{"id":"ne4","title":"Desanāhāravibhaṅga","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ne4","title":"Desanāhāravibhaṅga","units":[{"id":"ne4:0","sourceIds":["ne4:0.1","ne4:0.2","ne4:0.3","ne4:0.4"],"kind":"text","text":{"pi":"Netti\nPaṭiniddesavāra\nVibhaṅga 1\nDesanāhāravibhaṅga"}},{"id":"ne4:1","sourceIds":["ne4:1.1","ne4:1.2","ne4:1.3","ne4:1.4","ne4:1.5"],"kind":"text","text":{"pi":"Tattha katamo desanāhāro?\n“Assādādīnavatā”ti gāthā ayaṁ desanāhāro.\nKiṁ desayati?\nAssādaṁ ādīnavaṁ nissaraṇaṁ phalaṁ upāyaṁ āṇattiṁ.\n“Dhammaṁ vo, bhikkhave, desessāmi ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ pakāsessāmī”ti."}},{"id":"ne4:2","sourceIds":["ne4:2.1"],"kind":"text","text":{"pi":"Tattha katamo assādo?"}},{"id":"ne4:3","sourceIds":["ne4:3.1","ne4:3.2","ne4:3.3","ne4:3.4","ne4:3.5"],"kind":"text","text":{"pi":"“Kāmaṁ kāmayamānassa,\ntassa cetaṁ samijjhati;\nAddhā pītimano hoti,\nladdhā macco yadicchatī”ti.\nAyaṁ assādo."}},{"id":"ne4:4","sourceIds":["ne4:4.1"],"kind":"text","text":{"pi":"Tattha katamo ādīnavo?"}},{"id":"ne4:5","sourceIds":["ne4:5.1","ne4:5.2","ne4:5.3","ne4:5.4","ne4:5.5"],"kind":"text","text":{"pi":"“Tassa ce kāmayānassa,\nchandajātassa jantuno;\nTe kāmā parihāyanti,\nsallaviddhova ruppatī”ti.\nAyaṁ ādīnavo."}},{"id":"ne4:6","sourceIds":["ne4:6.1"],"kind":"text","text":{"pi":"Tattha katamaṁ nissaraṇaṁ?"}},{"id":"ne4:7","sourceIds":["ne4:7.1","ne4:7.2","ne4:7.3","ne4:7.4","ne4:7.5"],"kind":"text","text":{"pi":"“Yo kāme parivajjeti,\nsappasseva padā siro;\nSomaṁ visattikaṁ loke,\nsato samativattatī”ti.\nIdaṁ nissaraṇaṁ."}},{"id":"ne4:8","sourceIds":["ne4:8.1"],"kind":"text","text":{"pi":"Tattha katamo assādo?"}},{"id":"ne4:9","sourceIds":["ne4:9.1","ne4:9.2","ne4:9.3","ne4:9.4","ne4:9.5"],"kind":"text","text":{"pi":"“Khettaṁ vatthuṁ hiraññaṁ vā,\ngavāssaṁ dāsaporisaṁ;\nThiyo bandhū puthū kāme,\nyo naro anugijjhatī”ti.\nAyaṁ assādo."}},{"id":"ne4:10","sourceIds":["ne4:10.1"],"kind":"text","text":{"pi":"Tattha katamo ādīnavo?"}},{"id":"ne4:11","sourceIds":["ne4:11.1","ne4:11.2","ne4:11.3","ne4:11.4","ne4:11.5"],"kind":"text","text":{"pi":"“Abalā naṁ balīyanti,\nmaddantenaṁ parissayā;\nTato naṁ dukkhamanveti,\nnāvaṁ bhinnamivodakan”ti.\nAyaṁ ādīnavo."}},{"id":"ne4:12","sourceIds":["ne4:12.1"],"kind":"text","text":{"pi":"Tattha katamaṁ nissaraṇaṁ?"}},{"id":"ne4:13","sourceIds":["ne4:13.1","ne4:13.2","ne4:13.3","ne4:13.4","ne4:13.5"],"kind":"text","text":{"pi":"“Tasmā jantu sadā sato,\nkāmāni parivajjaye;\nTe pahāya tare oghaṁ,\nnāvaṁ sitvāva pāragū”ti.\nIdaṁ nissaraṇaṁ."