{"id":"ne19","title":"Samāropanahāravibhaṅga","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ne19","title":"Samāropanahāravibhaṅga","units":[{"id":"ne19:0","sourceIds":["ne19:0.1","ne19:0.2","ne19:0.3","ne19:0.4"],"kind":"text","text":{"pi":"Netti\nPaṭiniddesavāra\nVibhaṅga 16\nSamāropanahāravibhaṅga"}},{"id":"ne19:1","sourceIds":["ne19:1.1","ne19:1.2"],"kind":"text","text":{"pi":"Tattha katamo samāropano hāro?\n“Ye dhammā yaṁmūlā, ye cekatthā pakāsitā muninā”ti."}},{"id":"ne19:2","sourceIds":["ne19:2.1","ne19:2.2","ne19:2.3"],"kind":"text","text":{"pi":"Ekasmiṁ padaṭṭhāne yattakāni padaṭṭhānāni otaranti, sabbāni tāni samāropayitabbāni.\nYathā āvaṭṭe hāre bahukāni padaṭṭhānāni otarantīti.\nTattha samāropanā catubbidhā padaṭṭhānaṁ, vevacanaṁ, bhāvanā, pahānamiti."}},{"id":"ne19:3","sourceIds":["ne19:3.1"],"kind":"text","text":{"pi":"Tattha katamā padaṭṭhānena samāropanā?"}},{"id":"ne19:4","sourceIds":["ne19:4.1","ne19:4.2","ne19:4.3","ne19:4.4"],"kind":"text","text":{"pi":"“Sabbapāpassa akaraṇaṁ,\nkusalassa upasampadā;\nSacittapariyodāpanaṁ,\netaṁ buddhāna sāsanan”ti."}},{"id":"ne19:5","sourceIds":["ne19:5.1","ne19:5.2","ne19:5.3","ne19:5.4","ne19:5.5","ne19:5.6","ne19:5.7","ne19:5.8","ne19:5.9","ne19:5.10"],"kind":"text","text":{"pi":"Tassa kiṁ padaṭṭhānaṁ?\nTīṇi sucaritāni—\nkāyasucaritaṁ vacīsucaritaṁ manosucaritaṁ—\nidaṁ padaṭṭhānaṁ;\ntattha yaṁ kāyikañca vācasikañca sucaritaṁ, ayaṁ sīlakkhandho.\nManosucarite yā anabhijjhā abyāpādo ca, ayaṁ samādhikkhandho.\nYā sammādiṭṭhi, ayaṁ paññākkhandho.\nIdaṁ padaṭṭhānaṁ, tattha sīlakkhandho ca samādhikkhandho ca samatho, paññākkhandho vipassanā.\nIdaṁ padaṭṭhānaṁ, tattha samathassa phalaṁ rāgavirāgā cetovimutti, vipassanāya phalaṁ avijjāvirāgā paññāvimutti.\nIdaṁ padaṭṭhānaṁ."}},{"id":"ne19:6","sourceIds":["ne19:6.1","ne19:6.2","ne19:6.3","ne19:6.4","ne19:6.5","ne19:6.6","ne19:6.7","ne19:6.8","ne19:6.9","ne19:6.10","ne19:6.11","ne19:6.12","ne19:6.13","ne19:6.14","ne19:6.15","ne19:6.16"],"kind":"text","text":{"pi":"Vanaṁ vanathassa padaṭṭhānaṁ.\nKiñca vanaṁ?\nKo ca vanatho?\nVanaṁ nāma pañca kāmaguṇā, taṇhā vanatho.\nIdaṁ padaṭṭhānaṁ.\nVanaṁ nāma nimittaggāho “itthī”ti vā “puriso”ti vā.\nVanatho nāma tesaṁ tesaṁ aṅgapaccaṅgānaṁ anubyañjanaggāho “aho cakkhu, aho sotaṁ, aho ghānaṁ, aho jivhā, aho kāyo” iti.\nIdaṁ padaṭṭhānaṁ.\nVanaṁ nāma cha ajjhattikabāhirāni āyatanāni apariññātāni.