{"id":"ne10","title":"Āvaṭṭahāravibhaṅga","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ne10","title":"Āvaṭṭahāravibhaṅga","units":[{"id":"ne10:0","sourceIds":["ne10:0.1","ne10:0.2","ne10:0.3","ne10:0.4"],"kind":"text","text":{"pi":"Netti\nPaṭiniddesavāra\nVibhaṅga 7\nĀvaṭṭahāravibhaṅga"}},{"id":"ne10:1","sourceIds":["ne10:1.1","ne10:1.2"],"kind":"text","text":{"pi":"Tattha katamo āvaṭṭo hāro?\n“Ekamhi padaṭṭhāne”ti ayaṁ."}},{"id":"ne10:2","sourceIds":["ne10:2.1","ne10:2.2","ne10:2.3","ne10:2.4"],"kind":"text","text":{"pi":"“Ārambhatha nikkamatha,\nYuñjatha buddhasāsane;\nDhunātha maccuno senaṁ,\nNaḷāgāraṁva kuñjaro”ti."}},{"id":"ne10:3","sourceIds":["ne10:3.1","ne10:3.2","ne10:3.3","ne10:3.4","ne10:3.5","ne10:3.6","ne10:3.7"],"kind":"text","text":{"pi":"“Ārambhatha nikkamathā”ti vīriyassa padaṭṭhānaṁ.\n“Yuñjatha buddhasāsane”ti samādhissa padaṭṭhānaṁ.\n“Dhunātha maccuno senaṁ, naḷāgāraṁva kuñjaro”ti paññāya padaṭṭhānaṁ.\n“Ārambhatha nikkamathā”ti vīriyindriyassa padaṭṭhānaṁ.\n“Yuñjatha buddhasāsane”ti samādhindriyassa padaṭṭhānaṁ.\n“Dhunātha maccuno senaṁ, naḷāgāraṁva kuñjaro”ti paññindriyassa padaṭṭhānaṁ.\nImāni padaṭṭhānāni desanā."}},{"id":"ne10:4","sourceIds":["ne10:4.1"],"kind":"text","text":{"pi":"Ayuñjantānaṁ vā sattānaṁ yoge, yuñjantānaṁ vā ārambho."}},{"id":"ne10:5","sourceIds":["ne10:5.1","ne10:5.2","ne10:5.3","ne10:5.4","ne10:5.5","ne10:5.6","ne10:5.7","ne10:5.8","ne10:5.9","ne10:5.10","ne10:5.11","ne10:5.12","ne10:5.13","ne10:5.14","ne10:5.15"],"kind":"text","text":{"pi":"Tattha ye na yuñjanti, te pamādamūlakā na yuñjanti.\nSo pamādo duvidho taṇhāmūlako avijjāmūlako ca.\nTattha avijjāmūlako yena aññāṇena nivuto ñeyyaṭṭhānaṁ nappajānāti pañcakkhandhā uppādavayadhammāti, ayaṁ avijjāmūlako.\nYo taṇhāmūlako, so tividho anuppannānaṁ bhogānaṁ uppādāya pariyesanto pamādaṁ āpajjati, uppannānaṁ bhogānaṁ ārakkhanimittaṁ paribhoganimittañca pamādaṁ āpajjati ayaṁ loke catubbidho pamādo ekavidho avijjāya tividho taṇhāya.\nTattha avijjāya nāmakāyo padaṭṭhānaṁ.\nTaṇhāya rūpakāyo padaṭṭhānaṁ.\nTaṁ kissa hetu, rūpīsu bhavesu ajjhosānaṁ, arūpīsu sammoho?\nTattha rūpakāyo rūpakkhandho nāmakāyo cattāro arūpino khandhā.\nIme pañcakkhandhā katamena upādānena saupādānā, taṇhāya ca avijjāya ca?\nTattha taṇhā dve upādānāni kāmupādānañca sīlabbatupādānañca.\nAvijjā dve upādānāni diṭṭhupādānañca attavādupādānañca.\nImehi catūhi upādānehi ye saupādānā khandhā, idaṁ dukkhaṁ.\nCattāri upādānāni, ayaṁ samudayo.\nPañcakkhandhā dukkhaṁ.\nTesaṁ bhagavā pariññāya pahānāya ca dhammaṁ deseti dukkhassa pariññāya samudayassa pahānāya."