{"id":"pp2.2","title":"2. Dukapuggalapaññatti","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"pp2.2","title":"2. Dukapuggalapaññatti","units":[{"id":"pp2.2:0","sourceIds":["pp2.2:0.1","pp2.2:0.2","pp2.2:0.3"],"kind":"text","text":{"pi":"Puggalapaññatti\nNiddesa\n2. Dukapuggalapaññatti"}},{"id":"pp2.2:1","sourceIds":["pp2.2:1.1","pp2.2:1.2","pp2.2:1.3","pp2.2:1.4","pp2.2:1.5","pp2.2:1.6"],"kind":"text","text":{"pi":"Katamo ca puggalo kodhano?\nTattha katamo kodho?\nYo kodho kujjhanā kujjhitattaṁ doso dussanā dussitattaṁ byāpatti byāpajjanā byāpajjitattaṁ virodho paṭivirodho caṇḍikkaṁ asuropo anattamanatā cittassa—\nayaṁ vuccati kodho.\nYassa puggalassa ayaṁ kodho appahīno—\nayaṁ vuccati puggalo “kodhano”."}},{"id":"pp2.2:2","sourceIds":["pp2.2:2.1","pp2.2:2.2","pp2.2:2.3","pp2.2:2.4","pp2.2:2.5","pp2.2:2.6","pp2.2:2.7"],"kind":"text","text":{"pi":"Katamo ca puggalo upanāhī?\nTattha katamo upanāho?\nPubbakālaṁ kodho aparakālaṁ upanāho.\nYo evarūpo upanāho upanayhanā upanayhitattaṁ aṭṭhapanā ṭhapanā saṇṭhapanā anusaṁsandanā anuppabandhanā daḷhīkammaṁ kodhassa—\nayaṁ vuccati upanāho.\nYassa puggalassa ayaṁ upanāho appahīno—\nayaṁ vuccati puggalo “upanāhī”."}},{"id":"pp2.2:3","sourceIds":["pp2.2:3.1","pp2.2:3.2","pp2.2:3.3","pp2.2:3.4","pp2.2:3.5","pp2.2:3.6"],"kind":"text","text":{"pi":"Katamo ca puggalo makkhī?\nTattha katamo makkho?\nYo makkho makkhāyanā makkhāyitattaṁ niṭṭhuriyaṁ niṭṭhuriyakammaṁ—\nayaṁ vuccati makkho.\nYassa puggalassa ayaṁ makkho appahīno—\nayaṁ vuccati puggalo “makkhī”."}},{"id":"pp2.2:4","sourceIds":["pp2.2:4.1","pp2.2:4.2","pp2.2:4.3","pp2.2:4.4","pp2.2:4.5","pp2.2:4.6"],"kind":"text","text":{"pi":"Katamo ca puggalo paḷāsī?\nTattha katamo paḷāso?\nYo paḷāso paḷāsāyanā paḷāsāyitattaṁ paḷāsāhāro vivādaṭṭhānaṁ yugaggāho appaṭinissaggo—\nayaṁ vuccati paḷāso.\nYassa puggalassa ayaṁ paḷāso appahīno—\nayaṁ vuccati puggalo “paḷāsī”."}},{"id":"pp2.2:5","sourceIds":["pp2.2:5.1","pp2.2:5.2","pp2.2:5.3","pp2.2:5.4","pp2.2:5.5","pp2.2:5.6"],"kind":"text","text":{"pi":"Katamo ca puggalo issukī?\nTattha katamā issā?\nYā paralābhasakkāragarukāramānanavandanapūjanāsu issā issāyanā issāyitattaṁ usūyā usūyanā usūyitattaṁ—\nayaṁ vuccati issā.\nYassa puggalassa ayaṁ issā appahīnā—\nayaṁ vuccati puggalo “issukī”."}},{"id":"pp2.2:6","sourceIds":["pp2.2:6.1","pp2.2:6.2","pp2.2:6.3","pp2.2:6.4","pp2.2:6.5","pp2.2:6.6","pp2.2:6.7","pp2.2:6.8"],"kind":"text","text":{"pi":"Katamo ca puggalo maccharī?\nTattha katamaṁ macchariyaṁ?\nPañca macchariyāni—\nāvāsamacchariyaṁ, kulamacchariyaṁ, lābhamacchariyaṁ, vaṇṇamacchariyaṁ, dhammamacchariyaṁ.