarā kilesā jitā ca parājitā ca bhaggā vippaluggā parammukhā, so vuccati visenibhūto.\nSo diṭṭhe visenibhūto, sute visenibhūto, mute visenibhūto, viññāte visenibhūtoti—\nsa sabbadhammesu visenibhūto yaṁ kiñci diṭṭhaṁ va sutaṁ mutaṁ vā."}},{"id":"mnd4:54","sourceIds":["mnd4:54.1","mnd4:54.2","mnd4:54.3","mnd4:54.4","mnd4:54.5","mnd4:54.6","mnd4:54.7"],"kind":"text","text":{"pi":"Tameva dassiṁ vivaṭaṁ carantanti.\nTameva suddhadassiṁ visuddhadassiṁ parisuddhadassiṁ vodātadassiṁ pariyodātadassiṁ.\nAtha vā, suddhadassanaṁ visuddhadassanaṁ parisuddhadassanaṁ vodātadassanaṁ pariyodātadassanaṁ.\nVivaṭanti taṇhāchadanaṁ diṭṭhichadanaṁ kilesachadanaṁ duccaritachadanaṁ avijjāchadanaṁ.\nTāni chadanāni vivaṭāni honti viddhaṁsitāni ugghāṭitāni samugghāṭitāni pahīnāni samucchinnāni vūpasantāni paṭipassaddhāni abhabbuppattikāni ñāṇagginā daḍḍhāni.\nCarantanti carantaṁ vicarantaṁ viharantaṁ iriyantaṁ vattentaṁ pālentaṁ yapentaṁ yāpentanti—\ntameva dassiṁ vivaṭaṁ carantaṁ."}},{"id":"mnd4:55","sourceIds":["mnd4:55.1","mnd4:55.2","mnd4:55.3","mnd4:55.4","mnd4:55.5","mnd4:55.6","mnd4:55.7","mnd4:55.8","mnd4:55.9","mnd4:55.10","mnd4:55.11","mnd4:55.12","mnd4:55.13","mnd4:55.14"],"kind":"text","text":{"pi":"Kenīdha lokasmi vikappayeyyāti.\nKappāti dve kappā—\ntaṇhākappo ca diṭṭhikappo ca …pe…\nayaṁ taṇhākappo …pe…\nayaṁ diṭṭhikappo.\nTassa taṇhākappo pahīno, diṭṭhikappo paṭinissaṭṭho.\nTaṇhākappassa pahīnattā diṭṭhikappassa paṭinissaṭṭhattā kena rāgena kappeyya, kena dosena kappeyya, kena mohena kappeyya, kena mānena kappeyya, kāya diṭṭhiyā kappeyya, kena uddhaccena kappeyya, kāya vicikicchāya kappeyya, kehi anusayehi kappeyya—\nrattoti vā duṭṭhoti vā mūḷhoti vā vinibaddhoti vā parāmaṭṭhoti vā vikkhepagatoti vā aniṭṭhaṅgatoti vā thāmagatoti vā.\nTe abhisaṅkhārā pahīnā.\nAbhisaṅkhārānaṁ pahīnattā gatiyo kena kappeyya—\nnerayikoti vā tiracchānayonikoti vā pettivisayikoti vā manussoti vā devoti vā rūpīti vā arūpīti vā saññīti vā asaññīti vā nevasaññīnāsaññīti vā.\nSo hetu natthi, paccayo natthi, kāraṇaṁ natthi, yena kappeyya vikappeyya vikappaṁ āpajjeyya.\nLokasminti apāyaloke manussaloke devaloke khandhaloke dhātuloke āyatanaloketi—\nkenīdha lokasmiṁ vikappayeyya."}},{"id":"mnd4:56","sourceIds":["mnd4:56.1"],"kind":"text","text":{"pi":"Tenāha bhagavā—"}},{"id":"mnd4:57","sourceIds":["mnd4:57.1","mnd4:57.2","mnd4:57.3","mnd4:57.4"],"kind":"text","text":{"pi":"“Sa sabbadhammesu visenibhūto,\nYaṁ kiñci diṭṭhaṁ va sutaṁ mutaṁ vā;\nTameva dassiṁ vivaṭaṁ carantaṁ,\nKenīdha lokasmi vikappayeyyā”ti."