{"id":"mnd9","title":"9. Māgaṇḍiyasuttaniddesa","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"mnd9","title":"9. Māgaṇḍiyasuttaniddesa","units":[{"id":"mnd9:0","sourceIds":["mnd9:0.1","mnd9:0.2","mnd9:0.3"],"kind":"text","text":{"pi":"Mahāniddesa\nAṭṭhakavagga\n9. Māgaṇḍiyasuttaniddesa"}},{"id":"mnd9:1","sourceIds":["mnd9:1.1"],"kind":"text","text":{"pi":"Atha māgaṇḍiyasuttaniddesaṁ vakkhati—"}},{"id":"mnd9:2","sourceIds":["mnd9:2.1","mnd9:2.2","mnd9:2.3","mnd9:2.4"],"kind":"text","text":{"pi":"Disvāna taṇhaṁ aratiṁ ragañca,\nNāhosi chando api methunasmiṁ;\nKimevidaṁ muttakarīsapuṇṇaṁ,\nPādāpi naṁ samphusituṁ na icche."}},{"id":"mnd9:3","sourceIds":["mnd9:3.1","mnd9:3.2","mnd9:3.3"],"kind":"text","text":{"pi":"Disvāna taṇhaṁ aratiṁ ragañca, nāhosi chando api methunasminti.\nTaṇhañca aratiñca ragañca māradhītaro disvā passitvā methunadhamme chando vā rāgo vā pemaṁ vā nāhosīti—\ndisvāna taṇhaṁ aratiṁ ragañca nāhosi chando api methunasmiṁ."}},{"id":"mnd9:4","sourceIds":["mnd9:4.1","mnd9:4.2","mnd9:4.3","mnd9:4.4","mnd9:4.5"],"kind":"text","text":{"pi":"Kimevidaṁ muttakarīsapuṇṇaṁ, pādāpi naṁ samphusituṁ na iccheti.\nKimevidaṁ sarīraṁ muttapuṇṇaṁ karīsapuṇṇaṁ semhapuṇṇaṁ ruhirapuṇṇaṁ aṭṭhisaṅghātanhārusambandhaṁ rudhiramaṁsāvalepanaṁ cammavinaddhaṁ chaviyā paṭicchannaṁ chiddāvachiddaṁ uggharantaṁ paggharantaṁ kimisaṅghanisevitaṁ nānākalimalaparipūraṁ pādena akkamituṁ na iccheyya, kuto pana saṁvāso vā samāgamo vāti—\nkimevidaṁ muttakarīsapuṇṇaṁ, pādāpi naṁ samphusituṁ na icche.\nAnacchariyañcetaṁ manusso dibbe kāme patthayanto mānusake kāme na iccheyya, mānusake vā kāme patthayanto dibbe kāme na iccheyya.\nYaṁ tvaṁ ubhopi na icchasi na sādiyasi na patthesi na pihesi nābhijappasi, kiṁ te dassanaṁ, katamāya tvaṁ diṭṭhiyā samannāgatoti pucchatīti."}},{"id":"mnd9:5","sourceIds":["mnd9:5.1"],"kind":"text","text":{"pi":"Tenāha bhagavā—"}},{"id":"mnd9:6","sourceIds":["mnd9:6.1","mnd9:6.2","mnd9:6.3","mnd9:6.4"],"kind":"text","text":{"pi":"“Disvāna taṇhaṁ aratiṁ ragañca,\nNāhosi chando api methunasmiṁ;\nKimevidaṁ muttakarīsapuṇṇaṁ,\nPādāpi naṁ samphusituṁ na icche”ti."}},{"id":"mnd9:7","sourceIds":["mnd9:7.1","mnd9:7.2","mnd9:7.3","mnd9:7.4"],"kind":"text","text":{"pi":"Etādisañce ratanaṁ na icchasi,\nNāriṁ narindehi bahūhi patthitaṁ;\nDiṭṭhigataṁ sīlavataṁ nu jīvitaṁ,\nBhavūpapattiñca vadesi kīdisaṁ."}},{"id":"mnd9:8","sourceIds":["mnd9:8.1","mnd9:8.2","mnd9:8.3","mnd9:8.4","mnd9:8.5"],"kind":"text","text":{"pi":"Idaṁ vadāmīti na tassa hoti,\n(māgaṇḍiyāti bhagavā)\nDhammesu niccheyya samuggahītaṁ;\nPassañca diṭṭhīsu anuggahāya,\nAjjhattasantiṁ pacinaṁ adassaṁ."}},{"id":"mnd9:9","sourceIds":["mnd9:9.1","mnd9:9.2","mnd9:9.3","mnd9:9.4","mnd9:9.5","mnd9:9.6"],"kind":"text","text":{"pi":"Idaṁ vadāmīti na tassa hotīti.\nIdaṁ vadāmīti idaṁ vadāmi, etaṁ vadāmi, ettakaṁ vadāmi, ettāvatā vadāmi, idaṁ diṭṭhigataṁ vadāmi—\n“sassato loko”ti vā …pe…\n“neva hoti na na hoti tathāgato paraṁ maraṇā”ti vā.\nNa tassa hotīti na mayhaṁ hoti, “ettāvatā vadāmī”ti na tassa hotīti—\nidaṁ vadāmīti na tassa hoti."}},{"id":"mnd9:10","sourceIds":["mnd9:10.1","mnd9:10.2","mnd9:10.3"],"kind":"text","text":{"pi":"Māgaṇḍiyāti bhagavā taṁ brāhmaṇaṁ nāmena ālapati.\nBhagavāti gāravādhivacanaṁ …pe… sacchikā paññatti yadidaṁ bhagavāti—\nmāgaṇḍiyāti bhagavā."}},{"id":"mnd9:11","sourceIds":["mnd9:11.1","mnd9:11.2","mnd9:11.3","mnd9:11.4","mnd9:11.5","mnd9:11.6"],"kind":"text","text":{"pi":"Dhammesu niccheyya samuggahītanti.\nDhammesūti dvāsaṭṭhiyā diṭṭhigatesu.\nNiccheyyāti nicchinitvā vinicchinitvā vicinitvā pavicinitvā tulayitvā tīrayitvā vibhāvayitvā vibhūtaṁ katvā.\nSamuggahītanti odhiggāho bilaggāho varaggāho koṭṭhāsaggāho uccayaggāho samuccayaggāho, “idaṁ saccaṁ tacchaṁ tathaṁ bhūtaṁ yāthāvaṁ aviparītan”ti gahitaṁ parāmaṭṭhaṁ abhiniviṭṭhaṁ ajjhositaṁ adhimuttaṁ,\nnatthi na santi na saṁvijjati nupalabbhati, pahīnaṁ samucchinnaṁ vūpasantaṁ paṭipassaddhaṁ abhabbuppattikaṁ ñāṇagginā daḍḍhanti—\ndhammesu niccheyya samuggahītaṁ."}},{"id":"mnd9:12","sourceIds":["mnd9:12.1","mnd9:12.2","mnd9:12.3","mnd9:12.4"],"kind":"text","text":{"pi":"Passañca diṭṭhīsu anuggahāyāti.\nDiṭṭhīsu ādīnavaṁ passanto diṭṭhiyo na gaṇhāmi na parāmasāmi nābhinivisāmi.\nAtha vā na gaṇhitabbā na parāmasitabbā nābhinivisitabbāti.\nEvampi passañca diṭṭhīsu anuggahāya."}},{"id":"mnd9:13","sourceIds":["mnd9:13.1","mnd9:13.2","mnd9:13.3","mnd9:13.4"],"kind":"text","text":{"pi":"Atha vā “sassato loko, idameva saccaṁ moghamaññan”ti diṭṭhigatametaṁ diṭṭhigahanaṁ diṭṭhikantāro diṭṭhivisūkāyikaṁ diṭṭhivipphanditaṁ diṭṭhisaṁyojanaṁ, sadukkhaṁ savighātaṁ saupāyāsaṁ sapariḷāhaṁ, na nibbidāya na virāgāya na nirodhāya na upasamāya na abhiññāya na sambodhāya na nibbānāya saṁvattatīti.\nDiṭṭhīsu ādīnavaṁ passanto diṭṭhiyo na gaṇhāmi na parāmasāmi nābhinivisāmi.\nAtha vā na gaṇhitabbā na parāmasitabbā nābhinivisitabbāti.\nEvampi passañca diṭṭhīsu anuggahāya."}},{"id":"mnd9:14","sourceIds":["mnd9:14.1","mnd9:14.2","mnd9:14.3","mnd9:14.4"],"kind":"text","text":{"pi":"Atha vā “asassato loko, antavā loko, anantavā loko, taṁ jīvaṁ taṁ sarīraṁ, aññaṁ jīvaṁ aññaṁ sarīraṁ, hoti tathāgato paraṁ maraṇā, na hoti tathāgato paraṁ maraṇā, hoti ca na ca hoti tathāgato paraṁ maraṇā, neva hoti na na hoti tathāgato paraṁ maraṇā, idameva saccaṁ moghamaññan”ti diṭṭhigatametaṁ diṭṭhigahanaṁ diṭṭhikantāro diṭṭhivisūkāyikaṁ diṭṭhivipphanditaṁ diṭṭhisaṁyojanaṁ, sadukkhaṁ savighātaṁ saupāyāsaṁ sapariḷāhaṁ na nibbidāya na virāgāya na nirodhāya na upasamāya na abhiññāya na sambodhāya na nibbānāya saṁvattatīti.\nDiṭṭhīsu ādīnavaṁ passanto diṭṭhiyo na gaṇhāmi na parāmasāmi nābhinivisāmi.\nAtha vā na gaṇhitabbā na parāmasitabbā nābhinivisitabbāti.\nEvampi passañca diṭṭhīsu anuggahāya."}},{"id":"mnd9:15","sourceIds":["mnd9:15.1","mnd9:15.2","mnd9:15.3","mnd9:15.4"],"kind":"text","text":{"pi":"Atha vā imā diṭṭhiyo evaṅgahitā evaṁparāmaṭṭhā evaṅgatikā bhavissanti evaṁabhisamparāyāti.\nDiṭṭhīsu ādīnavaṁ passanto diṭṭhiyo na gaṇhāmi na parāmasāmi nābhinivisāmi.\nAtha vā na gaṇhitabbā na parāmasitabbā nābhinivisitabbāti.\nEvampi passañca diṭṭhīsu anuggahāya."