\nYaṁ evarūpaṁ maccheraṁ maccharāyanā maccharāyitattaṁ vevicchaṁ kadariyaṁ kaṭukañcukatā aggahitattaṁ cittassa—\nidaṁ vuccati macchariyaṁ.\nYassa puggalassa idaṁ macchariyaṁ appahīnaṁ—\nayaṁ vuccati puggalo “maccharī”."}},{"id":"pp2.2:7","sourceIds":["pp2.2:7.1","pp2.2:7.2","pp2.2:7.3","pp2.2:7.4","pp2.2:7.5","pp2.2:7.6","pp2.2:7.7"],"kind":"text","text":{"pi":"Katamo ca puggalo saṭho?\nTattha katamaṁ sāṭheyyaṁ?\nIdhekacco saṭho hoti parisaṭho.\nYaṁ tattha saṭhaṁ saṭhatā sāṭheyyaṁ kakkaratā kakkariyaṁ parikkhattatā pārikkhattiyaṁ—\nidaṁ vuccati sāṭheyyaṁ.\nYassa puggalassa idaṁ sāṭheyyaṁ appahīnaṁ—\nayaṁ vuccati puggalo “saṭho”."}},{"id":"pp2.2:8","sourceIds":["pp2.2:8.1","pp2.2:8.2","pp2.2:8.3","pp2.2:8.4","pp2.2:8.5","pp2.2:8.6","pp2.2:8.7","pp2.2:8.8"],"kind":"text","text":{"pi":"Katamo ca puggalo māyāvī?\nTattha katamā māyā?\nIdhekacco kāyena duccaritaṁ caritvā vācāya duccaritaṁ caritvā manasā duccaritaṁ caritvā tassa paṭicchādanahetu pāpikaṁ icchaṁ paṇidahati—\n“mā maṁ jaññā”ti icchati, “mā maṁ jaññā”ti saṅkappati “mā maṁ jaññā”ti vācaṁ bhāsati, “mā maṁ jaññā”ti kāyena parakkamati.\nYā evarūpā māyā māyāvitā accāsarā vañcanā nikati vikiraṇā pariharaṇā gūhanā parigūhanā chādanā paṭicchādanā anuttānīkammaṁ anāvikammaṁ vocchādanā pāpakiriyā—\nayaṁ vuccati māyā.\nYassa puggalassa ayaṁ māyā appahīnā—\nayaṁ vuccati puggalo “māyāvī”."}},{"id":"pp2.2:9","sourceIds":["pp2.2:9.1","pp2.2:9.2","pp2.2:9.3","pp2.2:9.4","pp2.2:9.5"],"kind":"text","text":{"pi":"Katamo ca puggalo ahiriko?\nTattha katamaṁ ahirikaṁ?\nYaṁ na hirīyati hiriyitabbena na hirīyati pāpakānaṁ akusalānaṁ dhammānaṁ samāpattiyā—\nidaṁ vuccati ahirikaṁ.\nIminā ahirikena samannāgato puggalo “ahiriko”."}},{"id":"pp2.2:10","sourceIds":["pp2.2:10.1","pp2.2:10.2","pp2.2:10.3","pp2.2:10.4","pp2.2:10.5"],"kind":"text","text":{"pi":"Katamo ca puggalo anottappī?\nTattha katamaṁ anottappaṁ?\nYaṁ na ottappati ottappitabbena na ottappati pāpakānaṁ akusalānaṁ dhammānaṁ samāpattiyā—\nidaṁ vuccati anottappaṁ.\nIminā anottappena samannāgato puggalo “anottappī”."}},{"id":"pp2.2:11","sourceIds":["pp2.2:11.1","pp2.2:11.2","pp2.2:11.3","pp2.2:11.4","pp2.2:11.5"],"kind":"text","text":{"pi":"Katamo ca puggalo dubbaco?\nTattha katamā dovacassatā?\nSahadhammike vuccamāne dovacassāyaṁ dovacassiyaṁ dovacassatā vippaṭikulaggāhitā vipaccanīkasātatā anādariyaṁ anādariyatā agāravatā appatissavatā—\nayaṁ vuccati dovacassatā.\nImāya dovacassatāya samannāgato puggalo “dubbaco”."}},{"id":"pp2.2:12","sourceIds":["pp2.2:12.1","pp2.2:12.2","pp2.2:12.3","pp2.2:12.4","pp2.2:12.5"],"kind":"text","text":{"pi":"Katamo ca puggalo pāpamitto?\nTattha katamā pāpamittatā?