{"id":"ne15","title":"Otaraṇahāravibhaṅga","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ne15","title":"Otaraṇahāravibhaṅga","units":[{"id":"ne15:0","sourceIds":["ne15:0.1","ne15:0.2","ne15:0.3","ne15:0.4"],"kind":"text","text":{"pi":"Netti\nPaṭiniddesavāra\nVibhaṅga 12\nOtaraṇahāravibhaṅga"}},{"id":"ne15:1","sourceIds":["ne15:1.1","ne15:1.2"],"kind":"text","text":{"pi":"Tattha katamo otaraṇo hāro?\n“Yo ca paṭiccuppādo”ti."}},{"id":"ne15:2","sourceIds":["ne15:2.1","ne15:2.2","ne15:2.3","ne15:2.4"],"kind":"text","text":{"pi":"“Uddhaṁ adho sabbadhi vippamutto,\nAyaṁ ahasmīti anānupassī;\nEvaṁ vimutto udatāri oghaṁ,\nAtiṇṇapubbaṁ apunabbhavāyā”ti."}},{"id":"ne15:3","sourceIds":["ne15:3.1","ne15:3.2","ne15:3.3","ne15:3.4"],"kind":"text","text":{"pi":"“Uddhan”ti rūpadhātu ca arūpadhātu ca.\n“Adho”ti kāmadhātu.\n“Sabbadhi vippamutto”ti tedhātuke ayaṁ asekkhāvimutti.\nTāniyeva asekkhāni pañcindriyāni, ayaṁ indriyehi otaraṇā."}},{"id":"ne15:4","sourceIds":["ne15:4.1","ne15:4.2","ne15:4.3"],"kind":"text","text":{"pi":"Tāniyeva asekkhāni pañcindriyāni vijjā, vijjuppādā avijjānirodho, avijjānirodhā saṅkhāranirodho, saṅkhāranirodhā viññāṇanirodho, viññāṇanirodhā nāmarūpanirodho, nāmarūpanirodhā saḷāyatananirodho, saḷāyatananirodhā phassanirodho, phassanirodhā vedanānirodho, vedanānirodhā taṇhānirodho, taṇhānirodhā upādānanirodho, upādānanirodhā bhavanirodho, bhavanirodhā jātinirodho, jātinirodhā jarāmaraṇaṁ sokaparidevadukkhadomanassupāyāsā nirujjhanti.\nEvametassa kevalassa dukkhakkhandhassa nirodho hoti.\nAyaṁ paṭiccasamuppādehi otaraṇā."}},{"id":"ne15:5","sourceIds":["ne15:5.1","ne15:5.2"],"kind":"text","text":{"pi":"Tāniyeva asekkhāni pañcindriyāni tīhi khandhehi saṅgahitāni—\nsīlakkhandhena samādhikkhandhena paññākkhandhena, ayaṁ khandhehi otaraṇā."}},{"id":"ne15:6","sourceIds":["ne15:6.1","ne15:6.2"],"kind":"text","text":{"pi":"Tāniyeva asekkhāni pañcindriyāni saṅkhārapariyāpannāni ye saṅkhārā anāsavā, no ca bhavaṅgā, te saṅkhārā dhammadhātusaṅgahitā.\nAyaṁ dhātūhi otaraṇā."}},{"id":"ne15:7","sourceIds":["ne15:7.1","ne15:7.2"],"kind":"text","text":{"pi":"Sā dhammadhātu dhammāyatanapariyāpannā, yaṁ āyatanaṁ anāsavaṁ, no ca bhavaṅgaṁ.\nAyaṁ āyatanehi otaraṇā."}},{"id":"ne15:8","sourceIds":["ne15:8.1","ne15:8.2"],"kind":"text","text":{"pi":"“Ayaṁ ahasmīti anānupassī”ti ayaṁ sakkāyadiṭṭhiyā samugghāto, sā sekkhāvimutti, tāniyeva sekkhāni pañcindriyāni.\nAyaṁ indriyehi otaraṇā."