}},{"id":"ne10:6","sourceIds":["ne10:6.1"],"kind":"text","text":{"pi":"Tattha yo tividho taṇhāmūlako pamādo anuppannānaṁ bhogānaṁ uppādāya pariyesati, uppannānaṁ bhogānaṁ ārakkhaṇañca karoti paribhoganimittañca, tassa sampaṭivedhena rakkhaṇā paṭisaṁharaṇā, ayaṁ samatho."}},{"id":"ne10:7","sourceIds":["ne10:7.1","ne10:7.2","ne10:7.3","ne10:7.4","ne10:7.5","ne10:7.6","ne10:7.7","ne10:7.8","ne10:7.9","ne10:7.10"],"kind":"text","text":{"pi":"So kathaṁ bhavati?\nYadā jānāti kāmānaṁ assādañca assādato ādīnavañca ādīnavato nissaraṇañca nissaraṇato okārañca saṅkilesañca vodānañca nekkhamme ca ānisaṁsaṁ.\nTattha yā vīmaṁsā upaparikkhā ayaṁ vipassanā.\nIme dve dhammā bhāvanāpāripūriṁ gacchanti samatho ca vipassanā ca.\nImesu dvīsu dhammesu bhāviyamānesu dve dhammā pahīyanti taṇhā ca avijjā ca, imesu dvīsu dhammesu pahīnesu cattāri upādānāni nirujjhanti.\nUpādānanirodhā bhavanirodho, bhavanirodhā jātinirodho, jātinirodhā jarāmaraṇaṁ sokaparidevadukkhadomanassupāyāsā nirujjhanti.\nEvametassa kevalassa dukkhakkhandhassa nirodho hoti.\nIti purimakāni ca dve saccāni dukkhaṁ samudayo ca, samatho ca vipassanā ca maggo.\nBhavanirodho nibbānaṁ imāni cattāri saccāni.\nTenāha bhagavā “ārambhatha nikkamathā”ti."}},{"id":"ne10:8","sourceIds":["ne10:8.1","ne10:8.2","ne10:8.3","ne10:8.4"],"kind":"text","text":{"pi":"“Yathāpi mūle anupaddave daḷhe,\nChinnopi rukkho punareva rūhati;\nEvampi taṇhānusaye anūhate,\nNibbattatī dukkhamidaṁ punappunaṁ”."}},{"id":"ne10:9","sourceIds":["ne10:9.1","ne10:9.2","ne10:9.3","ne10:9.4","ne10:9.5","ne10:9.6","ne10:9.7","ne10:9.8","ne10:9.9","ne10:9.10"],"kind":"text","text":{"pi":"Ayaṁ taṇhānusayo.\nKatamassā taṇhāya?\nBhavataṇhāya.\nYo etassa dhammassa paccayo ayaṁ avijjā.\nAvijjāpaccayā hi bhavataṇhā.\nIme dve kilesā taṇhā ca avijjā ca.\nTāni cattāri upādānāni tehi catūhi upādānehi ye saupādānā khandhā, idaṁ dukkhaṁ.\nCattāri upādānāni ayaṁ samudayo.\nPañcakkhandhā dukkhaṁ.\nTesaṁ bhagavā pariññāya ca pahānāya ca dhammaṁ deseti dukkhassa pariññāya samudayassa pahānāya."}},{"id":"ne10:10","sourceIds":["ne10:10.1","ne10:10.2","ne10:10.3","ne10:10.4","ne10:10.5","ne10:10.6","ne10:10.7"],"kind":"text","text":{"pi":"Yena taṇhānusayaṁ samūhanati, ayaṁ samatho.\nYena taṇhānusayassa paccayaṁ avijjaṁ vārayati, ayaṁ vipassanā.\nIme dve dhammā bhāvanāpāripūriṁ gacchanti samatho ca vipassanā ca.\nTattha samathassa phalaṁ rāgavirāgā cetovimutti, vipassanāya phalaṁ avijjāvirāgā paññāvimutti.\nIti purimakāni ca dve saccāni dukkhaṁ samudayo ca, samatho vipassanā ca maggo, dve ca vimuttiyo nirodho.