{"id":"pp2.1","title":"1. Ekakapuggalapaññatti","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"pp2.1","title":"1. Ekakapuggalapaññatti","units":[{"id":"pp2.1:0","sourceIds":["pp2.1:0.1","pp2.1:0.2","pp2.1:0.3"],"kind":"text","text":{"pi":"Puggalapaññatti\nNiddesa\n1. Ekakapuggalapaññatti"}},{"id":"pp2.1:1","sourceIds":["pp2.1:1.1","pp2.1:1.2","pp2.1:1.3"],"kind":"text","text":{"pi":"Katamo ca puggalo samayavimutto?\nIdhekacco puggalo kālena kālaṁ samayena samayaṁ aṭṭha vimokkhe kāyena phusitvā viharati, paññāya cassa disvā ekacce āsavā parikkhīṇā honti—\nayaṁ vuccati puggalo “samayavimutto”."}},{"id":"pp2.1:2","sourceIds":["pp2.1:2.1","pp2.1:2.2","pp2.1:2.3","pp2.1:2.4"],"kind":"text","text":{"pi":"Katamo ca puggalo asamayavimutto?\nIdhekacco puggalo na heva kho kālena kālaṁ samayena samayaṁ aṭṭha vimokkhe kāyena phusitvā viharati, paññāya cassa disvā āsavā parikkhīṇā honti—\nayaṁ vuccati puggalo “asamayavimutto”.\nSabbepi ariyapuggalā ariye vimokkhe asamayavimuttā."}},{"id":"pp2.1:3","sourceIds":["pp2.1:3.1","pp2.1:3.2","pp2.1:3.3","pp2.1:3.4","pp2.1:3.5","pp2.1:3.6"],"kind":"text","text":{"pi":"Katamo ca puggalo kuppadhammo?\nIdhekacco puggalo lābhī hoti rūpasahagatānaṁ vā arūpasahagatānaṁ vā samāpattīnaṁ.\nSo ca kho na nikāmalābhī hoti na akicchalābhī na akasiralābhī;\nna yatthicchakaṁ yadicchakaṁ yāvaticchakaṁ samāpajjatipi vuṭṭhātipi.\nṬhānaṁ kho panetaṁ vijjati, yaṁ tassa puggalassa pamādamāgamma tā samāpattiyo kuppeyyuṁ—\nayaṁ vuccati puggalo “kuppadhammo”."}},{"id":"pp2.1:4","sourceIds":["pp2.1:4.1","pp2.1:4.2","pp2.1:4.3","pp2.1:4.4","pp2.1:4.5","pp2.1:4.6","pp2.1:4.7"],"kind":"text","text":{"pi":"Katamo ca puggalo akuppadhammo?\nIdhekacco puggalo lābhī hoti rūpasahagatānaṁ vā arūpasahagatānaṁ vā samāpattīnaṁ.\nSo ca kho nikāmalābhī hoti akicchalābhī akasiralābhī;\nyatthicchakaṁ yadicchakaṁ yāvaticchakaṁ samāpajjatipi vuṭṭhātipi.\nAṭṭhānametaṁ anavakāso yaṁ tassa puggalassa pamādamāgamma tā samāpattiyo kuppeyyuṁ—\nayaṁ vuccati puggalo “akuppadhammo”.\nSabbepi ariyapuggalā ariye vimokkhe akuppadhammā."}},{"id":"pp2.1:5","sourceIds":["pp2.1:5.1","pp2.1:5.2","pp2.1:5.3","pp2.1:5.4","pp2.1:5.5","pp2.1:5.6"],"kind":"text","text":{"pi":"Katamo ca puggalo parihānadhammo?\nIdhekacco puggalo lābhī hoti rūpasahagatānaṁ vā arūpasahagatānaṁ vā samāpattīnaṁ.