{"id":"ne12","title":"Parivattanahāravibhaṅga","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ne12","title":"Parivattanahāravibhaṅga","units":[{"id":"ne12:0","sourceIds":["ne12:0.1","ne12:0.2","ne12:0.3","ne12:0.4"],"kind":"text","text":{"pi":"Netti\nPaṭiniddesavāra\nVibhaṅga 9\nParivattanahāravibhaṅga"}},{"id":"ne12:1","sourceIds":["ne12:1.1","ne12:1.2","ne12:1.3","ne12:1.4","ne12:1.5","ne12:1.6","ne12:1.7","ne12:1.8","ne12:1.9","ne12:1.10","ne12:1.11","ne12:1.12"],"kind":"text","text":{"pi":"Tattha katamo parivattano hāro?\n“Kusalākusale dhamme”ti.\nSammādiṭṭhissa purisapuggalassa micchādiṭṭhi nijjiṇṇā bhavati.\nYe cassa micchādiṭṭhipaccayā uppajjeyyuṁ aneke pāpakā akusalā dhammā, te cassa nijjiṇṇā honti.\nSammādiṭṭhipaccayā cassa aneke kusalā dhammā sambhavanti, te cassa bhāvanāpāripūriṁ gacchanti.\nSammāsaṅkappassa purisapuggalassa micchāsaṅkappo nijjiṇṇo bhavati.\nYe cassa micchāsaṅkappapaccayā uppajjeyyuṁ aneke pāpakā akusalā dhammā, te cassa nijjiṇṇā honti.\nSammāsaṅkappapaccayā cassa aneke kusalā dhammā sambhavanti.\nTe cassa bhāvanāpāripūriṁ gacchanti.\nEvaṁ sammāvācassa sammākammantassa sammāājīvassa sammāvāyāmassa sammāsatissa sammāsamādhissa sammāvimuttassa sammāvimuttiñāṇadassanassa purisapuggalassa micchāvimuttiñāṇadassanaṁ nijjiṇṇaṁ bhavati.\nYe cassa micchāvimuttiñāṇadassanapaccayā uppajjeyyuṁ aneke pāpakā akusalā dhammā, te cassa nijjiṇṇā honti.\nSammāvimuttiñāṇadassanapaccayā cassa aneke kusalā dhammā sambhavanti, te cassa bhāvanāpāripūriṁ gacchanti."}},{"id":"ne12:2","sourceIds":["ne12:2.1","ne12:2.2","ne12:2.3","ne12:2.4","ne12:2.5","ne12:2.6","ne12:2.7","ne12:2.8","ne12:2.9","ne12:2.10"],"kind":"text","text":{"pi":"Yassa vā pāṇātipātā paṭiviratassa pāṇātipāto pahīno hoti.\nAdinnādānā paṭiviratassa adinnādānaṁ pahīnaṁ hoti.\nBrahmacārissa abrahmacariyaṁ pahīnaṁ hoti.\nSaccavādissa musāvādo pahīno hoti.\nApisuṇavācassa pisuṇā vācā pahīnā hoti.\nSaṇhavācassa pharusā vācā pahīnā hoti.\nKālavādissa samphappalāpo pahīno hoti.\nAnabhijjhālussa abhijjhā pahīnā hoti.\nAbyāpannacittassa byāpādo pahīno hoti.\nSammādiṭṭhissa micchādiṭṭhi pahīnā hoti."}},{"id":"ne12:3","sourceIds":["ne12:3.1","ne12:3.2","ne12:3.3","ne12:3.4","ne12:3.5"],"kind":"text","text":{"pi":"Ye ca kho keci ariyaṁ aṭṭhaṅgikaṁ maggaṁ garahanti, nesaṁ sandiṭṭhikā sahadhammikā gārayhā vādānuvādā āgacchanti.\nSammādiṭṭhiñca te bhavanto dhammaṁ garahanti.\nTena hi ye micchādiṭṭhikā, tesaṁ bhavantānaṁ pujjā ca pāsaṁsā ca.\nEvaṁ sammāsaṅkappaṁ sammāvācaṁ sammākammantaṁ sammāājīvaṁ sammāvāyāmaṁ sammāsatiṁ sammāsamādhiṁ sammāvimuttiṁ sammāvimuttiñāṇadassanañca te bhavanto dhammaṁ garahanti.\nTena hi ye micchāvimuttiñāṇadassanā, tesaṁ bhavantānaṁ pujjā ca pāsaṁsā ca."}},{"id":"ne12:4","sourceIds":["ne12:4.1","ne12:4.2"],"kind":"text","text":{"pi":"Ye ca kho keci evamāhaṁsu “bhuñjitabbā kāmā, paribhuñjitabbā kāmā, āsevitabbā kāmā, nisevitabbā kāmā, bhāvayitabbā kāmā, bahulīkātabbā kāmā”ti.\nKāmehi veramaṇī tesaṁ adhammo."}},{"id":"ne12:5","sourceIds":["ne12:5.1","ne12:5.2","ne12:5.3","ne12:5.4","ne12:5.5","ne12:5.6","ne12:5.7","ne12:5.8","ne12:5.9","ne12:5.10","ne12:5.11"],"kind":"text","text":{"pi":"Ye vā pana keci evamāhaṁsu “attakilamathānuyogo dhammo”ti.\nNiyyāniko tesaṁ dhammo adhammo.\nYe ca kho keci evamāhaṁsu “dukkho dhammo”ti.\nSukho tesaṁ dhammo adhammo.\nYathā vā pana bhikkhuno sabbasaṅkhāresu asubhānupassino viharato subhasaññā pahīyanti.\nDukkhānupassino viharato sukhasaññā pahīyanti.\nAniccānupassino viharato niccasaññā pahīyanti.\nAnattānupassino viharato attasaññā pahīyanti.\nYaṁ yaṁ vā pana dhammaṁ rocayati vā upagacchati vā, tassa tassa dhammassa yo paṭipakkho, svassa aniṭṭhato ajjhāpanno bhavati.\nTenāha āyasmā mahākaccāyano “kusalākusaladhamme”ti.\nNiyutto parivattano hāro."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ne12/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}