\nImāni cattāri saccāni.\nTenāha bhagavā “yathāpi mūle”ti."}},{"id":"ne10:11","sourceIds":["ne10:11.1","ne10:11.2","ne10:11.3","ne10:11.4"],"kind":"text","text":{"pi":"“Sabbapāpassa akaraṇaṁ,\nkusalassa upasampadā;\nSacittapariyodāpanaṁ,\netaṁ buddhāna sāsanan”ti."}},{"id":"ne10:12","sourceIds":["ne10:12.1","ne10:12.2","ne10:12.3","ne10:12.4","ne10:12.5","ne10:12.6","ne10:12.7","ne10:12.8","ne10:12.9"],"kind":"text","text":{"pi":"Sabbapāpaṁ nāma tīṇi duccaritāni kāyaduccaritaṁ vacīduccaritaṁ manoduccaritaṁ, te dasa akusalakammapathā pāṇātipāto adinnādānaṁ kāmesumicchācāro musāvādo pisuṇā vācā pharusā vācā samphappalāpo abhijjhā byāpādo micchādiṭṭhi, tāni dve kammāni cetanā cetasikañca.\nTattha yo ca pāṇātipāto yā ca pisuṇā vācā yā ca pharusā vācā, idaṁ dosasamuṭṭhānaṁ.\nYañca adinnādānaṁ yo ca kāmesumicchācāro yo ca musāvādo, idaṁ lobhasamuṭṭhānaṁ, yo samphappalāpo, idaṁ mohasamuṭṭhānaṁ.\nImāni satta kāraṇāni cetanākammaṁ.\nYā abhijjhā, ayaṁ lobho akusalamūlaṁ.\nYo byāpādo, ayaṁ doso akusalamūlaṁ.\nYā micchādiṭṭhi, ayaṁ micchāmaggo.\nImāni tīṇi kāraṇāni cetasikakammaṁ.\nTenāha “cetanākammaṁ cetasikakamman”ti."}},{"id":"ne10:13","sourceIds":["ne10:13.1","ne10:13.2","ne10:13.3","ne10:13.4","ne10:13.5","ne10:13.6","ne10:13.7","ne10:13.8","ne10:13.9","ne10:13.10","ne10:13.11"],"kind":"text","text":{"pi":"Akusalamūlaṁ payogaṁ gacchantaṁ catubbidhaṁ agatiṁ gacchati chandā dosā bhayā mohā.\nTattha yaṁ chandā agatiṁ gacchati, idaṁ lobhasamuṭṭhānaṁ.\nYaṁ dosā agatiṁ gacchati, idaṁ dosasamuṭṭhānaṁ.\nYaṁ bhayā ca mohā ca agatiṁ gacchati, idaṁ mohasamuṭṭhānaṁ.\nTattha lobho asubhāya pahīyati.\nDoso mettāya.\nMoho paññāya.\nTathā lobho upekkhāya pahīyati.\nDoso mettāya ca karuṇāya ca.\nMoho muditāya pahānaṁ abbhatthaṁ gacchati.\nTenāha bhagavā “sabbapāpassa akaraṇan”ti."}},{"id":"ne10:14","sourceIds":["ne10:14.1","ne10:14.2"],"kind":"text","text":{"pi":"Sabbapāpaṁ nāma aṭṭha micchattāni micchādiṭṭhi micchāsaṅkappo micchāvācā micchākammanto micchāājīvo micchāvāyāmo micchāsati micchāsamādhi, idaṁ vuccati sabbapāpaṁ.\nImesaṁ aṭṭhannaṁ micchattānaṁ yā akiriyā akaraṇaṁ anajjhācāro, idaṁ vuccati sabbapāpassa akaraṇaṁ."}},{"id":"ne10:15","sourceIds":["ne10:15.1","ne10:15.2","ne10:15.3","ne10:15.4","ne10:15.5","ne10:15.6","ne10:15.7","ne10:15.8","ne10:15.9","ne10:15.10","ne10:15.11"],"kind":"text","text":{"pi":"Aṭṭhasu micchattesu pahīnesu aṭṭha sammattāni sampajjanti.\nAṭṭhannaṁ sammattānaṁ yā kiriyā karaṇaṁ sampādanaṁ, ayaṁ vuccati kusalassa upasampadā.