{"id":"ne7","title":"Padaṭṭhānahāravibhaṅga","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ne7","title":"Padaṭṭhānahāravibhaṅga","units":[{"id":"ne7:0","sourceIds":["ne7:0.1","ne7:0.2","ne7:0.3","ne7:0.4"],"kind":"text","text":{"pi":"Netti\nPaṭiniddesavāra\nVibhaṅga 4\nPadaṭṭhānahāravibhaṅga"}},{"id":"ne7:1","sourceIds":["ne7:1.1","ne7:1.2","ne7:1.3","ne7:1.4","ne7:1.5","ne7:1.6","ne7:1.7","ne7:1.8","ne7:1.9","ne7:1.10","ne7:1.11","ne7:1.12","ne7:1.13","ne7:1.14","ne7:1.15","ne7:1.16","ne7:1.17","ne7:1.18","ne7:1.19"],"kind":"text","text":{"pi":"Tattha katamo padaṭṭhāno hāro?\n“Dhammaṁ deseti jino”ti, ayaṁ padaṭṭhāno hāro.\nKiṁ deseti?\nSabbadhammayāthāvaasampaṭivedhalakkhaṇā avijjā, tassā vipallāsā padaṭṭhānaṁ.\nAjjhosānalakkhaṇā taṇhā, tassā piyarūpaṁ sātarūpaṁ padaṭṭhānaṁ.\nPatthanalakkhaṇo lobho, tassa adinnādānaṁ padaṭṭhānaṁ.\nVaṇṇasaṇṭhānabyañjanaggahaṇalakkhaṇā subhasaññā, tassā indriyā saṁvaro padaṭṭhānaṁ.\nSāsavaphassaupagamanalakkhaṇā sukhasaññā, tassā assādo padaṭṭhānaṁ.\nSaṅkhatalakkhaṇānaṁ dhammānaṁ asamanupassanalakkhaṇā niccasaññā, tassā viññāṇaṁ padaṭṭhānaṁ.\nAniccasaññādukkhasaññāasamanupassanalakkhaṇā attasaññā, tassā nāmakāyo padaṭṭhānaṁ.\nSabbadhammasampaṭivedhalakkhaṇā vijjā, tassā sabbaṁ neyyaṁ padaṭṭhānaṁ.\nCittavikkhepapaṭisaṁharaṇalakkhaṇo samatho, tassa asubhā padaṭṭhānaṁ.\nIcchāvacarapaṭisaṁharaṇalakkhaṇo alobho, tassa adinnādānā veramaṇī padaṭṭhānaṁ.\nAbyāpajjalakkhaṇo adoso, tassa pāṇātipātā veramaṇī padaṭṭhānaṁ.\nVatthuavippaṭipattilakkhaṇo amoho, tassa sammāpaṭipatti padaṭṭhānaṁ.\nVinīlakavipubbakagahaṇalakkhaṇā asubhasaññā, tassā nibbidā padaṭṭhānaṁ.\nSāsavaphassaparijānanalakkhaṇā dukkhasaññā, tassā vedanā padaṭṭhānaṁ.\nSaṅkhatalakkhaṇānaṁ dhammānaṁ samanupassanalakkhaṇā aniccasaññā, tassā uppādavayā padaṭṭhānaṁ.\nSabbadhammaabhinivesalakkhaṇā anattasaññā, tassā dhammasaññā padaṭṭhānaṁ."}},{"id":"ne7:2","sourceIds":["ne7:2.1","ne7:2.2","ne7:2.3","ne7:2.4","ne7:2.5","ne7:2.6","ne7:2.7","ne7:2.8"],"kind":"text","text":{"pi":"Pañca kāmaguṇā kāmarāgassa padaṭṭhānaṁ, pañcindriyāni rūpīni rūparāgassa padaṭṭhānaṁ, chaṭṭhāyatanaṁ bhavarāgassa padaṭṭhānaṁ, nibbattabhavānupassitā pañcannaṁ upādānakkhandhānaṁ padaṭṭhānaṁ, pubbenivāsānussatiñāṇadassanassa padaṭṭhānaṁ.\nOkappanalakkhaṇā saddhā adhimuttipaccupaṭṭhānā ca, anāvilalakkhaṇo pasādo sampasīdanapaccupaṭṭhāno ca.\nAbhipatthiyanalakkhaṇā saddhā, tassā aveccappasādo padaṭṭhānaṁ.\nAnāvilalakkhaṇo pasādo, tassa saddhā padaṭṭhānaṁ.\nĀrambhalakkhaṇaṁ vīriyaṁ, tassa sammappadhānaṁ padaṭṭhānaṁ.\nApilāpanalakkhaṇā sati, tassā satipaṭṭhānaṁ padaṭṭhānaṁ.\nEkaggalakkhaṇo samādhi, tassa jhānāni padaṭṭhānaṁ.\nPajānanalakkhaṇā paññā, tassā saccāni padaṭṭhānaṁ."