\nSo ca kho na nikāmalābhī hoti na akicchalābhī na akasiralābhī;\nna yatthicchakaṁ yadicchakaṁ yāvaticchakaṁ samāpajjatipi vuṭṭhātipi.\nṬhānaṁ kho panetaṁ vijjati, yaṁ so puggalo pamādamāgamma tāhi samāpattīhi parihāyeyya—\nayaṁ vuccati puggalo “parihānadhammo”."}},{"id":"pp2.1:6","sourceIds":["pp2.1:6.1","pp2.1:6.2","pp2.1:6.3","pp2.1:6.4","pp2.1:6.5","pp2.1:6.6","pp2.1:6.7"],"kind":"text","text":{"pi":"Katamo ca puggalo aparihānadhammo?\nIdhekacco puggalo lābhī hoti rūpasahagatānaṁ vā arūpasahagatānaṁ vā samāpattīnaṁ.\nSo ca kho nikāmalābhī hoti akicchalābhī akasiralābhī;\nyatthicchakaṁ yadicchakaṁ yāvaticchakaṁ samāpajjatipi vuṭṭhātipi.\nAṭṭhānametaṁ anavakāso yaṁ so puggalo pamādamāgamma tāhi samāpattīhi parihāyeyya—\nayaṁ vuccati puggalo “aparihānadhammo”.\nSabbepi ariyapuggalā ariye vimokkhe aparihānadhammā."}},{"id":"pp2.1:7","sourceIds":["pp2.1:7.1","pp2.1:7.2","pp2.1:7.3","pp2.1:7.4","pp2.1:7.5","pp2.1:7.6","pp2.1:7.7"],"kind":"text","text":{"pi":"Katamo ca puggalo cetanābhabbo?\nIdhekacco puggalo lābhī hoti rūpasahagatānaṁ vā arūpasahagatānaṁ vā samāpattīnaṁ.\nSo ca kho na nikāmalābhī hoti na akicchalābhī na akasiralābhī;\nna yatthicchakaṁ yadicchakaṁ yāvaticchakaṁ samāpajjatipi vuṭṭhātipi.\nSace anusañceteti, na parihāyati tāhi samāpattīhi.\nSace na anusañceteti, parihāyati tāhi samāpattīhi—\nayaṁ vuccati puggalo “cetanābhabbo”."}},{"id":"pp2.1:8","sourceIds":["pp2.1:8.1","pp2.1:8.2","pp2.1:8.3","pp2.1:8.4","pp2.1:8.5","pp2.1:8.6","pp2.1:8.7"],"kind":"text","text":{"pi":"Katamo ca puggalo anurakkhaṇābhabbo?\nIdhekacco puggalo lābhī hoti rūpasahagatānaṁ vā arūpasahagatānaṁ vā samāpattīnaṁ.\nSo ca kho na nikāmalābhī hoti na akicchalābhī na akasiralābhī;\nna yatthicchakaṁ yadicchakaṁ yāvaticchakaṁ samāpajjatipi vuṭṭhātipi.\nSace anurakkhati, na parihāyati tāhi samāpattīhi.\nSace na anurakkhati, parihāyati tāhi samāpattīhi—\nayaṁ vuccati puggalo “anurakkhaṇābhabbo”."}},{"id":"pp2.1:9","sourceIds":["pp2.1:9.1","pp2.1:9.2","pp2.1:9.3","pp2.1:9.4"],"kind":"text","text":{"pi":"Katamo ca puggalo puthujjano?\nYassa puggalassa tīṇi saṁyojanāni appahīnāni;\nna ca tesaṁ dhammānaṁ pahānāya paṭipanno—\nayaṁ vuccati puggalo “puthujjano”."}},{"id":"pp2.1:10","sourceIds":["pp2.1:10.1","pp2.1:10.2","pp2.1:10.3"],"kind":"text","text":{"pi":"Katamo ca puggalo gotrabhū?\nYesaṁ dhammānaṁ samanantarā ariyadhammassa avakkanti hoti tehi dhammehi samannāgato—\nayaṁ vuccati puggalo “gotrabhū”."