\nYe te puggalā assaddhā dussīlā appassutā maccharino duppaññā, yā tesaṁ sevanā nisevanā saṁsevanā bhajanā sambhajanā bhatti sambhatti sampavaṅkatā—\nayaṁ vuccati pāpamittatā.\nImāya pāpamittatāya samannāgato puggalo “pāpamitto”."}},{"id":"pp2.2:13","sourceIds":["pp2.2:13.1","pp2.2:13.2","pp2.2:13.3","pp2.2:13.4","pp2.2:13.5","pp2.2:13.6","pp2.2:13.7","pp2.2:13.8","pp2.2:13.9","pp2.2:13.10","pp2.2:13.11","pp2.2:13.12","pp2.2:13.13"],"kind":"text","text":{"pi":"Katamo ca puggalo indriyesu aguttadvāro?\nTattha katamā indriyesu aguttadvāratā?\nIdhekacco puggalo cakkhunā rūpaṁ disvā nimittaggāhī hoti anubyañjanaggāhī;\nyatvādhikaraṇamenaṁ cakkhundriyaṁ asaṁvutaṁ viharantaṁ abhijjhādomanassā pāpakā akusalā dhammā anvāssaveyyuṁ, tassa saṁvarāya na paṭipajjati, na rakkhati cakkhundriyaṁ, cakkhundriye na saṁvaraṁ āpajjati.\nSotena saddaṁ sutvā …pe…\nghānena gandhaṁ ghāyitvā …pe…\njivhāya rasaṁ sāyitvā …pe…\nkāyena phoṭṭhabbaṁ phusitvā …pe…\nmanasā dhammaṁ viññāya nimittaggāhī hoti anubyañjanaggāhī;\nyatvādhikaraṇamenaṁ manindriyaṁ asaṁvutaṁ viharantaṁ abhijjhādomanassā pāpakā akusalā dhammā anvāssaveyyuṁ, tassa saṁvarāya na paṭipajjati, na rakkhati manindriyaṁ, manindriye na saṁvaraṁ āpajjati.\nYā imesaṁ channaṁ indriyānaṁ agutti agopanā anārakkho asaṁvaro—\nayaṁ vuccati indriyesu aguttadvāratā.\nImāya indriyesu aguttadvāratāya samannāgato puggalo “indriyesu aguttadvāro”."}},{"id":"pp2.2:14","sourceIds":["pp2.2:14.1","pp2.2:14.2","pp2.2:14.3","pp2.2:14.4","pp2.2:14.5"],"kind":"text","text":{"pi":"Katamo ca puggalo bhojane amattaññū?\nTattha katamā bhojane amattaññutā?\nIdhekacco puggalo appaṭisaṅkhā ayoniso āhāraṁ āhāreti davāya madāya maṇḍanāya vibhūsanāya, yā tattha asantuṭṭhitā amattaññutā appaṭisaṅkhā bhojane—\nayaṁ vuccati bhojane amattaññutā.\nImāya bhojane amattaññutāya samannāgato puggalo “bhojane amattaññū”."}},{"id":"pp2.2:15","sourceIds":["pp2.2:15.1","pp2.2:15.2","pp2.2:15.3","pp2.2:15.4","pp2.2:15.5"],"kind":"text","text":{"pi":"Katamo ca puggalo muṭṭhassati?\nTattha katamaṁ muṭṭhassaccaṁ?\nYā assati ananussati appaṭissati assati assaraṇatā adhāraṇatā pilāpanatā sammussanatā—\nidaṁ vuccati muṭṭhassaccaṁ.\nIminā muṭṭhassaccena samannāgato puggalo “muṭṭhassati”."}},{"id":"pp2.2:16","sourceIds":["pp2.2:16.1","pp2.2:16.2","pp2.2:16.3","pp2.2:16.4","pp2.2:16.5"],"kind":"text","text":{"pi":"Katamo ca puggalo asampajāno?\nTattha katamaṁ asampajaññaṁ?\nYaṁ aññāṇaṁ adassanaṁ anabhisamayo ananubodho asambodho appaṭivedho asaṅgāhaṇā apariyogāhaṇā asamapekkhaṇā apaccavekkhaṇā apaccakkhakammaṁ dummejjhaṁ bālyaṁ asampajaññaṁ moho pamoho sammoho avijjā avijjogho avijjāyogo avijjānusayo avijjāpariyuṭṭhānaṁ avijjālaṅgī moho akusalamūlaṁ—\nidaṁ vuccati asampajaññaṁ.