{"id":"pp1.4","title":"4. Catukkauddesa","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"pp1.4","title":"4. Catukkauddesa","units":[{"id":"pp1.4:0","sourceIds":["pp1.4:0.1","pp1.4:0.2","pp1.4:0.3"],"kind":"text","text":{"pi":"Puggalapaññatti\nMātikā\n4. Catukkauddesa"}},{"id":"pp1.4:1","sourceIds":["pp1.4:1.1"],"kind":"text","text":{"pi":"Cattāro puggalā—"}},{"id":"pp1.4:2","sourceIds":["pp1.4:2.1"],"kind":"text","text":{"pi":"Asappuriso, asappurisena asappurisataro, sappuriso, sappurisena sappurisataro."}},{"id":"pp1.4:3","sourceIds":["pp1.4:3.1"],"kind":"text","text":{"pi":"Pāpo, pāpena pāpataro, kalyāṇo, kalyāṇena kalyāṇataro."}},{"id":"pp1.4:4","sourceIds":["pp1.4:4.1"],"kind":"text","text":{"pi":"Pāpadhammo, pāpadhammena pāpadhammataro, kalyāṇadhammo, kalyāṇadhammena kalyāṇadhammataro."}},{"id":"pp1.4:5","sourceIds":["pp1.4:5.1"],"kind":"text","text":{"pi":"Sāvajjo, vajjabahulo, appavajjo, anavajjo."}},{"id":"pp1.4:6","sourceIds":["pp1.4:6.1"],"kind":"text","text":{"pi":"Ugghaṭitaññū, vipañcitaññū, neyyo, padaparamo."}},{"id":"pp1.4:7","sourceIds":["pp1.4:7.1"],"kind":"text","text":{"pi":"Yuttappaṭibhāno, no muttappaṭibhāno, muttappaṭibhāno, no yuttappaṭibhāno, yuttappaṭibhāno ca muttappaṭibhāno ca, neva yuttappaṭibhāno no muttappaṭibhāno."}},{"id":"pp1.4:8","sourceIds":["pp1.4:8.1"],"kind":"text","text":{"pi":"Cattāro dhammakathikā puggalā."}},{"id":"pp1.4:9","sourceIds":["pp1.4:9.1"],"kind":"text","text":{"pi":"Cattāro valāhakūpamā puggalā."}},{"id":"pp1.4:10","sourceIds":["pp1.4:10.1"],"kind":"text","text":{"pi":"Cattāro mūsikūpamā puggalā."}},{"id":"pp1.4:11","sourceIds":["pp1.4:11.1"],"kind":"text","text":{"pi":"Cattāro ambūpamā puggalā."}},{"id":"pp1.4:12","sourceIds":["pp1.4:12.1"],"kind":"text","text":{"pi":"Cattāro kumbhūpamā puggalā."}},{"id":"pp1.4:13","sourceIds":["pp1.4:13.1"],"kind":"text","text":{"pi":"Cattāro udakarahadūpamā puggalā."}},{"id":"pp1.4:14","sourceIds":["pp1.4:14.1"],"kind":"text","text":{"pi":"Cattāro balībaddūpamā puggalā."}},{"id":"pp1.4:15","sourceIds":["pp1.4:15.1"],"kind":"text","text":{"pi":"Cattāro āsīvisūpamā puggalā."}},{"id":"pp1.4:16","sourceIds":["pp1.4:16.1"],"kind":"text","text":{"pi":"Atthekacco puggalo ananuvicca apariyogāhetvā avaṇṇārahassa vaṇṇaṁ bhāsitā hoti, atthekacco puggalo ananuvicca apariyogāhetvā vaṇṇārahassa avaṇṇaṁ bhāsitā hoti, atthekacco puggalo ananuvicca apariyogāhetvā appasādanīye ṭhāne pasādaṁ upadaṁsitā hoti, atthekacco puggalo ananuvicca apariyogāhetvā pasādanīye ṭhāne appasādaṁ upadaṁsitā hoti."}},{"id":"pp1.4:17","sourceIds":["pp1.4:17.1"],"kind":"text","text":{"pi":"Atthekacco puggalo anuvicca pariyogāhetvā avaṇṇārahassa avaṇṇaṁ bhāsitā hoti, atthekacco puggalo anuvicca pariyogāhetvā vaṇṇārahassa vaṇṇaṁ bhāsitā hoti, atthekacco puggalo anuvicca pariyogāhetvā appasādanīye ṭhāne appasādaṁ upadaṁsitā hoti, atthekacco puggalo anuvicca pariyogāhetvā pasādanīye ṭhāne pasādaṁ upadaṁsitā hoti."}},{"id":"pp1.4:18","sourceIds":["pp1.4:18.1","pp1.4:18.2","pp1.4:18.3","pp1.4:18.4"],"kind":"text","text":{"pi":"Atthekacco puggalo avaṇṇārahassa avaṇṇaṁ bhāsitā hoti bhūtaṁ tacchaṁ kālena, no ca kho vaṇṇārahassa vaṇṇaṁ bhāsitā hoti bhūtaṁ tacchaṁ kālena;\natthekacco puggalo vaṇṇārahassa vaṇṇaṁ bhāsitā hoti bhūtaṁ tacchaṁ kālena, no ca kho avaṇṇārahassa avaṇṇaṁ bhāsitā hoti bhūtaṁ tacchaṁ kālena;\natthekacco puggalo avaṇṇārahassa ca avaṇṇaṁ bhāsitā hoti bhūtaṁ tacchaṁ kālena;\nvaṇṇārahassa ca vaṇṇaṁ bhāsitā hoti bhūtaṁ tacchaṁ kālena, atthekacco puggalo neva avaṇṇārahassa avaṇṇaṁ bhāsitā hoti bhūtaṁ tacchaṁ kālena, no ca vaṇṇārahassa vaṇṇaṁ bhāsitā hoti bhūtaṁ tacchaṁ kālena."