}},{"id":"pp2.1:11","sourceIds":["pp2.1:11.1","pp2.1:11.2","pp2.1:11.3"],"kind":"text","text":{"pi":"Katamo ca puggalo bhayūparato?\nSatta sekkhā bhayūparatā, ye ca puthujjanā sīlavanto.\nArahā abhayūparato."}},{"id":"pp2.1:12","sourceIds":["pp2.1:12.1","pp2.1:12.2","pp2.1:12.3"],"kind":"text","text":{"pi":"Katamo ca puggalo abhabbāgamano?\nYe te puggalā kammāvaraṇena samannāgatā, kilesāvaraṇena samannāgatā, vipākāvaraṇena samannāgatā, assaddhā acchandikā duppaññā eḷā, abhabbā niyāmaṁ okkamituṁ kusalesu dhammesu sammattaṁ—\nime vuccanti puggalā “abhabbāgamanā”."}},{"id":"pp2.1:13","sourceIds":["pp2.1:13.1","pp2.1:13.2","pp2.1:13.3"],"kind":"text","text":{"pi":"Katamo ca puggalo bhabbāgamano?\nYe te puggalā na kammāvaraṇena samannāgatā, na kilesāvaraṇena samannāgatā, na vipākāvaraṇena samannāgatā, saddhā chandikā paññavanto aneḷā, bhabbā niyāmaṁ okkamituṁ kusalesu dhammesu sammattaṁ—\nime vuccanti puggalā “bhabbāgamanā”."}},{"id":"pp2.1:14","sourceIds":["pp2.1:14.1","pp2.1:14.2","pp2.1:14.3"],"kind":"text","text":{"pi":"Katamo ca puggalo niyato?\nPañca puggalā ānantarikā, ye ca micchādiṭṭhikā niyatā, aṭṭha ca ariyapuggalā niyatā.\nAvasesā puggalā aniyatā."}},{"id":"pp2.1:15","sourceIds":["pp2.1:15.1","pp2.1:15.2"],"kind":"text","text":{"pi":"Katamo ca puggalo paṭipannako?\nCattāro maggasamaṅgino puggalā paṭipannakā, cattāro phalasamaṅgino puggalā phale ṭhitā."}},{"id":"pp2.1:16","sourceIds":["pp2.1:16.1","pp2.1:16.2","pp2.1:16.3"],"kind":"text","text":{"pi":"Katamo ca puggalo samasīsī?\nYassa puggalassa apubbaṁ acarimaṁ āsavapariyādānañca hoti jīvitapariyādānañca—\nayaṁ vuccati puggalo “samasīsī”."}},{"id":"pp2.1:17","sourceIds":["pp2.1:17.1","pp2.1:17.2","pp2.1:17.3","pp2.1:17.4"],"kind":"text","text":{"pi":"Katamo ca puggalo ṭhitakappī?\nAyañca puggalo sotāpattiphalasacchikiriyāya paṭipanno assa, kappassa ca uḍḍayhanavelā assa, neva tāva kappo uḍḍayheyya yāvāyaṁ puggalo na sotāpattiphalaṁ sacchikaroti.\nAyaṁ vuccati puggalo “ṭhitakappī”.\nSabbepi maggasamaṅgino puggalā ṭhitakappino."}},{"id":"pp2.1:18","sourceIds":["pp2.1:18.1","pp2.1:18.2","pp2.1:18.3"],"kind":"text","text":{"pi":"Katamo ca puggalo ariyo?\nAṭṭha ariyapuggalā ariyā.\nAvasesā puggalā anariyā."}},{"id":"pp2.1:19","sourceIds":["pp2.1:19.1","pp2.1:19.2","pp2.1:19.3","pp2.1:19.4"],"kind":"text","text":{"pi":"Katamo ca puggalo sekkho?