{"id":"mnd8","title":"8. Pasūrasuttaniddesa","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mnd8","title":"8. Pasūrasuttaniddesa","units":[{"id":"mnd8:0","sourceIds":["mnd8:0.1","mnd8:0.2","mnd8:0.3"],"kind":"text","text":{"pi":"Mahāniddesa\nAṭṭhakavagga\n8. Pasūrasuttaniddesa"}},{"id":"mnd8:1","sourceIds":["mnd8:1.1"],"kind":"text","text":{"pi":"Atha pasūrasuttaniddesaṁ vakkhati—"}},{"id":"mnd8:2","sourceIds":["mnd8:2.1","mnd8:2.2","mnd8:2.3","mnd8:2.4"],"kind":"text","text":{"pi":"Idheva suddhiṁ iti vādayanti,\nNāññesu dhammesu visuddhimāhu;\nYaṁ nissitā tattha subhaṁ vadānā,\nPaccekasaccesu puthū niviṭṭhā."}},{"id":"mnd8:3","sourceIds":["mnd8:3.1","mnd8:3.2","mnd8:3.3","mnd8:3.4","mnd8:3.5","mnd8:3.6","mnd8:3.7","mnd8:3.8","mnd8:3.9","mnd8:3.10","mnd8:3.11","mnd8:3.12","mnd8:3.13"],"kind":"text","text":{"pi":"Idheva suddhiṁ iti vādayantīti.\nIdheva suddhiṁ visuddhiṁ parisuddhiṁ muttiṁ vimuttiṁ parimuttiṁ vadanti kathenti bhaṇanti dīpayanti voharanti.\n“Sassato loko, idameva saccaṁ moghamaññan”ti suddhiṁ visuddhiṁ parisuddhiṁ muttiṁ vimuttiṁ parimuttiṁ vadanti kathenti bhaṇanti dīpayanti voharanti.\n“Asassato loko …\nantavā loko …\nanantavā loko …\ntaṁ jīvaṁ taṁ sarīraṁ …\naññaṁ jīvaṁ aññaṁ sarīraṁ …\nhoti tathāgato paraṁ maraṇā …\nna hoti tathāgato paraṁ maraṇā …\nhoti ca na ca hoti tathāgato paraṁ maraṇā …\nneva hoti na na hoti tathāgato paraṁ maraṇā, idameva saccaṁ moghamaññan”ti suddhiṁ visuddhiṁ parisuddhiṁ muttiṁ vimuttiṁ parimuttiṁ vadanti kathenti bhaṇanti dīpayanti voharantīti—\nidheva suddhiṁ iti vādayanti."}},{"id":"mnd8:4","sourceIds":["mnd8:4.1","mnd8:4.2","mnd8:4.3","mnd8:4.4","mnd8:4.5"],"kind":"text","text":{"pi":"Nāññesu dhammesu visuddhimāhūti.\nAttano satthāraṁ dhammakkhānaṁ gaṇaṁ diṭṭhiṁ paṭipadaṁ maggaṁ ṭhapetvā sabbe paravāde khipanti ukkhipanti parikkhipanti.\n“So satthā na sabbaññū, dhammo na svākkhāto, gaṇo na suppaṭipanno, diṭṭhi na bhaddikā, paṭipadā na supaññattā, maggo na niyyāniko, natthettha suddhi vā visuddhi vā parisuddhi vā mutti vā vimutti vā parimutti vā, na tattha sujjhanti vā visujjhanti vā parisujjhanti vā muccanti vā vimuccanti vā parimuccanti vā, hīnā nihīnā omakā lāmakā chatukkā parittā”ti—\nevamāhaṁsu evaṁ vadanti evaṁ kathenti evaṁ bhaṇanti evaṁ dīpayanti evaṁ voharantīti—\nnāññesu dhammesu visuddhimāhu."}},{"id":"mnd8:5","sourceIds":["mnd8:5.1","mnd8:5.2","mnd8:5.3","mnd8:5.4","mnd8:5.5"],"kind":"text","text":{"pi":"Yaṁ nissitā tattha subhaṁ vadānāti.\nYaṁ nissitāti yaṁ satthāraṁ dhammakkhānaṁ gaṇaṁ diṭṭhiṁ paṭipadaṁ maggaṁ nissitā sannissitā allīnā upagatā ajjhositā adhimuttā.\nTatthāti sakāya diṭṭhiyā sakāya khantiyā sakāya ruciyā sakāya laddhiyā.\nSubhaṁ vadānāti subhavādā sobhanavādā paṇḍitavādā thiravādā ñāyavādā hetuvādā lakkhaṇavādā kāraṇavādā ṭhānavādā sakāya laddhiyāti—\nyaṁ nissitā tattha subhaṁ vadānā."}},{"id":"mnd8:6","sourceIds":["mnd8:6.1","mnd8:6.2","mnd8:6.3","mnd8:6.4","mnd8:6.5","mnd8:6.6"],"kind":"text","text":{"pi":"Paccekasaccesu puthū niviṭṭhāti.\nPuthū samaṇabrāhmaṇā puthū paccekasaccesu niviṭṭhā patiṭṭhitā allīnā upagatā ajjhositā adhimuttā.\n“Sassato loko, idameva saccaṁ moghamaññan”ti niviṭṭhā patiṭṭhitā allīnā upagatā ajjhositā adhimuttā.\n“Asassato loko …pe…\nneva hoti na na hoti tathāgato paraṁ maraṇā, idameva saccaṁ moghamaññan”ti niviṭṭhā patiṭṭhitā allīnā upagatā ajjhositā adhimuttāti—\npaccekasaccesu puthū niviṭṭhā."}},{"id":"mnd8:7","sourceIds":["mnd8:7.1"],"kind":"text","text":{"pi":"Tenāha bhagavā—"}},{"id":"mnd8:8","sourceIds":["mnd8:8.1","mnd8:8.2","mnd8:8.3","mnd8:8.4"],"kind":"text","text":{"pi":"“Idheva suddhiṁ iti vādayanti,\nNāññesu dhammesu visuddhimāhu;\nYaṁ nissitā tattha subhaṁ vadānā,\nPaccekasaccesu puthū niviṭṭhā”ti."}},{"id":"mnd8:9","sourceIds":["mnd8:9.1","mnd8:9.2","mnd8:9.3","mnd8:9.4"],"kind":"text","text":{"pi":"Te vādakāmā parisaṁ vigayha,\nBālaṁ dahantī mithu aññamaññaṁ;\nVadanti te aññasitā kathojjaṁ,\nPasaṁsakāmā kusalāvadānā."}},{"id":"mnd8:10","sourceIds":["mnd8:10.1","mnd8:10.2","mnd8:10.3","mnd8:10.4"],"kind":"text","text":{"pi":"Te vādakāmā parisaṁ vigayhāti.\nTe vādakāmāti te vādakāmā vādatthikā vādādhippāyā vādapurekkhārā vādapariyesanaṁ carantā.\nParisaṁ vigayhāti khattiyaparisaṁ brāhmaṇaparisaṁ gahapatiparisaṁ samaṇaparisaṁ vigayha ogayha ajjhogāhetvā pavisitvāti—\nte vādakāmā parisaṁ vigayha."}},{"id":"mnd8:11","sourceIds":["mnd8:11.1","mnd8:11.2","mnd8:11.3","mnd8:11.4"],"kind":"text","text":{"pi":"Bālaṁ dahantī mithu aññamaññanti.