\nIminā asampajaññena samannāgato puggalo “asampajāno”."}},{"id":"pp2.2:17","sourceIds":["pp2.2:17.1","pp2.2:17.2","pp2.2:17.3","pp2.2:17.4","pp2.2:17.5","pp2.2:17.6"],"kind":"text","text":{"pi":"Katamo ca puggalo sīlavipanno?\nTattha katamā sīlavipatti?\nKāyiko vītikkamo vācasiko vītikkamo kāyikavācasiko vītikkamo—\nayaṁ vuccati sīlavipatti.\nSabbampi dussilyaṁ sīlavipatti.\nImāya sīlavipattiyā samannāgato puggalo “sīlavipanno”."}},{"id":"pp2.2:18","sourceIds":["pp2.2:18.1","pp2.2:18.2","pp2.2:18.3","pp2.2:18.4","pp2.2:18.5","pp2.2:18.6"],"kind":"text","text":{"pi":"Katamo ca puggalo diṭṭhivipanno?\nTattha katamā diṭṭhivipatti?\n“Natthi dinnaṁ, natthi yiṭṭhaṁ, natthi hutaṁ, natthi sukatadukkaṭānaṁ kammānaṁ phalaṁ vipāko, natthi ayaṁ loko, natthi paro loko, natthi mātā, natthi pitā, natthi sattā opapātikā, natthi loke samaṇabrāhmaṇā sammaggatā sammāpaṭipannā ye imañca lokaṁ parañca lokaṁ sayaṁ abhiññā sacchikatvā pavedentī”ti.\nYā evarūpā diṭṭhi diṭṭhigataṁ diṭṭhigahanaṁ diṭṭhikantāro diṭṭhivisūkāyikaṁ diṭṭhivipphanditaṁ diṭṭhisaṁyojanaṁ gāho paṭiggāho abhiniveso parāmāso kummaggo micchāpatho micchattaṁ titthāyatanaṁ vipariyāsaggāho, ayaṁ vuccati diṭṭhivipatti.\nSabbāpi micchādiṭṭhi diṭṭhivipatti.\nImāya diṭṭhivipattiyā samannāgato puggalo “diṭṭhivipanno”."}},{"id":"pp2.2:19","sourceIds":["pp2.2:19.1","pp2.2:19.2","pp2.2:19.3"],"kind":"text","text":{"pi":"Katamo ca puggalo ajjhattasaṁyojano?\nYassa puggalassa pañcorambhāgiyāni saṁyojanāni appahīnāni—\nayaṁ vuccati puggalo “ajjhattasaṁyojano”."}},{"id":"pp2.2:20","sourceIds":["pp2.2:20.1","pp2.2:20.2","pp2.2:20.3"],"kind":"text","text":{"pi":"Katamo ca puggalo bahiddhāsaṁyojano?\nYassa puggalassa pañcuddhambhāgiyāni saṁyojanāni appahīnāni—\nayaṁ vuccati puggalo “bahiddhāsaṁyojano”."}},{"id":"pp2.2:21","sourceIds":["pp2.2:21.1","pp2.2:21.2","pp2.2:21.3","pp2.2:21.4","pp2.2:21.5","pp2.2:21.6"],"kind":"text","text":{"pi":"Katamo ca puggalo akkodhano?\nTattha katamo kodho?\nYo kodho kujjhanā kujjhitattaṁ doso dussanā dussitattaṁ byāpatti byāpajjanā byāpajjitattaṁ virodho paṭivirodho caṇḍikkaṁ asuropo anattamanatā cittassa—\nayaṁ vuccati kodho.\nYassa puggalassa ayaṁ kodho pahīno—\nayaṁ vuccati puggalo “akkodhano”."}},{"id":"pp2.2:22","sourceIds":["pp2.2:22.1","pp2.2:22.2","pp2.2:22.3","pp2.2:22.4","pp2.2:22.5","pp2.2:22.6"],"kind":"text","text":{"pi":"Katamo ca puggalo anupanāhī?\nTattha katamo upanāho?\nPubbakālaṁ kodho aparakālaṁ upanāho yo evarūpo upanāho upanayhanā upanayhitattaṁ aṭṭhapanā ṭhapanā saṇṭhapanā anusaṁsandanā anuppabandhanā daḷhīkammaṁ kodhassa—\nayaṁ vuccati upanāho.