{"id":"mnd7","title":"7. Tissametteyyasuttaniddesa","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mnd7","title":"7. Tissametteyyasuttaniddesa","units":[{"id":"mnd7:0","sourceIds":["mnd7:0.1","mnd7:0.2","mnd7:0.3"],"kind":"text","text":{"pi":"Mahāniddesa\nAṭṭhakavagga\n7. Tissametteyyasuttaniddesa"}},{"id":"mnd7:1","sourceIds":["mnd7:1.1"],"kind":"text","text":{"pi":"Atha tissametteyyasuttaniddesaṁ vakkhati—"}},{"id":"mnd7:2","sourceIds":["mnd7:2.1","mnd7:2.2","mnd7:2.3","mnd7:2.4","mnd7:2.5"],"kind":"text","text":{"pi":"Methunamanuyuttassa,\n(iccāyasmā tisso metteyyo)\nVighātaṁ brūhi mārisa;\nSutvāna tava sāsanaṁ,\nViveke sikkhissāmase."}},{"id":"mnd7:3","sourceIds":["mnd7:3.1","mnd7:3.2","mnd7:3.3","mnd7:3.4","mnd7:3.5","mnd7:3.6","mnd7:3.7","mnd7:3.8"],"kind":"text","text":{"pi":"Methunamanuyuttassāti.\nMethunadhammo nāma yo so asaddhammo gāmadhammo vasaladhammo duṭṭhullo odakantiko rahasso dvayaṁdvayasamāpatti.\nKiṅkāraṇā vuccati methunadhammo?\nUbhinnaṁ rattānaṁ sārattānaṁ avassutānaṁ pariyuṭṭhitānaṁ pariyādinnacittānaṁ ubhinnaṁ sadisānaṁ dhammoti—\ntaṅkāraṇā vuccati methunadhammo.\nYathā ubho kalahakārakā methunakāti vuccanti, ubho bhaṇḍanakārakā methunakāti vuccanti, ubho bhassakārakā methunakāti vuccanti, ubho vivādakārakā methunakāti vuccanti, ubho adhikaraṇakārakā methunakāti vuccanti, ubho vādino methunakāti vuccanti, ubho sallāpakā methunakāti vuccanti;\nevamevaṁ ubhinnaṁ rattānaṁ sārattānaṁ avassutānaṁ pariyuṭṭhitānaṁ pariyādinnacittānaṁ ubhinnaṁ sadisānaṁ dhammoti—\ntaṅkāraṇā vuccati methunadhammo."}},{"id":"mnd7:4","sourceIds":["mnd7:4.1","mnd7:4.2","mnd7:4.3"],"kind":"text","text":{"pi":"Methunamanuyuttassāti.\nMethunadhamme yuttassa payuttassa āyuttassa samāyuttassa taccaritassa tabbahulassa taggarukassa tanninnassa tappoṇassa tappabbhārassa tadadhimuttassa tadadhipateyyassāti—\nmethunamanuyuttassa."}},{"id":"mnd7:5","sourceIds":["mnd7:5.1","mnd7:5.2","mnd7:5.3","mnd7:5.4","mnd7:5.5","mnd7:5.6","mnd7:5.7","mnd7:5.8"],"kind":"text","text":{"pi":"Iccāyasmā tisso metteyyoti.\nIccāti padasandhi padasaṁsaggo padapāripūrī akkharasamavāyo byañjanasiliṭṭhatā padānupubbatāpetaṁ—\niccāti.\nĀyasmāti piyavacanaṁ garuvacanaṁ sagāravavacanaṁ sappatissavacanametaṁ—\nāyasmāti.\nTissoti tassa therassa nāmaṁ saṅkhā samaññā paññatti vohāro nāmaṁ nāmakammaṁ nāmadheyyaṁ nirutti byañjanaṁ abhilāpo.\nMetteyyoti tassa therassa gottaṁ saṅkhā samaññā paññatti vohāroti—\niccāyasmā tisso metteyyo."}},{"id":"mnd7:6","sourceIds":["mnd7:6.1","mnd7:6.2","mnd7:6.3","mnd7:6.4"],"kind":"text","text":{"pi":"Vighātaṁ brūhi mārisāti.\nVighātanti vighātaṁ upaghātaṁ pīḷanaṁ ghaṭṭanaṁ upaddavaṁ upasaggaṁ brūhi ācikkha desehi paññapehi paṭṭhapehi vivara vibhaja uttānīkarohi pakāsehi.\nMārisāti piyavacanaṁ garuvacanaṁ sagāravavacanaṁ sappatissavacanametaṁ mārisāti—\nvighātaṁ brūhi mārisa."}},{"id":"mnd7:7","sourceIds":["mnd7:7.1","mnd7:7.2","mnd7:7.3"],"kind":"text","text":{"pi":"Sutvāna tava sāsananti.\nTuyhaṁ vacanaṁ byappathaṁ desanaṁ anusāsanaṁ anusiṭṭhiṁ sutvā suṇitvā uggahetvā upadhārayitvā upalakkhayitvāti—\nsutvāna tava sāsanaṁ."}},{"id":"mnd7:8","sourceIds":["mnd7:8.1","mnd7:8.2","mnd7:8.3","mnd7:8.4","mnd7:8.5","mnd7:8.6","mnd7:8.7"],"kind":"text","text":{"pi":"Viveke sikkhissāmaseti.\nVivekoti tayo vivekā—\nkāyaviveko, cittaviveko, upadhiviveko.\nKatamo kāyaviveko?\nIdha bhikkhu vivittaṁ senāsanaṁ bhajati araññaṁ rukkhamūlaṁ pabbataṁ kandaraṁ giriguhaṁ susānaṁ vanapatthaṁ abbhokāsaṁ palāsapuñjaṁ, kāyena vivitto viharati.\nSo eko gacchati, eko tiṭṭhati, eko nisīdati, eko seyyaṁ kappeti, eko gāmaṁ piṇḍāya pavisati, eko paṭikkamati, eko raho nisīdati, eko caṅkamaṁ adhiṭṭhāti, eko carati, eko viharati iriyati vattati pāleti yapeti yāpeti—\nayaṁ kāyaviveko."}},{"id":"mnd7:9","sourceIds":["mnd7:9.1","mnd7:9.2","mnd7:9.3","mnd7:9.4","mnd7:9.5","mnd7:9.6","mnd7:9.7","mnd7:9.8","mnd7:9.9","mnd7:9.10","mnd7:9.11","mnd7:9.12","mnd7:9.13","mnd7:9.14"],"kind":"text","text":{"pi":"Katamo cittaviveko?\nPaṭhamaṁ jhānaṁ samāpannassa nīvaraṇehi cittaṁ vivittaṁ hoti,\ndutiyaṁ jhānaṁ samāpannassa vitakkavicārehi cittaṁ vivittaṁ hoti,\ntatiyaṁ jhānaṁ samāpannassa pītiyā cittaṁ vivittaṁ hoti,\ncatutthaṁ jhānaṁ samāpannassa sukhadukkhehi cittaṁ vivittaṁ hoti,\nākāsānañcāyatanaṁ samāpannassa rūpasaññāya paṭighasaññāya nānattasaññāya cittaṁ vivittaṁ hoti,\nviññāṇañcāyatanaṁ samāpannassa ākāsānañcāyatanasaññāya cittaṁ vivittaṁ hoti,\nākiñcaññāyatanaṁ samāpannassa viññāṇañcāyatanasaññāya cittaṁ vivittaṁ hoti,\nnevasaññānāsaññāyatanaṁ samāpannassa ākiñcaññāyatanasaññāya cittaṁ vivittaṁ hoti,\nsotāpannassa sakkāyadiṭṭhiyā vicikicchāya sīlabbataparāmāsā diṭṭhānusayā vicikicchānusayā tadekaṭṭhehi ca kilesehi cittaṁ vivittaṁ hoti,\nsakadāgāmissa oḷārikā kāmarāgasaṁyojanā paṭighasaṁyojanā oḷārikā kāmarāgānusayā paṭighānusayā tadekaṭṭhehi ca kilesehi cittaṁ vivittaṁ hoti,\nanāgāmissa anusahagatā kāmarāgasaṁyojanā paṭighasaṁyojanā anusahagatā kāmarāgānusayā paṭighānusayā tadekaṭṭhehi ca kilesehi cittaṁ vivittaṁ hoti,\narahato rūparāgā arūparāgā mānā uddhaccā avijjāya mānānusayā bhavarāgānusayā avijjānusayā tadekaṭṭhehi ca kilesehi bahiddhā ca sabbanimittehi cittaṁ vivittaṁ hoti—\nayaṁ cittaviveko."