\nMithūti dve janā dve kalahakārakā dve bhaṇḍanakārakā dve bhassakārakā dve vivādakārakā dve adhikaraṇakārakā dve vādino dve sallāpakā;\nte aññamaññaṁ bālato hīnato nihīnato omakato lāmakato chatukkato parittato dahanti passanti dakkhanti olokenti nijjhāyanti upaparikkhantīti—\nbālaṁ dahantī mithu aññamaññaṁ."}},{"id":"mnd8:12","sourceIds":["mnd8:12.1","mnd8:12.2","mnd8:12.3","mnd8:12.4","mnd8:12.5"],"kind":"text","text":{"pi":"Vadanti te aññasitā kathojjanti.\nAññaṁ satthāraṁ dhammakkhānaṁ gaṇaṁ diṭṭhiṁ paṭipadaṁ maggaṁ nissitā sannissitā allīnā upagatā ajjhositā adhimuttā.\nKathojjaṁ vuccati kalaho bhaṇḍanaṁ viggaho vivādo medhagaṁ.\nAtha vā kathojjanti anojavantī sā kathā kathojjaṁ vadanti, kalahaṁ vadanti, bhaṇḍanaṁ vadanti, viggahaṁ vadanti, vivādaṁ vadanti, medhagaṁ vadanti kathenti bhaṇanti dīpayanti voharantīti—\nvadanti te aññasitā kathojjaṁ."}},{"id":"mnd8:13","sourceIds":["mnd8:13.1","mnd8:13.2","mnd8:13.3","mnd8:13.4"],"kind":"text","text":{"pi":"Pasaṁsakāmā kusalāvadānāti.\nPasaṁsakāmāti pasaṁsakāmā pasaṁsatthikā pasaṁsādhippāyā pasaṁsapurekkhārā pasaṁsapariyesanaṁ carantā.\nKusalāvadānāti kusalavādā paṇḍitavādā thiravādā ñāyavādā hetuvādā lakkhaṇavādā kāraṇavādā ṭhānavādā sakāya laddhiyāti—\npasaṁsakāmā kusalāvadānā."}},{"id":"mnd8:14","sourceIds":["mnd8:14.1"],"kind":"text","text":{"pi":"Tenāha bhagavā—"}},{"id":"mnd8:15","sourceIds":["mnd8:15.1","mnd8:15.2","mnd8:15.3","mnd8:15.4"],"kind":"text","text":{"pi":"“Te vādakāmā parisaṁ vigayha,\nBālaṁ dahantī mithu aññamaññaṁ;\nVadanti te aññasitā kathojjaṁ,\nPasaṁsakāmā kusalāvadānā”ti."}},{"id":"mnd8:16","sourceIds":["mnd8:16.1","mnd8:16.2","mnd8:16.3","mnd8:16.4"],"kind":"text","text":{"pi":"Yutto kathāyaṁ parisāya majjhe,\nPasaṁsamicchaṁ vinighāti hoti;\nApāhatasmiṁ pana maṅku hoti,\nNindāya so kuppati randhamesī."}},{"id":"mnd8:17","sourceIds":["mnd8:17.1","mnd8:17.2","mnd8:17.3"],"kind":"text","text":{"pi":"Yutto kathāyaṁ parisāya majjheti.\nKhattiyaparisāya vā brāhmaṇaparisāya vā gahapatiparisāya vā samaṇaparisāya vā majjhe attano kathāyaṁ yutto payutto āyutto samāyutto sampayutto kathetunti—\nyutto kathāyaṁ parisāya majjhe."}},{"id":"mnd8:18","sourceIds":["mnd8:18.1","mnd8:18.2","mnd8:18.3","mnd8:18.4","mnd8:18.5"],"kind":"text","text":{"pi":"Pasaṁsamicchaṁ vinighāti hotīti.\nPasaṁsamicchanti pasaṁsaṁ thomanaṁ kittiṁ vaṇṇahāriyaṁ icchanto sādiyanto patthayanto pihayanto abhijappanto.\nVinighāti hotīti pubbeva sallāpā kathaṅkathī vinighātī hoti.\n“Jayo nu kho me bhavissati, parājayo nu kho me bhavissati, kathaṁ niggahaṁ karissāmi, kathaṁ paṭikammaṁ karissāmi, kathaṁ visesaṁ karissāmi, kathaṁ paṭivisesaṁ karissāmi, kathaṁ āveṭhiyaṁ karissāmi, kathaṁ nibbeṭhiyaṁ karissāmi, kathaṁ chedaṁ karissāmi, kathaṁ maṇḍalaṁ karissāmī”ti, evaṁ pubbeva sallāpā kathaṅkathī vinighāti hotīti—\npasaṁsamicchaṁ vinighāti hoti."}},{"id":"mnd8:19","sourceIds":["mnd8:19.1","mnd8:19.2","mnd8:19.3","mnd8:19.4","mnd8:19.5","mnd8:19.6","mnd8:19.7","mnd8:19.8","mnd8:19.9"],"kind":"text","text":{"pi":"Apāhatasmiṁ pana maṅku hotīti.\nYe te pañhavīmaṁsakā parisā pārisajjā pāsārikā, te apaharanti.\n“Atthāpagataṁ bhaṇitan”ti atthato apaharanti,\n“byañjanāpagataṁ bhaṇitan”ti byañjanato apaharanti,\n“atthabyañjanāpagataṁ bhaṇitan”ti atthabyañjanato apaharanti,\n“attho te dunnīto, byañjanaṁ te duropitaṁ, atthabyañjanaṁ te dunnītaṁ duropitaṁ, niggaho te akato, paṭikammaṁ te dukkaṭaṁ, viseso te akato, paṭiviseso te dukkaṭo, āveṭhiyā te akatā, nibbeṭhiyā te dukkaṭā, chedo te akato, maṇḍalaṁ te dukkaṭaṁ visamakathaṁ dukkathitaṁ dubbhaṇitaṁ dullapitaṁ duruttaṁ dubbhāsitan”ti apaharanti.\nApāhatasmiṁ pana maṅku hotīti.\nApāhatasmiṁ maṅku hoti pīḷito ghaṭṭito byādhito domanassito hotīti—\napāhatasmiṁ pana maṅku hoti."}},{"id":"mnd8:20","sourceIds":["mnd8:20.1","mnd8:20.2","mnd8:20.3","mnd8:20.4","mnd8:20.5"],"kind":"text","text":{"pi":"Nindāya so kuppati randhamesīti.\nNindāya garahāya akittiyā avaṇṇahārikāya kuppati byāpajjati patiṭṭhīyati, kopañca dosañca appaccayañca pātukarotīti—\nnindāya so kuppati.\nRandhamesīti virandhamesī aparaddhamesī khalitamesī gaḷitamesī vivaramesīti—\nnindāya so kuppati randhamesī."}},{"id":"mnd8:21","sourceIds":["mnd8:21.1"],"kind":"text","text":{"pi":"Tenāha bhagavā—"}},{"id":"mnd8:22","sourceIds":["mnd8:22.1","mnd8:22.2","mnd8:22.3","mnd8:22.4"],"kind":"text","text":{"pi":"“Yutto kathāyaṁ parisāya majjhe,\nPasaṁsamicchaṁ vinighāti hoti;\nApāhatasmiṁ pana maṅku hoti,\nNindāya so kuppati randhamesī”ti."}},{"id":"mnd8:23","sourceIds":["mnd8:23.1","mnd8:23.2","mnd8:23.3","mnd8:23.4"],"kind":"text","text":{"pi":"Yamassa vādaṁ parihīnamāhu,\nApāhataṁ pañhavimaṁsakāse;\nParidevati socati hīnavādo,\nUpaccagā manti anutthunāti."