}},{"id":"ne15:9","sourceIds":["ne15:9.1","ne15:9.2"],"kind":"text","text":{"pi":"Tāniyeva sekkhāni pañcindriyāni vijjā, vijjuppādā avijjānirodho, avijjānirodhā saṅkhāranirodho, evaṁ sabbo paṭiccasamuppādo.\nAyaṁ paṭiccasamuppādehi otaraṇā."}},{"id":"ne15:10","sourceIds":["ne15:10.1","ne15:10.2"],"kind":"text","text":{"pi":"Sāyeva vijjā paññākkhandho.\nAyaṁ khandhehi otaraṇā."}},{"id":"ne15:11","sourceIds":["ne15:11.1"],"kind":"text","text":{"pi":"Sāyeva vijjā saṅkhārapariyāpannā, ye saṅkhārā anāsavā, no ca bhavaṅgā, te saṅkhārā dhammadhātusaṅgahitā, ayaṁ dhātūhi otaraṇā."}},{"id":"ne15:12","sourceIds":["ne15:12.1"],"kind":"text","text":{"pi":"Sā dhammadhātu dhammāyatanapariyāpannā, yaṁ āyatanaṁ anāsavaṁ, no ca bhavaṅgaṁ, ayaṁ āyatanehi otaraṇā."}},{"id":"ne15:13","sourceIds":["ne15:13.1","ne15:13.2"],"kind":"text","text":{"pi":"Sekkhāya ca vimuttiyā asekkhāya ca vimuttiyā vimutto udatāri oghaṁ atiṇṇapubbaṁ apunabbhavāya.\nTenāha bhagavā “uddhaṁ adho”ti."}},{"id":"ne15:14","sourceIds":["ne15:14.1"],"kind":"text","text":{"pi":"“Nissitassa calitaṁ, anissitassa calitaṁ natthi, calite asati passaddhi, passaddhiyā sati nati na hoti, natiyā asati āgatigati na hoti, āgatigatiyā asati cutūpapāto na hoti, cutūpapāte asati nevidha na huraṁ na ubhayamantarena esevanto dukkhassā”ti."}},{"id":"ne15:15","sourceIds":["ne15:15.1","ne15:15.2","ne15:15.3","ne15:15.4","ne15:15.5"],"kind":"text","text":{"pi":"“Nissitassa calitan”ti nissayo nāma duvidho taṇhānissayo ca diṭṭhinissayo ca.\nTattha yā rattassa cetanā, ayaṁ taṇhānissayo;\nyā mūḷhassa cetanā, ayaṁ diṭṭhinissayo.\nCetanā pana saṅkhārā, saṅkhārapaccayā viññāṇaṁ, viññāṇapaccayā nāmarūpaṁ, evaṁ sabbo paṭiccasamuppādo.\nAyaṁ paṭiccasamuppādehi otaraṇā."}},{"id":"ne15:16","sourceIds":["ne15:16.1","ne15:16.2","ne15:16.3"],"kind":"text","text":{"pi":"Tattha yā rattassa vedanā, ayaṁ sukhā vedanā.\nYā sammūḷhassa vedanā, ayaṁ adukkhamasukhā vedanā, imā dve vedanā vedanākkhandho.\nAyaṁ khandhehi otaraṇā."}},{"id":"ne15:17","sourceIds":["ne15:17.1","ne15:17.2"],"kind":"text","text":{"pi":"Tattha sukhā vedanā dve indriyāni sukhindriyaṁ somanassindriyañca, adukkhamasukhā vedanā upekkhindriyaṁ.\nAyaṁ indriyehi otaraṇā."}},{"id":"ne15:18","sourceIds":["ne15:18.1","ne15:18.2"],"kind":"text","text":{"pi":"Tāniyeva indriyāni saṅkhārapariyāpannāni, ye saṅkhārā sāsavā bhavaṅgā, te saṅkhārā dhammadhātusaṅgahitā.\nAyaṁ dhātūhi otaraṇā."}},{"id":"ne15:19","sourceIds":["ne15:19.1"],"kind":"text","text":{"pi":"Sā dhammadhātu dhammāyatanapariyāpannā, yaṁ āyatanaṁ sāsavaṁ bhavaṅgaṁ, ayaṁ āyatanehi otaraṇā."