}},{"id":"mnd7:10","sourceIds":["mnd7:10.1","mnd7:10.2","mnd7:10.3","mnd7:10.4","mnd7:10.5","mnd7:10.6","mnd7:10.7","mnd7:10.8","mnd7:10.9","mnd7:10.10","mnd7:10.11","mnd7:10.12"],"kind":"text","text":{"pi":"Katamo upadhiviveko?\nUpadhi vuccanti kilesā ca khandhā ca abhisaṅkhārā ca.\nUpadhiviveko vuccati amataṁ nibbānaṁ.\nYo so sabbasaṅkhārasamatho sabbūpadhipaṭinissaggo taṇhakkhayo virāgo nirodho nibbānaṁ—\nayaṁ upadhiviveko.\nKāyaviveko ca vivekaṭṭhakāyānaṁ nekkhammābhiratānaṁ;\ncittaviveko ca parisuddhacittānaṁ paramavodānappattānaṁ;\nupadhiviveko ca nirūpadhīnaṁ puggalānaṁ visaṅkhāragatānaṁ.\nViveke sikkhissāmaseti.\nSo thero pakatiyā sikkhitasikkho.\nApi ca dhammadesanaṁ upādāya dhammadesanaṁ sāvento evamāha—\nviveke sikkhissāmaseti."}},{"id":"mnd7:11","sourceIds":["mnd7:11.1"],"kind":"text","text":{"pi":"Tenāha thero tissametteyyo—"}},{"id":"mnd7:12","sourceIds":["mnd7:12.1","mnd7:12.2","mnd7:12.3","mnd7:12.4","mnd7:12.5"],"kind":"text","text":{"pi":"“Methunamanuyuttassa,\n(iccāyasmā tisso metteyyo)\nVighātaṁ brūhi mārisa;\nSutvāna tava sāsanaṁ,\nViveke sikkhissāmase”ti."}},{"id":"mnd7:13","sourceIds":["mnd7:13.1","mnd7:13.2","mnd7:13.3","mnd7:13.4","mnd7:13.5"],"kind":"text","text":{"pi":"Methunamanuyuttassa,\n(metteyyāti bhagavā)\nMussate vāpi sāsanaṁ;\nMicchā ca paṭipajjati,\nEtaṁ tasmiṁ anāriyaṁ."}},{"id":"mnd7:14","sourceIds":["mnd7:14.1","mnd7:14.2","mnd7:14.3","mnd7:14.4","mnd7:14.5","mnd7:14.6","mnd7:14.7","mnd7:14.8"],"kind":"text","text":{"pi":"Methunamanuyuttassāti.\nMethunadhammo nāma yo so asaddhammo gāmadhammo vasaladhammo duṭṭhullo odakantiko rahasso dvayaṁdvayasamāpatti.\nKiṅkāraṇā vuccati methunadhammo?\nUbhinnaṁ rattānaṁ sārattānaṁ avassutānaṁ pariyuṭṭhitānaṁ pariyādinnacittānaṁ ubhinnaṁ sadisānaṁ dhammoti—\ntaṅkāraṇā vuccati methunadhammo.\nYathā ubho kalahakārakā methunakāti vuccanti, ubho bhaṇḍanakārakā methunakāti vuccanti, ubho bhassakārakā methunakāti vuccanti, ubho vivādakārakā methunakāti vuccanti, ubho adhikaraṇakārakā methunakāti vuccanti, ubho vādino methunakāti vuccanti, ubho sallāpakā methunakāti vuccanti;\nevamevaṁ ubhinnaṁ rattānaṁ sārattānaṁ avassutānaṁ pariyuṭṭhitānaṁ pariyādinnacittānaṁ ubhinnaṁ sadisānaṁ dhammoti—\ntaṅkāraṇā vuccati methunadhammo."}},{"id":"mnd7:15","sourceIds":["mnd7:15.1","mnd7:15.2","mnd7:15.3"],"kind":"text","text":{"pi":"Methunamanuyuttassāti.\nMethunadhamme yuttassa payuttassa āyuttassa samāyuttassa taccaritassa tabbahulassa taggarukassa tanninnassa tappoṇassa tappabbhārassa tadadhimuttassa tadadhipateyyassāti—\nmethunamanuyuttassa."}},{"id":"mnd7:16","sourceIds":["mnd7:16.1","mnd7:16.2","mnd7:16.3","mnd7:16.4","mnd7:16.5","mnd7:16.6","mnd7:16.7","mnd7:16.8","mnd7:16.9","mnd7:16.10","mnd7:16.11","mnd7:16.12","mnd7:16.13","mnd7:16.14","mnd7:16.15","mnd7:16.16","mnd7:16.17","mnd7:16.18","mnd7:16.19","mnd7:16.20","mnd7:16.21","mnd7:16.22","mnd7:16.23"],"kind":"text","text":{"pi":"Metteyyāti bhagavā taṁ theraṁ gottena ālapati.\nBhagavāti gāravādhivacanaṁ.\nApi ca bhaggarāgoti bhagavā,\nbhaggadosoti bhagavā,\nbhaggamohoti bhagavā,\nbhaggamānoti bhagavā,\nbhaggadiṭṭhīti bhagavā,\nbhaggakaṇḍakoti bhagavā,\nbhaggakilesoti bhagavā,\nbhaji vibhaji pavibhaji dhammaratananti bhagavā,\nbhavānaṁ antakaroti bhagavā,\nbhāvitakāyo bhāvitasīlo bhāvitacitto bhāvitapaññoti bhagavā,\nbhaji vā bhagavā araññavanapatthāni pantāni senāsanāni appasaddāni appanigghosāni vijanavātāni manussarāhasseyyakāni paṭisallānasāruppānīti bhagavā,\nbhāgī vā bhagavā cīvarapiṇḍapātasenāsanagilānapaccayabhesajjaparikkhārānanti bhagavā,\nbhāgī vā bhagavā attharasassa dhammarasassa vimuttirasassa adhisīlassa adhicittassa adhipaññāyāti bhagavā,\nbhāgī vā bhagavā catunnaṁ jhānānaṁ catunnaṁ appamaññānaṁ catunnaṁ arūpasamāpattīnanti bhagavā,\nbhāgī vā bhagavā aṭṭhannaṁ vimokkhānaṁ aṭṭhannaṁ abhibhāyatanānaṁ navannaṁ anupubbavihārasamāpattīnanti bhagavā,\nbhāgī vā bhagavā dasannaṁ saññābhāvanānaṁ dasannaṁ kasiṇasamāpattīnaṁ ānāpānassatisamādhissa asubhasamāpattiyāti bhagavā,\nbhāgī vā bhagavā catunnaṁ satipaṭṭhānānaṁ catunnaṁ sammappadhānānaṁ catunnaṁ iddhipādānaṁ pañcannaṁ indriyānaṁ pañcannaṁ balānaṁ sattannaṁ bojjhaṅgānaṁ ariyassa aṭṭhaṅgikassa maggassāti bhagavā,\nbhāgī vā bhagavā dasannaṁ tathāgatabalānaṁ catunnaṁ vesārajjānaṁ catunnaṁ paṭisambhidānaṁ channaṁ abhiññānaṁ channaṁ buddhadhammānanti bhagavā.\nBhagavāti netaṁ nāmaṁ mātarā kataṁ, na pitarā kataṁ, na bhātarā kataṁ, na bhaginiyā kataṁ, na mittāmaccehi kataṁ, na ñātisālohitehi kataṁ na samaṇabrāhmaṇehi kataṁ, na devatāhi kataṁ.\nVimokkhantikametaṁ buddhānaṁ bhagavantānaṁ bodhiyā mūle saha sabbaññutaññāṇassa paṭilābhā sacchikā paññatti yadidaṁ bhagavāti—\nmetteyyāti bhagavā."}},{"id":"mnd7:17","sourceIds":["mnd7:17.1","mnd7:17.2","mnd7:17.3","mnd7:17.4","mnd7:17.5","mnd7:17.6","mnd7:17.7","mnd7:17.8","mnd7:17.9"],"kind":"text","text":{"pi":"Mussate vāpi sāsananti.\nDvīhi kāraṇehi sāsanaṁ mussati—\npariyattisāsanampi mussati, paṭipattisāsanampi mussati.\nKatamaṁ pariyattisāsanaṁ?\nYaṁ tassa pariyāpuṭaṁ—\nsuttaṁ geyyaṁ veyyākaraṇaṁ gāthā udānaṁ itivuttakaṁ jātakaṁ abbhutadhammaṁ vedallaṁ—\nidaṁ pariyattisāsanaṁ.\nTampi mussati sammussati pamussati sampamussati paribāhiro hotīti—\nevampi mussate vāpi sāsanaṁ."}},{"id":"mnd7:18","sourceIds":["mnd7:18.1","mnd7:18.2","mnd7:18.3","mnd7:18.4","mnd7:18.5"],"kind":"text","text":{"pi":"Katamaṁ paṭipattisāsanaṁ?