\nCattāro maggasamaṅgino tayo phalasamaṅgino puggalā “sekkhā”.\nArahā asekkho.\nAvasesā puggalā nevasekkhanāsekkhā."}},{"id":"pp2.1:20","sourceIds":["pp2.1:20.1","pp2.1:20.2"],"kind":"text","text":{"pi":"Katamo ca puggalo tevijjo?\nTīhi vijjāhi samannāgato puggalo “tevijjo”."}},{"id":"pp2.1:21","sourceIds":["pp2.1:21.1","pp2.1:21.2"],"kind":"text","text":{"pi":"Katamo ca puggalo chaḷabhiñño?\nChahi abhiññāhi samannāgato puggalo “chaḷabhiñño”."}},{"id":"pp2.1:22","sourceIds":["pp2.1:22.1","pp2.1:22.2","pp2.1:22.3","pp2.1:22.4"],"kind":"text","text":{"pi":"Katamo ca puggalo sammāsambuddho?\nIdhekacco puggalo pubbe ananussutesu dhammesu sāmaṁ saccāni abhisambujjhati;\ntattha ca sabbaññutaṁ pāpuṇāti, balesu ca vasībhāvaṁ—\nayaṁ vuccati puggalo “sammāsambuddho”."}},{"id":"pp2.1:23","sourceIds":["pp2.1:23.1","pp2.1:23.2","pp2.1:23.3","pp2.1:23.4"],"kind":"text","text":{"pi":"Katamo ca puggalo paccekasambuddho?\nIdhekacco puggalo pubbe ananussutesu dhammesu sāmaṁ saccāni abhisambujjhati;\nna ca tattha sabbaññutaṁ pāpuṇāti, na ca balesu vasībhāvaṁ—\nayaṁ vuccati puggalo “paccekasambuddho”."}},{"id":"pp2.1:24","sourceIds":["pp2.1:24.1","pp2.1:24.2","pp2.1:24.3","pp2.1:24.4"],"kind":"text","text":{"pi":"Katamo ca puggalo ubhatobhāgavimutto?\nIdhekacco puggalo aṭṭha vimokkhe kāyena phusitvā viharati;\npaññāya cassa disvā āsavā parikkhīṇā honti—\nayaṁ vuccati puggalo “ubhatobhāgavimutto”."}},{"id":"pp2.1:25","sourceIds":["pp2.1:25.1","pp2.1:25.2","pp2.1:25.3","pp2.1:25.4"],"kind":"text","text":{"pi":"Katamo ca puggalo paññāvimutto?\nIdhekacco puggalo na heva kho aṭṭha vimokkhe kāyena phusitvā viharati;\npaññāya cassa disvā āsavā parikkhīṇā honti.\nAyaṁ vuccati puggalo “paññāvimutto”."}},{"id":"pp2.1:26","sourceIds":["pp2.1:26.1","pp2.1:26.2","pp2.1:26.3","pp2.1:26.4"],"kind":"text","text":{"pi":"Katamo ca puggalo kāyasakkhī?\nIdhekacco puggalo aṭṭha vimokkhe kāyena phusitvā viharati;\npaññāya cassa disvā ekacce āsavā parikkhīṇā honti.\nAyaṁ vuccati puggalo “kāyasakkhī”."}},{"id":"pp2.1:27","sourceIds":["pp2.1:27.1","pp2.1:27.2","pp2.1:27.3","pp2.1:27.4","pp2.1:27.5"],"kind":"text","text":{"pi":"Katamo ca puggalo diṭṭhippatto?\nIdhekacco puggalo “idaṁ dukkhan”ti yathābhūtaṁ pajānāti, “ayaṁ dukkhasamudayo”ti yathābhūtaṁ pajānāti, “ayaṁ dukkhanirodho”ti yathābhūtaṁ pajānāti, “ayaṁ dukkhanirodhagāminī paṭipadā”ti yathābhūtaṁ pajānāti.