\nYaṁ tadubhayaṁ paṭicca uppajjati saṁyojanaṁ, ayaṁ vanatho.\nIdaṁ padaṭṭhānaṁ.\nVanaṁ nāma anusayo.\nVanatho nāma pariyuṭṭhānaṁ.\nIdaṁ padaṭṭhānaṁ.\nTenāha bhagavā “chetvā vanañca vanathañcā”ti.\nAyaṁ padaṭṭhānena samāropanā."}},{"id":"ne19:7","sourceIds":["ne19:7.1","ne19:7.2","ne19:7.3","ne19:7.4","ne19:7.5","ne19:7.6","ne19:7.7","ne19:7.8","ne19:7.9","ne19:7.10","ne19:7.11","ne19:7.12"],"kind":"text","text":{"pi":"Tattha katamā vevacanena samāropanā?\nRāgavirāgā cetovimutti sekkhaphalaṁ;\navijjāvirāgā paññāvimutti asekkhaphalaṁ.\nIdaṁ vevacanaṁ.\nRāgavirāgā cetovimutti anāgāmiphalaṁ;\navijjāvirāgā paññāvimutti aggaphalaṁ arahattaṁ.\nIdaṁ vevacanaṁ.\nRāgavirāgā cetovimutti kāmadhātusamatikkamanaṁ;\navijjāvirāgā paññāvimutti tedhātusamatikkamanaṁ.\nIdaṁ vevacanaṁ.\nPaññindriyaṁ, paññābalaṁ, adhipaññāsikkhā, paññākkhandho, dhammavicayasambojjhaṅgo, upekkhāsambojjhaṅgo, ñāṇaṁ, sammādiṭṭhi, tīraṇā, santīraṇā, hirī, vipassanā, dhamme ñāṇaṁ, sabbaṁ, idaṁ vevacanaṁ.\nAyaṁ vevacanena samāropanā."}},{"id":"ne19:8","sourceIds":["ne19:8.1","ne19:8.2","ne19:8.3","ne19:8.4","ne19:8.5","ne19:8.6","ne19:8.7","ne19:8.8","ne19:8.9","ne19:8.10","ne19:8.11","ne19:8.12","ne19:8.13","ne19:8.14","ne19:8.15","ne19:8.16"],"kind":"text","text":{"pi":"Tattha katamā bhāvanāya samāropanā?\nYathāha bhagavā “tasmātiha tvaṁ bhikkhu kāye kāyānupassī viharāhi, ātāpī sampajāno satimā vineyya loke abhijjhādomanassaṁ”.\nĀtāpīti vīriyindriyaṁ.\nSampajānoti paññindriyaṁ.\nSatimāti satindriyaṁ.\nVineyya loke abhijjhādomanassanti samādhindriyaṁ.\nEvaṁ kāye kāyānupassino viharato cattāro satipaṭṭhānā bhāvanāpāripūriṁ gacchanti.\nKena kāraṇena?\nEkalakkhaṇattā catunnaṁ indriyānaṁ.\nCatūsu satipaṭṭhānesu bhāviyamānesu cattāro sammappadhānā bhāvanāpāripūriṁ gacchanti.\nCatūsu sammappadhānesu bhāviyamānesu cattāro iddhipādā bhāvanāpāripūriṁ gacchanti.\nCatūsu iddhipādesu bhāviyamānesu pañcindriyāni bhāvanāpāripūriṁ gacchanti.\nEvaṁ sabbe.\nKena kāraṇena?\nSabbe hi bodhaṅgamā dhammā bodhipakkhiyā niyyānikalakkhaṇena ekalakkhaṇā, te ekalakkhaṇattā bhāvanāpāripūriṁ gacchanti.\nAyaṁ bhāvanāya samāropanā."}},{"id":"ne19:9","sourceIds":["ne19:9.1","ne19:9.2"],"kind":"text","text":{"pi":"Tattha katamā pahānena samāropanā?