{"id":"pe4","title":"4. Suttavicayacatutthabhūmi","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"pe4","title":"4. Suttavicayacatutthabhūmi","units":[{"id":"pe4:0","sourceIds":["pe4:0.1","pe4:0.2"],"kind":"text","text":{"pi":"Peṭakopadesa\n4. Suttavicayacatutthabhūmi"}},{"id":"pe4:1","sourceIds":["pe4:1.1"],"kind":"text","text":{"pi":"Tattha katamo suttavicayo?"}},{"id":"pe4:2","sourceIds":["pe4:2.1","pe4:2.2"],"kind":"text","text":{"pi":"Tattha kusalehi dhammehi akusalehi dhammehi pubbāparaso sādhukaṁ upaparikkhiyati.\nKiṁ nu kho idaṁ suttaṁ ārabhi …pe… tehi suttehi saha adhisannaṭṭhehi yujjati udāhu na yujjatīti?"}},{"id":"pe4:3","sourceIds":["pe4:3.1","pe4:3.2","pe4:3.3","pe4:3.4","pe4:3.5","pe4:3.6","pe4:3.7","pe4:3.8","pe4:3.9","pe4:3.10","pe4:3.11","pe4:3.12","pe4:3.13","pe4:3.14","pe4:3.15","pe4:3.16","pe4:3.17","pe4:3.18","pe4:3.19","pe4:3.20","pe4:3.21","pe4:3.22","pe4:3.23","pe4:3.24","pe4:3.25","pe4:3.26","pe4:3.27","pe4:3.28","pe4:3.29","pe4:3.30"],"kind":"text","text":{"pi":"Yathā bhagavā kilese ādimhi tattha deseti.\nKiṁ desitaṁ?\nTesaṁ kilesānaṁ pahānaṁ udāhu no desitanti upaparikkhitabbaṁ.\nYadi na desitaṁ bhagavati tesaṁ kilesānaṁ pahānaṁ kusalā dhammā pariyesitabbā;\nyattha te akusalā pahānaṁ gacchanti.\nSace samannehamāno na labhati.\nTattha akusalā dhammā apakaḍḍhitabbā vīmaṁsitabbā, saṅkilesabhāgiyasuttaṁ, yadi kilesā apakaḍḍhiyantā.\nYe vā na denti tattha upaparikkhitabbā ariyamaggadhammā tāsu bhūmīsu kilesā pahānaṁ gacchanti, udāhu na gacchantīti.\nYattakā pana kilesā desitā.\nNa tattakā ariyadhammā desitā.\nYattha kilesā pahānaṁ gacchanti, tattha ye kilesā ariyadhammānaṁ paṭipakkhena na yujjanti, te apakaḍḍhitabbā, sace apakaḍḍhiyantā yojanaṁ deti.\nTattha evaṁ vīmaṁsitabbaṁ.\nDve tīṇi vā taduttari vā kilesā ekena ariyamaggena pahānaṁ gacchantīti.\nSace evaṁ vīmaṁsiyantā yojanaṁ deti, tattha upaparikkhitabbaṁ.\nParamparāya vā piṭakasampadānena vā suttassa attho ca nattho ca.\nYaṁ vā na sakkā suttaṁ niddisituṁ neva suttaṁ vicikicchitabbaṁ.\nEvaṁ yathā ādimhi kusalā dhammā honti.\nYe kilesā te pahīneyyāti.\nTe upaparikkhitabbā.\nPuro vā kusalo paṭipakkhena vā puro desanā, anūnā anadhikā uggahetabbā.\nYathā paṭhamo uttilo yesamidāni kilesānaṁ ye ariyadhammā desitā ime kilesā imehi ariyadhammehi pahīyanti, udāhu nappahīyantīti vicinitabbā.\nYadi upaparikkhiyamānā yujjanti, gahetabbā.\nAtha na yujjanti, ye kilesā apaṭipakkhā honti, te kilesā aparipakkhitabbā.\nYe ca ariyadhammā paṭipakkhā honti, te ariyadhammā apakaḍḍhitabbā.\nNa hi ariyadhammā anāgāmikilesappahānaṁ gacchanti, nāpi ariyadhammā sabbakilesānaṁ pahānāya saṁvattanti.