}},{"id":"mnd9:16","sourceIds":["mnd9:16.1","mnd9:16.2","mnd9:16.3","mnd9:16.4"],"kind":"text","text":{"pi":"Atha vā imā diṭṭhiyo nirayasaṁvattanikā tiracchānayonisaṁvattanikā pettivisayasaṁvattanikāti.\nDiṭṭhīsu ādīnavaṁ passanto diṭṭhiyo na gaṇhāmi na parāmasāmi nābhinivisāmi.\nAtha vā na gaṇhitabbā na parāmasitabbā nābhinivisitabbāti.\nEvampi passañca diṭṭhīsu anuggahāya."}},{"id":"mnd9:17","sourceIds":["mnd9:17.1","mnd9:17.2","mnd9:17.3","mnd9:17.4"],"kind":"text","text":{"pi":"Atha vā imā diṭṭhiyo aniccā saṅkhatā paṭiccasamuppannā khayadhammā vayadhammā virāgadhammā nirodhadhammāti.\nDiṭṭhīsu ādīnavaṁ passanto diṭṭhiyo na gaṇhāmi na parāmasāmi nābhinivisāmi.\nAtha vā na gaṇhitabbā na parāmasitabbā nābhinivisitabbāti.\nEvampi passañca diṭṭhīsu anuggahāya."}},{"id":"mnd9:18","sourceIds":["mnd9:18.1","mnd9:18.2","mnd9:18.3","mnd9:18.4","mnd9:18.5","mnd9:18.6","mnd9:18.7","mnd9:18.8","mnd9:18.9"],"kind":"text","text":{"pi":"Ajjhattasantiṁ pacinaṁ adassanti.\nAjjhattasantiṁ ajjhattaṁ rāgassa santiṁ, dosassa santiṁ, mohassa santiṁ, kodhassa … upanāhassa … makkhassa … paḷāsassa … issāya … macchariyassa … māyāya … sāṭheyyassa … thambhassa … sārambhassa … mānassa … atimānassa … madassa … pamādassa … sabbakilesānaṁ … sabbaduccaritānaṁ … sabbadarathānaṁ … sabbapariḷāhānaṁ … sabbasantāpānaṁ … sabbākusalābhisaṅkhārānaṁ santiṁ upasantiṁ vūpasantiṁ nibbutiṁ paṭipassaddhiṁ santiṁ.\nPacinanti pacinanto vicinanto pavicinanto tulayanto tīrayanto vibhāvayanto vibhūtaṁ karonto,\n“sabbe saṅkhārā aniccā”ti pacinanto vicinanto pavicinanto tulayanto tīrayanto vibhāvayanto vibhūtaṁ karonto,\n“sabbe saṅkhārā dukkhā”ti …\n“sabbe dhammā anattā”ti pacinanto vicinanto pavicinanto …\n“yaṁ kiñci samudayadhammaṁ, sabbaṁ taṁ nirodhadhamman”ti pacinanto vicinanto pavicinanto tulayanto tīrayanto vibhāvayanto vibhūtaṁ karonto.\nAdassanti adassaṁ adakkhiṁ apassiṁ paṭivijjhinti—\najjhattasantiṁ pacinaṁ adassaṁ."}},{"id":"mnd9:19","sourceIds":["mnd9:19.1"],"kind":"text","text":{"pi":"Tenāha bhagavā—"}},{"id":"mnd9:20","sourceIds":["mnd9:20.1","mnd9:20.2","mnd9:20.3","mnd9:20.4","mnd9:20.5"],"kind":"text","text":{"pi":"“Idaṁ vadāmīti na tassa hoti,\n(māgaṇḍiyāti bhagavā)\nDhammesu niccheyya samuggahītaṁ;\nPassañca diṭṭhīsu anuggahāya,\nAjjhattasantiṁ pacinaṁ adassan”ti."}},{"id":"mnd9:21","sourceIds":["mnd9:21.1","mnd9:21.2","mnd9:21.3","mnd9:21.4","mnd9:21.5"],"kind":"text","text":{"pi":"Vinicchayā yāni pakappitāni,\n(iti māgaṇḍiyo)\nTe ve munī brūsi anuggahāya;\nAjjhattasantīti yametamatthaṁ,\nKathaṁ nu dhīrehi paveditaṁ taṁ."}},{"id":"mnd9:22","sourceIds":["mnd9:22.1","mnd9:22.2","mnd9:22.3","mnd9:22.4","mnd9:22.5"],"kind":"text","text":{"pi":"Vinicchayā yāni pakappitānīti.\nVinicchayā vuccanti dvāsaṭṭhi diṭṭhigatāni diṭṭhivinicchayā.\nPakappitānīti kappitā pakappitā abhisaṅkhatā saṇṭhapitātipi pakappitā.\nAtha vā aniccā saṅkhatā paṭiccasamuppannā khayadhammā vayadhammā virāgadhammā nirodhadhammā vipariṇāmadhammātipi pakappitāti—\nvinicchayā yāni pakappitāni."}},{"id":"mnd9:23","sourceIds":["mnd9:23.1","mnd9:23.2","mnd9:23.3","mnd9:23.4","mnd9:23.5"],"kind":"text","text":{"pi":"Iti māgaṇḍiyoti.\nItīti padasandhi padasaṁsaggo padapāripūrī akkharasamavāyo byañjanasiliṭṭhatā padānupubbatāpetaṁ—\nitīti.\nMāgaṇḍiyoti tassa brāhmaṇassa nāmaṁ saṅkhā samaññā paññatti vohāro—\niti māgaṇḍiyoti."}},{"id":"mnd9:24","sourceIds":["mnd9:24.1","mnd9:24.2","mnd9:24.3","mnd9:24.4","mnd9:24.5","mnd9:24.6","mnd9:24.7"],"kind":"text","text":{"pi":"Te ve munī brūsi anuggahāya, ajjhattasantīti yametamatthanti.\nTe veti dvāsaṭṭhi diṭṭhigatāni.\nMunīti.\nMonaṁ vuccati ñāṇaṁ …pe… saṅgajālamaticca so munīti.\nAnuggahāyāti diṭṭhīsu ādīnavaṁ passanto diṭṭhiyo na gaṇhāmi na parāmasāmi nābhinivisāmīti ca bhaṇasi, ajjhattasantīti ca bhaṇasi.\nYametamatthanti yaṁ paramatthanti—\nte ve munī brūsi anuggahāya, ajjhattasantīti yametamatthaṁ."}},{"id":"mnd9:25","sourceIds":["mnd9:25.1","mnd9:25.2","mnd9:25.3","mnd9:25.4","mnd9:25.5","mnd9:25.6"],"kind":"text","text":{"pi":"Kathaṁ nu dhīrehi paveditaṁ tanti.\nKathaṁ nūti padaṁ saṁsayapucchā vimatipucchā dveḷhakapucchā anekaṁsapucchā, evaṁ nu kho nanu kho kiṁ nu kho kathaṁ nu khoti—\nkathaṁ nu.\nDhīrehīti dhīrehi paṇḍitehi paññavantehi buddhimantehi ñāṇīhi vibhāvīhi medhāvīhi.\nPaveditanti veditaṁ paveditaṁ ācikkhitaṁ desitaṁ paññāpitaṁ paṭṭhapitaṁ vivaṭaṁ vibhattaṁ uttānīkataṁ pakāsitanti—\nkathaṁ nu dhīrehi paveditaṁ taṁ."}},{"id":"mnd9:26","sourceIds":["mnd9:26.1"],"kind":"text","text":{"pi":"Tenāha so brāhmaṇo—"}},{"id":"mnd9:27","sourceIds":["mnd9:27.1","mnd9:27.2","mnd9:27.3","mnd9:27.4","mnd9:27.5"],"kind":"text","text":{"pi":"“Vinicchayā yāni pakappitāni,\n(iti māgaṇḍiyo)\nTe ve munī brūsi anuggahāya;\nAjjhattasantīti yametamatthaṁ,\nKathaṁ nu dhīrehi paveditaṁ tan”ti."}},{"id":"mnd9:28","sourceIds":["mnd9:28.1","mnd9:28.2","mnd9:28.3","mnd9:28.4","mnd9:28.5","mnd9:28.6","mnd9:28.7"],"kind":"text","text":{"pi":"Na diṭṭhiyā na sutiyā na ñāṇena,\n(māgaṇḍiyāti bhagavā)\nSīlabbatenāpi na suddhimāha;\nAdiṭṭhiyā assutiyā añāṇā,\nAsīlatā abbatā nopi tena;\nEte ca nissajja anuggahāya,\nSanto anissāya bhavaṁ na jappe."}},{"id":"mnd9:29","sourceIds":["mnd9:29.1","mnd9:29.2","mnd9:29.3","mnd9:29.4","mnd9:29.5","mnd9:29.6"],"kind":"text","text":{"pi":"Na diṭṭhiyā na sutiyā na ñāṇenāti.\nDiṭṭhenāpi suddhiṁ visuddhiṁ parisuddhiṁ, muttiṁ vimuttiṁ parimuttiṁ nāha na kathesi na bhaṇasi na dīpayasi na voharasi;\nsutenāpi suddhiṁ visuddhiṁ parisuddhiṁ, muttiṁ vimuttiṁ parimuttiṁ nāha na kathesi na bhaṇasi na dīpayasi na voharasi;\ndiṭṭhasutenāpi suddhiṁ visuddhiṁ parisuddhiṁ, muttiṁ vimuttiṁ parimuttiṁ nāha na kathesi na bhaṇasi na dīpayasi na voharasi;\nñāṇenāpi suddhiṁ visuddhiṁ parisuddhiṁ, muttiṁ vimuttiṁ parimuttiṁ nāha na kathesi na bhaṇasi na dīpayasi na voharasīti—\nna diṭṭhiyā na sutiyā na ñāṇena."}},{"id":"mnd9:30","sourceIds":["mnd9:30.1","mnd9:30.2","mnd9:30.3"],"kind":"text","text":{"pi":"Māgaṇḍiyāti bhagavā taṁ brāhmaṇaṁ nāmena ālapati.\nBhagavāti gāravādhivacanaṁ …pe… sacchikā paññatti yadidaṁ bhagavāti—\nmāgaṇḍiyāti bhagavā."}},{"id":"mnd9:31","sourceIds":["mnd9:31.1","mnd9:31.2","mnd9:31.3","mnd9:31.4","mnd9:31.5"],"kind":"text","text":{"pi":"Sīlabbatenāpi na suddhimāhāti.