\nSammāpaṭipadā anulomapaṭipadā apaccanīkapaṭipadā anvatthapaṭipadā dhammānudhammapaṭipadā sīlesu paripūrakāritā indriyesu guttadvāratā bhojane mattaññutā jāgariyānuyogo satisampajaññaṁ cattāro satipaṭṭhānā cattāro sammappadhānā cattāro iddhipādā pañcindriyāni pañca balāni satta bojjhaṅgā ariyo aṭṭhaṅgiko maggo—\nidaṁ paṭipattisāsanaṁ.\nTampi mussati sammussati pamussati sampamussati paribāhiro hotīti.\nEvampi mussate vāpi sāsanaṁ."}},{"id":"mnd7:19","sourceIds":["mnd7:19.1","mnd7:19.2","mnd7:19.3"],"kind":"text","text":{"pi":"Micchā ca paṭipajjatīti.\nPāṇampi hanati, adinnampi ādiyati, sandhimpi chindati, nillopampi harati, ekāgārikampi karoti, paripanthepi tiṭṭhati, paradārampi gacchati, musāpi bhaṇatīti—\nmicchā ca paṭipajjati."}},{"id":"mnd7:20","sourceIds":["mnd7:20.1","mnd7:20.2","mnd7:20.3"],"kind":"text","text":{"pi":"Etaṁ tasmiṁ anāriyanti.\nEtaṁ tasmiṁ puggale anariyadhammo bāladhammo mūḷhadhammo aññāṇadhammo amarāvikkhepadhammo, yadidaṁ micchāpaṭipadāti—\netaṁ tasmiṁ anāriyaṁ."}},{"id":"mnd7:21","sourceIds":["mnd7:21.1"],"kind":"text","text":{"pi":"Tenāha bhagavā—"}},{"id":"mnd7:22","sourceIds":["mnd7:22.1","mnd7:22.2","mnd7:22.3","mnd7:22.4","mnd7:22.5"],"kind":"text","text":{"pi":"“Methunamanuyuttassa,\n(metteyyāti bhagavā)\nMussate vāpi sāsanaṁ;\nMicchā ca paṭipajjati,\nEtaṁ tasmiṁ anāriyan”ti."}},{"id":"mnd7:23","sourceIds":["mnd7:23.1","mnd7:23.2","mnd7:23.3","mnd7:23.4"],"kind":"text","text":{"pi":"Eko pubbe caritvāna,\nmethunaṁ yo nisevati;\nYānaṁ bhantaṁva taṁ loke,\nhīnamāhu puthujjanaṁ."}},{"id":"mnd7:24","sourceIds":["mnd7:24.1","mnd7:24.2","mnd7:24.3","mnd7:24.4","mnd7:24.5","mnd7:24.6"],"kind":"text","text":{"pi":"Eko pubbe caritvānāti.\nDvīhi kāraṇehi eko pubbe caritvāna—\npabbajjāsaṅkhātena vā gaṇāvavassaggaṭṭhena vā.\nKathaṁ pabbajjāsaṅkhātena eko pubbe caritvāna?\nSabbaṁ gharāvāsapalibodhaṁ chinditvā puttadārapalibodhaṁ chinditvā ñātipalibodhaṁ chinditvā mittāmaccapalibodhaṁ chinditvā sannidhipalibodhaṁ chinditvā kesamassuṁ ohāretvā kāsāyāni vatthāni acchādetvā agārasmā anagāriyaṁ pabbajitvā akiñcanabhāvaṁ upagantvā eko carati viharati iriyati vattati pāleti yapeti yāpeti.\nEvaṁ pabbajjāsaṅkhātena eko pubbe caritvāna."}},{"id":"mnd7:25","sourceIds":["mnd7:25.1","mnd7:25.2","mnd7:25.3","mnd7:25.4"],"kind":"text","text":{"pi":"Kathaṁ gaṇāvavassaggaṭṭhena eko pubbe caritvāna?\nSo evaṁ pabbajito samāno eko araññavanapatthāni pantāni senāsanāni paṭisevati appasaddāni appanigghosāni vijanavātāni manussarāhasseyyakāni paṭisallānasāruppāni.\nSo eko gacchati, eko tiṭṭhati, eko nisīdati, eko seyyaṁ kappeti, eko gāmaṁ piṇḍāya pavisati, eko paṭikkamati, eko raho nisīdati, eko caṅkamaṁ adhiṭṭhāti, eko carati viharati iriyati vattati pāleti yapeti yāpeti.\nEvaṁ gaṇāvavassaggaṭṭhena eko pubbe caritvāna."}},{"id":"mnd7:26","sourceIds":["mnd7:26.1","mnd7:26.2","mnd7:26.3","mnd7:26.4","mnd7:26.5","mnd7:26.6"],"kind":"text","text":{"pi":"Methunaṁ yo nisevatīti.\nMethunadhammo nāma yo so asaddhammo …pe…\ntaṅkāraṇā vuccati methunadhammo.\nMethunaṁ yo nisevatīti.\nYo aparena samayena buddhaṁ dhammaṁ saṅghaṁ sikkhaṁ paccakkhāya hīnāyāvattitvā methunaṁ dhammaṁ sevati nisevati saṁsevati paṭisevatīti—\nmethunaṁ yo nisevati."}},{"id":"mnd7:27","sourceIds":["mnd7:27.1","mnd7:27.2","mnd7:27.3","mnd7:27.4","mnd7:27.5","mnd7:27.6","mnd7:27.7","mnd7:27.8","mnd7:27.9","mnd7:27.10","mnd7:27.11","mnd7:27.12"],"kind":"text","text":{"pi":"Yānaṁ bhantaṁva taṁ loketi.\nYānanti hatthiyānaṁ assayānaṁ goyānaṁ ajayānaṁ meṇḍayānaṁ oṭṭhayānaṁ kharayānaṁ bhantaṁ adantaṁ akāritaṁ avinītaṁ uppathaṁ gaṇhāti, visamaṁ khāṇumpi pāsāṇampi abhiruhati, yānampi ārohanakampi bhañjati, papātepi papatati.\nYathā taṁ bhantaṁ yānaṁ adantaṁ akāritaṁ avinītaṁ uppathaṁ gaṇhāti;\nevamevaṁ so vibbhantako bhantayānapaṭibhāgo uppathaṁ gaṇhāti, micchādiṭṭhiṁ gaṇhāti …pe… micchāsamādhiṁ gaṇhāti.\nYathā taṁ bhantaṁ yānaṁ adantaṁ akāritaṁ avinītaṁ visamaṁ khāṇumpi pāsāṇampi abhiruhati;\nevamevaṁ so vibbhantako bhantayānapaṭibhāgo visamaṁ kāyakammaṁ abhiruhati, visamaṁ vacīkammaṁ abhiruhati, visamaṁ manokammaṁ abhiruhati, visamaṁ pāṇātipātaṁ abhiruhati, visamaṁ adinnādānaṁ abhiruhati, visamaṁ kāmesumicchācāraṁ abhiruhati, visamaṁ musāvādaṁ abhiruhati, visamaṁ pisuṇavācaṁ abhiruhati, visamaṁ pharusavācaṁ abhiruhati, visamaṁ samphappalāpaṁ abhiruhati, visamaṁ abhijjhaṁ abhiruhati, visamaṁ byāpādaṁ abhiruhati, visamaṁ micchādiṭṭhiṁ abhiruhati, visame saṅkhāre abhiruhati, visame pañca kāmaguṇe abhiruhati, visame nīvaraṇe abhiruhati.\nYathā taṁ bhantaṁ yānaṁ adantaṁ akāritaṁ avinītaṁ yānampi ārohanakampi bhañjati;\nevamevaṁ so vibbhantako bhantayānapaṭibhāgo niraye attānaṁ bhañjati, tiracchānayoniyaṁ attānaṁ bhañjati, pettivisaye attānaṁ bhañjati, manussaloke attānaṁ bhañjati, devaloke attānaṁ bhañjati.\nYathā taṁ bhantaṁ yānaṁ adantaṁ akāritaṁ avinītaṁ papāte papatati;\nevamevaṁ so vibbhantako bhantayānapaṭibhāgo jātipapātampi papatati, jarāpapātampi papatati, byādhipapātampi papatati, maraṇapapātampi papatati, sokaparidevadukkhadomanassupāyāsapapātampi papatati.\nLoketi apāyaloke manussaloketi—\nyānaṁ bhantaṁva taṁ loke."}},{"id":"mnd7:28","sourceIds":["mnd7:28.1","mnd7:28.2","mnd7:28.3","mnd7:28.4","mnd7:28.5","mnd7:28.6"],"kind":"text","text":{"pi":"Hīnamāhu puthujjananti.\nPuthujjanāti kenaṭṭhena puthujjanā?