}},{"id":"ne15:20","sourceIds":["ne15:20.1","ne15:20.2","ne15:20.3"],"kind":"text","text":{"pi":"“Anissitassa calitaṁ natthī”ti samathavasena vā taṇhāya anissito vipassanāvasena vā diṭṭhiyā anissito.\nYā vipassanā ayaṁ vijjā, vijjuppādā avijjānirodho, avijjānirodhā saṅkhāranirodho, saṅkhāranirodhā viññāṇanirodho, evaṁ sabbo paṭiccasamuppādo.\nAyaṁ paṭiccasamuppādehi otaraṇā."}},{"id":"ne15:21","sourceIds":["ne15:21.1","ne15:21.2"],"kind":"text","text":{"pi":"Sāyeva vipassanā paññākkhandho.\nAyaṁ khandhehi otaraṇā."}},{"id":"ne15:22","sourceIds":["ne15:22.1","ne15:22.2","ne15:22.3"],"kind":"text","text":{"pi":"Sāyeva vipassanā dve indriyāni—\nvīriyindriyañca paññindriyañca.\nAyaṁ indriyehi otaraṇā."}},{"id":"ne15:23","sourceIds":["ne15:23.1","ne15:23.2"],"kind":"text","text":{"pi":"Sāyeva vipassanā saṅkhārapariyāpannā, ye saṅkhārā anāsavā, no ca bhavaṅgā, te saṅkhārā dhammadhātusaṅgahitā.\nAyaṁ dhātūhi otaraṇā."}},{"id":"ne15:24","sourceIds":["ne15:24.1","ne15:24.2"],"kind":"text","text":{"pi":"Sā dhammadhātu dhammāyatanapariyāpannā, yaṁ āyatanaṁ anāsavaṁ, no ca bhavaṅgaṁ.\nAyaṁ āyatanehi otaraṇā."}},{"id":"ne15:25","sourceIds":["ne15:25.1","ne15:25.2","ne15:25.3","ne15:25.4","ne15:25.5","ne15:25.6"],"kind":"text","text":{"pi":"“Passaddhiyā satī”ti duvidhā passaddhi kāyikā ca cetasikā ca.\nYaṁ kāyikaṁ sukhaṁ, ayaṁ kāyapassaddhi.\nYaṁ cetasikaṁ sukhaṁ, ayaṁ cetasikā passaddhi.\nPassaddhakāyo sukhaṁ vediyati, sukhino cittaṁ samādhiyati, samāhito yathābhūtaṁ pajānāti, yathābhūtaṁ pajānanto nibbindati, nibbindanto virajjati, virāgā vimuccati, vimuttasmiṁ “vimuttam”iti ñāṇaṁ hoti, “khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā”ti pajānāti.\nSo na namati rūpesu, na saddesu, na gandhesu, na rasesu, na phoṭṭhabbesu, na dhammesu khayā rāgassa khayā dosassa khayā mohassa yena rūpena tathāgataṁ tiṭṭhantaṁ carantaṁ paññāpayamāno paññāpeyya, tassa rūpassa khayā virāgā nirodhā cāgā paṭinissaggā rūpasaṅkhaye vimutto, tathāgato atthītipi na upeti, natthītipi na upeti, atthi natthītipi na upeti, nevatthi no natthītipi na upeti.\nAtha kho gambhīro appameyyo asaṅkheyyo nibbutotiyeva saṅkhaṁ gacchati khayā rāgassa, khayā dosassa, khayā mohassa."}},{"id":"ne15:26","sourceIds":["ne15:26.1","ne15:26.2","ne15:26.3","ne15:26.4","ne15:26.5","ne15:26.6","ne15:26.7","ne15:26.8","ne15:26.9","ne15:26.10","ne15:26.11","ne15:26.12","ne15:26.13","ne15:26.14","ne15:26.15","ne15:26.16"],"kind":"text","text":{"pi":"Yāya vedanāya …pe…\nyāya saññāya.\nYehi saṅkhārehi.