\nSīlenāpi suddhiṁ visuddhiṁ parisuddhiṁ, muttiṁ vimuttiṁ parimuttiṁ nāha na kathesi na bhaṇasi na dīpayasi na voharasi;\nvatenāpi suddhiṁ visuddhiṁ parisuddhiṁ, muttiṁ vimuttiṁ parimuttiṁ nāha na kathesi na bhaṇasi na dīpayasi na voharasi;\nsīlabbatenāpi suddhiṁ visuddhiṁ parisuddhiṁ, muttiṁ vimuttiṁ parimuttiṁ nāha na kathesi na bhaṇasi na dīpayasi na voharasīti—\nsīlabbatenāpi na suddhimāha."}},{"id":"mnd9:32","sourceIds":["mnd9:32.1","mnd9:32.2","mnd9:32.3","mnd9:32.4","mnd9:32.5","mnd9:32.6","mnd9:32.7","mnd9:32.8","mnd9:32.9","mnd9:32.10","mnd9:32.11","mnd9:32.12","mnd9:32.13"],"kind":"text","text":{"pi":"Adiṭṭhiyā assutiyā añāṇā, asīlatā abbatā nopi tenāti.\nDiṭṭhipi icchitabbā.\nDasavatthukā sammādiṭṭhi—\natthi dinnaṁ, atthi yiṭṭhaṁ, atthi hutaṁ, atthi sukatadukkaṭānaṁ kammānaṁ phalaṁ vipāko, atthi ayaṁ loko, atthi paro loko, atthi mātā, atthi pitā, atthi sattā opapātikā, atthi loke samaṇabrāhmaṇā sammaggatā sammāpaṭipannā ye imañca lokaṁ parañca lokaṁ sayaṁ abhiññā sacchikatvā pavedentīti;\nsavanampi icchitabbaṁ—\nparato ghoso, suttaṁ, geyyaṁ, veyyākaraṇaṁ, gāthā, udānaṁ, itivuttakaṁ, jātakaṁ, abbhutadhammaṁ, vedallaṁ;\nñāṇampi icchitabbaṁ—\nkammassakatañāṇaṁ, saccānulomikañāṇaṁ, abhiññāñāṇaṁ, samāpattiñāṇaṁ;\nsīlampi icchitabbaṁ—\npātimokkhasaṁvaro;\nvatampi icchitabbaṁ—\naṭṭha dhutaṅgāni—\nāraññikaṅgaṁ, piṇḍapātikaṅgaṁ, paṁsukūlikaṅgaṁ, tecīvarikaṅgaṁ, sapadānacārikaṅgaṁ, khalupacchābhattikaṅgaṁ, nesajjikaṅgaṁ, yathāsanthatikaṅganti."}},{"id":"mnd9:33","sourceIds":["mnd9:33.1","mnd9:33.2","mnd9:33.3","mnd9:33.4"],"kind":"text","text":{"pi":"Adiṭṭhiyā assutiyā añāṇā, asīlatā abbatā nopi tenāti.\nNāpi sammādiṭṭhimattena, nāpi savanamattena, nāpi ñāṇamattena, nāpi sīlamattena, nāpi vatamattena ajjhattasantiṁ patto hoti, nāpi vinā etehi dhammehi ajjhattasantiṁ pāpuṇāti.\nApi ca sambhārā ime dhammā honti ajjhattasantiṁ pāpuṇituṁ adhigantuṁ phassituṁ sacchikātunti—\nadiṭṭhiyā assutiyā añāṇā asīlatā abbatā nopi tena."}},{"id":"mnd9:34","sourceIds":["mnd9:34.1","mnd9:34.2","mnd9:34.3","mnd9:34.4","mnd9:34.5","mnd9:34.6"],"kind":"text","text":{"pi":"Ete ca nissajja anuggahāyāti.\nEteti kaṇhapakkhikānaṁ dhammānaṁ samugghātato pahānaṁ icchitabbaṁ, tedhātukesu kusalesu dhammesu atammayatā icchitabbā, yato kaṇhapakkhiyā dhammā samugghātapahānena pahīnā honti ucchinnamūlā tālāvatthukatā anabhāvaṅkatā āyatiṁ anuppādadhammā, tedhātukesu ca kusalesu dhammesu atammayatā hoti, ettāvatāpi na gaṇhāti na parāmasati nābhinivisati.\nAtha vā na gaṇhitabbā na parāmasitabbā nābhinivisitabbāti.\nEvampi ete ca nissajja anuggahāya.\nYato taṇhā ca diṭṭhi ca māno ca pahīnā honti ucchinnamūlā tālāvatthukatā anabhāvaṅkatā āyatiṁ anuppādadhammāti, ettāvatāpi na gaṇhāti na parāmasati nābhinivisatīti.\nEvampi ete ca nissajja anuggahāya."}},{"id":"mnd9:35","sourceIds":["mnd9:35.1","mnd9:35.2"],"kind":"text","text":{"pi":"Yato puññābhisaṅkhāro ca apuññābhisaṅkhāro ca āneñjābhisaṅkhāro ca pahīnā honti ucchinnamūlā tālāvatthukatā anabhāvaṅkatā āyatiṁ anuppādadhammāti, ettāvatāpi na gaṇhāti na parāmasati nābhinivisatīti.\nEvampi ete ca nissajja anuggahāya."}},{"id":"mnd9:36","sourceIds":["mnd9:36.1","mnd9:36.2","mnd9:36.3"],"kind":"text","text":{"pi":"Santo anissāya bhavaṁ na jappeti.\nSantoti rāgassa samitattā santo, dosassa samitattā santo, mohassa samitattā santo, kodhassa … upanāhassa … makkhassa … paḷāsassa … issāya … macchariyassa … māyāya … sāṭheyyassa … thambhassa … sārambhassa … mānassa … atimānassa … madassa … pamādassa … sabbakilesānaṁ … sabbaduccaritānaṁ … sabbadarathānaṁ … sabbapariḷāhānaṁ … sabbasantāpānaṁ … sabbākusalābhisaṅkhārānaṁ santattā samitattā vūpasamitattā vijjhātattā nibbutattā vigatattā paṭipassaddhattā santo upasanto vūpasanto nibbuto paṭipassaddhoti—\nsanto."}},{"id":"mnd9:37","sourceIds":["mnd9:37.1","mnd9:37.2","mnd9:37.3","mnd9:37.4","mnd9:37.5","mnd9:37.6","mnd9:37.7","mnd9:37.8"],"kind":"text","text":{"pi":"Anissāyāti dve nissayā—\ntaṇhānissayo ca diṭṭhinissayo ca …pe…\nayaṁ taṇhānissayo …pe…\nayaṁ diṭṭhinissayo.\nTaṇhānissayaṁ pahāya diṭṭhinissayaṁ paṭinissajjitvā cakkhuṁ anissāya, sotaṁ anissāya, ghānaṁ anissāya, jivhaṁ anissāya, kāyaṁ anissāya, manaṁ anissāya, rūpe … sadde … gandhe … rase … phoṭṭhabbe … kulaṁ … gaṇaṁ … āvāsaṁ … lābhaṁ … yasaṁ … pasaṁsaṁ … sukhaṁ … cīvaraṁ … piṇḍapātaṁ … senāsanaṁ … gilānapaccayabhesajjaparikkhāraṁ … kāmadhātuṁ … rūpadhātuṁ … arūpadhātuṁ … kāmabhavaṁ … rūpabhavaṁ … arūpabhavaṁ … saññābhavaṁ … asaññābhavaṁ … nevasaññānāsaññābhavaṁ … ekavokārabhavaṁ … catuvokārabhavaṁ … pañcavokārabhavaṁ … atītaṁ … anāgataṁ … paccuppannaṁ … diṭṭhasutamutaviññātabbe dhamme anissāya aggaṇhitvā aparāmasitvā anabhinivisitvāti—\nsanto anissāya.\nBhavaṁ na jappeti kāmabhavaṁ na jappeyya, rūpabhavaṁ na jappeyya, arūpabhavaṁ na jappeyya nappajappeyya na abhijappeyyāti—\nsanto anissāya bhavaṁ na jappe."}},{"id":"mnd9:38","sourceIds":["mnd9:38.1"],"kind":"text","text":{"pi":"Tenāha bhagavā—"}},{"id":"mnd9:39","sourceIds":["mnd9:39.1","mnd9:39.2","mnd9:39.3","mnd9:39.4","mnd9:39.5","mnd9:39.6","mnd9:39.7"],"kind":"text","text":{"pi":"“Na diṭṭhiyā na sutiyā na ñāṇena,\n(māgaṇḍiyāti bhagavā)\nSīlabbatenāpi na suddhimāha;\nAdiṭṭhiyā assutiyā añāṇā,\nAsīlatā abbatā nopi tena;\nEte ca nissajja anuggahāya,\nSanto anissāya bhavaṁ na jappe”ti."}},{"id":"mnd9:40","sourceIds":["mnd9:40.1","mnd9:40.2","mnd9:40.3","mnd9:40.4","mnd9:40.5","mnd9:40.6","mnd9:40.7"],"kind":"text","text":{"pi":"No ce kira diṭṭhiyā na sutiyā na ñāṇena,\n(iti māgaṇḍiyo)\nSīlabbatenāpi na suddhimāha;\nAdiṭṭhiyā assutiyā añāṇā,\nAsīlatā abbatā nopi tena;\nMaññāmahaṁ momuhameva dhammaṁ,\nDiṭṭhiyā eke paccenti suddhiṁ."}},{"id":"mnd9:41","sourceIds":["mnd9:41.1","mnd9:41.2","mnd9:41.3","mnd9:41.4","mnd9:41.5","mnd9:41.6"],"kind":"text","text":{"pi":"No ce kira diṭṭhiyā na sutiyā na ñāṇenāti.\nDiṭṭhiyāpi suddhiṁ visuddhiṁ parisuddhiṁ, muttiṁ vimuttiṁ parimuttiṁ nāha na kathesi na bhaṇasi na dīpayasi na voharasi;\nsutenāpi suddhiṁ visuddhiṁ parisuddhiṁ, muttiṁ vimuttiṁ parimuttiṁ …\ndiṭṭhasutenāpi suddhiṁ visuddhiṁ parisuddhiṁ, muttiṁ vimuttiṁ parimuttiṁ …\nñāṇenāpi suddhiṁ visuddhiṁ parisuddhiṁ, muttiṁ vimuttiṁ parimuttiṁ nāha na kathesi na bhaṇasi na dīpayasi na voharasīti—\nno ce kira diṭṭhiyā na sutiyā na ñāṇena."