{"id":"ne8","title":"Lakkhaṇahāravibhaṅga","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ne8","title":"Lakkhaṇahāravibhaṅga","units":[{"id":"ne8:0","sourceIds":["ne8:0.1","ne8:0.2","ne8:0.3","ne8:0.4"],"kind":"text","text":{"pi":"Netti\nPaṭiniddesavāra\nVibhaṅga 5\nLakkhaṇahāravibhaṅga"}},{"id":"ne8:1","sourceIds":["ne8:1.1","ne8:1.2","ne8:1.3","ne8:1.4","ne8:1.5","ne8:1.6"],"kind":"text","text":{"pi":"Tattha katamo lakkhaṇo hāro?\n“Vuttamhi ekadhamme”ti, ayaṁ lakkhaṇo hāro.\nKiṁ lakkhayati?\nYe dhammā ekalakkhaṇā, tesaṁ dhammānaṁ ekasmiṁ dhamme vutte avasiṭṭhā dhammā vuttā bhavanti.\nYathā kiṁ bhave?\nYathāha bhagavā—"}},{"id":"ne8:2","sourceIds":["ne8:2.1","ne8:2.2","ne8:2.3","ne8:2.4","ne8:2.5"],"kind":"text","text":{"pi":"“Cakkhuṁ, bhikkhave, anavaṭṭhitaṁ ittaraṁ parittaṁ pabhaṅgu parato dukkhaṁ byasanaṁ calanaṁ kukkuḷaṁ saṅkhāraṁ vadhakaṁ amittamajjhe”.\nImasmiṁ cakkhusmiṁ vutte avasiṭṭhāni ajjhattikāni āyatanāni vuttāni bhavanti.\nKena kāraṇena?\nSabbāni hi cha ajjhattikāni āyatanāni vadhakaṭṭhena ekalakkhaṇāni.\nYathā cāha bhagavā—"}},{"id":"ne8:3","sourceIds":["ne8:3.1","ne8:3.2","ne8:3.3","ne8:3.4","ne8:3.5"],"kind":"text","text":{"pi":"“Atīte, rādha, rūpe anapekkho hohi, anāgataṁ rūpaṁ mā abhinandi, paccuppannassa rūpassa nibbidāya virāgāya nirodhāya cāgāya paṭinissaggāya paṭipajja”.\nImasmiṁ rūpakkhandhe vutte avasiṭṭhā khandhā vuttā bhavanti.\nKena kāraṇena?\nSabbe hi pañcakkhandhā yamakovādasutte vadhakaṭṭhena ekalakkhaṇā vuttā.\nYathā cāha bhagavā—"}},{"id":"ne8:4","sourceIds":["ne8:4.1","ne8:4.2","ne8:4.3","ne8:4.4"],"kind":"text","text":{"pi":"“Yesañca susamāraddhā,\nniccaṁ kāyagatāsati;\nAkiccaṁ te na sevanti,\nkicce sātaccakārino”."}},{"id":"ne8:5","sourceIds":["ne8:5.1","ne8:5.2","ne8:5.3"],"kind":"text","text":{"pi":"Iti kāyagatāya satiyā vuttāya vuttā bhavanti vedanāgatā sati cittagatā dhammagatā ca.\nTathā yaṁ kiñci diṭṭhaṁ vā sutaṁ vā mutaṁ vāti vutte vuttaṁ bhavati viññātaṁ.\nYathā cāha bhagavā—"}},{"id":"ne8:6","sourceIds":["ne8:6.1","ne8:6.2","ne8:6.3"],"kind":"text","text":{"pi":"“Tasmātiha tvaṁ bhikkhu kāye kāyānupassī viharāhi ātāpī sampajāno satimā vineyya loke abhijjhādomanassaṁ”.\n“Ātāpī”ti vīriyindriyaṁ, “sampajāno”ti paññindriyaṁ, “satimā”ti satindriyaṁ, “vineyya loke abhijjhādomanassan”ti samādhindriyaṁ, evaṁ kāye kāyānupassino viharato cattāro satipaṭṭhānā bhāvanāpāripūriṁ gacchanti.\nKena kāraṇena, ekalakkhaṇattā catunnaṁ indriyānaṁ."