{"id":"ne33","title":"Adhiṭṭhānahārasampāta","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ne33","title":"Adhiṭṭhānahārasampāta","units":[{"id":"ne33:0","sourceIds":["ne33:0.1","ne33:0.2","ne33:0.3","ne33:0.4"],"kind":"text","text":{"pi":"Netti\nPaṭiniddesavāra\nSampāta 14\nAdhiṭṭhānahārasampāta"}},{"id":"ne33:1","sourceIds":["ne33:1.1"],"kind":"text","text":{"pi":"Tattha katamo adhiṭṭhāno hārasampāto?"}},{"id":"ne33:2","sourceIds":["ne33:2.1","ne33:2.2","ne33:2.3","ne33:2.4","ne33:2.5","ne33:2.6","ne33:2.7","ne33:2.8","ne33:2.9","ne33:2.10","ne33:2.11","ne33:2.12"],"kind":"text","text":{"pi":"“Tasmā rakkhitacittassa, sammāsaṅkappagocaro”ti gāthā.\nTasmā rakkhitacittassāti ekattatā.\nCittaṁ mano viññāṇaṁ, ayaṁ vemattatā.\nSammāsaṅkappagocaroti ekattatā.\nNekkhammasaṅkappo abyāpādasaṅkappo avihiṁsāsaṅkappo ayaṁ vemattatā.\nSammādiṭṭhipurekkhāroti ekattatā.\nSammādiṭṭhi nāma yaṁ dukkhe ñāṇaṁ dukkhasamudaye ñāṇaṁ dukkhanirodhe ñāṇaṁ dukkhanirodhagāminiyā paṭipadāya ñāṇaṁ magge ñāṇaṁ hetumhi ñāṇaṁ hetusamuppannesu dhammesu ñāṇaṁ paccaye ñāṇaṁ paccayasamuppannesu dhammesu ñāṇaṁ, yaṁ tattha tattha yathābhūtaṁ ñāṇadassanaṁ abhisamayo sampaṭivedho saccāgamanaṁ, ayaṁ vemattatā.\nÑatvāna udayabbayanti ekattatā, udayena avijjāpaccayā saṅkhārā, saṅkhārapaccayā viññāṇaṁ, evaṁ sabbaṁ samudayo bhavati.\nVayena avijjānirodhā saṅkhāranirodho, evaṁ sabbaṁ nirodho hoti, ayaṁ vemattatā.\nThinamiddhābhibhū bhikkhūti ekattatā, thinaṁ nāma yā cittassa akallatā akammaniyatā, middhaṁ nāma yaṁ kāyassa līnattaṁ, ayaṁ vemattatā.\nSabbā duggatiyo jaheti ekattatā, devamanusse vā upanidhāya apāyā duggati, nibbānaṁ vā upanidhāya sabbā upapattiyo duggati, ayaṁ vemattatā.\nNiyutto adhiṭṭhāno hārasampāto."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ne33/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}