{"id":"pli-tv-bu-vb-pc84","title":"Picking up precious things","languageCodes":["en","pi"],"languageNotes":{"en":"Bhikkhu Brahmāli · CC0","pi":"Mahāsaṅgīti edition · SuttaCentral"},"chapters":[{"id":"pli-tv-bu-vb-pc84","title":"Picking up precious things","units":[{"id":"pli-tv-bu-vb-pc84:0","sourceIds":["pli-tv-bu-vb-pc84:0.1","pli-tv-bu-vb-pc84:0.2","pli-tv-bu-vb-pc84:0.3","pli-tv-bu-vb-pc84:0.4","pli-tv-bu-vb-pc84:0.5"],"kind":"text","text":{"pi":"Theravāda Vinaya\nMahāvibhaṅga\nPācittiyakaṇḍa\nRatanavagga\n84. Ratanasikkhāpada","en":"Theravāda Collection on Monastic Law\nThe Great Analysis\nThe chapter on offenses entailing confession\nThe subchapter on precious things\nPicking up precious things"}},{"id":"pli-tv-bu-vb-pc84:1.0","sourceIds":["pli-tv-bu-vb-pc84:1.0.1","pli-tv-bu-vb-pc84:1.0.2"],"kind":"text","text":{"en":"Origin story\nFirst substory"}},{"id":"pli-tv-bu-vb-pc84:1","sourceIds":["pli-tv-bu-vb-pc84:1.1","pli-tv-bu-vb-pc84:1.2","pli-tv-bu-vb-pc84:1.3","pli-tv-bu-vb-pc84:1.4","pli-tv-bu-vb-pc84:1.5","pli-tv-bu-vb-pc84:1.6","pli-tv-bu-vb-pc84:1.7","pli-tv-bu-vb-pc84:1.8","pli-tv-bu-vb-pc84:1.9","pli-tv-bu-vb-pc84:1.10","pli-tv-bu-vb-pc84:1.11","pli-tv-bu-vb-pc84:1.12","pli-tv-bu-vb-pc84:1.13","pli-tv-bu-vb-pc84:1.14","pli-tv-bu-vb-pc84:1.15","pli-tv-bu-vb-pc84:1.16"],"kind":"text","text":{"pi":"Tena samayena buddho bhagavā sāvatthiyaṁ viharati jetavane anāthapiṇḍikassa ārāme.\nTena kho pana samayena aññataro bhikkhu aciravatiyā nadiyā nahāyati. Aññataropi brāhmaṇo pañcasatānaṁ thavikaṁ thale nikkhipitvā aciravatiyā nadiyā nahāyanto vissaritvā agamāsi.\nAtha kho so bhikkhu—“tassāyaṁ brāhmaṇassa thavikā, mā idha nassī”ti aggahesi.\nAtha kho so brāhmaṇo saritvā turito ādhāvitvā taṁ bhikkhuṁ etadavoca—“api me, bho, thavikaṁ passeyyāsī”ti?\n“Handa, brāhmaṇā”ti adāsi.\nAtha kho tassa brāhmaṇassa etadahosi—“kena nu kho ahaṁ upāyena imassa bhikkhuno puṇṇapattaṁ na dadeyyan”ti.\n“Na me, bho, pañcasatāni, sahassaṁ me”ti palibundhetvā muñci.\nAtha kho so bhikkhu ārāmaṁ gantvā bhikkhūnaṁ etamatthaṁ ārocesi.\nYe te bhikkhū appicchā …pe… te ujjhāyanti khiyyanti vipācenti—\n“kathañhi nāma bhikkhu ratanaṁ uggahessatī”ti …pe…\n“saccaṁ kira tvaṁ, bhikkhu, ratanaṁ uggahesī”ti?\n“Saccaṁ, bhagavā”ti.\nVigarahi buddho bhagavā …pe…\nkathañhi nāma tvaṁ, moghapurisa, ratanaṁ uggahessasi.\nNetaṁ, moghapurisa, appasannānaṁ vā pasādāya …pe…\nevañca pana, bhikkhave, imaṁ sikkhāpadaṁ uddiseyyātha—","en":"At one time when the Buddha was staying at Sāvatthī in Anāthapiṇḍika’s Monastery,\na monk was bathing in the river Aciravatī, when a brahmin, too, came there to bathe. He deposited a bag with five hundred coins on the ground, bathed, forgot about the bag, and left.\nThe monk thought, “This is the bag belonging to that brahmin; it wouldn’t be nice if it got lost,” and he picked it up.