\nYassa puggalassa ayaṁ upanāho pahīno—\nayaṁ vuccati puggalo “anupanāhī”."}},{"id":"pp2.2:23","sourceIds":["pp2.2:23.1","pp2.2:23.2","pp2.2:23.3","pp2.2:23.4","pp2.2:23.5","pp2.2:23.6"],"kind":"text","text":{"pi":"Katamo ca puggalo amakkhī?\nTattha katamo makkho?\nYo makkho makkhāyanā makkhāyitattaṁ niṭṭhuriyaṁ niṭṭhuriyakammaṁ—\nayaṁ vuccati makkho.\nYassa puggalassa ayaṁ makkho pahīno—\nayaṁ vuccati puggalo “amakkhī”."}},{"id":"pp2.2:24","sourceIds":["pp2.2:24.1","pp2.2:24.2","pp2.2:24.3","pp2.2:24.4","pp2.2:24.5","pp2.2:24.6"],"kind":"text","text":{"pi":"Katamo ca puggalo apaḷāsī?\nTattha katamo paḷāso?\nYo paḷāso paḷāsāyanā paḷāsāyitattaṁ paḷāsāhāro vivādaṭṭhānaṁ yugaggāho appaṭinissaggo—\nayaṁ vuccati paḷāso.\nYassa puggalassa ayaṁ paḷāso pahīno—\nayaṁ vuccati puggalo “apaḷāsī”."}},{"id":"pp2.2:25","sourceIds":["pp2.2:25.1","pp2.2:25.2","pp2.2:25.3","pp2.2:25.4","pp2.2:25.5","pp2.2:25.6"],"kind":"text","text":{"pi":"Katamo ca puggalo anissukī?\nTattha katamā issā?\nYā paralābhasakkāragarukāramānanavandanapūjanāsu issā issāyanā issāyitattaṁ usūyā usūyanā usūyitattaṁ—\nayaṁ vuccati issā.\nYassa puggalassa ayaṁ issā pahīnā—\nayaṁ vuccati puggalo “anissukī”."}},{"id":"pp2.2:26","sourceIds":["pp2.2:26.1","pp2.2:26.2","pp2.2:26.3","pp2.2:26.4","pp2.2:26.5","pp2.2:26.6","pp2.2:26.7","pp2.2:26.8"],"kind":"text","text":{"pi":"Katamo ca puggalo amaccharī?\nTattha katamaṁ macchariyaṁ?\nPañca macchariyāni—\nāvāsamacchariyaṁ, kulamacchariyaṁ, lābhamacchariyaṁ, vaṇṇamacchariyaṁ, dhammamacchariyaṁ.\nYaṁ evarūpaṁ maccheraṁ maccharāyanā maccharāyitattaṁ vevicchaṁ kadariyaṁ kaṭukañcukatā aggahitattaṁ cittassa—\nidaṁ vuccati macchariyaṁ.\nYassa puggalassa idaṁ macchariyaṁ pahīnaṁ—\nayaṁ vuccati puggalo “amaccharī”."}},{"id":"pp2.2:27","sourceIds":["pp2.2:27.1","pp2.2:27.2","pp2.2:27.3","pp2.2:27.4","pp2.2:27.5","pp2.2:27.6","pp2.2:27.7"],"kind":"text","text":{"pi":"Katamo ca puggalo asaṭho?\nTattha katamaṁ sāṭheyyaṁ?\nIdhekacco saṭho hoti parisaṭho.\nYaṁ tattha saṭhaṁ saṭhatā sāṭheyyaṁ kakkaratā kakkariyaṁ parikkhattatā pārikkhattiyaṁ—\nidaṁ vuccati sāṭheyyaṁ.\nYassa puggalassa idaṁ sāṭheyyaṁ pahīnaṁ—\nayaṁ vuccati puggalo “asaṭho”."}},{"id":"pp2.2:28","sourceIds":["pp2.2:28.1","pp2.2:28.2","pp2.2:28.3","pp2.2:28.4","pp2.2:28.5","pp2.2:28.6","pp2.2:28.7","pp2.2:28.8"],"kind":"text","text":{"pi":"Katamo ca puggalo amāyāvī?\nTattha katamā māyā?\nIdhekacco puggalo kāyena duccaritaṁ caritvā vācāya duccaritaṁ caritvā manasā duccaritaṁ caritvā tassa paṭicchādanahetu pāpikaṁ icchaṁ paṇidahati—\n“mā maṁ jaññā”ti icchati, “mā maṁ jaññā”ti saṅkappati, “mā maṁ jaññā”ti vācaṁ bhāsati, “mā maṁ jaññā”ti kāyena parakkamati.