\nSacittapariyodāpananti atītassa maggassa bhāvanākiriyaṁ dassayati, citte pariyodāpite pañcakkhandhā pariyodāpitā bhavanti, evañhi bhagavā āha—\n“cetovisuddhatthaṁ, bhikkhave, tathāgate brahmacariyaṁ vussatī”ti.\nDuvidhā hi pariyodāpanā nīvaraṇappahānañca anusayasamugghāto ca.\nDve pariyodāpanabhūmiyo dassanabhūmi ca, bhāvanābhūmi ca, tattha yaṁ paṭivedhena pariyodāpeti, idaṁ dukkhaṁ.\nYato pariyodāpeti, ayaṁ samudayo.\nYena pariyodāpeti, ayaṁ maggo.\nYaṁ pariyodāpitaṁ, ayaṁ nirodho.\nImāni cattāri saccāni.\nTenāha bhagavā “sabbapāpassa akaraṇan”ti."}},{"id":"ne10:16","sourceIds":["ne10:16.1","ne10:16.2","ne10:16.3","ne10:16.4"],"kind":"text","text":{"pi":"“Dhammo have rakkhati dhammacāriṁ,\nChattaṁ mahantaṁ yatha vassakāle;\nEsānisaṁso dhamme suciṇṇe,\nNa duggatiṁ gacchati dhammacārī”ti."}},{"id":"ne10:17","sourceIds":["ne10:17.1","ne10:17.2","ne10:17.3","ne10:17.4","ne10:17.5","ne10:17.6"],"kind":"text","text":{"pi":"Dhammo nāma duvidho indriyasaṁvaro maggo ca.\nDuggati nāma duvidhā devamanusse vā upanidhāya apāyā duggati, nibbānaṁ vā upanidhāya sabbā upapattiyo duggati.\nTattha yā saṁvarasīle akhaṇḍakāritā, ayaṁ dhammo suciṇṇo apāyehi rakkhati.\nEvaṁ bhagavā āha—\n“dvemā, bhikkhave, sīlavato gatiyo devā ca manussā ca”.\nEvañca nāḷandāyaṁ nigame asibandhakaputto gāmaṇi bhagavantaṁ etadavoca—"}},{"id":"ne10:18","sourceIds":["ne10:18.1","ne10:18.2"],"kind":"text","text":{"pi":"“Brāhmaṇā, bhante, pacchābhūmakā kāmaṇḍalukā sevālamālikā udakorohakā aggiparicārakā, te mataṁ kālaṅkataṁ uyyāpenti nāma, saññāpenti nāma, saggaṁ nāma okkāmenti.\nBhagavā pana, bhante, arahaṁ sammāsambuddho pahoti tathā kātuṁ, yathā sabbo loko kāyassa bhedā paraṁ maraṇā sugatiṁ saggaṁ lokaṁ upapajjeyyā”ti."}},{"id":"ne10:19","sourceIds":["ne10:19.1"],"kind":"text","text":{"pi":"“Tena hi, gāmaṇi, taññevettha paṭipucchissāmi, yathā te khameyya, tathā naṁ byākareyyāsīti."}},{"id":"ne10:20","sourceIds":["ne10:20.1","ne10:20.2","ne10:20.3"],"kind":"text","text":{"pi":"Taṁ kiṁ maññasi, gāmaṇi, idhassa puriso pāṇātipātī adinnādāyī kāmesumicchācārī musāvādī pisuṇavāco pharusavāco samphappalāpī abhijjhālu byāpannacitto micchādiṭṭhiko, tamenaṁ mahā janakāyo saṅgamma samāgamma āyāceyya thomeyya pañjaliko anuparisakkeyya ‘ayaṁ puriso kāyassa bhedā paraṁ maraṇā sugatiṁ saggaṁ lokaṁ upapajjatū’ti.\nTaṁ kiṁ maññasi, gāmaṇi, api nu so puriso mahato janakāyassa āyācanahetu vā thomanahetuvā pañjalikaṁ anuparisakkanahetu vā kāyassa bhedā paraṁ maraṇā sugatiṁ saggaṁ lokaṁ upapajjeyyā”ti.\n“No hetaṁ, bhante”."