}},{"id":"mnd4:58","sourceIds":["mnd4:58.1","mnd4:58.2","mnd4:58.3","mnd4:58.4"],"kind":"text","text":{"pi":"Na kappayanti na purekkharonti,\nAccantasuddhīti na te vadanti;\nĀdānaganthaṁ gathitaṁ visajja,\nĀsaṁ na kubbanti kuhiñci loke."}},{"id":"mnd4:59","sourceIds":["mnd4:59.1","mnd4:59.2","mnd4:59.3","mnd4:59.4","mnd4:59.5","mnd4:59.6","mnd4:59.7","mnd4:59.8","mnd4:59.9","mnd4:59.10","mnd4:59.11","mnd4:59.12","mnd4:59.13","mnd4:59.14","mnd4:59.15","mnd4:59.16"],"kind":"text","text":{"pi":"Na kappayanti na purekkharontīti.\nKappāti dve kappā—\ntaṇhākappo ca diṭṭhikappo ca …pe…\nayaṁ taṇhākappo …pe…\nayaṁ diṭṭhikappo.\nTesaṁ taṇhākappo pahīno, diṭṭhikappo paṭinissaṭṭho.\nTaṇhākappassa pahīnattā, diṭṭhikappassa paṭinissaṭṭhattā taṇhākappaṁ vā diṭṭhikappaṁ vā na kappenti na janenti na sañjanenti na nibbattenti nābhinibbattentīti—\nna kappayanti.\nNa purekkharontīti.\nPurekkhārāti dve purekkhārā—\ntaṇhāpurekkhāro ca diṭṭhipurekkhāro ca …pe…\nayaṁ taṇhāpurekkhāro …pe…\nayaṁ diṭṭhipurekkhāro.\nTesaṁ taṇhāpurekkhāro pahīno, diṭṭhipurekkhāro paṭinissaṭṭho.\nTaṇhāpurekkhārassa pahīnattā, diṭṭhipurekkhārassa paṭinissaṭṭhattā na taṇhaṁ vā na diṭṭhiṁ vā purato katvā caranti, na taṇhādhajā na taṇhāketū na taṇhādhipateyyā, na diṭṭhidhajā na diṭṭhiketū na diṭṭhādhipateyyā, na taṇhāya vā na diṭṭhiyā vā parivāritā carantīti—\nna kappayanti na purekkharonti."}},{"id":"mnd4:60","sourceIds":["mnd4:60.1","mnd4:60.2"],"kind":"text","text":{"pi":"Accantasuddhīti na te vadantīti accantasuddhiṁ saṁsārasuddhiṁ akiriyadiṭṭhiṁ sassatavādaṁ na vadanti na kathenti na bhaṇanti na dīpayanti na voharantīti—\naccantasuddhīti na te vadanti."}},{"id":"mnd4:61","sourceIds":["mnd4:61.1","mnd4:61.2","mnd4:61.3","mnd4:61.4","mnd4:61.5","mnd4:61.6","mnd4:61.7","mnd4:61.8","mnd4:61.9","mnd4:61.10","mnd4:61.11","mnd4:61.12","mnd4:61.13","mnd4:61.14","mnd4:61.15","mnd4:61.16","mnd4:61.17","mnd4:61.18","mnd4:61.19","mnd4:61.20","mnd4:61.21","mnd4:61.22","mnd4:61.23","mnd4:61.24","mnd4:61.25","mnd4:61.26","mnd4:61.27"],"kind":"text","text":{"pi":"Ādānaganthaṁ gathitaṁ visajjāti.\nGanthāti cattāro ganthā—\nabhijjhākāyagantho, byāpādo kāyagantho, sīlabbataparāmāso kāyagantho, idaṁsaccābhiniveso kāyagantho.\nAttano diṭṭhiyā rāgo abhijjhākāyagantho;\nparavādesu āghāto appaccayo byāpādo kāyagantho;\nattano sīlaṁ vā vataṁ vā sīlavataṁ vā parāmasantīti sīlabbataparāmāso kāyagantho, attano diṭṭhi idaṁsaccābhiniveso kāyagantho.\nKiṅkāraṇā vuccati ādānagantho?