\nYā evarūpā māyā māyāvitā accāsarā vañcanā nikati vikiraṇā pariharaṇā gūhanā parigūhanā chādanā paṭicchādanā anuttānīkammaṁ anāvikammaṁ vocchādanā pāpakiriyā—\nayaṁ vuccati māyā.\nYassa puggalassa ayaṁ māyā pahīnā—\nayaṁ vuccati puggalo “amāyāvī”."}},{"id":"pp2.2:29","sourceIds":["pp2.2:29.1","pp2.2:29.2","pp2.2:29.3","pp2.2:29.4","pp2.2:29.5"],"kind":"text","text":{"pi":"Katamo ca puggalo hirimā?\nTattha katamā hirī?\nYaṁ hirīyati hiriyitabbena hirīyati pāpakānaṁ akusalānaṁ dhammānaṁ samāpattiyā—\nayaṁ vuccati hirī.\nImāya hiriyā samannāgato puggalo “hirimā”."}},{"id":"pp2.2:30","sourceIds":["pp2.2:30.1","pp2.2:30.2","pp2.2:30.3","pp2.2:30.4","pp2.2:30.5"],"kind":"text","text":{"pi":"Katamo ca puggalo ottappī?\nTattha katamaṁ ottappaṁ?\nYaṁ ottappati ottappitabbena ottappati pāpakānaṁ akusalānaṁ dhammānaṁ samāpattiyā—\nidaṁ vuccati ottappaṁ.\nIminā ottappena samannāgato puggalo “ottappī”."}},{"id":"pp2.2:31","sourceIds":["pp2.2:31.1","pp2.2:31.2","pp2.2:31.3","pp2.2:31.4","pp2.2:31.5"],"kind":"text","text":{"pi":"Katamo ca puggalo suvaco?\nTattha katamā sovacassatā?\nSahadhammike vuccamāne sovacassāyaṁ sovacassiyaṁ sovacassatā avippaṭikulaggāhitā avipaccanīkasātatā sādariyaṁ sādariyatā sagāravatā sappatissavatā—\nayaṁ vuccati sovacassatā.\nImāya sovacassatāya samannāgato puggalo “suvaco”."}},{"id":"pp2.2:32","sourceIds":["pp2.2:32.1","pp2.2:32.2","pp2.2:32.3","pp2.2:32.4","pp2.2:32.5"],"kind":"text","text":{"pi":"Katamo ca puggalo kalyāṇamitto?\nTattha katamā kalyāṇamittatā?\nYe te puggalā saddhā sīlavanto bahussutā cāgavanto paññavanto, yā tesaṁ sevanā nisevanā saṁsevanā bhajanā sambhajanā bhatti sambhatti sampavaṅkatā—\nayaṁ vuccati kalyāṇamittatā.\nImāya kalyāṇamittatāya samannāgato puggalo “kalyāṇamitto”."}},{"id":"pp2.2:33","sourceIds":["pp2.2:33.1","pp2.2:33.2","pp2.2:33.3","pp2.2:33.4","pp2.2:33.5","pp2.2:33.6","pp2.2:33.7","pp2.2:33.8","pp2.2:33.9","pp2.2:33.10","pp2.2:33.11","pp2.2:33.12","pp2.2:33.13"],"kind":"text","text":{"pi":"Katamo ca puggalo indriyesu guttadvāro?\nTattha katamā indriyesu guttadvāratā?\nIdhekacco puggalo cakkhunā rūpaṁ disvā na nimittaggāhī hoti nānubyañjanaggāhī;\nyatvādhikaraṇamenaṁ cakkhundriyaṁ asaṁvutaṁ viharantaṁ abhijjhādomanassā pāpakā akusalā dhammā anvāssaveyyuṁ, tassa saṁvarāya paṭipajjati, rakkhati cakkhundriyaṁ cakkhundriye saṁvaraṁ āpajjati.\nSotena saddaṁ sutvā …pe…\nghānena gandhaṁ ghāyitvā …pe…\njivhāya rasaṁ sāyitvā …pe…\nkāyena phoṭṭhabbaṁ phusitvā …pe…\nmanasā dhammaṁ viññāya na nimittaggāhī hoti nānubyañjanaggāhī;\nyatvādhikaraṇamenaṁ manindriyaṁ asaṁvutaṁ viharantaṁ abhijjhādomanassā pāpakā akusalā dhammā anvāssaveyyuṁ, tassa saṁvarāya paṭipajjati, rakkhati manindriyaṁ, manindriye saṁvaraṁ āpajjati.