}},{"id":"mnd9:42","sourceIds":["mnd9:42.1","mnd9:42.2","mnd9:42.3"],"kind":"text","text":{"pi":"Iti māgaṇḍiyoti itīti padasandhi …pe….\nMāgaṇḍiyoti tassa brāhmaṇassa nāmaṁ …pe…\niti māgaṇḍiyo."}},{"id":"mnd9:43","sourceIds":["mnd9:43.1","mnd9:43.2","mnd9:43.3","mnd9:43.4","mnd9:43.5"],"kind":"text","text":{"pi":"Sīlabbatenāpi na suddhimāhāti.\nSīlenāpi suddhiṁ visuddhiṁ parisuddhiṁ …pe…\nvatenāpi suddhiṁ visuddhiṁ parisuddhiṁ …pe…\nsīlabbatenāpi suddhiṁ visuddhiṁ parisuddhiṁ, muttiṁ vimuttiṁ parimuttiṁ nāha na kathesi na bhaṇasi na dīpayasi na voharasīti—\nsīlabbatenāpi na suddhimāha."}},{"id":"mnd9:44","sourceIds":["mnd9:44.1","mnd9:44.2","mnd9:44.3"],"kind":"text","text":{"pi":"Adiṭṭhiyā assutiyā añāṇā, asīlatā abbatā nopi tenāti.\nDiṭṭhipi icchitabbāti evaṁ bhaṇasi, savanampi icchitabbanti evaṁ bhaṇasi, ñāṇampi icchitabbanti evaṁ bhaṇasi, na sakkosi ekaṁsena anujānituṁ, napi sakkosi ekaṁsena paṭikkhipitunti—\nadiṭṭhiyā assutiyā añāṇā, asīlatā abbatā nopi tena."}},{"id":"mnd9:45","sourceIds":["mnd9:45.1","mnd9:45.2","mnd9:45.3"],"kind":"text","text":{"pi":"Maññāmahaṁ momuhameva dhammanti.\nMomūhadhammo ayaṁ tuyhaṁ bāladhammo mūḷhadhammo aññāṇadhammo amarāvikkhepadhammoti evaṁ maññāmi evaṁ jānāmi evaṁ ājānāmi evaṁ vijānāmi evaṁ paṭivijānāmi evaṁ paṭivijjhāmīti—\nmaññāmahaṁ momuhameva dhammaṁ."}},{"id":"mnd9:46","sourceIds":["mnd9:46.1","mnd9:46.2","mnd9:46.3","mnd9:46.4","mnd9:46.5","mnd9:46.6"],"kind":"text","text":{"pi":"Diṭṭhiyā eke paccenti suddhinti.\nSuddhidiṭṭhiyā eke samaṇabrāhmaṇā suddhiṁ visuddhiṁ parisuddhiṁ, muttiṁ vimuttiṁ parimuttiṁ paccenti;\n“sassato loko, idameva saccaṁ moghamaññan”ti diṭṭhiyā eke samaṇabrāhmaṇā suddhiṁ visuddhiṁ parisuddhiṁ, muttiṁ vimuttiṁ parimuttiṁ paccenti;\n“asassato loko …pe…\nneva hoti na na hoti tathāgato paraṁ maraṇā, idameva saccaṁ moghamaññan”ti diṭṭhiyā eke samaṇabrāhmaṇā suddhiṁ visuddhiṁ parisuddhiṁ, muttiṁ vimuttiṁ parimuttiṁ paccentīti—\ndiṭṭhiyā eke paccenti suddhiṁ."}},{"id":"mnd9:47","sourceIds":["mnd9:47.1"],"kind":"text","text":{"pi":"Tenāha so brāhmaṇo—"}},{"id":"mnd9:48","sourceIds":["mnd9:48.1","mnd9:48.2","mnd9:48.3","mnd9:48.4","mnd9:48.5","mnd9:48.6","mnd9:48.7"],"kind":"text","text":{"pi":"“No ce kira diṭṭhiyā na sutiyā na ñāṇena,\n(iti māgaṇḍiyo)\nSīlabbatenāpi na suddhimāha;\nAdiṭṭhiyā assutiyā añāṇā,\nAsīlatā abbatā nopi tena;\nMaññāmahaṁ momuhameva dhammaṁ,\nDiṭṭhiyā eke paccenti suddhin”ti."}},{"id":"mnd9:49","sourceIds":["mnd9:49.1","mnd9:49.2","mnd9:49.3","mnd9:49.4","mnd9:49.5"],"kind":"text","text":{"pi":"Diṭṭhiñca nissāyanupucchamāno,\n(māgaṇḍiyāti bhagavā)\nSamuggahītesu pamohamāgā;\nIto ca nāddakkhi aṇumpi saññaṁ,\nTasmā tuvaṁ momuhato dahāsi."}},{"id":"mnd9:50","sourceIds":["mnd9:50.1","mnd9:50.2","mnd9:50.3","mnd9:50.4"],"kind":"text","text":{"pi":"Diṭṭhiñca nissāyanupucchamānoti.\nMāgaṇḍiyo brāhmaṇo diṭṭhiṁ nissāya diṭṭhiṁ pucchati, lagganaṁ nissāya lagganaṁ pucchati, bandhanaṁ nissāya bandhanaṁ pucchati, palibodhaṁ nissāya palibodhaṁ pucchati.\nAnupucchamānoti punappunaṁ pucchatīti—\ndiṭṭhiñca nissāyanupucchamāno."}},{"id":"mnd9:51","sourceIds":["mnd9:51.1","mnd9:51.2","mnd9:51.3"],"kind":"text","text":{"pi":"Māgaṇḍiyāti bhagavā taṁ brāhmaṇaṁ nāmena ālapati.\nBhagavāti gāravādhivacanaṁ …pe… sacchikā paññatti yadidaṁ bhagavāti—\nmāgaṇḍiyāti bhagavā."}},{"id":"mnd9:52","sourceIds":["mnd9:52.1","mnd9:52.2","mnd9:52.3"],"kind":"text","text":{"pi":"Samuggahītesu pamohamāgāti.\nYā sā diṭṭhi tayā gahitā parāmaṭṭhā abhiniviṭṭhā ajjhositā adhimuttā, tāyeva tvaṁ diṭṭhiyā mūḷhosi pamūḷhosi sammūḷhosi mohaṁ āgatosi pamohaṁ āgatosi sammohaṁ āgatosi andhakāraṁ pakkhandosīti—\nsamuggahītesu pamohamāgā."}},{"id":"mnd9:53","sourceIds":["mnd9:53.1","mnd9:53.2","mnd9:53.3","mnd9:53.4","mnd9:53.5"],"kind":"text","text":{"pi":"Ito ca nāddakkhi aṇumpi saññanti.\nIto ajjhattasantito vā paṭipadāto vā dhammadesanāto vā, yuttasaññaṁ pattasaññaṁ lakkhaṇasaññaṁ kāraṇasaññaṁ ṭhānasaññaṁ na paṭilabhati, kuto ñāṇanti.\nEvampi ito ca nāddakkhi aṇumpi saññaṁ.\nAtha vā aniccaṁ vā aniccasaññānulomaṁ vā, dukkhaṁ vā dukkhasaññānulomaṁ vā, anattaṁ vā anattasaññānulomaṁ vā, saññuppādamattaṁ vā sañjānitamattaṁ vā na paṭilabhati, kuto ñāṇanti.\nEvampi ito ca nāddakkhi aṇumpi saññaṁ."}},{"id":"mnd9:54","sourceIds":["mnd9:54.1","mnd9:54.2","mnd9:54.3"],"kind":"text","text":{"pi":"Tasmā tuvaṁ momuhato dahāsīti.\nTasmāti tasmā taṅkāraṇā taṁhetu tappaccayā taṁnidānā momūhadhammato bāladhammato mūḷhadhammato aññāṇadhammato amarāvikkhepadhammato dahāsi passasi dakkhasi olokesi nijjhāyasi upaparikkhasīti—\ntasmā tuvaṁ momuhato dahāsi."}},{"id":"mnd9:55","sourceIds":["mnd9:55.1"],"kind":"text","text":{"pi":"Tenāha bhagavā—"}},{"id":"mnd9:56","sourceIds":["mnd9:56.1","mnd9:56.2","mnd9:56.3","mnd9:56.4","mnd9:56.5"],"kind":"text","text":{"pi":"“Diṭṭhiñca nissāyanupucchamāno,\n(māgaṇḍiyāti bhagavā)\nSamuggahītesu pamohamāgā;\nIto ca nāddakkhi aṇumpi saññaṁ,\nTasmā tuvaṁ momuhato dahāsī”ti."}},{"id":"mnd9:57","sourceIds":["mnd9:57.1","mnd9:57.2","mnd9:57.3","mnd9:57.4"],"kind":"text","text":{"pi":"Samo visesī uda vā nihīno,\nYo maññati so vivadetha tena;\nTīsu vidhāsu avikampamāno,\nSamo visesīti na tassa hoti."}},{"id":"mnd9:58","sourceIds":["mnd9:58.1","mnd9:58.2","mnd9:58.3","mnd9:58.4"],"kind":"text","text":{"pi":"Samo visesī uda vā nihīno, yo maññati so vivadetha tenāti.\nSadisohamasmīti vā seyyohamasmīti vā hīnohamasmīti vā yo maññati, so tena mānena tāya diṭṭhiyā tena vā puggalena kalahaṁ kareyya bhaṇḍanaṁ kareyya viggahaṁ kareyya vivādaṁ kareyya medhagaṁ kareyya—\n“na tvaṁ imaṁ dhammavinayaṁ ājānāsi, ahaṁ imaṁ dhammavinayaṁ ājānāmi, kiṁ tvaṁ imaṁ dhammavinayaṁ ājānissasi, micchāpaṭipanno tvamasi, ahamasmi sammāpaṭipanno, sahitaṁ me, asahitaṁ te, pure vacanīyaṁ pacchā avaca, pacchā vacanīyaṁ pure avaca, adhiciṇṇaṁ te viparāvattaṁ, āropito te vādo, niggahito tvamasi, cara vādappamokkhāya, nibbeṭhehi vā sace pahosī”ti—\nsamo visesī uda vā nihīno yo maññati so vivadetha tena."