\nTehi ganthehi rūpaṁ ādiyanti upādiyanti gaṇhanti parāmasanti abhinivisanti;\nvedanaṁ …\nsaññaṁ …\nsaṅkhāre …\nviññāṇaṁ …\ngatiṁ …\nupapattiṁ …\npaṭisandhiṁ …\nbhavaṁ …\nsaṁsāravaṭṭaṁ ādiyanti upādiyanti gaṇhanti parāmasanti abhinivisanti.\nTaṅkāraṇā vuccati ādānagantho.\nVisajjāti ganthe vosajjitvā vā—\nvisajja.\nAtha vā ganthe gadhite ganthite bandhe vibandhe ābandhe lagge laggite palibuddhe bandhane phoṭayitvā—\nvisajja.\nYathā vayhaṁ vā rathaṁ vā sakaṭaṁ vā sandamānikaṁ vā sajjaṁ visajjaṁ karonti vikopenti;\nevamevaṁ ganthe vosajjitvā—\nvisajja.\nAtha vā ganthe gathite ganthite bandhe vibandhe ābandhe lagge laggite palibuddhe bandhane phoṭayitvā visajjāti—\nādānaganthaṁ gathitaṁ visajja."}},{"id":"mnd4:62","sourceIds":["mnd4:62.1","mnd4:62.2","mnd4:62.3","mnd4:62.4","mnd4:62.5","mnd4:62.6"],"kind":"text","text":{"pi":"Āsaṁ na kubbanti kuhiñci loketi.\nĀsā vuccati taṇhā yo rāgo sārāgo …pe… abhijjhā lobho akusalamūlaṁ.\nĀsaṁ na kubbantīti āsaṁ na kubbanti na janenti na sañjanenti na nibbattenti na abhinibbattenti.\nKuhiñcīti kuhiñci kimhici katthaci ajjhattaṁ vā bahiddhā vā ajjhattabahiddhā vā.\nLoketi apāyaloke …pe… āyatanaloketi—\nāsaṁ na kubbanti kuhiñci loke."}},{"id":"mnd4:63","sourceIds":["mnd4:63.1"],"kind":"text","text":{"pi":"Tenāha bhagavā—"}},{"id":"mnd4:64","sourceIds":["mnd4:64.1","mnd4:64.2","mnd4:64.3","mnd4:64.4"],"kind":"text","text":{"pi":"“Na kappayanti na purekkharonti,\nAccantasuddhīti na te vadanti;\nĀdānaganthaṁ gathitaṁ visajja,\nĀsaṁ na kubbanti kuhiñci loke”ti."}},{"id":"mnd4:65","sourceIds":["mnd4:65.1","mnd4:65.2","mnd4:65.3","mnd4:65.4"],"kind":"text","text":{"pi":"Sīmātigo brāhmaṇo tassa natthi,\nÑatvā va disvā va samuggahītaṁ;\nNa rāgarāgī na virāgaratto,\nTassīdha natthi paramuggahītaṁ."}},{"id":"mnd4:66","sourceIds":["mnd4:66.1","mnd4:66.2","mnd4:66.3","mnd4:66.4","mnd4:66.5","mnd4:66.6","mnd4:66.7","mnd4:66.8","mnd4:66.9","mnd4:66.10","mnd4:66.11","mnd4:66.12","mnd4:66.13","mnd4:66.14","mnd4:66.15"],"kind":"text","text":{"pi":"Sīmātigo brāhmaṇo tassa natthi, ñatvā va disvā va samuggahītanti.\nSīmāti catasso sīmāyo—\nsakkāyadiṭṭhi, vicikicchā, sīlabbataparāmāso, diṭṭhānusayo, vicikicchānusayo, tadekaṭṭhā ca kilesā—\nayaṁ paṭhamā sīmā.\nOḷārikaṁ kāmarāgasaṁyojanaṁ, paṭighasaṁyojanaṁ, oḷāriko kāmarāgānusayo, paṭighānusayo, tadekaṭṭhā ca kilesā—\nayaṁ dutiyā sīmā.\nAnusahagataṁ kāmarāgasaṁyojanaṁ, paṭighasaṁyojanaṁ, anusahagato kāmarāgānusayo, paṭighānusayo, tadekaṭṭhā ca kilesā—\nayaṁ tatiyā sīmā.\nRūparāgo arūparāgo māno uddhaccaṁ avijjā, mānānusayo bhavarāgānusayo avijjānusayo, tadekaṭṭhā ca kilesā—\nayaṁ catutthā sīmā.