\nYathā kusalā mettā akusalo rāgo na tu kusalā mettāti kāretvā akusalassa rāgassa pahānāya sambhavati byāpādo mettāya pahānaṁ gacchati.\nTasmā ubho kilesā upaparikkhitabbā.\nYo yo ca dhammo upadisiyati kusalo vā akusalo vā so apakaḍḍhitabbo.\nSace te yujjanti apakaḍḍhiyamāno natthi upaparikkhitabbaṁ.\nDve vā kilesā ekena ariyadhammena pahīneyyāti dvīhi vā ariyadhammehi eko vā kileso pahīyatīti."}},{"id":"pe4:4","sourceIds":["pe4:4.1","pe4:4.2","pe4:4.3","pe4:4.4","pe4:4.5","pe4:4.6","pe4:4.7","pe4:4.8","pe4:4.9","pe4:4.10"],"kind":"text","text":{"pi":"Atha vā evampi upaparikkhiyamānaṁ yujjati, tattha vīmaṁsitabbaṁ vā yathā yujjati tattha vīmaṁsitabbaṁ vā, yathā nanu sakkā suttaṁ niddisituṁ, na hi sutte vicikicchitabbaṁ.\nKileso maṁ ariyadhammesu desitesu ubhayato upaparikkhitabbaṁ.\nKira ye vā ime kilesā desitā ye ca ariyadhammā desitā gāthāya vā byākaraṇena vā, kiṁ nu kho ime kilesā imehi ariyadhammehi pahīyanti, udāhu nappahīyanti?\nIme vā ariyadhammā imesaṁ kilesānaṁ pahānāya saṁvattantīti.\nKiñcāpi kusalehi dhammehi akusalā dhammā pahānaṁ gacchanti.\nNa tu sabbehi ariyadhammehi sabbākusalā pahānaṁ gacchanti.\nYathā mettā kusalo akusalo ca rāgo na tu kusalā mettā akusalo rāgoti kāretvā mettāya rāgo pahānaṁ, byāpādo mettāya pahānaṁ gacchanti.\nEvaṁ kilesoti kāretvā suttena pahānaṁ gacchati.\nNa sutto dhammoti kāretvā sabbaṁ kilesassa pahānāya saṁvattati.\nYaṁ tu suttassa ariyadhammo saṅkilesapaṭipakkho, so tena pahānaṁ gacchatīti."}},{"id":"pe4:5","sourceIds":["pe4:5.1","pe4:5.2","pe4:5.3","pe4:5.4","pe4:5.5","pe4:5.6","pe4:5.7","pe4:5.8","pe4:5.9","pe4:5.10","pe4:5.11","pe4:5.12","pe4:5.13","pe4:5.14","pe4:5.15","pe4:5.16","pe4:5.17","pe4:5.18"],"kind":"text","text":{"pi":"Tattha kusale desite sutte byākaraṇe vā saṅkilesā na yujjanti ariyadhammā vā, te mahāpadese niddisitabbāvayavena apakaḍḍhitabbā.\nTattha kilesehi ca desitehi ariyadhammesu ca yadipi tena ariyadhammena te kilesā pahānaṁ gacchanti.\nTatthapi uttari upaparikkhitabbaṁ.\nKena kāraṇena ete kilesā pajahitabbā, kena kāraṇena ariyadhammā desitāti?\nYena yena vā ākārena ariyadhammā desitā, tena tena pakārena ayaṁ kileso ṭhito.\nAtthi hi eko kileso, tena vā ariyadhammā na aññathā aññathā pahātabbo, yathā diṭṭhi rāgo avijjā ca dassanena pahātabbā.\nSā ce evañca avijjā bhāvanāya bhūmi vā dhammā bhāvanāya pahātabbā.\nSāyeva uddhambhāgiyaṁ asaṅkhatadassanāya vimuttiyā animittena cetosamādhinā amanasikārena pahīyati.\nEvaṁ sātthaṁ sabyañjanaṁ upaparikkhitabbaṁ.\nYe dassanena pahātabbā kilesā dassanākārena ariyadhammo desito, bhāvanāya pahātabbā bhāvanākārena ariyadhammo desito, patisevanā pahātabbā patisevanākārena ariyadhammo desito, evaṁ vinodanapahātabbā yāva satta āsavā kātabbā, yāvaññathā.