}},{"id":"mnd9:59","sourceIds":["mnd9:59.1","mnd9:59.2","mnd9:59.3","mnd9:59.4","mnd9:59.5"],"kind":"text","text":{"pi":"Tīsu vidhāsu avikampamāno, samo visesīti na tassa hotīti.\nYassetā tisso vidhā pahīnā samucchinnā vūpasantā paṭipassaddhā abhabbuppattikā ñāṇagginā daḍḍhā, so tīsu vidhāsu na kampati na vikampati, avikampamānassa puggalassa sadisohamasmīti vā seyyohamasmīti vā hīnohamasmīti vā.\nNa tassa hotīti.\nTīsu vidhāsu avikampamāno, samo visesīti—\nna tassa hoti."}},{"id":"mnd9:60","sourceIds":["mnd9:60.1"],"kind":"text","text":{"pi":"Tenāha bhagavā—"}},{"id":"mnd9:61","sourceIds":["mnd9:61.1","mnd9:61.2","mnd9:61.3","mnd9:61.4"],"kind":"text","text":{"pi":"“Samo visesī uda vā nihīno,\nYo maññati so vivadetha tena;\nTīsu vidhāsu avikampamāno,\nSamo visesīti na tassa hotī”ti."}},{"id":"mnd9:62","sourceIds":["mnd9:62.1","mnd9:62.2","mnd9:62.3","mnd9:62.4"],"kind":"text","text":{"pi":"Saccanti so brāhmaṇo kiṁ vadeyya,\nMusāti vā so vivadetha kena;\nYasmiṁ samaṁ visamaṁ vāpi natthi,\nSa kena vādaṁ paṭisaṁyujeyya."}},{"id":"mnd9:63","sourceIds":["mnd9:63.1","mnd9:63.2","mnd9:63.3","mnd9:63.4","mnd9:63.5","mnd9:63.6","mnd9:63.7"],"kind":"text","text":{"pi":"Saccanti so brāhmaṇo kiṁ vadeyyāti.\nBrāhmaṇoti sattannaṁ dhammānaṁ bāhitattā brāhmaṇo …pe… asito tādi pavuccate sa brahmā.\nSaccanti so brāhmaṇo kiṁ vadeyyāti.\n“Sassato loko, idameva saccaṁ moghamaññan”ti brāhmaṇo kiṁ vadeyya kiṁ katheyya kiṁ bhaṇeyya kiṁ dīpayeyya kiṁ vohareyya;\n“asassato loko …pe…\nneva hoti na na hoti tathāgato paraṁ maraṇā, idameva saccaṁ moghamaññan”ti brāhmaṇo kiṁ vadeyya kiṁ katheyya kiṁ bhaṇeyya kiṁ dīpayeyya kiṁ vohareyyāti—\nsaccanti so brāhmaṇo kiṁ vadeyya."}},{"id":"mnd9:64","sourceIds":["mnd9:64.1","mnd9:64.2","mnd9:64.3","mnd9:64.4","mnd9:64.5"],"kind":"text","text":{"pi":"Musāti vā so vivadetha kenāti.\nBrāhmaṇo mayhaṁva saccaṁ, tuyhaṁ musāti kena mānena, kāya diṭṭhiyā, kena vā puggalena kalahaṁ kareyya bhaṇḍanaṁ kareyya viggahaṁ kareyya vivādaṁ kareyya medhagaṁ kareyya—\n“na tvaṁ imaṁ dhammavinayaṁ ājānāsi …pe…\nnibbeṭhehi vā sace pahosī”ti—\nmusāti vā so vivadetha kena."}},{"id":"mnd9:65","sourceIds":["mnd9:65.1","mnd9:65.2","mnd9:65.3"],"kind":"text","text":{"pi":"Yasmiṁ samaṁ visamaṁ vāpi natthīti.\nYasminti yasmiṁ puggale arahante khīṇāsave sadisohamasmīti māno natthi, seyyohamasmīti māno natthi, hīnohamasmīti omāno natthi na santi na saṁvijjati nupalabbhati, pahīnaṁ samucchinnaṁ vūpasantaṁ paṭipassaddhaṁ abhabbuppattikaṁ ñāṇagginā daḍḍhanti—\nyasmiṁ samaṁ visamaṁ vāpi natthi."}},{"id":"mnd9:66","sourceIds":["mnd9:66.1","mnd9:66.2","mnd9:66.3","mnd9:66.4","mnd9:66.5"],"kind":"text","text":{"pi":"Sa kena vādaṁ paṭisaṁyujeyyāti.\nSo kena mānena, kāya diṭṭhiyā, kena vā puggalena vādaṁ paṭisaṁyojeyya paṭibaleyya kalahaṁ kareyya bhaṇḍanaṁ kareyya viggahaṁ kareyya vivādaṁ kareyya medhagaṁ kareyya—\n“na tvaṁ imaṁ dhammavinayaṁ ājānāsi …pe…\nnibbeṭhehi vā sace pahosī”ti—\nsa kena vādaṁ paṭisaṁyujeyya."}},{"id":"mnd9:67","sourceIds":["mnd9:67.1"],"kind":"text","text":{"pi":"Tenāha bhagavā—"}},{"id":"mnd9:68","sourceIds":["mnd9:68.1","mnd9:68.2","mnd9:68.3","mnd9:68.4"],"kind":"text","text":{"pi":"“Saccanti so brāhmaṇo kiṁ vadeyya,\nMusāti vā so vivadetha kena;\nYasmiṁ samaṁ visamaṁ vāpi natthi,\nSa kena vādaṁ paṭisaṁyujeyyā”ti."}},{"id":"mnd9:69","sourceIds":["mnd9:69.1","mnd9:69.2","mnd9:69.3","mnd9:69.4"],"kind":"text","text":{"pi":"Okaṁ pahāya aniketasārī,\nGāme akubbaṁ muni santhavāni;\nKāmehi ritto apurakkharāno,\nKathaṁ na viggayha janena kayirā."}},{"id":"mnd9:70","sourceIds":["mnd9:70.1","mnd9:70.2","mnd9:70.3"],"kind":"text","text":{"pi":"Atha kho hāliddakāni gahapati yenāyasmā mahākaccāno tenupasaṅkami; upasaṅkamitvā āyasmantaṁ mahākaccānaṁ abhivādetvā ekamantaṁ nisīdi.\nEkamantaṁ nisinno kho hāliddakāni gahapati āyasmantaṁ mahākaccānaṁ etadavoca—\n“vuttamidaṁ, bhante kaccāna, bhagavatā aṭṭhakavaggiye māgaṇḍiyapañhe—"}},{"id":"mnd9:71","sourceIds":["mnd9:71.1","mnd9:71.2","mnd9:71.3","mnd9:71.4"],"kind":"text","text":{"pi":"‘Okaṁ pahāya aniketasārī,\nGāme akubbaṁ muni santhavāni;\nKāmehi ritto apurakkharāno,\nKathaṁ na viggayha janena kayirā’ti."}},{"id":"mnd9:72","sourceIds":["mnd9:72.1"],"kind":"text","text":{"pi":"Imassa nu kho, bhante kaccāna, bhagavatā saṅkhittena bhāsitassa kathaṁ vitthārena attho daṭṭhabbo”ti?"}},{"id":"mnd9:73","sourceIds":["mnd9:73.1","mnd9:73.2","mnd9:73.3","mnd9:73.4","mnd9:73.5"],"kind":"text","text":{"pi":"“Rūpadhātu kho, gahapati, viññāṇassa oko rūpadhāturāgavinibaddhañca pana viññāṇaṁ okasārīti vuccati.\nVedanādhātu kho, gahapati …\nsaññādhātu kho, gahapati …\nsaṅkhāradhātu kho, gahapati, viññāṇassa oko saṅkhāradhāturāgavinibandhañca pana viññāṇaṁ okasārīti vuccati.\nEvaṁ kho, gahapati, okasārī hoti."}},{"id":"mnd9:74","sourceIds":["mnd9:74.1","mnd9:74.2","mnd9:74.3","mnd9:74.4","mnd9:74.5","mnd9:74.6","mnd9:74.7","mnd9:74.8","mnd9:74.9"],"kind":"text","text":{"pi":"Kathañca, gahapati, anokasārī hoti?\nRūpadhātuyā kho, gahapati, yo chando yo rāgo yā nandī yā taṇhā ye upāyupādānā cetaso adhiṭṭhānābhinivesānusayā te tathāgatassa pahīnā ucchinnamūlā tālāvatthukatā anabhāvaṅkatā āyatiṁ anuppādadhammā;\ntasmā tathāgato anokasārīti vuccati.\nVedanādhātuyā kho, gahapati …\nsaññādhātuyā kho, gahapati …\nsaṅkhāradhātuyā kho, gahapati …\nviññāṇadhātuyā kho, gahapati, yo chando yo rāgo yā nandī yā taṇhā ye upāyupādānā cetaso adhiṭṭhānābhinivesānusayā te tathāgatassa pahīnā ucchinnamūlā tālāvatthukatā anabhāvaṅkatā āyatiṁ anuppādadhammā;\ntasmā tathāgato anokasārīti vuccati.\nEvaṁ kho, gahapati, anokasārī hoti."}},{"id":"mnd9:75","sourceIds":["mnd9:75.1","mnd9:75.2","mnd9:75.3","mnd9:75.4","mnd9:75.5","mnd9:75.6","mnd9:75.7","mnd9:75.8"],"kind":"text","text":{"pi":"Kathañca, gahapati, niketasārī hoti?\nRūpanimittaniketavisāravinibandhā kho, gahapati, niketasārīti vuccati.\nSaddanimitta …\ngandhanimitta …\nrasanimitta …\nphoṭṭhabbanimitta …\ndhammanimittaniketavisāravinibandhā kho, gahapati, niketasārīti vuccati.\nEvaṁ kho, gahapati, niketasārī hoti."}},{"id":"mnd9:76","sourceIds":["mnd9:76.1","mnd9:76.2","mnd9:76.3","mnd9:76.4","mnd9:76.5","mnd9:76.6","mnd9:76.7","mnd9:76.8","mnd9:76.9","mnd9:76.10"],"kind":"text","text":{"pi":"Kathañca, gahapati, aniketasārī hoti?