\nYena viññāṇena tathāgataṁ tiṭṭhantaṁ carantaṁ paññāpayamāno paññāpeyya, tassa viññāṇassa khayā virāgā nirodhā cāgā paṭinissaggā viññāṇasaṅkhaye vimutto, tathāgato atthītipi na upeti, natthītipi na upeti, atthi natthītipi na upeti, nevatthi no natthītipi na upeti.\nAtha kho gambhīro appameyyo asaṅkheyyo nibbutotiyeva saṅkhaṁ gacchati khayā rāgassa, khayā dosassa, khayā mohassa.\n“Āgatī”ti idhāgati.\n“Gatī”ti peccabhavo.\nĀgatigatīpi na bhavanti, “nevidhā”ti chasu ajjhattikesu āyatanesu.\n“Na huran”ti chasu bāhiresu āyatanesu.\n“Na ubhayamantarenā”ti phassasamuditesu dhammesu attānaṁ na passati.\n“Esevanto dukkhassā”ti paṭiccasamuppādo.\nSo duvidho lokiyo ca lokuttaro ca.\nTattha lokiyo avijjāpaccayā saṅkhārā, yāva jarāmaraṇā.\nLokuttaro sīlavato avippaṭisāro jāyati, yāva nāparaṁ itthattāyāti pajānāti.\nTenāha bhagavā “nissitassa calitaṁ anissitassa calitaṁ natthi …pe…\nesevanto dukkhassā”ti."}},{"id":"ne15:27","sourceIds":["ne15:27.1","ne15:27.2","ne15:27.3","ne15:27.4"],"kind":"text","text":{"pi":"“Ye keci sokā paridevitā vā,\nDukkhā ca lokasmimanekarūpā;\nPiyaṁ paṭiccappabhavanti ete,\nPiye asante na bhavanti ete."}},{"id":"ne15:28","sourceIds":["ne15:28.1","ne15:28.2","ne15:28.3","ne15:28.4"],"kind":"text","text":{"pi":"Tasmā hi te sukhino vītasokā,\nYesaṁ piyaṁ natthi kuhiñci loke;\nTasmā asokaṁ virajaṁ patthayāno,\nPiyaṁ na kayirātha kuhiñci loke”ti."}},{"id":"ne15:29","sourceIds":["ne15:29.1","ne15:29.2","ne15:29.3","ne15:29.4","ne15:29.5","ne15:29.6"],"kind":"text","text":{"pi":"“Ye keci sokā paridevitā vā, dukkhā ca lokasmimanekarūpā piyaṁ paṭiccappabhavanti ete”ti—\nayaṁ dukkhā vedanā.\n“Piye asante na bhavanti ete”ti—\nayaṁ sukhā vedanā.\nVedanā vedanākkhandho.\nAyaṁ khandhehi otaraṇā."}},{"id":"ne15:30","sourceIds":["ne15:30.1","ne15:30.2"],"kind":"text","text":{"pi":"Vedanāpaccayā taṇhā, taṇhāpaccayā upādānaṁ, upādānapaccayā bhavo, bhavapaccayā jāti, jātipaccayā jarāmaraṇaṁ, evaṁ sabbaṁ.\nAyaṁ paṭiccasamuppādehi otaraṇā."}},{"id":"ne15:31","sourceIds":["ne15:31.1","ne15:31.2","ne15:31.3","ne15:31.4","ne15:31.5"],"kind":"text","text":{"pi":"Tattha sukhā vedanā dve indriyāni—\nsukhindriyaṁ somanassindriyañca.\nDukkhā vedanā dve indriyāni—\ndukkhindriyaṁ domanassindriyañca.\nAyaṁ indriyehi otaraṇā."}},{"id":"ne15:32","sourceIds":["ne15:32.1","ne15:32.2"],"kind":"text","text":{"pi":"Tāniyeva indriyāni saṅkhārapariyāpannāni, ye saṅkhārā sāsavā bhavaṅgā, te saṅkhārā dhammadhātusaṅgahitā.\nAyaṁ dhātūhi otaraṇā."