\nSoon the brahmin remembered. He hurried back and asked that monk, “Sir, did you see my bag?”\nSaying, “I did indeed,” he gave it to him.\nThe brahmin thought, “How can I avoid giving a reward to this monk?”\nAnd he said, “I didn’t have five hundred coins, I had a thousand!” And he seized hold of that monk.\nAfter being released, that monk went to the monastery and told the monks what had happened.\nThe monks of few desires complained and criticized him,\n“How could a monk pick up precious things?” …\n“Is it true, monk, that you did this?”\n“It’s true, sir.”\nThe Buddha rebuked him …\n“Foolish man, how could you do this?\nThis will affect people’s confidence …” …\n“And, monks, this training rule should be recited like this:"}},{"id":"pli-tv-bu-vb-pc84:1.17","sourceIds":["pli-tv-bu-vb-pc84:1.17.0","pli-tv-bu-vb-pc84:1.17.1"],"kind":"text","text":{"en":"First preliminary ruling\n‘If a monk picks up something precious or something regarded as precious, or he has it picked up, he commits an offense entailing confession.’”","pi":"“Yo pana bhikkhu ratanaṁ vā ratanasammataṁ vā uggaṇheyya vā uggaṇhāpeyya vā, pācittiyan”ti."}},{"id":"pli-tv-bu-vb-pc84:1-from-pli-tv-bu-vb-pc84-1.18","sourceIds":["pli-tv-bu-vb-pc84:1.18"],"kind":"text","text":{"pi":"Evañcidaṁ bhagavatā bhikkhūnaṁ sikkhāpadaṁ paññattaṁ hoti.","en":"In this way the Buddha laid down this training rule for the monks."}},{"id":"pli-tv-bu-vb-pc84:2","sourceIds":["pli-tv-bu-vb-pc84:2.0","pli-tv-bu-vb-pc84:2.1","pli-tv-bu-vb-pc84:2.2","pli-tv-bu-vb-pc84:2.3","pli-tv-bu-vb-pc84:2.4","pli-tv-bu-vb-pc84:2.5","pli-tv-bu-vb-pc84:2.6","pli-tv-bu-vb-pc84:2.7","pli-tv-bu-vb-pc84:2.8","pli-tv-bu-vb-pc84:2.9","pli-tv-bu-vb-pc84:2.10","pli-tv-bu-vb-pc84:2.11"],"kind":"text","text":{"en":"Second substory\nSoon afterwards there was a celebration in Sāvatthī. People were going to the park all dressed up,\nas did Visākhā Migāramātā.\nAs she was leaving her village, she thought, “What will I do when I get to the park? Why don’t I pay a visit to the Buddha!”\nShe then removed all her ornaments, bound them in a bundle with her upper robe, and gave it to her slave girl, saying, “Listen, look after this bundle.”\nVisākhā then went to the Buddha, bowed, and sat down.\nAnd the Buddha instructed, inspired, and gladdened her with a teaching, after which she got up from her seat, bowed down, circumambulated him with her right side toward him, and left.\nAnd the slave girl left too, forgetting the bundle.\nThe monks saw it and told the Buddha. “Well then, monks, pick it up and put it aside.”\nSoon afterwards the Buddha gave a teaching and addressed the monks:\n“Within a monastery, monks, you should pick up precious things or what’s regarded as precious, or have it picked up, and then put it aside with the thought, ‘Whoever owns it will come and get it.’