}},{"id":"ne10:21","sourceIds":["ne10:21.1","ne10:21.2","ne10:21.3","ne10:21.4","ne10:21.5","ne10:21.6"],"kind":"text","text":{"pi":"“Seyyathāpi, gāmaṇi, puriso mahatiṁ puthusilaṁ gambhīre udakarahade pakkhipeyya, tamenaṁ mahā janakāyo saṅgamma samāgamma āyāceyya thomeyya pañjaliko anuparisakkeyya ‘ummujja, bho, puthusile, uplava bho puthusile, thalamuplava, bho puthusile’ti.\nTaṁ kiṁ maññasi, gāmaṇi, api nu sā mahatī puthusilā mahato janakāyassa āyācanahetu vā thomanahetu vā pañjalikaṁ anuparisakkanahetu vā ummujjeyya vā uplaveyya vā thalaṁ vā uplaveyyā”ti.\n“No hetaṁ, bhante”.\n“Evameva kho, gāmaṇi, yo so puriso pāṇātipātī …pe…\nmicchādiṭṭhiko, kiñcāpi naṁ mahā janakāyo saṅgamma samāgamma āyāceyya thomeyya pañjaliko anuparisakkeyya ‘ayaṁ puriso kāyassa bhedā paraṁ maraṇā sugatiṁ saggaṁ lokaṁ upapajjatū’ti.\nAtha kho so puriso kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjeyya."}},{"id":"ne10:22","sourceIds":["ne10:22.1","ne10:22.2","ne10:22.3"],"kind":"text","text":{"pi":"Taṁ kiṁ maññasi, gāmaṇi, idhassa puriso pāṇātipātā paṭivirato adinnādānā paṭivirato kāmesumicchācārā paṭivirato musāvādā paṭivirato pisuṇāya vācāya paṭivirato pharusāya vācāya paṭivirato samphappalāpā paṭivirato anabhijjhālu abyāpannacitto sammādiṭṭhiko, tamenaṁ mahā janakāyo saṅgamma samāgamma āyāceyya thomeyya pañjaliko anuparisakkeyya ‘ayaṁ puriso kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjatū’ti.\nTaṁ kiṁ maññasi, gāmaṇi, api nu so puriso mahato janakāyassa āyācanahetu vā thomanahetu vā pañjalikaṁ anuparisakkanahetu vā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjeyyā”ti.\n“No hetaṁ, bhante”."}},{"id":"ne10:23","sourceIds":["ne10:23.1","ne10:23.2","ne10:23.3","ne10:23.4","ne10:23.5","ne10:23.6"],"kind":"text","text":{"pi":"“Seyyathāpi, gāmaṇi, puriso sappikumbhaṁ vā telakumbhaṁ vā gambhīre udakarahade ogāhetvā bhindeyya.\nTatra yāssa sakkharakaṭhalaṁ, sā adhogāmī assa.\nYañca khvassa tatra sappi vā telaṁ vā, taṁ uddhaṅgāmi assa.\nTamenaṁ mahā janakāyo saṅgamma samāgamma āyāceyya thomeyya pañjaliko anuparisakkeyya ‘osīda, bho sappitela, saṁsīda, bho sappitela, adho gaccha, bho sappitelā’ti.\nTaṁ kiṁ maññasi gāmaṇi, api nu taṁ sappitelaṁ mahato janakāyassa āyācanahetu vā thomanahetu vā pañjalikaṁ anuparisakkanahetu vā ‘osīdeyya vā saṁsīdeyya vā adho vā gaccheyyā’”ti.\n“No hetaṁ, bhante”."}},{"id":"ne10:24","sourceIds":["ne10:24.1","ne10:24.2","ne10:24.3","ne10:24.4","ne10:24.5","ne10:24.6"],"kind":"text","text":{"pi":"“Evameva kho, gāmaṇi, yo so puriso pāṇātipātā paṭivirato …pe…\nsammādiṭṭhiko, kiñcāpi naṁ mahā janakāyo saṅgamma samāgamma āyāceyya thomeyya pañjaliko anuparisakkeyya ‘ayaṁ puriso kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjatū’”ti.