}},{"id":"mnd8:24","sourceIds":["mnd8:24.1","mnd8:24.2"],"kind":"text","text":{"pi":"Yamassa vādaṁ parihīnamāhūti yaṁ tassa vādaṁ hīnaṁ nihīnaṁ parihīnaṁ parihāpitaṁ na paripūritaṁ, evamāhaṁsu evaṁ kathenti evaṁ bhaṇanti evaṁ dīpayanti evaṁ voharantīti—\nyamassa vādaṁ parihīnamāhu."}},{"id":"mnd8:25","sourceIds":["mnd8:25.1","mnd8:25.2","mnd8:25.3","mnd8:25.4","mnd8:25.5","mnd8:25.6","mnd8:25.7"],"kind":"text","text":{"pi":"Apāhataṁ pañhavimaṁsakāseti.\nYe te pañhavīmaṁsakā parisā pārisajjā pāsārikā, te apaharanti.\n“Atthāpagataṁ bhaṇitan”ti atthato apaharanti,\n“byañjanāpagataṁ bhaṇitan”ti byañjanato apaharanti,\n“atthabyañjanāpagataṁ bhaṇitan”ti atthabyañjanato apaharanti,\n“attho te dunnīto, byañjanaṁ te duropitaṁ, atthabyañjanaṁ te dunnītaṁ duropitaṁ, niggaho te akato, paṭikammaṁ te dukkaṭaṁ, viseso te akato, paṭiviseso te dukkaṭo, āveṭhiyā te akatā, nibbeṭhiyā te dukkaṭā, chedo te akato, maṇḍalaṁ te dukkaṭaṁ visamakathaṁ dukkathitaṁ dubbhaṇitaṁ dullapitaṁ duruttaṁ dubbhāsitan”ti, apaharantīti—\napāhataṁ pañhavimaṁsakāse."}},{"id":"mnd8:26","sourceIds":["mnd8:26.1","mnd8:26.2","mnd8:26.3","mnd8:26.4","mnd8:26.5","mnd8:26.6","mnd8:26.7","mnd8:26.8","mnd8:26.9","mnd8:26.10","mnd8:26.11","mnd8:26.12","mnd8:26.13","mnd8:26.14","mnd8:26.15","mnd8:26.16","mnd8:26.17","mnd8:26.18","mnd8:26.19"],"kind":"text","text":{"pi":"Paridevati socati hīnavādoti.\nParidevatīti “aññaṁ mayā āvajjitaṁ aññaṁ cintitaṁ aññaṁ upadhāritaṁ, aññaṁ upalakkhitaṁ so mahāpakkho mahāpariso mahāparivāro;\nparisā cāyaṁ vaggā, na samaggā;\nsamaggāya parisāya hetu kathāsallāpo puna bhañjissāmī”ti, yā evarūpā vācā palāpo vippalāpo lālappo lālappāyanā lālappāyitattanti—\nparidevati.\nSocatīti “tassa jayo”ti socati,\n“mayhaṁ parājayo”ti socati,\n“tassa lābho”ti socati,\n“mayhaṁ alābho”ti socati,\n“tassa yaso”ti socati,\n“mayhaṁ ayaso”ti socati,\n“tassa pasaṁsā”ti socati,\n“mayhaṁ nindā”ti socati,\n“tassa sukhan”ti socati,\n“mayhaṁ dukkhan”ti socati,\n“so sakkato garukato mānito pūjito apacito lābhī cīvarapiṇḍapātasenāsanagilānapaccayabhesajjaparikkhārānaṁ, ahamasmi asakkato agarukato amānito apūjito anapacito na lābhī cīvarapiṇḍapātasenāsanagilānapaccayabhesajjaparikkhārānan”ti socati kilamati paridevati urattāḷiṁ kandati sammohaṁ āpajjatīti—\nparidevati socati.\nHīnavādoti hīnavādo nihīnavādo parihīnavādo parihāpitavādo na paripūravādoti—\nparidevati socati hīnavādo."}},{"id":"mnd8:27","sourceIds":["mnd8:27.1","mnd8:27.2","mnd8:27.3","mnd8:27.4","mnd8:27.5","mnd8:27.6","mnd8:27.7"],"kind":"text","text":{"pi":"Upaccagā manti anutthunātīti.\nSo maṁ vādena vādaṁ accagā upaccagā atikkanto samatikkanto vītivattoti.\nEvampi upaccagā manti.\nAtha vā maṁ vādena vādaṁ abhibhavitvā ajjhottharitvā pariyādiyitvā maddayitvā carati viharati iriyati vattati pāleti yapeti yāpetīti.\nEvampi upaccagā manti.\nAnutthunā vuccati vācā palāpo vippalāpo lālappo lālappāyanā lālappāyitattanti—\nupaccagā manti anutthunāti."}},{"id":"mnd8:28","sourceIds":["mnd8:28.1"],"kind":"text","text":{"pi":"Tenāha bhagavā—"}},{"id":"mnd8:29","sourceIds":["mnd8:29.1","mnd8:29.2","mnd8:29.3","mnd8:29.4"],"kind":"text","text":{"pi":"“Yamassa vādaṁ parihīnamāhu,\nApāhataṁ pañhavimaṁsakāse;\nParidevati socati hīnavādo,\nUpaccagā manti anutthunātī”ti."}},{"id":"mnd8:30","sourceIds":["mnd8:30.1","mnd8:30.2","mnd8:30.3","mnd8:30.4"],"kind":"text","text":{"pi":"Ete vivādā samaṇesu jātā,\nEtesu ugghātinighāti hoti;\nEtampi disvā virame kathojjaṁ,\nNa haññadatthatthi pasaṁsalābhā."}},{"id":"mnd8:31","sourceIds":["mnd8:31.1","mnd8:31.2","mnd8:31.3","mnd8:31.4"],"kind":"text","text":{"pi":"Ete vivādā samaṇesu jātāti.\nSamaṇāti ye keci ito bahiddhā paribbajūpagatā paribbajasamāpannā.\nEte diṭṭhikalahā diṭṭhibhaṇḍanā diṭṭhiviggahā diṭṭhivivādā diṭṭhimedhagā samaṇesu jātā sañjātā nibbattā abhinibbattā pātubhūtāti—\nete vivādā samaṇesu jātā."}},{"id":"mnd8:32","sourceIds":["mnd8:32.1","mnd8:32.2","mnd8:32.3","mnd8:32.4","mnd8:32.5","mnd8:32.6","mnd8:32.7","mnd8:32.8","mnd8:32.9","mnd8:32.10","mnd8:32.11","mnd8:32.12","mnd8:32.13","mnd8:32.14","mnd8:32.15","mnd8:32.16","mnd8:32.17","mnd8:32.18","mnd8:32.19","mnd8:32.20"],"kind":"text","text":{"pi":"Etesu ugghātinighāti hotīti.\nJayaparājayo hoti,\nlābhālābho hoti,\nyasāyaso hoti,\nnindāpasaṁsā hoti,\nsukhadukkhaṁ hoti,\nsomanassadomanassaṁ hoti,\niṭṭhāniṭṭhaṁ hoti,\nanunayapaṭighaṁ hoti,\nugghātitanigghātitaṁ hoti,\nanurodhavirodho hoti,\njayena cittaṁ ugghātitaṁ hoti parājayena cittaṁ nigghātitaṁ hoti,\nlābhena cittaṁ ugghātitaṁ hoti alābhena cittaṁ nigghātitaṁ hoti,\nyasena cittaṁ ugghātitaṁ hoti ayasena cittaṁ nigghātitaṁ hoti,\npasaṁsāya cittaṁ ugghātitaṁ hoti nindāya cittaṁ nigghātitaṁ hoti,\nsukhena cittaṁ ugghātitaṁ hoti dukkhena cittaṁ nigghātitaṁ hoti,\nsomanassena cittaṁ ugghātitaṁ hoti domanassena cittaṁ nigghātitaṁ hoti,\nunnatiyā cittaṁ ugghātitaṁ hoti,\nonatiyā cittaṁ nigghātitaṁ hotīti—\netesu ugghātinighāti hoti."