\nAnd so, monks, this training rule should be recited like this:","pi":"Tena kho pana samayena sāvatthiyā ussavo hoti. Manussā alaṅkatappaṭiyattā uyyānaṁ gacchanti.\nVisākhāpi migāramātā alaṅkatappaṭiyattā “uyyānaṁ gamissāmī”ti\ngāmato nikkhamitvā—“kyāhaṁ karissāmi uyyānaṁ gantvā, yannūnāhaṁ bhagavantaṁ payirupāseyyan”ti\nābharaṇaṁ omuñcitvā uttarāsaṅgena bhaṇḍikaṁ bandhitvā dāsiyā adāsi—“handa, je, imaṁ bhaṇḍikaṁ gaṇhāhī”ti.\nAtha kho visākhā migāramātā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi.\nEkamantaṁ nisinnaṁ kho visākhaṁ migāramātaraṁ bhagavā dhammiyā kathāya sandassesi samādapesi samuttejesi sampahaṁsesi. Atha kho visākhā migāramātā bhagavatā dhammiyā kathāya sandassitā samādapitā samuttejitā sampahaṁsitā uṭṭhāyāsanā bhagavantaṁ abhivādetvā padakkhiṇaṁ katvā pakkāmi.\nAtha kho sā dāsī taṁ bhaṇḍikaṁ vissaritvā agamāsi.\nBhikkhū passitvā bhagavato etamatthaṁ ārocesuṁ. “Tena hi, bhikkhave, uggahetvā nikkhipathā”ti.\nAtha kho bhagavā etasmiṁ nidāne etasmiṁ pakaraṇe dhammiṁ kathaṁ katvā bhikkhū āmantesi—\n“anujānāmi, bhikkhave, ratanaṁ vā ratanasammataṁ vā ajjhārāme uggahetvā vā uggahāpetvā vā nikkhipituṁ—‘yassa bhavissati so harissatī’ti.\nEvañca pana, bhikkhave, imaṁ sikkhāpadaṁ uddiseyyātha—"}},{"id":"pli-tv-bu-vb-pc84:2.12","sourceIds":["pli-tv-bu-vb-pc84:2.12.0","pli-tv-bu-vb-pc84:2.12.1"],"kind":"text","text":{"en":"Second preliminary ruling\n‘If a monk picks up something precious or something regarded as precious, or he has it picked up, except within a monastery, he commits an offense entailing confession.’”","pi":"“Yo pana bhikkhu ratanaṁ vā ratanasammataṁ vā, aññatra ajjhārāmā, uggaṇheyya vā uggaṇhāpeyya vā, pācittiyan”ti."}},{"id":"pli-tv-bu-vb-pc84:2-from-pli-tv-bu-vb-pc84-2.13","sourceIds":["pli-tv-bu-vb-pc84:2.13"],"kind":"text","text":{"pi":"Evañcidaṁ bhagavatā bhikkhūnaṁ sikkhāpadaṁ paññattaṁ hoti.","en":"In this way the Buddha laid down this training rule for the monks."}},{"id":"pli-tv-bu-vb-pc84:3","sourceIds":["pli-tv-bu-vb-pc84:3.0","pli-tv-bu-vb-pc84:3.1","pli-tv-bu-vb-pc84:3.2","pli-tv-bu-vb-pc84:3.3","pli-tv-bu-vb-pc84:3.4","pli-tv-bu-vb-pc84:3.5","pli-tv-bu-vb-pc84:3.6","pli-tv-bu-vb-pc84:3.7","pli-tv-bu-vb-pc84:3.8","pli-tv-bu-vb-pc84:3.9","pli-tv-bu-vb-pc84:3.10","pli-tv-bu-vb-pc84:3.11","pli-tv-bu-vb-pc84:3.12","pli-tv-bu-vb-pc84:3.13","pli-tv-bu-vb-pc84:3.14","pli-tv-bu-vb-pc84:3.15","pli-tv-bu-vb-pc84:3.16"],"kind":"text","text":{"en":"Third substory\nAt that time the householder Anāthapiṇḍika had a whole village working for him in the country of Kāsi,\nand he had told an apprentice there that if the monks arrive he should make them a meal.\nSoon afterwards a number of monks were wandering in the country of Kāsi, when they came to that village.\nWhen that man saw them coming, he approached them, bowed, and said, “Venerables, please accept a meal from Anāthapiṇḍika tomorrow.”\nThe monks accepted by remaining silent.