}},{"id":"ne8:7","sourceIds":["ne8:7.1","ne8:7.2"],"kind":"text","text":{"pi":"Catūsu satipaṭṭhānesu bhāviyamānesu cattāro sammappadhānā bhāvanāpāripūriṁ gacchanti, catūsu sammappadhānesu bhāviyamānesu cattāro iddhipādā bhāvanāpāripūriṁ gacchanti, catūsu iddhipādesu bhāviyamānesu pañcindriyāni bhāvanāpāripūriṁ gacchanti, pañcasu indriyesu bhāviyamānesu pañca balāni bhāvanāpāripūriṁ gacchanti, pañcasu balesu bhāviyamānesu satta bojjhaṅgā bhāvanāpāripūriṁ gacchanti, sattasu bojjhaṅgesu bhāviyamānesu ariyo aṭṭhaṅgiko maggo bhāvanāpāripūriṁ gacchati, sabbeva bodhaṅgamā dhammā bodhipakkhiyā bhāvanāpāripūriṁ gacchanti.\nKena kāraṇena, sabbe hi bodhaṅgamā bodhipakkhiyā neyyānikalakkhaṇena ekalakkhaṇā, te ekalakkhaṇattā bhāvanāpāripūriṁ gacchanti."}},{"id":"ne8:8","sourceIds":["ne8:8.1","ne8:8.2"],"kind":"text","text":{"pi":"Evaṁ akusalāpi dhammā ekalakkhaṇattā pahānaṁ abbhatthaṁ gacchanti.\nCatūsu satipaṭṭhānesu bhāviyamānesu vipallāsā pahīyanti, āhārā cassa pariññaṁ gacchanti, upādānehi anupādāno bhavati, yogehi ca visaṁyutto bhavati, ganthehi ca vippayutto bhavati, āsavehi ca anāsavo bhavati, oghehi ca nitthiṇṇo bhavati, sallehi ca visallo bhavati, viññāṇaṭṭhitiyo cassa pariññaṁ gacchanti, agatigamanehi na agatiṁ gacchati, evaṁ akusalāpi dhammā ekalakkhaṇattā pahānaṁ abbhatthaṁ gacchanti."}},{"id":"ne8:9","sourceIds":["ne8:9.1","ne8:9.2","ne8:9.3","ne8:9.4","ne8:9.5","ne8:9.6","ne8:9.7"],"kind":"text","text":{"pi":"Yattha vā pana rūpindriyaṁ desitaṁ, desitā tattheva rūpadhātu rūpakkhandho rūpañcāyatanaṁ.\nYattha vā pana sukhā vedanā desitā, desitaṁ tattha sukhindriyaṁ somanassindriyaṁ dukkhasamudayo ca ariyasaccaṁ.\nYattha vā pana dukkhā vedanā desitā, desitaṁ tattha dukkhindriyaṁ domanassindriyaṁ dukkhañca ariyasaccaṁ.\nYattha vā pana adukkhamasukhā vedanā desitā, desitaṁ tattha upekkhindriyaṁ sabbo ca paṭiccasamuppādo.\nKena kāraṇena, adukkhamasukhāya hi vedanāya avijjā anuseti.\nAvijjāpaccayā saṅkhārā, saṅkhārapaccayā viññāṇaṁ, viññāṇapaccayā nāmarūpaṁ, nāmarūpapaccayā saḷāyatanaṁ, saḷāyatanapaccayā phasso, phassapaccayā vedanā, vedanāpaccayā taṇhā, taṇhāpaccayā upādānaṁ, upādānapaccayā bhavo, bhavapaccayā jāti, jātipaccayā jarāmaraṇaṁ sokaparidevadukkhadomanassupāyāsā sambhavanti, evametassa kevalassa dukkhakkhandhassa samudayo hoti.\nSo ca sarāgasadosasamohasaṅkilesapakkhena hātabbo, vītarāgavītadosavītamohaariyadhammehi hātabbo."}},{"id":"ne8:10","sourceIds":["ne8:10.1","ne8:10.2","ne8:10.3"],"kind":"text","text":{"pi":"Evaṁ ye dhammā ekalakkhaṇā kiccato ca lakkhaṇato ca sāmaññato ca cutūpapātato ca, tesaṁ dhammānaṁ ekasmiṁ dhamme vutte avasiṭṭhā dhammā vuttā bhavanti.\nTenāha āyasmā mahākaccāyano “vuttamhi ekadhamme”ti.\nNiyutto lakkhaṇo hāro."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ne8/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}