\nYato ca catūhi ariyamaggehi imā catasso sīmāyo atikkanto hoti samatikkanto vītivatto, so vuccati sīmātigo.\nBrāhmaṇoti sattannaṁ dhammānaṁ bāhitattā brāhmaṇo—\nsakkāyadiṭṭhi bāhitā hoti, vicikicchā bāhitā hoti, sīlabbataparāmāso bāhito hoti …pe…\nasito tādi pavuccate sa brahmā.\nTassāti arahato khīṇāsavassa."}},{"id":"mnd4:67","sourceIds":["mnd4:67.1","mnd4:67.2","mnd4:67.3","mnd4:67.4","mnd4:67.5"],"kind":"text","text":{"pi":"Ñatvāti paracittañāṇena vā ñatvā pubbenivāsānussatiñāṇena vā ñatvā.\nDisvāti maṁsacakkhunā vā disvā dibbacakkhunā vā disvā.\nSīmātigo brāhmaṇo tassa natthi, ñatvā va disvā va samuggahītanti.\nTassa idaṁ paramaṁ aggaṁ seṭṭhaṁ visiṭṭhaṁ pāmokkhaṁ uttamaṁ pavaranti gahitaṁ parāmaṭṭhaṁ abhiniviṭṭhaṁ ajjhositaṁ adhimuttaṁ natthi na santi na saṁvijjati nupalabbhati, pahīnaṁ samucchinnaṁ vūpasantaṁ paṭipassaddhaṁ abhabbuppattikaṁ ñāṇagginā daḍḍhanti—\nsīmātigo brāhmaṇo tassa natthi ñatvā va disvā va samuggahītaṁ."}},{"id":"mnd4:68","sourceIds":["mnd4:68.1","mnd4:68.2","mnd4:68.3","mnd4:68.4","mnd4:68.5"],"kind":"text","text":{"pi":"Na rāgarāgī na virāgarattoti.\nRāgarattā vuccanti ye pañcasu kāmaguṇesu rattā giddhā gadhitā mucchitā ajjhosannā laggā laggitā palibuddhā.\nVirāgarattā vuccanti ye rūpāvacaraarūpāvacarasamāpattīsu rattā giddhā gadhitā mucchitā ajjhosannā laggā laggitā palibuddhā.\nNa rāgarāgī na virāgarattoti yato kāmarāgo ca rūparāgo ca arūparāgo ca pahīnā honti ucchinnamūlā tālāvatthukatā anabhāvaṅkatā āyatiṁ anuppādadhammā.\nEttāvatā na rāgarāgī na virāgaratto."}},{"id":"mnd4:69","sourceIds":["mnd4:69.1","mnd4:69.2","mnd4:69.3","mnd4:69.4"],"kind":"text","text":{"pi":"Tassīdha natthi paramuggahītanti.\nTassāti arahato khīṇāsavassa.\nTassa idaṁ paramaṁ aggaṁ seṭṭhaṁ visiṭṭhaṁ pāmokkhaṁ uttamaṁ pavaranti gahitaṁ parāmaṭṭhaṁ abhiniviṭṭhaṁ ajjhositaṁ adhimuttaṁ natthi na santi na saṁvijjati nupalabbhati, pahīnaṁ samucchinnaṁ vūpasantaṁ paṭipassaddhaṁ abhabbuppattikaṁ ñāṇagginā daḍḍhanti—\ntassīdha natthi paramuggahītaṁ."}},{"id":"mnd4:70","sourceIds":["mnd4:70.1"],"kind":"text","text":{"pi":"Tenāha bhagavā—"}},{"id":"mnd4:71","sourceIds":["mnd4:71.1","mnd4:71.2","mnd4:71.3","mnd4:71.4"],"kind":"text","text":{"pi":"“Sīmātigo brāhmaṇo tassa natthi,\nÑatvā va disvā va samuggahītaṁ;\nNa rāgarāgī na virāgaratto,\nTassīdha natthi paramuggahītan”ti."}},{"id":"mnd4:72","sourceIds":["mnd4:72.1"],"kind":"text","text":{"pi":"Suddhaṭṭhakasuttaniddeso catuttho."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mnd4/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}