{"id":"ne6","title":"Yuttihāravibhaṅga","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ne6","title":"Yuttihāravibhaṅga","units":[{"id":"ne6:0","sourceIds":["ne6:0.1","ne6:0.2","ne6:0.3","ne6:0.4"],"kind":"text","text":{"pi":"Netti\nPaṭiniddesavāra\nVibhaṅga 3\nYuttihāravibhaṅga"}},{"id":"ne6:1","sourceIds":["ne6:1.1","ne6:1.2","ne6:1.3","ne6:1.4","ne6:1.5"],"kind":"text","text":{"pi":"Tattha katamo yuttihāro?\n“Sabbesaṁ hārānan”ti, ayaṁ yuttihāro.\nKiṁ yojayati?\nCattāro mahāpadesā buddhāpadeso saṅghāpadeso sambahulattherāpadeso ekattherāpadeso.\nIme cattāro mahāpadesā, tāni padabyañjanāni sutte otārayitabbāni, vinaye sandassayitabbāni, dhammatāyaṁ upanikkhipitabbāni."}},{"id":"ne6:2","sourceIds":["ne6:2.1","ne6:2.2","ne6:2.3","ne6:2.4","ne6:2.5","ne6:2.6","ne6:2.7","ne6:2.8"],"kind":"text","text":{"pi":"Katamasmiṁ sutte otārayitabbāni?\nCatūsu ariyasaccesu.\nKatamasmiṁ vinaye sandassayitabbāni?\nRāgavinaye dosavinaye mohavinaye.\nKatamissaṁ dhammatāyaṁ upanikkhipitabbāni?\nPaṭiccasamuppāde.\nYadi catūsu ariyasaccesu avatarati, kilesavinaye sandissati, dhammatañca na vilometi, evaṁ āsave na janeti.\nCatūhi mahāpadesehi yaṁ yaṁ yujjati, yena yena yujjati, yathā yathā yujjati, taṁ taṁ gahetabbaṁ."}},{"id":"ne6:3","sourceIds":["ne6:3.1","ne6:3.2","ne6:3.3","ne6:3.4","ne6:3.5","ne6:3.6","ne6:3.7","ne6:3.8","ne6:3.9"],"kind":"text","text":{"pi":"Pañhaṁ pucchitena kati padāni pañheti padaso pariyogāhitabbaṁ vicetabbaṁ?\nYadi sabbāni padāni ekaṁ atthaṁ abhivadanti, eko pañho.\nAtha cattāri padāni ekaṁ atthaṁ abhivadanti, eko pañho.\nAtha tīṇi padāni ekaṁ atthaṁ abhivadanti, eko pañho.\nAtha dve padāni ekaṁ atthaṁ abhivadanti, eko pañho.\nAtha ekaṁ padaṁ ekaṁ atthaṁ abhivadati, eko pañho.\nTaṁ upaparikkhamānena aññātabbaṁ kiṁ ime dhammā nānatthā nānābyañjanā, udāhu imesaṁ dhammānaṁ eko attho byañjanameva nānanti.\nYathā kiṁ bhave?\nYathā sā devatā bhagavantaṁ pañhaṁ pucchati."}},{"id":"ne6:4","sourceIds":["ne6:4.1","ne6:4.2","ne6:4.3","ne6:4.4"],"kind":"text","text":{"pi":"“Kenassubbhāhato loko,\nkenassu parivārito;\nKena sallena otiṇṇo,\nkissa dhūpāyito sadā”ti."}},{"id":"ne6:5","sourceIds":["ne6:5.1","ne6:5.2","ne6:5.3"],"kind":"text","text":{"pi":"Imāni cattāri padāni pucchitāni.\nTe tayo pañhā kathaṁ ñāyati?\nBhagavā hi devatāya visajjeti."}},{"id":"ne6:6","sourceIds":["ne6:6.1","ne6:6.2","ne6:6.3","ne6:6.4"],"kind":"text","text":{"pi":"“Maccunābbhāhato loko,\njarāya parivārito;\nTaṇhāsallena otiṇṇo,\nicchādhūpāyito sadā”ti."}},{"id":"ne6:7","sourceIds":["ne6:7.1","ne6:7.2","ne6:7.3","ne6:7.4","ne6:7.5","ne6:7.6","ne6:7.7","ne6:7.8","ne6:7.9","ne6:7.10","ne6:7.11","ne6:7.12","ne6:7.13"],"kind":"text","text":{"pi":"Tattha jarā ca maraṇañca imāni dve saṅkhatassa saṅkhatalakkhaṇāni.