}},{"id":"pp1.4:19","sourceIds":["pp1.4:19.1"],"kind":"text","text":{"pi":"Uṭṭhānaphalūpajīvī no puññaphalūpajīvī, puññaphalūpajīvī no uṭṭhānaphalūpajīvī, uṭṭhānaphalūpajīvī ca puññaphalūpajīvī ca, neva uṭṭhānaphalūpajīvī no puññaphalūpajīvī."}},{"id":"pp1.4:20","sourceIds":["pp1.4:20.1"],"kind":"text","text":{"pi":"Tamo tamaparāyano, tamo jotiparāyano, joti tamaparāyano, joti jotiparāyano."}},{"id":"pp1.4:21","sourceIds":["pp1.4:21.1"],"kind":"text","text":{"pi":"Oṇatoṇato, oṇatuṇṇato, uṇṇatoṇato, uṇṇatuṇṇato."}},{"id":"pp1.4:22","sourceIds":["pp1.4:22.1"],"kind":"text","text":{"pi":"Cattāro rukkhūpamā puggalā."}},{"id":"pp1.4:23","sourceIds":["pp1.4:23.1"],"kind":"text","text":{"pi":"Rūpappamāṇo, rūpappasanno, ghosappamāṇo, ghosappasanno."}},{"id":"pp1.4:24","sourceIds":["pp1.4:24.1"],"kind":"text","text":{"pi":"Lūkhappamāṇo, lūkhappasanno, dhammappamāṇo, dhammappasanno."}},{"id":"pp1.4:25","sourceIds":["pp1.4:25.1","pp1.4:25.2","pp1.4:25.3","pp1.4:25.4"],"kind":"text","text":{"pi":"Atthekacco puggalo attahitāya paṭipanno hoti, no parahitāya;\natthekacco puggalo parahitāya paṭipanno hoti, no attahitāya;\natthekacco puggalo attahitāya ceva paṭipanno hoti parahitāya ca;\natthekacco puggalo neva attahitāya paṭipanno hoti no parahitāya."}},{"id":"pp1.4:26","sourceIds":["pp1.4:26.1","pp1.4:26.2","pp1.4:26.3","pp1.4:26.4","pp1.4:26.5"],"kind":"text","text":{"pi":"Atthekacco puggalo attantapo hoti attaparitāpanānuyogamanuyutto;\natthekacco puggalo parantapo hoti paraparitāpanānuyogamanuyutto;\natthekacco puggalo attantapo ca hoti attaparitāpanānuyogamanuyutto, parantapo ca paraparitāpanānuyogamanuyutto;\natthekacco puggalo neva attantapo hoti na attaparitāpanānuyogamanuyutto, na parantapo na paraparitāpanānuyogamanuyutto.\nSo anattantapo aparantapo diṭṭheva dhamme nicchāto nibbuto sītībhūto sukhappaṭisaṁvedī brahmabhūtena attanā viharati."}},{"id":"pp1.4:27","sourceIds":["pp1.4:27.1"],"kind":"text","text":{"pi":"Sarāgo, sadoso, samoho, samāno."}},{"id":"pp1.4:28","sourceIds":["pp1.4:28.1","pp1.4:28.2","pp1.4:28.3","pp1.4:28.4"],"kind":"text","text":{"pi":"Atthekacco puggalo lābhī hoti ajjhattaṁ cetosamathassa, na lābhī adhipaññādhammavipassanāya;\natthekacco puggalo lābhī hoti adhipaññādhammavipassanāya, na lābhī ajjhattaṁ cetosamathassa;\natthekacco puggalo lābhī ceva hoti ajjhattaṁ cetosamathassa, lābhī ca adhipaññādhammavipassanāya;\natthekacco puggalo neva lābhī hoti ajjhattaṁ cetosamathassa, na lābhī adhipaññādhammavipassanāya."}},{"id":"pp1.4:29","sourceIds":["pp1.4:29.1"],"kind":"text","text":{"pi":"Anusotagāmī puggalo, paṭisotagāmī puggalo, ṭhitatto puggalo, tiṇṇo pāraṅgato thale tiṭṭhati brāhmaṇo."}},{"id":"pp1.4:30","sourceIds":["pp1.4:30.1"],"kind":"text","text":{"pi":"Appassuto sutena anupapanno, appassuto sutena upapanno, bahussuto sutena anupapanno, bahussuto sutena upapanno."}},{"id":"pp1.4:31","sourceIds":["pp1.4:31.1"],"kind":"text","text":{"pi":"Samaṇamacalo, samaṇapadumo, samaṇapuṇḍarīko, samaṇesu samaṇasukhumālo."}},{"id":"pp1.4:32","sourceIds":["pp1.4:32.1"],"kind":"text","text":{"pi":"Catukkaṁ."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/pp1.4/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}