}},{"id":"mnd8:33","sourceIds":["mnd8:33.1","mnd8:33.2","mnd8:33.3","mnd8:33.4","mnd8:33.5","mnd8:33.6","mnd8:33.7","mnd8:33.8","mnd8:33.9","mnd8:33.10","mnd8:33.11","mnd8:33.12","mnd8:33.13"],"kind":"text","text":{"pi":"Etampi disvā virame kathojjanti.\nEtampi disvāti etaṁ ādīnavaṁ disvā passitvā tulayitvā tīrayitvā vibhāvayitvā vibhūtaṁ katvā diṭṭhikalahesu diṭṭhibhaṇḍanesu diṭṭhiviggahesu diṭṭhivivādesu diṭṭhimedhagesūti—\netampi disvā virame kathojjanti.\nKathojjaṁ vuccati kalaho bhaṇḍanaṁ viggaho vivādo medhagaṁ.\nAtha vā kathojjanti anojavantī sā kathā kathojjaṁ na kareyya,\nkalahaṁ na kareyya,\nbhaṇḍanaṁ na kareyya,\nviggahaṁ na kareyya,\nvivādaṁ na kareyya,\nmedhagaṁ na kareyya,\nkalahabhaṇḍanaviggahavivādamedhagaṁ pajaheyya vinodeyya byantiṁ kareyya anabhāvaṁ gameyya,\nkalahabhaṇḍanaviggahavivādamedhagā ārato assa virato paṭivirato nikkhanto nissaṭo vippayutto visaññutto vimariyādikatena cetasā vihareyyāti—\netampi disvā virame kathojjaṁ."}},{"id":"mnd8:34","sourceIds":["mnd8:34.1","mnd8:34.2","mnd8:34.3","mnd8:34.4","mnd8:34.5","mnd8:34.6","mnd8:34.7","mnd8:34.8","mnd8:34.9","mnd8:34.10","mnd8:34.11","mnd8:34.12","mnd8:34.13","mnd8:34.14"],"kind":"text","text":{"pi":"Na haññadatthatthi pasaṁsalābhāti.\nPasaṁsalābhā añño attho natthi attattho vā parattho vā ubhayattho vā diṭṭhadhammiko vā attho,\nsamparāyiko vā attho,\nuttāno vā attho,\ngambhīro vā attho,\ngūḷho vā attho,\npaṭicchanno vā attho,\nneyyo vā attho,\nnīto vā attho,\nanavajjo vā attho,\nnikkileso vā attho,\nvodāno vā attho,\nparamattho vā attho natthi na santi na saṁvijjanti nupalabbhantīti—\nna haññadatthatthi pasaṁsalābhā."}},{"id":"mnd8:35","sourceIds":["mnd8:35.1"],"kind":"text","text":{"pi":"Tenāha bhagavā—"}},{"id":"mnd8:36","sourceIds":["mnd8:36.1","mnd8:36.2","mnd8:36.3","mnd8:36.4"],"kind":"text","text":{"pi":"“Ete vivādā samaṇesu jātā,\nEtesu ugghātinighāti hoti;\nEtampi disvā virame kathojjaṁ,\nNa haññadatthatthi pasaṁsalābhā”ti."}},{"id":"mnd8:37","sourceIds":["mnd8:37.1","mnd8:37.2","mnd8:37.3","mnd8:37.4"],"kind":"text","text":{"pi":"Pasaṁsito vā pana tattha hoti,\nAkkhāya vādaṁ parisāya majjhe;\nSo hassatī unnamatī ca tena,\nPappuyya tamatthaṁ yathā mano ahu."}},{"id":"mnd8:38","sourceIds":["mnd8:38.1","mnd8:38.2","mnd8:38.3"],"kind":"text","text":{"pi":"Pasaṁsito vā pana tattha hotīti.\nTatthāti sakāya diṭṭhiyā sakāya khantiyā sakāya ruciyā sakāya laddhiyā pasaṁsito thomito kittito vaṇṇito hotīti—\npasaṁsito vā pana tattha hoti."}},{"id":"mnd8:39","sourceIds":["mnd8:39.1","mnd8:39.2","mnd8:39.3"],"kind":"text","text":{"pi":"Akkhāya vādaṁ parisāya majjheti.\nKhattiyaparisāya vā brāhmaṇaparisāya vā gahapatiparisāya vā samaṇaparisāya vā majjhe attano vādaṁ akkhāya ācikkhitvā anuvādaṁ akkhāya ācikkhitvā thambhayitvā brūhayitvā dīpayitvā jotayitvā voharitvā pariggaṇhitvāti—\nakkhāya vādaṁ parisāya majjhe."}},{"id":"mnd8:40","sourceIds":["mnd8:40.1","mnd8:40.2","mnd8:40.3","mnd8:40.4","mnd8:40.5"],"kind":"text","text":{"pi":"So hassatī unnamatī ca tenāti.\nSo tena jayatthena tuṭṭho hoti haṭṭho pahaṭṭho attamano paripuṇṇasaṅkappo.\nAtha vā dantavidaṁsakaṁ hasamāno.\nSo hassatī unnamatī ca tenāti so tena jayatthena unnato hoti unnamo dhajo sampaggāho ketukamyatā cittassāti—\nso hassatī unnamatī ca tena."}},{"id":"mnd8:41","sourceIds":["mnd8:41.1","mnd8:41.2","mnd8:41.3","mnd8:41.4"],"kind":"text","text":{"pi":"Pappuyya tamatthaṁ yathā mano ahūti.\nTaṁ jayatthaṁ pappuyya pāpuṇitvā adhigantvā vinditvā paṭilabhitvā.\nYathā mano ahūti yathā mano ahu, yathā citto ahu, yathā saṅkappo ahu, yathā viññāṇo ahūti—\npappuyya tamatthaṁ yathā mano ahu."}},{"id":"mnd8:42","sourceIds":["mnd8:42.1"],"kind":"text","text":{"pi":"Tenāha bhagavā—"}},{"id":"mnd8:43","sourceIds":["mnd8:43.1","mnd8:43.2","mnd8:43.3","mnd8:43.4"],"kind":"text","text":{"pi":"“Pasaṁsito vā pana tattha hoti,\nAkkhāya vādaṁ parisāya majjhe;\nSo hassatī unnamatī ca tena,\nPappuyya tamatthaṁ yathā mano ahū”ti."}},{"id":"mnd8:44","sourceIds":["mnd8:44.1","mnd8:44.2","mnd8:44.3","mnd8:44.4"],"kind":"text","text":{"pi":"Yā unnatī sāssa vighātabhūmi,\nMānātimānaṁ vadate paneso;\nEtampi disvā na vivādayetha,\nNa hi tena suddhiṁ kusalā vadanti."}},{"id":"mnd8:45","sourceIds":["mnd8:45.1","mnd8:45.2","mnd8:45.3","mnd8:45.4","mnd8:45.5"],"kind":"text","text":{"pi":"Yā unnatī sāssa vighātabhūmīti.\nYā unnati unnamo dhajo sampaggāho ketukamyatā cittassāti—\nyā unnati.