\nJarāyaṁ ṭhitassa aññathattaṁ, maraṇaṁ vayo.\nTattha jarāya ca maraṇassa ca atthato nānattaṁ.\nKena kāraṇena, gabbhagatāpi hi mīyanti, na ca te jiṇṇā bhavanti.\nAtthi ca devānaṁ maraṇaṁ, na ca tesaṁ sarīrāni jīranti.\nSakkateva jarāya paṭikammaṁ kātuṁ, na pana sakkate maraṇassa paṭikammaṁ kātuṁ aññatreva iddhimantānaṁ iddhivisayā.\nYaṁ panāha taṇhāsallena otiṇṇoti dissanti vītarāgā jīrantāpi mīyantāpi.\nYadi ca yathā jarāmaraṇaṁ, evaṁ taṇhāpi siyā.\nEvaṁ sante sabbe yobbanaṭṭhāpi vigatataṇhā siyuṁ.\nYathā ca taṇhā dukkhassa samudayo, evaṁ jarāmaraṇampi siyā dukkhassa samudayo, na ca siyā taṇhā dukkhassa samudayo, na hi jarāmaraṇaṁ dukkhassa samudayo, taṇhā dukkhassa samudayo.\nYathā ca taṇhā maggavajjhā, evaṁ jarāmaraṇampi siyā maggavajjhaṁ.\nImāya yuttiyā aññamaññehi kāraṇehi gavesitabbaṁ.\nYadi ca sandissati yuttisamārūḷhaṁ atthato ca aññattaṁ, byañjanatopi gavesitabbaṁ."}},{"id":"ne6:8","sourceIds":["ne6:8.1","ne6:8.2","ne6:8.3","ne6:8.4"],"kind":"text","text":{"pi":"Salloti vā dhūpāyananti vā imesaṁ dhammānaṁ atthato ekattaṁ.\nNa hi yujjati icchāya ca taṇhāya ca atthato aññattaṁ.\nTaṇhāya adhippāye aparipūramāne navasu āghātavatthūsu kodho ca upanāho ca uppajjati.\nImāya yuttiyā jarāya ca maraṇassa ca taṇhāya ca atthato aññattaṁ."}},{"id":"ne6:9","sourceIds":["ne6:9.1","ne6:9.2","ne6:9.3","ne6:9.4"],"kind":"text","text":{"pi":"Yaṁ panidaṁ bhagavatā dvīhi nāmehi abhilapitaṁ icchātipi taṇhātipi, idaṁ bhagavatā bāhirānaṁ vatthūnaṁ ārammaṇavasena dvīhi nāmehi abhilapitaṁ icchātipi taṇhātipi, sabbā hi taṇhā ajjhosānalakkhaṇena ekalakkhaṇā.\nYathā sabbo aggi uṇhattalakkhaṇena ekalakkhaṇo, api ca upādānavasena aññamaññāni nāmāni labhati, kaṭṭhaggītipi tiṇaggītipi sakalikaggītipi gomayaggītipi thusaggītipi saṅkāraggītipi, sabbo hi aggi uṇhattalakkhaṇova.\nEvaṁ sabbā taṇhā ajjhosānalakkhaṇena ekalakkhaṇā, api tu ārammaṇaupādānavasena aññamaññehi nāmehi abhilapitā icchāitipi taṇhāitipi salloitipi dhūpāyanāitipi saritāitipi visattikāitipi sinehoitipi kilamathoitipi latāitipi maññanāitipi bandhoitipi āsāitipi pipāsāitipi abhinandanāitipi, iti sabbā taṇhā ajjhosānalakkhaṇena ekalakkhaṇā.\nYathā ca vevacane vuttā."}},{"id":"ne6:10","sourceIds":["ne6:10.1","ne6:10.2","ne6:10.3","ne6:10.4"],"kind":"text","text":{"pi":"“Āsā ca pihā abhinandanā ca,\nAnekadhātūsu sarā patiṭṭhitā;\nAññāṇamūlappabhavā pajappitā,\nSabbā mayā byantikatā samūlikā”ti."}},{"id":"ne6:11","sourceIds":["ne6:11.1","ne6:11.2","ne6:11.3","ne6:11.4","ne6:11.5"],"kind":"text","text":{"pi":"Taṇhāyetaṁ vevacanaṁ.