\nAññathā hesa dhammo pahātabbo aññenākārena ariyadhammo desito, so ariyadhammo aññathā pariyesitabbo.\nYadi ayaṁ dhammo pariyesato yo ca deseti yena yenākārena, so ariyadhammo pariyesitabbo, tenākārena kileso pahīyati.\nSo tattha upaparikkhitabbo.\nAtha na yujjati yadi hi tena suttena vihitaṁ suttaṁ vīmaṁsitabbaṁ.\nYathā yujjati, tathā gahetabbaṁ.\nYathā na yujjati, tathā na gahetabbaṁ, addhā etaṁ bhagavatā na bhāsitaṁ, āyasmatā vā duggahitaṁ, yathā mahāpadese niddisitabbaṁ, bhagavatā yathābhūtaṁ desitaṁ, yo ca dhammo desito kusalo ca akusalo ca tassa dhammassa paccayo pariyesitabbo.\nNa hi paccayā vinā dhammo appaccayo uppajjati.\nTattha ko ākāro pariyesanāya?"}},{"id":"pe4:6","sourceIds":["pe4:6.1","pe4:6.2","pe4:6.3","pe4:6.4","pe4:6.5","pe4:6.6","pe4:6.7","pe4:6.8","pe4:6.9","pe4:6.10","pe4:6.11","pe4:6.12","pe4:6.13","pe4:6.14","pe4:6.15","pe4:6.16","pe4:6.17","pe4:6.18"],"kind":"text","text":{"pi":"Tattha tathārūpaṁ sahetu sappaccayaṁ soyaṁ dhammo vuttoti idaṁ vīmaṁsitabbaṁ.\nSo ca paccayo tividho—\nmudu majjho adhimatto.\nTattha mudumhi paccaye mududhammo gahetabbo, evaṁ satyesa paccayo duvidho paramparāpaccayo ca samanantarapaccayo ca.\nSo paccayo mudutena byādhimattaṁ pariyesitabbaṁ.\nKiṅkāraṇaṁ?\nAññataropi paccayo aññehi paccayehi pariyattiṁ vā pāripūriṁ vā gacchati.\nTattha yo dhammo desito, tassa dhammassa etena vā kāraṇena vā hetu pariyesitabbo.\nYathā paccayo hetunā paccayena ca, so tassa dhammassa nissando pariyesitabbo.\nYathā niddiṭṭho adhiṭṭhāne padhānaṁ pariyesati, so paccayo pariyesitabbo.\nNa hi mudussa dhammassa adhimatto nissando adhimattassa vā nissandassa mududhammo, atha mudussa mudu majjhāya majjho adhimattassa adhimatto yujjati, taṁ gahetabbaṁ, atha na yujjati na gahetabbaṁ.\nYañca bhagavā ārabhati dhammaṁ desetuṁ, taṁyeva dhammaṁ majjhantapariyosānaṁ deseti, yathā suttādhiṭṭhāne dhammā ādimhi niddisati, taṁyeva bahu tassa suttassa pariyosānaṁ.\nTassa hi dhammassa vasena taṁ suttaṁ hoti gāthā vā byākaraṇaṁ khuddakaṁ mahantaṁ vā, yathā pana duvidhā anurūpanti vā thapanā ca desanāthapanā.\nRūpantipi dhammassa pariyesitabbā.\nYathā ca bhagavatā pañcannaṁ indriyānaṁ saṁvaraṇaṁ desitaṁ taṇhāya niggahaṇatthaṁ icchāva hoti.\nDeseti yathā gopālakopame sutte aññehipi suttehi bhagavā bhāsati icchāva hoti majjhimanikāye vitakko ayaṁ bhagavato desanānurūpanti iti so dhammo aññesupi veyyākaraṇesu pariyesitabbo.\nNa hi ekaṁ hi sutte daṭṭhabbo.\nYujjanaṁ taṁ gahetabbaṁ."}},{"id":"pe4:7","sourceIds":["pe4:7.1","pe4:7.2","pe4:7.3","pe4:7.4","pe4:7.5","pe4:7.6","pe4:7.7"],"kind":"text","text":{"pi":"Tattha katamaṁ anuññātaṁ?\nYaṁ kiñci suttaṁ bhagavatā na bhāsitaṁ tañca suttesuyeva dissati, evametaṁ dhāretabbaṁ.