\nSāssa vighātabhūmīti sā tassa vighātabhūmi upaghātabhūmi pīḷanabhūmi ghaṭṭanabhūmi upaddavabhūmi upasaggabhūmīti—\nyā unnatī sāssa vighātabhūmi."}},{"id":"mnd8:46","sourceIds":["mnd8:46.1","mnd8:46.2","mnd8:46.3"],"kind":"text","text":{"pi":"Mānātimānaṁ vadate panesoti.\nSo puggalo mānañca vadati atimānañca vadatīti—\nmānātimānaṁ vadate paneso."}},{"id":"mnd8:47","sourceIds":["mnd8:47.1","mnd8:47.2","mnd8:47.3","mnd8:47.4","mnd8:47.5"],"kind":"text","text":{"pi":"Etampi disvā na vivādayethāti.\nEtaṁ ādīnavaṁ disvā passitvā tulayitvā tīrayitvā vibhāvayitvā vibhūtaṁ katvā diṭṭhikalahesu diṭṭhibhaṇḍanesu diṭṭhiviggahesu diṭṭhivivādesu diṭṭhimedhagesūti—\netampi disvā.\nNa vivādayethāti na kalahaṁ kareyya na bhaṇḍanaṁ kareyya na viggahaṁ kareyya na vivādaṁ kareyya, na medhagaṁ kareyya, kalahabhaṇḍanaviggahavivādamedhagaṁ pajaheyya vinodeyya byantiṁ kareyya anabhāvaṁ gameyya, kalahabhaṇḍanaviggahavivādamedhagā ārato assa virato paṭivirato nikkhanto nissaṭo vippayutto visaññutto vimariyādikatena cetasā vihareyyāti—\netampi disvā na vivādayetha."}},{"id":"mnd8:48","sourceIds":["mnd8:48.1","mnd8:48.2","mnd8:48.3"],"kind":"text","text":{"pi":"Na hi tena suddhiṁ kusalā vadantīti.\nKusalāti ye te khandhakusalā dhātukusalā āyatanakusalā paṭiccasamuppādakusalā satipaṭṭhānakusalā sammappadhānakusalā iddhipādakusalā indriyakusalā balakusalā bojjhaṅgakusalā maggakusalā phalakusalā nibbānakusalā, te kusalā diṭṭhikalahena diṭṭhibhaṇḍanena diṭṭhiviggahena diṭṭhivivādena diṭṭhimedhagena suddhiṁ visuddhiṁ parisuddhiṁ, muttiṁ vimuttiṁ parimuttiṁ na vadanti na kathenti na bhaṇanti na dīpayanti na voharantīti—\nna hi tena suddhiṁ kusalā vadanti."}},{"id":"mnd8:49","sourceIds":["mnd8:49.1"],"kind":"text","text":{"pi":"Tenāha bhagavā—"}},{"id":"mnd8:50","sourceIds":["mnd8:50.1","mnd8:50.2","mnd8:50.3","mnd8:50.4"],"kind":"text","text":{"pi":"“Yā unnatī sāssa vighātabhūmi,\nMānātimānaṁ vadate paneso;\nEtampi disvā na vivādayetha,\nNa hi tena suddhiṁ kusalā vadantī”ti."}},{"id":"mnd8:51","sourceIds":["mnd8:51.1","mnd8:51.2","mnd8:51.3","mnd8:51.4"],"kind":"text","text":{"pi":"Sūro yathā rājakhādāya puṭṭho,\nAbhigajjameti paṭisūramicchaṁ;\nYeneva so tena palehi sūra,\nPubbeva natthi yadidaṁ yudhāya."}},{"id":"mnd8:52","sourceIds":["mnd8:52.1","mnd8:52.2","mnd8:52.3","mnd8:52.4"],"kind":"text","text":{"pi":"Sūro yathā rājakhādāya puṭṭhoti.\nSūroti sūro vīro vikkanto abhīrū achambhī anutrāsī apalāyī.\nRājakhādāya puṭṭhoti rājakhādanīyena rājabhojanīyena puṭṭho posito āpādito vaḍḍhitoti—\nsūro yathā rājakhādāya puṭṭho."}},{"id":"mnd8:53","sourceIds":["mnd8:53.1","mnd8:53.2","mnd8:53.3"],"kind":"text","text":{"pi":"Abhigajjameti paṭisūramicchanti.\nSo gajjanto uggajjanto abhigajjanto eti upeti upagacchati paṭisūraṁ paṭipurisaṁ paṭisattuṁ paṭimallaṁ icchanto sādiyanto patthayanto pihayanto abhijappantoti—\nabhigajjameti paṭisūramicchaṁ."}},{"id":"mnd8:54","sourceIds":["mnd8:54.1","mnd8:54.2","mnd8:54.3"],"kind":"text","text":{"pi":"Yeneva so tena palehi sūrāti.\nYeneva so diṭṭhigatiko tena palehi, tena vaja, tena gaccha, tena atikkama, so tuyhaṁ paṭisūro paṭipuriso paṭisattu paṭimalloti—\nyeneva so tena palehi sūra."}},{"id":"mnd8:55","sourceIds":["mnd8:55.1","mnd8:55.2","mnd8:55.3","mnd8:55.4"],"kind":"text","text":{"pi":"Pubbeva natthi yadidaṁ yudhāyāti.\nPubbeva bodhiyā mūle ye paṭisenikarā kilesā paṭilomakarā paṭikaṇḍakakarā paṭipakkhakarā te natthi na santi na saṁvijjanti nupalabbhanti, pahīnā samucchinnā vūpasantā paṭipassaddhā abhabbuppattikā ñāṇagginā daḍḍhā.\nYadidaṁ yudhāyāti yadidaṁ yuddhatthāya kalahatthāya bhaṇḍanatthāya viggahatthāya vivādatthāya medhagatthāyāti—\npubbeva natthi yadidaṁ yudhāya."}},{"id":"mnd8:56","sourceIds":["mnd8:56.1"],"kind":"text","text":{"pi":"Tenāha bhagavā—"}},{"id":"mnd8:57","sourceIds":["mnd8:57.1","mnd8:57.2","mnd8:57.3","mnd8:57.4"],"kind":"text","text":{"pi":"“Sūro yathā rājakhādāya puṭṭho,\nAbhigajjameti paṭisūramicchaṁ;\nYeneva so tena palehi sūra,\nPubbeva natthi yadidaṁ yudhāyā”ti."}},{"id":"mnd8:58","sourceIds":["mnd8:58.1","mnd8:58.2","mnd8:58.3","mnd8:58.4"],"kind":"text","text":{"pi":"Ye diṭṭhimuggayha vivādayanti,\nIdameva saccanti ca vādayanti;\nTe tvaṁ vadassū na hi tedha atthi,\nVādamhi jāte paṭisenikattā."}},{"id":"mnd8:59","sourceIds":["mnd8:59.1","mnd8:59.2","mnd8:59.3"],"kind":"text","text":{"pi":"Ye diṭṭhimuggayha vivādayantīti ye dvāsaṭṭhidiṭṭhigatānaṁ aññataraññataraṁ diṭṭhigataṁ gahetvā gaṇhitvā uggaṇhitvā parāmasitvā abhinivisitvā vivādayanti kalahaṁ karonti, bhaṇḍanaṁ karonti, viggahaṁ karonti, vivādaṁ karonti, medhagaṁ karonti—\n“na tvaṁ imaṁ dhammavinayaṁ ājānāsi, ahaṁ imaṁ dhammavinayaṁ ājānāmi, kiṁ tvaṁ imaṁ dhammavinayaṁ ājānissasi, micchāpaṭipanno tvamasi, ahamasmi sammāpaṭipanno, sahitaṁ me, asahitaṁ te, pure vacanīyaṁ pacchā avaca, pacchā vacanīyaṁ pure avaca, adhiciṇṇaṁ te viparāvattaṁ, āropito te vādo, niggahito tvamasi, cara vādappamokkhāya, nibbeṭhehi vā sace pahosī”ti—\nye diṭṭhimuggayha vivādayanti."