\nYathāha bhagavā—\nrūpe, tissa, avigatarāgassa avigatacchandassa avigatapemassa avigatapipāsassa avigatapariḷāhassa.\nEvaṁ vedanāya saññāya saṅkhāresu viññāṇe avigatarāgassa avigatacchandassa avigatapemassa avigatapipāsassa avigatapariḷāhassa sabbaṁ suttaṁ vitthāretabbaṁ.\nTaṇhāyetaṁ vevacanaṁ, evaṁ yujjati."}},{"id":"ne6:12","sourceIds":["ne6:12.1","ne6:12.2"],"kind":"text","text":{"pi":"Sabbo dukkhūpacāro kāmataṇhāsaṅkhāramūlako, na pana yujjati sabbo nibbidūpacāro kāmataṇhāparikkhāramūlako.\nImāya yuttiyā aññamaññehi kāraṇehi gavesitabbaṁ."}},{"id":"ne6:13","sourceIds":["ne6:13.1","ne6:13.2","ne6:13.3","ne6:13.4","ne6:13.5","ne6:13.6","ne6:13.7"],"kind":"text","text":{"pi":"Yathā hi bhagavā rāgacaritassa puggalassa asubhaṁ desayati, dosacaritassa bhagavā puggalassa mettaṁ desayati.\nMohacaritassa bhagavā puggalassa paṭiccasamuppādaṁ desayati.\nYadi hi bhagavā rāgacaritassa puggalassa mettaṁ cetovimuttiṁ deseyya.\nSukhaṁ vā paṭipadaṁ dandhābhiññaṁ sukhaṁ vā paṭipadaṁ khippābhiññaṁ vipassanāpubbaṅgamaṁ vā pahānaṁ deseyya, na yujjati desanā.\nEvaṁ yaṁ kiñci rāgassa anulomappahānaṁ dosassa anulomappahānaṁ mohassa anulomappahānaṁ.\nSabbaṁ taṁ vicayena hārena vicinitvā yuttihārena yojetabbaṁ.\nYāvatikā ñāṇassa bhūmi."}},{"id":"ne6:14","sourceIds":["ne6:14.1","ne6:14.2","ne6:14.3","ne6:14.4","ne6:14.5","ne6:14.6","ne6:14.7"],"kind":"text","text":{"pi":"Mettāvihārissa sato byāpādo cittaṁ pariyādāya ṭhassatīti na yujjati desanā, byāpādo pahānaṁ abbhatthaṁ gacchatīti yujjati desanā.\nKaruṇāvihārissa sato vihesā cittaṁ pariyādāya ṭhassatīti na yujjati desanā, vihesā pahānaṁ abbhatthaṁ gacchatīti yujjati desanā.\nMuditāvihārissa sato arati cittaṁ pariyādāya ṭhassatīti na yujjati desanā, arati pahānaṁ abbhatthaṁ gacchatīti yujjati desanā.\nUpekkhāvihārissa sato rāgo cittaṁ pariyādāya ṭhassatīti na yujjati desanā, rāgo pahānaṁ abbhatthaṁ gacchatīti yujjati desanā.\nAnimittavihārissa sato nimittānusārī tena teneva viññāṇaṁ pavattatīti na yujjati desanā, nimittaṁ pahānaṁ abbhatthaṁ gacchatīti yujjati desanā.\nAsmīti vigataṁ ayamahamasmīti na samanupassāmi.\nAtha ca pana me kismīti kathasmīti vicikicchā kathaṅkathāsallaṁ cittaṁ pariyādāya ṭhassatīti na yujjati desanā, vicikicchā kathaṅkathāsallaṁ pahānaṁ abbhatthaṁ gacchatīti yujjati desanā."}},{"id":"ne6:15","sourceIds":["ne6:15.1","ne6:15.2","ne6:15.3","ne6:15.4","ne6:15.5","ne6:15.6","ne6:15.7"],"kind":"text","text":{"pi":"Yathā vā pana paṭhamaṁ jhānaṁ samāpannassa sato kāmarāgabyāpādā visesāya saṁvattantīti na yujjati desanā, hānāya saṁvattantīti yujjati desanā.\nVitakkasahagatā vā saññāmanasikārā hānāya saṁvattantīti na yujjati desanā, visesāya saṁvattantīti yujjati desanā.