\nAtha kho so puriso kāyassa bhedā paraṁ maraṇā sugatiṁ saggaṁ lokaṁ upapajjeyya.\nIti dhammo suciṇṇo apāyehi rakkhati.\nTattha yā maggassa tikkhatā adhimattatā, ayaṁ dhammo suciṇṇo sabbāhi upapattīhi rakkhati.\nEvaṁ bhagavā āha—"}},{"id":"ne10:25","sourceIds":["ne10:25.1","ne10:25.2","ne10:25.3","ne10:25.4","ne10:25.5","ne10:25.6"],"kind":"text","text":{"pi":"“Tasmā rakkhitacittassa,\nsammāsaṅkappagocaro;\nSammādiṭṭhipurekkhāro,\nñatvāna udayabbayaṁ;\nThinamiddhābhibhū bhikkhu,\nsabbā duggatiyo jahe”ti."}},{"id":"ne10:26","sourceIds":["ne10:26.1","ne10:26.2","ne10:26.3","ne10:26.4","ne10:26.5","ne10:26.6","ne10:26.7","ne10:26.8","ne10:26.9","ne10:26.10","ne10:26.11"],"kind":"text","text":{"pi":"Tattha duggatīnaṁ hetu taṇhā ca avijjā ca, tāni cattāri upādānāni, tehi catūhi upādānehi ye saupādānā khandhā, idaṁ dukkhaṁ.\nCattāri upādānāni, ayaṁ samudayo.\nPañcakkhandhā dukkhaṁ, tesaṁ bhagavā pariññāya ca pahānāya ca dhammaṁ deseti dukkhassa pariññāya samudayassa pahānāya.\nTattha taṇhāya pañcindriyāni rūpīni padaṭṭhānaṁ.\nAvijjāya manindriyaṁ padaṭṭhānaṁ.\nPañcindriyāni rūpīni rakkhanto samādhiṁ bhāvayati, taṇhañca niggaṇhāti.\nManindriyaṁ rakkhanto vipassanaṁ bhāvayati, avijjañca niggaṇhāti.\nTaṇhāniggahena dve upādānāni pahīyanti kāmupādānañca sīlabbatupādānañca.\nAvijjāniggahena dve upādānāni pahīyanti diṭṭhupādānañca attavādupādānañca.\nCatūsu upādānesu pahīnesu dve dhammā bhāvanāpāripūriṁ gacchanti samatho ca vipassanā ca.\nIdaṁ vuccati brahmacariyanti."}},{"id":"ne10:27","sourceIds":["ne10:27.1","ne10:27.2","ne10:27.3","ne10:27.4","ne10:27.5","ne10:27.6"],"kind":"text","text":{"pi":"Tattha brahmacariyassa phalaṁ cattāri sāmaññaphalāni sotāpattiphalaṁ sakadāgāmiphalaṁ anāgāmiphalaṁ arahattaṁ aggaphalaṁ.\nImāni cattāri brahmacariyassa phalāni.\nIti purimakāni ca dve saccāni dukkhaṁ samudayo ca.\nSamatho ca vipassanā ca brahmacariyañca maggo, brahmacariyassa phalāni ca tadārammaṇā ca asaṅkhatādhātu nirodho.\nImāni cattāri saccāni.\nTenāha bhagavā “dhammo have rakkhatī”ti."}},{"id":"ne10:28","sourceIds":["ne10:28.1","ne10:28.2","ne10:28.3","ne10:28.4","ne10:28.5","ne10:28.6","ne10:28.7"],"kind":"text","text":{"pi":"Tattha yaṁ paṭivedhena rakkhati, idaṁ dukkhaṁ.\nYato rakkhati, ayaṁ samudayo.\nYena rakkhati, ayaṁ maggo.\nYaṁ rakkhati, ayaṁ nirodho.\nImāni cattāri saccāni.\nTenāha āyasmā mahākaccāyano “ekamhi padaṭṭhāne”ti.\nNiyutto āvaṭṭo hāro."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ne10/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}