}},{"id":"ne4:14","sourceIds":["ne4:14.1"],"kind":"text","text":{"pi":"Tattha katamaṁ phalaṁ?"}},{"id":"ne4:15","sourceIds":["ne4:15.1","ne4:15.2","ne4:15.3","ne4:15.4","ne4:15.5"],"kind":"text","text":{"pi":"“Dhammo have rakkhati dhammacāriṁ,\nChattaṁ mahantaṁ yatha vassakāle;\nEsānisaṁso dhamme suciṇṇe,\nNa duggatiṁ gacchati dhammacārī”ti.\nIdaṁ phalaṁ."}},{"id":"ne4:16","sourceIds":["ne4:16.1"],"kind":"text","text":{"pi":"Tattha katamo upāyo?"}},{"id":"ne4:17","sourceIds":["ne4:17.1","ne4:17.2"],"kind":"text","text":{"pi":"“Sabbe saṅkhārā aniccāti,\n…pe…"}},{"id":"ne4:18","sourceIds":["ne4:18.1","ne4:18.2"],"kind":"text","text":{"pi":"“Sabbe saṅkhārā dukkhāti,\n…pe…"}},{"id":"ne4:19","sourceIds":["ne4:19.1","ne4:19.2","ne4:19.3","ne4:19.4","ne4:19.5"],"kind":"text","text":{"pi":"“Sabbe dhammā anattāti,\nyadā paññāya passati;\nAtha nibbindati dukkhe,\nesa maggo visuddhiyā”ti.\nAyaṁ upāyo."}},{"id":"ne4:20","sourceIds":["ne4:20.1"],"kind":"text","text":{"pi":"Tattha katamā āṇatti?"}},{"id":"ne4:21","sourceIds":["ne4:21.1","ne4:21.2","ne4:21.3","ne4:21.4","ne4:21.5"],"kind":"text","text":{"pi":"“Cakkhumā visamānīva,\nvijjamāne parakkame;\nPaṇḍito jīvalokasmiṁ,\npāpāni parivajjaye”ti.\nAyaṁ āṇatti."}},{"id":"ne4:22","sourceIds":["ne4:22.1"],"kind":"text","text":{"pi":"Tattha katamaṁ phalaṁ?"}},{"id":"ne4:23","sourceIds":["ne4:23.1","ne4:23.2","ne4:23.3","ne4:23.4","ne4:23.5","ne4:23.6"],"kind":"text","text":{"pi":"“‘Suññato lokaṁ avekkhassu,\nMogharājā’ti āṇatti;\n‘Sadā sato’ti upāyo,\n‘Attānudiṭṭhiṁ ūhacca;\nEvaṁ maccutaro siyā’”.\nIdaṁ phalaṁ."}},{"id":"ne4:24","sourceIds":["ne4:24.1"],"kind":"text","text":{"pi":"Tattha bhagavā ugghaṭitaññussa puggalassa nissaraṇaṁ desayati, vipañcitaññussa puggalassa ādīnavañca nissaraṇañca desayati, neyyassa puggalassa assādañca ādīnavañca nissaraṇañca desayati."}},{"id":"ne4:25","sourceIds":["ne4:25.1","ne4:25.2","ne4:25.3","ne4:25.4","ne4:25.5"],"kind":"text","text":{"pi":"Tattha catasso paṭipadā, cattāro puggalā.\nTaṇhācarito mando satindriyena dukkhāya paṭipadāya dandhābhiññāya niyyāti satipaṭṭhānehi nissayehi.\nTaṇhācarito udattho samādhindriyena dukkhāya paṭipadāya khippābhiññāya niyyāti jhānehi nissayehi.\nDiṭṭhicarito mando vīriyindriyena sukhāya paṭipadāya dandhābhiññāya niyyāti sammappadhānehi nissayehi.\nDiṭṭhicarito udatto paññindriyena sukhāya paṭipadāya khippābhiññāya niyyāti saccehi nissayehi."}},{"id":"ne4:26","sourceIds":["ne4:26.1","ne4:26.2"],"kind":"text","text":{"pi":"Ubho taṇhācaritā samathapubbaṅgamāya vipassanāya niyyanti rāgavirāgāya cetovimuttiyā.