\nThe following morning, after having various kinds of fine foods prepared, he had the monks informed that it was time for the meal. He removed a ring from his finger and then offered the food to the monks, saying,\n“Venerables, please leave after you’ve eaten. I have to go to work.” And he left, forgetting his ring.\nThe monks saw it and said, “If we just go, this ring will be lost,” and so they stayed right there.\nWhen that man returned from work, he saw the monks and said to them, “Why are you still here?”\nAnd the monks told him what had happened.\nThose monks then went to Sāvatthī where they told the monks,\nwho in turn told the Buddha.\nAfter giving a teaching, the Buddha addressed the monks:\n“Within a monastery, monks, or inside a lodging, you should pick up precious things or what’s regarded as precious, or have it picked up, and then put it aside with the thought,\n‘Whoever owns it will come and get it.’\nAnd so, monks, this training rule should be recited like this:","pi":"Tena kho pana samayena kāsīsu janapade anāthapiṇḍikassa gahapatissa kammantagāmo hoti.\nTena ca gahapatinā antevāsī āṇatto hoti—“sace bhadantā āgacchanti, bhattaṁ kareyyāsī”ti.\nTena kho pana samayena sambahulā bhikkhū kāsīsu janapade cārikaṁ caramānā yena anāthapiṇḍikassa gahapatissa kammantagāmo tenupasaṅkamiṁsu.\nAddasā kho so puriso te bhikkhū dūratova āgacchante. Disvāna yena te bhikkhū tenupasaṅkami; upasaṅkamitvā te bhikkhū abhivādetvā etadavoca—“adhivāsentu, bhante, ayyā svātanāya gahapatino bhattan”ti.\nAdhivāsesuṁ kho te bhikkhū tuṇhībhāvena.\nAtha kho so puriso tassā rattiyā accayena paṇītaṁ khādanīyaṁ bhojanīyaṁ paṭiyādāpetvā kālaṁ ārocāpetvā aṅgulimuddikaṁ omuñcitvā te bhikkhū bhattena parivisitvā—\n“ayyā bhuñjitvā gacchantu, ahampi kammantaṁ gamissāmī”ti aṅgulimuddikaṁ vissaritvā agamāsi.\nBhikkhū passitvā—“sace mayaṁ gamissāma nassissatāyaṁ aṅgulimuddikā”ti tattheva acchiṁsu.\nAtha kho so puriso kammantā āgacchanto te bhikkhū passitvā etadavoca—“kissa, bhante, ayyā idheva acchantī”ti?\nAtha kho te bhikkhū tassa purisassa etamatthaṁ ārocetvā\nsāvatthiṁ gantvā bhikkhūnaṁ etamatthaṁ ārocesuṁ.\nBhikkhū bhagavato etamatthaṁ ārocesuṁ.\nAtha kho bhagavā etasmiṁ nidāne etasmiṁ pakaraṇe dhammiṁ kathaṁ katvā bhikkhū āmantesi—\n“anujānāmi, bhikkhave, ratanaṁ vā ratanasammataṁ vā ajjhārāme vā ajjhāvasathe vā uggahetvā vā uggahāpetvā vā nikkhipituṁ—\n‘yassa bhavissati so harissatī’ti.\nEvañca pana, bhikkhave, imaṁ sikkhāpadaṁ uddiseyyātha—"}},{"id":"pli-tv-bu-vb-pc84:3.17","sourceIds":["pli-tv-bu-vb-pc84:3.17.0","pli-tv-bu-vb-pc84:3.17.1"],"kind":"text","text":{"en":"Final ruling\n‘If a monk picks up something precious or something regarded as precious, or he has it picked up, except within a monastery or inside a lodging, he commits an offense entailing confession.","pi":"“Yo pana bhikkhu ratanaṁ vā ratanasammataṁ vā, aññatra ajjhārāmā vā ajjhāvasathā vā, uggaṇheyya vā uggaṇhāpeyya vā, pācittiyaṁ."