\nPuthu kilese janentīti puthujjanā, puthu avihatasakkāyadiṭṭhikāti puthujjanā, puthu satthārānaṁ mukhullokikāti puthujjanā, puthu sabbagatīhi avuṭṭhitāti puthujjanā, puthu nānābhisaṅkhāre abhisaṅkharontīti puthujjanā, puthu nānāoghehi vuyhantīti puthujjanā, puthu nānāsantāpehi santapantīti puthujjanā, puthu nānāpariḷāhehi paridayhantīti puthujjanā, puthu pañcasu kāmaguṇesu rattā giddhā gadhitā mucchitā ajjhosannā laggā laggitā palibuddhāti puthujjanā, puthu pañcahi nīvaraṇehi āvutā nivutā ovutā pihitā paṭicchannā paṭikujjitāti puthujjanā.\nHīnamāhu puthujjananti.\nPuthujjanaṁ hīnaṁ nihīnaṁ omakaṁ lāmakaṁ chatukkaṁ parittanti evamāhaṁsu evaṁ kathenti evaṁ bhaṇanti evaṁ dīpayanti evaṁ voharantīti—\nhīnamāhu puthujjanaṁ."}},{"id":"mnd7:29","sourceIds":["mnd7:29.1"],"kind":"text","text":{"pi":"Tenāha bhagavā—"}},{"id":"mnd7:30","sourceIds":["mnd7:30.1","mnd7:30.2","mnd7:30.3","mnd7:30.4"],"kind":"text","text":{"pi":"“Eko pubbe caritvāna,\nmethunaṁ yo nisevati;\nYānaṁ bhantaṁva taṁ loke,\nhīnamāhu puthujjanan”ti."}},{"id":"mnd7:31","sourceIds":["mnd7:31.1","mnd7:31.2","mnd7:31.3","mnd7:31.4"],"kind":"text","text":{"pi":"Yaso kitti ca yā pubbe,\nhāyate vāpi tassa sā;\nEtampi disvā sikkhetha,\nmethunaṁ vippahātave."}},{"id":"mnd7:32","sourceIds":["mnd7:32.1","mnd7:32.2","mnd7:32.3","mnd7:32.4","mnd7:32.5","mnd7:32.6","mnd7:32.7","mnd7:32.8","mnd7:32.9"],"kind":"text","text":{"pi":"Yaso kitti ca yā pubbe, hāyate vāpi tassa sāti.\nKatamo yaso?\nIdhekacco pubbe samaṇabhāve sakkato hoti garukato mānito pūjito apacito lābhī cīvarapiṇḍapātasenāsanagilānapaccayabhesajjaparikkhārānaṁ—\nayaṁ yaso.\nKatamā kitti?\nIdhekacco pubbe samaṇabhāve kittivaṇṇagato hoti paṇḍito viyatto medhāvī bahussuto cittakathī kalyāṇapaṭibhāno—\nsuttantikoti vā vinayadharoti vā dhammakathikoti vā āraññikoti vā piṇḍapātikoti vā paṁsukūlikoti vā tecīvarikoti vā sapadānacārikoti vā khalupacchābhattikoti vā nesajjikoti vā yathāsanthatikoti vā\npaṭhamassa jhānassa lābhīti vā dutiyassa jhānassa lābhīti vā tatiyassa jhānassa lābhīti vā catutthassa jhānassa lābhīti vā ākāsānañcāyatanasamāpattiyā lābhīti vā viññāṇañcāyatanasamāpattiyā lābhīti vā ākiñcaññāyatanasamāpattiyā lābhīti vā nevasaññānāsaññāyatanasamāpattiyā lābhīti vā, ayaṁ kittīti—\nyaso kitti ca yā pubbe."}},{"id":"mnd7:33","sourceIds":["mnd7:33.1","mnd7:33.2","mnd7:33.3"],"kind":"text","text":{"pi":"Hāyate vāpi tassa sāti.\nTassa aparena samayena buddhaṁ dhammaṁ saṅghaṁ sikkhaṁ paccakkhāya hīnāyāvattassa so ca yaso sā ca kitti hāyati parihāyati paridhaṁsati paripatati antaradhāyati vippalujjatīti—\nyaso kitti ca yā pubbe hāyate vāpi tassa sā."}},{"id":"mnd7:34","sourceIds":["mnd7:34.1","mnd7:34.2","mnd7:34.3","mnd7:34.4","mnd7:34.5","mnd7:34.6","mnd7:34.7","mnd7:34.8","mnd7:34.9","mnd7:34.10","mnd7:34.11","mnd7:34.12"],"kind":"text","text":{"pi":"Etampi disvā sikkhetha methunaṁ vippahātaveti.\nEtanti pubbe samaṇabhāve yaso kitti ca, aparabhāge buddhaṁ dhammaṁ saṅghaṁ sikkhaṁ paccakkhāya hīnāyāvattassa ayaso ca akitti ca;\netaṁ sampattiṁ vipattiṁ.\nDisvāti passitvā tulayitvā tīrayitvā vibhāvayitvā vibhūtaṁ katvāti—\netampi disvā.\nSikkhethāti tisso sikkhā—\nadhisīlasikkhā, adhicittasikkhā, adhipaññāsikkhā.\nKatamā adhisīlasikkhā?\nIdha bhikkhu sīlavā hoti, pātimokkhasaṁvarasaṁvuto viharati ācāragocarasampanno aṇumattesu vajjesu bhayadassāvī, samādāya sikkhati sikkhāpadesu.\nKhuddako sīlakkhandho, mahanto sīlakkhandho.\nSīlaṁ patiṭṭhā ādi caraṇaṁ saṁyamo saṁvaro mukhaṁ pamukhaṁ kusalānaṁ dhammānaṁ samāpattiyā—\nayaṁ adhisīlasikkhā."}},{"id":"mnd7:35","sourceIds":["mnd7:35.1","mnd7:35.2","mnd7:35.3","mnd7:35.4","mnd7:35.5","mnd7:35.6"],"kind":"text","text":{"pi":"Katamā adhicittasikkhā?\nIdha bhikkhu vivicceva kāmehi vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharati …pe…\ndutiyaṁ jhānaṁ …\ntatiyaṁ jhānaṁ …\ncatutthaṁ jhānaṁ upasampajja viharati—\nayaṁ adhicittasikkhā."}},{"id":"mnd7:36","sourceIds":["mnd7:36.1","mnd7:36.2","mnd7:36.3","mnd7:36.4","mnd7:36.5","mnd7:36.6","mnd7:36.7"],"kind":"text","text":{"pi":"Katamā adhipaññāsikkhā?\nIdha bhikkhu paññavā hoti udayatthagāminiyā paññāya samannāgato ariyāya nibbedhikāya sammā dukkhakkhayagāminiyā.\nSo idaṁ dukkhanti yathābhūtaṁ pajānāti, ayaṁ dukkhasamudayoti yathābhūtaṁ pajānāti, ayaṁ dukkhanirodhoti yathābhūtaṁ pajānāti, ayaṁ dukkhanirodhagāminī paṭipadāti yathābhūtaṁ pajānāti,\nime āsavāti yathābhūtaṁ pajānāti, ayaṁ āsavasamudayoti yathābhūtaṁ pajānāti, ayaṁ āsavanirodhoti yathābhūtaṁ pajānāti, ayaṁ āsavanirodhagāminī paṭipadāti yathābhūtaṁ pajānāti—\nayaṁ adhipaññāsikkhā.\nMethunadhammo nāma yo so asaddhammo …pe…\ntaṅkāraṇā vuccati methunadhammo."}},{"id":"mnd7:37","sourceIds":["mnd7:37.1","mnd7:37.2","mnd7:37.3","mnd7:37.4"],"kind":"text","text":{"pi":"Etampi disvā sikkhetha, methunaṁ vippahātaveti.\nMethunadhammassa pahānāya vūpasamāya paṭinissaggāya paṭipassaddhiyā adhisīlampi sikkheyya, adhicittampi sikkheyya, adhipaññampi sikkheyya.\nImā tisso sikkhāyo āvajjanto sikkheyya, jānanto sikkheyya, passanto sikkheyya, paccavekkhanto sikkheyya, cittaṁ adhiṭṭhahanto sikkheyya, saddhāya adhimuccanto sikkheyya, vīriyaṁ paggaṇhanto sikkheyya, satiṁ upaṭṭhapento sikkheyya, cittaṁ samādahanto sikkheyya, paññāya pajānanto sikkheyya, abhiññeyyaṁ abhijānanto sikkheyya, pariññeyyaṁ parijānanto sikkheyya, pahātabbaṁ pajahanto sikkheyya, bhāvetabbaṁ bhāvento sikkheyya, sacchikātabbaṁ sacchikaronto sikkheyya ācareyya samācareyya samādāya vatteyyāti—\netampi disvā sikkhetha, methunaṁ vippahātave."