}},{"id":"ne15:33","sourceIds":["ne15:33.1","ne15:33.2"],"kind":"text","text":{"pi":"Sā dhammadhātu dhammāyatanapariyāpannā, yaṁ āyatanaṁ sāsavaṁ bhavaṅgaṁ.\nAyaṁ āyatanehi otaraṇā."}},{"id":"ne15:34","sourceIds":["ne15:34.1","ne15:34.2","ne15:34.3","ne15:34.4"],"kind":"text","text":{"pi":"“Tasmā hi te sukhino vītasokā,\nYesaṁ piyaṁ natthi kuhiñci loke;\nTasmā asokaṁ virajaṁ patthayāno,\nPiyaṁ na kayirātha kuhiñci loke”ti."}},{"id":"ne15:35","sourceIds":["ne15:35.1","ne15:35.2","ne15:35.3"],"kind":"text","text":{"pi":"Idaṁ taṇhāpahānaṁ.\nTaṇhānirodhā upādānanirodho, upādānanirodhā bhavanirodho, evaṁ sabbaṁ.\nAyaṁ paṭiccasamuppādehi otaraṇā."}},{"id":"ne15:36","sourceIds":["ne15:36.1","ne15:36.2","ne15:36.3"],"kind":"text","text":{"pi":"Taṁyeva taṇhāpahānaṁ samatho.\nSo samatho dve indriyāni satindriyaṁ samādhindriyañca.\nAyaṁ indriyehi otaraṇā."}},{"id":"ne15:37","sourceIds":["ne15:37.1","ne15:37.2"],"kind":"text","text":{"pi":"Soyeva samatho samādhikkhandho.\nAyaṁ khandhehi otaraṇā."}},{"id":"ne15:38","sourceIds":["ne15:38.1","ne15:38.2"],"kind":"text","text":{"pi":"Soyeva samatho saṅkhārapariyāpanno, ye saṅkhārā anāsavā, no ca bhavaṅgā, te saṅkhārā dhammadhātusaṅgahitā.\nAyaṁ dhātūhi otaraṇā."}},{"id":"ne15:39","sourceIds":["ne15:39.1","ne15:39.2","ne15:39.3"],"kind":"text","text":{"pi":"Sā dhammadhātu dhammāyatanapariyāpannā, yaṁ āyatanaṁ anāsavaṁ, no ca bhavaṅgaṁ.\nAyaṁ āyatanehi otaraṇā.\nTenāha bhagavā “ye keci sokā”ti."}},{"id":"ne15:40","sourceIds":["ne15:40.1","ne15:40.2","ne15:40.3","ne15:40.4"],"kind":"text","text":{"pi":"“Kāmaṁ kāmayamānassa,\ntassa ce taṁ samijjhati;\nAddhā pītimano hoti,\nladdhā macco yadicchati."}},{"id":"ne15:41","sourceIds":["ne15:41.1","ne15:41.2","ne15:41.3","ne15:41.4"],"kind":"text","text":{"pi":"Tassa ce kāmayānassa,\nchandajātassa jantuno;\nTe kāmā parihāyanti,\nsallaviddhova ruppati."}},{"id":"ne15:42","sourceIds":["ne15:42.1","ne15:42.2","ne15:42.3","ne15:42.4"],"kind":"text","text":{"pi":"Yo kāme parivajjeti,\nsappasseva padā siro;\nSomaṁ visattikaṁ loke,\nsato samativattatī”ti."}},{"id":"ne15:43","sourceIds":["ne15:43.1","ne15:43.2","ne15:43.3","ne15:43.4"],"kind":"text","text":{"pi":"Tattha yā pītimanatā, ayaṁ anunayo.\nYadāha sallaviddhova ruppatīti, idaṁ paṭighaṁ.\nAnunayaṁ paṭighañca pana taṇhāpakkho, taṇhāya ca pana dasarūpīni āyatanāni padaṭṭhānaṁ.\nAyaṁ āyatanehi otaraṇā."}},{"id":"ne15:44","sourceIds":["ne15:44.1","ne15:44.2"],"kind":"text","text":{"pi":"Tāniyeva dasa rūpīni rūpakāyo nāmasampayutto, tadubhayaṁ nāmarūpaṁ, nāmarūpapaccayā saḷāyatanaṁ, saḷāyatanapaccayā phasso, phassapaccayā vedanā, vedanāpaccayā taṇhā, evaṁ sabbaṁ.