\nTathāgatappaveditā cassa dhammā paññāya vodiṭṭhā honti vocaritā.\nPaññāya cassa disvā ekacce āsavā parikkhīṇā honti—\nayaṁ vuccati puggalo “diṭṭhippatto”."}},{"id":"pp2.1:28","sourceIds":["pp2.1:28.1","pp2.1:28.2","pp2.1:28.3","pp2.1:28.4","pp2.1:28.5"],"kind":"text","text":{"pi":"Katamo ca puggalo saddhāvimutto?\nIdhekacco puggalo “idaṁ dukkhan”ti yathābhūtaṁ pajānāti, “ayaṁ dukkhasamudayo”ti yathābhūtaṁ pajānāti, “ayaṁ dukkhanirodho”ti yathābhūtaṁ pajānāti, “ayaṁ dukkhanirodhagāminī paṭipadā”ti yathābhūtaṁ pajānāti.\nTathāgatappaveditā cassa dhammā paññāya vodiṭṭhā honti vocaritā.\nPaññāya cassa disvā ekacce āsavā parikkhīṇā honti, no ca kho yathā diṭṭhippattassa—\nayaṁ vuccati puggalo “saddhāvimutto”."}},{"id":"pp2.1:29","sourceIds":["pp2.1:29.1","pp2.1:29.2","pp2.1:29.3","pp2.1:29.4"],"kind":"text","text":{"pi":"Katamo ca puggalo dhammānusārī?\nYassa puggalassa sotāpattiphalasacchikiriyāya paṭipannassa paññindriyaṁ adhimattaṁ hoti, paññāvāhiṁ paññāpubbaṅgamaṁ ariyamaggaṁ bhāveti—\nayaṁ vuccati puggalo “dhammānusārī”.\nSotāpattiphalasacchikiriyāya paṭipanno puggalo dhammānusārī phale ṭhito diṭṭhippatto."}},{"id":"pp2.1:30","sourceIds":["pp2.1:30.1","pp2.1:30.2","pp2.1:30.3","pp2.1:30.4"],"kind":"text","text":{"pi":"Katamo ca puggalo saddhānusārī?\nYassa puggalassa sotāpattiphalasacchikiriyāya paṭipannassa saddhindriyaṁ adhimattaṁ hoti, saddhāvāhiṁ saddhāpubbaṅgamaṁ ariyamaggaṁ bhāveti—\nayaṁ vuccati puggalo “saddhānusārī”.\nSotāpattiphalasacchikiriyāya paṭipanno puggalo saddhānusārī phale ṭhito saddhāvimutto."}},{"id":"pp2.1:31","sourceIds":["pp2.1:31.1","pp2.1:31.2","pp2.1:31.3","pp2.1:31.4"],"kind":"text","text":{"pi":"Katamo ca puggalo sattakkhattuparamo?\nIdhekacco puggalo tiṇṇaṁ saṁyojanānaṁ parikkhayā sotāpanno hoti avinipātadhammo niyato sambodhiparāyano.\nSo sattakkhattuṁ deve ca mānuse ca sandhāvitvā saṁsaritvā dukkhassantaṁ karoti—\nayaṁ vuccati puggalo “sattakkhattuparamo”."}},{"id":"pp2.1:32","sourceIds":["pp2.1:32.1","pp2.1:32.2","pp2.1:32.3","pp2.1:32.4"],"kind":"text","text":{"pi":"Katamo ca puggalo kolaṅkolo?\nIdhekacco puggalo tiṇṇaṁ saṁyojanānaṁ parikkhayā sotāpanno hoti avinipātadhammo niyato sambodhiparāyano.\nSo dve vā tīṇi vā kulāni sandhāvitvā saṁsaritvā dukkhassantaṁ karoti—\nayaṁ vuccati puggalo “kolaṅkolo”."