}},{"id":"mnd7:38","sourceIds":["mnd7:38.1"],"kind":"text","text":{"pi":"Tenāha bhagavā—"}},{"id":"mnd7:39","sourceIds":["mnd7:39.1","mnd7:39.2","mnd7:39.3","mnd7:39.4"],"kind":"text","text":{"pi":"“Yaso kitti ca yā pubbe,\nhāyate vāpi tassa sā;\nEtampi disvā sikkhetha,\nmethunaṁ vippahātave”ti."}},{"id":"mnd7:40","sourceIds":["mnd7:40.1","mnd7:40.2","mnd7:40.3","mnd7:40.4"],"kind":"text","text":{"pi":"Saṅkappehi pareto so,\nkapaṇo viya jhāyati;\nSutvā paresaṁ nigghosaṁ,\nmaṅku hoti tathāvidho."}},{"id":"mnd7:41","sourceIds":["mnd7:41.1","mnd7:41.2","mnd7:41.3","mnd7:41.4","mnd7:41.5"],"kind":"text","text":{"pi":"Saṅkappehi pareto so, kapaṇo viya jhāyatīti.\nKāmasaṅkappena byāpādasaṅkappena vihiṁsāsaṅkappena diṭṭhisaṅkappena phuṭṭho pareto samohito samannāgato pihito kapaṇo viya mando viya momūho viya jhāyati pajjhāyati nijjhāyati apajjhāyati.\nYathā ulūko rukkhasākhāyaṁ mūsikaṁ magayamāno jhāyati pajjhāyati nijjhāyati apajjhāyati, yathā kotthu nadītīre macche magayamāno jhāyati pajjhāyati nijjhāyati apajjhāyati, yathā biḷāro sandhisamalasaṅkaṭire mūsikaṁ magayamāno jhāyati pajjhāyati nijjhāyati apajjhāyati, yathā gadrabho vahacchinno sandhisamalasaṅkaṭire jhāyati pajjhāyati nijjhāyati apajjhāyati;\nevamevaṁ so vibbhantako kāmasaṅkappena byāpādasaṅkappena vihiṁsāsaṅkappena diṭṭhisaṅkappena phuṭṭho pareto samohito samannāgato pihito kapaṇo viya mando viya momūho viya jhāyati pajjhāyati nijjhāyati apajjhāyatīti—\nsaṅkappehi pareto so kapaṇo viya jhāyati."}},{"id":"mnd7:42","sourceIds":["mnd7:42.1","mnd7:42.2","mnd7:42.3","mnd7:42.4","mnd7:42.5","mnd7:42.6","mnd7:42.7","mnd7:42.8"],"kind":"text","text":{"pi":"Sutvā paresaṁ nigghosaṁ, maṅku hoti tathāvidhoti.\nParesanti upajjhāyā vā ācariyā vā samānupajjhāyakā vā samānācariyakā vā mittā vā sandiṭṭhā vā sambhattā vā sahāyā vā codenti—\n“tassa te, āvuso, alābhā, tassa te dulladdhaṁ, yaṁ tvaṁ evarūpaṁ uḷāraṁ satthāraṁ labhitvā evaṁ svākkhāte dhammavinaye pabbajitvā evarūpaṁ ariyagaṇaṁ labhitvā hīnassa methunadhammassa kāraṇā buddhaṁ dhammaṁ saṅghaṁ sikkhaṁ paccakkhāya hīnāyāvattosi.\nSaddhāpi nāma te nāhosi kusalesu dhammesu, hirīpi nāma te nāhosi kusalesu dhammesu, ottappampi nāma te nāhosi kusalesu dhammesu, vīriyampi nāma te nāhosi kusalesu dhammesu, satipi nāma te nāhosi kusalesu dhammesu, paññāpi nāma te nāhosi kusalesu dhammesū”ti.\nTesaṁ vacanaṁ byappathaṁ desanaṁ anusāsanaṁ anusiṭṭhiṁ sutvā suṇitvā uggahetvā upadhārayitvā upalakkhayitvā maṅku hoti, pīḷito ghaṭṭito byādhito domanassito hoti.\nTathāvidhoti tathāvidho tādiso tassaṇṭhito tappakāro tappaṭibhāgo.\nYo so vibbhantakoti—\nsutvā paresaṁ nigghosaṁ maṅku hoti tathāvidho."}},{"id":"mnd7:43","sourceIds":["mnd7:43.1"],"kind":"text","text":{"pi":"Tenāha bhagavā—"}},{"id":"mnd7:44","sourceIds":["mnd7:44.1","mnd7:44.2","mnd7:44.3","mnd7:44.4"],"kind":"text","text":{"pi":"“Saṅkappehi pareto so,\nkapaṇo viya jhāyati;\nSutvā paresaṁ nigghosaṁ,\nmaṅku hoti tathāvidho”ti."}},{"id":"mnd7:45","sourceIds":["mnd7:45.1","mnd7:45.2","mnd7:45.3","mnd7:45.4"],"kind":"text","text":{"pi":"Atha satthāni kurute,\nparavādehi codito;\nEsa khvassa mahāgedho,\nmosavajjaṁ pagāhati."}},{"id":"mnd7:46","sourceIds":["mnd7:46.1","mnd7:46.2","mnd7:46.3","mnd7:46.4","mnd7:46.5","mnd7:46.6","mnd7:46.7","mnd7:46.8","mnd7:46.9","mnd7:46.10","mnd7:46.11","mnd7:46.12","mnd7:46.13","mnd7:46.14","mnd7:46.15","mnd7:46.16","mnd7:46.17","mnd7:46.18","mnd7:46.19","mnd7:46.20","mnd7:46.21"],"kind":"text","text":{"pi":"Atha satthāni kurute, paravādehi coditoti.\nAthāti padasandhi padasaṁsaggo padapāripūrī akkharasamavāyo byañjanasiliṭṭhatā padānupubbatāpetaṁ—\nathāti.\nSatthānīti tīṇi satthāni—\nkāyasatthaṁ, vacīsatthaṁ, manosatthaṁ.\nTividhaṁ kāyaduccaritaṁ kāyasatthaṁ, catubbidhaṁ vacīduccaritaṁ vacīsatthaṁ, tividhaṁ manoduccaritaṁ manosatthaṁ.\nParavādehi coditoti.\nUpajjhāyehi vā ācariyehi vā samānupajjhāyakehi vā samānācariyakehi vā mittehi vā sandiṭṭhehi vā sambhattehi vā sahāyehi vā codito sampajānamusā bhāsati.\n“Abhirato ahaṁ, bhante, ahosiṁ pabbajjāya.\nMātā me posetabbā, tenamhi vibbhanto”ti bhaṇati.\n“Pitā me posetabbo, tenamhi vibbhanto”ti bhaṇati.\n“Bhātā me posetabbo …\nbhaginī me posetabbā …\nputto me posetabbo …\ndhītā me posetabbā …\nmittā me posetabbā …\namaccā me posetabbā …\nñātakā me posetabbā …\nsālohitā me posetabbā, tenamhi vibbhanto”ti bhaṇati.\nVacīsatthaṁ karoti saṅkaroti janeti sañjaneti nibbatteti abhinibbattetīti—\natha satthāni kurute, paravādehi codito."}},{"id":"mnd7:47","sourceIds":["mnd7:47.1","mnd7:47.2","mnd7:47.3"],"kind":"text","text":{"pi":"Esa khvassa mahāgedhoti.\nEso tassa mahāgedho mahāvanaṁ mahāgahanaṁ mahākantāro mahāvisamo mahākuṭilo mahāpaṅko mahāpalipo mahāpalibodho mahābandhanaṁ, yadidaṁ sampajānamusāvādoti—\nesa khvassa mahāgedho."}},{"id":"mnd7:48","sourceIds":["mnd7:48.1","mnd7:48.2","mnd7:48.3","mnd7:48.4","mnd7:48.5","mnd7:48.6","mnd7:48.7","mnd7:48.8","mnd7:48.9","mnd7:48.10"],"kind":"text","text":{"pi":"Mosavajjaṁ pagāhatīti.\nMosavajjaṁ vuccati musāvādo.