\nYā imesaṁ channaṁ indriyānaṁ gutti gopanā ārakkho saṁvaro—\nayaṁ vuccati indriyesu guttadvāratā.\nImāya indriyesu guttadvāratāya samannāgato puggalo “indriyesu guttadvāro”."}},{"id":"pp2.2:34","sourceIds":["pp2.2:34.1","pp2.2:34.2","pp2.2:34.3","pp2.2:34.4","pp2.2:34.5","pp2.2:34.6","pp2.2:34.7","pp2.2:34.8","pp2.2:34.9"],"kind":"text","text":{"pi":"Katamo ca puggalo bhojane mattaññū?\nTattha katamā bhojane mattaññutā?\nIdhekacco puggalo paṭisaṅkhā yoniso āhāraṁ āhāreti—\n“neva davāya, na madāya, na maṇḍanāya, na vibhūsanāya;\nyāvadeva imassa kāyassa ṭhitiyā yāpanāya vihiṁsūparatiyā brahmacariyānuggahāya.\nIti purāṇañca vedanaṁ paṭihaṅkhāmi, navañca vedanaṁ na uppādessāmi, yātrā ca me bhavissati anavajjatā ca phāsuvihāro cā”ti.\nYā tattha santuṭṭhitā mattaññutā paṭisaṅkhā bhojane—\nayaṁ vuccati bhojane mattaññutā.\nImāya bhojane mattaññutāya samannāgato puggalo “bhojane mattaññū”."}},{"id":"pp2.2:35","sourceIds":["pp2.2:35.1","pp2.2:35.2","pp2.2:35.3","pp2.2:35.4","pp2.2:35.5"],"kind":"text","text":{"pi":"Katamo ca puggalo upaṭṭhitassati?\nTattha katamā sati?\nYā sati anussati paṭissati sati saraṇatā dhāraṇatā apilāpanatā asammussanatā sati satindriyaṁ satibalaṁ sammāsati—\nayaṁ vuccati sati.\nImāya satiyā samannāgato puggalo “upaṭṭhitassati”."}},{"id":"pp2.2:36","sourceIds":["pp2.2:36.1","pp2.2:36.2","pp2.2:36.3","pp2.2:36.4","pp2.2:36.5"],"kind":"text","text":{"pi":"Katamo ca puggalo sampajāno?\nTattha katamaṁ sampajaññaṁ?\nYā paññā pajānanā vicayo pavicayo dhammavicayo sallakkhaṇā upalakkhaṇā paccupalakkhaṇā paṇḍiccaṁ kosallaṁ nepuññaṁ vebhabyā cintā upaparikkhā bhūrī medhā pariṇāyikā vipassanā sampajaññaṁ patodo paññā paññindriyaṁ paññābalaṁ paññāsatthaṁ paññāpāsādo paññāāloko paññāobhāso paññāpajjoto paññāratanaṁ amoho dhammavicayo sammādiṭṭhi—\nidaṁ vuccati sampajaññaṁ.\nIminā sampajaññena samannāgato puggalo “sampajāno”."}},{"id":"pp2.2:37","sourceIds":["pp2.2:37.1","pp2.2:37.2","pp2.2:37.3","pp2.2:37.4","pp2.2:37.5","pp2.2:37.6"],"kind":"text","text":{"pi":"Katamo ca puggalo sīlasampanno?\nTattha katamā sīlasampadā?\nKāyiko avītikkamo vācasiko avītikkamo kāyikavācasiko avītikkamo—\nayaṁ vuccati sīlasampadā.\nSabbopi sīlasaṁvaro sīlasampadā.\nImāya sīlasampadāya samannāgato puggalo “sīlasampanno”."}},{"id":"pp2.2:38","sourceIds":["pp2.2:38.1","pp2.2:38.2","pp2.2:38.3","pp2.2:38.4","pp2.2:38.5","pp2.2:38.6","pp2.2:38.7"],"kind":"text","text":{"pi":"Katamo ca puggalo diṭṭhisampanno?\nTattha katamā diṭṭhisampadā?