}},{"id":"pp2.1:33","sourceIds":["pp2.1:33.1","pp2.1:33.2","pp2.1:33.3","pp2.1:33.4"],"kind":"text","text":{"pi":"Katamo ca puggalo ekabījī?\nIdhekacco puggalo tiṇṇaṁ saṁyojanānaṁ parikkhayā sotāpanno hoti avinipātadhammo niyato sambodhiparāyano.\nSo ekaṁyeva mānusakaṁ bhavaṁ nibbattetvā dukkhassantaṁ karoti—\nayaṁ vuccati puggalo “ekabījī”."}},{"id":"pp2.1:34","sourceIds":["pp2.1:34.1","pp2.1:34.2","pp2.1:34.3"],"kind":"text","text":{"pi":"Katamo ca puggalo sakadāgāmī?\nIdhekacco puggalo tiṇṇaṁ saṁyojanānaṁ parikkhayā rāgadosamohānaṁ tanuttā sakadāgāmī hoti, sakideva imaṁ lokaṁ āgantvā dukkhassantaṁ karoti—\nayaṁ vuccati puggalo “sakadāgāmī”."}},{"id":"pp2.1:35","sourceIds":["pp2.1:35.1","pp2.1:35.2","pp2.1:35.3"],"kind":"text","text":{"pi":"Katamo ca puggalo anāgāmī?\nIdhekacco puggalo pañcannaṁ orambhāgiyānaṁ saṁyojanānaṁ parikkhayā opapātiko hoti, tattha parinibbāyī anāvattidhammo tasmā lokā—\nayaṁ vuccati puggalo “anāgāmī”."}},{"id":"pp2.1:36","sourceIds":["pp2.1:36.1","pp2.1:36.2","pp2.1:36.3","pp2.1:36.4"],"kind":"text","text":{"pi":"Katamo ca puggalo antarāparinibbāyī?\nIdhekacco puggalo pañcannaṁ orambhāgiyānaṁ saṁyojanānaṁ parikkhayā opapātiko hoti, tattha parinibbāyī anāvattidhammo tasmā lokā.\nSo upapannaṁ vā samanantarā appattaṁ vā vemajjhaṁ āyuppamāṇaṁ ariyamaggaṁ sañjaneti upariṭṭhimānaṁ saṁyojanānaṁ pahānāya—\nayaṁ vuccati puggalo “antarāparinibbāyī”."}},{"id":"pp2.1:37","sourceIds":["pp2.1:37.1","pp2.1:37.2","pp2.1:37.3","pp2.1:37.4"],"kind":"text","text":{"pi":"Katamo ca puggalo upahaccaparinibbāyī?\nIdhekacco puggalo pañcannaṁ orambhāgiyānaṁ saṁyojanānaṁ parikkhayā opapātiko hoti, tattha parinibbāyī anāvattidhammo tasmā lokā.\nSo atikkamitvā vemajjhaṁ āyuppamāṇaṁ upahacca vā kālakiriyaṁ ariyamaggaṁ sañjaneti upariṭṭhimānaṁ saṁyojanānaṁ pahānāya—\nayaṁ vuccati puggalo “upahaccaparinibbāyī”."}},{"id":"pp2.1:38","sourceIds":["pp2.1:38.1","pp2.1:38.2","pp2.1:38.3","pp2.1:38.4"],"kind":"text","text":{"pi":"Katamo ca puggalo asaṅkhāraparinibbāyī?\nIdhekacco puggalo pañcannaṁ orambhāgiyānaṁ saṁyojanānaṁ parikkhayā opapātiko hoti, tattha parinibbāyī anāvattidhammo tasmā lokā.\nSo asaṅkhārena ariyamaggaṁ sañjaneti upariṭṭhimānaṁ saṁyojanānaṁ pahānāya—\nayaṁ vuccati puggalo “asaṅkhāraparinibbāyī”."