}},{"id":"pli-tv-bu-vb-pc84:3-from-pli-tv-bu-vb-pc84-3.18","sourceIds":["pli-tv-bu-vb-pc84:3.18"],"kind":"text","text":{"pi":"Ratanaṁ vā pana bhikkhunā ratanasammataṁ vā ajjhārāme vā ajjhāvasathe vā uggahetvā vā uggahāpetvā vā nikkhipitabbaṁ—‘yassa bhavissati so harissatī’ti. Ayaṁ tattha sāmīcī”ti.","en":"If he picks up something precious or something regarded as precious, or he has it picked up, within a monastery or inside a lodging, he should put it aside with the thought, “Whoever owns it will come and get it.” This is the proper procedure.’”"}},{"id":"pli-tv-bu-vb-pc84:4.1","sourceIds":["pli-tv-bu-vb-pc84:4.1.0","pli-tv-bu-vb-pc84:4.1.1","pli-tv-bu-vb-pc84:4.1.2","pli-tv-bu-vb-pc84:4.1.3","pli-tv-bu-vb-pc84:4.1.4","pli-tv-bu-vb-pc84:4.1.5","pli-tv-bu-vb-pc84:4.1.6","pli-tv-bu-vb-pc84:4.1.7","pli-tv-bu-vb-pc84:4.1.8","pli-tv-bu-vb-pc84:4.1.9","pli-tv-bu-vb-pc84:4.1.10","pli-tv-bu-vb-pc84:4.1.11","pli-tv-bu-vb-pc84:4.1.12","pli-tv-bu-vb-pc84:4.1.13","pli-tv-bu-vb-pc84:4.1.14","pli-tv-bu-vb-pc84:4.1.15","pli-tv-bu-vb-pc84:4.1.16","pli-tv-bu-vb-pc84:4.1.17","pli-tv-bu-vb-pc84:4.1.18","pli-tv-bu-vb-pc84:4.1.19","pli-tv-bu-vb-pc84:4.1.20","pli-tv-bu-vb-pc84:4.1.21","pli-tv-bu-vb-pc84:4.1.22","pli-tv-bu-vb-pc84:4.1.23","pli-tv-bu-vb-pc84:4.1.24","pli-tv-bu-vb-pc84:4.1.25","pli-tv-bu-vb-pc84:4.1.26"],"kind":"text","text":{"en":"Definitions\nA:\nwhoever …\nMonk:\n… The monk who has been given the full ordination by a unanimous Sangha through a legal procedure consisting of one motion and three announcements that is irreversible and fit to stand—this sort of monk is meant in this case.\nSomething precious:\na pearl, a gem, a beryl, mother-of-pearl, quartz, a coral, silver, gold, a ruby, a cat’s eye.\nSomething regarded as precious:\nwhatever people regard as valuable or useful—this is called “regarded as precious”.\nExcept within a monastery or inside a lodging:\napart from within a monastery or inside a lodging.\nWithin a monastery:\nif the monastery is enclosed, then within the enclosure. If the monastery is unenclosed, then in the vicinity.\nInside a lodging:\nif the lodging is enclosed, then within the enclosure. If the lodging is unenclosed, then in the vicinity.\nPicks up:\nif he takes hold of it himself, he commits an offense entailing confession.\nHas picked up:\nif he gets someone else to take hold of it, he commits an offense entailing confession.\nIf he picks up something precious or something regarded as precious, or he has it picked up, within a monastery or inside a lodging, he should put it aside:\nafter taking note of its appearance or distinguishing marks, he should put it aside, and then make an announcement: “Whoever has lost anything should come.”\nIf anyone comes, they should be told, “Please describe it.”