\nIdhekacco sabhaggato vā parisaggato vā ñātimajjhagato vā pūgamajjhagato vā rājakulamajjhagato vā abhinīto sakkhipuṭṭho—\n“ehambho purisa, yaṁ jānāsi taṁ vadehī”ti,\nso ajānaṁ vā āha—“jānāmī”ti,\njānaṁ vā āha—“na jānāmī”ti,\napassaṁ vā āha—“passāmī”ti,\npassaṁ vā āha—“na passāmī”ti.\nIti attahetu vā parahetu vā āmisakiñcikkhahetu vā sampajānamusā bhāsati—\nidaṁ vuccati mosavajjaṁ."}},{"id":"mnd7:49","sourceIds":["mnd7:49.1","mnd7:49.2","mnd7:49.3","mnd7:49.4","mnd7:49.5","mnd7:49.6","mnd7:49.7","mnd7:49.8","mnd7:49.9","mnd7:49.10","mnd7:49.11","mnd7:49.12","mnd7:49.13","mnd7:49.14","mnd7:49.15","mnd7:49.16","mnd7:49.17","mnd7:49.18","mnd7:49.19","mnd7:49.20","mnd7:49.21","mnd7:49.22","mnd7:49.23","mnd7:49.24"],"kind":"text","text":{"pi":"Api ca tīhākārehi musāvādo hoti.\nPubbevassa hoti—\n“musā bhaṇissan”ti, bhaṇantassa hoti—\n“musā bhaṇāmī”ti, bhaṇitassa hoti—\n“musā mayā bhaṇitan”ti.\nImehi tīhākārehi musāvādo hoti.\nApi ca catūhākārehi musāvādo hoti.\nPubbevassa hoti—\n“musā bhaṇissan”ti, bhaṇantassa hoti—\n“musā bhaṇāmī”ti, bhaṇitassa hoti—\n“musā mayā bhaṇitan”ti, vinidhāya diṭṭhiṁ.\nImehi catūhākārehi musāvādo hoti.\nApi ca pañcahākārehi …\nchahākārehi …\nsattahākārehi …\naṭṭhahākārehi musāvādo hoti.\nPubbevassa hoti—\n“musā bhaṇissan”ti, bhaṇantassa hoti—\n“musā bhaṇāmī”ti, bhaṇitassa hoti—\n“musā mayā bhaṇitan”ti, vinidhāya diṭṭhiṁ, vinidhāya khantiṁ, vinidhāya ruciṁ, vinidhāya saññaṁ, vinidhāya bhāvaṁ.\nImehi aṭṭhahākārehi musāvādo hoti.\nMosavajjaṁ pagāhatīti.\nMosavajjaṁ pagāhati ogāhati ajjhogāhati pavisatīti—\nmosavajjaṁ pagāhati."}},{"id":"mnd7:50","sourceIds":["mnd7:50.1"],"kind":"text","text":{"pi":"Tenāha bhagavā—"}},{"id":"mnd7:51","sourceIds":["mnd7:51.1","mnd7:51.2","mnd7:51.3","mnd7:51.4"],"kind":"text","text":{"pi":"“Atha satthāni kurute,\nparavādehi codito;\nEsa khvassa mahāgedho,\nmosavajjaṁ pagāhatī”ti."}},{"id":"mnd7:52","sourceIds":["mnd7:52.1","mnd7:52.2","mnd7:52.3","mnd7:52.4"],"kind":"text","text":{"pi":"Paṇḍitoti samaññāto,\nekacariyaṁ adhiṭṭhito;\nSa cāpi methune yutto,\nmandova parikissati."}},{"id":"mnd7:53","sourceIds":["mnd7:53.1","mnd7:53.2","mnd7:53.3","mnd7:53.4","mnd7:53.5","mnd7:53.6"],"kind":"text","text":{"pi":"Paṇḍitoti samaññātoti.\nIdhekacco pubbe samaṇabhāve kitti vaṇṇagato hoti—\n“paṇḍito viyatto medhāvī bahussuto cittakathī kalyāṇapaṭibhāno suttantikoti vā vinayadharoti vā dhammakathikoti vā …pe…\nnevasaññānāsaññāyatanasamāpattiyā lābhī”ti vā.\nEvaṁ ñāto hoti paññāto samaññāto hotīti—\npaṇḍitoti samaññāto."}},{"id":"mnd7:54","sourceIds":["mnd7:54.1","mnd7:54.2","mnd7:54.3","mnd7:54.4","mnd7:54.5","mnd7:54.6","mnd7:54.7","mnd7:54.8","mnd7:54.9","mnd7:54.10"],"kind":"text","text":{"pi":"Ekaccariyaṁ adhiṭṭhitoti.\nDvīhi kāraṇehi ekaccariyaṁ adhiṭṭhito—\npabbajjāsaṅkhātena vā gaṇāvavassaggaṭṭhena vā.\nKathaṁ pabbajjāsaṅkhātena ekacariyaṁ adhiṭṭhito?\nSabbaṁ gharāvāsapalibodhaṁ chinditvā …pe…\nevaṁ pabbajjāsaṅkhātena ekaccariyaṁ adhiṭṭhito.\nKathaṁ gaṇāvavassaggaṭṭhena ekacariyaṁ adhiṭṭhito?\nSo evaṁ pabbajito samāno eko araññavanapatthāni pantāni …pe…\nevaṁ gaṇāvavassaggaṭṭhena ekacariyaṁ adhiṭṭhitoti—\nekacariyaṁ adhiṭṭhito."}},{"id":"mnd7:55","sourceIds":["mnd7:55.1","mnd7:55.2","mnd7:55.3","mnd7:55.4","mnd7:55.5","mnd7:55.6"],"kind":"text","text":{"pi":"Sa cāpi methune yuttoti.\nMethunadhammo nāma yo so asaddhammo gāmadhammo …pe…\ntaṅkāraṇā vuccati methunadhammo.\nSa cāpi methune yuttoti.\nSo aparena samayena buddhaṁ dhammaṁ saṅghaṁ sikkhaṁ paccakkhāya hīnāyāvattitvā methunadhamme yutto payutto āyutto samāyuttoti—\nsa cāpi methune yutto."}},{"id":"mnd7:56","sourceIds":["mnd7:56.1","mnd7:56.2","mnd7:56.3","mnd7:56.4","mnd7:56.5","mnd7:56.6","mnd7:56.7"],"kind":"text","text":{"pi":"Mandova parikissatīti.\nKapaṇo viya mando viya momūho viya kissati parikissati parikilissati.\nPāṇampi hanati, adinnampi ādiyati, sandhimpi chindati, nillopampi harati, ekāgārikampi karoti, paripanthepi tiṭṭhati, paradārampi gacchati, musāpi bhaṇati.\nEvampi kissati parikissati parikilissati.\nTamenaṁ rājāno gahetvā vividhā kammakāraṇā kārenti—\nkasāhipi tāḷenti, vettehipi tāḷenti, addhadaṇḍakehipi tāḷenti, hatthampi chindanti, pādampi chindanti, hatthapādampi chindanti, kaṇṇampi chindanti, nāsampi chindanti, kaṇṇanāsampi chindanti, bilaṅgathālikampi karonti, saṅkhamuṇḍikampi karonti, rāhumukhampi karonti, jotimālikampi karonti, hatthapajjotikampi karonti, erakavattikampi karonti, cīrakavāsikampi karonti, eṇeyyakampi karonti, baḷisamaṁsikampi karonti, kahāpaṇikampi karonti, khārāpatacchikampi karonti, palighaparivattikampi karonti, palālapīṭhakampi karonti, tattenapi telena osiñcanti, sunakhehipi khādāpenti, jīvantampi sūle uttāsenti, asināpi sīsaṁ chindanti.\nEvampi kissati parikissati parikilissati."}},{"id":"mnd7:57","sourceIds":["mnd7:57.1","mnd7:57.2"],"kind":"text","text":{"pi":"Atha vā kāmataṇhāya abhibhūto pariyādinnacitto bhoge pariyesanto nāvāya mahāsamuddaṁ pakkhandati, sītassa purakkhato uṇhassa purakkhato ḍaṁsamakasavātātapasarīsapasamphassehi pīḷiyamāno khuppipāsāya miyyamāno tigumbaṁ gacchati, takkolaṁ gacchati, takkasīlaṁ gacchati, kālamukhaṁ gacchati, purapūraṁ gacchati, vesuṅgaṁ gacchati, verāpathaṁ gacchati, javaṁ gacchati, tāmaliṁ gacchati, vaṅgaṁ gacchati, eḷabandhanaṁ gacchati, suvaṇṇakūṭaṁ gacchati, suvaṇṇabhūmiṁ gacchati, tambapāṇiṁ gacchati, suppārakaṁ gacchati, bhārukacchaṁ gacchati, suraṭṭhaṁ gacchati, bhaṅgalokaṁ gacchati, bhaṅgaṇaṁ gacchati, paramabhaṅgaṇaṁ gacchati, yonaṁ gacchati, paramayonaṁ gacchati, vinakaṁ gacchati, mūlapadaṁ gacchati, marukantāraṁ gacchati, jaṇṇupathaṁ gacchati, ajapathaṁ gacchati, meṇḍapathaṁ gacchati, saṅkupathaṁ gacchati, chattapathaṁ gacchati, vaṁsapathaṁ gacchati, sakuṇapathaṁ gacchati, mūsikapathaṁ gacchati, daripathaṁ gacchati, vettācāraṁ gacchati.