\nYathā asukena bhāsitanti, taṁ suttaṁ vīmaṁsitabbaṁ.\nKiṁ nu kho imaṁ suttaṁ anuññātaṁ khamaṁ bhagavato udāhu nānuññātaṁ khamaṁ, kiñci rūpañca suttaṁ bhagavato anuññātaṁ khamaṁ kiñci rūpañca nānuññātaṁ khamaṁ?\nYaṁ sabbaso anotāretvā dasabalo gocaraṁ deseti, taṁ sabbaṁ suttaṁ bhagavato nānuññātaṁ khamaṁ.\nAtthipi so sāvako dasabalānaṁ gocaraṁ jānāti odhiso anodhiso, taṁ pana balaṁ sabbaso na jānāti aññathā nāma savanena, yathā āyasmatā sāriputtena yena brāhmaṇo ovadito, tassa āyasmato natthi indriyabalavemattañāṇaṁ, tena puggalaparo parañca taṁ ajānanto sati uttarikaraṇīye uppādito, so bhagavatā apasādito.\nYathāva āyasmā mahākassapo bhāgineyyaṁ ovadati anantariyasamannāgato iddhipāṭihīrena aṅguliyo adīpetvā yaṁ sabbesaṁ dhammānaṁ kammasamādānānaṁ hetuso ṭhānaso yathābhūtaṁ ñāṇaṁ, tassa āyasmato saṁvijjate, tena naṁ ovadati, taṁ bhagavā karoti."}},{"id":"pe4:8","sourceIds":["pe4:8.1","pe4:8.2","pe4:8.3","pe4:8.4"],"kind":"text","text":{"pi":"“Sacepi dasa pajjote,\ndhārayissasi kassapa;\nNeva dakkhati rūpāni,\ncakkhu tassa na vijjatī”ti."}},{"id":"pe4:9","sourceIds":["pe4:9.1","pe4:9.2","pe4:9.3"],"kind":"text","text":{"pi":"Api ca kho yathā dūto rājavacanena sattamanusāsati, evaṁ sesānugo aññātakaṁ ghosaṁ paresaṁ deseti.\nAnuññātakhamasuttaṁ gahetabbaṁ.\nAnanuññātakhamaṁ na gahetabbaṁ."}},{"id":"pe4:10","sourceIds":["pe4:10.1","pe4:10.2","pe4:10.3","pe4:10.4","pe4:10.5","pe4:10.6","pe4:10.7","pe4:10.8","pe4:10.9","pe4:10.10"],"kind":"text","text":{"pi":"Tattha katamo suttasaṅkaro?\nPañcavidhaṁ suttaṁ, saṅkilesabhāgiyaṁ vāsanābhāgiyaṁ dassanabhāgiyaṁ bhāvanābhāgiyaṁ asekkhabhāgiyaṁ.\nAññaṁ ārādheyya aññaṁ deseti aññassa ca suttassa atthaṁ aññamhi sutte niddisati.\nSuttassa vā hi anekākāraṁ atthaṁ niddisati.\nAriyadhammasādhane atthaṁ vivarati.\nVāsanābhāgiyassa atthaṁ dassanabhāgiyesu niddisati.\nOrambhāgiyānaṁ saṁyojanānaṁ atthaṁ uddhambhāgiyesu niddisati.\nMudumajjhānaṁ indriyānaṁ adhimattesu suttesu niddisati.\nIti ayaṁ suttaṁ sambhedaṁ hetunā ca nissandena ca phalena ca niddesena ca mudumajjhādhimattatāyapi ca atthena ca byañjanena ca yo sambhedo, ayaṁ vuccati suttasaṅkaro.\nYo asambhedo, ayaṁ vuccati suttavicayo."}},{"id":"pe4:11","sourceIds":["pe4:11.1"],"kind":"text","text":{"pi":"Tatthāyaṁ uddānagāthā"}},{"id":"pe4:12","sourceIds":["pe4:12.1","pe4:12.2","pe4:12.3","pe4:12.4"],"kind":"text","text":{"pi":"Purimānaṁ akkhaṇḍaṁ,\nyathābhūtassa paccayo;\nNissando vāsanāsaddhi,\nanuññā suttasaṅkaro."}},{"id":"pe4:13","sourceIds":["pe4:13.1"],"kind":"text","text":{"pi":"Therassa mahākaccāyanassa suttavicayo nāma catutthabhūmi."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/pe4/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}