\nUbho diṭṭhicaritā vipassanāpubbaṅgamena samathena niyyanti avijjāvirāgāya paññāvimuttiyā."}},{"id":"ne4:27","sourceIds":["ne4:27.1"],"kind":"text","text":{"pi":"Tattha ye samathapubbaṅgamāhi paṭipadāhi niyyanti, te nandiyāvaṭṭena nayena hātabbā, ye vipassanāpubbaṅgamāhi paṭipadāhi niyyanti, te sīhavikkīḷitena nayena hātabbā."}},{"id":"ne4:28","sourceIds":["ne4:28.1","ne4:28.2","ne4:28.3","ne4:28.4"],"kind":"text","text":{"pi":"Svāyaṁ hāro kattha sambhavati, yassa satthā vā dhammaṁ desayati aññataro vā garuṭṭhānīyo sabrahmacārī, so taṁ dhammaṁ sutvā saddhaṁ paṭilabhati.\nTattha yā vīmaṁsā ussāhanā tulanā upaparikkhā, ayaṁ sutamayī paññā.\nTathā sutena nissayena yā vīmaṁsā tulanā upaparikkhā manasānupekkhaṇā, ayaṁ cintāmayī paññā.\nImāhi dvīhi paññāhi manasikārasampayuttassa yaṁ ñāṇaṁ uppajjati dassanabhūmiyaṁ vā bhāvanābhūmiyaṁ vā, ayaṁ bhāvanāmayī paññā."}},{"id":"ne4:29","sourceIds":["ne4:29.1","ne4:29.2","ne4:29.3","ne4:29.4","ne4:29.5","ne4:29.6"],"kind":"text","text":{"pi":"Paratoghosā sutamayī paññā.\nPaccattasamuṭṭhitā yoniso manasikārā cintāmayī paññā.\nYaṁ parato ca ghosena paccattasamuṭṭhitena ca yonisomanasikārena ñāṇaṁ uppajjati, ayaṁ bhāvanāmayī paññā.\nYassa imā dve paññā atthi sutamayī cintāmayī ca, ayaṁ ugghaṭitaññū.\nYassa sutamayī paññā atthi, cintāmayī natthi, ayaṁ vipañcitaññū.\nYassa neva sutamayī paññā atthi na cintāmayī, ayaṁ neyyo."}},{"id":"ne4:30","sourceIds":["ne4:30.1","ne4:30.2","ne4:30.3","ne4:30.4","ne4:30.5"],"kind":"text","text":{"pi":"Sāyaṁ dhammadesanā kiṁ desayati?\nCattāri saccāni dukkhaṁ samudayaṁ nirodhaṁ maggaṁ.\nĀdīnavo ca phalañca dukkhaṁ, assādo samudayo, nissaraṇaṁ nirodho, upāyo āṇatti ca maggo.\nImāni cattāri saccāni.\nIdaṁ dhammacakkaṁ."}},{"id":"ne4:31","sourceIds":["ne4:31.1","ne4:31.2"],"kind":"text","text":{"pi":"Yathāha bhagavā—\n“idaṁ dukkhan”ti me, bhikkhave, bārāṇasiyaṁ isipatane migadāye anuttaraṁ dhammacakkaṁ pavattitaṁ appaṭivattiyaṁ samaṇena vā brāhmaṇena vā devena vā mārena vā brahmunā vā kenaci vā lokasmiṁ, sabbaṁ dhammacakkaṁ."}},{"id":"ne4:32","sourceIds":["ne4:32.1","ne4:32.2"],"kind":"text","text":{"pi":"Tattha aparimāṇā padā, aparimāṇā akkharā, aparimāṇā byañjanā, aparimāṇā ākārā neruttā niddesā.\nEtasseva atthassa saṅkāsanā pakāsanā vivaraṇā vibhajanā uttānīkammaṁ paññatti, itipidaṁ dukkhaṁ ariyasaccaṁ."}},{"id":"ne4:33","sourceIds":["ne4:33.1","ne4:33.2","ne4:33.3"],"kind":"text","text":{"pi":"“Ayaṁ dukkhasamudayo”ti me, bhikkhave, bārāṇasiyaṁ isipatane migadāye anuttaraṁ dhammacakkaṁ pavattitaṁ …pe…\n“ayaṁ dukkhanirodho”ti me, bhikkhave …pe…\n“ayaṁ dukkhanirodhagāminī paṭipadā”ti me, bhikkhave, bārāṇasiyaṁ isipatane migadāye anuttaraṁ dhammacakkaṁ pavattitaṁ appaṭivattiyaṁ samaṇena vā brāhmaṇena vā devena vā mārena vā brahmunā vā kenaci vā lokasmiṁ."