\nEvampi kissati parikissati parikilissati."}},{"id":"mnd7:58","sourceIds":["mnd7:58.1","mnd7:58.2"],"kind":"text","text":{"pi":"Gavesanto na vindati, alābhamūlakampi dukkhaṁ domanassaṁ paṭisaṁvedeti.\nEvampi kissati parikissati parikilissati."}},{"id":"mnd7:59","sourceIds":["mnd7:59.1","mnd7:59.2","mnd7:59.3","mnd7:59.4","mnd7:59.5","mnd7:59.6"],"kind":"text","text":{"pi":"Gavesanto vindati, laddhāpi ārakkhamūlakampi dukkhaṁ domanassaṁ paṭisaṁvedeti—\n“kinti me bhoge neva rājāno hareyyuṁ, na corā hareyyuṁ, na aggi daheyya, na udakaṁ vaheyya, na apiyā dāyādā hareyyun”ti.\nTassa evaṁ ārakkhato gopayato te bhogā vippalujjanti.\nSo vippayogamūlakampi dukkhaṁ domanassaṁ paṭisaṁvedeti.\nEvampi kissati parikissati parikilissatīti—\nsa cāpi methune yutto, mandova parikissati."}},{"id":"mnd7:60","sourceIds":["mnd7:60.1"],"kind":"text","text":{"pi":"Tenāha bhagavā—"}},{"id":"mnd7:61","sourceIds":["mnd7:61.1","mnd7:61.2","mnd7:61.3","mnd7:61.4"],"kind":"text","text":{"pi":"“Paṇḍitoti samaññāto,\nekacariyaṁ adhiṭṭhito;\nSa cāpi methune yutto,\nmandova parikissatī”ti."}},{"id":"mnd7:62","sourceIds":["mnd7:62.1","mnd7:62.2","mnd7:62.3","mnd7:62.4"],"kind":"text","text":{"pi":"Etamādīnavaṁ ñatvā,\nMuni pubbāpare idha;\nEkacariyaṁ daḷhaṁ kayirā,\nNa nisevetha methunaṁ."}},{"id":"mnd7:63","sourceIds":["mnd7:63.1","mnd7:63.2","mnd7:63.3","mnd7:63.4","mnd7:63.5","mnd7:63.6","mnd7:63.7","mnd7:63.8","mnd7:63.9"],"kind":"text","text":{"pi":"Etamādīnavaṁ ñatvā, muni pubbāpare idhāti.\nEtanti pubbe samaṇabhāve yaso ca kitti ca, aparabhāge buddhaṁ dhammaṁ saṅghaṁ sikkhaṁ paccakkhāya hīnāyāvattassa ayaso ca akitti ca;\netaṁ sampattiṁ vipattiñca.\nÑatvāti jānitvā tulayitvā tīrayitvā vibhāvayitvā vibhūtaṁ katvā.\nMunīti.\nMonaṁ vuccati ñāṇaṁ.\nYā paññā pajānanā …pe… saṅgajālamaticca so muni.\nIdhāti imissā diṭṭhiyā imissā khantiyā imissā ruciyā imasmiṁ ādāye imasmiṁ dhamme imasmiṁ vinaye imasmiṁ dhammavinaye imasmiṁ pāvacane imasmiṁ brahmacariye imasmiṁ satthusāsane imasmiṁ attabhāve imasmiṁ manussaloketi—\netamādīnavaṁ ñatvā muni pubbāpare idha."}},{"id":"mnd7:64","sourceIds":["mnd7:64.1","mnd7:64.2","mnd7:64.3","mnd7:64.4","mnd7:64.5","mnd7:64.6"],"kind":"text","text":{"pi":"Ekacariyaṁ daḷhaṁ kayirāti.\nDvīhi kāraṇehi ekacariyaṁ daḷhaṁ kareyya—\npabbajjāsaṅkhātena vā gaṇāvavassaggaṭṭhena vā.\nKathaṁ pabbajjāsaṅkhātena ekacariyaṁ daḷhaṁ kareyya?\nSabbaṁ gharāvāsapalibodhaṁ chinditvā puttadārapalibodhaṁ chinditvā ñātipalibodhaṁ chinditvā mittāmaccapalibodhaṁ chinditvā sannidhipalibodhaṁ chinditvā kesamassuṁ ohāretvā kāsāyāni vatthāni acchādetvā agārasmā anagāriyaṁ pabbajitvā akiñcanabhāvaṁ upagantvā eko careyya vihareyya iriyeyya vatteyya pāleyya yapeyya yāpeyya.\nEvaṁ pabbajjāsaṅkhātena ekacariyaṁ daḷhaṁ kareyya."}},{"id":"mnd7:65","sourceIds":["mnd7:65.1","mnd7:65.2","mnd7:65.3","mnd7:65.4","mnd7:65.5","mnd7:65.6"],"kind":"text","text":{"pi":"Kathaṁ gaṇāvavassaggaṭṭhena ekacariyaṁ daḷhaṁ kareyya?\nSo evaṁ pabbajito samāno eko araññavanapatthāni pantāni senāsanāni paṭiseveyya appasaddāni appanigghosāni vijanavātāni manussarāhasseyyakāni paṭisallānasāruppāni.\nSo eko gaccheyya, eko tiṭṭheyya, eko nisīdeyya, eko seyyaṁ kappeyya, eko gāmaṁ piṇḍāya paviseyya, eko paṭikkameyya, eko raho nisīdeyya, eko caṅkamaṁ adhiṭṭheyya, eko careyya vihareyya iriyeyya vatteyya pāleyya yapeyya yāpeyya.\nEvaṁ gaṇāvavassaggaṭṭhena ekacariyaṁ daḷhaṁ kareyyāti—\nekacariyaṁ daḷhaṁ kareyya, thiraṁ kareyya, daḷhaṁ samādāno assa, avaṭṭhitasamādāno assa kusalesu dhammesūti—\nekacariyaṁ daḷhaṁ kayirā."}},{"id":"mnd7:66","sourceIds":["mnd7:66.1","mnd7:66.2","mnd7:66.3","mnd7:66.4","mnd7:66.5"],"kind":"text","text":{"pi":"Na nisevetha methunanti.\nMethunadhammo nāma yo so asaddhammo gāmadhammo …pe…\ntaṅkāraṇā vuccati methunadhammo.\nMethunadhammaṁ na seveyya na niseveyya na saṁseveyya na paṭiseveyya na careyya na samācareyya na samādāya vatteyyāti—\nna nisevetha methunaṁ."}},{"id":"mnd7:67","sourceIds":["mnd7:67.1"],"kind":"text","text":{"pi":"Tenāha bhagavā—"}},{"id":"mnd7:68","sourceIds":["mnd7:68.1","mnd7:68.2","mnd7:68.3","mnd7:68.4"],"kind":"text","text":{"pi":"“Etamādīnavaṁ ñatvā,\nMuni pubbāpare idha;\nEkacariyaṁ daḷhaṁ kayirā,\nNa nisevetha methunan”ti."}},{"id":"mnd7:69","sourceIds":["mnd7:69.1","mnd7:69.2","mnd7:69.3","mnd7:69.4"],"kind":"text","text":{"pi":"Vivekaññeva sikkhetha,\netaṁ ariyānamuttamaṁ;\nNa tena seṭṭho maññetha,\nsa ve nibbānasantike."}},{"id":"mnd7:70","sourceIds":["mnd7:70.1","mnd7:70.2","mnd7:70.3","mnd7:70.4","mnd7:70.5","mnd7:70.6","mnd7:70.7","mnd7:70.8","mnd7:70.9","mnd7:70.10","mnd7:70.11","mnd7:70.12","mnd7:70.13"],"kind":"text","text":{"pi":"Vivekaññeva sikkhethāti.\nVivekoti tayo vivekā—\nkāyaviveko, cittaviveko, upadhiviveko.\nKatamo kāyaviveko …pe…\nayaṁ upadhiviveko.\nKāyaviveko ca vivekaṭṭhakāyānaṁ nekkhammābhiratānaṁ.\nCittaviveko ca parisuddhacittānaṁ paramavodānappattānaṁ.\nUpadhiviveko ca nirūpadhīnaṁ puggalānaṁ visaṅkhāragatānaṁ.