\nDutiyaṁ jhānaṁ samāpannassa sato vitakkavicārasahagatā saññāmanasikārā visesāya saṁvattantīti na yujjati desanā, hānāya saṁvattantīti yujjati desanā.\nUpekkhāsukhasahagatā vā saññāmanasikārā hānāya saṁvattantīti na yujjati desanā, visesāya saṁvattantīti yujjati desanā.\nTatiyaṁ jhānaṁ samāpannassa sato pītisukhasahagatā saññāmanasikārā visesāya saṁvattantīti na yujjati desanā, hānāya saṁvattantīti yujjati desanā, upekkhāsatipārisuddhisahagatā vā saññāmanasikārā hānāya saṁvattantīti na yujjati desanā, visesāya saṁvattantīti yujjati desanā.\nCatutthaṁ jhānaṁ samāpannassa sato upekkhāsahagatā saññāmanasikārā visesāya saṁvattantīti na yujjati desanā, hānāya saṁvattantīti yujjati desanā.\nĀkāsānañcāyatanasahagatā vā saññāmanasikārā hānāya saṁvattantīti na yujjati desanā, visesāya saṁvattantīti yujjati desanā."}},{"id":"ne6:16","sourceIds":["ne6:16.1","ne6:16.2","ne6:16.3","ne6:16.4","ne6:16.5","ne6:16.6","ne6:16.7","ne6:16.8","ne6:16.9"],"kind":"text","text":{"pi":"Ākāsānañcāyatanaṁ samāpannassa sato rūpasahagatā saññāmanasikārā visesāya saṁvattantīti na yujjati desanā, hānāya saṁvattantīti yujjati desanā.\nViññāṇañcāyatanasahagatā vā saññāmanasikārā hānāya saṁvattantīti na yujjati desanā, visesāya saṁvattantīti yujjati desanā.\nViññāṇañcāyatanaṁ samāpannassa sato ākāsānañcāyatanasahagatā saññāmanasikārā visesāya saṁvattantīti na yujjati desanā, hānāya saṁvattantīti yujjati desanā.\nĀkiñcaññāyatanasahagatā vā saññāmanasikārā hānāya saṁvattantīti na yujjati desanā, visesāya saṁvattantīti yujjati desanā.\nĀkiñcaññāyatanaṁ samāpannassa sato viññāṇañcāyatanasahagatā saññāmanasikārā visesāya saṁvattantīti na yujjati desanā, hānāya saṁvattantīti yujjati desanā.\nNevasaññānāsaññāyatanasahagatā vā saññāmanasikārā hānāya saṁvattantīti na yujjati desanā, visesāya saṁvattantīti yujjati desanā.\nNevasaññānāsaññāyatanaṁ samāpannassa sato saññūpacārā visesāya saṁvattantīti na yujjati desanā, hānāya saṁvattantīti yujjati desanā.\nSaññāvedayitanirodhasahagatā vā saññāmanasikārā hānāya saṁvattantīti na yujjati desanā, visesāya saṁvattantīti yujjati desanā.\nKallatāparicitaṁ cittaṁ na ca abhinīhāraṁ khamatīti na yujjati desanā, kallatāparicitaṁ cittaṁ atha ca abhinīhāraṁ khamatīti yujjati desanā."}},{"id":"ne6:17","sourceIds":["ne6:17.1","ne6:17.2","ne6:17.3"],"kind":"text","text":{"pi":"Evaṁ sabbe navasuttantā yathādhammaṁ yathāvinayaṁ yathāsatthusāsanaṁ sabbato vicayena hārena vicinitvā yuttihārena yojetabbāti.\nTenāha āyasmā mahākaccāyano “sabbesaṁ hārānaṁ yā bhūmi yo ca gocaro tesan”ti.\nNiyutto yutti hāro."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ne6/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}