\nRūpanimittaniketavisāravinibandhā kho, gahapati, tathāgatassa pahīnā ucchinnamūlā tālāvatthukatā anabhāvaṅkatā āyatiṁ anuppādadhammā;\ntasmā tathāgato aniketasārīti vuccati.\nSaddanimitta …\ngandhanimitta …\nrasanimitta …\nphoṭṭhabbanimitta …\ndhammanimittaniketavisāravinibandhā kho, gahapati, tathāgatassa pahīnā ucchinnamūlā tālāvatthukatā anabhāvaṅkatā āyatiṁ anuppādadhammā;\ntasmā tathāgato aniketasārīti vuccati.\nEvaṁ kho, gahapati, aniketasārī hoti."}},{"id":"mnd9:77","sourceIds":["mnd9:77.1","mnd9:77.2","mnd9:77.3"],"kind":"text","text":{"pi":"Kathañca, gahapati, gāme santhavajāto hoti?\nIdha, gahapati, ekacco bhikkhu gihīhi saṁsaṭṭho viharati sahanandī sahasokī, sukhitesu sukhito, dukkhitesu dukkhito, uppannesu kiccakaraṇīyesu attanā voyogaṁ āpajjati.\nEvaṁ kho, gahapati, gāme santhavajāto hoti."}},{"id":"mnd9:78","sourceIds":["mnd9:78.1","mnd9:78.2","mnd9:78.3"],"kind":"text","text":{"pi":"Kathañca, gahapati, gāme na santhavajāto hoti?\nIdha, gahapati, ekacco bhikkhu gihīhi asaṁsaṭṭho viharati na sahanandī na sahasokī, na sukhitesu sukhito, na dukkhitesu dukkhito, uppannesu kiccakaraṇīyesu na attanā voyogaṁ āpajjati.\nEvaṁ kho, gahapati, gāme na santhavajāto hoti."}},{"id":"mnd9:79","sourceIds":["mnd9:79.1","mnd9:79.2","mnd9:79.3"],"kind":"text","text":{"pi":"Kathañca, gahapati, kāmehi aritto hoti?\nIdha, gahapati, ekacco bhikkhu kāmesu avītarāgo hoti avigatacchando avigatapemo avigatapipāso avigatapariḷāho avigatataṇho.\nEvaṁ kho, gahapati, kāmehi aritto hoti."}},{"id":"mnd9:80","sourceIds":["mnd9:80.1","mnd9:80.2","mnd9:80.3"],"kind":"text","text":{"pi":"Kathañca, gahapati, kāmehi ritto hoti?\nIdha, gahapati, ekacco bhikkhu kāmesu vītarāgo hoti vigatacchando vigatapemo vigatapipāso vigatapariḷāho vigatataṇho.\nEvaṁ kho, gahapati, kāmehi ritto hoti."}},{"id":"mnd9:81","sourceIds":["mnd9:81.1","mnd9:81.2","mnd9:81.3","mnd9:81.4","mnd9:81.5","mnd9:81.6","mnd9:81.7","mnd9:81.8"],"kind":"text","text":{"pi":"Kathañca, gahapati, purakkharāno hoti?\nIdha, gahapati, ekaccassa bhikkhuno evaṁ hoti—\n‘evaṁrūpo siyaṁ anāgatamaddhānan’ti …\n‘evaṁvedano siyaṁ …\nevaṁsañño siyaṁ …\nevaṁsaṅkhāro siyaṁ …\nevaṁviññāṇo siyaṁ anāgatamaddhānan’ti …\nevaṁ kho, gahapati, purakkharāno hoti."}},{"id":"mnd9:82","sourceIds":["mnd9:82.1","mnd9:82.2","mnd9:82.3","mnd9:82.4","mnd9:82.5","mnd9:82.6","mnd9:82.7","mnd9:82.8"],"kind":"text","text":{"pi":"Kathañca, gahapati, apurakkharāno hoti?\nIdha, gahapati, ekaccassa bhikkhuno na evaṁ hoti—\n‘evaṁrūpo siyaṁ anāgatamaddhānan’ti …\n‘evaṁvedano siyaṁ …\nevaṁsañño siyaṁ …\nevaṁsaṅkhāro siyaṁ …\nevaṁviññāṇo siyaṁ anāgatamaddhānan’ti …\nevaṁ kho, gahapati, apurakkharāno hoti."}},{"id":"mnd9:83","sourceIds":["mnd9:83.1","mnd9:83.2","mnd9:83.3","mnd9:83.4"],"kind":"text","text":{"pi":"Kathañca, gahapati, kathaṁ viggayha janena kattā hoti?\nIdha, gahapati, ekacco evarūpiṁ kathaṁ kattā hoti—\n‘na tvaṁ imaṁ dhammavinayaṁ ājānāsi, ahaṁ imaṁ dhammavinayaṁ ājānāmi, kiṁ tvaṁ imaṁ dhammavinayaṁ ājānissasi, micchāpaṭipanno tvamasi, ahamasmi sammāpaṭipanno, sahitaṁ me, asahitaṁ te, pure vacanīyaṁ pacchā avaca, pacchā vacanīyaṁ pure avaca, adhiciṇṇaṁ te viparāvattaṁ, āropito te vādo, niggahito tvamasi, cara vādappamokkhāya, nibbeṭhehi vā sace pahosī’ti.\nEvaṁ kho, gahapati, kathaṁ viggayha janena kattā hoti."}},{"id":"mnd9:84","sourceIds":["mnd9:84.1","mnd9:84.2","mnd9:84.3","mnd9:84.4","mnd9:84.5","mnd9:84.6"],"kind":"text","text":{"pi":"Kathañca, gahapati, kathaṁ na viggayha janena kattā hoti?\nIdha, gahapati, ekacco na evarūpiṁ kathaṁ kattā hoti—\n‘na tvaṁ imaṁ dhammavinayaṁ ājānāsi …pe…\nnibbeṭhehi vā sace pahosī’ti.\nEvaṁ kho, gahapati, na viggayha janena kattā hoti.\nIti kho, gahapati, yaṁ taṁ vuttaṁ bhagavatā aṭṭhakavaggiye māgaṇḍiyapañhe—"}},{"id":"mnd9:85","sourceIds":["mnd9:85.1","mnd9:85.2","mnd9:85.3","mnd9:85.4"],"kind":"text","text":{"pi":"‘Okaṁ pahāya aniketasārī,\nGāme akubbaṁ muni santhavāni;\nKāmehi ritto apurakkharāno,\nKathaṁ na viggayha janena kayirā’ti."}},{"id":"mnd9:86","sourceIds":["mnd9:86.1"],"kind":"text","text":{"pi":"Imassa kho, gahapati, bhagavatā saṅkhittena bhāsitassa evaṁ vitthārena attho daṭṭhabbo”ti."}},{"id":"mnd9:87","sourceIds":["mnd9:87.1"],"kind":"text","text":{"pi":"Tenāha bhagavā—"}},{"id":"mnd9:88","sourceIds":["mnd9:88.1","mnd9:88.2","mnd9:88.3","mnd9:88.4"],"kind":"text","text":{"pi":"“Okaṁ pahāya aniketasārī,\nGāme akubbaṁ muni santhavāni;\nKāmehi ritto apurakkharāno,\nKathaṁ na viggayha janena kayirā”ti."}},{"id":"mnd9:89","sourceIds":["mnd9:89.1","mnd9:89.2","mnd9:89.3","mnd9:89.4","mnd9:89.5","mnd9:89.6"],"kind":"text","text":{"pi":"Yehi vivitto vicareyya loke,\nNa tāni uggayha vadeyya nāgo;\nElambujaṁ kaṇḍakavārijaṁ yathā,\nJalena paṅkena canūpalittaṁ;\nEvaṁ munī santivādo agiddho,\nKāme ca loke ca anūpalitto."}},{"id":"mnd9:90","sourceIds":["mnd9:90.1","mnd9:90.2","mnd9:90.3","mnd9:90.4","mnd9:90.5","mnd9:90.6","mnd9:90.7","mnd9:90.8","mnd9:90.9"],"kind":"text","text":{"pi":"Yehi vivitto vicareyya loketi.\nYehīti yehi diṭṭhigatehi.\nVivittoti kāyaduccaritena ritto vivitto pavivitto, vacīduccaritena …\nmanoduccaritena …\nrāgena …pe…\nsabbākusalābhisaṅkhārehi ritto vivitto pavivitto.\nVicareyyāti vicareyya vihareyya iriyeyya vatteyya pāleyya yapeyya yāpeyya.\nLoketi manussaloketi—\nyehi vivitto vicareyya loke."}},{"id":"mnd9:91","sourceIds":["mnd9:91.1","mnd9:91.2","mnd9:91.3","mnd9:91.4","mnd9:91.5","mnd9:91.6","mnd9:91.7","mnd9:91.8"],"kind":"text","text":{"pi":"Na tāni uggayha vadeyya nāgoti.\nNāgoti āguṁ na karotīti—\nnāgo, na gacchatīti—\nnāgo, nāgacchatīti—\nnāgo.\nKathaṁ āguṁ na karotīti—\nnāgo?\nĀgū vuccanti pāpakā akusalā dhammā saṅkilesikā ponobhavikā sadarā dukkhavipākā āyatiṁ jātijarāmaraṇiyā."}},{"id":"mnd9:92","sourceIds":["mnd9:92.1","mnd9:92.2","mnd9:92.3","mnd9:92.4","mnd9:92.5"],"kind":"text","text":{"pi":"Āguṁ na karoti kiñci loke,\n(sabhiyāti bhagavā)\nSabbasaññoge visajja bandhanāni;\nSabbattha na sajjatī vimutto,\nNāgo tādi pavuccate tathattā."}},{"id":"mnd9:93","sourceIds":["mnd9:93.1","mnd9:93.2"],"kind":"text","text":{"pi":"Evaṁ āguṁ na karotīti—\nnāgo."