}},{"id":"ne4:34","sourceIds":["ne4:34.1","ne4:34.2"],"kind":"text","text":{"pi":"Tattha aparimāṇā padā, aparimāṇā akkharā, aparimāṇā byañjanā, aparimāṇā ākārā neruttā niddesā.\nEtasseva atthassa saṅkāsanā pakāsanā vivaraṇā vibhajanā uttānīkammaṁ paññatti itipidaṁ dukkhanirodhagāminī paṭipadā ariyasaccaṁ."}},{"id":"ne4:35","sourceIds":["ne4:35.1","ne4:35.2","ne4:35.3","ne4:35.4","ne4:35.5","ne4:35.6"],"kind":"text","text":{"pi":"Tattha bhagavā akkharehi saṅkāseti, padehi pakāseti, byañjanehi vivarati, ākārehi vibhajati, niruttīhi uttānīkaroti, niddesehi paññapeti.\nTattha bhagavā akkharehi ca padehi ca ugghaṭeti, byañjanehi ca ākārehi ca vipañcayati, niruttīhi ca niddesehi ca vitthāreti.\nTattha ugghaṭanā ādi, vipañcanā majjhe, vitthāraṇā pariyosānaṁ.\nSoyaṁ dhammavinayo ugghaṭīyanto ugghaṭitaññūpuggalaṁ vineti, tena naṁ āhu “ādikalyāṇo”ti.\nVipañcīyanto vipañcitaññūpuggalaṁ vineti, tena naṁ āhu “majjhekalyāṇo”ti.\nVitthārīyanto neyyaṁ puggalaṁ vineti, tena naṁ āhu “pariyosānakalyāṇo”ti."}},{"id":"ne4:36","sourceIds":["ne4:36.1","ne4:36.2","ne4:36.3"],"kind":"text","text":{"pi":"Tattha chappadāni attho saṅkāsanā pakāsanā vivaraṇā vibhajanā uttānīkammaṁ paññatti, imāni chappadāni attho.\nChappadāni byañjanaṁ akkharaṁ padaṁ byañjanaṁ ākāro nirutti niddeso, imāni chappadāni byañjanaṁ.\nTenāha bhagavā “dhammaṁ vo, bhikkhave, desessāmi ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanan”ti."}},{"id":"ne4:37","sourceIds":["ne4:37.1","ne4:37.2","ne4:37.3","ne4:37.4"],"kind":"text","text":{"pi":"Kevalanti lokuttaraṁ, na missaṁ lokiyehi dhammehi.\nParipuṇṇanti paripūraṁ anūnaṁ anatirekaṁ.\nParisuddhanti nimmalaṁ sabbamalāpagataṁ pariyodātaṁ upaṭṭhitaṁ sabbavisesānaṁ, idaṁ vuccati tathāgatapadaṁitipi tathāgatanisevitaṁitipi tathāgatārañjitaṁitipi, ato cetaṁ brahmacariyaṁ paññāyati.\nTenāha bhagavā “kevalaparipuṇṇaṁ parisuddhaṁ brahmacariyaṁ pakāsessāmī”ti."}},{"id":"ne4:38","sourceIds":["ne4:38.1","ne4:38.2"],"kind":"text","text":{"pi":"Kesaṁ ayaṁ dhammadesanā, yogīnaṁ.\nTenāha āyasmā mahākaccāyano—"}},{"id":"ne4:39","sourceIds":["ne4:39.1","ne4:39.2","ne4:39.3","ne4:39.4","ne4:39.5"],"kind":"text","text":{"pi":"“Assādādīnavatā,\nNissaraṇampi ca phalaṁ upāyo ca;\nĀṇattī ca bhagavato,\nYogīnaṁ desanāhāro”ti.\nNiyutto desanāhāro."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ne4/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}