\nKāye kāyānupassī viharanto “asubhe subhan”ti vipallāsaṁ pajahati, kabaḷīkāro cassa āhāro pariññaṁ gacchati, kāmupādānena ca anupādāno bhavati, kāmayogena ca visaṁyutto bhavati, abhijjhākāyaganthena ca vippayujjati, kāmāsavena ca anāsavo bhavati, kāmoghañca uttiṇṇo bhavati, rāgasallena ca visallo bhavati, rūpūpikā cassa viññāṇaṭṭhiti pariññaṁ gacchati, rūpadhātuyaṁ cassa rāgo pahīno bhavati, na ca chandāgatiṁ gacchati."}},{"id":"ne19:10","sourceIds":["ne19:10.1"],"kind":"text","text":{"pi":"Vedanāsu vedanānupassī viharanto “dukkhe sukhan”ti vipallāsaṁ pajahati, phasso cassa āhāro pariññaṁ gacchati, bhavūpādānena ca anupādāno bhavati, bhavayogena ca visaṁyutto bhavati, byāpādakāyaganthena ca vippayujjati, bhavāsavena ca anāsavo bhavati, bhavoghañca uttiṇṇo bhavati, dosasallena ca visallo bhavati, vedanūpikā cassa viññāṇaṭṭhiti pariññaṁ gacchati, vedanādhātuyaṁ cassa rāgo pahīno bhavati, na ca dosāgatiṁ gacchati."}},{"id":"ne19:11","sourceIds":["ne19:11.1"],"kind":"text","text":{"pi":"Citte cittānupassī viharanto “anicce niccan”ti vipallāsaṁ pajahati, viññāṇaṁ cassa āhāro pariññaṁ gacchati, diṭṭhupādānena ca anupādāno bhavati, diṭṭhiyogena ca visaṁyutto bhavati, sīlabbataparāmāsakāyaganthena ca vippayujjati, diṭṭhāsavena ca anāsavo bhavati, diṭṭhoghañca uttiṇṇo bhavati, mānasallena ca visallo bhavati, saññūpikā cassa viññāṇaṭṭhiti pariññaṁ gacchati, saññādhātuyaṁ cassa rāgo pahīno bhavati, na ca bhayāgatiṁ gacchati."}},{"id":"ne19:12","sourceIds":["ne19:12.1","ne19:12.2"],"kind":"text","text":{"pi":"Dhammesu dhammānupassī viharanto “anattani attā”ti vipallāsaṁ pajahati, manosañcetanā cassa āhāro pariññaṁ gacchati, attavādupādānena ca anupādāno bhavati, avijjāyogena ca visaṁyutto bhavati, idaṁsaccābhinivesakāyaganthena ca vippayujjati, avijjāsavena ca anāsavo bhavati, avijjoghañca uttiṇṇo bhavati, mohasallena ca visallo bhavati, saṅkhārūpikā cassa viññāṇaṭṭhiti pariññaṁ gacchati, saṅkhāradhātuyaṁ cassa rāgo pahīno bhavati, na ca mohāgatiṁ gacchati.\nAyaṁ pahānena samāropanā."}},{"id":"ne19:13","sourceIds":["ne19:13.1"],"kind":"text","text":{"pi":"Tenāha āyasmā mahākaccāyano—"}},{"id":"ne19:14","sourceIds":["ne19:14.1","ne19:14.2","ne19:14.3","ne19:14.4","ne19:14.5","ne19:14.6"],"kind":"text","text":{"pi":"“Ye dhammā yaṁmūlā,\nYe cekatthā pakāsitā muninā;\nTe samāropayitabbā,\nEsa samāropano hāro”ti.\nNiyutto samāropano hāro.\nNiṭṭhito ca hāravibhaṅgo."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ne19/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}