}},{"id":"mnd9:94","sourceIds":["mnd9:94.1","mnd9:94.2","mnd9:94.3","mnd9:94.4","mnd9:94.5"],"kind":"text","text":{"pi":"Kathaṁ na gacchatīti—\nnāgo?\nNa chandāgatiṁ gacchati, na dosāgatiṁ gacchati, na mohāgatiṁ gacchati, na bhayāgatiṁ gacchati, na rāgavasena gacchati, na dosavasena gacchati, na mohavasena gacchati, na mānavasena gacchati, na diṭṭhivasena gacchati, na uddhaccavasena gacchati, na vicikicchāvasena gacchati, nānusayavasena gacchati, na vaggehi dhammehi yāyati nīyati vuyhati saṁharīyati.\nEvaṁ na gacchatīti—\nnāgo."}},{"id":"mnd9:95","sourceIds":["mnd9:95.1","mnd9:95.2","mnd9:95.3","mnd9:95.4","mnd9:95.5","mnd9:95.6","mnd9:95.7","mnd9:95.8"],"kind":"text","text":{"pi":"Kathaṁ nāgacchatīti—\nnāgo?\nSotāpattimaggena ye kilesā pahīnā te kilese na puneti na pacceti na paccāgacchati.\nSakadāgāmimaggena …\nanāgāmimaggena …\narahattamaggena ye kilesā pahīnā te kilese na puneti na pacceti na paccāgacchati.\nEvaṁ nāgacchatīti—\nnāgo."}},{"id":"mnd9:96","sourceIds":["mnd9:96.1","mnd9:96.2","mnd9:96.3","mnd9:96.4","mnd9:96.5"],"kind":"text","text":{"pi":"Na tāni uggayha vadeyya nāgoti.\nNāgo na tāni diṭṭhigatāni gahetvā uggahetvā gaṇhitvā parāmasitvā abhinivisitvā vadeyya katheyya bhaṇeyya dīpayeyya vohareyya;\n“sassato loko …pe…\nneva hoti na na hoti tathāgato paraṁ maraṇā, idameva saccaṁ moghamaññan”ti vadeyya katheyya bhaṇeyya dīpayeyya vohareyyāti—\nna tāni uggayha vadeyya nāgo."}},{"id":"mnd9:97","sourceIds":["mnd9:97.1","mnd9:97.2","mnd9:97.3","mnd9:97.4"],"kind":"text","text":{"pi":"Elambujaṁ kaṇḍakavārijaṁ yathā, jalena paṅkena canūpalittanti.\nElaṁ vuccati udakaṁ, ambujaṁ vuccati padumaṁ, kaṇḍako vuccati kharadaṇḍo, vāri vuccati udakaṁ, vārijaṁ vuccati padumaṁ vārisambhavaṁ, jalaṁ vuccati udakaṁ, paṅko vuccati kaddamo.\nYathā padumaṁ vārijaṁ vārisambhavaṁ jalena ca paṅkena ca na limpati na palimpati na upalimpati, alittaṁ asaṁlittaṁ anupalittanti—\nelambujaṁ kaṇḍakavārijaṁ yathā jalena paṅkena canūpalittaṁ."}},{"id":"mnd9:98","sourceIds":["mnd9:98.1","mnd9:98.2","mnd9:98.3","mnd9:98.4","mnd9:98.5","mnd9:98.6","mnd9:98.7","mnd9:98.8","mnd9:98.9","mnd9:98.10","mnd9:98.11","mnd9:98.12"],"kind":"text","text":{"pi":"Evaṁ munī santivādo agiddho, kāme ca loke ca anūpalittoti.\nEvanti opammasaṁpaṭipādanaṁ.\nMunīti.\nMonaṁ vuccati ñāṇaṁ …pe… saṅgajālamaticca so muni.\nSantivādoti santivādo muni tāṇavādo leṇavādo saraṇavādo abhayavādo accutavādo amatavādo nibbānavādoti—\nevaṁ muni santivādo.\nAgiddhoti.\nGedho vuccati taṇhā.\nYo rāgo sārāgo …pe… abhijjhā lobho akusalamūlaṁ.\nYasseso gedho pahīno samucchinno vūpasanto paṭipassaddho abhabbuppattiko ñāṇagginā daḍḍho so vuccati agiddho.\nSo rūpe agiddho, sadde … gandhe … rase … phoṭṭhabbe … kule … gaṇe … āvāse … lābhe … yase … pasaṁsāya … sukhe … cīvare … piṇḍapāte … senāsane … gilānapaccayabhesajjaparikkhāre … kāmadhātuyā … rūpadhātuyā … arūpadhātuyā … kāmabhave … rūpabhave … arūpabhave … saññābhave … asaññābhave … nevasaññānāsaññābhave … ekavokārabhave … catuvokārabhave … pañcavokārabhave … atīte … anāgate … paccuppanne … diṭṭhasutamutaviññātabbesu dhammesu agiddho agadhito amucchito anajjhosanno, vītagedho vigatagedho cattagedho vantagedho muttagedho pahīnagedho paṭinissaṭṭhagedho, vītarāgo vigatarāgo cattarāgo vantarāgo muttarāgo pahīnarāgo paṭinissaṭṭharāgo, nicchāto nibbuto sītibhūto sukhappaṭisaṁvedī brahmabhūtena attanā viharatīti—\nevaṁ muni santivādo agiddho."}},{"id":"mnd9:99","sourceIds":["mnd9:99.1","mnd9:99.2","mnd9:99.3","mnd9:99.4","mnd9:99.5","mnd9:99.6","mnd9:99.7","mnd9:99.8","mnd9:99.9","mnd9:99.10","mnd9:99.11","mnd9:99.12"],"kind":"text","text":{"pi":"Kāme ca loke ca anūpalittoti.\nKāmāti udānato dve kāmā—\nvatthukāmā ca kilesakāmā ca …pe…\nime vuccanti vatthukāmā …pe…\nime vuccanti kilesakāmā.\nLoketi apāyaloke manussaloke devaloke khandhaloke dhātuloke āyatanaloke.\nLepāti dve lepā—\ntaṇhālepo ca diṭṭhilepo ca …pe…\nayaṁ taṇhālepo …pe…\nayaṁ diṭṭhilepo.\nMuni taṇhālepaṁ pahāya diṭṭhilepaṁ paṭinissajjitvā kāme ca loke ca na limpati na palimpati na upalimpati, alitto apalitto anupalitto nikkhanto nissaṭo vippamutto visaññutto vimariyādikatena cetasā viharatīti—\nevaṁ munī santivādo agiddho, kāme ca loke ca anūpalitto."}},{"id":"mnd9:100","sourceIds":["mnd9:100.1"],"kind":"text","text":{"pi":"Tenāha bhagavā—"}},{"id":"mnd9:101","sourceIds":["mnd9:101.1","mnd9:101.2","mnd9:101.3","mnd9:101.4","mnd9:101.5","mnd9:101.6"],"kind":"text","text":{"pi":"“Yehi vivitto vicareyya loke,\nNa tāni uggayha vadeyya nāgo;\nElambujaṁ kaṇḍakavārijaṁ yathā,\nJalena paṅkena canūpalittaṁ;\nEvaṁ munī santivādo agiddho,\nKāme ca loke ca anūpalitto”ti."}},{"id":"mnd9:102","sourceIds":["mnd9:102.1","mnd9:102.2","mnd9:102.3","mnd9:102.4"],"kind":"text","text":{"pi":"Na vedagū diṭṭhiyāyako na mutiyā,\nSa mānameti na hi tammayo so;\nNa kammunā nopi sutena neyyo,\nAnūpanīto sa nivesanesu."}},{"id":"mnd9:103","sourceIds":["mnd9:103.1","mnd9:103.2","mnd9:103.3","mnd9:103.4","mnd9:103.5"],"kind":"text","text":{"pi":"Na vedagū diṭṭhiyāyako na mutiyā, sa mānametīti.\nNāti paṭikkhepo.\nVedagūti.\nVedo vuccati catūsu maggesu ñāṇaṁ, paññā paññindriyaṁ paññābalaṁ dhammavicayasambojjhaṅgo vīmaṁsā vipassanā sammādiṭṭhi.\nTehi vedehi jātijarāmaraṇassa antagato antappatto, koṭigato koṭippatto, pariyantagato pariyantappatto, vosānagato vosānappatto, tāṇagato tāṇappatto, leṇagato leṇappatto, saraṇagato saraṇappatto, abhayagato abhayappatto, accutagato accutappatto, amatagato amatappatto, nibbānagato nibbānappatto, vedānaṁ vā antaṁ gatoti vedagū, vedehi vā antaṁ gatoti vedagū, sattannaṁ vā dhammānaṁ viditattā vedagū, sakkāyadiṭṭhi viditā hoti, vicikicchā viditā hoti, sīlabbataparāmāso vidito hoti, rāgo vidito hoti, doso vidito hoti, moho vidito hoti, māno vidito hoti, viditāssa honti pāpakā akusalā dhammā saṅkilesikā ponobhavikā sadarā dukkhavipākā āyatiṁ jātijarāmaraṇiyā."}},{"id":"mnd9:104","sourceIds":["mnd9:104.1","mnd9:104.2","mnd9:104.3","mnd9:104.4","mnd9:104.5"],"kind":"text","text":{"pi":"Vedāni viceyya kevalāni,\n(sabhiyāti bhagavā)\nSamaṇānaṁ yānīdhatthi brāhmaṇānaṁ;\nSabbavedanāsu vītarāgo,\nSabbaṁ vedamaticca vedagū soti."