}},{"id":"mnd8:60","sourceIds":["mnd8:60.1","mnd8:60.2","mnd8:60.3","mnd8:60.4","mnd8:60.5"],"kind":"text","text":{"pi":"Idameva saccanti ca vādayantīti.\n“Sassato loko, idameva saccaṁ moghamaññan”ti vādayanti kathenti bhaṇanti dīpayanti voharanti.\n“Asassato loko …pe…\nneva hoti na na hoti tathāgato paraṁ maraṇā, idameva saccaṁ moghamaññan”ti vādayanti kathenti bhaṇanti dīpayanti voharantīti—\nidameva saccanti ca vādayanti."}},{"id":"mnd8:61","sourceIds":["mnd8:61.1","mnd8:61.2","mnd8:61.3","mnd8:61.4","mnd8:61.5","mnd8:61.6","mnd8:61.7"],"kind":"text","text":{"pi":"Te tvaṁ vadassū na hi tedha atthi, vādamhi jāte paṭisenikattāti.\nTe tvaṁ diṭṭhigatike vadassu vādena vādaṁ, niggahena niggahaṁ, paṭikammena paṭikammaṁ, visesena visesaṁ, paṭivisesena paṭivisesaṁ, āveṭhiyāya āveṭhiyaṁ, nibbeṭhiyāya nibbeṭhiyaṁ, chedena chedaṁ, maṇḍalena maṇḍalaṁ, te tuyhaṁ paṭisūrā paṭipurisā paṭisattū paṭimallāti—\nte tvaṁ vadassū na hi tedha atthi.\nVādamhi jāte paṭisenikattāti.\nVāde jāte sañjāte nibbatte abhinibbatte pātubhūteyeva paṭisenikattā paṭilomakattā paṭikaṇḍakakattā paṭipakkhakattā kalahaṁ kareyyuṁ bhaṇḍanaṁ kareyyuṁ viggahaṁ kareyyuṁ vivādaṁ kareyyuṁ medhagaṁ kareyyuṁ, te natthi na santi na saṁvijjanti nupalabbhanti, pahīnā …pe…\nñāṇagginā daḍḍhāti—\nte tvaṁ vadassū na hi tedha atthi vādamhi jāte paṭisenikattā."}},{"id":"mnd8:62","sourceIds":["mnd8:62.1"],"kind":"text","text":{"pi":"Tenāha bhagavā—"}},{"id":"mnd8:63","sourceIds":["mnd8:63.1","mnd8:63.2","mnd8:63.3","mnd8:63.4"],"kind":"text","text":{"pi":"“Ye diṭṭhimuggayha vivādayanti,\nIdameva saccanti ca vādayanti;\nTe tvaṁ vadassū na hi tedha atthi,\nVādamhi jāte paṭisenikattā”ti."}},{"id":"mnd8:64","sourceIds":["mnd8:64.1","mnd8:64.2","mnd8:64.3","mnd8:64.4"],"kind":"text","text":{"pi":"Visenikatvā pana ye caranti,\nDiṭṭhīhi diṭṭhiṁ avirujjhamānā;\nTesu tvaṁ kiṁ labhetho pasūra,\nYesīdha natthi paramuggahītaṁ."}},{"id":"mnd8:65","sourceIds":["mnd8:65.1","mnd8:65.2","mnd8:65.3"],"kind":"text","text":{"pi":"Visenikatvā pana ye carantīti.\nSenā vuccati mārasenā.\nKāyaduccaritaṁ mārasenā, vacīduccaritaṁ mārasenā, manoduccaritaṁ mārasenā, lobho mārasenā, doso mārasenā, moho mārasenā, kodho … upanāho … makkho … paḷāso … issā … macchariyaṁ … māyā … sāṭheyyaṁ … thambho … sārambho … māno … atimāno … mado … pamādo … sabbe kilesā … sabbe duccaritā … sabbe darathā … sabbe pariḷāhā … sabbe santāpā … sabbākusalābhisaṅkhārā mārasenā."}},{"id":"mnd8:66","sourceIds":["mnd8:66.1"],"kind":"text","text":{"pi":"Vuttañhetaṁ bhagavatā—"}},{"id":"mnd8:67","sourceIds":["mnd8:67.1","mnd8:67.2","mnd8:67.3","mnd8:67.4","mnd8:67.5"],"kind":"text","text":{"pi":"“Kāmā te paṭhamā senā,\ndutiyā arati vuccati;\n…pe…\nNa naṁ asuro jināti,\njetvāva labhate sukhan”ti."}},{"id":"mnd8:68","sourceIds":["mnd8:68.1","mnd8:68.2","mnd8:68.3","mnd8:68.4"],"kind":"text","text":{"pi":"Yato catūhi ariyamaggehi sabbā ca mārasenā sabbe ca paṭisenikarā kilesā jitā ca parājitā ca bhaggā vippaluggā parammukhā, tena vuccati visenikatvāti.\nYeti arahanto khīṇāsavā.\nCarantīti caranti viharanti iriyanti vattenti pālenti yapenti yāpentīti—\nvisenikatvā pana ye caranti."}},{"id":"mnd8:69","sourceIds":["mnd8:69.1","mnd8:69.2","mnd8:69.3"],"kind":"text","text":{"pi":"Diṭṭhīhi diṭṭhiṁ avirujjhamānāti.\nYesaṁ dvāsaṭṭhi diṭṭhigatāni pahīnāni samucchinnāni vūpasantāni paṭipassaddhāni abhabbuppattikāni ñāṇagginā daḍḍhāni, te diṭṭhīhi diṭṭhiṁ avirujjhamānā appaṭivirujjhamānā appahīyamānā appaṭihaññamānā appaṭihatamānāti—\ndiṭṭhīhi diṭṭhiṁ avirujjhamānā."}},{"id":"mnd8:70","sourceIds":["mnd8:70.1","mnd8:70.2","mnd8:70.3"],"kind":"text","text":{"pi":"Tesu tvaṁ kiṁ labhetho pasūrāti.\nTesu arahantesu khīṇāsavesu kiṁ labhetho paṭisūraṁ paṭipurisaṁ paṭisattuṁ paṭimallanti—\ntesu tvaṁ kiṁ labhetho pasūra."}},{"id":"mnd8:71","sourceIds":["mnd8:71.1","mnd8:71.2","mnd8:71.3"],"kind":"text","text":{"pi":"Yesīdha natthi paramuggahītanti.\nYesaṁ arahantānaṁ khīṇāsavānaṁ “idaṁ paramaṁ aggaṁ seṭṭhaṁ visiṭṭhaṁ pāmokkhaṁ uttamaṁ pavaran”ti gahitaṁ parāmaṭṭhaṁ abhiniviṭṭhaṁ ajjhositaṁ adhimuttaṁ, natthi na santi na saṁvijjanti nupalabbhanti, pahīnaṁ samucchinnaṁ vūpasantaṁ paṭipassaddhaṁ abhabbuppattikaṁ ñāṇagginā daḍḍhanti—\nyesīdha natthi paramuggahītaṁ."