\n“Atthi dinnaṁ, atthi yiṭṭhaṁ, atthi hutaṁ, atthi sukatadukkaṭānaṁ kammānaṁ phalaṁ vipāko, atthi ayaṁ loko, atthi paro loko, atthi mātā, atthi pitā, atthi sattā opapātikā, atthi loke samaṇabrāhmaṇā sammaggatā sammāpaṭipannā ye imañca lokaṁ parañca lokaṁ sayaṁ abhiññā sacchikatvā pavedentī”ti.\nYā evarūpā paññā pajānanā …pe… amoho dhammavicayo sammādiṭṭhi—\nayaṁ vuccati diṭṭhisampadā.\nSabbāpi sammādiṭṭhi diṭṭhisampadā.\nImāya diṭṭhisampadāya samannāgato puggalo “diṭṭhisampanno”."}},{"id":"pp2.2:39","sourceIds":["pp2.2:39.1","pp2.2:39.2","pp2.2:39.3"],"kind":"text","text":{"pi":"Katame dve puggalā dullabhā lokasmiṁ?\nYo ca pubbakārī, yo ca kataññū katavedī—\nime dve puggalā dullabhā lokasmiṁ."}},{"id":"pp2.2:40","sourceIds":["pp2.2:40.1","pp2.2:40.2","pp2.2:40.3"],"kind":"text","text":{"pi":"Katame dve puggalā duttappayā?\nYo ca laddhaṁ laddhaṁ nikkhipati, yo ca laddhaṁ laddhaṁ vissajjeti—\nime dve puggalā “duttappayā”."}},{"id":"pp2.2:41","sourceIds":["pp2.2:41.1","pp2.2:41.2","pp2.2:41.3"],"kind":"text","text":{"pi":"Katame dve puggalā sutappayā?\nYo ca laddhaṁ laddhaṁ na nikkhipati, yo ca laddhaṁ laddhaṁ na vissajjeti—\nime dve puggalā “sutappayā”."}},{"id":"pp2.2:42","sourceIds":["pp2.2:42.1","pp2.2:42.2","pp2.2:42.3"],"kind":"text","text":{"pi":"Katamesaṁ dvinnaṁ puggalānaṁ āsavā vaḍḍhanti?\nYo ca na kukkuccāyitabbaṁ kukkuccāyati, yo ca kukkuccāyitabbaṁ na kukkuccāyati—\nimesaṁ dvinnaṁ puggalānaṁ āsavā vaḍḍhanti."}},{"id":"pp2.2:43","sourceIds":["pp2.2:43.1","pp2.2:43.2","pp2.2:43.3"],"kind":"text","text":{"pi":"Katamesaṁ dvinnaṁ puggalānaṁ āsavā na vaḍḍhanti?\nYo ca na kukkuccāyitabbaṁ na kukkuccāyati, yo ca kukkuccāyitabbaṁ kukkuccāyati—\nimesaṁ dvinnaṁ puggalānaṁ āsavā na vaḍḍhanti."}},{"id":"pp2.2:44","sourceIds":["pp2.2:44.1","pp2.2:44.2","pp2.2:44.3"],"kind":"text","text":{"pi":"Katamo ca puggalo hīnādhimutto?\nIdhekacco puggalo dussīlo hoti pāpadhammo, so aññaṁ dussīlaṁ pāpadhammaṁ sevati bhajati payirupāsati—\nayaṁ vuccati puggalo “hīnādhimutto”."}},{"id":"pp2.2:45","sourceIds":["pp2.2:45.1","pp2.2:45.2","pp2.2:45.3"],"kind":"text","text":{"pi":"Katamo ca puggalo paṇītādhimutto?\nIdhekacco puggalo sīlavā hoti kalyāṇadhammo, so aññaṁ sīlavantaṁ kalyāṇadhammaṁ sevati bhajati payirupāsati—\nayaṁ vuccati puggalo “paṇītādhimutto”."}},{"id":"pp2.2:46","sourceIds":["pp2.2:46.1","pp2.2:46.2","pp2.2:46.3"],"kind":"text","text":{"pi":"Katamo ca puggalo titto?\nPaccekasambuddhā ye ca tathāgatassa sāvakā arahanto tittā.\nSammāsambuddho titto ca tappetā ca."}},{"id":"pp2.2:47","sourceIds":["pp2.2:47.1"],"kind":"text","text":{"pi":"Dukaniddeso."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/pp2.2/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}