\nIf they rightly describe its appearance or distinguishing marks, it should be given to them. If they do not, they should be told, “Keep looking.”\nIf that monk is leaving that monastery, he should first place that item into the hands of suitable monks there.\nIf there are no suitable monks, he should place it into the hands of suitable householders there.\nThis is the proper procedure:\nthis is the right method.","pi":"Yo panāti\nyo yādiso …pe…\nbhikkhūti\n…pe… ayaṁ imasmiṁ atthe adhippeto bhikkhūti.\nRatanaṁ nāma\nmuttā maṇi veḷuriyo saṅkho silā pavālaṁ rajataṁ jātarūpaṁ lohitaṅko masāragallaṁ.\nRatanasammataṁ nāma\nyaṁ manussānaṁ upabhogaparibhogaṁ, etaṁ ratanasammataṁ nāma.\nAññatra ajjhārāmā vā ajjhāvasathā vāti\nṭhapetvā ajjhārāmaṁ ajjhāvasathaṁ.\nAjjhārāmo nāma\nparikkhittassa ārāmassa anto ārāmo, aparikkhittassa upacāro.\nAjjhāvasatho nāma\nparikkhittassa āvasathassa anto āvasatho, aparikkhittassa upacāro.\nUggaṇheyyāti\nsayaṁ gaṇhāti, āpatti pācittiyassa.\nUggaṇhāpeyyāti\naññaṁ gāhāpeti, āpatti pācittiyassa.\nRatanaṁ vā pana bhikkhunā ratanasammataṁ vā ajjhārāme vā ajjhāvasathe vā uggahetvā vā uggahāpetvā vā nikkhipitabbanti\nrūpena vā nimittena vā saññāṇaṁ katvā nikkhipitvā ācikkhitabbaṁ—“yassa bhaṇḍaṁ naṭṭhaṁ so āgacchatū”ti.\nSace tattha āgacchati so vattabbo—“āvuso, kīdisaṁ te bhaṇḍan”ti?\nSace rūpena vā nimittena vā sampādeti dātabbaṁ, no ce sampādeti “vicināhi, āvuso”ti vattabbo.\nTamhā āvāsā pakkamantena ye tattha honti bhikkhū patirūpā, tesaṁ hatthe nikkhipitvā pakkamitabbaṁ.\nNo ce honti bhikkhū patirūpā, ye tattha honti gahapatikā patirūpā, tesaṁ hatthe nikkhipitvā pakkamitabbaṁ.\nAyaṁ tattha sāmīcīti\nayaṁ tattha anudhammatā."}},{"id":"pli-tv-bu-vb-pc84:4.2","sourceIds":["pli-tv-bu-vb-pc84:4.2.0","pli-tv-bu-vb-pc84:4.2.1","pli-tv-bu-vb-pc84:4.2.2","pli-tv-bu-vb-pc84:4.2.3","pli-tv-bu-vb-pc84:4.2.4","pli-tv-bu-vb-pc84:4.2.5","pli-tv-bu-vb-pc84:4.2.6"],"kind":"text","text":{"en":"Non-offenses\nThere is no offense:\nif he picks up something precious or something regarded as precious, or he has it picked up, within a monastery or inside a lodging, and then puts it aside with the thought, “Whoever owns it will come and get it;”\nif he takes something regarded as precious on trust or he borrows it or he perceives it as discarded;\nif he is insane;\nif he is the first offender.\nThe training rule on picking up precious things, the second, is finished.","pi":"Anāpatti—\nratanaṁ vā ratanasammataṁ vā ajjhārāme vā ajjhāvasathe vā uggahetvā vā uggahāpetvā vā nikkhipati—“yassa bhavissati so harissatī”ti,\nratanasammataṁ vissāsaṁ gaṇhāti, tāvakālikaṁ gaṇhāti, paṁsukūlasaññissa,\nummattakassa,\nādikammikassāti.\nRatanasikkhāpadaṁ niṭṭhitaṁ dutiyaṁ."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/pli-tv-bu-vb-pc84/en/brahmali","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}