}},{"id":"mnd8:72","sourceIds":["mnd8:72.1"],"kind":"text","text":{"pi":"Tenāha bhagavā—"}},{"id":"mnd8:73","sourceIds":["mnd8:73.1","mnd8:73.2","mnd8:73.3","mnd8:73.4"],"kind":"text","text":{"pi":"“Visenikatvā pana ye caranti,\nDiṭṭhīhi diṭṭhiṁ avirujjhamānā;\nTesu tvaṁ kiṁ labhetho pasūra,\nYesīdha natthi paramuggahītan”ti."}},{"id":"mnd8:74","sourceIds":["mnd8:74.1","mnd8:74.2","mnd8:74.3","mnd8:74.4"],"kind":"text","text":{"pi":"Atha tvaṁ pavitakkamāgamā,\nManasā diṭṭhigatāni cintayanto;\nDhonena yugaṁ samāgamā,\nNa hi tvaṁ sakkhasi sampayātave."}},{"id":"mnd8:75","sourceIds":["mnd8:75.1","mnd8:75.2","mnd8:75.3","mnd8:75.4","mnd8:75.5"],"kind":"text","text":{"pi":"Atha tvaṁ pavitakkamāgamāti.\nAthāti padasandhi padasaṁsaggo padapāripūrī akkharasamavāyo byañjanasiliṭṭhatā padānupubbatā petaṁ—\nathāti.\nPavitakkamāgamāti takkento vitakkento saṅkappento “jayo nu kho me bhavissati, parājayo nu kho me bhavissati, kathaṁ niggahaṁ karissāmi, kathaṁ paṭikammaṁ karissāmi, kathaṁ visesaṁ karissāmi, kathaṁ paṭivisesaṁ karissāmi, kathaṁ āveṭhiyaṁ karissāmi, kathaṁ nibbeṭhiyaṁ karissāmi, kathaṁ chedaṁ karissāmi, kathaṁ maṇḍalaṁ karissāmi” evaṁ takkento vitakkento saṅkappento āgatosi upagatosi sampattosi mayā saddhiṁ samāgatosīti—\natha tvaṁ pavitakkamāgamā."}},{"id":"mnd8:76","sourceIds":["mnd8:76.1","mnd8:76.2","mnd8:76.3","mnd8:76.4","mnd8:76.5","mnd8:76.6"],"kind":"text","text":{"pi":"Manasā diṭṭhigatāni cintayantoti.\nManoti yaṁ cittaṁ mano mānasaṁ hadayaṁ paṇḍaraṁ, mano manāyatanaṁ manindriyaṁ viññāṇaṁ viññāṇakkhandho tajjā manoviññāṇadhātu.\nCittena diṭṭhiṁ cintento vicintento “sassato loko”ti vā,\n“asassato loko”ti vā …pe…\n“neva hoti na na hoti tathāgato paraṁ maraṇā”ti vāti—\nmanasā diṭṭhigatāni cintayanto."}},{"id":"mnd8:77","sourceIds":["mnd8:77.1","mnd8:77.2","mnd8:77.3","mnd8:77.4","mnd8:77.5","mnd8:77.6","mnd8:77.7","mnd8:77.8","mnd8:77.9","mnd8:77.10","mnd8:77.11","mnd8:77.12","mnd8:77.13","mnd8:77.14","mnd8:77.15","mnd8:77.16","mnd8:77.17","mnd8:77.18","mnd8:77.19"],"kind":"text","text":{"pi":"Dhonena yugaṁ samāgamā, na hi tvaṁ sakkhasi sampayātaveti.\nDhonā vuccati paññā.\nYā paññā pajānanā …pe… amoho dhammavicayo sammādiṭṭhi.\nKiṅkāraṇā dhonā vuccati paññā?\nTāya paññāya kāyaduccaritaṁ dhutañca dhotañca sandhotañca niddhotañca,\nvacīduccaritaṁ …pe…\nsabbākusalābhisaṅkhārā dhutā ca dhotā ca sandhotā ca niddhotā ca.\nAtha vā sammādiṭṭhiyā micchādiṭṭhi …\nsammāsaṅkappena micchāsaṅkappo …pe…\nsammāvimuttiyā micchāvimutti dhutā ca dhotā ca sandhotā ca niddhotā ca.\nAtha vā ariyena aṭṭhaṅgikena maggena sabbe kilesā …\nsabbe duccaritā …\nsabbe darathā …\nsabbe pariḷāhā …\nsabbe santāpā …\nsabbākusalābhisaṅkhārā dhutā ca dhotā ca sandhotā ca niddhotā ca.\nBhagavā imehi dhoneyyehi dhammehi upeto samupeto upagato samupagato upapanno samupapanno samannāgato, tasmā bhagavā dhono.\nSo dhutarāgo dhutapāpo dhutakileso dhutapariḷāhoti—\ndhonoti."}},{"id":"mnd8:78","sourceIds":["mnd8:78.1","mnd8:78.2","mnd8:78.3","mnd8:78.4","mnd8:78.5","mnd8:78.6","mnd8:78.7","mnd8:78.8","mnd8:78.9","mnd8:78.10","mnd8:78.11","mnd8:78.12","mnd8:78.13","mnd8:78.14","mnd8:78.15","mnd8:78.16"],"kind":"text","text":{"pi":"Dhonena yugaṁ samāgamā, na hi tvaṁ sakkhasi sampayātaveti.\nPasūro paribbājako na paṭibalo dhonena buddhena bhagavatā saddhiṁ yugaṁ samāgamaṁ samāgantvā yugaggāhaṁ gaṇhitvā sākacchetuṁ sallapituṁ sākacchaṁ samāpajjituṁ.\nTaṁ kissa hetu?\nPasūro paribbājako hīno nihīno omako lāmako chatukko paritto.\nSo hi bhagavā aggo ca seṭṭho ca visiṭṭho ca pāmokkho ca uttamo ca pavaro ca.\nYathā saso na paṭibalo mattena mātaṅgena saddhiṁ yugaṁ samāgamaṁ samāgantvā yugaggāhaṁ gaṇhituṁ;\nyathā kotthuko na paṭibalo sīhena migaraññā saddhiṁ yugaṁ samāgamaṁ samāgantvā yugaggāhaṁ gaṇhituṁ;\nyathā vacchako taruṇako dhenupako na paṭibalo usabhena calakakunā saddhiṁ yugaṁ samāgamaṁ samāgantvā yugaggāhaṁ gaṇhituṁ;\nyathā dhaṅko na paṭibalo garuḷena venateyyena saddhiṁ yugaṁ samāgamaṁ samāgantvā yugaggāhaṁ gaṇhituṁ;\nyathā caṇḍālo na paṭibalo raññā cakkavattinā saddhiṁ yugaṁ samāgamaṁ samāgantvā yugaggāhaṁ gaṇhituṁ;\nyathā paṁsupisācako na paṭibalo indena devaraññā saddhiṁ yugaṁ samāgamaṁ samāgantvā yugaggāhaṁ gaṇhituṁ;\nevamevaṁ pasūro paribbājako na paṭibalo dhonena buddhena bhagavatā saddhiṁ yugaṁ samāgamaṁ samāgantvā yugaggāhaṁ gaṇhitvā sākacchetuṁ sallapituṁ sākacchaṁ samāpajjituṁ.\nTaṁ kissa hetu?\nPasūro paribbājako hīnapañño nihīnapañño omakapañño lāmakapañño chatukkapañño parittapañño.\nSo hi bhagavā mahāpañño puthupañño hāsapañño javanapañño tikkhapañño nibbedhikapañño, paññāpabhedakusalo pabhinnañāṇo adhigatapaṭisambhido, catuvesārajjappatto dasabaladhārī, purisāsabho purisasīho purisanāgo purisājañño purisadhorayho, anantañāṇo anantatejo anantayaso aḍḍho mahaddhano dhanavā, netā vinetā anunetā, paññāpetā nijjhāpetā pekkhetā pasādetā.