}},{"id":"mnd9:105","sourceIds":["mnd9:105.1","mnd9:105.2","mnd9:105.3","mnd9:105.4","mnd9:105.5"],"kind":"text","text":{"pi":"Na diṭṭhiyāti tassa dvāsaṭṭhi diṭṭhigatāni pahīnāni samucchinnāni vūpasantāni paṭipassaddhāni abhabbuppattikāni ñāṇagginā daḍḍhāni.\nSo diṭṭhiyā na yāyati na nīyati na vuyhati na saṁharīyati, napi taṁ diṭṭhigataṁ sārato pacceti na paccāgacchatīti—\nna vedagū diṭṭhiyā.\nNa mutiyāti mutarūpena vā parato ghosena vā mahājanasammutiyā vā mānaṁ neti na upeti na upagacchati na gaṇhāti na parāmasati nābhinivisatīti—\nna vedagū diṭṭhiyāyako na mutiyā sa mānameti."}},{"id":"mnd9:106","sourceIds":["mnd9:106.1","mnd9:106.2","mnd9:106.3"],"kind":"text","text":{"pi":"Na hi tammayo soti na taṇhāvasena diṭṭhivasena tammayo hoti tapparamo tapparāyaṇo.\nYato taṇhā ca diṭṭhi ca māno cassa pahīnā honti ucchinnamūlā tālāvatthukatā anabhāvaṅkatā āyatiṁ anuppādadhammā ettāvatā na tammayo hoti na tapparamo na tapparāyaṇoti—\nsa mānameti na hi tammayo so."}},{"id":"mnd9:107","sourceIds":["mnd9:107.1","mnd9:107.2","mnd9:107.3","mnd9:107.4","mnd9:107.5"],"kind":"text","text":{"pi":"Na kammunā nopi sutena neyyoti.\nNa kammunāti puññābhisaṅkhārena vā apuññābhisaṅkhārena vā āneñjābhisaṅkhārena vā na yāyati na nīyati na vuyhati na saṁharīyatīti—\nna kammunā.\nNopi sutena neyyoti sutasuddhiyā vā parato ghosena vā mahājanasammutiyā vā na yāyati na nīyati na vuyhati na saṁharīyatīti—\nna kammunā nopi sutena neyyo."}},{"id":"mnd9:108","sourceIds":["mnd9:108.1","mnd9:108.2","mnd9:108.3","mnd9:108.4","mnd9:108.5","mnd9:108.6","mnd9:108.7","mnd9:108.8"],"kind":"text","text":{"pi":"Anūpanīto sa nivesanesūti.\nUpayāti dve upayā—\ntaṇhūpayo ca diṭṭhūpayo ca …pe…\nayaṁ taṇhūpayo …pe…\nayaṁ diṭṭhūpayo.\nTassa taṇhūpayo pahīno, diṭṭhūpayo paṭinissaṭṭho.\nTaṇhūpayassa pahīnattā, diṭṭhūpayassa paṭinissaṭṭhattā so nivesanesu anūpanīto anupalitto anupagato anajjhosito anadhimutto nikkhanto nissaṭo vippamutto visaññutto vimariyādikatena cetasā viharatīti—\nanūpanīto sa nivesanesu."}},{"id":"mnd9:109","sourceIds":["mnd9:109.1"],"kind":"text","text":{"pi":"Tenāha bhagavā—"}},{"id":"mnd9:110","sourceIds":["mnd9:110.1","mnd9:110.2","mnd9:110.3","mnd9:110.4"],"kind":"text","text":{"pi":"“Na vedagū diṭṭhiyāyako na mutiyā,\nSa mānameti na hi tammayo so;\nNa kammunā nopi sutena neyyo,\nAnūpanīto sa nivesanesū”ti."}},{"id":"mnd9:111","sourceIds":["mnd9:111.1","mnd9:111.2","mnd9:111.3","mnd9:111.4"],"kind":"text","text":{"pi":"Saññāvirattassa na santi ganthā,\nPaññāvimuttassa na santi mohā;\nSaññañca diṭṭhiñca ye aggahesuṁ,\nTe ghaṭṭayantā vicaranti loke."}},{"id":"mnd9:112","sourceIds":["mnd9:112.1","mnd9:112.2","mnd9:112.3"],"kind":"text","text":{"pi":"Saññāvirattassa na santi ganthāti.\nYo samathapubbaṅgamaṁ ariyamaggaṁ bhāveti tassa ādito upādāya ganthā vikkhambhitā honti, arahatte patte arahato ganthā ca mohā ca nīvaraṇā ca kāmasaññā byāpādasaññā vihiṁsāsaññā diṭṭhisaññā ca pahīnā honti ucchinnamūlā tālāvatthukatā anabhāvaṅkatā āyatiṁ anuppādadhammāti—\nsaññāvirattassa na santi ganthā."}},{"id":"mnd9:113","sourceIds":["mnd9:113.1","mnd9:113.2","mnd9:113.3"],"kind":"text","text":{"pi":"Paññāvimuttassa na santi mohāti.\nYo vipassanāpubbaṅgamaṁ ariyamaggaṁ bhāveti, tassa ādito upādāya mohā vikkhambhitā honti, arahatte patte arahato mohā ca ganthā ca nīvaraṇā ca kāmasaññā byāpādasaññā vihiṁsāsaññā diṭṭhisaññā ca pahīnā honti ucchinnamūlā tālāvatthukatā anabhāvaṅkatā āyatiṁ anuppādadhammāti—\npaññāvimuttassa na santi mohā."}},{"id":"mnd9:114","sourceIds":["mnd9:114.1","mnd9:114.2","mnd9:114.3","mnd9:114.4","mnd9:114.5","mnd9:114.6","mnd9:114.7"],"kind":"text","text":{"pi":"Saññañca diṭṭhiñca ye aggahesuṁ, te ghaṭṭayantā vicaranti loketi.\nYe saññaṁ gaṇhanti kāmasaññaṁ byāpādasaññaṁ vihiṁsāsaññaṁ te saññāvasena ghaṭṭenti saṅghaṭṭenti.\nRājānopi rājūhi vivadanti, khattiyāpi khattiyehi vivadanti, brāhmaṇāpi brāhmaṇehi vivadanti, gahapatīpi gahapatīhi vivadanti, mātāpi puttena vivadati, puttopi mātarā vivadati, pitāpi puttena vivadati, puttopi pitarā vivadati, bhātāpi bhātarā vivadati, bhaginīpi bhaginiyā vivadati, bhātāpi bhaginiyā vivadati, bhaginīpi bhātarā vivadati, sahāyopi sahāyena vivadati.\nTe tattha kalahaviggahavivādamāpannā aññamaññaṁ pāṇīhipi upakkamanti, leḍḍūhipi upakkamanti, daṇḍehipi upakkamanti, satthehipi upakkamanti.\nTe tattha maraṇampi nigacchanti maraṇamattampi dukkhaṁ.\nYe diṭṭhiṁ gaṇhanti “sassato loko”ti vā …pe…\n“neva hoti na na hoti tathāgato paraṁ maraṇā”ti vā te diṭṭhivasena ghaṭṭenti saṅghaṭṭenti, satthārato satthāraṁ ghaṭṭenti, dhammakkhānato dhammakkhānaṁ ghaṭṭenti, gaṇato gaṇaṁ ghaṭṭenti, diṭṭhiyā diṭṭhiṁ ghaṭṭenti, paṭipadāya paṭipadaṁ ghaṭṭenti, maggato maggaṁ ghaṭṭenti."}},{"id":"mnd9:115","sourceIds":["mnd9:115.1","mnd9:115.2","mnd9:115.3","mnd9:115.4","mnd9:115.5","mnd9:115.6","mnd9:115.7"],"kind":"text","text":{"pi":"Atha vā te vivadanti, kalahaṁ karonti, bhaṇḍanaṁ karonti, viggahaṁ karonti, vivādaṁ karonti, medhagaṁ karonti—\n“na tvaṁ imaṁ dhammavinayaṁ ājānāsi …pe…\nnibbeṭhehi vā sace pahosī”ti.\nTesaṁ abhisaṅkhārā appahīnā;\nabhisaṅkhārānaṁ appahīnattā gatiyā ghaṭṭenti, niraye ghaṭṭenti, tiracchānayoniyā ghaṭṭenti, pettivisaye ghaṭṭenti, manussaloke ghaṭṭenti, devaloke ghaṭṭenti, gatiyā gatiṁ … upapattiyā upapattiṁ … paṭisandhiyā paṭisandhiṁ … bhavena bhavaṁ … saṁsārena saṁsāraṁ … vaṭṭena vaṭṭaṁ ghaṭṭenti saṅghaṭṭenti vadanti vicaranti viharanti iriyanti vattenti pālenti yapenti yāpenti.\nLoketi apāyaloke …pe… āyatanaloketi—\nsaññañca diṭṭhiñca ye aggahesuṁ te ghaṭṭayantā vicaranti loke."}},{"id":"mnd9:116","sourceIds":["mnd9:116.1"],"kind":"text","text":{"pi":"Tenāha bhagavā—"}},{"id":"mnd9:117","sourceIds":["mnd9:117.1","mnd9:117.2","mnd9:117.3","mnd9:117.4"],"kind":"text","text":{"pi":"“Saññāvirattassa na santi ganthā,\nPaññāvimuttassa na santi mohā;\nSaññañca diṭṭhiñca ye aggahesuṁ,\nTe ghaṭṭayantā vicaranti loke”ti."}},{"id":"mnd9:118","sourceIds":["mnd9:118.1"],"kind":"text","text":{"pi":"Māgaṇḍiyasuttaniddeso navamo."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/mnd9/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}