\nAyaṁ paṭiccasamuppādehi otaraṇā."}},{"id":"ne15:45","sourceIds":["ne15:45.1","ne15:45.2"],"kind":"text","text":{"pi":"Tadeva nāmarūpaṁ pañcakkhandho.\nAyaṁ khandhehi otaraṇā."}},{"id":"ne15:46","sourceIds":["ne15:46.1","ne15:46.2"],"kind":"text","text":{"pi":"Tadeva nāmarūpaṁ aṭṭhārasa dhātuyo.\nAyaṁ dhātūhi otaraṇā."}},{"id":"ne15:47","sourceIds":["ne15:47.1","ne15:47.2"],"kind":"text","text":{"pi":"Tattha yo rūpakāyo imāni pañca rūpīni indriyāni, yo nāmakāyo imāni pañca arūpīni indriyāni, imāni dasa indriyāni.\nAyaṁ indriyehi otaraṇā."}},{"id":"ne15:48","sourceIds":["ne15:48.1"],"kind":"text","text":{"pi":"Tattha yadāha—"}},{"id":"ne15:49","sourceIds":["ne15:49.1","ne15:49.2","ne15:49.3","ne15:49.4"],"kind":"text","text":{"pi":"“Yo kāme parivajjeti,\nsappasseva padā siro;\nSomaṁ visattikaṁ loke,\nsato samativattatī”ti."}},{"id":"ne15:50","sourceIds":["ne15:50.1"],"kind":"text","text":{"pi":"Ayaṁ saupādisesā nibbānadhātu, ayaṁ dhātūhi otaraṇā."}},{"id":"ne15:51","sourceIds":["ne15:51.1","ne15:51.2"],"kind":"text","text":{"pi":"Sāyeva saupādisesā nibbānadhātu vijjā, vijjuppādā avijjānirodho, avijjānirodhā saṅkhāranirodho, evaṁ sabbaṁ.\nAyaṁ paṭiccasamuppādehi otaraṇā."}},{"id":"ne15:52","sourceIds":["ne15:52.1","ne15:52.2"],"kind":"text","text":{"pi":"Sāyeva vijjā paññākkhandho.\nAyaṁ khandhehi otaraṇā."}},{"id":"ne15:53","sourceIds":["ne15:53.1","ne15:53.2","ne15:53.3"],"kind":"text","text":{"pi":"Sāyeva vijjā dve indriyāni—\nvīriyindriyaṁ paññindriyañca.\nAyaṁ indriyehi otaraṇā."}},{"id":"ne15:54","sourceIds":["ne15:54.1","ne15:54.2"],"kind":"text","text":{"pi":"Sāyeva vijjā saṅkhārapariyāpannā, ye saṅkhārā anāsavā, no ca bhavaṅgā, te saṅkhārā dhammadhātusaṅgahitā.\nAyaṁ dhātūhi otaraṇā."}},{"id":"ne15:55","sourceIds":["ne15:55.1","ne15:55.2","ne15:55.3"],"kind":"text","text":{"pi":"Sā dhammadhātu dhammāyatanapariyāpannā, yaṁ āyatanaṁ anāsavaṁ, no ca bhavaṅgaṁ.\nAyaṁ āyatanehi otaraṇā.\nTenāha bhagavā “kāmaṁ kāmayamānassā”ti."}},{"id":"ne15:56","sourceIds":["ne15:56.1","ne15:56.2","ne15:56.3","ne15:56.4"],"kind":"text","text":{"pi":"Ettāvatā paṭicca indriyakhandhadhātuāyatanāni samosaraṇotaraṇāni bhavanti.\nEvaṁ paṭicca indriyakhandhadhātuāyatanāni otāretabbāni.\nTenāha āyasmā mahākaccāyano “yo ca paṭiccuppādo”ti.\nNiyutto otaraṇo hāro."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ne15/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}