\nSikkhāti tisso sikkhā—\nadhisīlasikkhā, adhicittasikkhā, adhipaññāsikkhā …pe…\nayaṁ adhipaññāsikkhā.\nVivekaññeva sikkhethāti vivekaññeva sikkheyya ācareyya samācareyya samādāya vatteyyāti—\nvivekaññeva sikkhetha."}},{"id":"mnd7:71","sourceIds":["mnd7:71.1","mnd7:71.2","mnd7:71.3","mnd7:71.4"],"kind":"text","text":{"pi":"Etaṁ ariyānamuttamanti.\nAriyā vuccanti buddhā ca buddhasāvakā ca paccekabuddhā ca.\nAriyānaṁ etaṁ aggaṁ seṭṭhaṁ visiṭṭhaṁ pāmokkhaṁ uttamaṁ pavaraṁ yadidaṁ vivekacariyāti—\netaṁ ariyānamuttamaṁ."}},{"id":"mnd7:72","sourceIds":["mnd7:72.1","mnd7:72.2","mnd7:72.3"],"kind":"text","text":{"pi":"Na tena seṭṭho maññethāti.\nKāyavivekacariyāya unnatiṁ na kareyya, unnamaṁ na kareyya, mānaṁ na kareyya, thāmaṁ na kareyya, thambhaṁ na kareyya, na tena mānaṁ janeyya, na tena thaddho assa patthaddho paggahitasiroti—\ntena seṭṭho na maññetha."}},{"id":"mnd7:73","sourceIds":["mnd7:73.1","mnd7:73.2","mnd7:73.3"],"kind":"text","text":{"pi":"Sa ve nibbānasantiketi.\nSo nibbānassa santike sāmantā āsanne avidūre upakaṭṭheti—\nsa ve nibbānasantike."}},{"id":"mnd7:74","sourceIds":["mnd7:74.1"],"kind":"text","text":{"pi":"Tenāha bhagavā—"}},{"id":"mnd7:75","sourceIds":["mnd7:75.1","mnd7:75.2","mnd7:75.3","mnd7:75.4"],"kind":"text","text":{"pi":"“Vivekaññeva sikkhetha,\netaṁ ariyānamuttamaṁ;\nNa tena seṭṭho maññetha,\nsa ve nibbānasantike”ti."}},{"id":"mnd7:76","sourceIds":["mnd7:76.1","mnd7:76.2","mnd7:76.3","mnd7:76.4"],"kind":"text","text":{"pi":"Rittassa munino carato,\nkāmesu anapekkhino;\nOghatiṇṇassa pihayanti,\nkāmesu gadhitā pajā."}},{"id":"mnd7:77","sourceIds":["mnd7:77.1","mnd7:77.2","mnd7:77.3","mnd7:77.4","mnd7:77.5","mnd7:77.6","mnd7:77.7","mnd7:77.8","mnd7:77.9","mnd7:77.10","mnd7:77.11","mnd7:77.12","mnd7:77.13","mnd7:77.14","mnd7:77.15","mnd7:77.16","mnd7:77.17","mnd7:77.18","mnd7:77.19","mnd7:77.20","mnd7:77.21","mnd7:77.22","mnd7:77.23","mnd7:77.24","mnd7:77.25","mnd7:77.26","mnd7:77.27","mnd7:77.28","mnd7:77.29","mnd7:77.30","mnd7:77.31"],"kind":"text","text":{"pi":"Rittassa munino caratoti.\nRittassa vivittassa pavivittassa, kāyaduccaritena rittassa vivittassa pavivittassa.\nVacīduccaritena …pe…\nmanoduccaritena …\nrāgena …\ndosena …\nmohena …\nkodhena …\nupanāhena …\nmakkhena …\npaḷāsena …\nissāya …\nmacchariyena …\nmāyāya …\nsāṭheyyena …\nthambhena …\nsārambhena …\nmānena …\natimānena …\nmadena …\npamādena …\nsabbakilesehi …\nsabbaduccaritehi …\nsabbadarathehi …\nsabbapariḷāhehi …\nsabbasantāpehi …\nsabbākusalābhisaṅkhārehi rittassa vivittassa pavivittassa.\nMuninoti.\nMonaṁ vuccati ñāṇaṁ …pe… saṅgajālamaticca so muni.\nCaratoti carato viharato iriyato vattato pālayato yapayato yāpayatoti—\nrittassa munino carato."}},{"id":"mnd7:78","sourceIds":["mnd7:78.1","mnd7:78.2","mnd7:78.3","mnd7:78.4","mnd7:78.5","mnd7:78.6","mnd7:78.7"],"kind":"text","text":{"pi":"Kāmesu anapekkhinoti.\nKāmāti uddānato dve kāmā—\nvatthukāmā ca kilesakāmā ca …pe…\nime vuccanti vatthukāmā …pe…\nime vuccanti kilesakāmā.\nVatthukāme parijānitvā kilesakāme pahāya pajahitvā vinodetvā byantiṁ karitvā anabhāvaṁ gametvā kāmesu anapekkhamāno cattakāmo vantakāmo muttakāmo pahīnakāmo paṭinissaṭṭhakāmo, vītarāgo cattarāgo vantarāgo muttarāgo pahīnarāgo paṭinissaṭṭharāgo nicchāto nibbuto sītibhūto sukhappaṭisaṁvedī brahmabhūtena attanā viharatīti—\nkāmesu anapekkhino."}},{"id":"mnd7:79","sourceIds":["mnd7:79.1","mnd7:79.2","mnd7:79.3","mnd7:79.4","mnd7:79.5","mnd7:79.6","mnd7:79.7"],"kind":"text","text":{"pi":"Oghatiṇṇassa pihayanti, kāmesu gadhitā pajāti.\nPajāti sattādhivacanaṁ pajā kāmesu rattā giddhā gadhitā mucchitā ajjhosannā laggā laggitā palibuddhā.\nTe kāmoghaṁ tiṇṇassa bhavoghaṁ tiṇṇassa diṭṭhoghaṁ tiṇṇassa avijjoghaṁ tiṇṇassa sabbasaṅkhārapathaṁ tiṇṇassa uttiṇṇassa nittiṇṇassa atikkantassa samatikkantassa vītivattassa pāraṅgatassa pāraṁ pattassa antaṁ gatassa antaṁ pattassa koṭiṁ gatassa koṭiṁ pattassa pariyantaṁ gatassa pariyantaṁ pattassa vosānaṁ gatassa vosānaṁ pattassa tāṇaṁ gatassa tāṇaṁ pattassa leṇaṁ gatassa leṇaṁ pattassa saraṇaṁ gatassa saraṇaṁ pattassa abhayaṁ gatassa abhayaṁ pattassa accutaṁ gatassa accutaṁ pattassa amataṁ gatassa amataṁ pattassa nibbānaṁ gatassa nibbānaṁ pattassa icchanti sādiyanti patthayanti pihayanti abhijappanti.\nYathā iṇāyikā ānaṇyaṁ patthenti pihayanti, yathā ābādhikā ārogyaṁ patthenti pihayanti, yathā bandhanabaddhā bandhanamokkhaṁ patthenti pihayanti, yathā dāsā bhujissaṁ patthenti pihayanti, yathā kantāraddhānapakkhandā khemantabhūmiṁ patthenti pihayanti;\nevamevaṁ pajā kāmesu rattā giddhā gadhitā mucchitā ajjhosannā laggā laggitā palibuddhā te kāmoghaṁ tiṇṇassa bhavoghaṁ tiṇṇassa …pe…\nnibbānaṁ gatassa nibbānaṁ pattassa icchanti sādiyanti patthayanti pihayanti abhijappantīti—\noghatiṇṇassa pihayanti, kāmesu gadhitā pajā."}},{"id":"mnd7:80","sourceIds":["mnd7:80.1"],"kind":"text","text":{"pi":"Tenāha bhagavā—"}},{"id":"mnd7:81","sourceIds":["mnd7:81.1","mnd7:81.2","mnd7:81.3","mnd7:81.4"],"kind":"text","text":{"pi":"“Rittassa munino carato,\nkāmesu anapekkhino;\nOghatiṇṇassa pihayanti,\nkāmesu gadhitā pajā”ti."}},{"id":"mnd7:82","sourceIds":["mnd7:82.1"],"kind":"text","text":{"pi":"Tissametteyyasuttaniddeso sattamo."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mnd7/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}