}},{"id":"ne7:3","sourceIds":["ne7:3.1","ne7:3.2","ne7:3.3","ne7:3.4","ne7:3.5","ne7:3.6","ne7:3.7","ne7:3.8","ne7:3.9","ne7:3.10","ne7:3.11","ne7:3.12","ne7:3.13","ne7:3.14","ne7:3.15","ne7:3.16","ne7:3.17","ne7:3.18","ne7:3.19","ne7:3.20","ne7:3.21"],"kind":"text","text":{"pi":"Aparo nayo, assādamanasikāralakkhaṇo ayonisomanasikāro, tassa avijjā padaṭṭhānaṁ.\nSaccasammohanalakkhaṇā avijjā, sā saṅkhārānaṁ padaṭṭhānaṁ.\nPunabbhavavirohaṇalakkhaṇā saṅkhārā, te viññāṇassa padaṭṭhānaṁ.\nOpapaccayikanibbattilakkhaṇaṁ viññāṇaṁ, taṁ nāmarūpassa padaṭṭhānaṁ.\nNāmakāyarūpakāyasaṅghātalakkhaṇaṁ nāmarūpaṁ, taṁ chaḷāyatanassa padaṭṭhānaṁ.\nIndriyavavatthānalakkhaṇaṁ chaḷāyatanaṁ, taṁ phassassa padaṭṭhānaṁ.\nCakkhurūpaviññāṇasannipātalakkhaṇo phasso, so vedanāya padaṭṭhānaṁ.\nIṭṭhāniṭṭhaanubhavanalakkhaṇā vedanā, sā taṇhāya padaṭṭhānaṁ.\nAjjhosānalakkhaṇā taṇhā, sā upādānassa padaṭṭhānaṁ.\nOpapaccayikaṁ upādānaṁ, taṁ bhavassa padaṭṭhānaṁ.\nNāmakāyarūpakāyasambhavanalakkhaṇo bhavo, so jātiyā padaṭṭhānaṁ.\nKhandhapātubhavanalakkhaṇā jāti, sā jarāya padaṭṭhānaṁ.\nUpadhiparipākalakkhaṇā jarā, sā maraṇassa padaṭṭhānaṁ.\nJīvitindriyupacchedalakkhaṇaṁ maraṇaṁ, taṁ sokassa padaṭṭhānaṁ.\nUssukkakārako soko, so paridevassa padaṭṭhānaṁ.\nLālappakārako paridevo, so dukkhassa padaṭṭhānaṁ.\nKāyasampīḷanaṁ dukkhaṁ, taṁ domanassassa padaṭṭhānaṁ.\nCittasampīḷanaṁ domanassaṁ, taṁ upāyāsassa padaṭṭhānaṁ.\nOdahanakārako upāyāso, so bhavassa padaṭṭhānaṁ.\nImāni bhavaṅgāni yadā samaggāni nibbattāni bhavanti so bhavo, taṁ saṁsārassa padaṭṭhānaṁ.\nNiyyānikalakkhaṇo maggo, so nirodhassa padaṭṭhānaṁ."}},{"id":"ne7:4","sourceIds":["ne7:4.1","ne7:4.2","ne7:4.3","ne7:4.4","ne7:4.5"],"kind":"text","text":{"pi":"Titthaññutā pītaññutāya padaṭṭhānaṁ, pītaññutā pattaññutāya padaṭṭhānaṁ, pattaññutā attaññutāya padaṭṭhānaṁ, attaññutā pubbekatapuññatāya padaṭṭhānaṁ, pubbekatapuññatā patirūpadesavāsassa padaṭṭhānaṁ, patirūpadesavāso sappurisūpanissayassa padaṭṭhānaṁ, sappurisūpanissayo attasammāpaṇidhānassa padaṭṭhānaṁ, attasammāpaṇidhānaṁ sīlānaṁ padaṭṭhānaṁ, sīlāni avippaṭisārassa padaṭṭhānaṁ, avippaṭisāro pāmojjassa padaṭṭhānaṁ, pāmojjaṁ pītiyā padaṭṭhānaṁ, pīti passaddhiyā padaṭṭhānaṁ, passaddhi sukhassa padaṭṭhānaṁ, sukhaṁ samādhissa padaṭṭhānaṁ, samādhi yathābhūtañāṇadassanassa padaṭṭhānaṁ, yathābhūtañāṇadassanaṁ nibbidāya padaṭṭhānaṁ, nibbidā virāgassa padaṭṭhānaṁ, virāgo vimuttiyā padaṭṭhānaṁ.\nVimutti vimuttiñāṇadassanassa padaṭṭhānaṁ.\nEvaṁ yo koci upanissayo yo koci paccayo, sabbo so padaṭṭhānaṁ.\nTenāha āyasmā mahākaccāyano “dhammaṁ deseti jino”ti.\nNiyutto padaṭṭhāno hāro."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ne7/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}