\nSo hi bhagavā anuppannassa maggassa uppādetā, asañjātassa maggassa sañjanetā, anakkhātassa maggassa akkhātā, maggaññū maggavidū maggakovido maggānugā ca panassa etarahi sāvakā viharanti pacchā samannāgatā."}},{"id":"mnd8:79","sourceIds":["mnd8:79.1","mnd8:79.2","mnd8:79.3","mnd8:79.4","mnd8:79.5"],"kind":"text","text":{"pi":"So hi bhagavā jānaṁ jānāti passaṁ passati, cakkhubhūto ñāṇabhūto dhammabhūto brahmabhūto, vattā pavattā atthassa ninnetā amatassa dātā dhammassāmī tathāgato;\nnatthi tassa bhagavato aññātaṁ adiṭṭhaṁ aviditaṁ asacchikataṁ aphassitaṁ paññāya.\nAtītaṁ anāgataṁ paccuppannaṁ upādāya sabbe dhammā sabbākārena buddhassa bhagavato ñāṇamukhe āpāthaṁ āgacchanti.\nYaṁ kiñci neyyaṁ nāma atthi dhammaṁ jānitabbaṁ.\nAttattho vā parattho vā ubhayattho vā diṭṭhadhammiko vā attho, samparāyiko vā attho, uttāno vā attho, gambhīro vā attho, gūḷho vā attho, paṭicchanno vā attho, neyyo vā attho, nīto vā attho, anavajjo vā attho, nikkileso vā attho, vodāno vā attho, paramattho vā attho, sabbaṁ taṁ antobuddhañāṇe parivattati."}},{"id":"mnd8:80","sourceIds":["mnd8:80.1","mnd8:80.2","mnd8:80.3","mnd8:80.4","mnd8:80.5","mnd8:80.6","mnd8:80.7"],"kind":"text","text":{"pi":"Sabbaṁ kāyakammaṁ buddhassa bhagavato ñāṇānuparivatti, sabbaṁ vacīkammaṁ ñāṇānuparivatti, sabbaṁ manokammaṁ ñāṇānuparivatti.\nAtīte buddhassa bhagavato appaṭihataṁ ñāṇaṁ, anāgate appaṭihataṁ ñāṇaṁ, paccuppanne appaṭihataṁ ñāṇaṁ, yāvatakaṁ neyyaṁ tāvatakaṁ ñāṇaṁ, yāvatakaṁ ñāṇaṁ tāvatakaṁ neyyaṁ, neyyapariyantikaṁ ñāṇaṁ, ñāṇapariyantikaṁ neyyaṁ, neyyaṁ atikkamitvā ñāṇaṁ nappavattati, ñāṇaṁ atikkamitvā neyyapatho natthi.\nAññamaññapariyantaṭṭhāyino te dhammā.\nYathā dvinnaṁ samuggapaṭalānaṁ sammā phusitānaṁ heṭṭhimaṁ samuggapaṭalaṁ uparimaṁ nātivattati, uparimaṁ samuggapaṭalaṁ heṭṭhimaṁ nātivattati aññamaññapariyantaṭṭhāyino;\nevamevaṁ buddhassa bhagavato neyyañca ñāṇañca aññamaññapariyantaṭṭhāyino;\nyāvatakaṁ neyyaṁ tāvatakaṁ ñāṇaṁ, yāvatakaṁ ñāṇaṁ tāvatakaṁ neyyaṁ, neyyapariyantikaṁ ñāṇaṁ, ñāṇapariyantikaṁ neyyaṁ, neyyaṁ atikkamitvā ñāṇaṁ nappavattati, ñāṇaṁ atikkamitvā neyyapatho natthi.\nAññamaññapariyantaṭṭhāyino te dhammā sabbadhammesu buddhassa bhagavato ñāṇaṁ pavattati."}},{"id":"mnd8:81","sourceIds":["mnd8:81.1","mnd8:81.2","mnd8:81.3","mnd8:81.4"],"kind":"text","text":{"pi":"Sabbe dhammā buddhassa bhagavato āvajjanapaṭibaddhā ākaṅkhapaṭibaddhā manasikārapaṭibaddhā cittuppādapaṭibaddhā.\nSabbasattesu buddhassa bhagavato ñāṇaṁ pavattati, sabbesañca sattānaṁ bhagavā āsayaṁ jānāti anusayaṁ jānāti caritaṁ jānāti adhimuttiṁ jānāti.\nApparajakkhe mahārajakkhe tikkhindriye mudindriye svākāre dvākāre suviññāpaye duviññāpaye bhabbābhabbe satte pajānāti.\nSadevako loko samārako sabrahmako sassamaṇabrāhmaṇī pajā sadevamanussā antobuddhañāṇe parivattati."}},{"id":"mnd8:82","sourceIds":["mnd8:82.1","mnd8:82.2","mnd8:82.3","mnd8:82.4","mnd8:82.5"],"kind":"text","text":{"pi":"Yathā ye keci macchakacchapā antamaso timitimiṅgalaṁ upādāya antomahāsamudde parivattanti;\nevamevaṁ sadevako loko samārako sabrahmako sassamaṇabrāhmaṇī pajā sadevamanussā antobuddhañāṇe parivattati.\nYathā ye keci pakkhī antamaso garuḷaṁ venateyyaṁ upādāya ākāsassa padese parivattanti;\nevamevaṁ yepi te sāriputtasamā paññāya tepi buddhañāṇassa padese parivattanti.\nBuddhañāṇaṁ devamanussānaṁ paññaṁ pharitvā abhibhavitvā tiṭṭhati."}},{"id":"mnd8:83","sourceIds":["mnd8:83.1","mnd8:83.2","mnd8:83.3","mnd8:83.4","mnd8:83.5"],"kind":"text","text":{"pi":"Yepi te khattiyapaṇḍitā brāhmaṇapaṇḍitā gahapatipaṇḍitā samaṇapaṇḍitā nipuṇā kataparappavādā vālavedhirūpā Vobhindantā maññe caranti paññāgatena diṭṭhigatāni, te pañhe abhisaṅkharitvā abhisaṅkharitvā tathāgate upasaṅkamitvā pucchanti gūḷhāni ca paṭicchannāni ca.\nKathitā visajjitāva te pañhā bhagavatā honti niddiṭṭhakāraṇā.\nUpakkhittakā ca te bhagavato sampajjanti.\nAtha kho bhagavāva tattha atirocati yadidaṁ paññāyāti—\ndhonena yugaṁ samāgamā, na hi tvaṁ sakkhasi sampayātave."}},{"id":"mnd8:84","sourceIds":["mnd8:84.1"],"kind":"text","text":{"pi":"Tenāha bhagavā—"}},{"id":"mnd8:85","sourceIds":["mnd8:85.1","mnd8:85.2","mnd8:85.3","mnd8:85.4"],"kind":"text","text":{"pi":"“Atha tvaṁ pavitakkamāgamā,\nManasā diṭṭhigatāni cintayanto;\nDhonena yugaṁ samāgamā,\nNa hi tvaṁ sakkhasi sampayātave”ti."}},{"id":"mnd8:86","sourceIds":["mnd8:86.1"],"kind":"text","text":{"pi":"Pasūrasuttaniddeso aṭṭhamo."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mnd8/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}