}},{"id":"pp2.1:39","sourceIds":["pp2.1:39.1","pp2.1:39.2","pp2.1:39.3","pp2.1:39.4"],"kind":"text","text":{"pi":"Katamo ca puggalo sasaṅkhāraparinibbāyī?\nIdhekacco puggalo pañcannaṁ orambhāgiyānaṁ saṁyojanānaṁ parikkhayā opapātiko hoti, tattha parinibbāyī anāvattidhammo tasmā lokā.\nSo sasaṅkhārena ariyamaggaṁ sañjaneti upariṭṭhimānaṁ saṁyojanānaṁ pahānāya—\nayaṁ vuccati puggalo “sasaṅkhāraparinibbāyī”."}},{"id":"pp2.1:40","sourceIds":["pp2.1:40.1","pp2.1:40.2","pp2.1:40.3","pp2.1:40.4","pp2.1:40.5"],"kind":"text","text":{"pi":"Katamo ca puggalo uddhaṁsoto akaniṭṭhagāmī?\nIdhekacco puggalo pañcannaṁ orambhāgiyānaṁ saṁyojanānaṁ parikkhayā opapātiko hoti, tattha parinibbāyī anāvattidhammo tasmā lokā.\nSo avihā cuto atappaṁ gacchati, atappā cuto sudassaṁ gacchati, sudassā cuto sudassiṁ gacchati, sudassiyā cuto akaniṭṭhaṁ gacchati;\nakaniṭṭhe ariyamaggaṁ sañjaneti upariṭṭhimānaṁ saṁyojanānaṁ pahānāya—\nayaṁ vuccati puggalo “uddhaṁsoto akaniṭṭhagāmī”."}},{"id":"pp2.1:41","sourceIds":["pp2.1:41.1","pp2.1:41.2","pp2.1:41.3","pp2.1:41.4"],"kind":"text","text":{"pi":"Katamo ca puggalo sotāpanno sotāpattiphalasacchikiriyāya paṭipanno?\nTiṇṇaṁ saṁyojanānaṁ pahānāya paṭipanno puggalo sotāpattiphalasacchikiriyāya paṭipanno.\nYassa puggalassa tīṇi saṁyojanāni pahīnāni—\nayaṁ vuccati puggalo “sotāpanno”."}},{"id":"pp2.1:42","sourceIds":["pp2.1:42.1","pp2.1:42.2","pp2.1:42.3"],"kind":"text","text":{"pi":"Kāmarāgabyāpādānaṁ tanubhāvāya paṭipanno puggalo sakadāgāmiphalasacchikiriyāya paṭipanno.\nYassa puggalassa kāmarāgabyāpādā tanubhūtā—\nayaṁ vuccati puggalo “sakadāgāmī”."}},{"id":"pp2.1:43","sourceIds":["pp2.1:43.1","pp2.1:43.2","pp2.1:43.3"],"kind":"text","text":{"pi":"Kāmarāgabyāpādānaṁ anavasesappahānāya paṭipanno puggalo anāgāmiphalasacchikiriyāya paṭipanno.\nYassa puggalassa kāmarāgabyāpādā anavasesā pahīnā—\nayaṁ vuccati puggalo “anāgāmī”."}},{"id":"pp2.1:44","sourceIds":["pp2.1:44.1","pp2.1:44.2","pp2.1:44.3"],"kind":"text","text":{"pi":"Rūparāgaarūparāgamānauddhaccaavijjāya anavasesappahānāya paṭipanno puggalo arahattaphalasacchikiriyāya paṭipanno.\nYassa puggalassa rūparāgo arūparāgo māno uddhaccaṁ avijjā anavasesā pahīnā—\nayaṁ vuccati puggalo “arahā”."}},{"id":"pp2.1:45","sourceIds":["pp2.1:45.1"],"kind":"text","text":{"pi":"Ekakaniddeso."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/pp2.1/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}